📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 22 | ഞായർ ✍ കപിൽ ശങ്കർ

🔹എൽഡിഎഫിന്റെ തെരഞ്ഞെടുപ്പ് പ്രചരണത്തിന് ശക്തി പകരാൻ മുഖ്യമന്ത്രി പിണറായി വിജയൻ സംസ്ഥാന വ്യാപക പര്യടനത്തിന് ഒരുങ്ങുന്നു. തിങ്കളാഴ്ച പത്തനംതിട്ടയിൽ ആരംഭിക്കുന്ന പര്യടനം ഏപ്രിൽ മൂന്നുവരെ നീളും. ഈ കാലയളവിൽ 48 കേന്ദ്രങ്ങളിലായി അദ്ദേഹം പൊതുയോഗങ്ങളിൽ സംസാരിക്കും.
പര്യടനത്തിന്റെ ഭാഗമായി ഓരോ ദിവസവും നാല് കേന്ദ്രങ്ങളിൽ പൊതുയോഗങ്ങളിൽ പങ്കെടുക്കും. 24-ന് ഇടുക്കി, 25ന് കോട്ടയം, 26ന് എറണാകുളം, 27-ന് തൃശൂർ, 28-ന് പാലക്കാട്, 29-ന് മലപ്പുറം, 30-ന് കൊല്ലം, 31-ന് തിരുവനന്തപുരം, ഏപ്രിൽ ഒന്നിന് ആലപ്പുഴ, രണ്ടിന് കോഴിക്കോട്, മൂന്നിന് കണ്ണൂർ എന്നിവിടങ്ങളിലാണ് മുഖ്യമന്ത്രിയുടെ പരിപാടികൾ. ഇതിനോടനുബന്ധിച്ച് സിപിഐ എം ദേശീയ-സംസ്ഥാന നേതാക്കളും വിവിധ ജില്ലകളിൽ പൊതുയോഗങ്ങളിൽ പങ്കെടുക്കും. ജനറൽ സെക്രട്ടറി എം എ ബേബി 28-ന് കണ്ണൂരിൽ നിന്ന് പ്രചാരണത്തിന് തുടക്കമിടും. തുടർന്ന് കാസർകോട്, കോഴിക്കോട്, വയനാട്, മലപ്പുറം, തൃശൂർ, എറണാകുളം, കോട്ടയം, തിരുവനന്തപുരം, കൊല്ലം എന്നിവിടങ്ങളിൽ അദ്ദേഹം സംസാരിക്കും.
പൊളിറ്റ് ബ്യൂറോ അംഗം എ വിജയരാഘവൻ 29-ന് തിരുവനന്തപുരം ജില്ലയിലെ പരിപാടികളിൽ പങ്കെടുക്കും. തുടർന്ന് ആലപ്പുഴ, കൊല്ലം, എറണാകുളം, വയനാട്, കോഴിക്കോട്, പാലക്കാട്, തൃശൂർ, മലപ്പുറം ജില്ലകളിലും പൊതുയോഗങ്ങളിൽ പങ്കെടുക്കും.
മുൻ ജനറൽ സെക്രട്ടറി പ്രകാശ് കാരാട്ട് 30-ന് തിരുവനന്തപുരം ജില്ലയിൽ പ്രചാരണ പരിപാടികളിൽ പങ്കെടുക്കും. തുടർന്ന് കൊല്ലം, കോട്ടയം, എറണാകുളം, പാലക്കാട്, കോഴിക്കോട്, കണ്ണൂർ, കാസർകോട് ജില്ലകളിലായി പര്യടനം തുടരും.
പൊളിറ്റ് ബ്യൂറോ അംഗം ബൃന്ദാ കാരാട്ട് 27-ന് തിരുവനന്തപുരം ജില്ലയിൽ പ്രചാരണത്തിന് തുടക്കം കുറിക്കും. തുടർന്ന് പത്തനംതിട്ട, കൊല്ലം, ആലപ്പുഴ, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ ജില്ലകളിലും പൊതുയോഗങ്ങളിൽ പങ്കെടുക്കും.
പൊളിറ്റ് ബ്യൂറോ അംഗം വിജൂ കൃഷ്ണൻ 28-ന് പത്തനംതിട്ടയിൽ നിന്ന് പ്രചാരണ പരിപാടികൾ ആരംഭിക്കും. തുടർന്ന് കോട്ടയം, ഇടുക്കി, എറണാകുളം, പാലക്കാട്, തൃശൂർ, കോഴിക്കോട്, വയനാട്, കാസർകോട്, കണ്ണൂർ ജില്ലകളിൽ പൊതുയോഗങ്ങളിൽ പങ്കെടുക്കും.
പൊളിറ്റ് ബ്യൂറോ അംഗം മറിയം ധാവ്‌ളെ 30-ന് കണ്ണൂരിൽ നിന്ന് പ്രചാരണത്തിന് തുടക്കം കുറിക്കും. തുടർന്ന് കോഴിക്കോട്, മലപ്പുറം, എറണാകുളം, ഇടുക്കി, ആലപ്പുഴ, കൊല്ലം, തിരുവനന്തപുരം ജില്ലകളിൽ പൊതുയോഗങ്ങളിൽ പങ്കെടുക്കും.
സിപിഐ എം നേതാവ് സുഭാഷിണി അലി 30-ന് പാലക്കാട് ജില്ലയിലെ പരിപാടികളിൽ പങ്കെടുക്കും. തുടർന്ന് എറണാകുളം, ആലപ്പുഴ, പത്തനംതിട്ട, തിരുവനന്തപുരം, കാസർകോട്, കണ്ണൂർ, പാലക്കാട് ജില്ലകളിൽ പൊതുയോഗങ്ങളിൽ സംസാരിക്കും.
ഇതോടെ സംസ്ഥാനത്ത് എൽഡിഎഫിന്റെ തെരഞ്ഞെടുപ്പ് പ്രചരണം ശക്തമാകുകയാണ്.

