📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 24 | വെള്ളി ✍ കപിൽ ശങ്കർ

🔹ഏപ്രിൽ 24 ഇന്ത്യയിൽ ദേശീയ പഞ്ചായത്തിരാജ് ദിനമായി ആചരിക്കുന്നു. 1993-ൽ ഭരണഘടനാ ഭേദഗതിയിലൂടെ പഞ്ചായത്തിരാജ് സംവിധാനം നിലവിൽ വന്നതിൻ്റെ ഓർമ്മയ്ക്കായാണ് ഈ ദിനം ആഘോഷിക്കുന്നത്. കൂടാതെ, സമാധാനത്തിനായുള്ള ബഹുമുഖത്വത്തിൻ്റെയും നയതന്ത്രത്തിൻ്റെയും അന്താരാഷ്ട്ര ദിനമായും ഇത് ആചരിക്കുന്നു.
•അന്താരാഷ്ട്ര ബഹുമുഖത്വ-നയതന്ത്ര ദിനം (International Day of Multilateralism and Diplomacy for Peace): ഐക്യരാഷ്ട്രസഭയുടെ ആഭിമുഖ്യത്തിൽ സമാധാനത്തിനും സുരക്ഷയ്ക്കുമായി ഈ ദിനം ആചരിക്കുന്നു.
•സ്ത്രീകളുടെ രാഷ്ട്രീയ ശാക്തീകരണ ദിനം (Women’s Political Empowerment Day): രാഷ്ട്രീയത്തിൽ സ്ത്രീ പ്രാതിനിധ്യം ഉറപ്പാക്കുന്നതിനായി ഈ ദിനം അടയാളപ്പെടു
ത്തുന്നു.

🔹കനത്ത ചൂട് തുടരുന്ന സാഹചര്യത്തിൽ കൊല്ലം ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ച് ജില്ലാ കളക്ടർ. അന്തരീക്ഷ താപനില 40 ഡിഗ്രി വരെ ഉയരാന്‍ സാധ്യതയുള്ളതിനാല്‍ ജില്ലയിലെ പ്രൊഫഷണല്‍ കോളേജുകള്‍ അടക്കമുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും ജില്ലാ കലക്ടര്‍ ഇന്ന് (24.04.2026 വെള്ളിയാഴ്ച) അവധി പ്രഖ്യാപിച്ചു.

🔹കനത്ത വേനൽ ചൂട് കണക്കിലെടുത്ത് കുട്ടികളെ അംഗനവാടികളിൽ നിർബന്ധിച്ച് ഇരുത്തരുതെന്ന് സംസ്ഥാന ബാലാവകാശ കമ്മീഷൻ ഉത്തരവിട്ടു. ഹാജരാകാത്ത കുട്ടികൾക്ക് പോഷകാഹാരം വീട്ടിലെത്തിക്കണമെന്നും വായുസഞ്ചാരമില്ലാത്തതും ഷീറ്റ് മേഞ്ഞതുമായ അംഗനവാടികൾ പ്രവർത്തിക്കരുതെന്നും ഉത്തരവിൽ വ്യക്തമാക്കുന്നു.

🔹ശബരിമല സന്നിധാനത്തിനു മുകളിലൂടെ ഹെലികോപ്ടർ താഴ്ന്നു പറന്ന സംഭവത്തിൽ അന്വേഷണം. വ്യാഴാഴ്ച രാവിലെ 11 മണിയോടെയാണ് സംഭവം. കോസ്റ്റ് ഗാർഡിന്‍റെ ചേതക് ഹെലികോപ്ടറാണ് അതീവ സുരക്ഷാ മേഖലയിലൂടെ പറന്നത്. സംഭവത്തില്‍ അന്വേഷണം നടത്തി റിപ്പോർട്ട് നൽകാൻ സ്പെഷൽ കമ്മീഷണർ എഡിജിപി എസ്. ശ്രീജിത്തിന് നിർദേശം നൽകി.ഹെലികോപ്ടർ എത്തിയതിനെ പറ്റി പമ്പ പോലീസിന് അറിവുണ്ടായിരുന്നില്ല. അതേസമയം, ഹെലികോപ്ടർ താഴ്ന്ന് പറന്നത് സാങ്കേതിക പ്രശ്‌നം കാരണമാണെന്ന് കോസ്‌റ്റ് ഗാർഡ് വൃത്തങ്ങൾ വിശദീകരിച്ചു. അന്തരീക്ഷം മേഘാവൃതമായപ്പോൾ കാഴ്ച മറഞ്ഞെന്നും അതിനാലാണ് താഴ്ന്ന് പറന്നതെന്നും കോസ്‌റ്റ് ഗാർഡ് വിശദീകരിച്ചു.

🔹ശബരിമല കേസിൽ സംസ്ഥാന സർക്കാരിന്റെ നിലപാടിനെ ചോദ്യം ചെയ്ത് പന്തളം കൊട്ടാര അംഗം രാജ രാജ വർമ്മ. യുവതിപ്രവേശനത്തിൽ പണ്ഡിതരുടെ നിലപാട് എന്തിന് സർക്കാർ തേടണമെന്ന് രാജരാജ വർമ്മയ്ക്കായി ഹാജരായ മുതിർന്ന അഭിഭാഷകൻ കെ രാധാകൃഷ്ണൻ വാദിച്ചു. നേരത്തെ ഹൈക്കോടതിയിൽ മകരജ്യോതി കേസിൽ അന്വേഷണം വേണ്ടെന്ന് സർക്കാർ നിലപാട് എടുത്തു.

