📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 10 | വെള്ളി ✍ കപിൽ ശങ്കർ

🔹ഏപ്രിൽ 10 ലോകമെമ്പാടും പ്രധാനമായും ലോക ഹോമിയോപ്പതി ദിനമായി (World Homeopathy Day) ആചരിക്കുന്നു. ഹോമിയോപ്പതി ചികിത്സാ സമ്പ്രദായത്തിൻ്റെ സ്ഥാപകനായ ഡോ. സാമുവൽ ഹാനിമാൻ്റെ ജന്മദിനമാണിത്. കൂടാതെ, സഹോദരങ്ങൾ തമ്മിലുള്ള ബന്ധത്തെ ആദരിക്കുന്ന ദേശീയ സഹോദര ദിനമായും (National Siblings Day) ഈ ദിവസം ആചരിക്കുന്നു.

🔹കേരള നിയമസഭ തെരഞ്ഞെടുപ്പില്‍ 78.27 ശതമാനം പോളിംഗ്. 2021 നിയമസഭ തെരഞ്ഞെടുപ്പില്‍ 74.06 ശതമാനമായിരുന്നു പോളിംഗ്. മേയ് നാലിനാണു വോട്ടെണ്ണല്‍. വോട്ടു രേഖപ്പെടുത്തിയ ഇലക്ട്രോണിക്സ് വോട്ടിംഗ് മെഷീനുകള്‍ സ്ട്രോംഗ് റൂമുകളിലേക്കു മാറ്റി.

🔹വനിതാ സംവരണ ബില്ലിനു കേന്ദ്ര മന്ത്രിസഭ അംഗീകാരം നല്‍കി. പാര്‍ലമെന്റിലും നിയമസഭകളിലും സ്ത്രീകള്‍ക്ക് 33 ശതമാനം സീറ്റു സംവരണം ചെയ്യുന്ന നിയമമാണിത്. ബില്‍ പാസാക്കാന്‍ എല്ലാ എംപിമാരുടേയും പിന്തുണവേണമെന്ന് പ്രധാനമന്ത്രി നരേന്ദ്രമോദി അഭ്യര്‍ത്ഥിച്ചു.

🔹ക്ഷേത്രദര്‍ശനത്തിന് എത്തുന്നവര്‍ ആചാരങ്ങള്‍ പാലിക്കണമെന്നും അവിശ്വാസിക്കും മതപരമായ വിഷയങ്ങള്‍ കോടതിക്കു മുന്‍പില്‍ ഉന്നയിക്കാമെന്നും സുപ്രീം കോടതി. ശബരിമലയിലെ യുവതീ പ്രവേശന വിഷയം പരിഗണിക്കവേയാണ് ഒമ്പതംഗം ഭരണഘടനാ ബഞ്ചിലെ ജസ്റ്റിസ് ബി വി നാഗരത്നയുടെ നിരീക്ഷണം. ജസ്റ്റിസ് ജോയ്മല്യ ബാഗ്ചിയും ഇതേ നീരീക്ഷണത്തെ പിന്തുണച്ചു.

🔹വോട്ടര്‍മാര്‍ക്കു നന്ദി അറിയിച്ച് മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും. ജനാധിപത്യ പ്രക്രിയയില്‍ പങ്കുചേര്‍ന്ന് തങ്ങളുടെ സമ്മതിദാനാവകാശം വിനിയോഗിച്ച വോട്ടര്‍മാര്‍ക്കു ഹൃദയം നിറഞ്ഞ നന്ദിയും അഭിവാദ്യങ്ങളും രേഖപ്പെടുത്തുന്നുവെന്ന് മുഖ്യമന്ത്രിയും പ്രതിപക്ഷനേതാവും സ്വന്തം ഫേസ്ബുക്ക് പേജുകളില്‍ കുറിച്ചു.

🔹തൃശൂര്‍ കൂര്‍ക്കഞ്ചേരിയില്‍ ശസ്ത്രക്രിയമൂലം ചൂണ്ടുവിരലില്‍ കെട്ടുണ്ടായിരുന്ന അക്ഷര എന്ന പെണ്‍കുട്ടിയെ വോട്ടു ചെയ്യാന്‍ അനുവദിക്കാതെ അഞ്ചു മണിക്കൂര്‍ പോളിംഗ് ഉദ്യോഗസ്ഥര്‍ തടഞ്ഞുവച്ചു. പ്രതിഷേധങ്ങള്‍ക്കും നേതാക്കളുടെ ഇടപെടലിനും ഒടുവില്‍ മുഖ്യ തെരഞ്ഞെടുപ്പ് ഓഫീസറുടെ നിര്‍ദേശപ്രകാരമാണു മറ്റൊരു വിരലില്‍ മഷി പുരട്ടി പെണ്‍കുട്ടിക്കു വോട്ട് ചെയ്യാന്‍ അനുമതി നല്‍കിയത്.

🔹പാലക്കാട് ചിറ്റൂരില്‍ എല്‍ഡിഎഫ് സ്ഥാനാര്‍ഥിക്ക് വോട്ടഭ്യര്‍ഥിച്ച് ബിജെപി സ്ഥാനാര്‍ഥിയുടെ ഫെയ്സ്ബുക്ക് പോസ്റ്റ്. ബിജെപി സ്ഥാനാര്‍ഥി പ്രണേഷ് രാജേന്ദ്രന്റെ ഫെയ്സ്ബുക്ക് പേജിലാണ് ഇടതുമുന്നണി സ്ഥാനാര്‍ഥി വി. മുരുകദാസിന് വോട്ട് ചെയ്യണമെന്ന പോസ്റ്റ് പ്രത്യക്ഷപ്പെട്ടത്.

🔹ആറു ലക്ഷം ഫോളോവേഴ്സുള്ള ഫേസ്ബുക്ക് പേജ് കേരള പൊലീസ് പൂട്ടിച്ചെന്ന് തൃക്കാക്കര എന്‍ഡിഎ സ്ഥാനാര്‍ഥി അഖില്‍ മാരാര്‍. വാ മൂടിക്കെട്ടിയിരിക്കില്ലെന്നും പിണറായിക്കു വേണ്ടി പണിയെടുക്കുന്ന സൈബര്‍ ഡിപ്പാര്‍ട്ട്മെന്റിലെ ഏതവനായാലും കോടതി കയറ്റുമെന്നും അഖില്‍ മാരാര്‍.

