📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 12 | ഞായർ ✍ കപിൽ ശങ്കർ

🔹ഏപ്രിൽ 12 പ്രധാനമായും അന്താരാഷ്ട്ര മനുഷ്യ ബഹിരാകാശ പറക്കൽ ദിനമായി (International Day of Human Space Flight) ആചരിക്കുന്നു. 1961-ൽ യൂറി ഗഗാറിൻ ആദ്യമായി ബഹിരാകാശത്ത് എത്തിയതിൻ്റെ സ്മരണയ്ക്കായാണ് ഈ ദിനം ആഘോഷിക്കുന്നത്. കൂടാതെ, ഇത് കോസ്മോനോട്ടിക്സ് ദിനമായും, യുഎസിൽ നാഷണൽ ഗ്രിൽഡ് ചീസ് സാൻഡ്‌വിച്ച് ദിനമായും ആചരിക്കുന്നു.കോറോം രക്തസാക്ഷി ദിനം (കേരളം): 1948-ലെ കോറോം സമരത്തിലെ രക്തസാക്ഷികളെ സ്മരിക്കുന്ന ദിനവും ഏപ്രിൽ 12ആണ്.

🔹സംസ്ഥാനത്തെ എന്‍ജിനിയറിംഗ്, ഫാര്‍മസി കോഴ്സുകളിലേക്കുള്ള കംപ്യൂട്ടര്‍ അധിഷ്ഠിത കീം പ്രവേശന പരീക്ഷ 17 മുതല്‍ 22 വരെ. 152 കേന്ദ്രങ്ങളിലായി 1,46,146 പേരാണു പരീക്ഷയ്ക്കു രജിസ്റ്റര്‍ ചെയ്തിരിക്കുന്നത്.

🔹പാലക്കാട്ടെ ബിജെപി സ്ഥാനാര്‍ത്ഥി ശോഭ സുരേന്ദ്രന്റെ ഭീഷണി ഓഡിയോ സന്ദേശം പുറത്തുവിട്ട് പരാതി നല്‍കിയ ബിന്ദു വിനയകുമാറിനെ ബിജെപി പാര്‍ട്ടിയുടെ പ്രാഥമിക അംഗത്വത്തില്‍നിന്ന് സസ്പെന്‍ഡ് ചെയ്തു. ആലപ്പുഴ നോര്‍ത്ത് ജില്ലാ കമ്മിറ്റിയംഗമായ ബിന്ദുവിനെതിരെ സംസ്ഥാന അധ്യക്ഷന്‍ രാജീവ് ചന്ദ്രശേഖറാണ് നടപടിയെടുത്തത്.

🔹മലപ്പുറത്ത് വോട്ടുയന്ത്രങ്ങള്‍ സൂക്ഷിച്ചിരിക്കുന്ന സ്ട്രോങ് റൂം തുറക്കാന്‍ ജില്ലാ കളക്ടര്‍ നിര്‍ദേശം നല്‍കിയെന്ന ആരോപണവുമായി യുഡിഎഫ്. തെരഞ്ഞെടുപ്പ് അട്ടിമറിക്കാനുള്ള ശ്രമമാണെന്നും തെരഞ്ഞെടുപ്പു കമ്മീഷനു പരാതി നല്‍കുമെന്നും യുഡിഎഫ് ജില്ലാ ചെയര്‍മാന്‍ കെ പി അബ്ദുല്‍ മജീദ് പറഞ്ഞു.

🔹പെരിന്തല്‍മണ്ണ കാദര്‍മൊല്ല എഎംഎല്‍പി സ്‌കൂളിലെ പോളിങ് കേന്ദ്രത്തില്‍ വോട്ടെടുപ്പിനിടെ കൃത്യനിര്‍വഹണം തടസപ്പെടുത്തിയെന്ന് ആരോപിച്ച് ബൂത്ത് ലെവല്‍ ഓഫീസര്‍ എം അനൂപിനെതിരെ പൊലീസ് കേസെടുത്തു. അഞ്ചു ബൂത്തുകളില്‍ വോട്ടര്‍മാരെ സഹായിക്കാന്‍ തെരഞ്ഞെടുപ്പ് കമ്മീഷന്‍ ചുമതല നല്‍കിയ ബിഎല്‍ഒമാര്‍ കൂട്ടംകൂടി നിന്നെന്ന് ആരോപിച്ച് പോലീസ് തള്ളിമാറ്റിയതിനെതിരേ അനൂപ് തെരഞ്ഞെടുപ്പു കമ്മീഷനു പരാതി നല്‍കിയിരുന്നു.

