പൊതുവേദികളിൽ സ്വന്തം പ്രതാപവും കരുത്തും പ്രദർശിപ്പിച്ച് കയ്യടി നേടുന്നവരിലാണ് ലോകം പലപ്പോഴും ‘ശക്തി’ ദർശിക്കുന്നത്. എന്നാൽ യഥാർത്ഥ കരുത്തിന്റെ അളവുകോൽ ആൾക്കൂട്ടത്തിന്റെ ആർപ്പുവിളികളല്ല. അനേകം മനുഷ്യരാൽ തിരസ്കരിക്കപ്പെടുമ്പോഴും, തള്ളപ്പറയപ്പെടുമ്പോഴും തളരാതെ, നിശ്ശബ്ദമായി വീണ്ടും എഴുന്നേറ്റ് മുന്നോട്ട് നടക്കാൻ മടിക്കാത്തവരിലാണ് യഥാർത്ഥ ആന്തരികശക്തി കുടികൊള്ളുന്നത്.
തിരസ്കാരം ഏതൊരു മനുഷ്യന്റെയും ആത്മവീര്യത്തെ ഉലയ്ക്കുന്ന ഒന്നാണ്. ആൾക്കൂട്ടത്തിന്റെ അവഗണനയ്ക്കും നിന്ദയ്ക്കും മുന്നിൽ തളർന്നു വീഴുക എന്നത് വളരെ എളുപ്പമാണ്. എന്നാൽ, വീണുപോയ ഇടത്തുനിന്നും വീണ്ടും കരുത്തോടെ എഴുന്നേറ്റു നിൽക്കുന്നിടത്താണ് ഒരാളുടെ വ്യക്തിത്വത്തിന്റെ യഥാർത്ഥ ഔന്നത്യം വെളിപ്പെടുന്നത്.
ലോകത്തിന്റെ താൽക്കാലിക കയ്യടികളല്ല, സ്വന്തം ലക്ഷ്യത്തെക്കുറിച്ചുള്ള വ്യക്തതയും ആത്മവിശ്വാസവുമാണ് ഒരാളുടെ സഞ്ചാരപഥം നിർണ്ണയിക്കേണ്ടത്.
ചരിത്രം തിരുത്തിയെഴുതിയ മഹാന്മാരിൽ ഭൂരിഭാഗവും ഒരു ഘട്ടത്തിൽ സമൂഹത്താൽ തിരസ്കരിക്കപ്പെട്ടവരായിരുന്നു. അന്ന് ആ നിരസിക്കലുകളിൽ പതറി അവർ യാത്ര അവസാനിപ്പിച്ചിരുന്നെങ്കിൽ ഇന്നത്തെ ലോകം മറ്റ ഒന്നാകുമായിരുന്നു.
ആൾക്കൂട്ടത്തിന്റെ ബഹളങ്ങൾക്കും തിരസ്കാരങ്ങൾക്കും അപ്പുറം സ്വന്തം സ്വപ്നങ്ങളെ മുറുകെപ്പിടിച്ച് മുന്നേറിയവർ മാത്രമാണ് കാലത്തിന് മായ്ക്കാൻ കഴിയാത്ത ഒപ്പ് ചാർത്തിയത്.
തിരസ്കാരങ്ങളും തിരിച്ചടികളും പരാജയത്തിന്റെ സന്ദേശങ്ങളല്ല; മറിച്ച്, നമ്മുടെ നിശ്ചയദാർഢ്യത്തിന്റെ മൂർച്ച കൂട്ടാനുള്ള നിശ്ശബ്ദ അവസരങ്ങളാണ്.
ഇന്ന് തള്ളിപ്പറഞ്ഞവർ തന്നെ നാളെ നിങ്ങളുടെ സഹിഷ്ണുതയ്ക്ക് മുന്നിൽ തലകുനിക്കും. ആൾക്കൂട്ടം പുറംതിരിഞ്ഞു നിൽക്കുമ്പോഴും പതറാതെ ചുവടുകൾ മുന്നോട്ടുവെക്കുക; കാരണം, തിരസ്കാരങ്ങൾക്ക് വഴങ്ങാത്ത ആ നിശ്ശബ്ദ പ്രയാണത്തിലാണ് നിങ്ങളുടെ യഥാർത്ഥ വിജയം ഒളിച്ചിരിക്കുന്നത്.
സ്നേഹാദരങ്ങളോടെ..
സിജു ജേക്കബ്, ഓസ്ട്രേലിയ
(എഴുത്തുകാരൻ/സഞ്ചാരി)