🔹പുനലൂരില്‍ പോളിംഗ് ബൂത്തിനു സമീപം വോട്ടു പിടിക്കാന്‍നിന്നു എന്നാരോപിച്ച് എല്‍ഡിഎഫ് – യുഡിഎഫ് പ്രവര്‍ത്തകര്‍ തമ്മില്‍ കയ്യാങ്കളി. വിളക്കുവെട്ടം എല്‍.പി സ്‌കൂള്‍ ബൂത്തിന് മുന്നിലായിരുന്നു സംഭവം. മര്‍ദ്ദനമേറ്റതായി ആരോപിച്ച് യുഡിഎഫിന്റെ വനിതാ കൗണ്‍സിലര്‍ ഷെമി അസീസ് ആശുപത്രിയില്‍ ചികിത്സ തേടി. എല്‍ഡിഎഫ് കൗണ്‍സിലറായ സുഭാഷ് ജി നാഥ് മര്‍ദ്ദിച്ചെന്നാണ് യുഡിഎഫിന്റെ ആരോപണം.

🔹വയനാട് മാനന്തവാടി ചെറുകാട്ടൂരില്‍ പോളിങ് ഓഫീസറെ മാറ്റി. താമര ചിഹ്നത്തില്‍ വോട്ട് ചെയ്യാന്‍ വോട്ടര്‍മാരെ പ്രേരിപ്പിച്ചു എന്ന പരാതിയിലാണ് നടപടി. ചെറുകാട്ടൂര്‍ സെന്റ് ജോസഫ് സ്‌കൂളിലെ 199 നമ്പര്‍ ബൂത്തില്‍ കോണ്‍ഗ്രസ് നല്‍കിയ പരാതിയുടെ അടിസ്ഥാനത്തിലാണ് പോളിങ് ഓഫീസറെ മാറ്റിയത്.

🔹വിരലിൽ മഷി പുരട്ടിയ ശേഷം വോട്ട് ചെയ്യാതെ ഇറങ്ങിപ്പോയ വോട്ടറെ തേടി ആലുവ തോട്ടക്കാട്ടുകര ബൂത്തിലെ പോളിംഗ് ഉദ്യോഗസ്ഥർ.വോട്ടിംഗ് മെഷീനിലെ വോട്ടർമാരുടെ എണ്ണവും രജിസ്റ്ററിലെ എണ്ണവും ആദ്യ മണിക്കൂറുകളിൽ എടുത്തപ്പോഴാണ് ഒരു വോട്ടിന്‍റെ വ്യത്യാസം കണ്ടെത്തിയത്.
ആലുവ നിയോജകമണ്ഡലത്തിലെ തോട്ടക്കാട്ടുകരയിൽ ബൂത്ത് നമ്പർ 120 ലെ ഒരു വോട്ടറാണ് കൈയിൽ മഷി പുരട്ടിയ ശേഷം വോട്ട് ചെയ്യാതെ പോയത്.
രാവിലെ തിരക്കുള്ള സമയമായതിനാൽ ഇലക്‌ട്രോണിക് മെഷീനിൽ വോട്ട് ചെയ്യുമ്പോൾ ഉണ്ടാകുന്ന ശബ്ദം ഉദ്യോഗസ്ഥർ ശ്രദ്ധിച്ചില്ലെന്നാണ് വിശദീകരണം. ഒരാൾ വോട്ട് ചെയ്യാതെ പോയ വിവരം പോളിംഗ് ഉദ്യോഗസ്ഥർ ഇലക‌്ഷൻ കമ്മീഷനെ അറിയിച്ചിട്ടുണ്ട്.

🔹ഒറ്റപ്പാലം മണ്ഡലത്തിലെ നാല് ബൂത്തുകളില്‍ കള്ളവോട്ടു ചെയ്തെന്നു പരാതി. ഒറ്റപ്പാലം മീറ്റ്ന സീനിയര്‍ ബേസിക് സ്‌കൂളിലെ 168, 169 ബൂത്തുകളിലും പടിഞ്ഞാര്‍ക്കര എല്‍പി സ്‌കൂളിലെ 163-ാം ബൂത്തിലുമാണ് കള്ളവോട്ട് നടന്നെന്ന പരാതി ഉയര്‍ന്നത്. അമ്പലപ്പാറ എഎല്‍പി സ്‌കൂളിലെ 98-ാം നമ്പര്‍ ബൂത്തിലും ഇതേ പരാതി ഉയര്‍ന്നിട്ടുണ്ട്. ഇവര്‍ക്ക് ടെന്‍ഡര്‍ വോട്ട് ചെയ്യാന്‍ ഉദ്യോഗസ്ഥര്‍ അവസരം നല്‍കി.

🔹യുഡിഎഫ് വനിതാ ബൂത്ത് ഏജന്റിനെതിരെ നായ്ക്കുരണ പൊടി പ്രയോഗമെന്ന് പരാതി. പേരാവൂരിലെ മുഴക്കുന്ന് യുപി സ്‌കൂളിലെ യുഡിഎഫ് ഏജന്റ് സജിതാ മോഹന്റെ ദേഹത്തേക്ക് നായ്ക്കുരണ പൊടി വിതറി എന്നാണ് പരാതി.

🔹ട്രാന്‍സ്ജെന്‍ഡര്‍ വ്യക്തികളുടെ അവകാശ സംരക്ഷണവുമായി ബന്ധപ്പെട്ട നിയമഭേദഗതി ചോദ്യം ചെയ്ത് എറണാകുളം, പാലക്കാട് സ്വദേശികള്‍ ഹര്‍ജി നല്‍കി. ലിംഗസ്വത്വം സ്വയം പ്രഖ്യാപിക്കാനുള്ള അവകാശം വേണമെന്നാണു വാദം.