🔹മുണ്ടത്തിക്കോട് അപകടത്തിൽ മരിച്ചവരുടെ ഡിഎൻഎ പരിശോധന ഫലം മറ്റന്നാൾ മുതൽ ലഭിച്ചു തുടങ്ങുമെന്ന് തൃശൂർ ജില്ലാ കളക്ടർ അറിയിച്ചു. 29 ശരീരഭാഗങ്ങളുടെ ഡിഎൻഎ സാമ്പിളുകൾ അയച്ചിട്ടുണ്ട്. ഇന്ന് ലഭിച്ച തലയിൽ നിന്നും ഡിഎൻഎ സാമ്പിളുകൾ ശേഖരിക്കും. ആരെന്നത് ഔദ്യോഗികമായി ഡിഎൻഎ ഫലത്തിനുശേഷം സ്ഥിരീകരിക്കുമെന്നും കളക്ടർ പറഞ്ഞു. മൊബൈൽ ഡിഎൻഎ യൂണിറ്റ് സന്ദർശിച്ചതിന് ശേഷം മാധ്യമങ്ങളോട് സംസാരിക്കുകയായിരുന്നു കളക്ടർ.

🔹തൃശൂര്‍ പൂരത്തോടനുബന്ധിച്ച് പൂരനഗരിയിൽ കുടിവെള്ളവും ഭക്ഷണവും വിതരണം ചെയ്യുന്നവർക്ക് ഭക്ഷ്യസുരക്ഷാ രജിസ്‌ട്രേഷൻ നിർബന്ധമാക്കി. സന്നദ്ധ സംഘടനകൾക്കും ഇത് ബാധകമാണ്. ശുദ്ധമായ ഭക്ഷണവും വെള്ളവും ഉറപ്പാക്കാനും, ശുചിത്വമുള്ള കേന്ദ്രങ്ങളിൽ നിന്ന് മാത്രം ഭക്ഷണം കഴിക്കാനും ഭക്ഷ്യസുരക്ഷാ വകുപ്പ് പൊതുജനങ്ങൾക്ക് നിർദ്ദേശം നൽകി.

🔹അത്യാധുനിക സൗകര്യങ്ങളുമായി കെഎസ്ആർടിസിയുടെ ‘ബിസിനസ് ക്ലാസ്’ ബസിന് ആവേശ സ്വീകരണം. ഒരു മാസം മുൻപ് എറണാകുളത്ത് വച്ച് ഉദ്ഘാടനം നിർവഹിച്ച പുതിയ ബിസിനസ് ക്ലാസ് ബസ്‌ ഓടിക്കുന്നതിന്‍റെ ദൃശ്യങ്ങൾ മന്ത്രി കെ ബി ഗണേഷ് കുമാര്‍ പുറത്ത് വിട്ടിട്ടുണ്ട്. ശുചിമുറി, കഫെറ്റീരിയ, പാൻട്രി തുടങ്ങിയ സൗകര്യങ്ങളുള്ള ആഡംബര ബസുകളാണ് നിരത്തിലിറങ്ങുന്നത്. ഏകദേശം രണ്ട് കോടി രൂപ വിലമതിക്കുന്ന രണ്ട് ബസുകളാണ് ആദ്യഘട്ടത്തിൽ സർവീസ് നടത്തുക.

🔹എറണാകുളം കാലടിയില്‍ കോളജ് വിദ്യാര്‍ഥിനി പെരിയാറിൽ ചാടി ജീവനൊടുക്കിയ സംഭവത്തില്‍ ആൺസുഹൃത്തിന്‍റെ പങ്ക് അന്വേഷിക്കണമെന്ന് ആവശ്യപ്പെട്ട് കുടുംബം. കുട്ടിയുടെ മൊബൈല്‍ ഫോണ്‍ കണ്ടെത്തണമെന്നും കുടുംബം ആവശ്യപ്പെട്ടു. പെൺകുട്ടി ജീവനൊടുക്കിയതാണെന്നാണ് പോലീസ് നിഗമനം. കഴിഞ്ഞ തിങ്കളാഴ്ച രാവിലെയാണ് ഇളമ്പകപ്പിള്ളി സ്വദേശിനി അഞ്ജന ബിജു (22) കാലടി റെയിൽവെ പാലത്തിൽ നിന്നും പെരിയാറിലേക്ക് ചാടി മരിച്ചത്. കോലഞ്ചേരി സെന്‍റ് പീറ്റേഴ്സ് കോളജിൽ ബിഎ ഹിസ്റ്ററി വിഭാഗം വിദ്യാർഥിനിയാണ് അഞ്ജന. മകള്‍ പുഴയിലേക്ക് ചാടുന്ന സമയത്ത് ആണ്‍സുഹൃത്ത് ഒപ്പമുണ്ടായിരുന്നോ എന്ന സംശയം കുടുംബത്തിനുണ്ട്. മരണത്തിന് മുമ്പ് ആണ്‍സുഹൃത്തുമായി ഇനി ഒത്തു പോകാന്‍ കഴിയില്ലെന്ന് അഞ്ജന പറഞ്ഞതായാണ് കൂട്ടുകാരികൾ പറയുന്നത്. പെൺകുട്ടി പുഴയില്‍ വീണ സമയത്ത് പാലത്തില്‍ നിന്ന് ആരോ ഒരാള്‍ ഓടിരക്ഷപ്പെട്ടെന്ന് നാട്ടുകാരും വിവരം നൽകിയിരുന്നു. ഈ സാഹചര്യത്തിലാണ് കുടുംബം പരാതി നൽകിയത്.

