പ്രിയരേ….!വിഭവ സമൃദ്ധമായ സദ്യയില്ലാതെ എന്തോണം.!!!വരൂ എളുപ്പത്തിൽ ഓണ വിഭവങ്ങള് ഒരുക്കാം.
1.അവിയല്
2. കിച്ചടി
3. ഓലന്
4. കാളന്
5. തോരന്
6. എരിശ്ശേരി
7. പച്ചടി
8. മാങ്ങാ അച്ചാര്
9. നാരങ്ങാ അച്ചാര്
10. ഇഞ്ചിക്കറി
11. പരിപ്പ്
12. സാമ്പാര്
13. രസം
14. പച്ചമോര്
15. പരിപ്പ് പ്രഥമന്
16. പാൽ പായസം
————
17. വാഴയില
18. ഉപ്പ്
19. കുത്തരി ചോറ്
20. കായ നുറുക്ക്
21. ശർക്കര വരട്ടി
22. നെയ്യ്
23. പഴം
24. പപ്പടം
25. വെള്ളം
🔸 അവിയല്
അവിയലില് സാധാരണയായി ഒട്ടുമിക്ക എല്ലാ പച്ചക്കറികളും ഇടാറുണ്ട്.ഇവിടെ നാലുപേർക്കുള്ള ചേരുവകൾ കുറിക്കുന്നു. ആവശ്യാനുസരണം കൂട്ടുകയോ, കുറയ്ക്കുകയോ ചെയ്യുക. ചേന, കായ, വെള്ളരിക്ക, കാരറ്റ്, മുരിങ്ങക്കായ എന്നിവ നീളത്തിൽ അരിഞ്ഞത് (ആകെ 2 കപ്പ്), തേങ്ങ ചിരകിയത് (1 കപ്പ്), ചെറിയ ജീരകം (1/2 ടീസ്പൂൺ), പച്ചമുളക് (4-5 എണ്ണം), മഞ്ഞൾപ്പൊടി (1/2 ടീസ്പൂൺ), കട്ടിത്തൈര് (3-4 ടേബിൾ സ്പൂൺ), വെളിച്ചെണ്ണ (2 ടേബിൾ സ്പൂൺ), കറിവേപ്പില (2 തണ്ട്), ഉപ്പ് (ആവശ്യത്തിന്).തയ്യാറാക്കുന്ന വിധം: പച്ചക്കറികൾ മഞ്ഞൾപ്പൊടിയും ഉപ്പും കുറച്ചു വെള്ളവും ചേർത്ത് കുഴഞ്ഞുപോകാതെ വേവിക്കുക. അതിനുശേഷം തേങ്ങ, ജീരകം, പച്ചമുളക് എന്നിവ വെള്ളം ചേർക്കാതെ ചതച്ചെടുത്ത് പച്ചക്കറിയിലേക്ക് ചേർത്ത് പതുക്കെ ഇളക്കുക. തേങ്ങയുടെ പച്ചമണം മാറുമ്പോൾ തൈര് ചേർത്ത് ചെറുതായി ചൂടാക്കി തീ ഓഫ് ചെയ്യുക. മുകളിലേക്ക് വെളിച്ചെണ്ണയും കറിവേപ്പിലയും ഒഴിച്ച് അടച്ചുവെച്ചാൽ അവിയൽ തയ്യാർ.
🔸കിച്ചടി
മധുരം ഉള്ള കറിയാണിത്. മാമ്പഴം, (3)മുന്തിരിങ്ങ(250gm) ഇവയില് ഏതെങ്കിലും ഇതിനായി ഉപയോഗിക്കുന്നു. മാമ്പഴം പച്ചമുളകും മഞ്ഞള്പ്പൊടിയും ചേര്ത്ത് വേവിക്കുക. പകുതി വേവാകുമ്പോള് ഇതിലേക്ക് അൽപം ശര്ക്കര ചേര്ക്കുക.
