📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 26 | വ്യാഴം ✍ കപിൽ ശങ്കർ

🔹പത്ത് വർഷത്തെ അനുഭവം വാഗ്ദാനങ്ങളുടെ രാഷ്ട്രീയമല്ല, പൂർത്തിയാക്കിയ വികസനത്തിൻ്റെ യാഥാർത്ഥ്യമെന്ന് മുഖ്യമന്ത്രി പിണറായി വിജയൻ. ഭരണ തുടർച്ചയുടെ ഫലം നാട് അനുഭവിച്ചു. കൊച്ചിയിൽ ഉൾപ്പെടെ സമഗ്ര വികസനം യാഥാർത്ഥ്യമായി എന്നും മുഖ്യമന്ത്രി എറണാകുളത്ത് മാധ്യമങ്ങളോട് പറഞ്ഞു.

🔹സംസ്ഥാനത്ത് നിയമസഭ തെരഞ്ഞെടുപ്പിന്‍റെ ആദ്യഘട്ട പ്രചാരണത്തിന്‍റെ ഭാഗമായി പ്രധാനമന്ത്രി നരേന്ദ്രമോദി ഞായറാഴ്ച കേരളത്തിലെത്തും. പാലക്കാട്-തൃശൂർ ജില്ലകളിലായി പ്രധാനമന്ത്രി രണ്ട് പരിപാടികളിൽ പങ്കെടുക്കും.ആദ്യഘട്ട പ്രചാരണത്തിന്‍റെ ഭാഗമായെത്തുന്ന പ്രധാനമന്ത്രി ഉച്ചയ്ക്ക് രണ്ടോടെ പാലക്കാട് നടക്കുന്ന എൻഡിഎ പൊതുസമ്മേളനത്തിലാണ് ആദ്യം പങ്കെടുക്കുക. തുടർന്ന് വൈകിട്ട് നാലോടെ തൃശൂർ സ്വരാജ് റൗണ്ടിലെ റോഡ് ഷോയിലും പങ്കെടുക്കും.ഏപ്രിൽ മൂന്നിന് രണ്ടാംഘട്ട തെരഞ്ഞെടുപ്പ് പ്രചാരണത്തിനായും പ്രധാനമന്ത്രിയെത്തുമെന്ന് ബിജെപി സംസ്ഥാന ജനറൽ സെക്രട്ടറി എം.ടി. രമേശ് പത്രസമ്മേളനത്തിൽ പറഞ്ഞു. രണ്ടാംഘട്ടത്തിൽ തിരുവനന്തപുരത്തും ആലപ്പുഴയിലും പ്രചാരണം നടത്തും.

🔹രാജ്യത്ത് ഊർജ്ജ പ്രതിസന്ധിയില്ലെന്ന് സർവകക്ഷിയോഗത്തിൽ ആവർത്തിച്ച് കേന്ദ്രസർക്കാർ. പശ്ചിമേഷ്യയിലെ സാഹചര്യം വിശദീകരിച്ച സർക്കാർ പ്രവാസികളുടെ സുരക്ഷയ്ക്കാണ് മുൻഗണന എന്നും ഏത് സാഹചര്യവും നേരിടാൻ സജ്ജമാണെന്നും വ്യക്തമാക്കി. വെടി നിർത്തൽ കരാർ നടപ്പിലാക്കാൻ പാകിസ്താന്റെ നേതൃത്വത്തിൽ നടക്കുന്ന ചർച്ചകൾ കേന്ദ്ര സർക്കാരിന് വലിയ ക്ഷീണമാണ് വരുത്തിയത്. അതുകൊണ്ട് തന്നെ പ്രശ്നം പരിഹരിക്കുന്നതിനായി മധ്യസ്ഥത വഹിക്കാന്‍ തല്‍ക്കാലം ഇന്ത്യ ഇല്ലെന്ന സൂചനയാണ് വിദേശകാര്യമന്ത്രി നൽകിയത്.ഒറ്റക്കെട്ടായി മുന്നോട്ട് പോകാനാണ് തീരുമാനം എന്ന് കേന്ദ്രമന്ത്രി കിരൺ റിജജ്ജു പ്രതികരിച്ചപ്പോൾ സർക്കാരിന്‍റെ വിശദീകരണത്തിൽ തൃപ്തരല്ലെന്ന് കോൺഗ്രസ് വ്യക്തമാക്കി. യുദ്ധത്തിനെതിരെ ശക്തമായ നിലപാട് എടുക്കാൻ സർക്കാർ തയ്യാറാകണമന്ന് ജോൺ ബ്രിട്ടാസ് എം പി പ്രതികരിച്ചു. പാർലമെന്റ് സമുച്ചയത്തിൽ പ്രതിരോധമന്ത്രി രാജ്നാഥ് സിംഗിന്റെ അധ്യക്ഷതയിൽ ചേർന്ന സർവകക്ഷിയോഗം ഒന്നേമുക്കാൽ മണിക്കൂറാണ് നീണ്ടത്. എന്നാൽ പ്രധാനമന്ത്രി യോഗത്തിൽ പങ്കെടുക്കാത്തത് വിമർശനത്തിന് കാരണമായി.

🔹രാജ്യത്ത് ഇന്ധന ക്ഷാമം ഇല്ലെന്ന് കേന്ദ്രം ആവർത്തിക്കുമ്പോഴും പശ്ചിമേഷ്യൻ യുദ്ധ പ്രതിസന്ധിയെത്തുടർന്ന് ഇന്ത്യയിലുണ്ടായ പാചകവാതക പ്രതിസന്ധി രൂക്ഷമാവുകയാണ്. ഇന്ത്യയിലേക്കുള്ള പാചകവാതക ഇറക്കുമതി ഏകദേശം പകുതിയോളം കുറഞ്ഞു. പ്രതിസന്ധി മറികടക്കാൻ നിലവിലെ 14.2 കിലോ സിലിണ്ടറുകൾക്ക് പകരം 10 കിലോ സിലിണ്ടറുകൾ താൽക്കാലികമായി വിതരണം ചെയ്യുന്ന ‘റേഷനിംഗ്’ സംവിധാനത്തെക്കുറിച്ച് സർക്കാർ ആലോചിക്കുന്നുണ്ട്. ഗൾഫ് രാജ്യങ്ങളിൽ നിന്നുള്ള വിതരണം കുറഞ്ഞതോടെ അർജന്റീന, അർമീനിയ എന്നിവിടങ്ങളിൽ നിന്ന് കൂടുതൽ പാചകവാതകം എത്തിക്കാൻ ഇന്ത്യ ശ്രമം തുടങ്ങിക്കഴിഞ്ഞു. അതേസമയം, ഹോട്ടലുകൾ ഭക്ഷണബില്ലിൽ അധിക ‘ഗ്യാസ് ചാർജ്’ ഈടാക്കുന്നതിനെതിരെ കർശന നടപടിയുണ്ടാകുമെന്ന് അധികൃതർ മുന്നറിയിപ്പ് നൽകിയിട്ടുണ്ട്.