🔹കാട്ടാക്കടയിൽ വാക്കുതർക്കത്തെ തുടർന്ന് യുവാവ് കുത്തേറ്റ് മരിച്ചു. കാട്ടാക്കട എള്ളുവിള സ്വദേശി രാഹുൽ (24) ആണ് മരിച്ചത്.വ്യാഴാഴ്ച രാത്രി 11 മണിയോടെ കാട്ടാക്കട കിള്ളി രാജശ്രീ ഓഡിറ്റോറിയത്തിന് സമീപത്താണ് സംഭവം. രാഹുലും മറ്റൊരാളും തമ്മിലുള്ള തർക്കമാണ് കൊലപാതകത്തിൽ കലാശിച്ചത്. താക്കോൽ കൊണ്ട് ഒരാൾ രാഹുലിന്‍റെ വാരിയെല്ലിന് സമീപത്തായി കുത്തുകയായിരുന്നു.
തുടർന്ന് കാട്ടാക്കട മമൽ ആശുപത്രിയിലും തുടർന്ന് മെഡിക്കൽ കോളജിലും എത്തിച്ചെങ്കിലും ജീവൻ രക്ഷിക്കാനായില്ല. കുത്തിയ ആളെ കണ്ടെത്താൻ സാധിച്ചില്ല. കാട്ടാക്കട പോലീസ് പ്രതിക്കായി അന്വേഷണം തുടരുകയാണ്.

🔹മുഖ്യമന്ത്രി പിണറായി വിജയന്റെ മകൾ വീണ വിജയൻ ഉൾപ്പെട്ട മാസപ്പടി കേസ് പരിഗണിക്കുന്നത് ദില്ലി ഹൈക്കോടതി വീണ്ടും മാറ്റി. സമയക്കുറവ് മൂലം വാദം കേൾക്കാൻ സാധിക്കാത്തതിനെത്തുടർന്ന് ഹർജികൾ ജൂലൈ ഏഴിലേക്ക് മാറ്റുകയായിരുന്നു. വീണയുടെ എക്സാലോജിക് കമ്പനിയും സിഎംആർഎല്ലും തമ്മിൽ സേവനങ്ങൾ നൽകാതെ പണം കൈപ്പറ്റിയെന്ന ആരോപണത്തിലാണ് അന്വേഷണം നടക്കുന്നത്.

🔹 കളിക്കുന്നതിനിടെ അബദ്ധത്തിൽ കലത്തിനുള്ളിൽ കുടുങ്ങിയ കുട്ടിയെ അഗ്നിരക്ഷാസേന രക്ഷപ്പെടുത്തി.ഊർങ്ങാട്ടിരി മൂർക്കനാട് അന്പായത്തിങ്ങൽ സാദിഖിന്‍റെ നാലുവയസുകാരനായ മകനാണ് കലത്തിനുള്ളിൽ അകപ്പെട്ടത്. വീടിനുള്ളിൽ കളിച്ചുകൊണ്ടിരിക്കെ കലത്തിൽ കയറാനുള്ള ശ്രമത്തിലാണ് കുട്ടി കുടുങ്ങിയത്. കുട്ടിയുടെ കരച്ചിൽ കേട്ട് പിതാവ് സാദിഖ് പരിശോധിച്ചപ്പോഴാണ് സംഭവം അറിഞ്ഞത്.വീട്ടുകാരും സമീപവാസികളും കുട്ടിയെ പുറത്തെടുക്കാൻ ശ്രമിച്ചെങ്കിലും സാധിക്കാതെ വന്നതോടെ തിരുവാലി ഫയർഫോഴ്സിനെ വിവരമറിയിക്കുകയായിരുന്നു. തുടർന്ന് സ്ഥലത്തെത്തിയ ഫയർഫോഴ്സ് സംഘം കുട്ടിയെ പരിക്കേൽക്കാതെ അതീവ ജാഗ്രതയോടെ അലൂമിനിയംകലം മുറിച്ചുമാറ്റി പുറത്തെടുത്തു. രക്ഷാപ്രവർത്തനം വിജയകരമായി പൂർത്തിയാക്കിയതോടെ വലിയൊരു ആശ്വാസത്തിലായി കുടുംബവും നാട്ടുകാരും.

🔹ട്രെയിന്‍ കടന്നുപോകുന്നതിനിടെ കാറ്റടിച്ചുവീണു പരിക്കേറ്റ ബാലിക മരിച്ചു. ചെങ്കള നാലാംമൈല്‍ തൈവളപ്പിലെ താഹിര്‍ നജാത്ത്-ആസിയ ദമ്പതികളുടെ മകള്‍ മറിയം നവാല്‍ (അഞ്ച്) ആണ് മരിച്ചത്. ഇന്നലെ ഉച്ചയോടെ കാസര്‍ഗോട്ടെ സ്വകാര്യ ആശുപത്രിയിലായിരുന്നു മരണം.ഏപ്രില്‍ 18നു വൈകുന്നേരം ആറോടെ മൊഗ്രാല്‍ നാങ്കിയിലായിരുന്നു അപകടം. വല്ല്യമ്മ കാസര്‍ഗോഡ് അടുക്കത്ത്ബയല്‍ സ്വദേശി നഫീസയ്ക്കൊപ്പം ഒരു മരണവീട്ടില്‍ പോയി റെയില്‍വേ ട്രാക്കിനു സമീപത്തുകൂടി മടങ്ങിവരുമ്പോഴാണ് അപകടമുണ്ടായത്. നഫീസ ഐസിയുവില്‍ ചികിത്സയിലാണ്. ഇരുവരുടെയും തലയ്ക്കാണ് പരിക്കേറ്റത്.

🔹ചൂട് കൂടുന്ന സാഹചര്യത്തിൽ പാമ്പുകടിയ്ക്കെതിരെ ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി വീണാ ജോര്‍ജ്. വീടും പരിസരവും വൃത്തിയായി സൂക്ഷിക്കുന്നതിലൂടെ പാമ്പുകൾ വരുന്നത് തടയാം. പാമ്പുകടിയേറ്റാൽ ഭയപ്പെടാതെ ശരിയായ പ്രഥമ ശുശ്രൂഷ നൽകി ഉടൻ ആശുപത്രിയിൽ എത്തിക്കേണ്ടതിൻ്റെ പ്രാധാന്യത്തെക്കുറിച്ചും ചികിത്സാ ലഭ്യതയെക്കുറിച്ചും ലേഖനം വിശദീകരിക്കുന്നു.