തേങ്ങയും (ഒരു കപ്പ്,ചിരകിയത് )ജീരക(അര ടേബിൾ സ്പൂൺ )വും നല്ലപോലെ അരച്ച് ചേര്ക്കുക. ആവശ്യത്തിനു ഉപ്പും ചേര്ക്കുക. വെളിച്ചെണ്ണ ചൂടാക്കി കടുകും കറിവേപ്പിലയും വറ്റല് മുളകും ചേര്ത്ത് കടുക് പൊട്ടിച്ചു കരിയില് ചേര്ത്ത് വാങ്ങാം.
🔸 ഓലന്
കുമ്പളങ്ങ ആണ് ഓലനിലെ പ്രധാന കഷണം. 1കുമ്പളങ്ങ ചെറിയ കഷണങ്ങള് ആക്കി എടുക്കുക. ഒരു പിടി വന്പയര് (ചുമന്ന പയര്) തലേദിവസം വെള്ളത്തിലിട്ടു കുതിര്ത്തതും കുമ്പളങ്ങ കഷണങ്ങളും എരിവിന് അനുസരിച്ചു പച്ചമുളകും കൂടെ വേവിക്കുക.
ഇതിലേക്ക് എണ്ണയും കറിവേപ്പിലയും ഇട്ടാല് ഓലന് ആയി. ചിലയിടങ്ങളില് ഓലനില് തേങ്ങാപ്പാല് ചേര്ത്തും ഉണ്ടാക്കാറുണ്ട്.
🔸 കാളന്
കാളൻ തയ്യാറാക്കാൻ ആദ്യം ഒരു പാത്രത്തിൽ ചെറിയ കഷണങ്ങളാക്കിയ 1 നേന്ത്രക്കായയും 100 ഗ്രാം ചേനയും എടുത്ത് 1/2 ടീസ്പൂൺ മഞ്ഞൾപ്പൊടി, 1 ടീസ്പൂൺ കുരുമുളകുപൊടി, ആവശ്യത്തിന് ഉപ്പ്, 1/2 കപ്പ് വെള്ളം എന്നിവ ചേർത്ത് നന്നായി വേവിച്ചെടുക്കുക. കഷണങ്ങൾ വേകുമ്പോഴേക്കും 1 കപ്പ് ചിരകിയ തേങ്ങ, 1/2 ടീസ്പൂൺ ജീരകം, 3-4 പച്ചമുളക് എന്നിവ അല്പം വെള്ളം ചേർത്ത് നല്ലതുപോലെ മയത്തിൽ അരച്ചെടുക്കണം. ഈ അരപ്പ് വെന്ത കഷണങ്ങളിലേക്ക് ഒഴിച്ച് പച്ചമണം മാറുന്നത് വരെ കുറഞ്ഞ തീയിൽ 2 മിനിറ്റ് തിളപ്പിച്ച ശേഷം, നന്നായി ഉടച്ചെടുത്ത 2 കപ്പ് പുളിയുള്ള കട്ടിത്തൈര് ഇതിലേക്ക് ചേർക്കുക. തൈര് ഒഴിച്ചതിന് ശേഷം കറി പിരിഞ്ഞുപോകാതിരിക്കാൻ തീ ഏറ്റവും കുറച്ചു വെച്ച് തുടർച്ചയായി ഇളക്കിക്കൊണ്ടിരിക്കണം; കറി ചെറുതായി ചൂടായി വരുമ്പോൾ (തിളക്കുന്നതിന് തൊട്ടുമുമ്പ്) തീ അണയ്ക്കുക. അവസാനമായി മറ്റൊരു പാനിൽ 1 ടേബിൾസ്പൂൺ വെളിച്ചെണ്ണ ചൂടാക്കി 1 ടീസ്പൂൺ കടുക്, 1/4 ടീസ്പൂൺ ഉലുവ, 2 വറ്റൽമുളക്, 2 തണ്ട് കറിവേപ്പില എന്നിവ പൊട്ടിച്ച് കറിയിലേക്ക് ഒഴിച്ച് നന്നായി ഇളക്കിയാൽ സ്വാദൂറും കാളൻ തയ്യാർ.