🔹വൈക്കത്ത് തെരഞ്ഞെടുപ്പ് ഉദ്യോഗസ്ഥര്‍ക്കെതിരേ സുരക്ഷാ സേനാംഗങ്ങള്‍ തോക്കു ചൂണ്ടിയെന്ന പ്രചാരണം ശരിയല്ലെന്നു കോട്ടയം ജില്ലാ കളക്ടര്‍ ചേതന്‍കുമാര്‍ മീണ. സ്ട്രോംഗ് റൂമിന്റെ താക്കോല്‍ സൂക്ഷിക്കുന്നതു സംബന്ധിച്ചു ചില ആശയക്കുഴപ്പങ്ങള്‍ ഉണ്ടായിരുന്നെന്നും താന്‍ സ്ഥലത്തെത്തി പരിഹരിച്ചെന്നും കളക്ടര്‍.

🔹തിരഞ്ഞെടുപ്പ് ഡ്യൂട്ടി കഴിഞ്ഞ് മടങ്ങിയ പോലീസുകാര്‍ ഉള്‍പ്പെടെ 28 പേര്‍ക്ക് വാഹനാപകടത്തില്‍ പരിക്കേറ്റു. കോഴിക്കോട് കൊയിലാണ്ടിയില്‍ പോലീസ് സംഘം സഞ്ചരിച്ച ടൂറിസ്റ്റ് ബസും കണ്ടെയ്‌നര്‍ ലോറിയും തമ്മില്‍ കൂട്ടിയിടിച്ചാണ് അപകടമുണ്ടായത്. വടകര മടപ്പള്ളിയില്‍ നിന്നും തെരഞ്ഞെടുപ്പ് ഡ്യൂട്ടി കഴിഞ്ഞ് മലപ്പുറത്തേക്കു മടങ്ങുകയായിരുന്നവരാണ് അപകടത്തില്‍പ്പെട്ടത്.

🔹കാക്കനാട് വനിതാ ജയിലില്‍ തടവുകാരികള്‍ തമ്മില്‍ കൈയാങ്കളി. ഭക്ഷണം വിളമ്പുന്നതിനെച്ചൊല്ലിയുണ്ടായ തര്‍ക്കത്തിനിടെ റിമാന്‍ഡ് തടവുകാരിയെ മര്‍ദിച്ച സഹ തടവുകാരിയായ കെനിയന്‍ സ്വദേശിനിക്കെതിരെ ഇന്‍ഫോപാര്‍ക് പൊലീസ് കേസെടുത്തു. കെനിയ സ്വദേശിനി അക്കിനി ഒന്യാങ്ങോയ്‌ക്കെതിരെയാണ് നടപടി. മര്‍ദനമേറ്റ തടവുകാരി നാഫിലയെ ആശുപത്രിയില്‍ പ്രവേശിപ്പിച്ചു.

🔹ആറ്റിങ്ങലില്‍ അനധികൃതമായി സൂക്ഷിച്ച 500 ഓളം പാചക വാതക സിലിണ്ടറുകള്‍ പിടികൂടി.സിവില്‍ സപ്ലൈസ് സ്‌പെഷ്യല്‍ സ്‌ക്വാഡ് ആണ് സിലിണ്ടറുകള്‍ പിടികൂടിയത്.
ആലംകോട് മണ്ണൂര്‍ ഭാഗത്ത് പ്രവര്‍ത്തിക്കുന്ന സ്വകാര്യ ഗ്യാസ് ഏജന്‍സിയില്‍ നിന്നാണ് അനധികൃതമായി സൂക്ഷിച്ച പാചക വാതക സിലിണ്ടറുകള്‍ പിടികൂടിയത്. രഹസ്യ വിവരം ലഭിച്ചത് പ്രകാരമാണ് സ്‌ക്വാഡ് ഇവിടെ പരിശോധന നടത്തിയത്.
അഞ്ച് കിലോ സിലിണ്ടറുകളും വാണിജ്യ ആവശ്യങ്ങള്‍ക്കായി ഉപയോഗിക്കുന്ന വലിയ സിലിണ്ടറുകളും ഉള്‍പ്പടെയാണ് പിടിച്ചെടുത്തത്.പശ്ചിമേഷ്യന്‍ യുദ്ധ പശ്ചാത്തലത്തില്‍ സിലിണ്ടര്‍ ക്ഷാമം നേരിടുന്നതിനാല്‍ ഇത്തരത്തില്‍ അനധികൃതമായി സൂക്ഷിച്ചിരിക്കുന്ന സിലിണ്ടറുകള്‍ കണ്ടെത്താന്‍ പ്രത്യേക സ്‌ക്വാഡിനെ ഏര്‍പ്പെടുത്തിയിട്ടുണ്ട്.