🔹സ്ത്രീധന നിരോധന നിയമം ഭേദഗതി ചെയ്യണമെന്ന കേരള നിയമ പരിഷ്‌കരണ കമ്മീഷന്‍ ശിപാര്‍ശയില്‍ സംസ്ഥാനസര്‍ക്കാര്‍ നിലപാട് അറിയിക്കണമെന്നു ഹൈക്കോടതി. സ്ത്രീധനം നല്‍കുന്നത് കുറ്റകരമാക്കുന്ന വ്യവസ്ഥ ഒഴിവാക്കിയതടക്കം ശിപാര്‍ശകളില്‍ നിലപാട് വ്യക്തമാക്കി സത്യവാങ്മൂലം നല്‍കാനാണു ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ചിന്‍റെ നിര്‍ദേശം.സ്ത്രീധനം നല്‍കുന്നതും കുറ്റമായി കണക്കാക്കുന്ന സ്ത്രീധന നിരോധന നിയമത്തിലെ മൂന്നാം വകുപ്പ് റദ്ദാക്കണമെന്നാവശ്യപ്പെട്ടു കൊച്ചി സ്വദേശി ടെല്‍മി ജോളി നല്‍കിയ ഹര്‍ജിയാണു കോടതിയുടെ പരിഗണനയിലുള്ളത്. സ്ത്രീധനം നല്‍കുന്നവരെയും കുറ്റക്കാരായി കണക്കാക്കുന്നതിനാല്‍ ഇതുമായി ബന്ധപ്പെട്ട് വധുവിന്‍റെ വീട്ടുകാര്‍ക്ക് പരാതി ഉന്നയിക്കാന്‍ പോലും കഴിയുന്നില്ലെന്നു ചൂണ്ടിക്കാട്ടിയാണ് ഹര്‍ജി.

🔹കാസർഗോഡ് ആദിവാസി കുടുംബത്തിന്‍റെ വീട് ജപ്തി ചെയ്ത് മഹീന്ദ്ര ഫിനാൻസ്. കാസർഗോഡ് മുള്ളംകോട് സ്വദേശി രഘുവിന്‍റെ വീടാണ് വീട്ടുകാർ സ്ഥലത്തില്ലാത്ത സമയത്ത് ജപ്തി ചെയ്തതായി പരാതിയുള്ളത്.മൂന്ന് വർഷം മുൻപ് മഹീന്ദ്ര ഫിനാൻസിൽ നിന്നെടുത്ത മൂന്നര ലക്ഷം രൂപയാണ് രഘു തിരിച്ചടക്കാനുള്ളത്. പണം തിരിച്ചടയ്ക്കാൻ വൈകിയതിനെ തുടർന്നാണ് നടപടി. ജപ്തി നടപടിയുണ്ടായതിനെ തുടർന്ന് കുടുംബം ബുധനാഴ്ച വീടിന്‍റെ വരാന്തയിലാണ് കുടുംബം കഴിഞ്ഞത്.ലൈഫ് ഭവന പദ്ധതിയുടെ ഭാഗമായി ലഭിച്ച വീടാണ് ജപ്തി നടപടി നേരിട്ടത്. വീട് പുതുക്കാനായി എടുത്ത ലോൺ ആണ് നിലവിൽ ആദിവാസി കുടുംബത്തിന് വീട് നഷ്ടമാകുന്നതിലേക്ക് നയിച്ചത്. ജപ്തി നടപടിയെ കുറിച്ച് അറിയിച്ചിരുന്നില്ലയെന്നും കുടുംബം ആരോപിക്കുന്നു. നേരത്തെ രണ്ട് തവണ നോട്ടീസ് പതിച്ചിരുന്നതായും എന്നാൽ നോട്ടീസ് ഇംഗ്ലിഷിൽ ആയിരുന്നതിനാൽ വിഷയം മനസിലായില്ലെന്നും കുടുംബം പറയുന്നു. ജോലി കഴിഞ്ഞ് തിരിച്ചെത്തുമ്പോഴാണ് വീട് ജപ്തി ചെയ്ത വിവരം കുടുംബം അറിയുന്നത്.

🔹ലിംഫോമ അര്‍ബുദം ബാധിച്ച പുത്തന്‍വേലിക്കര സ്വദേശിയായ 64 കാരിയിൽ കാര്‍ ടിസെല്‍ തെറാപ്പി (കിമറിക് ആന്‍റിജന്‍ റിസപ്റ്റര്‍ ടിസെല്‍) വിജയകരമായി നടത്തി ആലുവ രാജഗിരി ആശുപത്രിയിലെ ഡോക്ടർമാർ.ശരീരത്തിലെ രോഗപ്രതിരോധ കോശങ്ങളായ ടിസെല്ലുകളെ രോഗിയില്‍നിന്നും ശേഖരിച്ച് പ്രത്യേക ലബോറട്ടറിയില്‍ വച്ച് ജനിതകമാറ്റം വരുത്തിയശേഷം തിരികെ പ്രവേശിപ്പിക്കുന്ന ചികിത്സാരീതിയാണിത്. ഇത്തരത്തില്‍ മാറ്റം വരുത്തിയ കോശങ്ങള്‍ ശരീരത്തിലെ ആരോഗ്യമുള്ള കോശങ്ങളെ നശിപ്പിക്കാതെ കാന്‍സര്‍ കോശങ്ങളെ മാത്രം കൃത്യമായി കണ്ടെത്തി നശിപ്പിക്കുന്നു.സാധാരണ കീമോതെറാപ്പിയോടു ശരീരം പ്രതികരിക്കാത്ത അവസ്ഥയിലാണ് കാര്‍ ടിസെല്‍ തെറാപ്പിയുടെ സാധ്യതകള്‍ പ്രയോജനപ്പെടുത്തുന്നത്. അത്യാധുനിക അഫറിസിസ് മെഷീന്‍റെ സഹായത്തോടെയാണു രക്തഘടകങ്ങള്‍ വേര്‍തിരിച്ചെടുക്കുന്നത്. ആവശ്യമായ രക്തഘടകം മാത്രം തത്‌സമയം വേര്‍തിരിച്ചെടുത്ത് അവശേഷിക്കുന്നവ അതേസമയംതന്നെ തിരികെ ശരീരത്തിലേക്ക് പ്രവേശിപ്പിക്കുന്നു.രാജഗിരി കാന്‍സര്‍ സെന്‍ററിലെ ക്ലിനിക്കല്‍ ഹെമറ്റോളജി വിഭാഗത്തിലെ ഡോ. റോയ് ജെ. പാലാട്ടി, ഡോ. നിഖില്‍ എം. കുമാര്‍ എന്നിവരാണു ചികിത്സയ്ക്ക് നേതൃത്വം നല്‍കിയത്. ഒറ്റത്തവണ ചികിത്സ എന്നതും പാര്‍ശ്വഫലങ്ങള്‍ കുറവാണെന്നതും ചികിത്സയുടെ നേട്ടമാണെന്ന് ഡോ. റോയ് ജെ. പാലാട്ടി അഭിപ്രായപ്പെട്ടു.മറ്റു ചികിത്സകളെ അപേക്ഷിച്ച് രോഗം തിരികെ വരാനുള്ള സാധ്യതയും ആശുപത്രിവാസവും താരതമ്യേന കുറവാണ്. മുന്‍കാലങ്ങളില്‍ വിദേശ രാജ്യങ്ങളെ ആശ്രയിച്ചിരുന്നതിനാല്‍ അതീവ ചെലവേറിയതായിരുന്ന ഈ ചികിത്സ, ഇപ്പോള്‍ തദ്ദേശീയമായി കാര്‍ ടി സെല്‍ ഇന്ത്യയില്‍ത്തന്നെ വികസിപ്പിക്കാന്‍ കഴിഞ്ഞത് രോഗികള്‍ക്ക് വലിയ ആശ്വാസമാണെന്ന് ഡോ. നിഖില്‍ എം. കുമാര്‍ പറഞ്ഞു. കാന്‍സര്‍ രോഗികള്‍ക്ക് പ്രതീക്ഷ നല്‍കുന്ന നൂതന ചികിത്സാരീതിയായ കാര്‍ ടിസെല്‍ തെറാപ്പിയിൽ തുടര്‍ച്ചയായി വിജയം കൈവരിച്ച ചികിത്സാസംഘത്തെ രാജഗിരി എക്‌സിക്യൂട്ടീവ് ഡയറക്ടര്‍ ഫാ. ജോണ്‍സണ്‍ വാഴപ്പിള്ളി അഭിനന്ദിച്ചു.