🔸 തോരന്
പയര്, കാബേജ്, ബീന്സ്, ബീട്രൂറ്റ്, കാരറ്റ് തുടങ്ങി എന്തും തോരന് മുഖ്യ ചേരുവയാകാം.
പയർ തോരൻ തയ്യാറാക്കാൻ ആദ്യം 250 ഗ്രാം വൻപയറോ അച്ചാർപയറോ ചെറുതായി അരിഞ്ഞ്, ആവശ്യത്തിന് ഉപ്പും കാൽ ടീസ്പൂൺ മഞ്ഞൾപ്പൊടിയും കാൽ കപ്പ് വെള്ളവും ചേർത്ത് ഒരു പാനിൽ മൂടിവെച്ച് നന്നായി വേവിച്ചെടുക്കുക. പയർ വേകുന്ന സമയം കൊണ്ട് അര കപ്പ് ചിരകിയ തേങ്ങ, 3 പച്ചമുളക് (അല്ലെങ്കിൽ 1 ടീസ്പൂൺ മുളകുപൊടി), 3 ചുവന്നുള്ളി, കാൽ ടീസ്പൂൺ ജീരകം, 2 അല്ലി വെളുത്തുള്ളി എന്നിവ മിക്സിയിൽ വെള്ളം ചേർക്കാതെ ഒന്നു ചതച്ചെടുക്കണം (അരഞ്ഞു പോകരുത്). പയറിലെ വെള്ളം പൂർണ്ണമായും വറ്റിയ ശേഷം ചതച്ചുവെച്ച തേങ്ങക്കൂട്ട് പയറിന് നടുവിലേക്ക് വെച്ച്, പയറുകൊണ്ട് മൂടി കുറഞ്ഞ തീയിൽ 2 മിനിറ്റ് ആവി കയറ്റുക. ശേഷം മറ്റൊരു പാനിൽ 1 ടേബിൾസ്പൂൺ വെളിച്ചെണ്ണ ചൂടാക്കി 1 ടീസ്പൂൺ കടുക്, 2 വറ്റൽമുളക്, ഒരു തണ്ട് കറിവേപ്പില എന്നിവ പൊട്ടിച്ച ശേഷം വെന്ത പയറും തേങ്ങയും ഇതിലേക്ക് ചേർത്ത് ഉയർന്ന തീയിൽ 2 മിനിറ്റ് നന്നായി ഇളക്കി ഉണർത്തിയെടുത്താൽ സ്വാദിഷ്ടമായ പയർ തോരൻ തയ്യാർ.
🔸 എരിശ്ശേരി
ചേരുവകള് മത്തങ്ങ -500 ഗ്രാം വന്പയര് -100 ഗ്രാം വെളുത്തുള്ളി -4 അല്ലി ചുവന്നുള്ളി -2 വറ്റല്മുളക്- 2 ജീരകം -അര ടീസ്പൂണ് മുളകുപൊടി ഒരു ടീസ്പൂണ് മഞ്ഞള്പ്പൊടി -അര ടീസ്പൂണ് തേങ്ങ ചിരകിയത്- ഒരു തേങ്ങയുടേത് ഉപ്പ് -ആവശ്യത്തിന് കടുക് -ആവശ്യത്തിന് വെളിച്ചെണ്ണ -ആവശ്യത്തിന് കറിവേപ്പില -ആവശ്യത്തിന്
ആദ്യം വന്പയര് വേവാന് വയ്ക്കുക. കുക്കറില് വേവിക്കുന്നതാണ് എളുപ്പം. മുക്കാല് വേവാകുമ്പോള് മത്തങ്ങയും മുളക്പൊടി, മഞ്ഞള്പ്പൊടി, ഉപ്പ് ഇവയും ചേര്ക്കുക. മത്തങ്ങ വെന്തുകഴിഞ്ഞാല് അളവില് പറഞ്ഞിരിക്കുന്ന തേങ്ങയില് നിന്നും കാല് ഭാഗം എടുത്തു അതിനോടൊപ്പം ജീരകവും വെളുത്തുള്ളിയും നന്നായി അരച്ച് ചേര്ക്കുക.
