📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 22 | ബുധൻ ✍ കപിൽ ശങ്കർ

🔹ഏപ്രിൽ 22 ലോക ഭൗമദിനമായി (World Earth Day) ആചരിക്കുന്നു. ഭാവിതലമുറയ്ക്കായി ഭൂമിയിലെ പ്രകൃതിവിഭവങ്ങൾ സംരക്ഷിക്കേണ്ടതിന്റെ ആവശ്യകതയെക്കുറിച്ച് അവബോധം വളർത്തുന്നതിനാണ് ഈ ദിനം ആചരിക്കുന്നത്.
പരിസ്ഥിതി നശീകരണത്തിനെതിരെ ജനങ്ങളെ ബോധവത്കരിക്കുകയും ഭൂമിയെ സംരക്ഷിക്കാൻ ഊർജ്ജം നൽകുകയും ചെയ്യുക.
ചരിത്രം: 1970 ഏപ്രിൽ 22-നാണ് അമേരിക്കൻ ഐക്യനാടുകളിൽ ആദ്യമായി ഭൗമദിനം ആചരിക്കുന്നത്. പരിസ്ഥിതി തകർച്ചയ്‌ക്കെതിരെ 20 ദശലക്ഷം ആളുകളാണ് അന്ന് രംഗത്തെത്തിയത്.
•2024-ലെ പ്രമേയം: ‘പ്ലാനറ്റ് വേഴ്സസ് പ്ലാസ്റ്റിക്’ (Planet vs. Plastics) എന്നതാണ് 2024-ലെ പ്രമേയം. പ്ലാസ്റ്റിക് മലിനീകരണത്തിൻ്റെ പ്രത്യാഘാതങ്ങളെക്കുറിച്ച് അവബോധം സൃഷ്ടിക്കാൻ ഇത് ലക്ഷ്യമിടുന്നു. മലിനീകരണം കുറയ്ക്കുക, പ്രകൃതി വിഭവങ്ങൾ സംരക്ഷിക്കുക, കാലാവസ്ഥാ വ്യതിയാനത്തിനെതിരെ പോരാടുക എന്നിവയാണ് ഈ ദിനത്തിലെ പ്രധാന പ്രവർത്തനങ്ങൾ.
എണ്ണച്ചോർച്ച, കീടനാശിനികൾ, വന്യജീവികളുടെ വംശനാശം, മലിനീകരണം എന്നിവയ്‌ക്കെതിരെ പോരാടാനും ഭൂമിയെ സുരക്ഷിതമാക്കാനും ഈ ദിനം ഓർമ്മിപ്പിക്കുന്നു.

🔹തൃശൂരില്‍ കണ്ണീര്‍പ്പൂരം. മുണ്ടത്തിക്കോട് പടക്ക നിര്‍മാണ കേന്ദ്രത്തിലുണ്ടായ സ്ഫോടനത്തില്‍ 13 പേര്‍ മരിച്ചു. എട്ടു പേരുടെ മൃതദേഹങ്ങള്‍ തിരിച്ചറിഞ്ഞു. തൃശൂര്‍ മെഡിക്കല്‍ കോളജ് ആശുപത്രിയില്‍ ചികില്‍സയിലുള്ള 13 പേരില്‍ 70 ശതമാനം പൊള്ളലേറ്റ ആറു പേരുടെ നില ഗുരുതരമാണ്. നാല്‍പതോളം തൊഴിലാളികള്‍ ജോലി ചെയ്തുകൊണ്ടിരിക്കേ വൈകിട്ട് മൂന്നരയോടെയാണു സ്ഫോടനമുണ്ടായത്. തൃശൂര്‍ പൂരത്തിനു തിരുവമ്പാടി വിഭാഗത്തിന്റെ വെടിക്കെട്ടിനുള്ള കുഴിമിന്നികളും അമിട്ടുകളും അടക്കമുള്ളവയാണു പൊട്ടിത്തെറിച്ചത്. വെടിക്കെട്ട് നിര്‍മാണം നടന്നിരുന്ന അഞ്ചു ഷെഡുകളിലും തീ പടര്‍ന്നു. പന്തലങ്ങാട്ട് സതീഷാണ് വെടിക്കെട്ടു കരാറുകാരന്‍.

🔹മരിച്ചവരില്‍ അഞ്ചു പേരുടെ മൃതദേഹങ്ങള്‍ പോസ്റ്റ്‌മോര്‍ട്ടം ചെയ്തു ബന്ധുക്കള്‍ക്കു വിട്ടു കൊടുത്തു. ചിതറിത്തെറിച്ചുപോയ മൃതദേഹ അവശിഷ്ടങ്ങള്‍ തിരിച്ചറിയാന്‍ ഡിഎന്‍എ ടെസ്റ്റു നടത്തും. 23 ശരീര ഭാഗങ്ങള്‍ കിട്ടിയിട്ടുണ്ട്. മരിച്ചവര്‍: പഴയന്നൂര്‍ വെണ്ണൂര്‍ സ്വദേശി സുദര്‍ശന്‍ (54), പാലക്കാട് കുമരനല്ലൂര്‍ സ്വദേശി വാസുദേവന്‍ (54), തൃശ്ശൂര്‍ കുണ്ടന്നൂര്‍ സ്വദേശി സുവിന്‍ (40), വിഷ്ണു, വിജീഷ്.

🔹വെടിക്കെട്ടു ശാലയിലെ തുടര്‍ സ്ഫോടനങ്ങളും തീയും പുകയും മണിക്കൂറുകളോളം നിയന്ത്രിക്കാനാകാതെ അഗ്‌നിശമന സേന. തീയും പുകയും രക്ഷാപ്രവര്‍ത്തനത്തിനു തടസമായി. തീയണക്കാനുള്ള നിരീക്ഷണങ്ങള്‍ക്ക് ഡ്രോണ്‍ എത്തിച്ചു. സ്ഫോടനത്തിന്റെ ശബ്ദവും പ്രകമ്പനവും എട്ടു കിലോമീറ്റര്‍ അകലേയ്ക്കുവരെ ഉണ്ടായി. പലരും ഭൂകമ്പമാണെന്നു ഭയന്നു. സ്ഫോടന ശക്തിയില്‍ വീടുകളുടെ ജനല്‍ ചില്ലുകള്‍ തകര്‍ന്നു.വെടിക്കെട്ടു പുരയിലുണ്ടായ ഉഗ്രസ്ഫോടനത്തില്‍ വിശദമായ മജിസ്റ്റീരിയല്‍ അന്വേഷണത്തിന് ജില്ലാ കളക്ടര്‍ ഉത്തരവിട്ടു. സബ് ഡിവിഷണല്‍ മജിസ്ട്രേറ്റായ തൃശൂര്‍ ആര്‍ഡിഒയ്ക്കാണ് അന്വേഷണ ചുമതല.