🔹പ്രശസ്ത നടനും സംവിധായകനുമായ ഇ എ രാജേന്ദ്രൻ (71)അന്തരിച്ചു. കൊല്ലം പട്ടത്താനത്തെ വസതിയിലായിരുന്നു അന്ത്യം. അസുഖ ബാധിതനായി ഏറെ നാളായി ചിത്സയിലായിരുന്നു. നടനും എംഎൽഎയുമായ എം മുകേഷിൻ്റെ സഹോദരീ ഭർത്താവാണ്. സംസ്കാരം നാളെ സ്വദേശമായ ത്രിശൂർ വാടാനപ്പള്ളി ത്രിത്തല്ലൂർ ഏങ്ങൂർ വീട്ടിൽ നടക്കും. തൃശൂർ ജില്ലയിൽ തൃത്തല്ലൂരിൽ അയ്യപ്പന്റെയും സുമതിയുടെയും മകനായി ഇ എ രാജേന്ദ്രൻ്റെ ജനിച്ചു. തൃത്തല്ലൂർ യു പി സ്കൂളിലെ വിദ്യാഭ്യാസകാലത്ത് തന്നെ സ്കൂൾ സാഹിത്യസമാജവുമായി ബന്ധപ്പെട്ട നാടകാവതരണങ്ങളിൽ സജീവമായി പ്രവർത്തിച്ചിരുന്നു.

🔹കൈതക്കാട്ടെ സ്വകാര്യ മാലിന്യസംസ്കരണ കേന്ദ്രത്തിൽ വൻ തീപിടിത്തം. യു.കെ. കുഞ്ഞബ്ദുള്ളയുടെ ഉടമസ്ഥതയിൽ പ്രവർത്തിക്കുന്ന മഹയൂബ വേസ്റ്റ് മാനേജ്മെന്‍റ് എന്ന സ്ഥാപനത്തിലാണ് ഇന്നലെ ഉച്ചകഴിഞ്ഞ് മൂന്നോടെ തീ പടർന്നുപിടിച്ചത്.പ്ലാസ്റ്റിക്കും തുണിയുമുൾപ്പെടെ സംസ്കരണത്തിനായി സൂക്ഷിച്ച മൂന്നര കോടി രൂപയോളം വിലവരുന്ന സാധനങ്ങളും ഒന്നരക്കോടി രൂപയുടെ യന്ത്രസാമഗ്രികളും കത്തിനശിച്ചു. ഹരിത കർമസേനയിൽ നിന്നുൾപ്പെടെ ശേഖരിക്കുന്ന മാലിന്യങ്ങൾ സംസ്കരിച്ച് കയറ്റി അയയ്ക്കുന്ന സ്ഥാപനമാണ് ഇത്.തൃക്കരിപ്പൂർ, ചീമേനി, കാഞ്ഞങ്ങാട്, പയ്യന്നൂർ, കാസർഗോഡ് അഗ്നിരക്ഷാ നിലയങ്ങളിൽ നിന്നെത്തിയ നാലു യൂണിറ്റുകൾ നാലു മണിക്കൂർ നീണ്ട പ്രയത്നത്തിനൊടുവിലാണ് തീ നിയന്ത്രണവിധേയമാക്കിയത്. തീപിടിച്ച പ്ലാസ്റ്റിക് മാലിന്യങ്ങളിൽനിന്ന് പ്രദേശമാകെ പുകപടലങ്ങൾ നിറഞ്ഞ നിലയിലാണ്.പുക ശ്വസിച്ച് ആരോഗ്യപ്രശ്നങ്ങളുണ്ടാകാൻ സാധ്യതയുള്ളതിനാൽ മാരകരോഗങ്ങൾ ബാധിച്ച് ചികിത്സ തേടുന്നവരും ഗർഭിണികളും കുട്ടികളും പരമാവധി സുരക്ഷിത സ്ഥാനങ്ങളിലേക്ക് മാറി താമസിക്കണമെന്ന് ആരോഗ്യവകുപ്പ് അധികൃതർ അറിയിച്ചു.

🔹വി.ആർ. പുരം റബ്ബർ തോട്ടത്തിനു സമീപം വെച്ച് സ്വകാര്യബസ് നിയന്ത്രണം വിട്ട് വീടിന്‍റെ മതിൽ ഇടിച്ചു തകർത്തു.ഇരിങ്ങാലക്കുടയിൽ നിന്നും ചാലക്കുടിയിലേക്ക് വരികയായിരുന്ന മഹിം മാത ബസാണ് അപകടത്തിൽ പെട്ടത്.ബസിൽ സഞ്ചരിച്ചിരുന്ന വി.ആർ. പുരം ഓമംഗലത്ത് ജിസ്മിയയെ (17) പരിക്കുകളോടെ സെന്‍റ്് ജെയിംസ് ആശൂപത്രിയിൽ പ്രവേശിപ്പിച്ചു.