🔹കോഴിക്കോട് നാദാപുരത്തെ പുളിയാവ് പുഴയില്‍ മൂന്നു പേര്‍ മുങ്ങി മരിച്ചു. അരീക്കുണ്ട് സ്വദേശികളായ അന്‍സാര്‍, ഭാര്യ സുഹാദ, സഹോദരന്റെ മകള്‍ ഇസ മറിയം എന്നിവരാണ് മരിച്ചത്. തുണി അലക്കുന്നതിനിടെ കയത്തില്‍പെട്ട കുട്ടിയെ രക്ഷിക്കാന്‍ ശ്രമിക്കവേയാണ് അന്‍സാറും ഭാര്യയും മുങ്ങിയത്.

🔹പാലക്കാട് ജില്ലയില്‍ ഈ സീസണിലെ ഏറ്റവും ഉയര്‍ന്ന താപനിലയായ 40 ഡിഗ്രി രേഖപ്പെടുത്തി. വരും ദിവസങ്ങളിലും ചൂട് വര്‍ധിക്കുമെന്ന മുന്നറിയിപ്പിനെ തുടര്‍ന്ന് പാലക്കാട് ഉള്‍പ്പെടെ സംസ്ഥാനത്തെ 12 ജില്ലകളില്‍ കേന്ദ്ര കാലാവസ്ഥാ വകുപ്പ് യെല്ലോ അലര്‍ട്ട് പ്രഖ്യാപിച്ചു.

🔹കുംഭമേളയിലെ വൈറല്‍ താരത്തിന്റെ വിവാഹവുമായി ബന്ധപ്പെട്ട വിവാദത്തില്‍ സിപിഎം നേതാക്കളെ ന്യായീകരിച്ച് എംഎ ബേബി. മിശ്രവിവാഹങ്ങളെ പിന്തുണക്കുന്നത് സിപിഎമ്മിന്റെ രീതിയാണ്. അപ്പോള്‍ എല്ലാ സാങ്കേതികത്വവും നോക്കാനാകില്ലെന്ന് എംഎ ബേബി പ്രതികരിച്ചു.

🔹കുതിരവട്ടം മാനസികാരോഗ്യ കേന്ദ്രത്തില്‍ നിന്ന് കഴിഞ്ഞ ഡിസംബറില്‍ ചാടിപ്പോയ ദൃശ്യ കൊലക്കേസ് പ്രതി വിനീഷ് മൂന്നു മാസത്തിനു ശേഷം മുംബൈയില്‍ പിടിയില്‍. ശുചിമുറിയുടെ ചുമര്‍ തുരന്നാണു വിനീഷ് രക്ഷപ്പെട്ടത്.

🔹കാമുകന്റേയും കാമുകിയുടേയും വീട്ടുകാര്‍ തമ്മില്‍ താമരശ്ശേരി കോടതിക്കു മുന്നില്‍ കൂട്ടത്തല്ല്. മുക്കം ചെറുവാടി സ്വദേശിനിയായ നിദ ഷെറിനെ നാലാം തീയതി മുതല്‍ കാണാനില്ലെന്ന് കുടുംബം പോലീസില്‍ പരാതി നല്‍കിയിരുന്നു. ഇന്നലെ രാവിലെ പെണ്‍കുട്ടി കാമുകനായ കാരശ്ശേരി സ്വദേശി ഷാമിലിനൊപ്പം മുക്കം പൊലീസ് സ്റ്റേഷനില്‍ ഹാജരായി. കോടതിയില്‍ ഹാജരാക്കിയ ഇവരെ ഒന്നിച്ചു പോകാന്‍ കോടതി അനുവദിച്ചു. കോടതിയ്ക്കു പുറത്ത് എത്തിയപ്പോഴാണു തര്‍ക്കവും കൂട്ടത്തലുമുണ്ടായത്.

🔹കണ്ണൂര്‍ അഞ്ചരക്കണ്ടി ഡെന്റല്‍ കോളേജിലെ നിതിന്‍ രാജിന്റെ മരണത്തില്‍ ആരോപണവിധേയരായ അധ്യാപകര്‍ക്ക് സസ്പെന്‍ഷന്‍. ഡെന്റല്‍ അനാട്ടമി വിഭാഗം മേധാവി ഡോ എം കെ റാം, അസോസിയേറ്റ് പ്രൊഫസര്‍ ഡോ. സംഗീത എന്നിവരെയാണ് സസ്പെന്‍ഡ് ചെയ്തത്.