🔹മുണ്ടത്തിക്കോട് വെടിക്കെട്ട് പുരയിലെ സ്ഫോടനത്തിനു രക്ഷാപ്രവര്‍ത്തനങ്ങള്‍ക്കായി 50 ലക്ഷം രൂപ ധനസഹായം അനുവദിച്ച് കേരള സര്‍ക്കാര്‍. തൃശൂര്‍ ജില്ലാ കളക്ടര്‍ക്കു തുക കൈമാറും. മരിച്ചവരുടെ കുടുംബത്തിന് പ്രധാനമന്ത്രി നരേന്ദ്ര മോദി രണ്ടു ലക്ഷം രൂപ വീതം സഹായധനം പ്രഖ്യാപിച്ചു. പരിക്കേറ്റവര്‍ക്ക് 50,000 രൂപ നല്‍കുമെന്നും മോദി അറിയിച്ചു.

🔹സ്‌ഫോടന ദുരന്തത്തില്‍ ദുഃഖം പ്രകടിപ്പിച്ച് പ്രധാനമന്ത്രി നരേന്ദ്രമോദിയും മുഖ്യമന്ത്രി പിണറായി വിജയനും. പരിക്കേറ്റവര്‍ക്ക് വിദഗ്ധ ചികിത്സ നല്‍കണമെന്നു മുഖ്യമന്ത്രി നിര്‍ദേശം നല്‍കി. ആരോഗ്യ വകുപ്പ് മന്ത്രി വീണാ ജോര്‍ജ് തൃശൂര്‍ മെഡിക്കല്‍ കോളേജില്‍ എത്തി. ചികില്‍സയ്ക്കു വിപുലമായ ക്രമീകരണങ്ങള്‍ ഒരുക്കാനും കനിവ് 108 ആംബുലന്‍സുകള്‍ സ്ഥലത്തെത്തിക്കാനും മന്ത്രി നിര്‍ദേശം നല്‍കി. വിവിധ മെഡിക്കല്‍ കോളേജുകളില്‍നിന്നു ഡോക്ടര്‍മാരുടെ കൂടുതല്‍ സംഘങ്ങള്‍ തൃശൂര്‍ മെഡിക്കല്‍ കോളേജില്‍ എത്തി.

🔹തൃശൂർ പൂരത്തിന് ഇത്തവണ വെടിക്കെട്ടിനില്ലെന്നും സർക്കാരും ജനങ്ങളും എന്തുപറയുന്നോ അതനുസരിക്കുമെന്നും തിരുവമ്പാടി ദേവസ്വം സെക്രട്ടറി കെ. ഗിരീഷ് കുമാർ.ആഘോഷപൂർവം പൂരം നടത്താനുള്ള ഒരു സാഹചര്യം അല്ല. ഇപ്പോൾ മരിച്ചവരുടെയും പരിക്കേറ്റവരുടെയും കുടുംബാംഗങ്ങളെ ചേർത്തുനിർത്താനുള്ള കാര്യങ്ങളിലാണ് ദേവസ്വത്തിന്‍റെ ശ്രദ്ധ. തിരുവമ്പാടി ദേവസ്വത്തിലെ ആഘോഷ കമ്മിറ്റി ഭാരവാഹികളായ അഞ്ചുപേരും അപകടത്തിൽപ്പെട്ടിട്ടുണ്ട്. ഏത് അന്വേഷണത്തെയും ദേവസ്വം സ്വാഗതം ചെയ്യുന്നു. നിരോധിത വെടിമരുന്ന് ഉൽപ്പന്നങ്ങൾ അവിടെ ഉപയോഗിച്ചിട്ടില്ല എന്നാണ് ദേവസ്വം കരുതുന്നത്. മുണ്ടത്തിക്കോട് സതീശനാണ് ദേവസ്വം കരാർ നൽകിയിരിക്കുകയാണ്. അദ്ദേഹം മറ്റ് ഉത്സവങ്ങളുടെയും പെരുന്നാളുകളുടെയും ജോലികൾ കൂടി എടുത്തിരിക്കാം. അപകടത്തിൽ അട്ടിമറിയില്ലെന്നും ദേവസ്വം സെക്രട്ടറി കൂട്ടിച്ചേർത്തു.

🔹’എന്‍റെ കുഞ്ഞിനെ അവരെല്ലാം ചേർന്നു കൊന്നു, ഇതിനായിരുന്നോ ഞാൻ അവനെ ഇവിടേക്കയച്ചത്, മകന്‍റെ കൊലയാളികളെ ആരെയും എനിക്കു കാണേണ്ട…’ മകൻ നഷ്ടപ്പെട്ട ഒരച്ഛന്‍റെ വിലാപമാണിത്. നിതിൻ രാജിന്‍റെ അച്ഛൻ രാജനും നിതിൻ രാജിന്‍റെ സഹോദരീഭർത്താവ് അശോകനും ഇന്നലെ രാവിലെ മെഡിക്കൽ കോളജിലെത്തിയപ്പോഴായിരുന്നു വൈകാരികമായ രംഗങ്ങൾ.പ്രിൻസിപ്പലിനെ കാണാനായിരുന്നു ഇരുവരും എത്തിയതെങ്കിലും നിതിൻ രാജ് വീണു കിടന്ന സ്ഥലം കണ്ടപ്പോൾ വികാരാധീനനായ രാജൻ സങ്കടമടക്കാനാകാതെ പൊട്ടിക്കരഞ്ഞു കൊണ്ട് മകൻ വീണു കിടന്ന അതേ സ്ഥലത്ത് കുഴഞ്ഞുവീഴുകയായിരുന്നു.പ്രിൻസിപ്പൽ ഉള്‍പ്പെടെയുള്ളവരാണ് തന്‍റെ മകനെ കൊന്നതെന്ന് പൊട്ടിക്കരഞ്ഞുകൊണ്ട് വിളിച്ചു പറഞ്ഞാണ് രാജൻ കുഴഞ്ഞുവീണത്. പിന്നീട് പ്രിൻസിപ്പൽ ഉൾപ്പെടെ ആരെയും കാണാതെ അവർ മടങ്ങി. മകൻ ഒരിക്കലും ആത്മഹത്യ ചെയ്യില്ലെന്നും എല്ലാവരും ചേർന്ന് ഉപദ്രവിച്ച് കൊന്നതാണെന്നും ആവർത്തിച്ചു പറഞ്ഞുകൊണ്ടായിരുന്നു മടക്കം. മെഡിക്കൽ കോളജിൽ നിതിൻ രാജിനെ ചേർക്കാൻ വന്ന ശേഷം രണ്ടാമതായി ഇന്നലെയാണ് മെഡിക്കൽ കോളജിൽ വരുന്നത്.അധ്യാപികയായ ലത അടക്കമുള്ള അധ്യാപകർക്കെതിരേ ആത്മഹത്യാ പ്രേരണാ കുറ്റം ചുമത്തണമെന്നു നിതിനിന്‍റെ സഹോദരീഭർത്താവ് അശോകൻ ആവശ്യപ്പെട്ടു. പ്രിൻസിപ്പലിന്‍റെ മുറിയിൽ വിളിച്ചുവരുത്തി വലിയ മാനസിക പീഡനമാണ് ഏൽപ്പിച്ചത്. ഡോ. റാമും സംഗീതയും ഒരു പോലെ കുറ്റക്കാരാണ്. ലോൺ ആപ്പിന്‍റെ പേരിൽ നിതിനെ സംഘടിതമായി വ്യക്തിഹത്യ ചെയ്യുകയായിരുന്നു. ജാതി അധിക്ഷേപം ഉൾപ്പെടെയുള്ള മറ്റു കാര്യങ്ങളെല്ലാം ഇപ്പോൾ ലോൺ ആപ്പിന്‍റെ പേരിൽ മറച്ചുവയ്ക്കാനുള്ള ശ്രമങ്ങളാണ് നടത്തുന്നതെന്നും അശോകൻ ആരോപിച്ചു.