🔹നിയമസഭാ തെരഞ്ഞെടുപ്പിനുള്ള നാമനിർദേശപത്രികാ സമർപ്പണം തിങ്കളാഴ്ച അവസാനിക്കും. പ്രമുഖ മുന്നണി സ്ഥാനാർഥികൾ കഴിഞ്ഞ ദിവസം പത്രിക സമർപ്പിച്ചിരുന്നു. തെരഞ്ഞെടുപ്പ് പ്രഖ്യാപിച്ച ശേഷം ആറു പ്രവർത്തി ദിവസങ്ങൾ മാത്രമാണ് പത്രിക സമർപ്പിക്കാനായി സ്ഥാനാർഥികൾക്ക് ലഭിച്ചത്.ചൊവ്വാഴ്ചയാണ് പത്രികകളുടെ സൂക്ഷ്മ പരിശോധന. നാമനിർദേശ പത്രിക പിൻവലിക്കാനുള്ള അവസാന ദിവസം വ്യാഴാഴ്ചയാണ്. കൂടാതെ വോട്ടർപട്ടികയിൽ ഇതുവരെ പേര് ചേർത്തിട്ടില്ലാത്തവർക്ക് പട്ടികയിൽ പേര് ചേർക്കാനുള്ള അവസാന തീയതിയും നാളെയാണ്.
അവധി ദിനമായ ഇന്ന് പരമാവധി സ്ഥലങ്ങളിൽ പ്രചാരണ പരിപാടികളുമായി സജീവമാകാനാണ് സ്ഥാനാര്‍ഥികള്‍ ലക്ഷ്യമിടുന്നത്. തിരുവനന്തപുരം സെന്‍ട്രൽ മണ്ഡലത്തിലും മലപ്പുറത്തുമടക്കം പലയിടത്തും ശനിയാഴ്ചയാണ് ഇടതുമുന്നണി സ്ഥാനാര്‍ഥികളെ പ്രഖ്യാപിച്ചത്.

🔹ഇന്ത്യൻ സമ്പദ്‌വ്യവസ്ഥ വലിയ വിലക്കയറ്റ ഭീഷണി നേരിടുകയാണെന്ന് ലോക്സഭ പ്രതിപക്ഷ നേതാവ് രാഹുൽ ഗാന്ധി. ആഗോള വിപണിയിൽ അസംസ്‌കൃത എണ്ണവില വർധിക്കുയാണെന്നും രൂപയുടെ മൂല്യം ഇടിയുകയാണെന്നും രാഹുൽ പറഞ്ഞു.ഈ സാഹചര്യത്തിൽ സാമ്പത്തിക വെല്ലുവിളികൾ നേരിടുന്നതിന് മോദി സർക്കാരിന് കൃത്യമായ ദിശാബോധമോ തന്ത്രമോ ഇല്ലെന്നും രാഹുൽ എക്സിൽ കുറിച്ചു.
അമേരിക്കയും ഇസ്രയേലും ഇറാനും തമ്മിലുള്ള യുദ്ധം ആഗോള വിപണിയിൽ അസംസ്‌കൃത എണ്ണവില വർധിപ്പിക്കുകയും ഇത് ഡോളറിനെതിരെ രൂപയുടെ മൂല്യം റെക്കോർഡ് താഴ്ചയായ 93.53-ലേക്ക് കൂപ്പുകുത്തിക്കുകയും ചെയ്തു.
അത് ഉടൻതന്നെ 100-ലേക്ക് എത്തിയേക്കാമെന്നും അദ്ദേഹം പറഞ്ഞു. ഇത് വരാനിരിക്കുന്ന വലിയ സാമ്പത്തിക പ്രതിസന്ധിയുടെ വ്യക്തമായ സൂചനയാണെന്നും രാഹുൽ ചൂണ്ടിക്കാട്ടി.

🔹തുടർച്ചയായ രണ്ടാം വർഷവും രാജ്യത്തിലെ ഏറ്റവും മികച്ച വൈദ്യുത വിതരണ സ്ഥാപനമെന്ന നേട്ടം അദാനി ഗ്രൂപ്പിന്റെ ഭാഗമായ അദാനി ഇലക്ട്രിസിറ്റി മുംബൈ ലിമിറ്റഡിന്. കേന്ദ്ര വൈദ്യുതി മന്ത്രാലയവും ആർഇസി ലിമിറ്റഡും ചേർന്ന് പുറത്തിറക്കിയ റാങ്കിങിലാണ് 92.5 സ്കോർ ചെയ്ത് അദാനി ഇലക്ട്രിസിറ്റി ഒന്നാം സ്ഥാനത്തെത്തിയത്.
തുടർച്ചയായി രണ്ടാം വർഷവും ഒന്നാം സ്ഥാനം നിലനിർത്താൻ സാധിച്ചത് ടീമിന്റെ സ്ഥിരതയും കൃത്യതയാർന്ന പ്രവർത്തന രീതിയുമാണ് തെളിയിക്കുന്നത് എന്ന് മാനേജിംഗ് ഡയറക്ടറും സിഇഒയുമായ കന്ദർപ്പ് പട്ടേൽ പറഞ്ഞു. രാജ്യത്തെ 66 വൈദ്യുതി വിതരണ കമ്പനികളെ വിലയിരുത്തിയത്തിൽ നിന്നാണ് അദാനി ഇലക്ട്രിസിറ്റി ഒന്നാം സ്ഥാനത്തെത്തിയത്.
മുംബൈയിലെ 30 ലക്ഷത്തിലധികം ഉപഭോക്താക്കൾക്ക് സേവനം നൽകുന്ന കമ്പനി ഉപഭോക്തൃ സേവന രംഗത്ത് എ+ റേറ്റിംഗ് നേടി. കൂടാതെ വൈദ്യുതി വിതരണത്തിലെ വിശ്വാസ്യത, കൃത്യമായ ബില്ലിംഗ്, വേഗത്തിലുള്ള പരാതി പരിഹാരം മുതലായ വിഷയങ്ങളിലും ശ്രദ്ധേയ പ്രകടനം കാഴ്ചവച്ചു.