🔹40 അടി ആഴമുള്ള കിണറ്റിൽ വീണ പശുവിനെ അഗ്നിരക്ഷാ സേനാംഗങ്ങൾ സുരക്ഷിതമായി കരകയറ്റി. വെള്ളരിക്കുണ്ടിലെ ജോൺസൺ കുളിരിപ്പളാക്കലിന്‍റെ രണ്ടു വയസുള്ള പശുവാണ് തൊട്ടടുത്ത പറമ്പിലെ കിണറ്റിൽ അകപ്പെട്ടത്.പശുവിനെ കരയ്ക്കെത്തിക്കാൻ വഴിയൊന്നും കാണാതിരുന്നതോടെ അഗ്നിരക്ഷാസേനയെ വിളിക്കുകയായിരുന്നു. തുടർന്ന് ചീമേനി അഗ്നിരക്ഷാനിലയത്തിൽ നിന്നും സീനിയർ ഫയർ ആൻഡ് റെസ്ക്യൂ ഓഫീസർ പി.വി. സുമേഷിന്‍റെ നേതൃത്വത്തിലെത്തിയ സംഘമാണ് രക്ഷാപ്രവർത്തനം നടത്തിയത്.ഫയർ ആൻഡ് റെസ്ക്യൂ ഓഫീസർ ബിനീഷ് ഡേവിഡ് നേരിട്ടു കിണറ്റിലിറങ്ങിയാണ് പശുവിനെ സുരക്ഷാ സംവിധാനങ്ങളുമായി ബന്ധിപ്പിച്ച് കരകയറ്റിയത്. ഫയർ ആൻഡ് റെസ്ക്യൂ ഓഫീസർമാരായ കെ. ഗോപി, കെ. പ്രിയേഷ്, രോഹിത്, ഹോം ഗാർഡ് ഷിബു എന്നിവരും സംഘത്തിലുണ്ടായിരുന്നു.

🔹വിറക് ശേഖരിക്കാന്‍ പോയ മൂന്നാര്‍ സ്വദേശി വന്യ ജീവി ആക്രമണത്തിൽ കൊല്ലപ്പെട്ടു. നല്ലതണ്ണി കല്ലാര്‍ എസ്‌റ്റേറ്റില്‍ ഫാക്ടറി ഡിവിഷനില്‍ നടരാജ് ആണ് മരണപ്പെട്ടത്. ഇന്നലെ വൈകിട്ടോടെയായിരുന്നു നടരാജിനെ മരിച്ചനിലയിൽ കണ്ടെത്തിയത്. മരിച്ച കല്ലാർ സ്വദേശി നടരാജിൻ്റെ കുടുംബത്തിന് അടിയന്തിര ധനസഹായമായി വനം വകുപ്പ് 5 ലക്ഷം രൂപ നൽകി. ജില്ലാ കളക്ടറുടെ ദുരിതാശ്വാസ നിധിയിൽ നിന്നും നാളെ നടരാജിൻ്റെ കുടുംബത്തിന് 4 ലക്ഷം രൂപയും കൈമാറും.
മൂന്നാര്‍ പഞ്ചായത്തില കല്ലാര്‍ എസ്റ്റേറ്റിലായിരുന്നു ഇന്നലെ ഗൃഹനാഥനെ മരിച്ചനിലയില്‍ കണ്ടെത്തിയത്. കാട്ടാന ആക്രമണത്തിലാണ് നടരാജ് മരണപ്പെട്ടതെന്ന ആരോപണവുമായി പ്രദേശവാസികളും ഗ്രാമ പഞ്ചായത്തംഗങ്ങളും രംഗത്ത് വന്നിരുന്നു. മരിച്ച നടരാജിൻ്റെ മൃതദേഹം ഇന്ന് ഇടുക്കി മെഡിക്കൽ കോളേജിലെത്തിച്ച് പോസ്റ്റുമോർട്ടം നടത്തി. നടരാജിൻ്റെ മരണകാരണം വന്യജീവി ആക്രമണമാണെന്ന് സ്ഥിരീകരിച്ചു. ഇതേ തുടർന്നാണ് വനം വകുപ്പ് നടരാജിൻ്റെ കുടുംബത്തിന് 5 ലക്ഷം രൂപ അടിയന്തിര ധനസഹായം കൈമാറിയത്.വനം വകുപ്പ് ആകെ പത്ത് ലക്ഷം രൂപ നടരാജിൻ്റെ കുടുംബത്തിന് നൽകും. ഇന്ന് നൽകിയ തുകക്ക് പുറമെയുള്ള 5 ലക്ഷം രൂപ വനം വകുപ്പ് മറ്റ് നിയമനടപടികൾ പൂർത്തീകരിച്ച ശേഷമാകും കുടുംബത്തിന് നൽകുക. ഇന്നലെ ഉച്ചയ്ക്ക് രണ്ടിന് നടരാജ് സമീപമുള്ള വനമേഖലയില്‍ വിറക് ശേഖരിക്കാന്‍ പോയിരുന്നു. വൈകീട്ട് ആറ് കഴിഞ്ഞിട്ടും തിരിച്ചെത്താഞ്ഞതിനെത്തുടര്‍ന്ന് ബന്ധുക്കളും എസ്റ്റേറ്റ് തൊഴിലാളികളും വനമേഖലയില്‍ പരിശോധന നടത്തിയപ്പോഴാണ് നടരാജിൻ്റെ മൃതദേഹം കണ്ടെത്തിയത്.