ചേരുവകള് നന്നായി തിളപ്പിച്ച് വാങ്ങി വയ്ക്കുക. ഇനി വെളിച്ചെണ്ണയില് വറ്റല്മുളക്, കടുക്, ഉള്ളി, കറിവേപ്പില ഇവ കടുക് വറുത്ത ശേഷം ബാക്കി വച്ചിരിക്കുന്ന തേങ്ങയും ഇതോടൊപ്പം ചേര്ത്ത് വറുക്കുക. ഇളം ചുവപ്പ് നിറമായാല് വാങ്ങി വന്പയര് മത്തങ്ങാ കൂട്ടില് ചേര്ത്ത് ഇളക്കി എടുക്കുക. എരിശ്ശേരി തയ്യാര്.
🔸 പച്ചടി
വെള്ളരിക്ക പച്ചടി തയ്യാറാക്കാൻ ആദ്യം ഒരു കപ്പ് വെള്ളരിക്ക കഷ്ണങ്ങൾ, രണ്ട് പച്ചമുളക്, കാൽ ടീസ്പൂൺ മഞ്ഞൾപ്പൊടി, ആവശ്യത്തിന് ഉപ്പ്, കാൽ കപ്പ് വെള്ളം എന്നിവ ചേർത്ത് അടച്ചുവെച്ച് നന്നായി വേവിച്ച് വെള്ളം വറ്റിച്ചെടുക്കുക. തുടർന്ന് അര കപ്പ് ചിരവിയ തേങ്ങയും കാൽ ടീസ്പൂൺ ജീരകവും അല്പം വെള്ളം ചേർത്ത് നന്നായി അരച്ച ശേഷം, അതിലേക്ക് കാൽ ടീസ്പൂൺ കടുക് കൂടി ചേർത്ത് ചെറുതായി ഒന്ന് ചതച്ചെടുക്കുക. ഈ തേങ്ങ അരപ്പ് വെന്ത വെള്ളരിക്കയിലേക്ക് ചേർത്ത് ചെറുതീയിൽ രണ്ട് മിനിറ്റ് ചൂടാക്കിയ ശേഷം (തിളപ്പിക്കരുത്) തീ ഓഫ് ചെയ്ത് തണുക്കാൻ വെയ്ക്കുക. കൂട്ട് നന്നായി തണുത്ത ശേഷം ഒരു കപ്പ് കട്ടിത്തൈര് നന്നായി ഉടച്ചത് ഇതിലേക്ക് ഒഴിച്ച് ആവശ്യത്തിന് ഉപ്പും ചേർത്ത് ഇളക്കണം. അവസാനമായി ഒരു പാനിൽ വെളിച്ചെണ്ണ ചൂടാക്കി കടുകും, രണ്ട് വറ്റൽമുളകും, ഒരു തണ്ട് കറിവേപ്പിലയും ചേർത്ത് മൂപ്പിച്ചു താളിച്ച് പച്ചടിയിലേക്ക് ഒഴിച്ചാൽ രുചികരമായ വെള്ളരിക്ക പച്ചടി തയ്യാർ.
🔸 മാങ്ങാ അച്ചാര്
ആദ്യമായി മാങ്ങ അരിഞ്ഞ് ഉപ്പ് പുരട്ടി വയ്ക്കുക. നല്ലെണ്ണയില് മുളകും കടുകും കറിവേപ്പിലയും ഇട്ടു പൊട്ടുമ്പോള് മുളകുപൊടിയും കായവും അതിലേക്കിട്ടു വാട്ടി ഉലുവാപ്പൊടി ചേര്ക്കുക. പിന്നീട് മാങ്ങാ ചേര്ത്തിളക്കി ആവശ്യമെങ്കില് അല്പം ഉപ്പും ചേര്ത്ത് വാങ്ങാം.