🔹പത്തനാപുരത്ത് വോട്ടു ചെയ്തു മടങ്ങിയ ഗൃഹനാഥന്‍ പോളിംങ്ങ് ബൂത്തിനു സമീപം കുഴഞ്ഞുവീണു മരിച്ചു. തലവൂര്‍ കുരാ ആരോമല്‍ നിവാസില്‍ മോഹനന്‍ ആചാരി(61)ആണ് മരിച്ചത്. കുരാ ഗവ എല്‍.പി എസിലെ 72 നമ്പര്‍ ബൂത്തില്‍ വോട്ട് ചെയ്തു നടന്നുപോകവെ റോഡില്‍ കുഴഞ്ഞു വീഴുകയായിരുന്നു.

🔹പോളിങ് ബൂത്തിലെത്തിയ പൊലീസ് വാഹനത്തില്‍ പാമ്പ്. കായംകുളം എംഎസ്എം ഹയര്‍സെക്കന്‍ഡറി സ്‌കൂളിലെ ബൂത്തില്‍ എത്തിയ വാഹനത്തിലാണ് പാമ്പിനെ കണ്ടെത്തിയത്.

🔹കൊടുമണ്‍ പഞ്ചായത്ത് സെക്രട്ടറിയുടെ പേരില്‍ തയാറാക്കിയ വ്യാജ പാസ് ഉപയോഗിച്ച് അനധികൃതമായി മണ്ണു കടത്തിയ മൂന്നു ലോറികള്‍ ശൂരനാട് പോലീസ് പിടിച്ചെടുത്തു.

🔹കൊട്ടാരക്കര കെഎസ്ആര്‍ടിസി ഡിപ്പോയില്‍ നിര്‍ത്തിയിട്ട ബസ്സില്‍നിന്ന് തീയും പുകയും ഉയര്‍ന്നു. ജനത്തിരക്കുള്ള സ്റ്റാന്‍ഡില്‍ ബസിലെ തീപിടിത്തം പരിഭ്രാന്തി പരത്തി. അഗ്നിരക്ഷാസേന കുതിച്ചെത്തിയാണ് തീയണച്ചത്.

🔹ക്ഷേത്രോത്സവത്തിനിടെ പ്രസാദ സദ്യ കഴിച്ചുണ്ടായ ഭക്ഷ്യവിഷബാധയെ തുടര്‍ന്ന് ചികിത്സയില്‍ കഴിഞ്ഞിരുന്നയാള്‍ മരിച്ചു. കാര പേരാവൂരിലെ പൂവത്തുംകണ്ടി വിജയനാ(70)ണ് മരിച്ചത്.കാര പുതിയേടത്ത് മടപ്പുര മുത്തപ്പന്‍ ക്ഷേത്രത്തില്‍ നിന്ന് പ്രസാദസദ്യ കഴിച്ചവര്‍ക്കാണ് ഭക്ഷ്യവിഷബാധയേറ്റത്. കണ്ണൂരിലെ എകെജി സഹകരണ ആശുപത്രിയില്‍ ചികിത്സയിലായിരുന്ന ഇദ്ദേഹം വ്യാഴാഴ്ച രാവിലെയാണ് മരിച്ചത്.
അഞ്ച്, ആറ് തീയതികളിലായി നടന്ന ഉത്സവത്തില്‍ ആറിന് സദ്യ കഴിച്ചവര്‍ക്കാണ് ഭക്ഷ്യവിഷബാധയേറ്റത്. 300ലധികം പേരാണ് കണ്ണൂര്‍, തലശേരി, മട്ടന്നൂര്‍ എന്നിവിടങ്ങളിലെ ആശുപത്രികളില്‍ ചികിത്സ തേടിയത്.
സദ്യയിലെ പച്ചടിയില്‍ നിന്നാണ് വിഷബാധയേറ്റതെന്നാണ് വിവരം. ഇതിന്‍റെ സാമ്പിള്‍ ആരോഗ്യവകുപ്പ് പരിശോധനയ്ക്ക് അയച്ചിട്ടുണ്ട്. ഭക്ഷണം കഴിച്ചവര്‍ക്ക് വയറിളക്കം, പനി, തലവേദന എന്നീ ശാരീരിക അസ്വസ്ഥകള്‍ ഉണ്ടായി.
ശാന്തയാണ് മരിച്ച വിജയന്‍റെ ഭാര്യ, സഹോദരങ്ങള്‍ : പൂവത്തുംകണ്ടി കൗസു, കൃഷ്ണന്‍, സഹജന്‍. മൃതദേഹം പോസ്റ്റ്മോര്‍ട്ടത്തിന് ശേഷം വൈകീട്ട് ഏഴോടെ പൊറോറ നഗരസഭാ ശ്മശാനത്തില്‍ സംസ്‌കരിച്ചു.

🔹ആസാം, പുതുച്ചേരി നിയമസഭാ തെരഞ്ഞെടുപ്പുകളില്‍ പോളിംഗ് ശതമാനത്തില്‍ വന്‍ വര്‍ധന. ആസാമില്‍ 84.42 ശതമാനവും പുതുച്ചേരിയില്‍ 86.92 ശതമാനവും പോളിംഗ്. ബിജെപി ഭരണം നിലനിര്‍ത്താനും കോണ്‍ഗ്രസ് അധികാരം തിരിച്ചുപിടിക്കാനും ശക്തമായ പോരാട്ടത്തിലാണ്.

🔹മുംബൈ ബാരാമതി നിയമസഭാ മണ്ഡലത്തിലെ ഉപതെരഞ്ഞെടുപ്പില്‍ മഹാരാഷ്ട്ര ഉപമുഖ്യമന്ത്രിയും അന്തരിച്ച എന്‍സിപി നേതാവ് അജിത് പവാറിന്റെ ഭാര്യയുമായ സുനേത്ര പവാര്‍ എതിരില്ലാതെ തെരഞ്ഞെടുക്കപ്പെടും. കോണ്‍ഗ്രസ് സ്ഥാനാര്‍ത്ഥിയെ പിന്‍വലിച്ചു. ജനുവരി 28-ന് ബാരാമതി വിമാനത്താവളത്തില്‍ ചാര്‍ട്ടേഡ് വിമാനം തകര്‍ന്നുണ്ടായ അപകടത്തില്‍ അജിത് പവാര്‍ അന്തരിച്ചതിനെ തുടര്‍ന്നാണ് മണ്ഡലത്തില്‍ ഉപതെരഞ്ഞെടുപ്പ് വേണ്ടിവന്നത്.