🔹ആന്ധ്രാപ്രദേശിലെ മർകപുരം ജില്ലയിൽ ഒരു സ്വകാര്യ ട്രാവൽ ബസ് ടിപ്പർ ലോറിയുമായി കൂട്ടിയിടിച്ച് തീപിടിച്ച് 12 പേർ മരിച്ചു. അപകടത്തിൽ നിരവധി യാത്രക്കാർക്ക് പൊള്ളലേറ്റതായും പൊലീസ് പറഞ്ഞു. അപകടത്തിന്റെ ആഘാതത്തിൽ ബസിൽ തീ പടരുകയായിരുന്നു. ഇതോടെ യാത്രക്കാർ ബസിൽ കുടുങ്ങി പോകുകയായിരുന്നു. രാവിലെ 6:00 മണിയോടെയാണ് അപകടമുണ്ടായത്. തെലങ്കാനയിലെ നിർമലിൽ നിന്ന് നെല്ലൂരിലേക്ക് പോകുകയായിരുന്ന ഹരികൃഷ്ണ ട്രാവൽസിന്റെ ബസ് അപകടത്തിൽപ്പെട്ടു. കൂട്ടിയിടിയെ തുടർന്ന് ബസിന് തീപിടിക്കുകയും നിരവധി യാത്രക്കാർ ജീവനോടെ വെന്തുമരിക്കുകയും ചെയ്തുവെന്ന് അധികൃതർ പറഞ്ഞു. പരിക്കേറ്റ 20 ഓളം യാത്രക്കാരെ അടുത്തുള്ള ആശുപത്രികളിലേക്ക് മാറ്റിയതായും അവർ ചികിത്സയിലാണെന്നും ജില്ലാ പോലീസ് അധികൃതർ അറിയിച്ചു. മരണസംഖ്യ ഉയരുമെന്ന് ഉദ്യോഗസ്ഥർ ആശങ്ക പ്രകടിപ്പിച്ചു.
അപകടത്തിൽ മുഖ്യമന്ത്രി എൻ ചന്ദ്രബാബു നായിഡു ഞെട്ടൽ രേഖപ്പെടുത്തി. നിരവധി യാത്രക്കാർ അപകടത്തിൽ ജീവനോടെ പൊള്ളലേറ്റതായുള്ള റിപ്പോർട്ടുകളിൽ അദ്ദേഹം ദുഃഖം രേഖപ്പെടുത്തി. പരിക്കേറ്റവർക്ക് നൽകുന്ന വൈദ്യചികിത്സ ഉൾപ്പെടെ മുഖ്യമന്ത്രി ഉദ്യോഗസ്ഥരുമായി സംസാരിക്കുകയും സ്ഥിതിഗതികൾ അവലോകനം ചെയ്യുകയും ചെയ്തു. അപകടത്തിന്റെ കാരണങ്ങളെക്കുറിച്ച് സമഗ്രമായ അന്വേഷണം നടത്തി വിശദമായ റിപ്പോർട്ട് സമർപ്പിക്കാൻ അദ്ദേഹം ഉദ്യോഗസ്ഥരോട് നിർദ്ദേശിച്ചു.

🔹പ്രായപൂർത്തിയാകാത്ത പെൺകുട്ടികളെ പിഡീപ്പിച്ച കേസിൽ ഗോവയിൽ അറസ്റ്റിലായ ബിജെപി നേതാവിന്‍റെ മകനെതിരെ മൊഴി നൽകി മൂന്ന് പേർ. കുർചോറം കക്കോറ മുനിസിപ്പൽ കൗൺസിലർ സുസാന്ത് നായിക്കിന്‍റെ മകൻ സോഹം നായിക്കാണ് (20) അറസ്റ്റിലായത്.കഴിഞ്ഞ മൂന്നു വർഷത്തിനിടെ ഏകദേശം 25–30 പെൺകുട്ടികളെ ഇയാൾ ലൈംഗീകമായി ദുരുപയോഗം ചെയ്തെന്നാണ് പരാതി. പെൺകുട്ടികളെ ചൂഷണം ചെയ്യുന്ന ദൃശ്യങ്ങൾ പകർത്തി ഭീഷണിപ്പെടുത്തിയെന്നും ആരോപണമുണ്ട്. യുവാവ് തന്‍റെ സുഹൃത്തുക്കൾക്കൊപ്പമിരിക്കുമ്പോൾ ഈ കാര്യങ്ങൾ അവരോട് പറയുകയും വീഡിയോകൾ കാണിക്കുകയും ചെയ്തു. പിന്നാലെയാണ് സംഭവം പുറത്തറിയുന്നത്. ഞായറാഴ്ച രാത്രി പോലീസ് സ്റ്റേഷന് പുറത്ത് തടിച്ചുകൂടിയ പ്രതിഷേധക്കാർ, പോലീസ് സ്വമേധയ കേസെടുക്കണമെന്നും നിഷ്പക്ഷ അന്വേഷണം നടത്തണമെന്നും ആവശ്യപ്പെട്ടിരുന്നു. സോഹത്തിനെതിരെ പോക്സോ നിയമപ്രകാരം കേസെടുത്തിട്ടുണ്ട്. യുവാവിനെതിരെ കനത്ത പ്രതിഷേധമാണ് ഉയർന്നത്.

🔹സൗദി അറേബ്യയില്‍ കുടുങ്ങിപ്പോയ സന്ദര്‍ശക വിസക്കാര്‍ക്കും ഉംറ തീർഥാടകര്‍ക്കും പിഴയില്ലാതെ നാട്ടിലേക്ക് മടങ്ങാന്‍ അനുമതി നൽകി സൗദി ആഭ്യന്തര മന്ത്രാലയം.മേഖലയിലെ നിലവിലെ സാഹചര്യം പരിഗണിച്ച് ഭരണകൂടം നല്‍കിയ പ്രത്യേക നിര്‍ദ്ദേശപ്രകാരമാണ് നടപടി. ഏപ്രില്‍ 18നകം ഈ ആനുകൂല്യം ഉപയോഗപ്പെടുത്തി മടങ്ങാമെന്നും മന്ത്രാലയം അറിയിച്ചു. 2026 ഫെബ്രുവരി 25 മുതല്‍ വീസ കാലാവധി അവസാനിച്ചവര്‍ക്കാണ് ഈ ഇളവുകള്‍ ബാധകം. ഫാമിലി വിസിറ്റ് വിസ ഉള്‍പ്പെടെ എല്ലാത്തരം സന്ദര്‍ശക വിസകള്‍ക്കും ഇത് ബാധകമാണ്. കൂടാതെ ഉംറ വിസ, ട്രാന്‍സിറ്റ് വിസ, ഫൈനല്‍ എക്‌സിറ്റിലുള്ളവര്‍ എന്നിവര്‍ക്കും ഇതിന്‍റെ ഗുണം ലഭിക്കും.ഇത്തരക്കാര്‍ക്ക് യാതൊരുവിധ പിഴയോ അധിക ഫീസോ നല്‍കാതെ തന്നെ രാജ്യത്തെ അന്താരാഷ്ട്ര വിമാനത്താവളങ്ങള്‍ വഴി നേരിട്ട് നാട്ടിലേക്ക് മടങ്ങാം. ഇതിനായി വീസ പുതുക്കേണ്ടതില്ല. പാസ്‌പോര്‍ട്ട് ഓഫീസുകളിലോ മറ്റ് മന്ത്രാലയങ്ങളിലോ മുന്‍കൂട്ടി അനുമതി തേടി പോകേണ്ടതില്ല. വിമാനത്താവളങ്ങളിലെ ഇമിഗ്രേഷന്‍ കൗണ്ടറുകളില്‍ വച്ച് തന്നെ നടപടികള്‍ ലളിതമായി പൂര്‍ത്തിയാക്കാം. എന്നാല്‍ 2026 ഏപ്രില്‍ 18നകം മടങ്ങാത്തവര്‍ക്കെതിരെ കര്‍ശന നിയമനടപടികള്‍ സ്വീകരിക്കുമെന്നും ആഭ്യന്തര മന്ത്രാലയം മുന്നറിയിപ്പ് നല്‍കി.