🔹വോട്ട് ചെയ്ത് മടങ്ങുകയായിരുന്ന വയോധികയുടെ കാലില്‍ കെഎസ്ആര്‍ടിസി ബസ് കയറി ഗുരുതര പരിക്കേല്‍ക്കുകയും കാല്‍മുറിച്ചു മാറ്റേണ്ടി വരികയും ചെയ്തു. ഡ്രൈവര്‍ അടക്കം ബസ് ജീവനക്കാര്‍ വരുത്തിയ ഗുരുതര വീഴ്ചമൂലമാണെന്ന് അപകടത്തിന് ഇരയായ വയനാട് വൈത്തിരി സ്വദേശിയായ 65 കാരി ജാനുവുവിന്റെ കുടുംബം ആരോപിച്ചു.

🔹രണ്ടു വയസിനുതാഴെയുള്ള കുട്ടികള്‍ക്ക് ചുമയ്ക്കും ജലദോഷത്തിനുമുള്ള കഫ് സിറപ്പ് നല്‍കുന്നത് നിയന്ത്രിച്ചേക്കും. കേന്ദ്ര ആരോഗ്യ മന്ത്രാലയവും ഡ്രഗ്‌സ് കണ്‍ട്രോളര്‍ ജനറല്‍ ഓഫ് ഇന്ത്യയും ഇതു സംബന്ധിച്ച ഉത്തരവു പുറപ്പെടുവിക്കുമെന്നു റിപ്പോര്‍ട്ട്.

🔹കേരളം, പുതുച്ചേരി, ആസാം എന്നിവിടങ്ങളിലെ നിയമസഭാ തിരഞ്ഞെടുപ്പുകള്‍ക്ക് ലോകശ്രദ്ധ ലഭിച്ചതായി ഇന്ത്യന്‍ തിരഞ്ഞെടുപ്പ് കമ്മീഷന്‍. 22 രാജ്യങ്ങളില്‍ നിന്നുള്ള 38 പ്രതിനിധികള്‍ ഇലക്ഷന്‍ കമ്മീഷന്റെ ഇന്റര്‍നാഷണല്‍ ഇലക്ഷന്‍ വിസിറ്റേഴ്സ് പ്രോഗ്രാമിന്റെ 2026-ലെ പതിപ്പിന്റെ ഭാഗമായി ഇന്ത്യയിലെത്തി. ഇന്ത്യയിലെ തെരഞ്ഞെടുപ്പ് ‘ജനാധിപത്യത്തിന്റെ യഥാര്‍ത്ഥ ഉത്സവം’ ആണെന്നാണ് പ്രതിനിധികള്‍ അഭിപ്രായപ്പെട്ടത്.

🔹രാജ്യത്ത് എല്‍പിജി ക്ഷാമംമൂലം ഹോസ്റ്റലുകളും ഹോട്ടലുകളും അടച്ചതോടെ ഭക്ഷണം കിട്ടാതെ വന്‍ നഗരങ്ങളില്‍നിന്നു തൊഴിലാളികള്‍ സ്വന്തം നാടുകളിലേക്കു കൂട്ടപ്പലായനം ചെയ്യുന്നു. ഒഡീഷ, ബംഗാള്‍, യുപി, മധ്യപ്രദേശ് എന്നീ സംസ്ഥാനങ്ങളില്‍നിന്നുള്ളവരാണ് മുംബൈ, അഹമ്മദാബാദ്, സൂററ്റ് അടക്കമുള്ള നഗരങ്ങളില്‍നിന്ന് പലായനം ചെയ്യുന്നത്.

🔹പാര്‍ലമെന്റ് പരിസരത്തു തന്റെ കാറില്‍ നിന്നിറങ്ങി പ്രധാനമന്ത്രി നരേന്ദ്രമോദി കോണ്‍ഗ്രസ് നേതാവ് രാഹുല്‍ ഗാന്ധിയുമായി കുറച്ചുനേരം സംസാരിക്കുന്ന ദൃശ്യം സാമൂഹ്യ മാധ്യമങ്ങളില്‍ പ്രചരിച്ചു. കൗതുകകരമായ കമന്റുകളും ചിത്രത്തിനൊപ്പമുണ്ട്.

🔹വനിതാ ഐഎഎസ് ഓഫീസര്‍ക്കെതിരെ സാമ്പത്തിക തട്ടിപ്പ് പരാതി. ഒഡീഷ സംസ്ഥാന ആഭ്യന്തര വകുപ്പില്‍ അഡീഷണല്‍ സെക്രട്ടറിയായ ആരാധന ദാസിനെതിരെയാണ് 95 ലക്ഷം രൂപയുടെ സാമ്പത്തിക തട്ടിപ്പ് ആരോപണം ഉയര്‍ന്നത്. കട്ടക്ക് ഡെവലപ്‌മെന്റ് അതോറിറ്റി പ്രദേശത്ത് ഭൂമി നല്‍കാമെന്നു വാഗ്ദാനം ചെയ്ത് ഭിന്നശേഷിക്കാരനായ കമല്‍ കുമാര്‍ ഭാവ്‌സിങ്കയില്‍ നിന്ന് പണം തട്ടിയെന്നാണ് ആരോപണം.