🔹അഞ്ചരക്കണ്ടി കണ്ണൂർ ഡെന്‍റൽ കോളജിലെ വിദ്യാർഥി നിതിൻ രാജിന്‍റെ മരണവുമായി ബന്ധപ്പെട്ട് ഭീഷണി മുഴക്കിയതിന് അറസ്റ്റിലായ ‘ഇൻസ്റ്റന്‍റ് ഫണ്ട്സ്’ എന്ന ലോൺ ആപ്പ് നടത്തിപ്പുകാരെ പോലീസ് കസ്റ്റഡിയിൽ വാങ്ങും. കണ്ണൂർ സിറ്റി കണ്ണൂർ സിറ്റി സൈബർ ക്രൈം പോലീസ് നോയിഡയിൽ വച്ച് അറസ്റ്റ് ചെയ്ത ഉത്തർപ്രദേശ് ഗാസിയാബാദ് സ്വദേശിയായ ഋഷികേഷ് തിവാരി (32), ഉത്തർപ്രദേശ് സ്വദേശിയായ പ്രശാന്ത് ഖേവൽ (28), ഹരിയാന ഫരീദാബാദ് സ്വദേശിയായ പ്രകാശ് ജയ് (54) എന്നിവരെയാണ് പോലീസ് കസ്റ്റഡിയിൽ വാങ്ങുന്നത്. ഇതിനായുള്ള അപേക്ഷ അടുത്ത ദിവസം കോടതിയിൽ നൽകുമെന്ന് അന്വേഷണ ഉദ്യോഗസ്ഥർ പറഞ്ഞു. ഇവരെ കസ്റ്റഡിയിൽ വാങ്ങി ചോദ്യംചെയ്താൽ ലോൺ ആപ്പുമായി ബന്ധപ്പെട്ട കൂടുതൽ വിവരങ്ങൾ ലഭിക്കുമെന്നാണ് പോലീസ് കരുതുന്നത്.

🔹പുതുക്കാട് കുറുമാലിപ്പുഴയിലെ ആറ്റപ്പിള്ളി റഗുലേറ്റര്‍ പാലത്തിന്റെ അപ്രോച്ച് റോഡ് ആറ് മാസത്തിനകം ഗതാഗതയോഗ്യമാക്കണമെന്ന് ഹൈക്കോടതി. പാലത്തിന്റെ മറ്റത്തൂര്‍ ഭാഗത്തേക്കുള്ള റോഡില്‍ വലിയ കുഴി രൂപപ്പെട്ടതോടെ ഗതാഗതം തടസപ്പെട്ടിരുന്നു. 20 വര്‍ഷം മുന്‍പ് 4.75 കോടി രൂപയുടെ എസ്റ്റിമേറ്റുമായി പണി ആരംഭിച്ച പദ്ധതിക്ക് ഇതുവരെ 17.24 കോടി രൂപ ചെലവഴിച്ചു. പണി പൂര്‍ത്തിയാക്കാന്‍ ഇനിയും 13.90 കോടി രൂപ വേണമെന്നാണ് ജലവിഭവ വകുപ്പിന്റെ എസ്റ്റിമേറ്റില്‍ പറയുന്നത്. കോടതി ചൂണ്ടിക്കാട്ടി.

🔹പേരാമ്പ്ര മണ്ഡലത്തിലെ മെറ്റീരിയല്‍ റൂം തുറന്നത് പ്രധാന സ്ഥാനാര്‍ത്ഥികളെ അറിയിച്ച ശേഷമാണെന്ന് കോഴിക്കോട് ജില്ലാ കളക്ടര്‍ മുഖ്യ തെരഞ്ഞെടുപ്പ് ഓഫീസര്‍ക്കു റിപ്പോര്‍ട്ടു നല്‍കി. സാധാരണയായി മെറ്റീരിയല്‍ റൂം സ്‌ട്രോങ് റൂമിന് സമീപം വയ്ക്കാറില്ല. സ്ട്രോംഗ് റൂം തുറന്നെന്നു തെറ്റിദ്ധാരണ മാത്രമാണെന്നും കളക്ടര്‍ ചൂണ്ടിക്കാട്ടി.

🔹പെരിങ്ങോട്ടുകര ദേവസ്ഥാനത്തിന്റെ അധികാരം പിടിച്ചെടുക്കുന്നതിനും ക്ഷേത്ര സ്വത്തുക്കള്‍ കൈവശപ്പെടുത്തുന്നതിനും കെട്ടിച്ചമച്ച വ്യാജ പീഡനക്കേസിന്റെ സൂത്രധാരനായ ഒന്നാംപ്രതി കാനാടി പ്രവീണ്‍ വേണുഗോപാലിനെ കര്‍ണാടക പൊലീസ് അറസ്റ്റു ചെയ്തു. ഹരിപ്പാട് നിന്നാണ് ഇയാളെ പിടികൂടിയത്. മറ്റു പ്രതികളെ നേരത്തെ പിടികൂടിയിരുന്നു.

🔹മോട്ടോര്‍വാഹന വകുപ്പിന്റെ പേരിലും ഓണ്‍ലൈന്‍ പണം തട്ടിപ്പ്. അമിത വേഗതയില്‍ വാഹനം ഓടിച്ചതിന് ആയിരം രൂപ പിഴ അടയ്ക്കണമെന്ന് ആവശ്യപ്പെട്ട് കൊല്ലം മണപ്പള്ളി സ്വദേശികളായ ശിവന്‍, അഭിലാഷ് എന്നിവര്‍ക്കു വാട്സ്ആപ്പ് സന്ദേശം ലഭിച്ചു. ആപ്പ് ഡൗണ്‍ലോഡ് ചെയ്യാനുള്ള ലിങ്കും സന്ദേശത്തിലുണ്ട്. എന്നാല്‍, പരിവാഹന സൈറ്റില്‍ പരിശോധിച്ചപ്പോഴാണ് ചെല്ലാന്‍ ഇല്ലെന്നും തട്ടിപ്പാണെന്നും ബോധ്യമായത്.