🔹കെനിയയിൽ ഒരു കൂട്ടക്കുഴിമാടത്തിൽനിന്ന് 25 കുട്ടികളുടേതടക്കം 32 മൃതദേഹങ്ങൾ കണ്ടെത്തി.മൃതദേഹങ്ങളിൽ ഭ്രൂണങ്ങളും ശിശുക്കളും ഉൾപ്പെടുന്നു. പടിഞ്ഞാറൻ പട്ടണമായ കെറിക്കോയിലെ ശ്മശാനത്തിൽ പോലീസ് നടത്തിയ പരിശോധനയിലാണ് ഇവ കണ്ടെത്തിയത്. ആശുപത്രിയിൽനിന്ന് 13 അജ്ഞാത മൃതദേഹങ്ങൾ ഇവിടെ എത്തിച്ചുവെന്നു രഹസ്യവിവരം ലഭിച്ചതിനെത്തുടർന്ന് പോലീസ് കോടതിയുടെ അനുമതിയോടെ കുഴി മാന്തുകയായിരുന്നു. അപ്രതീക്ഷിതമായി കൂടുതൽ മൃതദേഹങ്ങൾ കണ്ടെത്തി.ചാക്കുകളിൽ നിറച്ചു കൂട്ടിയ നിലയിലായിരുന്നു മൃതദേഹങ്ങൾ. ഇവയ്ക്കു വലിയ പഴക്കമില്ലെന്നാണ് അന്വേഷണസംഘവും ഫോറൻസിക് വിദഗ്ധരും പറഞ്ഞത്.മൃതദേഹങ്ങൾ തിരിച്ചറിയാൻ നടപടികൾ ആരംഭിച്ചു. നടപടിക്രമങ്ങൾ പാലിക്കാതെ ഇത്രയും മൃതദേഹങ്ങൾ ഒരുമിച്ചു സംസ്കരിച്ചതിൽ ഊർജിത അന്വേഷണം നടക്കുകയാണ്.

🔹യുഎസ്-ഇസ്രയേൽ-ഇറാൻ യുദ്ധം കൊടുമ്പിരിക്കൊണ്ടിരിക്കെ, ആഗോള ഊർജ വിപണിയിൽ നിർണായകമായ ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തിന് ഇന്ത്യയുൾപ്പെടെയുള്ള സൗഹൃദരാജ്യങ്ങൾക്ക് ഇളവ് അനുവദിച്ച് ഇറാൻ. ഇറാൻ വിദേശകാര്യ മന്ത്രി അബ്ബാസ് അരാഗ്‌ചിയാണ് ഇക്കാര്യം അറിയിച്ചത്. ഇന്ത്യയെക്കൂടാതെ പാക്കിസ്ഥാൻ, ഇറാഖ്, ചൈന, റഷ്യ എന്നീ രാജ്യങ്ങളെയാണ് ഇറാൻ സൗഹൃദ രാജ്യങ്ങളുടെ പട്ടികയിൽ ഉൾപ്പെടുത്തിയത്. ഹോർമുസ് കടലിടുക്ക് അടച്ചതോടെ ആഗോളതലത്തിൽ ഇന്ധനവില കുതിച്ചുയരുകയും പല രാജ്യങ്ങളിലും ക്ഷാമം അനുഭവപ്പെടുകയും ചെയ്യുന്ന സാഹചര്യത്തിലാണ് ഇറാൻ തങ്ങളുടെ നിലപാടിൽ മാറ്റം വരുത്തുന്നത്. ഇറാനോടു ശത്രുത പുലർത്താത്ത രാജ്യങ്ങളിലെ കപ്പലുകൾക്കു കൃത്യമായ സുരക്ഷാമാനദണ്ഡങ്ങൾ പാലിച്ചു കടലിടുക്കിലൂടെ സഞ്ചരിക്കാമെന്ന് ഇറാൻ അറിയിച്ചു.‌ അതേസമയം, ഗ്യാസ് കയറ്റിവന്ന രണ്ട് ഇന്ത്യൻ കപ്പലുകൾ സുരക്ഷിതമായി ഹോർമുസ് പിന്നിട്ടതായും ഇന്ത്യൻ ഷിപ്പിംഗ് മന്ത്രാലയം സ്ഥിരീകരിച്ചു. ഹോർമുസ് കടലിടുക്കിലൂടെ കടന്നുപോകുന്ന കപ്പലുകളിൽനിന്നു സുരക്ഷാഫീസായി ടോൾ ഈടാക്കാനുള്ള നീക്കവും ഇറാൻ പാർലമെന്‍റ് നടത്തുന്നുണ്ട്. ഇതുമായി ബന്ധപ്പെട്ട ബില്ലിന് അടുത്ത ആഴ്ചയോടെ അന്തിമരൂപമായേക്കും.

🔹ഐപിഎൽ 2026 സീസണിൽ സൺറൈസേഴ്‌സ് ഹൈദരാബാദിനു വേണ്ടി കളിയ്ക്കുവാനുള്ള താല്പര്യം വ്യക്തമാക്കി ഓസ്‌ട്രേലിയൻ നായകൻ പാറ്റ് കമ്മിൻസ്. നേരത്തെ പരിക്ക് മൂലം ടൂർണമെന്റിന്റെ ആദ്യ ഘട്ടത്തിൽ നിന്നും
പിന്മാറിയ താരം ടൂർണമെന്റിന്റെ രണ്ടാം പകുതിയും ഫൈനലും കളിയ്ക്കുകയാണ് തന്റെ ലക്ഷ്യമെന്ന് ഓസ്‌ട്രേലിയയെ ലോകകപ്പ് കിരീടവിജയത്തിലേക്ക് നയിച്ച കമ്മിൻസ് പറഞ്ഞു.നേരത്ത പരിക്കിനെതുടർന്ന് ടി 20 ലോകകപ്പിൽ കളിക്കാത്തിരുന്ന കമ്മിൻസ്, ക്രിക്കറ്റ് ഓസ്ട്രേലിയയുടെ മെഡിക്കൽ സംഘത്തിന്റെ അനുമതി ഇതുവരെ ലഭിച്ചിട്ടില്ല എന്ന കാരണത്താലാണ് സീസണിന്റെ ആദ്യ ഘട്ടത്തിൽ നിന്ന് വിട്ടുനിൽക്കുന്നത്. ഹൈദരാബാദ് ടീമിന്റെയും ഓസ്‌ട്രേലിയയുടെയും ബൗളിംഗ് കുന്തമുനയായ താരത്തിന്റെ അഭാവം സൺറൈസേഴ്സ് ഹൈദരാബാദിനു തിരിച്ചടിയാകും.ഐപിഎൽ സീസണിന്ടെ ആദ്യ ഘട്ട മത്സരങ്ങളിൽ സൺറൈസേഴ്‌സ് ഹൈദരാബാദിനെ പാറ്റ് കമ്മിൻസിന് പകരം ഇഷാൻ കിഷൻ നയിക്കും. ശനിയാഴ്ച നടക്കുന്ന സീസണിന്റെ ഉദ്‌ഘാടന മത്സരത്തിൽ സൺറൈസേഴ്‌സ് ഹൈദരാബാദ് ചിന്നസ്വാമി സ്റ്റേഡിയത്തിൽ നിലവിലെ ചാമ്പ്യന്മാരായ റോയൽ ചാലഞ്ചേഴ്സ് ബംഗളുരുവിനെ നേരിടും.