🔹മധ്യപ്രദേശിലെ ഷിയോപുര്‍ ജില്ലയിലുള്ള കുനോ നാഷണല്‍ പാര്‍ക്കില്‍, ഇന്ത്യയില്‍ ജനിച്ച ഒരു പെണ്‍ചീറ്റ നാല് കുഞ്ഞുങ്ങള്‍ക്കു ജന്മം നല്‍കി. 25 മാസം പ്രായമുള്ള ഗാമിനി എന്ന ഈ ചീറ്റ ഒരു വര്‍ഷത്തിലേറെയായി കാട്ടിലാണ് ജീവിക്കുന്നത്.

🔹റെസിഡന്‍ഷ്യല്‍ സ്‌കൂളില്‍ അഞ്ചു വയസ്സുകാരനെ ലൈംഗികമായി പീഡിപ്പിച്ച ശേഷം കഴുത്തറുത്ത് കൊലപ്പെടുത്തി. ബിഹാറിലെ ജെഹാനാബാദിലെ റെസിഡന്‍ഷ്യല്‍ സ്‌കൂളിലാണ് സംഭവം നടന്നത്. സംഭവവുമായി ബന്ധപ്പെട്ട് സ്‌കൂളിലെ സുരക്ഷാ ജീവനക്കാരനെ പൊലീസ് അറസ്റ്റ് ചെയ്തു.

🔹ഇസ്ലമാബാദില്‍ ഇറാന്‍ – അമേരിക്ക സമാധാന ചര്‍ച്ചയില്‍ പുരോഗതിയുണ്ടെങ്കിലും തീരുമാനങ്ങളായില്ല. ചര്‍ച്ച പുരോഗമിക്കുന്നതിനിടെ ഹോര്‍മുസ് കടലിടുക്കിലെ സമുദ്ര മൈനുകള്‍ അമേരിക്കന്‍ നാവികസേന നീക്കം ചെയ്തു. രണ്ട് അത്യാധുനിക പടക്കപ്പലുകളുടെ സംരക്ഷണത്തിലാണ് മൈനുകള്‍ നീക്കം ചെയ്തത്. കടലിടുക്കിന്റെ നിയന്ത്രണം കൈപ്പിടിയിലൊതുക്കാന്‍ ഇറാന്‍ നിക്ഷേപിച്ച മൈനുകള്‍ നീക്കം ചെയ്യാനാകുന്നില്ലെന്ന് ഇറാന്‍ തന്നെ വെളിപ്പെടുത്തിയിരുന്നു.

🔹സമാധാന ചര്‍ച്ചയില്‍ തീരുമാനങ്ങളോ കരാറോ ഉണ്ടായാലും ഇല്ലെങ്കിലും തങ്ങള്‍ വിജയിച്ചെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഇറാന്റെ നാവിക, വ്യോമ സേനകളേയും റഡാര്‍ സംവിധാനങ്ങളേയും തങ്ങള്‍ തകര്‍ത്തു. ഹോര്‍മുസ് കടലിടുക്ക് എല്ലാ രാജ്യങ്ങള്‍ക്കുമായി സ്വതന്ത്രമാക്കി. ട്രംപ് അവകാശപ്പെട്ടു.

🔹അമേരിക്ക മരവിപ്പിച്ച 12,000 കോടി ഡോളറിന്റെ സ്വത്തുവകകള്‍ ഉടനേ വിട്ടുതരണമെന്നും അമേരിക്കയും ഇസ്രയേലും നടത്തിയ ആക്രമണങ്ങളിലുണ്ടായ നാശനഷ്ടങ്ങള്‍ക്കു നഷ്ടപരിഹാരം വേണമെന്നും ഇറാന്‍ ആവശ്യപ്പെട്ടു. ആക്രമണം ഉടനേ നിര്‍ത്തണമെന്നും ഹോര്‍മൂസ് കടലിടുക്കിന്റെ നിയന്ത്രണാവകാശം തങ്ങള്‍ക്കു വേണമെന്നുമാണ് ഇറാന്റെ ഇതര ആവശ്യങ്ങള്‍.