🔹പാലക്കാട് ഊഞ്ഞാൽ ആടുന്നതിനിടെ ബനിയൻ കഴുത്തിൽ കുടുങ്ങി പത്ത് വയസുകാരന് ദാരുണാന്ത്യം. പാലക്കാട് നല്ലേപ്പിള്ളി കറുപ്പുസ്വാമി- പ്രിയ ദമ്പതികളുടെ മകൻ അഭിനവ് ആണ് മരിച്ചത്. ഇന്ന് രാവിലെ 11 മണിക്കാണ് അപകടം ഉണ്ടായത്.

🔹ചിറയിൻകീഴിൽ പാമ്പുകടിയേറ്റ് എട്ട് വയസുകാരൻ മരിച്ച സംഭവത്തിൽ ഡി എം ഒ റിപ്പോർട്ട് തേടി. ഉടൻ റിപ്പോർട്ട് നൽകണമെന്ന് സൂപ്രണ്ടിനോട് നിർദേശിച്ചു. സംഭവത്തിൽ കുട്ടിയെ ആശുപത്രിയിൽ എത്തിച്ചപ്പോൾ വേണ്ട പരിഗണന ലഭിച്ചില്ലെന്ന് അച്ഛന്റെ പരാതിയിലാണ് ഡി എം ഒ റിപ്പോർട്ട് തേടിയത്.

🔹കോഴിക്കോട് കുറ്റിക്കാട്ടൂരിൽ കുടുംബനാഥൻ ആത്മഹത്യ ചെയ്തത് ബ്ലേഡ് പലിശ സംഘത്തിന്‍റെ ഭീഷണിയെ തുടർന്നെന്ന് ശബ്ദസന്ദേശം.മരിക്കുന്നതിന് തൊട്ടുമുന്പ് കുറ്റിക്കാട്ടൂർ സ്വദേശിയായ കൃഷ്ണൻ മകനയച്ച ശബ്ദ സന്ദേശമാണ് പുറത്തുവന്നത്. അയൽവാസിയിൽനിന്ന് വാങ്ങിയ 15,000 രൂപ തിരിച്ചടച്ചിട്ടും ഭീഷണി തുടരുന്നതിനാൽ ആത്മഹത്യ ചെയ്യുന്നുവെന്നാണ് ശബ്ദസന്ദേശത്തിലുള്ളത്. ഏപ്രില്‍ ആറിനാണ് കുറ്റിക്കാട്ടൂർ സ്വദേശിയും പട്ടികജാതി വിഭാഗക്കാരനുമായ കൃഷ്ണൻ ജോലി സ്ഥലത്ത് തൂങ്ങിമരിച്ചത്. പ്രദേശവാസിയിനിന്ന് ഒരു വർഷം ന്പ് 15,000 രൂപ കൃഷ്ണൻ കടമായി വാങ്ങിയിരുന്നു. ഈ പണം തിരികെ നൽകിയിട്ടും പലിശയും കൂട്ടുപലിശയും ചേർത്ത് വൻ തുക ആവശ്യപ്പെട്ട് ഭീഷണിപ്പെടുത്തിയെന്നാണ് മരിക്കുന്നതിന് തൊട്ടുമുന്പ് മകനയച്ച കൃഷ്ണന്‍റെ ശബ്ദ സന്ദേശം. ക്രൈംബ്രാഞ്ച് സംഘമെന്ന വ്യാജേന രണ്ടുപേർ കൃഷ്ണനെ നിരന്തരമായി ഭീഷണിപ്പെടുത്തിയെന്ന് കുടുംബവും ആരോപിച്ചു. 15,000 രൂപ കടം വാങ്ങിയതിന് 3.5 ലക്ഷം തിരികെ ചോദിച്ചെന്നാണ് ആരോപണം. മെഡിക്കൽ കോളജ് പോലീസ് കേസെടുത്ത് അന്വേഷണം ആരംഭിച്ചു.