🔹ബിഹാര്‍ മുഖ്യമന്ത്രിയും ജനതാദള്‍ യുണൈറ്റഡ് നേതാവുമായ നിതീഷ് കുമാര്‍ ഇന്നു രാജ്യസഭാംഗമായി സത്യപ്രതിജ്ഞ ചെയ്യും. മുഖ്യമന്ത്രി സ്ഥാനം രാജിവയ്ക്കുന്ന അദ്ദേഹം മകന്‍ നിഷാന്ത് കുമാറിനെ ഉപമുഖ്യമന്ത്രിയാക്കാനാണു നീക്കം. ബിജെപി നേതാവും ഉപമുഖ്യമന്ത്രിയുമായ സാമ്രാട്ട് ചൗധരി ബിഹാര്‍ മുഖ്യമന്ത്രിയാക്കും.

🔹മഹാരാഷ്ട്രയിലെ നാസിക്കില്‍ ബഹുരാഷ്ട്ര കമ്പനിയിലെ വനിതാ ജീവനക്കാര്‍ ലൈംഗിക പീഡന പരാതി നല്‍കിയതിനെ തുടര്‍ന്ന് ഒരു ടീം ലീഡര്‍ ഉള്‍പ്പെടെ ആറു പേര്‍ അറസ്റ്റിലായി. കഴിഞ്ഞ നാലു വര്‍ഷമായി പീഡനമുണ്ടെന്നു പൊലീസ്. ലൈംഗിക പീഡനം, മതവികാരം വ്രണപ്പെടുത്തല്‍ എന്നീ കുറ്റങ്ങള്‍ ചുമത്തി ഇവര്‍ക്കെതിരെ ഒമ്പത് കേസുകള്‍ രജിസ്റ്റര്‍ ചെയ്തു.

🔹മഹാരാഷ്ട്രയിൽ ഭർതൃവീട്ടിലെ ഗാർഹിക പീഡനത്തെ തുടർന്ന് കൗമാരക്കാരി ജീവനൊടുക്കി. സോളാപൂർ ജില്ലയിലെ മംഗൽവേധ തഹ്‌സിലിലാണ് സംഭവം. 14കാരിയാണ് മരിച്ചത്.നാലു മാസങ്ങൾക്ക് മുൻപാണ് 19കാരനുമായി കുട്ടിയുടെ വിവാഹം നടത്തിയത്. പിന്നീട് തുടർച്ചയായ ഗാർഹിക പീഡനത്തിന് ഇരയായ കുട്ടി, ജീവനൊടുക്കുകയായിരുന്നു.
പെൺകുട്ടിക്ക് പ്രായപൂർത്തിയായിരുന്നില്ലെന്നും ഇവർ മാനസികവും ശാരീരികവുമായ പീഡനത്തിന് ഇരയായെന്നും പോലീസ് പറഞ്ഞു. സംഭവത്തിൽ, ആത്മഹത്യാ പ്രേരണക്കുറ്റം ചുമത്തി ഭർത്താവിനും ഭർതൃപിതാവിനും ഉൾപ്പെടെ അഞ്ച് പേർക്കെതിരെ മംഗൾവേദ പോലീസ് കേസെടുത്തു. ഭർത്താവിനെയും ഭർതൃപിതാവിനെയും പോലീസ് അറസ്റ്റ് ചെയ്തു.
“ഒന്നാമതായി, പെൺകുട്ടി പ്രായപൂർത്തിയായിരുന്നില്ല, രണ്ടാമതായി, പല വീട്ടുജോലികളും ചെയ്യാൻ ഭർതൃവീട്ടുകാർ കുട്ടിയെ നിർബന്ധിച്ചു. തന്‍റെ പ്രായത്തിന്‍റെ ചെറുപ്പം കാരണം ഈ സമ്മർദങ്ങൾ താങ്ങാൻ കുട്ടിക്ക് കഴിഞ്ഞില്ല. മാത്രമല്ല, ശാരീരിക ബന്ധത്തിന് ഏർപ്പെടാൻ ഭർത്താവ് കുട്ടിയെ നിർബന്ധിക്കുകയും ചെയ്തു. ഇതെല്ലാം കുട്ടിയുടെ മരണത്തിന് കാരണമായി’.-മംഗൽവേദ പോലീസ് സ്റ്റേഷനിലെ പോലീസ് ഇൻസ്പെക്ടർ ദത്താത്രേ ബോറിഗിഡെ പറഞ്ഞു.

🔹ഗുജറാത്തിൽ ഭർത്താവിനെ കൊന്ന യുവതി ഒരു രാത്രി മുഴുവൻ മൃതദേഹത്തോടൊപ്പം ചിലവഴിച്ചു. നർമ്മദ ജില്ലയിലാണ് സംഭവം. കുടുംബ വഴക്കാണ് കൊലപാതക കാരണം. വഴക്കിനിടെ യുവാവ് ഭാര്യയുടെ മുഖത്ത് അടിച്ചു. കലിപൂണ്ട യുവതി സമീപത്തുണ്ടായിരുന്ന ഒരു കല്ലെടുത്ത് അയാളുടെ തലയിൽ അടിക്കുകയായിരുന്നു. സംഭവസ്ഥലത്ത് വച്ചുതന്നെ യുവാവ് കൊല്ലപ്പെട്ടു.
ഇതിനു ശേഷം ഇവർ രക്ഷപെടാൻ മുതിർന്നില്ല. രാത്രി മുഴുവൻ മൃതദേഹത്തിന് ഒപ്പമിരുന്ന ഇവരെ പുലർച്ചയോടെ പോലീസ് കസ്റ്റഡിയിലെടുക്കുകയായിരുന്നു. ഭാരതീയ ന്യായ സംഹിതയിലെ വകുപ്പുകൾ പ്രകാരമാണ് ഇവർക്കെതിരെ കേസെടുത്തത്. പോലീസ് അന്വേഷണം പുരോഗമിക്കുന്നു.