🔹ഗള്‍ഫ്-കേരള സെക്ടറില്‍ വിമാനയാത്രക്കാരുടെ പ്രശ്നങ്ങള്‍ പരിഹരിക്കണമെന്ന് കാന്തപുരം എപി അബൂബക്കര്‍ മുസ്ലിയാര്‍ കേന്ദ്ര വ്യോമയാന മന്ത്രി കെ റാം മോഹന്‍ നായിഡുവിന് കത്തയച്ചു. പശ്ചിമേഷ്യന്‍ യുദ്ധ സാഹചര്യത്തില്‍ വിവിധ ഗള്‍ഫ് രാജ്യങ്ങളില്‍നിന്ന് കേരളത്തിലേക്കുള്ള വിമാന നിരക്കിലുണ്ടായ വര്‍ധന, മുന്നറിയിപ്പില്ലാതെ ഫ്ളൈറ്റുകള്‍ റദ്ദാക്കല്‍ എന്നിവ പ്രവാസികള്‍ക്കു വലിയ പ്രയാസങ്ങള്‍ ഉണ്ടാക്കുന്നുണ്ടെന്നും കാന്തപുരം കത്തില്‍ സൂചിപ്പിച്ചു.

🔹രാത്രി പെട്രോള്‍ തീര്‍ന്ന് റോഡില്‍ നിന്നുപോയ ബൈക്കില്‍ പിക്കപ്പ് വാന്‍ ഇടിച്ച് യുവാവ് മരിച്ചു. താമരക്കുളം കിഴക്കേമുറി പച്ചക്കാട് വിദ്യാഭവനത്തില്‍ രാധാകൃഷ്ണന്‍ – സുജാത ദമ്പതികളുടെ മകന്‍ ഹരിനാരായണന്‍ (20) ആണ് മരിച്ചത്. ഹരിനാരായണന്റെ സുഹൃത്ത് ആദിത്യനെ (20) പരിക്കുകളോടെ ആശുപത്രിയില്‍ പ്രവേശിപ്പിച്ചു. ഞായറാഴ്ച രാത്രി ഒമ്പതോടെ കണ്ണനാകുഴി ക്ഷേത്രത്തിന് സമീപമായിരുന്നു അപകടം.

🔹കോട്ടയം വേമ്പിന്‍കുളങ്ങര മഹാവിഷ്ണു ക്ഷേത്രത്തിലെ പരിപാടിക്കിടെ ക്രിസ്ത്യന്‍ ഭക്തിഗാനം ആലപിച്ച നന്ദഗോവിന്ദം ഭജന്‍സിനെതിരെ രൂക്ഷ വിമര്‍ശനവുമായി ഹിന്ദു ഐക്യവേദി നേതാവ് കെ.പി. ശശികല. ചിക്കന്‍ മസാല നല്ലതാണെങ്കിലും പായസത്തിലിടരുത് എന്ന ഉപമയോടെയായിരുന്നു ശശികലയുടെ പ്രതികരണം.

🔹ക്ഷേത്രത്തില്‍ ക്രിസ്ത്യന്‍ ഭക്തിഗാനം ആലപിച്ചതില്‍ വിശദീകരണവുമായി നന്ദഗോവിന്ദം ഭജന്‍സ്. ക്ഷേത്ര പുനര്‍നിര്‍മ്മാണത്തിന് പിന്തുണ നല്‍കിയവര്‍ക്കുള്ള നന്ദിസൂചകമായി സംഘാടകരുടെ അനുമതിയോടെയാണ് ഗാനം ആലപിച്ചതെന്നും ആരുടെയും വികാരങ്ങളെ വ്രണപ്പെടുത്താന്‍ ഉദ്ദേശിച്ചിരുന്നില്ലെന്നും അവര്‍ വ്യക്തമാക്കി.

🔹അമ്മയോടൊപ്പം വീടിനു പുറത്തിറങ്ങിയ നാലു വയസ്സുകാരനെ തെരുവ് നായ കടിച്ചു കീറി. കോഴിക്കോട് കോടഞ്ചേരിയിലെ നിരന്നപാറ ഉന്നതിയില്‍ താമസിക്കുന്ന അരുണ്‍രാജിന്റെയും മണിമേഖലയുടെയും മകന്‍ അയാനാണ് തെരുവ് നായയുടെ ആക്രമണത്തില്‍ സാരമായി പരിക്കേറ്റത്. പിന്നീടു ചത്ത നായയെ പോസ്റ്റുമോര്‍ട്ടം നടത്തി.

🔹തവനൂരില്‍ ജോയിയോടു ജയിച്ചില്ലെങ്കില്‍ മൊട്ടയടിച്ചു പാതി മീശ കളയുമെന്ന് കെ.ടി ജലീല്‍ പറഞ്ഞെന്നു വ്യാജ പ്രചരണം നടത്തിയതിനെതിരെ ഡിവൈഎഫ്ഐ ഡി ജി പിക്കും, ജില്ലാ പൊലീസ് മേധാവിക്കും പരാതി നല്‍കി. ജലീലിനെതിരെ വ്യാജ കാര്‍ഡ് ഉണ്ടാക്കി സമൂഹമാധ്യമങ്ങളില്‍ പ്രചരിപ്പിച്ചു എന്നാണ് പരാതി.

🔹വ്യക്തവും വായിക്കാന്‍ കഴിയുന്നതുമായ പ്രിസ്‌ക്രിപ്ഷന്‍ നല്‍കുന്നതിനായി ഡോക്ടര്‍മാര്‍ക്ക് മാര്‍ഗനിര്‍ദ്ദേശം പുറത്തിറക്കണമെന്ന് മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥ് ആരോഗ്യവകുപ്പ് സെക്രട്ടറിക്ക് നിര്‍ദ്ദേശം നല്‍കി. മാര്‍ഗനിര്‍ദ്ദേശം ലംഘിക്കുന്ന ഡോക്ടര്‍മാര്‍ക്കെതിരെ നിയമനടപടികള്‍ സ്വീകരിക്കണമെന്നും ഉത്തരവില്‍ പറഞ്ഞു.

🔹ലൈംഗികാതിക്രമ കേസില്‍ പ്രതിയായ കെഎസ്യു നേതാവ് എം സി അതുലിന് പിന്തുണയുമായി രാഹുല്‍ മാങ്കൂട്ടത്തില്‍. വീണ ജോര്‍ജിനെതിരായ പ്രതിഷേധത്തിന് പിന്നാലെയുള്ള വേട്ടയാടലാണ് കേസെന്ന അതുലിന്റെ ഫേസ്ബുക്ക് പോസ്റ്റിലാണ് രാഹുല്‍ പിന്തുണ അറിയിച്ചത്. കോടതി കുറ്റക്കാരനെന്ന് വിധിക്കാതെ അതുലിനെ തള്ളിപ്പറയില്ലെന്നും രാഹുല്‍ കമന്റില്‍ വ്യക്തമാക്കി.