🔹ജനപ്രിയ മെസേജിംഗ് ആപ്പായ വാട്‌സാപില്‍ ഇനി മുതല്‍ മൊബൈല്‍ റീചാര്‍ജ് സേവനവും ലഭ്യമാകും. പ്രീപെയ്ഡ് വരിക്കാര്‍ക്ക് ആപ്പിനുള്ളില്‍നിന്നുതന്നെ പ്ലാനുകള്‍ തെരഞ്ഞെടുക്കാനും പണമടയ്ക്കാനുമുള്ള സൗകര്യമാണ് മെറ്റ അവതരിപ്പിച്ചിരിക്കുന്നത്. പ്രമുഖ ഫിന്‍ടെക് പ്ലാറ്റ്ഫോമായ പേയുവുമായി (പേ യു) സഹകരിച്ചാണ് ഈ സേവനം ഒരുക്കിയിരിക്കുന്നത്.ഇന്ത്യയിലെ പ്രമുഖ ടെലികോം സേവനദാതാക്കളായ ജിയോ, എയര്‍ടെല്‍, വിഐ എന്നിവയുടെ വരിക്കാര്‍ക്ക് ഈ സേവനമുപയോഗിക്കാം. ഉപഭോക്താക്കള്‍ക്ക് സ്വന്തം നമ്പരോ സുഹൃത്തുക്കളുടെയോ കുടുംബാംഗങ്ങളുടെയോ നമ്പറുകളോ വാട്‌സാപിലൂടെതന്നെ റീച്ചാര്‍ജ് ചെയ്യാം. പേയ്മെന്‍റ് വിഭാഗം വേഗത്തില്‍ കണ്ടെത്തുന്നതിനായി ആപ്പിന്‍റെ ഹോം സ്‌ക്രീനില്‍ പ്രത്യേക രൂപ (₹) ഐക്കണും വാട്‌സാപ് പുതുതായി ഉള്‍പ്പെടുത്തിയിട്ടുണ്ട്.
മൊബൈല്‍ റീചാര്‍ജ് പോലുള്ള ദൈനംദിന ആവശ്യങ്ങള്‍ക്കായി ഉപഭോക്താക്കള്‍ മറ്റ് ആപ്പുകളെ ആശ്രയിക്കുന്നത് ഒഴിവാക്കി വാട്‌സാപില്‍തന്നെ എല്ലാം ലഭ്യമാക്കുകയാണ് ലക്ഷ്യമെന്ന് മെറ്റ ഇന്ത്യ അധികൃതര്‍ പറഞ്ഞു. എംബഡഡ് പേയ്മെന്‍റ് സംവിധാനത്തിലൂടെ ഇടപാടുകള്‍ കൂടുതല്‍ ലളിതവും വേഗത്തിലുമാക്കാന്‍ ഈ പങ്കാളിത്തം സഹായിക്കുമെന്ന് പേയു അധികൃതരും വ്യക്തമാക്കി.
ആന്‍ഡ്രോയിഡ്, ഐഒഎസ് ഉപഭോക്താക്കള്‍ക്ക് ഘട്ടം ഘട്ടമായി ഈ സേവനം ഉടന്‍ ലഭ്യമായിത്തുടങ്ങും.
റീച്ചാര്‍ജ് ചെയ്യേണ്ട വിധം:
● വാട്‌സാപ് തുറന്ന് ഹോം സ്‌ക്രീനിലെ (₹) ഐക്കണില്‍ ടാപ്പ് ചെയ്യുക.
● മൊബൈല്‍ പ്രീപെയ്ഡ് റീച്ചാര്‍ജ് ഓപ്ഷന്‍ തെരഞ്ഞെടുക്കുക.
● റീച്ചാര്‍ജ് ചെയ്യേണ്ട നമ്പര്‍ നല്‍കി ഓപ്പറേറ്ററെ സ്ഥിരീകരിക്കുക.
● ലഭ്യമായ പ്ലാനുകളില്‍നിന്ന് അനുയോജ്യമായത് തെരഞ്ഞെടുക്കുക.
● യുപിഐ, ഡെബിറ്റ്/ക്രെഡിറ്റ് കാര്‍ഡുകള്‍ എന്നിവ ഉപയോഗിച്ച് പണമടയ്ക്കാം.

🔹കണ്ണൂരിൽ അനുമതിയില്ലാതെ കരിമരുന്ന് പ്രയോഗിച്ചതിന് ക്ഷേത്ര ഭാരവാഹികൾക്കെതിരെ കേസെടുത്തു. 10 പേർക്കെതിരെയാണ് വളപട്ടണം പൊലീസ് കേസെടുത്തത്. കീച്ചേരി പാലോട്ടുകാവ് ക്ഷേത്രോത്സവത്തിലായിരുന്നു കരിമരുന്ന് പ്രയോഗം. സുരക്ഷാ മാനദണ്ഡങ്ങൾ പാലിച്ചില്ലെന്നാണ് ഇവർക്കെതിരെ ചുമത്തിയിരിക്കുന്ന കുറ്റം. അശ്രദ്ധമായി സ്ഫോടക വസ്തുക്കൾ കൈകാര്യം ചെയ്തതിനാണ് കേസെടുത്തിരിക്കുന്നത്.

🔹ദക്ഷിണ ഡല്‍ഹിയില്‍ മുതിര്‍ന്ന ഐആര്‍എസ് ഉദ്യോഗസ്ഥന്‍റെ 22കാരിയായ മകളെ അപ്പാര്‍ട്ട്‌മെന്‍റില്‍ വച്ച് ബലാത്സംഗം ചെയ്തു കൊലപ്പെടുത്തിയ കേസിലെ പ്രതി രാജസ്ഥാനിലെ ആല്‍വാര്‍ സ്വദേശി രാഹുല്‍ മീണ(23)യെ നാലു ദിവസത്തെ പോലീസ് കസ്റ്റഡിയിൽ വിട്ടു.ബുധനാഴ്ച ദ്വാരകയിലെ ഒരു ഹോട്ടലിൽനിന്ന് അറസ്റ്റ് ചെയ്ത പ്രതിയെ ഇന്നലെയാണു ഡൽഹി സാകേത് കോടതിയിൽ ഹാജരാക്കിയത്. പ്രതിയുടെ മൊബൈൽ ഫോണ്‍ വീണ്ടെടുക്കാനും കുടുംബാംഗങ്ങളെ ചോദ്യം ചെയ്യാനും കുറ്റകൃത്യത്തിൽ മറ്റാർക്കെങ്കിലും പങ്കുണ്ടോയെന്നു പരിശോധിക്കാനും നാലു ദിവസത്തെ കസ്റ്റഡി വേണമെന്ന പോലീസിന്‍റെ ആവശ്യം ജുഡീഷൽ മജിസ്ട്രേറ്റ് ഫസ്റ്റ് ക്ലാസ് ദീപിക തക്രാൻ അംഗീകരിക്കുകയായിരുന്നു. കൊലപാതകത്തിനുശേഷം വീട്ടില്‍നിന്ന് 2.5 ലക്ഷം രൂപ കൊള്ളയടിക്കുകയും കൊല്ലപ്പെട്ട യുവതിയുടെ വിരലടയാളം ഉപയോഗിച്ച് ബയോമെട്രിക് ഹോം ലോക്കര്‍ തുറക്കാന്‍ ശ്രമിക്കുകയും ചെയ്തതായി പ്രതിയുടെ മൊഴിയില്‍ പറയുന്നു.