🔹ഹിമാചൽപ്രദേശിലെ ഉനായിൽ വീട്ടുവളപ്പിൽനിന്ന് പേരയ്ക്ക പറിച്ചെന്ന് ആരോപിച്ച് നാല് വയസുകാരിയെ വിമുക്തഭടൻ കെട്ടിയിട്ട് മർദിച്ചു. കുട്ടിയെ വീടിന്‍റെ മുൻവശത്തെ ഗോവണിയിൽ കെട്ടിയിട്ട ശേഷമാണ് ഇയാൾ ക്രൂരമായി ഉപദ്രവിച്ചത്.സംഭവം കണ്ടെത്തിയ പ്രദേശവാസിയായ രോഹിത് ജയ്സ്വാൾ, കുട്ടിയുടെ കരച്ചിൽ കേട്ട് സ്ഥലത്തെത്തി. കുട്ടി ഗോവണിയിൽ കെട്ടിയിട്ട നിലയിൽ സഹായിക്കാനായി യാചിക്കുന്നതായിരുന്നു അദ്ദേഹം കണ്ടത്. ഉടൻ തന്നെ രോഹിത് ചൈൽഡ് ലൈനിലും പോലീസിലും വിവരമറിയിക്കുകയും സംഭവത്തിന്‍റെ ദൃശ്യങ്ങൾ പകർത്തുകയും ചെയ്തു. ഇതോടെയാണ് വിമുക്തഭടൻ പെൺകുട്ടിയെ കെട്ടഴിച്ചുവിട്ടത്. തുടർന്ന് ഇയാൾ പെൺകുട്ടിയുടെ കുടുംബത്തോട് ക്ഷമാപണം നടത്തുകയുംചെയ്തു. സംഭവത്തിൽ പോലീസ് കേസെടുത്തിട്ടുണ്ട്. കൂടുതൽ അന്വേഷണം നടന്നുവരികയാണ്.

🔹മുംബൈ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിൽ വ്യാഴാഴ്ച വൈകുന്നേരം തീപിടുത്തം ഉണ്ടായി. ഇലക്ട്രിക് പവർ ഹൗസിലുണ്ടായ ഷോർട്ട് സർക്യൂട്ടാണ് തീപിടുത്തത്തിന് കാരണമായത്. ഏകദേശം മൂന്ന് മണിക്കൂർ നീണ്ട പരിശ്രമത്തിനൊടുവിലാണ് തീ പൂർണമായും അണക്കാനായത്.വിമാനത്താവളത്തിലെ ഹെവി ഡ്യൂട്ടി കേബിളുകളിൽ നിന്നും പാനലുകളിൽ നിന്നുമാണ് ഷോർട്ട് സർക്യൂട്ടുണ്ടായത്. സംഭവത്തിൽ ആർക്കും പരിക്കേറ്റതായി റിപ്പോർട്ട് ചെയ്തിട്ടില്ലെന്ന് മുംബൈ ഫയർ ബ്രിഗേഡ് ചീഫ് ഫയർ ഓഫീസർ രവീന്ദ്ര അംബുൾഗേക്കർ അറിയിച്ചു.
എമർജനസി റെസ്പോൺസ് ടീമും മുംബൈ ഫയർ ബ്രിഗേഡും ചേർന്നാണ് തീ നിയന്ത്രണവിധേയമാക്കിയത്. മൂന്ന് നിലകളുള്ള കെട്ടിടത്തിന്‍റെ താഴത്തെ നിലയിൽ മാത്രമായി തീ നിയന്ത്രിക്കാൻ സാധിച്ചതിനാൽ കൂടുതൽ നാശനഷ്ടങ്ങൾ ഉണ്ടായില്ല. വിമാനങ്ങൾ വൈകിയതായി ചില യാത്രക്കാർ സമൂഹമാധ്യമങ്ങളിലൂടെ പരാതിപ്പെട്ടുവെങ്കിലും വിമാന സർവീസുകൾ സാധാരണ നിലയിലാണെന്ന് ഉദ്യോഗസ്ഥർ പറഞ്ഞു.

🔹രാജസ്ഥാനിലെ ജൽ ജീവൻ മിഷൻ (ജെജെഎം) അഴിമതിയുമായി ബന്ധപ്പെട്ട് ഒളിവിലായിരുന്ന മുൻ ഐഎഎസ് ഉദ്യോഗസ്ഥൻ സുബോധ് അഗർവാളിനെ അഴിമതി വിരുദ്ധ ബ്യൂറോ (എസിബി) അറസ്റ്റ് ചെയ്തു.എസിബി സംഘം അഗർവാളിനെ ഡൽഹിയിൽ നിന്ന് ജയ്പൂരിലേക്ക് കൊണ്ടുവന്നു. തുടർന്ന് ഡെപ്യൂട്ടി ഇൻസ്പെക്ടർ ജനറൽ ഓഫ് പോലീസ് ഓം പ്രകാശ് മീണ എസിബി ആസ്ഥാനത്ത് വച്ച് അദേഹത്തെ ചോദ്യം ചെയ്തു. കേസിൽ അഗർവാളിനെതിരെ നേരത്തെ അറസ്റ്റ് വാറണ്ട് പുറപ്പെടുവിച്ചിരുന്നു.ഇതേ കേസിൽ, പബ്ലിക് ഹെൽത്ത് എഞ്ചിനീയറിംഗ് ഡിപ്പാർട്ട്‌മെന്‍റിലെ ഒമ്പത് ഉദ്യോഗസ്ഥരെ അറസ്റ്റ് ചെയ്തിരുന്നു.2024 ൽ ആരംഭിച്ച അന്വേഷണത്തിൽ ഇതുവരെ 11 പ്രതികളെ അറസ്റ്റ് ചെയ്തുവെന്നും മറ്റ് മൂന്ന് പേർ ഇപ്പോഴും ഒളിവിലാണെന്നും എസിബി ഡയറക്ടർ ജനറൽ ഗോവിന്ദ് ഗുപ്ത പറഞ്ഞു.ജൽജീവൻ മിഷൻ കരാറുകൾ നേടാൻ ഗണപതി ട്യൂബ്വെൽ, ശ്യാം ട്യൂബ്വെൽ എന്നിവയുൾപ്പെടെ നിരവധി സ്ഥാപനങ്ങൾ വ്യാജ സർട്ടിഫിക്കറ്റുകൾ സമർപ്പിച്ചതായി ആരോപണം ഉയർന്നിരുന്നു. ഏകദേശം 900 കോടി രൂപയുടെ ടെൻഡറുകൾ ആണ് നൽകിയത്.
ഇതേക്കുറിച്ച് അറിഞ്ഞിട്ടും ഉദ്യോഗസ്ഥർ നടപടി സ്വീകരിച്ചില്ലെന്ന് എസിബി കണ്ടെത്തി. ഇതിനുപുറമെ, 50 കോടി രൂപയിൽ കൂടുതലുള്ള പദ്ധതികൾക്ക് നിർബന്ധിത സൈറ്റ് പരിശോധനകൾ നടത്തിയിട്ടില്ലെന്നും റിപ്പോർട്ടുണ്ട്.
കേസിൽ, ഫെബ്രുവരി 17 ന് എസിബി, ജയ്പൂർ, ബാർമർ, ജലൂർ, സിക്കാർ, ബിഹാർ, ജാർഖണ്ഡ്, ഡൽഹി, രാജസ്ഥാൻ തുടങ്ങി 15 സ്ഥലങ്ങളിൽ റെയ്ഡ് നടത്തി. അന്വേഷണത്തിൽ വ്യാജ ബില്ലിംഗ്, സാമ്പത്തിക ക്രമക്കേടുകൾ, ടെൻഡർ പ്രക്രിയയിലെ ഗുരുതരമായ നടപടിക്രമ ലംഘനങ്ങൾ എന്നിവ കണ്ടെത്തി.അതേ ദിവസം തന്നെ അഗർവാളിന്‍റെ വസതിയിൽ ഒരു റെയ്ഡ് നടത്തുകയും ഒമ്പത് പിഎച്ച്ഇഡി ഉദ്യോഗസ്ഥരെ അറസ്റ്റ് ചെയ്യുകയും ചെയ്തു. ഫെബ്രുവരി 18ന് അഗർവാളിനെതിരെ ലുക്ക്-ഔട്ട് സർക്കുലർ (എൽഒസി) പുറപ്പെടുവിച്ചു.രാജസ്ഥാനിലെ മുൻ കോൺഗ്രസ് സർക്കാരിന്‍റെ കാലത്താണ് അഴിമതി നടന്നത്. വിരമിച്ച ഐഎഎസ് ഉദ്യോഗസ്ഥനായിരുന്ന അഗർവാൾ, പിഎച്ച്ഇഡിയിൽ അഡീഷണൽ ചീഫ് സെക്രട്ടറിയായി സേവനമനുഷ്ഠിക്കുകയായിരുന്നു.