🔹തെരഞ്ഞെടുപ്പ് പ്രചാരണങ്ങൾ മുറുകുകയാണ്. നിയമസഭ തെരഞ്ഞെടുപ്പിൽ മത്സരിക്കാനായി കോഴിക്കോട് നിന്ന് 39 പേർ വിവിധ മണ്ഡലങ്ങളിലെ വരണാധികാരികൾ, ഉപവരണാധികാരികൾ മുമ്പാകെ നാമനിർദേശ പത്രിക സമർപ്പിച്ചു. കോഴിക്കോട് നോർത്ത് നാല്, കോഴിക്കോട് സൗത്ത് ഒന്ന്, ബേപ്പൂർ രണ്ട്, എലത്തൂർ മൂന്ന്, കുന്ദമംഗലം മൂന്ന്, കൊടുവള്ളി മൂന്ന്, തിരുവമ്പാടി നാല്, ബാലുശ്ശേരി നാല്, കൊയിലാണ്ടി മൂന്ന്, വടകര മൂന്ന്, കുറ്റ്യാടി രണ്ട്, പേരാമ്പ്ര മൂന്ന്, നാദാപുരം നാല് എന്നിങ്ങനെയാണ് നാമനിർദ്ദേശ പത്രികകൾ സമർപ്പിച്ചവരുടെ എണ്ണം.ആകെ 73 സെറ്റ് പത്രികകളാണ് സമർപ്പിച്ചത്. കോഴിക്കോട് നോർത്ത് മണ്ഡത്തിൽ തോട്ടത്തിൽ രവീന്ദ്രൻ (സി.പി.ഐ.എം), നവ്യാ ഹരിദാസ് (എൻ.ഡി.എ) എന്നിവർ ഓരോ സെറ്റ് വീതവും അഡ്വ. കെ ജയന്ത് (ഐ.എൻ.സി) മൂന്ന് സെറ്റും സജീന (സോഷ്യലിസ്റ്റ് പാർട്ടി) രണ്ട് സെറ്റും പത്രികകൾ വീതമാണ് വരണാധികാരിയായ സബ് കലക്ടർ എസ് ഗൗതം രാജ് മുമ്പാകെ സമർപ്പിച്ചത്.
കോഴിക്കോട് സൗത്ത് നിയോജകമണ്ഡലത്തിൽ അഹമ്മദ് ദേവർകോവിൽ (ഐ.എൻ.എൽ) വരണാധികാരിയായ ജില്ലാ വ്യവസായ കേന്ദ്രം മാനേജർ കെ സജിത്കുമാർ മുമ്പാകെ ഒരു സെറ്റ് നാമനിർദ്ദേശ പത്രിക സമർപ്പിച്ചു. ബേപ്പൂർ നിയോജകമണ്ഡലത്തിൽ പി എ മുഹമ്മദ് റിയാസ് മൂന്ന് സെറ്റും (സി.പി.ഐ.എം) ഗിരീഷ് കുമാർ (സി.പി.ഐ.എം) ഒരു സെറ്റും നാമനിർദ്ദേശ പത്രികകൾ എൽ.എസ്.ജി.ഡി ജോയിന്റ് ഡയറക്ടർ ടി ജെ അരുൺ മുമ്പാകെ സമർപ്പിച്ചു. എലത്തൂർ മണ്ഡലത്തിൽ ശ്രീകുമാർ (എസ്.ഐ.യു.സി) രണ്ട് സെറ്റും വിദ്യ ബാലകൃഷ്ണൻ (യു.ഡി.എഫ്) ടി ദേവദാസ് (ബി.ജെ.പി) എന്നിവർ ഓരോ സെറ്റും പത്രികകൾ സമർപ്പിച്ചു.

🔹നിയമസഭാ തെരഞ്ഞെടുപ്പു നടക്കുന്ന ഏപ്രിൽ ഒമ്പതിന് നെഗോഷ്യബിൾ ഇൻസ്ട്രുമെന്‍റ് ആക്ട് അനുസരിച്ച് പൊതു അവധി പ്രഖ്യാപിച്ച് ഉത്തരവായി.
സംസ്ഥാനത്തെ വാണിജ്യ-സ്വകാര്യ സ്ഥാപനങ്ങൾ അടക്കമുള്ളിടങ്ങളിലെ എല്ലാ ജീവനക്കാർക്കും ശന്പളത്തോടു കൂടിയഅവധിയായിരിക്കും.
കേരള ഷോപ്സ് ആൻഡ് കൊമേഴ്സ്യൽ എസ്റ്റാബ്ലിഷ്മെന്‍റ് ആക്ട് പ്രകാരം എല്ലാ സ്വകാര്യ സംരംഭങ്ങൾ, സ്വകാര്യ വ്യാവസായിക കേന്ദ്രങ്ങൾ, മറ്റു സ്വകാര്യ സ്ഥാപനങ്ങൾ എന്നിവക്കും അവധി ബാധകമായിരിക്കും.എല്ലാ ജീവനക്കാർക്കും ശമ്പളത്തോടുകൂടിയ അവധി നൽകണം. നിയോജക മണ്ഡലത്തിനു പുറത്തു ജോലി ചെയ്യുന്ന ദിവസവേതന തൊഴിലാളികൾ, താത്കാലിക തൊഴിലാളികൾ ഉൾപ്പെടെയുള്ള ജീവനക്കാർക്ക് ശന്പളത്തോടു കൂടിയ അവധി അനുവദിക്കണമെന്നും ഉത്തരവിൽ പറയുന്നു.

🔹തിരുവനന്തപുരം മെഡിക്കൽ കോളജ് ആശുപത്രി ഐസിയുവിൽ തീപിടിച്ച സംഭവത്തിൽ ഡിഎംഇയ്ക്ക് റിപ്പോർട്ട് നൽകി സൂപ്രണ്ട്. തീപിടിത്തത്തിന് ശേഷം രോഗികളെ മാറ്റിയത് കൃത്യമായ ജീവൻരക്ഷാ സംവിധാനങ്ങളോടെയെന്ന് റിപ്പോർട്ടിൽ വ്യക്തമാക്കുന്നു.തീപിടിത്തമുണ്ടായ ദിവസവും അടുത്ത ദിവസവും ആശുപത്രിയിൽ സംഭവിച്ച മണങ്ങൾ സംബന്ധിച്ചുള്ള വിവരങ്ങളും കൈമാറി. അഞ്ച് പേരുടെയും മരണത്തിന് കാരണം ഗുരുതര പരിക്കുകളെ തുടർന്ന് സ്ഥിതി വഷളായതെന്നാണ് നിഗമനം.
തീപിടിത്തമുണ്ടായ ഐസിയുവിലെ വെന്‍റിലേറ്ററിലുണ്ടായിരുന്നവർക്ക് അമ്പ്യൂ ബാഗ് സപ്പോർട്ടും ഓക്സിജൻ സഹായവും നൽകിയിരുന്നു. പോസ്റ്റ്മോർട്ടം റിപ്പോർട്ട് കൂടി ലഭിച്ചാൽ മാത്രമേ കൃത്യമായ മരണകാരണം കണ്ടെത്താനാകൂ എന്നും റിപ്പോർട്ടിൽ പറ‍യുന്നു. ‌രോഗികളെ മാറ്റുന്നതിനിടെ ദേഹാസ്വാസ്ഥ്യം അനുഭവപ്പെട്ട ഒൻപത് ജീവനക്കാർക്കും ചികിത്സ നൽകിയെന്നാണ് ന്യൂറോ സർജറി, സർജറി വിഭാഗം മേധാവിമാർ സൂപ്രണ്ടിന് നൽകിയ റിപ്പോർട്ടിൽ വ്യക്തമാക്കുന്നു.