🔹ഫ്രഞ്ച് വിമാനത്താവളങ്ങൾ വഴി അന്താരാഷ്ട്ര യാത്ര നടത്തുന്ന ഇന്ത്യക്കാർക്ക് ഇനി മുതൽ ട്രാൻസിറ്റ് വിസ ആവശ്യമില്ലെന്ന് ഫ്രാൻസ് തീരുമാനിച്ചു. പ്രസിഡന്റ് ഇമ്മാനുവൽ മക്രോണിന്റെ ഈ തീരുമാനത്തിന് ഇന്ത്യൻ വിദേശകാര്യ മന്ത്രാലയം നന്ദി അറിയിച്ചു. ഈ നീക്കം ഇന്ത്യൻ യാത്രക്കാർക്ക് വലിയ ആശ്വാസം നൽകുന്നതാണ്.

🔹ഡെന്മാർക്കിൽ ട്രെയിനുകൾ കൂട്ടിയിടിച്ച് 17 പേർക്കു പരിക്ക്. അഞ്ചു പേരുടെ നില ഗുരുതരമാണ്. തലസ്ഥാനമായ കോപ്പൻഹേഗനു വടക്കുപടിഞ്ഞാറ് നോർത്ത് സീലാൻഡ് മേഖലയിലെ ലെവൽ ക്രോസിൽ ഇന്നലെ രാവിലെയായിരുന്നു അപകടം.എതിർദിശയിൽനിന്നു വന്ന രണ്ടു ട്രെയിനുകൾ കൂട്ടിയിടിക്കുകയായിരുന്നു. രണ്ടു ട്രെയിനുകളിലുമായി 38 യാത്രക്കാരേ ഉണ്ടായിരുന്നുള്ളൂ. ട്രെയിനുകൾക്ക് വലിയ തോതിൽ നാശമുണ്ടായി. അപകടത്തിന്‍റെ കാരണം അന്വേഷിച്ചുവരുന്നു.

🔹അമേരിക്കയുടെ അതീവ രഹസ്യ പദ്ധതികളിൽ ഏർപ്പെട്ടിരിക്കുന്ന പ്രമുഖ ശാസ്ത്രജ്ഞർ ദുരൂഹമായി കൊല്ലപ്പെടുകയോ അപ്രത്യക്ഷരാവുകയോ ചെയ്യുന്നു. നാസ, കാൽടെക് തുടങ്ങിയ സ്ഥാപനങ്ങളിലെ ഉദ്യോഗസ്ഥർ ഇരകളായതോടെ, എഫ്ബിഐയുടെ നേതൃത്വത്തിൽ ട്രംപ് ഭരണകൂടം വിപുലമായ അന്വേഷണത്തിന് ഉത്തരവിട്ടു.

🔹ഇറാനിലെ മുൻ കിരീടാവകാശി റെസ പഹ്‌ലവിക്ക് നേരെ ജർമനിയിൽ മഷി ആക്രമണം. ഇറാൻ യുദ്ധത്തിലെ നിലപാടുകളിൽ പ്രതിഷേധിച്ചായിരുന്നു ആക്രമണം. ബെർലിനിലെ ഫെഡറൽ പ്രസ് കോൺഫറൻസിൽ വാർത്താ സമ്മേളനം കഴിഞ്ഞ് പുറത്തിറങ്ങിയപ്പോഴായിരുന്നു പ്രതിഷേധം. അദ്ദേഹത്തിന്റെ വസ്ത്രത്തിലും കഴുത്തിലും ചുവന്ന നിറത്തിലുള്ള മഷി ഒഴിച്ചായിരുന്നു ആക്രമണം.

🔹ഫിഫ 2026 ലോകകപ്പ് ഫുട്‌ബോളില്‍ ഇറാന്‍ കളിക്കുമെന്ന് സര്‍ക്കാര്‍ വൃത്തങ്ങള്‍. അമേരിക്ക, മെക്‌സിക്കോ, കാനഡ എന്നീ രാജ്യങ്ങള്‍ സംയുക്തമായാണ് 2026 ലോകകപ്പ് ഫുട്‌ബോളിന് ആതിഥേയത്വം വഹിക്കുന്നത്. അമേരിക്ക-ഇസ്രയേല്‍ സഖ്യം ഇറാന് എതിരേ നടത്തുന്ന വ്യോമാക്രമണത്തെത്തുടര്‍ന്ന് ഇറാന്‍റെ ലോകകപ്പ് സാന്നിധ്യം ആശങ്കയിലായിരുന്നു. ലോകകപ്പില്‍ തങ്ങളുടെ ടീം പങ്കെടുക്കുമെന്ന് ഇറേനിയന്‍ സര്‍ക്കാര്‍ വക്താവ് ഇന്നലെ അറിയിച്ചു. ലോകകപ്പിന്‍റെ കിക്കോഫിലേക്ക് ഇനി 48 ദിനങ്ങളുടെ അകലം മാത്രമാണുള്ളത്.

🔹ഇറാനു പകരം ഇറ്റലിയെ 2026 ലോകകപ്പില്‍ ഉള്‍പ്പെടുത്താന്‍ അമേരിക്കന്‍ പ്രസിഡന്‍റ് ഡോണള്‍ഡ് ട്രംപിന്‍റെ ദൂതന്‍ ഫിഫയോട് ആവശ്യപ്പെട്ടതായി ഫിനാന്‍ഷല്‍ ടൈംസ് റിപ്പോര്‍ട്ട് ചെയ്തു.ഇറ്റാലിയന്‍ പ്രധാനമന്ത്രി ജോര്‍ജിയ മെലോണിയുമായുള്ള ഇഴടയുപ്പം വര്‍ധിപ്പിക്കാനാണ് ട്രംപിന്‍റെ ഈ നീക്കമെന്നു വിലയിരുത്തപ്പെടുന്നു. ഇറാന്‍ യുദ്ധത്തില്‍ ലെയോ പതിനാലാമന്‍ മാര്‍പാപ്പയുടെ പ്രസ്താവനയ്‌ക്കെതിരേ ട്രംപ് നടത്തിയ വിവാദ പ്രത്യാക്രമണങ്ങള്‍ ഇറ്റാലിയന്‍ പ്രധാനമന്ത്രിയുടെ അതൃപ്തിക്കു കാരണമായി. 2014നുശേഷം ഇറ്റലി ഇതുവരെ ഫിഫ ലോകകപ്പ് കളിച്ചിട്ടില്ല.