🔹വ്യാജ ഓണ്‍ലൈന്‍ ട്രേഡിങ് വഴി വന്‍ തുക ലാഭം വാഗ്ദാനം ചെയ്ത് 1.83 കോടി രൂപ തട്ടിയെടുത്ത റാഞ്ചി സ്വദേശി പിടിയില്‍. പുത്തൂര്‍ സ്വദേശിയുടെ പരാതിയില്‍ കൊല്ലം റൂറല്‍ സൈബര്‍ ക്രൈം വിഭാഗം നടത്തിയ അന്വേഷണത്തിലാണ് തട്ടിപ്പിലെ മുഖ്യപ്രതി റാഞ്ചി ജംതാര സ്വദേശി ജിതേന്ദ്ര കുമാര്‍ പപ്പു പിടിയിലായത്.

🔹താമരശ്ശേരി അടിവാരം – നാലാം വളവ് ചുരം ബദല്‍ റോഡില്‍ ഉള്ളി കയറ്റി വരികയായിരുന്ന പിക്കപ്പ് ലോറി നിയന്ത്രണം വിട്ട് താഴ്ചയിലേക്ക് മറിഞ്ഞു. അപകടത്തില്‍ ഡ്രൈവര്‍ ഉള്‍പ്പെടെ രണ്ടു പേര്‍ക്ക് പരിക്കേറ്റു. കര്‍ണാടകയില്‍നിന്ന് ഉള്ളിയുമായി വരികയായിരുന്ന പിക്കപ്പാണ് മുപ്പതേക്ര എന്ന സ്ഥലത്ത് മറിഞ്ഞത്.

🔹കോഴിക്കോട് തൊട്ടില്‍പ്പാലം നാമ്പിലാട് യുവതിയും യുവാവും തൂങ്ങിമരിച്ച നിലയില്‍. പേരാമ്പ്ര കുയിമ്പില്‍ സ്വദേശിനി തട്ടാന്‍കണ്ടി ശരണ്യ, കുറ്റ്യാടി കള്ളാട് സ്വദേശി പഞ്ചാര പറമ്പത്ത് അജേഷ് എന്നിവരാണ് മരിച്ചത്. രണ്ടു മക്കളുടെ അമ്മയാണു ശരണ്യ. അജേഷ് അവിവാഹിതനാണ്.

🔹എറണാകുളത്ത് സ്‌കൂളില്‍നിന്നു വിനോദസഞ്ചാരത്തിനു പോയ സംഘത്തിലെ അഞ്ചു വയസുള്ള മുഹമ്മദ് ആദം കാനയില്‍ വീണു മരിച്ചു. തമ്മനത്തെ പ്രീ സ്‌കൂളില്‍ നിന്ന് കിഴക്കമ്പലം പഴങ്ങനാട്ടെ ജംഗിള്‍ പാര്‍ക്കിനു പുറത്തെ കാനയിലാണ് കുട്ടി വീണത്.

🔹മലപ്പുറത്ത് യുവതിയെ മണ്ണെണ്ണയൊഴിച്ച് തീ കൊളുത്തി കൊലപ്പെടുത്തി. പെരിന്തല്‍മണ്ണ സ്വദേശിനി ചേരിക്കല്ലന്‍ ഷഫ്ന എന്ന 25 കാരിയാണു മരിച്ചത്. ഷഫ്നയുടെ ഭര്‍ത്താവ് മുന്‍ഷാദിനെ (30) പെരിന്തല്‍മണ്ണ പൊലീസ് അറസ്റ്റു ചെയ്തു.

🔹പ്രധാനമന്ത്രി നരേന്ദ്രമോദിക്കെതിരെ എഐസിസി ജനറല്‍ സെക്രട്ടറി കെ.സി. വേണുഗോപാല്‍ അവകാശ ലംഘന നോട്ടീസ് നല്‍കി. രാജ്യത്തോടുള്ള അഭിസംബോധനയില്‍ പ്രധാനമന്ത്രി എംപിമാരെ അപമാനിച്ചെന്നാണ് പരാതി. പ്രതിപക്ഷം വോട്ട് ചെയ്ത് സ്ത്രീ സംവരണം തടഞ്ഞെന്ന പ്രസ്താവന അസത്യമാണ്. പാര്‍ലമെന്റിലെ നടപടിക്രമങ്ങളെ കുറിച്ചാണ് മോദി പുറത്ത് സംസാരിച്ചത്. ഇത് എംപിമാരുടെ അവകാശം ലംഘിക്കുന്നതാണെന്ന് കെ സി വേണുഗോപാല്‍ പറയുന്നു.

🔹തമിഴ്നാട് നിയമസഭാ തെരഞ്ഞെടുപ്പിന്‍റെ പരസ്യ പ്രചാരണം സമാപിച്ചു. ബംഗാളിൽ ആദ്യ ഘട്ടം തെരഞ്ഞെടുപ്പ് നടക്കുന്ന 152 മണ്ഡലങ്ങളിലും ഇന്നലെ പരസ്യ പ്രചാരണം സമാപിച്ചു.തമിഴ്നാട്ടിൽ 234 മണ്ഡലങ്ങളാണ് വ്യാഴാഴ്ച വിധിയെഴുത്ത് നടക്കുക. തുടർഭരണം ലക്ഷ്യമിടുന്ന ഡിഎംകെയ്ക്ക് അണ്ണാ ഡിഎംകെ നേതൃത്വം നല്കുന്ന എൻഡിഎയും നടൻ വിജയിന്‍റെ ടിവികെയുമാണ് പ്രധാന എതിരാളികൾ. ഡിഎംകെ 164 മണ്ഡലങ്ങളിലും സഖ്യകക്ഷികൾ 70ലും മത്സരിക്കുന്നു. എൻ ഡിഎയിൽ അണ്ണാ ഡിഎംകെ 169 സീറ്റിലും സഖ്യകക്ഷികൾ 65ലും മത്സരിക്കുന്നു. വിജയിന്‍റെ ടിവികെയ്ക്ക് എല്ലായിടത്തും സ്ഥാനാർഥികളുണ്ട്. വിജയ് പെരന്പൂരിലും തിരുച്ചിറപ്പള്ളി ഈസ്റ്റിലും ജനവിധി തേടുന്നു. സംവിധായകൻ സീമാൻ നേതൃത്വം നല്കുന്ന നാം തമിഴർ കക്ഷി 234 സീറ്റുകളിലും മത്സരിക്കുന്നു. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ലോക്സഭാ പ്രതിപക്ഷനേതാവ് രാഹുൽഗാന്ധി, ആന്ധ്രപ്രദേശ് മുഖ്യമന്ത്രി എൻ. ചന്ദ്രബാബു നായിഡു, അരവിന്ദ് കേജരിവാൾ തുടങ്ങിയ പ്രമുഖർ തമിഴ്നാട്ടിൽ പ്രചാരണത്തിനെത്തിയിരുന്നു. വടക്കൻ ബംഗാളിലെയും സംസ്ഥാനത്തിന്‍റെ മധ്യ, തെക്കൻ ഭാഗങ്ങളിലെ ജില്ലകളിലെ മണ്ഡലങ്ങളിലാണ് നാളെ വോട്ടെടുപ്പ് നടക്കുക. ആകെ വോട്ടർമാർ 3.60 കോടി. അക്രമസാധ്യത കണക്കിലെടുത്ത് രണ്ടര ലക്ഷം കേന്ദ്രസേനാംഗങ്ങളെയാണ് ബംഗാളിൽ വിന്യസിച്ചിരിക്കുന്നത്. തുടർച്ചയായ നാലാം വിജയമാണ് തൃണമൂൽ കോൺഗ്രസ് ലക്ഷ്യമിടുന്നത്. ശക്തമായ വെല്ലുവിളിയുമായി ബിജെപി രംഗത്തുണ്ട്. ഇടതുമുന്നണിയും കോൺഗ്രസും ചില മണ്ഡലങ്ങളിൽ നിർണായകശക്തിയാണ്. 54 സീറ്റുള്ള വടക്കൻ ബംഗാൾ ബിജെപിയുടെ ശക്തികേന്ദ്രമാണ്. ഡാർജിലിംഗ്, കലിംപോംഗ്, ജൽപായ്ഗുഡി, അലിപുർദുവാർ, കൂച്ച് ബെഹാർ, നോർത്ത് ദിനാജ്പുർ, സൗത്ത് ദിനാജ്പുർ, മാൽദ ജില്ലകൾ ഉൾപ്പെടുന്നതാണ് വടക്കൻ ബംഗാൾ. 2021ൽ ബിജെപി 30ഉം തൃണമൂൽ കോൺഗ്രസ് 24ഉം സീറ്റ് നേടി.