🔹പോക്കറ്റ് മണി എന്ന പേരിലുള്ള ഫീച്ചറില്‍ ചില പരിഷ്‌കരണങ്ങള്‍ വരുത്തി ഗൂഗിള്‍ പേ. ഗൂഗിള്‍ പേ ഓപ്പണ്‍ ചെയ്യുമ്പോള്‍ തന്നെ പോക്കറ്റ് മണി കാണാന്‍ കഴിയുന്ന തരത്തിലാണ് ഫീച്ചര്‍ അവതരിപ്പിച്ചത്. എന്നാല്‍ ഇത് വ്യാജമാണ് എന്ന തരത്തില്‍ പ്രചാരണങ്ങള്‍ നടക്കുന്നുണ്ട്. ഇതില്‍ വീഴരുതെന്ന് വിദഗ്ധര്‍ മുന്നറിയിപ്പ് നല്‍കി. ബാങ്ക് അക്കൗണ്ട് ഇല്ലാത്ത സുഹൃത്തുക്കള്‍ക്കും കുടുംബാംഗങ്ങള്‍ക്കും യുപിഐ പണമിടപാടുകള്‍ നടത്താന്‍ സഹായിക്കുന്നതാണ് ‘പോക്കറ്റ് മണി’ ഫീച്ചര്‍. ഗൂഗിള്‍ പേ ഉപയോഗിക്കുന്ന നിലവിലെ ഉപയോക്താവ് ‘പ്രൈമറി യൂസര്‍’ ആയിരിക്കും. ഇവര്‍ക്ക് തങ്ങളുടെ കുടുംബാംഗങ്ങളെയോ സുഹൃത്തുക്കളെയോ ജീവനക്കാരെയോ ‘സെക്കന്‍ഡറി യൂസര്‍’ ആയി ചേര്‍ക്കാന്‍ സാധിക്കും. പ്രൈമറി ഉപയോക്താവിന്റെ ബാങ്ക് അക്കൗണ്ട് ഉപയോഗിച്ച് തന്നെ സെക്കന്‍ഡറി ഉപയോക്താക്കള്‍ക്ക് പണമിടപാടുകള്‍ നടത്താന്‍ ഇതിലൂടെ സാധിക്കും. കുട്ടികള്‍ക്ക് പോക്കറ്റ് മണി നല്‍കുന്നതിനും ആശ്രിതരെ സഹായിക്കുന്നതിനും ഇത് ഏറെ ഉപകാരപ്രദമാണ്. പരമാവധി 5 സെക്കന്‍ഡറി ഉപയോക്താക്കളെ വരെ ചേര്‍ക്കാന്‍ സാധിക്കും.

🔹കുവൈറ്റില്‍നിന്ന് ഇന്ത്യയിലെ ഒമ്പത് നഗരങ്ങളിലേക്കുള്ള ജസീറ എയര്‍വേയ്‌സ് സര്‍വീസുകള്‍ മെയ് 15 വരെ റദ്ദാക്കി.

🔹ഇറാനില്‍ അമേരിക്കന്‍ ആക്രമണങ്ങളിലുണ്ടായ നാശനഷ്ടങ്ങള്‍ക്ക് പരിഹാരത്തുക ഈടാക്കുമെന്നും ആക്രമിച്ചവര്‍ ശിക്ഷിക്കപ്പെടാതെ പോകില്ലെന്നും ഇറാന്‍ പരമോന്നത നേതാവ് മുജ്തബ ഖമനയി.

🔹കുവൈറ്റില്‍ വീണ്ടും ഇറാന്‍ ഡ്രോണ്‍ ആക്രമണം. കുവൈത്തിലെ അതീവ സുരക്ഷാ മേഖലയായ നാഷണല്‍ ഗാര്‍ഡ് സൈറ്റിലാണ് ഡ്രോണ്‍ ആക്രമണം നടന്നത്.