🔹ഐപിഎൽ 2026 സീസണിന് മുന്നോടിയായി ടീമുകളുടെ നായകന്മാർക്ക് പുതിയ നിർദ്ദേശങ്ങൾ നൽകി ബിസിസിഐ. മത്സരങ്ങൾക്കിടയിൽ ഉണ്ടാകുന്ന “അപൂർണ്ണ ക്യാച്ചുകൾ ” സംബന്ധിച്ച് കൂടുതൽ ജാഗ്രത പുലർത്തണമെന്നും നായകന്മാർക്ക് ബിസിസിഐ മുന്നറിയിപ്പു നൽകിയതായി ആണ് റിപ്പോർട്ടുകൾ.നായകന്മാരുടെയും ടീം മാനേജ്മെന്റികളുടെയും യോഗത്തിൽ ഫീൽഡിംഗ് നിയമങ്ങൾ കൂടുതൽ വ്യക്തമായി പാലിക്കുന്നതിന്റെ പ്രാധാന്യം ചർച്ചയായി എന്നാണ് റിപ്പോർട്ട്. ക്യാച്ചുകൾ, പ്രത്യേകിച്ച് ബൗണ്ടറിയ്ക്ക് സമീപമുള്ള ക്യാച്ചുകൾ, ഗ്രൗണ്ടിംഗ് നിയമങ്ങൾ എന്നിവയിൽ കൂടുതൽ കർശന സമീപനം സ്വീകരിക്കണമെന്നതാണ് ബിസിസിഐയുടെ തീരുമാനം.നിയമലംഘനങ്ങൾ നടത്തിയാൽ ടീമുകൾക്ക് പിഴയും മറ്റ് ശിക്ഷകളും ലഭിക്കുമെന്ന് അധികൃതർ വ്യക്തമാക്കിയിട്ടുണ്ട്. ക്യാച്ച് എടുത്തുവെന്ന് പൂർണ്ണമായും ഉറപ്പാക്കാതെ ആഘോഷിക്കുന്ന സംഭവങ്ങൾ ഒഴിവാക്കണമെന്നും നിർദേശിച്ചിട്ടുണ്ട്.യോഗത്തിൽ ബാറ്റ് പരിശോധന, ബോൾ മാറ്റം, ഫീൽഡിംഗ് നിയന്ത്രണങ്ങൾ തുടങ്ങിയ സാങ്കേതിക വിഷയങ്ങളും ചർച്ചയാക്കിയതായി റിപ്പോർട്ടുണ്ട്. പുതിയ സീസണിൽ നിയമങ്ങൾ കർശനമായി നടപ്പാക്കാൻ ബിസിസിഐ തയ്യാറാകുന്നതിന്റെ ഭാഗമായാണ് ഈ മുന്നറിയിപ്പ്.

🔹‘ആട് 3 പാർട്ട് 1: വൺ ലാസ്റ്റ് റൈഡ്’ 100 കോടി ക്ലബ്ബിൽ രാജകീയ ഇടം നേടി. വെറും ഏഴ് ദിവസം കൊണ്ടാണ് റെക്കോർഡ് കളക്ഷൻ സിനിമ സ്വന്തമാക്കിയിരിക്കുന്നത്. മാർച്ച് 19ന് ആഗോള റിലീസായി എത്തിയ സിനിമയ്ക്ക് ആദ്യ ദിനം തന്നെ 18 കോടിക്ക് മുകളില്‍ കളക്ഷൻ നേടിയിരുന്നു. ഇതോടെ 100 കോടി ക്ലബിൽ ഇടം പിടിക്കുന്ന പതിനാലാമത്തെ മാത്രം മലയാള സിനിമയായി ആട് 3 മാറി. ഇത് കൂടാതെ ജയസൂര്യയുടെ കരിയറിലെ ആദ്യ നൂറ് കോടി ചിത്രം കൂടെയാണ് ആട് 3 .മിഥുൻ മാനുവൽ തോമസ് രചിച്ചു സംവിധാനം ചെയ്ത ചിത്രം വിജയ് ബാബുവിന്റെ ഫ്രൈഡേ ഫിലിം ഹൗസും വേണു കുന്നപ്പിള്ളിയുടെ കാവ്യ ഫിലിം കമ്പനിയും ചേർന്നാണ് നിർമിച്ചിരിക്കുന്നത്. ചിത്രത്തിന്റെ ആദ്യ രണ്ടു ഭാഗങ്ങൾ ഹിറ്റുകളായിരുന്നെങ്കിലും അതിനേക്കാൾ സ്വീകാര്യതയാണ് ആട് – 3 ക്ക് ലഭിച്ചിരിക്കുന്നത്. ജയസൂര്യ കൂടാതെ, വിനായകൻ, ഇന്ദ്രൻസ്, ധർമജൻ ബോൾഗാട്ടി, വിജയ് ബാബു, നോബി, നിർമ്മൽ പാലാഴി, സൈജു കുറുപ്പ്, ഹരികൃഷ്ണൻ, ഭഗത് മാനുവൽ, സണ്ണി വെയ്ൻ, സുധി കോപ്പ, ബിജു കുട്ടൻ എന്നിവര്‍ സിനിമയിൽ പ്രധാന വേഷങ്ങളിൽ എത്തിയിട്ടുണ്ട്. ആദ്യ വീക്കെൻഡ് പിന്നിടുമ്പോൾ വിദേശത്ത് കൂടുതൽ സ്‌ക്രീനുകൾ ചിത്രം പ്രദർശനത്തിനെത്തി. ഓരോ ദിനവും കേരളത്തിലും കൂടുതൽ ഷോകളും സ്‌ക്രീനുകളും കൂട്ടിച്ചേർക്കപെടുന്ന ചിത്രത്തിന് വൻ ജനപിന്തുണയാണ് ലഭിക്കുന്നത്.