🔸 നാരങ്ങാ അച്ചാര്
നല്ലെണ്ണയില് നാരങ്ങ വാഴറ്റി എടുക്കുക. വറ്റല്മുളക്, കടുക്, കറിവേപ്പില എന്നിവ പൊട്ടിച്ചു അതില് മുളകുപൊടി, കായം, ഉലുവാപ്പൊടി എന്നിവ ചേര്ത്തിളക്കി ഉപ്പും വെള്ളവും ചേര്ത്ത് തിളപ്പിച്ച് വാങ്ങി വച്ച ശേഷം വാട്ടി വച്ച നാരങ്ങ ചേര്ക്കുക. നാരങ്ങ കറി തയ്യാര്.
🔸ഇഞ്ചിക്കറി
ആദ്യം 100 ഗ്രാം ഇഞ്ചി തൊലി കളഞ്ഞ് വളരെ ചെറുതായി അരിഞ്ഞെടുക്കുക. ഒരു പാനിൽ ആവശ്യത്തിന് വെളിച്ചെണ്ണ ചൂടാക്കി ഈ ഇഞ്ചി കഷ്ണങ്ങൾ നല്ല കടും തവിട്ടുനിറമാകുന്നതുവരെ (crispy ആകുന്നത് വരെ) വറുത്തു കോരി, തണുത്ത ശേഷം മിക്സിയിൽ വെള്ളം ചേർക്കാതെ പൊടിച്ചെടുക്കുക. ആ സമയത്ത് ഒരു വലിയ നാരങ്ങ വലുപ്പത്തിലുള്ള പുളി ഒരു കപ്പ് ചൂടുവെള്ളത്തിൽ പിഴിഞ്ഞ് അരിച്ചുവെക്കണം. ഇഞ്ചി വറുത്ത അതേ എണ്ണയിൽ അര ടീസ്പൂൺ കടുക്, 2 വറ്റൽമുളക്, ഒരു തണ്ട് കറിവേപ്പില, നീളത്തിൽ അരിഞ്ഞ 3 പച്ചമുളക് എന്നിവ ചേർത്ത് മൂപ്പിച്ച ശേഷം അതിലേക്ക് പുളിവെള്ളം, കാൽ ടീസ്പൂൺ മഞ്ഞൾപ്പൊടി, ആവശ്യത്തിന് ഉപ്പ് എന്നിവ ചേർത്ത് നന്നായി തിളപ്പിക്കുക. പുളിവെള്ളം തിളച്ച് പകുതിയായി വറ്റുമ്പോൾ പൊടിച്ചു വെച്ചിരിക്കുന്ന ഇഞ്ചിയും, ഒരു ടീസ്പൂൺ മുളകുപൊടിയും, കാൽ ടീസ്പൂൺ കായപ്പൊടിയും ചേർത്ത് ചെറുതീയിൽ നന്നായി കുറുക്കിയെടുക്കുക. കറി നന്നായി കുറുകി എണ്ണ തെളിഞ്ഞു വരുമ്പോൾ 2 ടേബിൾസ്പൂൺ ചരണ്ടിയ ശർക്കര (അല്ലെങ്കിൽ ശർക്കര പാനി) ചേർത്ത് ഇളക്കി ഒരു മിനിറ്റിനു ശേഷം തീ ഓഫ് ചെയ്താൽ നല്ല നാടൻ ഇഞ്ചിക്കറിയായി.
