അധികസമയം ഇല്ലന്ന് കേൾക്കവേ
കയറിവരുന്നുണ്ടദൃശ്യനായൊരാൾ
മനസ്സിൽ തെളിയുന്നു
ചോർന്നനിമിഷങ്ങൾ
കഴിഞ്ഞില്ല കടമകൾ
ചെയ്തുതീർക്കുവാൻ
മനോമുകുരത്തിൽ തെളിയും
മുഖങ്ങളെ
തെല്ലൊരതിശയത്തോടെ നോക്കുന്നു
ഇതുവരെ കാണാൻ
കഴിയാത്തതെന്തോ
കണ്ടെടുക്കാൻ മനസ്സുവെമ്പുന്നു !
നാടിനും വീടിനും നാട്ടിടവഴികൾക്കും
തൊടിയിൽ പതിവായി വരുന്ന
പറവകൾ !
കാലിലുരുമ്മുന്ന പൂച്ച കുറിഞ്ഞിയെ
കാരണമില്ലാതെ തോണ്ടിയെറിഞ്ഞതും
പരിഭവക്കെട്ടും പരാതിയും മാത്രമെ-
ന്നാവോളം പുഛിച്ച ഭൈമി മുഖവും
ദൈന്യമായ് നോക്കി നെടുവീർപ്പിടും
മാതാവിൻ സമ്മിശ്രഭാവവും
ഓർമ്മയിൽ !
കള്ളും കരളും തമ്മിലിത്രയടുപ്പമോ
പാടെ കുടിച്ചുചീർത്ത കരളുറപ്പിപ്പോൾ
കല്ലിച്ചുനിർജീവമായിതാ കേൾക്കുന്നു
തീർന്നുപോയ് ജീവിതം
അധികസമയമില്ല!
അവ്യക്ത നിഴലിനെ നോക്കി
മനോഗതം
യാത്ര പറയാനരനിമിഷം തരൂ..!
എക് ട്രാ ടൈമില്ല കളിയാണ് മന്നിൽ
ഫൈനൽ വിസിലൊന്നു മാത്രമേ
ലൈഫ്!