🔹തമിഴ്നാട് വാൽപ്പാറയിലുണ്ടായ വാഹനാപകടത്തിൽ പരിക്കേറ്റ് കോയമ്പത്തൂർ മെഡിക്കൽ കോളജ് ആശുപത്രിയിൽ ചികിത്സയിലായിരുന്ന നൗഷാദ് അലി അന്തരിച്ചു. ഇന്ന് പുലർച്ചെയായിരുന്നു മരണം. നൗഷാദ് അലിയുടെ ആരോഗ്യനില വഷളായിട്ടും ഡോക്ടർമാർ എത്താൻ വൈകിയതാണ് മരണം സംഭവിക്കാൻ കാരണമെന്ന് കുടുംബം ആരോപിച്ചു. തീവ്രപരിചരണ വിഭാഗത്തിൽ ചികിത്സയിലിരിക്കെയാണ് മരണം.അപകടത്തിൽ പരിക്കേറ്റ മറ്റു മൂന്ന് പേർ ഇപ്പോഴും ചികിത്സയിൽ തുടരുകയാണ്. കോയമ്പത്തൂർ മെഡിക്കൽ കോളജിലുള്ള മുഹമ്മദ് ഫായിസിന്‍റെ ആരോഗ്യനില ഇപ്പോഴും അതീവ ഗുരുതരമായി തുടരുന്നു. ഇദ്ദേഹം തീവ്രപരിചരണ വിഭാഗത്തിൽ നിരീക്ഷണത്തിലാണ്. അതേസമയം, കോയമ്പത്തൂരിൽ തന്നെയുള്ള സഹദിൻ മുഹമ്മദിന്‍റെ നിലയിൽ നേരിയ പുരോഗതിയുള്ളതിനാൽ വാർഡിലേക്ക് മാറ്റിയിട്ടുണ്ട്.
പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലുള്ള മസ്നിന്‍റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ഇദ്ദേഹത്തെയും വാർഡിലേക്ക് മാറ്റിയിട്ടുണ്ട്. നൗഷാദ് അലിയുടെ വിയോഗത്തോടെ അപകടത്തിൽ മരിച്ചവരുടെ എണ്ണം വർധിച്ചു.

🔹25 പേര്‍ കൊല്ലപ്പെട്ട തമിഴ്നാട്ടിലെ വിരുദുനഗര്‍ പടക്കനിര്‍മാണ ശാല സ്ഫോടനക്കേസില്‍ ഫാക്ടറി ഉടമകളായ ഈശ്വരി, ഭര്‍ത്താവ് മുത്തുമാണിക്യം എന്നിവര്‍ കീഴടങ്ങി. വിരുദുനഗര്‍ ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് ഇവര്‍ കീഴടങ്ങിയത്. ഇവരുടെ നാലു ബന്ധുക്കളെ പൊലീസ് അറസ്റ്റു ചെയ്തിരുന്നു.

🔹തമിഴ്നാട് നിയമസഭ തെരഞ്ഞെടുപ്പില്‍ കുട്ടികളോട് വോട്ട് അഭ്യര്‍ത്ഥനയുമായി വിജയ്. വീട്ടിലുള്ളവരോട് വിജയ്ക്ക് വോട്ട് ചെയ്യാന്‍ പറയണമെന്നായിരുന്നു കുട്ടികളോട് അഭ്യര്‍ത്ഥിച്ചത്. പുത്തന്‍ ഉടുപ്പും കിന്‍ഡര്‍ ജോയിയും നിങ്ങള്‍ കരഞ്ഞു വാങ്ങാറില്ലേ? അതുപോലെ നിങ്ങള്‍ക്ക് ഇഷ്ടപ്പെട്ട വിജയിയെയും വിജയിപ്പിക്കണം. വോട്ട് ചെയ്യാന്‍ തയാറാകുന്നില്ലെങ്കില്‍ നിര്‍ബന്ധിച്ച് പറഞ്ഞയക്കണമെന്നും വിജയ് കുട്ടികളോട് ആവശ്യപ്പെട്ടു.

🔹ഒപ്പോയുടെ ഏറ്റവും പുതിയ സ്മാര്‍ട്ട്‌ഫോണ്‍ സീരീസായ എഫ്33 സീരീസിലെ എഫ്33 പ്രൊ 5ജി, എഫ്33 5ജി എന്നീ മോഡലുകള്‍ കേരളത്തിലും വില്‍പനയ്‌ക്കെത്തി. പതിനായിരത്തിലധികം തവണ വെള്ളത്തില്‍ മുക്കിയുള്ള പരിശോധനകള്‍ക്ക് വിധേയമാക്കിയ ഈ ഫോണ്‍, 12 മണിക്കൂര്‍ വരെ വെള്ളത്തിനടിയില്‍ കിടന്നാലും കേടുപാടുകള്‍ സംഭവിക്കാത്ത രീതിയിലാണ് നിര്‍മ്മിച്ചിരിക്കുന്നതെന്ന് കമ്പനി അവകാശപ്പെടുന്നു. മഴ, പൂള്‍സൈഡിലെ വെള്ളം തെറിക്കല്‍, ആവി, ക്ലീനിംഗ് ലോഷനുകള്‍ തുടങ്ങി നിത്യജീവിതത്തില്‍ ഉണ്ടാകാന്‍ സാധ്യതയുള്ള 36 തരം വെല്ലുവിളികളെ ചെറുക്കാന്‍ ഈ ഫോണിന് കഴിയും. 50 മെഗാപിക്‌സലിന്റെ അള്‍ട്രാ-വൈഡ് സെല്‍ഫി ക്യാമറയാണ് എഫ്33 പ്രൊ 5ജിയുടെ എടുത്തുപറയേണ്ട സവിശേഷത. 7000 എംഎഎച്ച് വലിയ ബാറ്ററി, കളര്‍ഒഎസ് 16, 5ജി++ കണക്റ്റിവിറ്റി എന്നിവ എഫ്33 പ്രൊ 5ജിയെ കൂടുതല്‍ കരുത്തുറ്റതാക്കുന്നു. ഹൈ പ്രെഷര്‍ വാട്ടര്‍ ജെറ്റുകളെയും 85 ഡിഗ്രി സെല്‍ഷ്യസ് വരെയുള്ള ചൂടുവെള്ളത്തെയും പ്രതിരോധിക്കാന്‍ ഈ ഫോണിന് സാധിക്കും.