🔹ഇറാന്റെ പുതിയ പരമോന്നത നേതാവായ മുജ്തബ ഖമനെയിക്ക് മുഖത്തും കാലിനും ഗുരുതരമായി പരിക്കേറ്റതായി അന്താരാഷ്ട്ര വാര്‍ത്താ ഏജന്‍സിയായ റോയിട്ടേഴ്‌സ്. പിതാവായ അയത്തുള്ള അലി ഖമനെയി കൊല്ലപ്പെട്ട ആക്രമണത്തിലാണ് മുജ്തബ ഖമനെയിക്കും പരിക്കേറ്റത്. അദ്ദേഹത്തിന്റെ ഒരു കാല്‍ നഷ്ടപ്പെട്ടെന്നു സംശയിക്കുന്നതായും റിപ്പോര്‍ട്ടില്‍ പറയുന്നു.

🔹സമാധാന ചര്‍ച്ചയ്ക്ക് അമേരിക്കന്‍ വൈസ് പ്രസിഡന്റ് ജെ ഡി വാന്‍സും ഇറാന്‍ പാര്‍ലമെന്റ് സ്പീക്കര്‍ മുഹമ്മദ് ബാഗര്‍ ഗാലിബാഫുമാണ് നേതൃത്വം നല്‍കിയത്. പാകിസ്ഥാന്‍ പ്രധാനമന്ത്രി ഷെഹ്ബാസ് ഷരീഫിന്റെ മധ്യസ്ഥതയിലാണ് ഈ ചര്‍ച്ച. അമേരിക്കന്‍ പ്രതിനിധി സംഘത്തില്‍ വാന്‍സിനൊപ്പം സ്റ്റീവ് വിറ്റ്‌കോഫ്, ജാരഡ് കുഷ്നര്‍ എന്നിവരും, ഇറാന്‍ ഭാഗത്ത് വിദേശകാര്യ മന്ത്രി അബ്ബാസ് അരാഗ്ചിയും പങ്കെടുത്തു. 1979 ലെ ഇറാനിലെ ഇസ്ലാമിക് വിപ്ലവത്തിനു ശേഷം ആദ്യമായാണ് അമേരിക്കയും ഇറാനും തമ്മില്‍ സമാധാന ചര്‍ച്ച നടക്കുന്നത്.

🔹യുകെയില്‍ ഇന്ത്യന്‍ വംശജയായ നഴ്സിനെ ‘ആന്റി’ എന്ന് വിളിച്ചതിനെതിരെ നല്‍കിയ പരാതിയില്‍ 1.8 ലക്ഷം രൂപ നഷ്ടപരിഹാരം നല്‍കാന്‍ ട്രൈബ്യൂണല്‍ ഉത്തരവിട്ടു. വെസ്റ്റ് ലണ്ടന്‍ എന്‍എച്ച്എസ് ട്രസ്റ്റിലെ ഹെല്‍ത്ത് കെയര്‍ അസിസ്റ്റന്റായ ഇല്‍ഡ എസ്റ്റെവ്സിന്‍(64) സ്റ്റാഫ് നഴ്സായ ചാള്‍സ് ഒപ്പോംഗിനെതിരേ നല്‍കിയ പരാതിയിലാണ് ശിക്ഷ.

🔹ചരിത്രദൗത്യം പൂര്‍ത്തിയാക്കി മടങ്ങിയെത്തിയ ആര്‍ട്ടെമിസ് 2 സംഘത്തിന് ഹ്യൂസ്റ്റണിലെ നാസയുടെ ജോണ്‍സണ്‍ സ്പേസ് സെന്ററില്‍ വരവേല്‍പ്. നാല് യാത്രികരും പൂര്‍ണ ആരോഗ്യവാന്മാരാണെന്ന് സ്പേസ് സെന്റര്‍ വിശദമാക്കി. ആശങ്കകളൊന്നുമില്ലാത്ത ദൗത്യമായിരുന്നുവെന്ന് യാത്രികര്‍ പ്രതികരിച്ചു.

🔹ഇന്ത്യന്‍ പ്രീമിയര്‍ ലീഗില്‍ ഡല്‍ഹി ക്യാപിറ്റല്‍സിനെതിരേ ചെന്നൈ സൂപ്പര്‍ കിംഗ്‌സിന് 23 റണ്‍സിന്റെ വിജയം. ചെന്നൈ, ചെപ്പോക്കില്‍ 56 പന്തില്‍ പുറത്താവാതെ 115 റണ്‍സ് നേടിയ സഞ്ജു സാംസന്റെ കരുത്തിലാണ് ഈ നേട്ടം. രണ്ട് വിക്കറ്റ് നഷ്ടത്തില്‍ 212 റണ്‍സാണ് ചെന്നൈ നേടിയത്. മറുപടി ബാറ്റിംഗില്‍ ഡല്‍ഹി 20 ഓവറില്‍ 189ന് എല്ലാവരും പുറത്തായി.ഐഎസ്എല്ലില്‍ കേരള ബ്ലാസ്റ്റേഴ്‌സിന് ആദ്യ ജയം. ബെംഗളൂരു എഫ്‌സിയെ ഒന്നിനെതിരേ രണ്ട് ഗോളുകള്‍ക്കാണു ബ്ലാസ്റ്റേഴ്‌സ് കീഴടക്കിയത്.