🔹യാത്രയ്ക്കിടെ കാറിന് തീപിടിച്ചു. ദമ്പതികൾ അദ്ഭുതകരമായി രക്ഷപ്പെട്ടു. കാർ പൂർണമായി കത്തി നശിച്ചു. ദേശീയ പാതയിൽ പുന്നപ്ര പറവൂരിൽ ഇന്നലെ ഉച്ചയോടെയായിരുന്നു സംഭവം.കരുവാറ്റ രേഖാലയം വീട്ടിൽ പ്രദീപ്, ഭാര്യ രേഖ എന്നിവരാണ് കാറിലുണ്ടായിരുന്നത്. കരുവാറ്റയിൽനിന്ന് ആലപ്പുഴയിലേക്ക് പോകുന്നതിനിടെ കാറിൽനിന്ന് പുക ഉയരുകയായിരുന്നു. ഉടൻതന്നെ കാർ നിർത്തി ദമ്പതികൾ പുറത്തിറങ്ങിയതിനാൽ അപകടം ഒഴിവായി.
ആലപ്പുഴയിൽനിന്നെത്തിയ ഫയർഫോഴ്സ് സംഘമാണ് തീയണച്ചത്. ഷോർട്ട് സർക്യൂട്ടാണ് അപകട കാരണമെന്നാണ് പ്രാഥമിക നിഗമനം.

🔹 മാങ്ങാ പറിക്കുന്നതിനിടെ വൈദ്യുത ലൈനിൽ ഇരുമ്പ് തോട്ടി മുട്ടി ഷോക്കേറ്റ് സ്കൂൾ വിദ്യാർഥിക്ക് ദാരുണാന്ത്യം.സ്കൂൾ പരിസരത്തെ മാവിൽ നിന്നും സുഹൃത്തുക്കൾക്കൊപ്പം മാങ്ങാ പറിക്കുന്നതിനിടെയാണ് സംഭവം.11 കെ.വി ലൈനിൽ നിന്നുമാണ് കുട്ടിക്ക് ഷോക്കേറ്റതായാണ് വിവരം. കോട്ടയം കൂരോപ്പട ഇടയ്ക്കാട്ടുകുന്ന് ഗവൺമെൻ്റ് വി എച്ച് എസ് സ്കൂൾ പരിസരത്ത് ഇന്നലെ ഉച്ചകഴിഞ്ഞ് 3.30 നാണ് സംഭവം.
കൂരോപ്പടയിലെ താമസിക്കുന്ന ബീഹാർ സ്വദേശി വഷിഷ്ഠ ഷാ യുടെ മകൻ ഉമേഷ് കുമാർ (14) ആണ് മരിച്ചത്.ഷോക്കേറ്റ ഉടനെ കുട്ടിയെ പാമ്പാടി താലൂക്ക് ആശുപത്രിയിലേക്ക് കൊണ്ടുപോയെങ്കിലും മരിച്ചു.
കൂരോപ്പട ഇടയ്ക്കാട്ട്കുന്ന് സ്കൂളിലെ എട്ടാം ക്ലാസ് വിദ്യാർഥിയാണ് ഉമേഷ്.
ഉമേഷിൻ്റെ പിതാവ് വർഷങ്ങളായി കൂരോപ്പട ചെന്നാമറ്റത്തുള്ള വീടിൻ്റെ കാര്യസ്ഥനായി ജോലി ചെയ്തു വരികയാണ്.അച്ഛൻ :വസിഷ്ട് ഷാ അമ്മ :പരേതയായ രഞ്ജു ദേവി സഹോദരങ്ങൾ :വിമലേഷ് കുമാർ, രാകേഷ് കുമാർ.

🔹അമിതവേഗത്തിലെത്തിയ ഥാർ നിയന്ത്രണം നഷ്ടപ്പെട്ട് കുഴിയിലേക്ക് മറിഞ്ഞ് അഞ്ച് പേര്‍ക്ക് പരിക്കേറ്റു. ശനിയാഴ്ച രാവിലെ കുടപ്പന മൂടിന് സമീപം നുള്ളിയോടില്‍ വച്ചായിരുന്നു അപകടം നടന്നത്.
വാഹനത്തിലുണ്ടായിരുന്ന റിയാസ് (25), മുഹമ്മദ് ഷാഫി (22), സുഹൈന്‍ (14), സിയാന്‍ (12), മുഹമ്മദ് (11 ) എന്നിവർക്കാണ് അപകടത്തിൽ പരിക്കേറ്റത്. കുടപ്പന മൂട്ടില്‍ നിന്നും നെടുമങ്ങാടേക്ക് പോവുകയായിരുന്ന വാഹനം നിയന്ത്രണം വിട്ട് 25 അടി താഴ്ചയിലുള്ള കുഴിയിലേക്ക് പതിക്കുകയായിരുന്നു.
കുഴിയിലേക്ക് വീണ വാഹനം വീടിന് സമീപത്തെ മരത്തിലിടിച്ച് നിന്നു. അപകടത്തെ തുടർന്ന് ഏറെ നേരത്തെ പരിശ്രമത്തിനൊടുവിലാണ് വാഹനത്തിലുണ്ടായിരുന്നവരെ നാട്ടുകാർ പുറത്തെടുത്തത്. പരിക്കേറ്റവരെ കാരക്കോണം സിഎസ്ഐ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

🔹പെരുവയൽ പഞ്ചായത്തിലെ എരഞ്ഞിക്കലിൽ ഷിഗല്ല പ‌ടരുന്നു. കഴിഞ്ഞദിവസം നടത്തിയ സാമ്പിൾ പരിശോധനയിൽ 12 പേർക്ക് കൂടി രോഗം സ്ഥിരീകരിച്ചതായി അധികൃതർ അറിയിച്ചു.പെരുവയൽ പഞ്ചായത്തിലെ കുറ്റിക്കാട്ടൂരിൽ ഷിഗല്ല ബാധിച്ച് അങ്കണവാടി വിദ്യാർഥി മരിച്ച സാഹചര്യത്തിലാണ് രോഗലക്ഷണം കണ്ടെത്തിയവരിൽ നിന്ന് സാമ്പിളുകൾ ശേഖരിച്ചത്. നേരത്തെ രോഗം സ്ഥിരീകരിച്ചവരുടെ ബന്ധുക്കളിലാണ് കൂടുതലും രോഗലക്ഷണങ്ങൾ കണ്ടത്.നിലവിൽ 34 പേർക്കാണ് രോഗലക്ഷണങ്ങളുള്ളത്. കൂടുതൽ പേർക്ക് ഷിഗല്ല സ്ഥിരീകരിച്ച സാഹചര്യത്തിൽ പെരുവയൽ പഞ്ചായത്തിന്‍റെയും ആരോഗ്യ വിഭാഗത്തിന്‍റെയും നേതൃത്വത്തിൽ പ്രതിരോധ പ്രവർത്തനങ്ങൾ ഊർജിതമാക്കി.