🔹ജൊഹാനസ്ബര്‍ഗ്: ദക്ഷിണാഫ്രിക്കന്‍ വനിതകള്‍ക്ക് എതിരായ മൂന്നാം ട്വന്‍റി-20 ക്രിക്കറ്റിലും ഇന്ത്യന്‍ വനിതകള്‍ക്കു തോല്‍വി. ഇതോടെ അഞ്ച് മത്സര പരമ്പര ആതിഥേയര്‍ ഉറപ്പാക്കി. ഒമ്പത് വിക്കറ്റിനായിരുന്നു മൂന്നാം മത്സരത്തില്‍ ഇന്ത്യയുടെ തോല്‍വി. സ്‌കോര്‍: ഇന്ത്യ 20 ഓവറില്‍ 192/4. ദക്ഷിണാഫ്രിക്ക 16.3 ഓവറില്‍ 193/1.കഴിഞ്ഞ രണ്ടു വര്‍ഷമായി ട്വന്‍റി-20 പരമ്പര നഷ്ടപ്പെടുത്തിയിട്ടില്ലെന്ന ഇന്ത്യന്‍ നേട്ടം ഇതോടെ അവസാനിച്ചു. 2024 ജനുവരിയിലായിരുന്നു ഇന്ത്യന്‍ വനിതകള്‍ ഇതിനു മുമ്പ് പരമ്പര കൈവിട്ടത്.

🔹‘സുമതി വളവ്’ അടക്കമുള്ള സിനിമകളിലൂടെ കോടികളുടെ നഷ്ടമാണ് തനിക്ക് ഉണ്ടായതെന്നും പറ്റിക്കപ്പെട്ടുവെന്നും അടുത്തിടെയാണ് വ്യവസായിയും നിർമാതാവുമായ മുരളി കുന്നുംപുറത്ത് വീഡിയോയിലൂടെ വെളിപ്പെടുത്തിയത്. ‘നദികളിൽ സുന്ദരി യമുന’, ‘സുമതി വളവ്’ അടക്കമുള്ള സിനിമകളിലൂടെ ഏകദേശം ഒൻപത് കോടിയുടെ നഷ്ടമുണ്ടായെന്നും ഇനി മുൻപിലുള്ളത് ആത്മഹത്യയാണെന്നും ആയിരുന്നു അദ്ദേഹം വെളിപ്പെടുത്തിയത്. ഇപ്പോ‍ഴിതാ നിർമാതാവായ വേണു കുന്നപ്പിള്ളിയും ഇത് സംബന്ധിച്ച് പോസ്റ്റ് പങ്കുവെച്ചിരിക്കുകയാണ്.സിനിമയിലെ ചതിക്കുഴികൾ എന്ന് പറഞ്ഞുകൊണ്ടാണ് അദ്ദേഹം പോസ്റ്റ് ആരംഭിക്കുന്നത്. ‘സുമതി വളവ്’ എന്ന സിനിമയുടെ പ്രൊഡ്യൂസറിന്റെ സോഷ്യൽ മീഡിയയിൽ പ്രചരിക്കുന്ന വീഡിയോയാണ് ഈ കുറിപ്പെഴുതാൻ തന്നെ പ്രേരിപ്പിച്ചതെന്നും അദ്ദേഹം ആമുഖമായി കുറിച്ചു. ഈ സിനിമയുടെ കഥ ഏതാനും വർഷങ്ങൾക്കു മുന്നേ കേട്ടതാണെന്നും മുരളിയെ ദുബായിൽ വച്ച് കണ്ടപ്പോൾ സീരിയൽ നിലവാരത്തിലുള്ള കഥയുടെ പോരായ്മയെ പറ്റി സംസാരിക്കുകയും കഴിയുന്നതും ഈ സിനിമയുമായി മുന്നോട്ടുപോകരുതെന്ന് പറഞ്ഞിരുന്നതാണെന്നും അദ്ദേഹം കുറിച്ചു. അണിയറ പ്രവർത്തകരുടെ പ്രലോഭനങ്ങളിൽ വശംവദനായി അദ്ദേഹം പ്രോജക്റ്റുമായി മുന്നോട്ട് പോവുകയായിരുന്നു എന്നും അദ്ദേഹം എ‍ഴുതി.ഇതൊന്നും ഒറ്റപ്പെട്ട സംഭവമല്ലെന്നും നൂറുകണക്കിന് നിർമിതാക്കൾ കുത്തുപാളയെടുത്ത് ആത്മഹത്യയുടെ വരമ്പത്തു കൂടി സഞ്ചരിക്കുന്നത് പച്ചയായ സത്യമാണെന്നും അദ്ദേഹം ചൂണ്ടിക്കാട്ടി. പലരും മാനനഷ്ടമോർത്താണ് ഇത് പുറത്തു പറയാത്തതെന്നും അദ്ദേഹം പറഞ്ഞു. ആത്മാർത്ഥത ലെവലേശമില്ലാത്ത ഒരു കൂട്ടം ആളുകൾ സിനിമാ മേഖലയിലുണ്ട്. വല്ലവരുടേയും പണം കൊണ്ട്, ആളായി അഹങ്കാരത്തിന്റെ അത്യുന്നതങ്ങളിൽ വിലസുന്നവരെ കാണണമെങ്കിൽ ഒരു സിനിമ എടുത്താൽ മതി.സിനിമ തുടങ്ങുന്നതിനു മുന്നേ പറഞ്ഞ ബഡ്ജറ്റിന്റെ, ഇരട്ടിയോ അതിനു മുകളിലേക്കോ പോയാലും ഒരു കുലുക്കവുമില്ലാത്ത സിനിമാ പ്രവർത്തകരേയും ബജറ്റ് കൂടുന്നതനുസരിച്ച് പുതിയ പ്രൊഡ്യൂസർമാരെ ചേർത്തുകൊണ്ടിരിക്കുന്നവന്മാരേയും, സംവിധാനം പോയിട്ട്,ആർട്ടിസ്റ്റുകൾക്ക് കുട പിടിച്ചു കൊടുക്കാൻ പോലും യോഗ്യതയില്ലാത്തവൻമാരേയും ആജീവനാന്തം സിനിമയിൽ നിന്ന് അകറ്റിയില്ലെങ്കിൽ ഇതുപോലുളള ദുരന്തങ്ങൾ തുടർന്നുകൊണ്ടേയിരിക്കും, വേണു കുന്നപ്പിള്ളി കുറിച്ചു. സിനിമാ അസോസിയേഷനുകളുടെ തലപ്പത്തിരിക്കുന്ന സാറന്മാരുടെ കണ്ണ് തുറക്കുന്നത് എപ്പോഴാണാവോ എന്ന ചോദ്യം ഉയർത്തിക്കൊണ്ടാണ് അദ്ദേഹം പോസ്റ്റ് അവസാനിപ്പിക്കുന്നത്.