🔹പാക്കിസ്ഥാന്റെ അഭ്യര്‍ത്ഥന മാനിച്ച് ഇറാനുമായുള്ള വെടിനിറുത്തല്‍ നീട്ടുന്നതായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. വെടിനിറുത്തല്‍ കരാര്‍ ഇന്ന് അവസാനിക്കാനിരിക്കേയാണ് ഒരാഴ്ചകൂടി നീട്ടുന്നതായി പ്രഖ്യാപിച്ചത്. ഇതേസമയം, ഇന്നു സമാധാന കരാറില്‍ ഒപ്പുവയ്ക്കണമെന്ന് ട്രംപ് ആവശ്യപ്പെട്ട സമാധാന ചര്‍ച്ചയില്‍ പങ്കെടുക്കാന്‍ ഇറാന്‍ തയാറായിട്ടില്ല. അണ്വായുധങ്ങളും ആണവശേഖരവും അമേരിക്കയ്ക്കു കൈമാറണമെന്ന ഉപാധി അടക്കമുള്ള നിര്‍ദ്ദേശങ്ങളോട് ഇറാന്‍ പ്രതികരിച്ചിട്ടുമില്ല. ഇതേത്തുടര്‍ന്ന് ചര്‍ച്ചാവേദിയായ ഇസ്ലമാബാദിലേക്ക് യുഎസ് വൈസ് പ്രസിഡന്റ് ജെ.ഡി. വാന്‍സ് യാത്ര തിരിച്ചിട്ടില്ല.

🔹പശ്ചിമേഷ്യയിലെ സംഘര്‍ഷാവസ്ഥ കുറഞ്ഞതോടെ പ്രമുഖ വിമാനക്കമ്പനികള്‍ യുഎഇയിലേക്ക് സര്‍വീസുകള്‍ പുനഃസ്ഥാപിക്കുന്നു. എമിറേറ്റ്സ്, ഇത്തിഹാദ്, ഫ്ലൈ ദുബായ്, എയര്‍ അറേബ്യ ഉള്‍പ്പെടെയുള്ളവ സര്‍വീസുകള്‍ വര്‍ധിപ്പിച്ചിട്ടുണ്ട്. ഈ മാസം ആദ്യം 250 ലക്ഷ്യസ്ഥാനങ്ങളിലേക്ക് ഉണ്ടായിരുന്ന കണക്റ്റിവിറ്റി ഇപ്പോള്‍ 420 ആയി വിമാന കമ്പനികള്‍ വര്‍ധിപ്പിച്ചിട്ടുണ്ട്.

🔹താന്‍ മുഴുക്കുടിയനും വഹിക്കുന്ന പദവിക്കു ബാധ്യതയുമാണെന്ന വാര്‍ത്തയ്‌ക്കെതിരെ അമേരിക്കയുടെ രഹസ്യാന്വേഷണ ഏജന്‍സിയായ എഫ്ബിഐയുടെ ഡയറക്ടറും ഇന്ത്യന്‍ വംശജനുമായ കാഷ് പട്ടേല്‍ അമേരിക്കയിലെ പ്രമുഖ മാധ്യമമായ അറ്റ്‌ലാന്റിക് മാസികയ്ക്കെതിരെ മാനനഷ്ടക്കേസ് ഫയല്‍ ചെയ്തു. 250 ദശലക്ഷം ഡോളര്‍ (2300 കോടി രൂപ) നഷ്ടപരിഹാരം തേടിയാണ് കൊളംബിയ ഡിസ്ട്രിക്റ്റ് കോടതിയില്‍ കേസ് നല്‍കിയത്. സാറാ ഫിറ്റ്സ്പാട്രിക് എഴുതിയ ‘എഫ്.ബി.ഐ ഡയറക്ടറെ കാണാനില്ല’ എന്ന തലക്കെട്ടിലുള്ള വാര്‍ത്തക്കെതിരേയാണ് കേസ്.

🔹ഐപിഎല്ലില്‍ ഡല്‍ഹി ക്യാപിറ്റല്‍സിനെ 47 റണ്‍സിന് തകര്‍ത്ത് സണ്‍റൈസേഴ്സ് ഹൈദരാബാദ്. തുടര്‍ച്ചയായ മൂന്നാം ജയത്തോടെ ഹൈദരാബാദ് പോയിന്റ് പട്ടികയില്‍ മൂന്നാം സ്ഥാനത്തേക്കുയര്‍ന്നപ്പോള്‍ ഡല്‍ഹി അഞ്ചാം സ്ഥാനത്ത് തുടരുന്നു. ആദ്യം ബാറ്റ് ചെയ്ത ഹൈദരാബാദ് 68 പന്തില്‍ 135 റണ്‍സെടുത്ത അഭിഷേക് ശര്‍മയുടെ മികവില്‍ 2 വിക്കറ്റ് നഷ്ടത്തില്‍ 243 റണ്‍സെടുത്തു. കൂറ്റന്‍ വിജയലക്ഷ്യത്തിലേക്ക് ബാറ്റ് വീശിയ ഡല്‍ഹിക്ക് 20 ഓവറില്‍ 9 വിക്കറ്റ് നഷ്ടത്തില്‍ 195 റണ്‍സെടുക്കാനെ കഴിഞ്ഞുള്ളു.