🔹യുദ്ധത്തിനെതിരെ കര്‍ശന നിലപാട് സ്വീകരിച്ച ലിയോ പതിനാലാമന്‍ മാര്‍പ്പാപ്പയെ സമ്മര്‍ദത്തിലാക്കാന്‍ അമേരിക്ക ഭീഷണിപ്പെടുത്തിയെന്ന് റിപ്പോര്‍ട്ടുകള്‍. പെന്റഗണ്‍ ഉദ്യോഗസ്ഥര്‍ വത്തിക്കാന്‍ പ്രതിനിധിയെ വിളിച്ച് ഭീഷണിപ്പെടുത്തിയതിനാല്‍ മാര്‍പ്പാപ്പയുടെ യുഎസ് സന്ദര്‍ശനം റദ്ദാക്കിയേക്കുമെന്നാണു വാര്‍ത്ത.

🔹അമേരിക്ക – ഇറാന്‍ സമാധാന ചര്‍ച്ച നാളെ പാക്കിസ്ഥാനിലെ ഇസ്ലമാബാദില്‍ നടക്കാനിരിക്കേ, ഏതു നിമിഷവും യുദ്ധമെന്ന ഭീഷണി ആവര്‍ത്തിച്ച് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഹോര്‍മുസ് കടലിടുക്കില്‍ നിയന്ത്രണങ്ങള്‍ ഏര്‍പ്പെടുത്തിയ ഇറാന്‍, കുവൈറ്റ് അടക്കമുള്ള രാജ്യങ്ങളിലേക്കു മിസൈല്‍, ഡ്രോണ്‍ ആക്രമണങ്ങള്‍ തുടര്‍ന്നു. ഇസ്രയേല്‍ ലബനനില്‍ ആക്രമണം നടത്തി. അമേരിക്ക സൈന്യത്തോടു മേഖലയില്‍ത്തന്നെ തുടരാന്‍ ആവശ്യപ്പെട്ടിരിക്കുകയാണ്.

🔹ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്‌സിനെതിരെ ലക്‌നൗ സൂപ്പര്‍ ജയന്റ്‌സിന് മൂന്ന് വിക്കറ്റിന്റെ വിജയം. കൊല്‍ക്കത്ത, ഈഡന്‍ ഗാര്‍ഡന്‍സില്‍ നടന്ന മത്സരത്തില്‍ 182 റണ്‍സ് വിജയലക്ഷ്യം അവസാന പന്തിലാണ് ലക്‌നൗ മറികടന്നത്. മുന്‍നിര തകര്‍ന്നപ്പോള്‍ 27 പന്തില്‍ 54 റണ്‍സുമായി പുറത്താവാതെ നിന്ന മുകുള്‍ ചൗധരിയാണ് ലക്‌നൗവിന്റെ വിജയശില്‍പി. ടോസ് നഷ്ടപ്പെട്ട് ബാറ്റിംഗിനെത്തിയ ആതിഥേയര്‍ക്കുവേണ്ടി 45 റണ്‍സെടുത്ത ആംകൃഷ് രഘുവന്‍ഷി ടോപ് സ്‌കോററായി.

🔹ജിയോ സ്റ്റുഡിയോസ് ബി62 സ്റ്റുഡിയോസ് എന്നിവര്‍ ചേര്‍ന്ന് നിര്‍മ്മിച്ച, ആദിത്യ ധര്‍- രണ്‍വീര്‍ സിങ് ചിത്രം ‘ധുരന്ധര്‍ പ്രതികാരം’ മൂന്നാം വീക്കെന്‍ഡ് അവസാനിക്കുമ്പോള്‍ ഇന്ത്യയില്‍ നിന്ന് മാത്രം 1000 കോടി നെറ്റ് ഗ്രോസ് നേടുന്ന ആദ്യ ചിത്രമായി. 1622 കോടിയാണ് ചിത്രം ഇതിനോടകം സ്വന്തമാക്കിയ ആഗോള ഗ്രോസ് കലക്ഷന്‍. വടക്കേ അമേരിക്കയില്‍ 25 മില്യണ്‍ ഡോളര്‍, ജര്‍മ്മനിയില്‍ 1 മില്യണ്‍ യൂറോ എന്നിവ മറികടന്ന ആദ്യ ഇന്ത്യന്‍ സിനിമ എന്ന ബഹുമതിയും ധുരന്ധര്‍ പ്രതികാരം സ്വന്തമാക്കി. ആഗോളതലത്തില്‍ ഏറ്റവും വേഗത്തില്‍ 1000 കോടി നേടിയ ഇന്ത്യന്‍ ചിത്രം, ഇന്ത്യയില്‍ നിന്ന് ഏറ്റവും വേഗതയേറിയ 100 കോടി, 200 കോടി, 300 കോടി, 400 കോടി, 500 കോടി, 600 കോടി, 700 കോടി, 800 കോടി, 900 കോടി, 1000 കോടി നേടിയ ചിത്രം, വിദേശ വിപണികളിലെ ഏറ്റവും വലിയ കളക്ഷന്‍ നേടിയ ഇന്ത്യന്‍ ചിത്രം (ആദ്യ ആഴ്ചയ്ക്കുള്ളില്‍), വെറും 10 ദിവസത്തിനുള്ളില്‍ ധുരന്ധര്‍ പാര്‍ട്ട് 1 വിദേശ കളക്ഷന്‍ മറികടന്നു എന്നിങ്ങനെയാണ് ‘ധുരന്ധര്‍ പ്രതികാരം’ സ്ഥാപിച്ച റെക്കോര്‍ഡുകള്‍.