🔹മലയാളത്തിൽ അടുത്തിടെ ഇറങ്ങിയ മികച്ചൊരു ചിത്രമാണ് മസ്തിഷ്ക മരണം. ചിത്രം വ്യത്യസ്തതകൾ കൊണ്ട് വിസ്മയം തീർത്തു. ഫെബ്രുവരി 27 നാണ് സിനിമ തീയേറ്റിറിലെത്തിയത്. രജീഷ വിജയൻ്റെ വേറിട്ട കഥാപാത്രം കൂടിയുണ്ടായിരുന്ന സിനിമയ്ക്ക് ജനശ്രദ്ധ ലഭിക്കുകയും ചെയ്തിരുന്നു. ‘മസ്തിഷ്ക മരണം എ ഫ്രാങ്കെന്‍ബൈറ്റിങ് ഓഫ് സൈമൺസ് മെമ്മറീസ്‌’. എന്നാണ് സിനിമയുടെ മുഴുവൻ പേര്. ഇപ്പോഴിതാ സിനിമ ഒടിടി യിൽ എത്താൻ പോകുകയാണ്. 2046 ലെ കഥയാണ് സിനിമയിൽ പറയുന്നത്. സയൻസ് ഫിക്ഷൻ ഇൻവസ്റ്റിഗേറ്റീവ് കോമഡി കാറ്റഗറിയിൽ ഒരുക്കിയ ചിത്രം 2046 ലെ കൊച്ചിയുടെ കഥയാണ് പറയുന്നത്. മികച്ച ദൃശ്യ വിരുന്നാണ് സിനിമ സമ്മാനിക്കുന്നത്. വിഎഫ്എക്സും മറ്റ് സംവിധാനങ്ങളും കൊണ്ട് സിനിമ അതിമനോഹരമായ അനുഭവമാണ് ഒരുക്കുന്നതെന്നും കാണികൾ സമൂഹമാധ്യമതങ്ങളിൽ കുറിച്ചിരുന്നു. ആവാസവ്യൂഹം, പുരുഷ പ്രേതം എന്നീ ചിത്രങ്ങൾക്ക് ശേഷം കൃഷാന്ദ് രചിച്ചു സംവിധാനം ചെയ്ത ചിത്രമാണ് ഇത്.നെറ്റ്ഫ്ലിക്സീലൂടെയാണ് ചിത്രം എത്തുക. എന്നാൽ നെറ്റ്ഫ്ലിക്സിൽ ചിത്രം എത്തുന്ന തീയതി ഇതുവരേയും പുറത്ത് വിട്ടിട്ടില്ല. എറ്റവും അടുത്ത ദിവസങ്ങളിൽ തന്നെ സിനിമ എത്തുമെനന്നാണ് ലഭിക്കുന്ന വിവരങ്ങൾ.

💦 ഗുരുജിയുടെ വാക്കുകൾ

ഒരു വ്യക്തി എന്ന നിലയില്‍ പുരുഷനും സ്ത്രീയും രണ്ടു വ്യത്യസ്ത അറ്റങ്ങളായി തന്നെയാണ് നാം ഇപ്പോഴും കണ്ടു പോരുന്നത്. പരസ്പര പൂരകങ്ങള്‍ ആയി ചേര്‍ന്ന് നില്‍ക്കേണ്ടവര്‍ തന്നെയാണവര്‍. എന്നാല്‍, പലപ്പോഴും പുരുഷന് സമൂഹം കല്പിച്ചു നല്‍കുന്ന പല പദവികളും, ഗുണങ്ങളും സ്ത്രീകളുടെ കാര്യത്തില്‍ ചോദ്യചിഹ്നം പോലെ തുറിച്ചു നോക്കാറുണ്ട്.
സമൂഹത്തിന്റെ ഏറ്റവും ചെറിയ രൂപം വീടാണ്. അവിടെ എങ്ങനെയാണു പുരുഷനും സ്ത്രീയും പരിഗണിക്കപ്പെടുന്നത് എന്നതില്‍ ആണ് കഥ മുഴുവന്‍ ഇരിക്കുന്നത്. സ്വന്തം കുടുംബത്തിന്റെ ഉത്തരവാദിത്തം ഒരു വ്യക്തിയില്‍ അല്ല, നാം ഓരോരുത്തരിലും ആണ്. ഒരാണ്‍കുഞ്ഞിനുള്ള അതേ പ്രാധാന്യത്തോടെ ഒരു പെണ്‍കുഞ്ഞിനേയും പരിഗണിച്ചു നോക്കൂ.
കുഞ്ഞുങ്ങളാണ്, അവര്‍ സന്തോഷിക്കും, കരയും, ദേഷ്യപ്പെടും, വികാരങ്ങള്‍ പ്രകടിപ്പിക്കും. ബഹുമാനത്തോടെയും, സ്‌നേഹത്തോടെയും പരസ്പരം പെരുമാറാന്‍ നമുക്ക് സാധിക്കുമെങ്കില്‍ നമ്മുടെ കുഞ്ഞുങ്ങള്‍ അത് പിന്തുടരും. അച്ഛനും,അമ്മയും, തമ്മില്‍ പരസ്പരം സംസാരിക്കുമ്പോള്‍, ജോലികള്‍ പങ്കിടുമ്പോള്‍, അസുഖങ്ങളിലും വേദനകളിലും താങ്ങാവുമ്പോള്‍, അത് കാണുന്ന കുഞ്ഞുങ്ങളിലും ആ കാര്യങ്ങളെല്ലാം ആഴത്തില്‍ പതിയും.

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 26 | വ്യാഴം ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 05 | ഞായർ ✍️ കപിൽ ശങ്കർ

അമേരിക്കയുടെ 250-ാം സ്വാതന്ത്ര്യദിനം: മോശം കാലാവസ്ഥയ്ക്കിടയിലും ജനങ്ങളെ അഭിസംബോധന ചെയ്ത് ട്രംപ്

1 COMMENT

LEAVE A REPLY Cancel reply

Most Popular

സപ്ലൈകോ കടുത്ത സാമ്പത്തിക പ്രതിസന്ധിയിൽ.

കൈവശമുള്ള ആനക്കൊമ്പുകളുടെ വിവരങ്ങൾ മോഹൻലാൽ വനംവകുപ്പിന് ഔദ്യോഗികമായി കൈമാറി.

മഞ്ചേരി മെഡിക്കൽ കോളേജിൽ ചികിത്സയിലിരിക്കെ മരിച്ചയാൾക്ക് ഷിഗെല്ല സ്ഥിരീകരിച്ചു; ആരോഗ്യവകുപ്പ് ജാഗ്രതയിൽ.

Recent Comments

EDITOR PICKS

സപ്ലൈകോ കടുത്ത സാമ്പത്തിക പ്രതിസന്ധിയിൽ.

കൈവശമുള്ള ആനക്കൊമ്പുകളുടെ വിവരങ്ങൾ മോഹൻലാൽ വനംവകുപ്പിന് ഔദ്യോഗികമായി കൈമാറി.

POPULAR POSTS

പ്രണയത്തിന് തടസ്സമാകുമെന്ന പേടി; മക്കളെ കൊലപ്പെടുത്തിയ അമ്മയ്ക്കും കാമുകനും വധശിക്ഷ വിധിച്ച് കോടതി.

POPULAR CATEGORY

ABOUT US

FOLLOW US