നനഞ്ഞ വേഴാമ്പൽ ഏതോ
നിർവൃതിയിൽ
മലയിടുക്കുകളിൽ ചേക്കേറി
മലമുഴക്കികളുടെ മുഴക്കൽ
അടുത്ത മഴയുടെ മണത്തിന്
കൊതിച്ചു
മണ്ണിന്റെ നനവുതേടിയൊരു മരം
വേരുകൾനീട്ടി
ആഴങ്ങളിലേക്ക് ഇറങ്ങിപ്പോയി
മഞ്ഞുകോരിയെടുത്ത
കൈക്കുമ്പിളിൽ മുഖംതാഴ്ത്തി
അവൾ ശൂന്യതയുടെ പൂർണ്ണതയിൽ
അലിഞ്ഞുചേർന്നു
പേനയുടെ മൂർച്ചയുള്ള മുനകൾ
ചുവന്നമഷിയിൽ മുങ്ങിനിവർന്നു
വിളറിയ കടലാസുതുണ്ടുകൾ
മേശപ്പുറത്ത് കൊതിയോടെ കാത്തിരുന്നു
മഞ്ഞ കുടഞ്ഞുകുളിച്ച സന്ധ്യ
മൈലാഞ്ചി അരച്ചുതേച്ചു
മന്ത്രമോതിരംചാർത്തി തിളങ്ങിനിന്നു
തിരകളിലൊരു തിര
തീരത്തണയാതെ
പിണങ്ങിനിന്നു
വിതുമ്പുന്ന സൂര്യൻ ഇരുട്ടിന്റെ
പടിക്കെട്ടിറങ്ങി
പകലിനോട് യാത്രപറഞ്ഞു
ഇനിയുംവരുമോയെന്ന് ഏതോ പക്ഷി
ചിലച്ചു
നന്നായിട്ടുണ്ട്