🔹ക്യൂബ്സ് എന്റര്‍ടെയ്ന്‍മെന്റ്സിന്റെ ബാനറില്‍ ‘മാര്‍ക്കോ’ എന്ന സൂപ്പര്‍ഹിറ്റ് ചിത്രത്തിന് ശേഷം ആന്റണി വര്‍ഗീസ് പെപ്പെ, ദുഷാര വിജയന്‍, സുനില്‍, കബീര്‍ സിംഗ് എന്നിവരെ കേന്ദ്ര കഥാപാത്രങ്ങളാക്കി ഷരീഫ് മുഹമ്മദ് നിര്‍മ്മിച്ച് പോള്‍ ജോര്‍ജ്ജ് സംവിധാനം ചെയ്യുന്ന ‘കാട്ടാളന്‍’ മെയ് മാസം തിയേറ്ററുകളില്‍. സിനിമയുടെ റിലീസ് അനൗണ്‍സ്മെന്റ് പോസ്റ്റര്‍ സോഷ്യല്‍ മീഡിയയില്‍ വൈറലായി. ആനക്കൊമ്പുകള്‍ക്കും ആയുധ കൂമ്പാരങ്ങള്‍ക്കും നടുവില്‍ ചിത്രത്തിലെ താരങ്ങളെ അണിനിരത്തിക്കൊണ്ടുള്ളതാണ് പുതിയ പോസ്റ്റര്‍. ആനവേട്ടയുടെയും പകയുടെയും പോരാട്ടത്തിന്റേയും കഥ പറയുന്ന ഒരു ഹൈ-വോള്‍ട്ടേജ് ആക്ഷന്‍ ത്രില്ലറാണ് കാട്ടാളന്‍ എന്നാണ് പോസ്റ്റര്‍ സൂചന തന്നിരിക്കുന്നത്. ജഗദീഷ്, സിദ്ധിഖ്, ആന്‍സണ്‍ പോള്‍, രാജ് തിരണ്‍ദാസു, ഷോണ്‍ ജോയ്, റാപ്പര്‍ ബേബി ജീന്‍, ഹനാന്‍ ഷാ, പാര്‍ത്ഥ് തീവാരി, ഷിബിന്‍ എസ്. രാഘവ്, ഹിപ്സ്റ്റര്‍ പ്രണവ് രാജ്, കോള്‍ മീ വെനം തുടങ്ങിയവരും ചിത്രത്തിലുണ്ട്.

🔹നടന്‍ കെന്‍ കരുണാസ് സംവിധായകനായി അരങ്ങേറ്റം കുറിച്ച ചിത്രമാണ് ‘യൂത്ത്’. ഇപ്പോഴിതാ ചിത്രം ഒടിടി സ്ട്രീമിങ്ങിനൊരുങ്ങുകയാണ്. ഏപ്രില്‍ 16 മുതല്‍ സിനിമ ഒടിടിയിലെത്തും. നെറ്റ്ഫ്ലിക്സിലൂടെയാണ് സിനിമ സ്ട്രീമിങ് ആരംഭിക്കുന്നത്. തമിഴ്, മലയാളം, കന്നഡ, തെലുങ്ക്, ഹിന്ദി ഭാഷകളില്‍ സിനിമ നെറ്റ്ഫ്ലിക്സില്‍ ലഭ്യമാകും. ഇതുവരെ 68 കോടിയാണ് സിനിമ ആഗോള തലത്തില്‍ നേടിയത്. കെന്‍, സുരാജ് വെഞ്ഞാറമൂട് എന്നിവരുടെ ഗംഭീര പ്രകടനമാണ് ചിത്രത്തെ അതീവ രസകരമായ സിനിമാനുഭവമാക്കി മാറ്റുന്നത്. ദേവദര്‍ശിനി ചേതന്‍, പ്രിയാന്‍ഷി യാദവ്, മീനാക്ഷി ദിനേശ് എന്നിവരാണ് ചിത്രത്തിലെ മറ്റു പ്രധാന താരങ്ങള്‍. ഈ വര്‍ഷത്തെ തമിഴിലെ ബ്ലോക്ക്ബസ്റ്റര്‍ ചിത്രങ്ങളിലൊന്നായിരുന്നു ഇത്. ചിത്രം കേരളത്തില്‍ പ്രദര്‍ശനത്തിന് എത്തിച്ചത് ദുല്‍ഖര്‍ സല്‍മാന്റെ വേഫറെര്‍ ഫിലിംസ് ആണ്.