🔸പരിപ്പ്
ഒരു കപ്പ് ചെറുപയർ പരിപ്പ് ഒരു പാനിലിട്ട് ചെറിയ തീയിൽ ഗോൾഡൻ നിറമാകുന്നതുവരെ നന്നായി വറുത്തെടുക്കുക. വറുത്ത പരിപ്പ് കഴുകി വൃത്തിയാക്കിയ ശേഷം പ്രഷർ കുക്കറിൽ ആവശ്യത്തിന് വെള്ളവും, കാൽ ടീസ്പൂൺ മഞ്ഞൾപ്പൊടിയും, ഒരു ടീസ്പൂൺ വെളിച്ചെണ്ണയും, ആവശ്യത്തിന് ഉപ്പും ചേർത്ത് 2-3 വിസിൽ വരും വരെ നന്നായി വേവിച്ച് ഉടച്ചുവെക്കുക. ഇതിനിടയിൽ അര കപ്പ് ചിരവിയ തേങ്ങ, കാൽ ടീസ്പൂൺ ജീരകം, 3 ചുവന്നുള്ളി, 2 പച്ചമുളക് എന്നിവ അല്പം വെള്ളം ചേർത്ത് നല്ല വെണ്ണപോലെ അരച്ചെടുക്കുക. ഈ തേങ്ങ അരപ്പ് വേവിച്ചുവെച്ചിരിക്കുന്ന പരിപ്പിലേക്ക് ഒഴിച്ച് ആവശ്യത്തിന് വെള്ളവും ചേർത്ത് നന്നായി ഇളക്കി ചെറുതീയിൽ തിളപ്പിക്കുക (അരപ്പ് ചേർത്ത ശേഷം ഒരുപാട് തിളയ്ക്കരുത്). കറി ചെറുതായി തിളച്ചു വരുമ്പോൾ തീ ഓഫ് ചെയ്ത് മാറ്റിവെക്കുക. അവസാനമായി ഒരു പാനിൽ ഒരു ടേബിൾസ്പൂൺ വെളിച്ചെണ്ണ ചൂടാക്കി അര ടീസ്പൂൺ കടുക് പൊട്ടിച്ച്, 2 വറ്റൽമുളക്, ഒരു തണ്ട് കറിവേപ്പില, നീളത്തിൽ അരിഞ്ഞ 2 ചുവന്നുള്ളി എന്നിവ ചേർത്ത് ഗോൾഡൻ നിറമാകുന്നതുവരെ മൂപ്പിച്ചു താളിച്ച് കറിയിലേക്ക് ഒഴിച്ചാൽ സദ്യ ശൈലിയിലുള്ള പരിപ്പ് കറി തയ്യാർ.
🔸 സാമ്പാര്
ആദ്യം അര കപ്പ് തുവരപ്പരിപ്പ് കഴുകി ആവശ്യത്തിന് വെള്ളവും കാൽ ടീസ്പൂൺ മഞ്ഞൾപ്പൊടിയും ഒരു ടീസ്പൂൺ വെളിച്ചെണ്ണയും ചേർത്ത് പ്രഷർ കുക്കറിൽ 3-4 വിസിൽ വരും വരെ നന്നായി വേവിച്ചെടുക്കുക. മറ്റൊരു പാത്രത്തിൽ കഷ്ണങ്ങളാക്കിയ മുരിങ്ങക്കായ (1 എണ്ണം), ഉരുളക്കിഴങ്ങ് (1 ചെറുത്), കാരറ്റ് (1 ചെറുത്), മത്തങ്ങ (അര കപ്പ്), പടവലങ്ങ (അര കപ്പ്), തക്കാളി (1 എണ്ണം), പച്ചമുളക് (2 എണ്ണം) എന്നിവ ആവശ്യത്തിന് വെള്ളവും ഉപ്പും ചേർത്ത് വേവിക്കാൻ വെയ്ക്കുക; കഷ്ണങ്ങൾ പകുതി വേവാകുമ്പോൾ അതിലേക്ക് ഒരു നെല്ലിക്ക വലുപ്പത്തിൽ എടുത്ത പുളി കാൽ കപ്പ് വെള്ളത്തിൽ പിഴിഞ്ഞതും, വഴുതനങ്ങ (1 ചെറുത്), വെണ്ടയ്ക്ക (3 എണ്ണം ചെറുതായി അരിഞ്ഞ് വെളിച്ചെണ്ണയിൽ ചെറുതായി വഴറ്റിയത്) എന്നിവയും ചേർത്ത് നന്നായി വേവിക്കുക. കഷ്ണങ്ങൾ വെന്തുകഴിഞ്ഞാൽ ഇതിലേക്ക് 2 ടേബിൾസ്പൂൺ സാമ്പാർ പൊടിയും കാൽ ടീസ്പൂൺ കായപ്പൊടിയും ചേർത്ത് പച്ചമണം മാറുന്നത് വരെ 2 മിനിറ്റ് തിളപ്പിച്ച ശേഷം, വേവിച്ചുവെച്ചിരിക്കുന്ന പരിപ്പ് ഇതിലേക്ക് ഒഴിച്ച് നന്നായി ഇളക്കി ചെറുതീയിൽ ഒരു മിനിറ്റ് കൂടി തിളപ്പിച്ചു വാങ്ങുക. അവസാനമായി ഒരു പാനിൽ ഒരു ടേബിൾസ്പൂൺ വെളിച്ചെണ്ണ ചൂടാക്കി അര ടീസ്പൂൺ കടുക്, കാൽ ടീസ്പൂൺ ഉലുവ, 2 വറ്റൽമുളക്, 1 തണ്ട് കറിവേപ്പില, 3 ചുവന്നുള്ളി ചെറുതായി അരിഞ്ഞത് എന്നിവ ചേർത്ത് മൂപ്പിച്ചു താളിച്ച് സാമ്പാറിലേക്ക് ഒഴിച്ച് അടച്ചുവെച്ചാൽ ചോറിനൊപ്പം കഴിക്കാൻ സാമ്പാർ തയ്യാർ.
🔸 പച്ചമോര്
നല്ലതു പോലെ പുളിച്ച തൈര് കട്ടയില്ലാതെ ഉടച്ചെടുക്കുക. അര ലിറ്റര് തൈരിന് അര ലിറ്റര് വെള്ളം എന്ന അളവില് പച്ചവെള്ളം ചേര്ത്ത് യോജിപ്പിക്കുക. ഇതിലേക്ക് ഏഴ് പച്ചമുളക്, അഞ്ച് ചെറിയ ഉള്ളി, ഒരു വലിയ കഷണം ഇഞ്ചി എന്നിവ ചതച്ചു ചേര്ക്കുക. ഇതിലേക്ക് ഒരു തണ്ട് കറിവേപ്പില കൈകൊണ്ട് തിരുമ്മി ഇടുക.
🔸 രസം
ഒരു വലിയ നെല്ലിക്ക വലുപ്പത്തിലുള്ള പുളി അര കപ്പ് ചൂടുവെള്ളത്തിൽ നന്നായി പിഴിഞ്ഞ് അരിച്ചുവെക്കുക. ഒരു മിക്സിയുടെ ചെറിയ ജാറിലേക്ക് ഒരു ടീസ്പൂൺ കുരുമുളക്, ഒരു ടീസ്പൂൺ ജീരകം, 5 അല്ലി വെളുത്തുള്ളി, ഒരല്ലി കറിവേപ്പില എന്നിവ ചേർത്ത് വെള്ളം ചേർക്കാതെ ചതച്ചെടുക്കുക. തുടർന്ന് ഒരു പാത്രത്തിൽ പുളിവെള്ളം, നന്നായി കൈകൊണ്ട് ഉടച്ചെടുത്ത ഒരു വലിയ തക്കാളി, ആവശ്യത്തിന് ഉപ്പ്, കാൽ ടീസ്പൂൺ മഞ്ഞൾപ്പൊടി, ഒരു കപ്പ് വെള്ളം എന്നിവ ചേർത്ത് നന്നായി തിളപ്പിക്കുക. പുളിയുടെ പച്ചമണം മാറുമ്പോൾ ചതച്ചുവെച്ചിരിക്കുന്ന കുരുമുളക്-വെളുത്തുള്ളി കൂട്ടും കാൽ ടീസ്പൂൺ കായപ്പൊടിയും ചേർത്ത് ചെറുതീയിൽ ഒരു മിനിറ്റ് കൂടി തിളപ്പിച്ച് വാങ്ങി വെക്കുക (ഒരുപാട് തിളച്ചുപോകരുത്). അവസാനമായി ഒരു പാനിൽ ഒരു ടേബിൾസ്പൂൺ വെളിച്ചെണ്ണ ചൂടാക്കി അര ടീസ്പൂൺ കടുക്, രണ്ട് വറ്റൽമുളക്, കുറച്ചു കറിവേപ്പില, രണ്ട് ചുവന്നുള്ളി അരിഞ്ഞത് എന്നിവ ചേർത്ത് മൂപ്പിച്ചു താളിച്ച് രസത്തിലേക്ക് ഒഴിച്ചാൽ നല്ല നാടൻ രസം തയ്യാർ.
