വിശുദ്ധ എസ്തപ്പാനോസ്:
ക്രിസ്തീയ സഭയിലെ ആദ്യത്തെ രക്തസാക്ഷിയായിരുന്നു വിശുദ്ധ എസ്തപ്പാനോസ് ( സ്റ്റീഫൻ ). വിശ്വാസികളുടെ പ്രത്യേക ആദരത്തിനു പാത്രമായിട്ടുള്ള വിശുദ്ധ എസ്തപ്പാനോസിനെ ക്രിസ്തുവിന്റെ മരണത്തിന് രണ്ടു വര്ഷങ്ങള്ക്ക ശേഷം കല്ലെറിഞ്ഞു കൊല്ലപ്പെടുകയാണ് ചെയ്തത്. അപ്പസ്തോലിക പ്രവര്ത്തനങ്ങളിലെ സൂചനകള് പ്രകാരം വിശുദ്ധനെ പിടികൂടിയതും അദ്ദേഹത്തിനെതിരായ ആരോപണമുന്നയിക്കലും ക്രിസ്തുവിന്റെ വിചാരണയോട് സമാനമായിരുന്നെന്ന കാര്യം എടുത്ത് കാണിക്കുന്നു. നഗര മതിലിനു പുറത്തു വച്ച് വിശുദ്ധനെ കല്ലെറിയുകയും, തന്റെ ഗുരുവിനേപോലെ തന്റെ ശത്രുക്കള്ക്ക് വേണ്ടി പ്രാര്ത്ഥിച്ചുകൊണ്ട് വിശുദ്ധന് മരണം വരിക്കുകയും ചെയ്തു.
അന്നത്തെ യഹൂദ സമൂഹത്തിൽ അദ്ദേഹം ക്രിസ്തുവിനു വേണ്ടി പ്രഘോഷണം നടത്തുകയും അനേകം പേരെ ക്രൈസ്തവസഭയിലേക്ക് കൊണ്ടു വരുന്നതിൽ വിജയിക്കുകയും ചെയ്തു. സിനഗോഗിലെ അംഗങ്ങളുമായുള്ള തർക്കത്തെ തുടർന്ന് സ്തേഫാനോസിന്റെ പേരിൽ മതനിന്ദ ആരോപിക്കപ്പെട്ടു. ദേവാലയത്തിനും നിയമത്തിനും എതിരെ സംസാരിച്ചു എന്ന ആരോപണങ്ങളെ തുടർന്ന് വിചാരണ ചെയ്യപ്പെട്ട സ്തേഫാനോസ് മരണത്തിനു വിധിക്കപ്പെടുകയും കല്ലേറേറ്റു കൊല്ലപ്പെടുകയും ആണ് ചെയ്തത്.
അപ്പസ്തോലന്മാരെ സഹായിക്കുവാനും, അവരുടെ സുവിശേഷ പ്രവര്ത്തനങ്ങള് ലഘൂകരിക്കുവാനും വേണ്ടി മുന്നിട്ടിറങ്ങിയ ഏഴ് പേരില് ഒരാളാണ് വിശുദ്ധ എസ്തപ്പാനോസ്. അദ്ദേഹം വിശ്വാസത്താലും, പരിശുദ്ധാത്മാവിനാലും നിറഞ്ഞ പുണ്യാത്മാവായിരുന്നു. മഹത്വവും ശക്തിയും നിറഞ്ഞവനും ആയിരുന്നു. അപ്പസ്തോലിക തീക്ഷണതയാലും, ദൈവീക വരങ്ങളാലും അനുഗ്രഹിക്കപ്പെട്ട ദൈവീക മനുഷ്യനായി വിശുദ്ധന് വിളങ്ങുന്നു. ക്രിസ്തുവിന്റെ ആദ്യ സാക്ഷി എന്ന നിലയില് അദ്ദേഹം തന്റെ ശത്രുക്കളെ ധൈര്യപൂര്വ്വം നേരിടുകയും ക്രിസ്തുവിന്റെ വാഗ്ദാനം നിറവേറ്റപ്പെടുകയും ചെയ്തു. “എസ്തപ്പാനോസുമായുള്ള തര്ക്കത്തില് അദ്ദേഹത്തിന്റെ ബുദ്ധിയേയും, ജ്ഞാനത്തേയും, അദേഹത്തിന്റെ വാക്കുകളിലെ ആത്മാവിനെയും പ്രതിരോധിക്കുവാന് അവര്ക്ക് കഴിഞ്ഞില്ല.”
സ്വന്തം ജീവന് തന്നെ ത്യജിക്കുവാന് തയ്യാറാകും വിധം, ക്രിസ്തുവിനെപ്പോലെ തന്നെ തന്റെ കൊലയാളികള്ക്ക് വേണ്ടി പ്രാര്ത്ഥിച്ചുകൊണ്ട് ക്രിസ്തുവിനെ അനുകരിച്ചവന്, എന്നാണ് ആദ്യ രക്തസാക്ഷിയായ വിശുദ്ധ എസ്തപ്പാനോസിനെക്കുറിച്ച് ആരാധന ക്രമത്തില് പരാമര്ശിച്ചിരിക്കുന്നത്. ക്രിസ്തുമസ്സിനു ശേഷം വരുന്ന ദിവസം വിശുദ്ധന്റെ നാമഹേതു തിരുനാളായി അംഗീകരിച്ചതിലൂടെ തിരുസഭ ഈ ശിക്ഷ്യനും ഗുരുവും തമ്മിലുള്ള സാദൃശ്യത്തെ എടുത്ത് കാണിക്കുകയും വീണ്ടെടുപ്പിന്റെ മിശിഹായായി സാക്ഷ്യപ്പെടുത്തുകയും ചെയ്യുന്നു.
🙏