🔹നവാഗതരുമായി എത്തി വിസ്മയ വിജയം നേടി മുന്നേറുന്ന ‘വാഴ 2’ തെലുങ്ക് മൊഴിമാറ്റ പതിപ്പിന്റെ ട്രെയ്ലര്‍ അണിയറക്കാര്‍ പുറത്തുവിട്ടു. അതേസമയം ചിത്രം ആഗോള ബോക്സ് ഓഫീസില്‍ നിന്ന് 200 കോടിയും മറികടന്ന് കുതിപ്പ് തുടരുകയാണ്. കേരളത്തില്‍ നിന്ന് മാത്രം 100 കോടിയിലേറെ ഗ്രോസും ചിത്രം ഇതിനകം നേടി. മലയാളത്തിലെ അടുത്ത ഇന്‍ഡസ്ട്രി ഹിറ്റ് ആകുമോ ചിത്രം എന്നതാണ് സിനിമാലോകം ആകാംക്ഷയോടെ നോക്കുന്നത്. ലോകയാണ് നിലവില്‍ മലയാളത്തിലെ ഇന്‍ഡസ്ട്രി ഹിറ്റ്. 300 കോടി ക്ലബ്ബില്‍ ഇടംപിടിച്ച ഒരേയൊരു മലയാള ചിത്രവും ലോക തന്നെ. വിപിന്‍ ദാസിന്റെ തിരക്കഥയില്‍ നവാഗതനായ സവിന്‍ സ ആണ് ചിത്രം സംവിധാനം ചെയ്തിരിക്കുന്നത്. ഹാഷിര്‍, അലന്‍ ബിന്‍ സിറാജ്, അജിന്‍ ജോയ്, വിനായക് തുടങ്ങിയ ഒരുപറ്റം യുവതാരങ്ങള്‍ക്കൊപ്പം സുധീഷ്, വിജയ് ബാബു, അജു വര്‍ഗീസ്, അരുണ്‍, അല്‍ഫോന്‍സ് പുത്രന്‍, വിനോദ് കെടാമംഗലം, അമീന്‍, നിഹാല്‍, അഞ്ചല്‍ മറിയ തുടങ്ങിയ താരങ്ങളും അഭിനയിച്ചിരിക്കുന്ന ചിത്രമാണ് ഇത്.

🔹ജയസൂര്യ നായകനാക്കി കളങ്കാവല്‍ ഫെയിം ജിതിന്‍ കെ ജോസ് തിരക്കഥയെഴുതി സംവിധാനം നിര്‍വഹിക്കുന്ന പുതിയ ചിത്രത്തിന്റെ തിരക്കഥയുടെ പൂജാ കര്‍മ്മം,കൊല്ലൂര്‍ ശ്രീ മൂകാംബിക ക്ഷേത്രത്തില്‍ നിര്‍വഹിച്ചു. മാജിക് മൂണ്‍ പ്രൊഡക്ഷന്‍സിന്റെ ബാനറില്‍ രാജീവ് ഗോവിന്ദന്‍ നിര്‍മ്മിക്കുന്ന ഈ ചിത്രത്തിന്റെ സംഗീത സംവിധാനം മുജീബ് മജീദ് നിര്‍വ്വഹിക്കുന്നു. ഓര്‍ഡിനറി,അനാര്‍ക്കലി,ഉടന്‍ റിലീസാകുന്ന കാളിയന്‍ തുടങ്ങിയ ബ്ലോക്ക്ബസ്റ്റര്‍ ഹിറ്റ് ചിത്രങ്ങളുടെ ടീമാണ് ഇതിന്റെ പിന്നിലുമുള്ളത്. നിരവധി ഹിറ്റുകള്‍ സമ്മാനിച്ച റാഫിയും ജിതിന്‍ കെ ജോസും ചേര്‍ന്ന് ഈ ചിത്രത്തിന്റെ തിരക്കഥ എഴുതുന്നു. ടൈറ്റില്‍ പ്രഖ്യാപനം ഉടന്‍ ഉണ്ടാകും. ഇന്ത്യയിലും വിദേശത്തുമായി ഷൂട്ടിംഗ് ആരംഭിക്കും. കറുത്തച്ചന്‍ ഊട്ടിനെ കേന്ദ്രീകരിച്ച് ഒരു ഹൈസ്‌കെയില്‍ ത്രില്ലര്‍ ചിത്രം ഒരുക്കാനുള്ള ശ്രമത്തിലാണ് അണിയറ ശില്പികള്‍.

💦 ഗുരുജിയുടെ വാക്കുകൾ

സമയം നൽകുന്നവൻ സമ്മാനം നൽകുന്നവനെക്കാൾ നല്ലവനാണ്. മാപ്പ് നൽകുന്നവൻ നീതി നടപ്പിലാക്കുന്നവനെക്കാൾ മഹാനാണ്. കണ്ണീരൊ പ്പുന്നവൻ ചിരിയ്ക്കുന്നവനെക്കാൾ പ്രിയപ്പെട്ടവനാണ്.
മനസ്സിൽ നന്മ മാത്രം കാത്ത് സൂക്ഷിക്കുന്നവർ പലപ്പോഴും പറ്റിക്കപ്പെടും,പലർക്കു മുന്നിലും തല കുനിക്കേണ്ടിവരും.. പക്ഷേ അവർ ഒരിക്കലും ജീവിതത്തിൽ പരാജയപ്പെടുകയില്ല..!!!

തയ്യാറാക്കിയത്: കപിൽ ശങ്കർ

6 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 22 | ബുധൻ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ഭാര്യയെ കൊന്ന് ഓടയിൽ തള്ളിയ യു.എസ് സൈനികന് 59 വർഷം തടവ്

തലച്ചോറിലെ നിശബ്ദ അപകടം: ചെറുപ്പക്കാരിൽ സ്ട്രോക്ക് ആശങ്കാജനകമായി വർദ്ധിക്കുന്നു

1 COMMENT

LEAVE A REPLY Cancel reply

Most Popular

10 ദിവസം അറ്റകുറ്റപ്പണി: ആലുവയിലെ 2 പാലങ്ങൾ 28 മുതൽ അടയ്ക്കും, ഗതാഗതം തടസ്സപ്പെടും

ഒക്ടോബർ 27; പുന്നപ്ര- വയലാർ രക്തസാക്ഷി ദിനം.

‘ഇ ഡി തോളില്‍ കയറുന്നു, കെ എം ഷാജഹാന് രാഷ്ട്രീയ അജണ്ട’; ടി വീണ ഹൈക്കോടതിയില്‍.

Recent Comments

EDITOR PICKS

10 ദിവസം അറ്റകുറ്റപ്പണി: ആലുവയിലെ 2 പാലങ്ങൾ 28 മുതൽ അടയ്ക്കും, ഗതാഗതം തടസ്സപ്പെടും

ഒക്ടോബർ 27; പുന്നപ്ര- വയലാർ രക്തസാക്ഷി ദിനം.

POPULAR POSTS

ഇതെന്തൊരു വിധി: ആറുമാസത്തിനിടെ 23 പേർക്ക് വധശിക്ഷ വിധിച്ച ജഡ്ജിയെ സ്ഥലംമാറ്റി

തേനിയിൽ ജയിൽ ജീവനക്കാരനെ ആക്രമിച്ചശേഷം 17 വിചാരണ തടവുകാർ കൂട്ടത്തോടെ രക്ഷപ്പെട്ടു

POPULAR CATEGORY

ABOUT US

FOLLOW US