ശബരിമല: ശബരിമല തീർഥാടന നടത്തിപ്പിൽ വിപ്ലവകരമായ മാറ്റങ്ങൾക്കൊരുങ്ങി തിരുവിതാംകൂർ ദേവസ്വം ബോർഡ്. തീർഥാടകർക്ക് സുഗമമായ ദർശനം ഉറപ്പാക്കുന്നതിനായി ഐ.ടി അധിഷ്ഠിത സേവനങ്ങളും ആധുനിക സൗകര്യങ്ങളും നടപ്പിലാക്കാൻ ബോർഡ് ‘വിഷൻ-സമീപനരേഖ’യിൽ ചർച്ച തുടങ്ങി.
പ്രധാന മാറ്റങ്ങൾ ഒറ്റനോട്ടത്തിൽ:
ഡിജിറ്റൽ ഡിസ്പ്ലേ ബോർഡുകൾ: സന്നിധാനത്തെ തിരക്ക്, ക്യൂവിന്റെ നീളം, വിവിധ സ്ഥലങ്ങളിലേക്കുള്ള ദൂരം എന്നിവ തത്സമയം അറിയാൻ പ്രധാന ഇടങ്ങളിൽ ഡിജിറ്റൽ ബോർഡുകൾ സ്ഥാപിക്കും.
അരവണ പ്രീ-ബുക്കിങ്: തിരക്ക് കുറയ്ക്കുന്നതിനായി അരവണപ്പായസം മുൻകൂട്ടി ബുക്ക് ചെയ്യാനുള്ള സൗകര്യം ഏർപ്പെടുത്തും. കൂടാതെ സന്നിധാനത്തെ എല്ലാ മുറികൾക്കും ഓൺലൈൻ ബുക്കിങ് നിർബന്ധമാക്കും.
അഞ്ചു ഭാഷകളിൽ അറിയിപ്പുകൾ: മലയാളം, തമിഴ്, തെലുങ്ക്, കന്നഡ, ഇംഗ്ലീഷ് ഭാഷകളിൽ (ആവശ്യമെങ്കിൽ ഹിന്ദിയിലും) അറിയിപ്പുകളും ബോർഡുകളും സ്ഥാപിക്കും.
പ്രത്യേക ബജറ്റ്: തീർഥാടനത്തിന് മാത്രമായി പ്രത്യേക ബജറ്റ് തയ്യാറാക്കുമെന്ന് ബോർഡ് പ്രസിഡന്റ് കെ. ജയകുമാർ അറിയിച്ചു.
ശുചിത്വവും സുരക്ഷയും:
മാലിന്യ നിർമ്മാർജ്ജനത്തിന് മൂന്ന് നിറത്തിലുള്ള ബിന്നുകൾ സ്ഥാപിക്കും. നിലയ്ക്കലിലും പമ്പയിലും സ്വീവേജ് ട്രീറ്റ്മെന്റ് പ്ലാന്റുകൾ സജ്ജമാക്കും. ശുചീകരണത്തിനായി യന്ത്രവത്കൃത സംവിധാനങ്ങൾ ഏർപ്പെടുത്തുന്നതിനെക്കുറിച്ചും ആലോചനയുണ്ട്. കാത്തുനിൽക്കുന്ന തീർഥാടകർക്ക് ഭക്ഷണവും കുടിവെള്ളവും ഉറപ്പാക്കുന്നതിനൊപ്പം, ഭക്ഷണശാലകളിൽ കർശനമായ ഭക്ഷ്യസുരക്ഷാ പരിശോധനകളും നടത്തും.