🔸 പരിപ്പ് പ്രഥമന്
ചേരുവകള് ചെറുപയര് പരിപ്പ് -250 ഗ്രാം ശര്ക്കര -500 ഗ്രാം നെയ്യ് -100 ഗ്രാം അണ്ടിപ്പരിപ്പ് -50 ഗ്രാം കിസ്മിസ് -25 ഗ്രാം ഏലക്കാപ്പൊടി -5 ഗ്രാം ചുക്കുപൊടി -5 ഗ്രാം തേങ്ങ -2 ഉണങ്ങിയ തേങ്ങ -1
തയ്യാറാക്കുന്ന വിധം:
പരിപ്പ് കഴുകി വറുത്ത ശേഷം നന്നായി വേവിക്കുക. കുക്കറില് വേവിക്കുന്നതാണ് എളുപ്പം. ഇതിലേക്ക് ശര്ക്കര ഉരുക്കിയരിച്ചത് ചേര്ത്തു വെള്ളം നന്നായി വറ്റുമ്പോള് പകുതി നെയ്യൊഴിച്ച് വരട്ടുക. തേങ്ങാ ചിരകി ഒന്നാംപാല് മാറ്റി വയ്ക്കുക.
6 കപ്പ് വെള്ളത്തില് രണ്ടാം പാല് പിഴിഞ്ഞ് വരട്ടിയെടുത്ത പരിപ്പിലേക്ക് ചേര്ത്തു നന്നായിളക്കി യോജിപ്പിക്കുക. വെള്ളം വറ്റി വരുമ്പോള് ഒന്നാം പാല് ചേര്ത്തു ഏലക്കാപ്പൊടി ചുക്കുപൊടി എന്നിവ ചേര്ത്തു നന്നായി ചൂടാക്കി വാങ്ങുക.
ചെരുതായി അരിഞ്ഞ കൊട്ടത്തേങ്ങ, അണ്ടിപ്പരിപ്പ്, കിസ്മിസ് ഇവ ബാക്കിയുള്ള നെയ്യില് വറുത്തു ചേര്ക്കുക. പരിപ്പ് പ്രഥമന് തയ്യാര്.
🔸പാൽ പായസം
പുഴുകലരി 1 കപ്പ് പാൽ 4 കപ്പ് വെള്ളം 3 കപ്പ് പഞ്ചസാര 1 കപ്പ്
അരി നന്നായി കഴുകി വേവിക്കുക പാതി വേവിനു 2 കപ്പു പാലു ചേർത്തു വേവിക്കുക നന്നായി വെന്താൽ അതിൽ ബാക്കി പാലു ഒഴിച് വേവിക്കുക പഞ്ചസാര ചേർക്കുക. നെയ്യിൽ കദലിപഴ്ം വഴയ്റ്റി ചേർകുക അൽപം ഏലക്ക ചേർക്കുക രുചി കരമായ പായസം തയ്യാർ.
ഇനിയും എണ്ണ ചൂടാക്കി പപ്പടം വറുത്ത് 17 മുതൽ 25 വരെയുള്ളവയും എടുത്ത് സദ്യ കഴിക്കാൻ ഇരുന്നോളൂ..
എല്ലാം വയറു നിറയെ കഴിച്ചിട്ട് മനസും നിറയട്ടെ 😍