🔹ഇന്ത്യന്‍ സിനിമയില്‍ ബോക്‌സ് ഓഫീസില്‍ തരംഗം തീര്‍ത്ത ‘കെജിഎഫ്’, ‘കെജിഎഫ് 2’, ‘കാന്താര ചാപ്റ്റര്‍ 2’, ‘കാന്താര ചാപ്റ്റര്‍ 1′,’സലാര്‍’ തുടങ്ങിയ ചിത്രങ്ങള്‍ സമ്മാനിച്ച നിര്‍മാണ കമ്പനിയായ ഹോംബാലെ ഫിലിംസ് ‘കാട്ടാളന്‍’ കര്‍ണാടക വിതരണാവകാശം സ്വന്തമാക്കി. റെക്കോര്‍ഡ് തുകയ്ക്കാണ് വിതരണാവകാശം ഏറ്റെടുത്തിരിക്കുന്നത്. മലയാള സിനിമയ്ക്ക് വലിയൊരു ആഗോള വിപണി ലക്ഷ്യം വെച്ചുകൊണ്ടാണ് ‘കാട്ടാളന്‍’ ഒരുങ്ങുന്നത്. ആന്റണി വര്‍ഗീസ് പെപ്പെ, ദുഷാര വിജയന്‍, സുനില്‍, കബീര്‍ സിംഗ് എന്നിവരെ കേന്ദ്ര കഥാപാത്രങ്ങളാക്കി ഷരീഫ് മുഹമ്മദ് നിര്‍മ്മിച്ച് പോള്‍ ജോര്‍ജ്ജ് സംവിധാനം ചെയ്യുന്ന ‘കാട്ടാളന്‍’ സിനിമയുടെ വേള്‍ഡ് വൈഡ് റിലീസ് മെയ് മാസമാണ്. ക്യൂബ്‌സ് എന്റര്‍ടൈന്‍മെന്റ്‌സും ഹോംബാലെ ഫിലിംസും കൈകോര്‍ക്കുന്നതിലൂടെ ചിത്രത്തിന് വമ്പന്‍ റിലീസായിരിക്കും കര്‍ണാടകയില്‍ ലഭിക്കാന്‍ പോകുന്നത്. ഫിലിം ഡിസ്ട്രിബ്യൂഷന്‍ രംഗത്തെ അതികായരായ ഫാര്‍സ് ഫിലിംസാണ് ‘കാട്ടാളന്‍’ സിനിമയുടെ ഓവര്‍സീസ് ഡിസ്ട്രിബ്യൂഷന്‍ വിതരണാവകാശം സ്വന്തമാക്കിയിരിക്കുന്നത്.

💦 ഗുരുജിയുടെ വാക്കുകൾ

നമ്മുടെ മനസ്സ് എന്തു ചിന്തിക്കുന്നു എന്നതിന് അനുസരിച്ചാണ് നമ്മുടെ ഓരോരുത്തരുടേയും ജീവിതം മുന്നോട്ടു പോകുന്നത്. ജീവിതത്തില്‍ എത്ര പരാജയങ്ങള്‍ സംഭവിച്ചാലും അതിനെ പുഞ്ചിരിയോടെ തരണം ചെയ്ത് മുന്നോട്ടു പോകുന്നവരെ കാണാം. ആത്മവിശ്വാസവും വിജയിക്കുമെന്ന ഉറച്ച ചിന്തയുമാണ് അവരെ മുന്നോട്ടു നയിക്കുന്നത്. ഇത്തരത്തില്‍ മനസ്സില്‍ പോസിറ്റീവ് ചിന്ത വളര്‍ത്തിയെടുക്കാന്‍ മനപൂര്‍വമായ ഒരു ശ്രമം തന്നെ വേണം. ഞാന്‍ ഇത് നേടും എന്ന് ഇടക്കിടെ മനസ്സിനോടു പറയുക. ചിന്തകള്‍ ചിന്താതരംഗങ്ങളാണ്. ഒരു പ്രത്യേകചിന്ത മനസ്സില്‍ രൂപപ്പെടുത്തുകയും അതിനെ കുറിച്ച് മാത്രം ചിന്തിക്കുകയും ചെയ്യുമ്പോള്‍ മനസ്സ് പതിയെ അത് സ്വീകരിക്കും.

തയ്യാറാക്കിയത്: കപിൽ ശങ്കർ

10 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 10 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ഫൊക്കാന കൺവൻഷനിൽ വമ്പൻ റാഫിൾ; ടെസ്ല കാർ ഉൾപ്പെടെ ആകർഷക സമ്മാനങ്ങൾ

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 07 | ചൊവ്വ ✍️ കപിൽ ശങ്കർ

യു.എസിലെ 20 സംസ്ഥാനങ്ങളിൽ ആൽഡി (ALDI) ജനപ്രിയ ഉൽപ്പന്നം തിരിച്ചുവിളിക്കുന്നു

1 COMMENT

LEAVE A REPLY Cancel reply

Most Popular

കെ .എസ് . ആർ.ടി.സിയുടെ ആദ്യത്തെ ഫ്രണ്ട്ലി പദവി സപര്യയ്ക്ക് പ്രഖ്യാപിച്ച് മന്ത്രി സിപി ജോൺ

ഫൊക്കാന കൺവൻഷനിൽ വമ്പൻ റാഫിൾ; ടെസ്ല കാർ ഉൾപ്പെടെ ആകർഷക സമ്മാനങ്ങൾ

അതിതീവ്ര മഴ: വയനാട്ടിലെ വിദ്യാഭ്യാസ സ്ഥാപനങ്ങൾക്ക് നാളെ (ജൂലൈ 8, ബുധനാഴ്ച) അവധി പ്രഖ്യാപിച്ചു

Recent Comments

EDITOR PICKS

കെ .എസ് . ആർ.ടി.സിയുടെ ആദ്യത്തെ ഫ്രണ്ട്ലി പദവി സപര്യയ്ക്ക് പ്രഖ്യാപിച്ച് മന്ത്രി സിപി ജോൺ

ഫൊക്കാന കൺവൻഷനിൽ വമ്പൻ റാഫിൾ; ടെസ്ല കാർ ഉൾപ്പെടെ ആകർഷക സമ്മാനങ്ങൾ

അതിതീവ്ര മഴ: വയനാട്ടിലെ വിദ്യാഭ്യാസ സ്ഥാപനങ്ങൾക്ക് നാളെ (ജൂലൈ 8, ബുധനാഴ്ച) അവധി പ്രഖ്യാപിച്ചു

POPULAR POSTS

മുംബൈയിൽ കനത്ത മഴ തുടരുന്നു; മരം കടപുഴകി വീണ് വയോധികൻ മരിച്ചു, ഒട്ടേറെ ജില്ലകളിൽ റെഡ് അലർട്ട്.

POPULAR CATEGORY

ABOUT US

FOLLOW US