🔹കോഴിക്കോട് ജില്ലയിൽ പക്ഷിപ്പനി സ്ഥിരീകരിച്ച പ്രദേശങ്ങളിൽ ജാഗ്രത പാലിക്കാൻ ആരോഗ്യവകുപ്പിന്‍റെ നിർദേശം. പക്ഷിപ്പനി സ്ഥിരീകരിച്ച പ്രദേശങ്ങളിൽ പ്രതിരോധ പ്രവർത്തനങ്ങൾ തുടരുന്നതായും ആരോഗ്യവകുപ്പ് അറിയിച്ചിട്ടുണ്ട്.രോഗം കണ്ടെത്തിയ നാല് പഞ്ചായത്തുകളിലും നല്ലളം ഡിവിഷനിലും വെള്ളിയാഴ്ച വളർത്തുപക്ഷികളെ കൊന്നൊടുക്കിയിരുന്നു. ആര്‍ആര്‍ടി സംഘത്തിന്‍റെ നേതൃത്വത്തിലായിരുന്നു ദൗത്യം. മൃഗസംരക്ഷണ വകുപ്പും ജില്ലാഭരണകൂടവും സംയുക്തമായാണ് പ്രതിരോധ പ്രവർത്തനങ്ങൾ നടത്തുന്നത്.
വളർത്തുപക്ഷികളുമായി അടുത്ത് ഇടപഴകുന്നവരും പൊതുജനങ്ങളും ജാഗ്രത പാലിക്കാൻ ആരോഗ്യവകുപ്പ് നിർദേശിച്ചിട്ടുണ്ട്. രോഗലക്ഷണങ്ങൾ കണ്ടെത്തിയാൽ ഉടൻ തന്നെ മൃഗസംരക്ഷണ വകുപ്പിനെയോ ജില്ലാഭരണകൂടത്തിന്‍റെ കൺട്രോൾ റൂമിലോ വിവരമറിയിക്കാം.
രോഗത്തിന്‍റെ പ്രഭവ കേന്ദ്രത്തിന്‍റെ പത്ത് കിലോമീറ്റർ ചുറ്റളവിൽ കോഴി,കാട,താറാവ് ഉൾപ്പെടെയുള്ളവയുടെ വിപണനവും ഉപയോഗവും നിരോധിച്ചിട്ടുണ്ട്.

🔹കൊട്ടാരക്കര താലൂക്ക് ആശുപത്രിയിലെ ഹൗസ്‌ സർജൻ ഡോ. വന്ദന ദാസ് കുത്തേറ്റ് കൊല്ലപ്പെട്ട കേസിലെ പ്രതി ജി. സന്ദീപിന് ജീവപര്യന്തം. പ്രതി ഒരു ലക്ഷം രൂപയും പിഴയൊടുക്കണം. കൊല്ലം സെഷൻസ് കോടതിയുടേതാണ് വിധി.കേസിൽ, ഓടനാവട്ടം കുടവട്ടൂർ ചെറുകരക്കോണം ശ്രീനിലയത്തിൽ ജി. സന്ദീപ് കുറ്റക്കാരനാണെന്ന് കോടതി വെള്ളിയാഴ്ച വിധിച്ചിരുന്നു. കൊട്ടാരക്കര താലൂക്ക് ആശുപത്രി അത്യാഹിത വിഭാഗത്തിൽ ഡ്യൂട്ടിക്കിടെയാണ് ഡോ.വന്ദന ദാസിന് കുത്തേൽക്കുന്നത്.ചികിത്സയ്ക്കായി പൂയപ്പള്ളി പോലീസ് താലൂക്ക് ആശുപത്രിയിൽ എത്തിച്ച സ്കൂൾ അധ്യാപകനായിരുന്ന വെളിയം ചെറുകരക്കോണം സ്വദേശി സന്ദീപ് (44) അക്രമാസക്തനായി ആശുപത്രിയിലെ സർജിക്കൽ കത്തി ഉപയോഗിച്ച് വന്ദന ദാസിനെ കുത്തിക്കൊലപ്പെടുത്തി എന്നാണ് കേസ്. 2023 മേയ് 10ന് പുലർച്ചെയാണ് വന്ദന മരിക്കുന്നത്.സന്ദീപിന്‍റെ ആക്രമണത്തിൽ മൂന്നു പോലീസുകാർ ഉൾപ്പെടെ അഞ്ചു പേർക്കു പരിക്കേറ്റിരുന്നു. കേസിൽ 70ൽ ഏറെ സാക്ഷികളെ വിസ്തരിച്ചു. 207 രേഖകൾ പ്രോസിക്യൂഷൻ ഹാജരാക്കി. പ്രതിക്കെതിരെ പ്രോസിക്യൂഷൻ ആരോപിച്ച കുറ്റങ്ങളെല്ലാം നിലനിൽക്കുമെന്ന് കോടതി വ്യക്തമാക്കി.പ്രതിക്ക് മാനസിക വൈകല്യം ഉണ്ടെന്ന വാദവും കോടതി തള്ളിയിരുന്നു. അപൂര്‍വങ്ങളില്‍ അപൂര്‍വമായി കണക്കാക്കണമെന്നും, പ്രതി സന്ദീപിന് വധശിക്ഷ നല്‍കണമെന്നും പ്രോസിക്യൂഷന്‍ ആവശ്യപ്പെട്ടിരുന്നു. എന്നാൽ കോടതി ജീവപര്യന്തം ശിക്ഷ വിധിച്ചു.

