ചാണകം മെഴുകിയ മുറ്റത്ത്
പൂക്കളമൊരുക്കാനായി
തെച്ചിയും, മുക്കുറ്റിയും,
ചെമ്പരത്തിയും
നന്ത്യാർവട്ടവും പറിക്കാൻ
ആർജ്ജവത്തോടെ,
ആരവത്തോടെ പറമ്പിലും പാടത്തും
നടന്ന
ഓണക്കാലം പരീക്ഷകൾക്കിടയിലും
പൂക്കളം തീർത്തും
ഓലമടൽ കൊണ്ട് ഊഞ്ഞാൽ
കെട്ടിയാടിയും
തിരുവോണത്തിന്
കോറ തുണിയുടെ മണമുള്ള ഓണ
കോടിയുമായി
തറവാട്ടിലെ ഇടനാഴിയിൽ
പായ വിരിച്ച്, ഒന്നിച്ചിരുന്ന് സദ്യയുണ്ട
ഓണക്കാലം….
അച്ഛനും വലിയച്ഛനും അമ്മാവനും ശീട്ട്
കളിയിലും
അമ്മയും വലിയമ്മയും അമ്മായിയും
അടുക്കളയിലും
കുട്ടികൾ തലപ്പന്ത് കളിയിലും
മുഴുകിയ-
ഓണക്കാലം….
മോടിയുള്ള ഓണക്കോടി ധരിച്ച്
ഓണസദ്യ വാങ്ങുവനായി
വരിയിൽ നിൽക്കുമ്പോൾ
ഓർമ്മയിൽ തെളിയുന്ന പഴയ
ഓണക്കാലം…