💦 ഗുരുജിയുടെ വാക്കുകൾ

സ്വന്തം ശരീരത്തേയും, മനസ്സിനേയും നിങ്ങള്‍ വേണ്ടതുപോലെ ശ്രദ്ധിച്ചില്ല, നിയന്ത്രിച്ചില്ല, അതിന്റെ ഫലമാണ് നിങ്ങള്‍ അനുഭവിക്കുന്നത്. ജീവിതം ഒരിക്കലും നിങ്ങളുടെ ഒരു തരത്തിലുള്ള ദുരവസ്ഥക്കും കാരണമാകുന്നില്ല. ദുഃഖവും, നഷ്ടവും, വേദനയും നിങ്ങളില്‍ നിന്നു തന്നെ നാമ്പെടുക്കുന്നതാണ്. ജീവിതം ആ കാര്യത്തില്‍ തികച്ചും നിരപരാധിയാണ്.
ജീവിതത്തിന്റെ അര്‍ത്ഥം തേടുന്നവരോട്‌ പറയാനുള്ളത്: അതിന് വിശേഷിച്ച് ഒരര്‍ത്ഥവുമില്ല, അതൊരു മഹാ പ്രതിഭാസമാണ്. ഒരു ചട്ടക്കൂട്ടില്‍ നമുക്കതിനെ ഒതുക്കാനാവില്ല. അതിനെല്ലാം അതീതമായൊരു പ്രതിഭാസമാണ് ജീവിതം. നമ്മുടെ മനസ്സുകൊണ്ട് അതിനെ അളന്നു തിട്ടപ്പെടുത്താനാവില്ല. എല്ലാം ഉള്‍ക്കൊള്ളുന്നതാണ് ജീവിതം. പ്രത്യേകിച്ച് ഒരു സംഭവമോ പ്രവര്‍ത്തിയോ അല്ല ജീവിതം – അത് പ്രകൃതി തന്നെയാണ്..

തയ്യാറാക്കിയത്: കപിൽ ശങ്കർ

9 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 12 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 08 | ബുധൻ ✍️ കപിൽ ശങ്കർ

റിട്ട. അധ്യാപിക ഏലിയാമ്മ എബ്രഹാം നിര്യാതയായി

ഗുഡ് സമരിറ്റൻ കമ്മ്യൂണിറ്റി (സ്നേഹതീരം) ഒരുക്കുന്ന “സ്നേഹസാന്ത്വനം – സംഗീതവിരുന്ന്” 2026 ജൂലൈ 12 ഞായറാഴ്ച

1 COMMENT

LEAVE A REPLY Cancel reply

Most Popular

തിരുവനന്തപുരം കോർപ്പറേഷൻ ഹരിത കർമ്മ സേനാംഗങ്ങൾക്ക് പുതിയ യൂണിഫോം നൽകി

കലാനിധി പുരസ്കാരം ഉണ്ണി ഭാസുരിക്ക്

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 08 | ബുധൻ ✍️ കപിൽ ശങ്കർ

റിട്ട. അധ്യാപിക ഏലിയാമ്മ എബ്രഹാം നിര്യാതയായി

Recent Comments

EDITOR PICKS

തിരുവനന്തപുരം കോർപ്പറേഷൻ ഹരിത കർമ്മ സേനാംഗങ്ങൾക്ക് പുതിയ യൂണിഫോം നൽകി

കലാനിധി പുരസ്കാരം ഉണ്ണി ഭാസുരിക്ക്

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 08 | ബുധൻ ✍️ കപിൽ ശങ്കർ

POPULAR POSTS

ഹോർമുസില്‍ കപ്പല്‍ ആക്രമിച്ചതിനു തിരിച്ചടിയായി ഇറാനെ ആക്രമിച്ച്‌ അമേരിക്ക.

2008ലെ അഹമ്മദാബാദ് സ്ഫോടനക്കേസിൽ 38 പ്രതികളുടെ വധശിക്ഷ ഗുജറാത്ത് ഹൈക്കോടതി ശരിവച്ചു

സർക്കാർ ജീവനക്കാരനായ അച്ഛൻ മരിച്ചു, ആശ്രിത നിയമനം നേടിയ അമ്മയെ മകൾ കൊലപ്പെടുത്തി

POPULAR CATEGORY

ABOUT US

FOLLOW US