🔹ഇസ്രായേലിൽ ജോലിക്ക് പോയ കല്ലമ്പലം സ്വദേശിയായ സുരേഷ് സുന്ദരേശനെ കാണാതായതായി ബന്ധുക്കൾ പരാതി നൽകി. ഒരു വർഷം മുൻപാണ് സുരേഷ് ലേബർ വിസയിൽ ഇസ്രയേലിലേക്ക് പോയത്. ആറുമാസം മുൻപ് മാതാവ് മരണപ്പെട്ടപ്പോഴാണ് സുരേഷ് അവസാനമായി നാട്ടിലെത്തിത്. തുടർന്ന് വീണ്ടും ഇസ്രയേലിലേക്ക് മടങ്ങി പോയി ജോലിയിൽ പ്രവേശിച്ചു. കഴിഞ്ഞ 17-ാം തീയതിയാണ് സുരേഷ് അവസാനമായി ബന്ധുക്കളുമായി ഫോണിൽ സംസാരിച്ചത്. അതിനുശേഷം അദ്ദേഹത്തെക്കുറിച്ച് യാതൊരു വിവരവും ലഭിക്കാത്തതിനാൽ കുടുംബാംഗങ്ങൾ ആശങ്കയിലാണ്. സംഭവത്തിൽ കല്ലമ്പലം പൊലീസിൽ ബന്ധുക്കൾ പരാതി നൽകിയിട്ടുണ്ട്.

🔹പശ്ചിമേഷ്യൻ സംഘർഷം രൂക്ഷമായതിന് പിന്നാലെ രാജ്യത്ത് എൽപിജി പ്രതിസന്ധി തുടരുന്നതിനിടെ കർണാടകയിൽ സിലിണ്ടർ മോഷണം. ബംഗളൂരുവിലാണ് സംഭവം. ആർസി ലേയൗട്ടിലെ വിശ്വപ്രിയ അപ്പാർട്ട്മെന്‍റിലാണ് സംഭവം.
ഇരുചക്ര വാഹനത്തിൽ ഹെൽമറ്റ് ധരിച്ചെത്തിയ രണ്ട് യുവാക്കളാണ് സിലിണ്ടറുകളുമായി കടന്നുകളയുകയായിരുന്നു. സംഭവത്തിന്‍റെ സിസിടിവി ദൃശ്യങ്ങൾ ഇതോടകം പ്രചരിച്ചിട്ടുണ്ട്. മോഷ്ടാക്കളിൽ ഒരാൾ ഗേറ്റിന് പുറത്ത് കാത്തുനിൽക്കുന്നതാണ് ദൃശ്യങ്ങളിലുള്ളത്.
ഒപ്പമുണ്ടായിരുന്ന യുവാവ് അപ്പാർട്ട്മെന്‍റിന്‍റെ മുറ്റത്ത് കയറി രണ്ട് പാചകവാതക സിലിണ്ടറുകൾ കടത്തിക്കൊണ്ടുവന്ന് ടൂവീലറിൽ കയറ്റി കൊണ്ടുപോവുകയുമായിരുന്നു. സംഭവത്തിന് പിന്നാലെ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

🔹വാരണാസിയിൽ 23 വയസുകാരനായ കോളേജ് വിദ്യാർഥിയെ സഹപാടി വെടിവെടിവച്ചു കൊലപ്പെടുത്തി. വാരണാസിയിലെ ഉദയ് പ്രതാപ് കോളേജിലെ നാലാം സെമസ്റ്റർ ബി എ വിദ്യാർഥിയായ സൂര്യപ്രതാപ് സിങിനെയാണ് സഹപാഠിയായ മ‍ഞ്ജീത് ചൗഹാൻ വെടിവച്ച് കൊന്നത്. ഇരുവരും തമ്മിലുള്ള വ്യക്തിപരമായ തർക്കമാണ് കൊലപാതകത്തിൽ കലാശിച്ചതെന്നാണ് റിപ്പോർട്ട്. സംഭവത്തെ തുടർന്ന് പ്രതിയായ മഞ്ജീതിനെ പൊലീസ് അറ്സ്റ്റ് ചെയ്ത് കോടതിയിൽ ഹാജരാക്കി. കോടതി പ്രതിയെ 14 ദിവസത്തെ ജുഡീഷ്യൽ കസ്റ്റഡിയിൽ വിട്ടു. സൂര്യപ്രതാപിന്റെ തലയിലും നെഞ്ചിലുമായി നാല് റൗണ്ട് വെടിയുതിർത്തതായി പൊലീസ് റിപ്പോർട്ട് ചെയ്തു. എന്നാൽ പ്രതിയെ കൊല്ലണമെന്ന് ആവശ്യപ്പെട്ട് ഇരയുടെ പിതാവ് മകന്റെ മൃതദേഹം ദഹിപ്പിക്കാൻ വിസമ്മതിച്ചു.വെടിയുതിർത്ത ശേഷം പ്രതി കോളേജിലെ മതിൽ ചാടി രക്ഷപ്പെടുകയും കൊല്ലാനുപയോഗിച്ച പിസ്റ്റൽ തൊട്ടടുത്ത മാലിന്യകൂമ്പാരത്തിൽ ഉപേക്ഷിക്കുകയും ചെയ്തു. പിന്നീട് പൊലീസ് സംഭവസ്ഥലത്ത് എത്തി ആയുധം കണ്ടെടുക്കുകയും പ്രതിയെ കസ്റ്റഡിയിലെടുക്കുകയും ചെയ്തു. സംഭവം നടന്നപ്പോൾ തന്നെ സൂര്യ പ്രതാപിനെ ആശുപത്രിയിലെത്തിച്ചെങ്കിലും ചികിത്സയ്
ക്കിടയിൽ മരിക്കുകയായിരുന്നു. ഗാസിപൂർ സ്വദേശിയാണ് മരിച്ച സീര്യ പ്രതാപ് സിങ്.

🔹ഉത്തർപ്രദേശിലെ ബറേലിയിലാണ് അച്ഛനെ കൊലപ്പെടുത്തിയ സ്വന്തം മകനെതിരെ ഒരമ്മയ്ക്ക് മൊഴി നൽകേണ്ടി വന്നത്. 2025 ഏപ്രിൽ 11-നാണ് കേസിനാസ്പദമായ സംഭവം നടന്നത്. ഭൂമിതർക്കത്തെ തുടർന്നുണ്ടായ തർക്കമാണ് കൊലപാതകത്തിലേക്ക് വഴിവച്ചത്. പിതാവും പ്രതി ഛത്രപാലും തമ്മിൽ സ്ഥിരമായി ഭൂമിയുടെ ഉടമസ്ഥതയെ ചൊല്ലിയുളള തർക്കമുണ്ടായിരുന്നു. ഏപ്രിൽ 11-ന് തർക്കം വഷളായതിനെത്തുടർന്ന് പ്രതി അരിവാൾ ഉപയോഗിച്ച് കഴുത്തിൽ വെട്ടി കൊലപ്പെടുത്തുകയായിരുന്നു.കേസിൽ അമ്മയുടെ മൊഴിയാണ് കോടതി പ്രാധമിക പരിഗണനയിലെടുത്തത്. തന്റെ ജീവിതം നശിപ്പിക്കുകയും ഭർത്താവിനെ കൊലപ്പെടുത്തുകയും ചെയ്ത മകന്റെ മുഖം ഇനി ഒരിക്കലും കാണേണ്ട എന്നും അവർ കോടതിയിൽ പറഞ്ഞു. ഇതോടെ പ്രതി ഛത്രപാലിന് ജീവപര്യന്തം തടവും ഒരു ലക്ഷം പിഴയും കോടതി വിധിച്ചു. വിചാരണക്കിടെ പ്രതിയുടെ അമ്മയും ഒരു സഹോദരനുമുൾപ്പെടെ ഏഴ് ദൃസക്ഷികളെ പ്രോസിക്യൂഷൻ കോടതിയിൽ ഹാജരാക്കിയിരുന്നു. എല്ലാ തെളിവുകളുടെയും സാക്ഷിമൊഴികളുടെയും അടിസ്ഥാനത്തിൽ അഡീഷണൽ ഡിസ്ട്രിക്ട് ജഡ്ജ് തബ്രെസ് അഹമ്മദാണ് ശിക്ഷ വിധിച്ചത്.