💦 ഗുരുജിയുടെ വാക്കുകൾ

രണ്ട്‌ പേരുടെ ജീവിതം , അതിൽ അവരുടേത് മാത്രമായ ഈ ലോകത്ത് നിന്ന് വളരെ പെട്ടെന്നൊരാള്‍ ഇറങ്ങിപ്പോവുകയും മറ്റേയാള്‍ തനിച്ചാവുകയും ചെയ്യുന്ന ആ നിമിഷം. എല്ലാം പറഞ്ഞിരുന്നൊരാള്‍, എല്ലാത്തിനും കൂട്ടു നിന്നൊരാള്‍…. അയാളുടെ ഇല്ലായ്മ തന്റെ തന്നെ ഇല്ലാതാവലാണ് എന്ന് തോന്നിയാല്‍ മനുഷ്യനെ കുറ്റം പറയാനൊക്കില്ല.`
സ്‌നേഹത്തില്‍ വീഴാന്‍ തയ്യാറാവുന്നവര്‍ ധൈര്യമുള്ളവരാണ്. നമ്മെ മുറിവേല്‍പ്പിക്കാനുള്ള വാള്‍ കൂടിയാണ് നാം മറ്റൊരാള്‍ക്ക് നല്‍കുന്നത്.

തയ്യാറാക്കിയത്: കപിൽ ശങ്കർ

7 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 24 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

📱വാർത്തകൾ ഒറ്റനോട്ടത്തിൽ📱 – 2026 | മെയ് 20 | ബുധൻ ✍️ കപിൽ ശങ്കർ

ടെക്സസ് സെനറ്റ് തിരഞ്ഞെടുപ്പ്: കോർണിനെ തള്ളി കെൻ പാക്സ്റ്റന് പിന്തുണയുമായി ട്രംപ്

സാൻ ഡിയാഗോയിലെ പള്ളിയിൽ കൂട്ടവെടിവെയ്പ്പ്: ഇസ്‌ലാമോഫോബിയയ്‌ക്കെതിരെ നടപടി വേണമെന്ന് നിയമനിർമ്മാതാക്കൾ

1 COMMENT

LEAVE A REPLY Cancel reply

Most Popular

കേരള മന്ത്രിസഭാ യോഗ തീരുമാനങ്ങൾ.

പ്രശസ്ത ഛായാഗ്രാഹകന്‍ സജി നായര്‍ അന്തരിച്ചു

മില്‍മ പാല്‍ വില ലിറ്ററിന് നാല് രൂപ വര്‍ധിപ്പിച്ചു, ജൂൺ 1മുതൽ പ്രാബല്യത്തിൽ

ചെരുപ്പടയാളം കുടുക്കി; കാസർഗോഡ് പ്രവാസിയുടെ വീട്ടിൽ നിന്ന് 45 പവൻ കവർന്ന കുപ്രസിദ്ധ മോഷ്ടാവ് പിടിയിൽ

Recent Comments

EDITOR PICKS

കേരള മന്ത്രിസഭാ യോഗ തീരുമാനങ്ങൾ.

പ്രശസ്ത ഛായാഗ്രാഹകന്‍ സജി നായര്‍ അന്തരിച്ചു

മില്‍മ പാല്‍ വില ലിറ്ററിന് നാല് രൂപ വര്‍ധിപ്പിച്ചു, ജൂൺ 1മുതൽ പ്രാബല്യത്തിൽ

POPULAR POSTS

പ്രശസ്ത ഛായാഗ്രാഹകന്‍ സജി നായര്‍ അന്തരിച്ചു

രാജ്യതലസ്ഥാനത്ത് ഉഷ്ണ തരംഗ മുന്നറിയിപ്പ്, ചൊവ്വാഴ്ച 46 ഡിഗ്രി സെൽഷ്യസ് താപനില രേഖപ്പെടുത്തി

ദേശീയ പണിമുടക്കിന് ആഹ്വാനംചെയ്ത് എസ്ബിഐ എംപ്ലോയീസ് ഫെഡറേഷൻ (ബെഫി).

POPULAR CATEGORY

ABOUT US

FOLLOW US