🔹ഐസിസി ട്വന്‍റി-20 ലോകകപ്പ് കിരീടം നിലനിര്‍ത്തിയശേഷമുള്ള ടീം ഇന്ത്യയുടെ ആദ്യ പരമ്പര ബിസിസിഐ പ്രഖ്യാപിച്ചു.ജൂണില്‍ അയര്‍ലന്‍ഡില്‍ പര്യടനം നടത്തുന്ന ഇന്ത്യ, രണ്ട് ട്വന്‍റി-20 കളിക്കും. ജൂണ്‍ 26, 28 തീയതികളിലാണ് മത്സരം.

🔹ബാങ്കേഴ്സ് ക്ലബ് തൃശൂരിന്‍റെ ആഭിമുഖ്യത്തിൽ സംഘടിപ്പിച്ച അഖില കേരള ക്രിക്കറ്റ് കാർണിവലിൽ സൗത്ത് ഇന്ത്യൻ ബാങ്ക് ജേതാക്കളായി.വിജയികൾക്കുള്ള ട്രോഫിയും കാഷ് പ്രൈസും സൗത്ത് ഇന്ത്യൻ ബാങ്ക് റീജണൽ ഹെഡ് രാമചന്ദ്രനും ബാങ്കേഴ്സ് ക്ലബ് പ്രസിഡന്‍റ് എസ്. എസ്. നാരായണനും ചേർന്നു സമ്മാനിച്ചു.

🔹പ്രിയദർശൻ തന്റെ നൂറാമത്തെ ചിത്രം പ്രഖ്യാപിച്ചിരിക്കുന്നു. ട്വിസ്റ്റ് എന്ന് പറയാൻ പറ്റില്ല അല്ലേ, നായകനായി മറ്റാരുവരാനാലേ… പ്രിയദർശന്റെ ആദ്യ സിനിമയിലെ നായകൻ തന്നെ. മലയാളികളുടെ സ്വന്തം ലാലേട്ടൻ. ചിത്രത്തിന്റെ ഔദ്യോഗിക പ്രഖ്യാപനവും നടന്നു. ആദ്യ സിനിമയും നൂറാമത്തെ സിനിമയും ഒരേ കൂട്ടുകെട്ടിൽ…ഭാഗ്യമാണ്, അപൂർവ്വനേട്ടമാണ്.
പ്രിയദർശന്റെ ആദ്യ ചിത്രമായ ‘പൂച്ചക്കൊരു മൂക്കുത്തി’യിലെ നായകനായിരുന്നു മോഹൻലാൽ. പ്രിയദർശൻ തിരക്കഥ എഴുതിയ ആദ്യ ചിത്രമായ ‘സിന്ദൂര സന്ധ്യയ്ക്ക് മൗനം’ എന്ന സിനിമയിലും മോഹൻലാലായിരുന്നു പ്രധാന വേഷത്തിൽ. നൂറാമതായി എത്തുന്ന ചിത്രം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്. ബിനു ജോർജ് അലക്‌സാണ്ടറാണ് സഹനിർമ്മാതാവാണ്. ആശിർവാദ് സിനിമാസ് നിർമ്മിക്കുന്ന 39-ാമത്തെ ചിത്രമാണിത്.സംഗീതത്തിനും വൈകാരികതയ്ക്കും പ്രാധാന്യമുള്ള ഒരു ‘ഫീൽ ഗുഡ് എന്റർടെയ്‌നർ’ ആയിരിക്കും ഈ ചിത്രമെന്നാണ് സൂചനകൾ. കുടുംബപ്രേക്ഷകർക്കും ആരാധകർക്കും ഒരുപോലെ ആസ്വദിക്കാവുന്ന തരത്തിൽ ആക്ഷൻ രംഗങ്ങളും ചിത്രത്തിലുണ്ടാകുമെന്ന ഉറപ്പും പ്രയദർശൻ തരുന്നുണ്ട്. 2026-ൽ സിനിമയുടെ ഷൂട്ടിങ് ആരംഭിക്കുമെന്ന് നിർമ്മാതാവ് ആന്റണി പെരുമ്പാവൂർ വ്യക്തമാക്കി. ‘കൊറോണ പേപ്പേഴ്‌സ്’ ആണ് പ്രിയദർശന്റെ ഒടുവിൽ പുറത്തിറങ്ങിയ മലയാള ചിത്രം. മോഹൻലാൽ നായകനായി പ്രിയദർശൻ ഒടുവിൽ സംവിധാനം ചെയ്തത്.
‘ചിത്രം’, ‘കിലുക്കം’, ‘താളവട്ടം’, ‘കാലാപാനി’ തുടങ്ങി മലയാളത്തിലെ എക്കാലത്തെയും മികച്ച ഹിറ്റുകൾ സമ്മാനിച്ച ഈ ആപൂർവ്വ കൂട്ടുകെട്ട് വീണ്ടും ഒന്നിക്കുമ്പോൾ വലിയ പ്രതീക്ഷയിലാണ് ആരാധകർ.

💦 ഗുരുജിയുടെ വാക്കുകൾ

സ്വാതന്ത്ര്യം എന്ന് പറയുന്നത്‌ മനസ്സിന്റെ കൂടി അവസ്ഥയാണ്. സ്വാതന്ത്ര്യം നേടുന്നത് വരെ മാത്രമേ ആ വാക്കിനു തന്നെ പ്രസക്തിയുള്ളൂ. അത് കഴിഞ്ഞാല്‍, കടലിലെ ഉപ്പു പോലെ, ആര്‍ക്കും നേരിട്ട് കാണാന്‍ പറ്റാത്ത, അഭാവത്തില്‍ മാത്രം അറിയാന്‍ പറ്റുന്ന ഒന്നാണ് ഇത്. വാക്കുകളുടെ വില അറിയാന്‍, ഒരിക്കലെങ്കിലും നിശ്ശബ്ദരാക്കപ്പെട്ടവര്‍ക്ക് മാത്രമേ സാധിക്കൂ എന്ന് പറയുന്ന പോലെ ആണത്. ഉള്ളില്‍ നാം എന്താണെന്നുള്ളത്, നമ്മുടെ ആശയപരത, സര്‍ഗ്ഗശേഷി എന്നിവയൊക്കെ പുറത്തേക്ക് പ്രകടിപ്പിക്കാനുള്ള അവസരങ്ങളെ അടിച്ചമര്‍ത്താതെ അതാവിഷ്‌കരിക്കാനുള്ള ഇടവും സമയവും നാം ഓരോരുത്തര്‍ക്കും ലഭിക്കുക എന്നുള്ളതാവണം സ്വാതന്ത്ര്യം എന്നുള്ളത് കൊണ്ട് ഓരോ വ്യക്തിയും ഉദ്ദേശിക്കുന്നത്.
പൂര്‍ണമായും സമൂഹത്തിലെ എല്ലാവരെയും സന്തോഷിപ്പിച്ചു കൊണ്ട് നമുക്കാര്‍ക്കും ഒരു തീരുമാനവും എടുക്കാന്‍ പറ്റില്ലെന്നിരിക്കേ, മറ്റുള്ളവര്‍ എന്ത് വിചാരിക്കും എന്നുള്ള ഒരു ചിന്തക്ക് എന്ത് പ്രസക്തിയാണുള്ളത്? ഒരു തരത്തില്‍ ശരിതെറ്റുകള്‍ പോലും ആപേക്ഷികം ആണല്ലോ. അതുകൊണ്ട് തന്നെ, മനസിലാക്കാന്‍ പറ്റുന്നവര്‍ക്ക് നമ്മളെ മനസിലാവും. മറ്റൊരാളെ ഹനിക്കാത്ത തരത്തില്‍, സ്വന്തം ജീവിതത്തില്‍ നമുക്കിഷ്ടപ്പെട്ട കാര്യങ്ങള്‍ കൂടി ഉള്‍പ്പെടുത്തി നോക്കൂ. ജീവിതം എന്ത് മനോഹരമാവും??
ഇമ്പച്ചരട് പൊട്ടാതെ, അങ്ങോട്ടുമിങ്ങോട്ടും അംഗീകരിക്കാന്‍ ശീലിച്ചു നോക്കൂ. മനസിലാക്കാന്‍ ശ്രമിച്ചു നോക്കൂ. തുറന്നു സംസാരിച്ചു നോക്കൂ. കേള്‍ക്കാന്‍ മനസ് കാണിക്കൂ. ഇത് വരെയുമില്ലാത്ത തരത്തില്‍ നമുക്കുള്ളില്‍ ശക്തിയും, സ്‌നേഹവും നിറയുന്നില്ലേ? അന്യോന്യം പ്രോത്സാഹിപ്പിച്ചു നോക്കൂ. വേണ്ട സാഹചര്യങ്ങളില്‍ പിന്തുണ നല്‍കൂ. നിങ്ങളില്‍ വെളിച്ചവും സമാധാനവും നിറയുന്നില്ലേ..?

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 22 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

അടുത്ത രണ്ടാഴ്‌ചയ്ക്കുള്ളിൽ ഇറാന് മേൽ സമ്പൂർണ വിജയം നേടുമെന്ന് ട്രംപ്.

ലോക കപ്പ് മത്സരങ്ങളിലെ വിജയികളെ പ്രവചിച്ച് മെക്‌സിക്കന്‍ മൃഗശാലയിലെ ആനയും ഗൊറില്ലയും ജിറാഫും.

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 09 | ചൊവ്വ ✍️ കപിൽ ശങ്കർ

1 COMMENT

LEAVE A REPLY Cancel reply

Most Popular

വിരമിച്ച റവന്യൂ ഉദ്യോഗസ്ഥനിൽ നിന്ന് ഇരുപത് ലക്ഷം രൂപ തട്ടിയെടുത്ത കേസിൽ യുവതി അറസ്റ്റിൽ

കണ്ണൂരിൽ അതിതീവ്ര മഴ; തളാപ്പിൽ കെട്ടിടം റോഡിലേക്ക് ഇടിഞ്ഞുവീണു, പയ്യാമ്പലത്ത് സഞ്ചാരികളെ ഒഴിപ്പിച്ചു.

കാസർകോട് കനത്ത മഴയിൽ റോഡ് നെടുകെ പിളർന്നു; 50 മീറ്ററോളം നീളത്തിൽ വിള്ളൽ.

Recent Comments

EDITOR PICKS

വിരമിച്ച റവന്യൂ ഉദ്യോഗസ്ഥനിൽ നിന്ന് ഇരുപത് ലക്ഷം രൂപ തട്ടിയെടുത്ത കേസിൽ യുവതി അറസ്റ്റിൽ

കണ്ണൂരിൽ അതിതീവ്ര മഴ; തളാപ്പിൽ കെട്ടിടം റോഡിലേക്ക് ഇടിഞ്ഞുവീണു, പയ്യാമ്പലത്ത് സഞ്ചാരികളെ ഒഴിപ്പിച്ചു.

കാസർകോട് കനത്ത മഴയിൽ റോഡ് നെടുകെ പിളർന്നു; 50 മീറ്ററോളം നീളത്തിൽ വിള്ളൽ.

POPULAR POSTS

അടുത്ത രണ്ടാഴ്‌ചയ്ക്കുള്ളിൽ ഇറാന് മേൽ സമ്പൂർണ വിജയം നേടുമെന്ന് ട്രംപ്.

ലോക കപ്പ് മത്സരങ്ങളിലെ വിജയികളെ പ്രവചിച്ച് മെക്‌സിക്കന്‍ മൃഗശാലയിലെ ആനയും ഗൊറില്ലയും ജിറാഫും.

സൗഹൃദത്തിന്റെ പേരിൽ പതിനെട്ടുകാരനായ ദലിത് വിദ്യാര്‍ഥിയെ പെൺകുട്ടിയുടെ കുടുംബം തല്ലിക്കൊന്നു.

POPULAR CATEGORY

ABOUT US

FOLLOW US