📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 08 | ബുധൻ ✍ കപിൽ ശങ്കർ

🔹2026 ഏപ്രിൽ 8-ന് (ബുധനാഴ്ച) പ്രധാനമായും താഴെ പറയുന്ന വിശേഷങ്ങളാണ് ഉള്ളത്:
* ചൈത്ര ബുധനാഴ്ച: ഹൈന്ദവ കലണ്ടർ പ്രകാരം ചൈത്ര മാസത്തിലെ ഒരു സുപ്രധാന ദിവസമാണിത്.
* ഷഷ്ഠി: മുരുക ഭക്തർക്ക് പ്രധാനപ്പെട്ട ഷഷ്ഠി വ്രതവുമായി ബന്ധപ്പെട്ട പ്രത്യേക പൂജകൾ പല ക്ഷേത്രങ്ങളിലും ഈ സമയത്ത് നടക്കാറുണ്ട്.
.കൂടാതെ, സാംസ്കാരികമായി ശ്രദ്ധേയമായ ‘വരവേൽപ്പ് ‘എന്ന സിനിമ പുറത്തിറങ്ങിയതും ഒരു ഏപ്രിൽ 8-ന് (1989) ആയിരുന്നു.

🔹കേരളം നാളെ പോളിംഗ് ബൂത്തിലേക്ക്. വോട്ടെടുപ്പു യന്ത്രങ്ങളുമായി പോളിംഗ് ഉദ്യോഗസ്ഥര്‍ ഇന്നുച്ചയോടെ വോട്ടെടുപ്പു കേന്ദ്രങ്ങളിലെത്തും. വാദ്യമേളങ്ങളും കൊടികളേന്തിയുള്ള ശക്തിപ്രകടനങ്ങളുമായി നിയമസഭ തെരഞ്ഞെടുപ്പിന്റെ പരസ്യ പ്രചാരണത്തിന് കൊട്ടിക്കലാശം. ഇനി നിശബ്ദ പ്രചരണം. കേരളത്തിന്റെ അടുത്ത അഞ്ചു വര്‍ഷത്തെ ഭരണത്തിനു 2.70 കോടി വോട്ടര്‍മാര്‍ നാളെ വിധിയെഴുതും.

🔹ശബരിമലയിലെ യുവതീ പ്രവേശനത്തില്‍ അഞ്ചംഗ ബെഞ്ചിന്റെ വിധി തിരുത്തണമെന്ന് കേന്ദ്ര സര്‍ക്കാരിന്റെ സോളിസിറ്റര്‍ ജനറല്‍ തുഷാര്‍ മേത്ത സുപ്രീംകോടതിയെ അറിയിച്ചു. മതത്തിന്റെ അനിവാര്യ ഘടകമെന്തെന്ന് കോടതികള്‍ മാത്രം തീരുമാനിക്കുന്നത് ഉചിതമല്ലെന്നും തുഷാര്‍ മേത്ത വാദിച്ചു. അതേസമയം സ്ത്രീകള്‍ക്ക് ആര്‍ത്തവ സമയത്ത് ഇപ്പോഴും തൊട്ടുകൂടായ്മയുണ്ടോയെന്ന് ജസ്റ്റിസ് നാഗരത്ന ചോദിച്ചു.

🔹മദ്യം അര്‍ബുദത്തിന് കാരണമാകുന്നുവെന്ന ലേബല്‍ മദ്യക്കുപ്പികളില്‍ പതിക്കേണ്ടതില്ലെന്ന് മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ ബൈജുനാഥ്. അര്‍ബുദത്തിന് കാരണമാകുമെന്ന ലേബല്‍ മദ്യക്കുപ്പികളില്‍ പതിപ്പിക്കണമെന്ന് ആവശ്യപ്പെട്ട് സമര്‍പ്പിച്ച പരാതിയിലാണ് നടപടി.

🔹പൊതുമരാമത്ത് മന്ത്രി മുഹമ്മദ് റിയാസും ഭാര്യ വീണ വിജയനും ജനപ്രാതിനിധ്യ നിയമത്തിലെ ചട്ടങ്ങള്‍ ലംഘിച്ചെന്ന് ആരോപിച്ച് തിരുവനന്തപുരം ഒന്നാം ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ സ്വകാര്യ ഹര്‍ജി. നാമനിര്‍ദ്ദേശ പത്രികയ്‌ക്കൊപ്പം വരുമാനത്തിന്റെ പൂര്‍ണ്ണ വിവരങ്ങള്‍ നല്‍കിയില്ലെന്നാണ് ഹര്‍ജിയിലെ ആരോപണം. ഈ മാസം 22 നകം റിപ്പോര്‍ട്ട് സമര്‍പ്പിക്കാന്‍ കോടതി പൊലീസിനോട് ഉത്തരവിട്ടു.

🔹മഴക്കാല മുന്നൊരുക്കങ്ങളില്‍ സര്‍ക്കാര്‍ പരാജയമാണെന്ന് യുഡിഎഫ്. കേരളത്തില്‍ മഴക്കാലം എത്തുമ്പോള്‍ തന്നെ പ്രളയഭീതിയും ആശങ്കയും കൂടി വരുന്നത് പതിവായിട്ടുണ്ട്. എറണാകുളം, കോട്ടയം, പത്തനംതിട്ട ജില്ലകളില്‍ ആവര്‍ത്തിച്ച് ഉണ്ടാകുന്ന വെള്ളപ്പൊക്കങ്ങള്‍, സംസ്ഥാനത്തിന്റെ പ്രളയ നിയന്ത്രണ സംവിധാനത്തിലെ ഗുരുതരമായ വീഴ്ചകളെ വീണ്ടും മുന്നില്‍ കൊണ്ടുവരുന്നതായി യുഡിഎഫ് കുറ്റപ്പെടുത്തി.

🔹ലൈംഗികാതിക്രമ കേസിലെ പരാതിക്കാരിയായ അതിജീവിതയുടെ പേര് വിവരങ്ങള്‍ വെളിപ്പെടുത്തിയ കേസില്‍ യുവാവിനെ പൊലീസ് അറസ്റ്റ് ചെയ്തു. കൊല്ലം കൊട്ടാരക്കര കാട്ടാമ്പിള്ളി മണ്ണൂര്‍ സ്വര്‍ദേശി ജിനു കുഞ്ഞുമോന്‍ (ജിനു കെ കോശി – 39) ആണ് പിടിയിലായത്.

🔹തെലങ്കാന മുഖ്യമന്ത്രി രേവന്ത് റെഡ്ഡിയെ ‘ഡാഷ് മോനേ’ പ്രയോഗിച്ച മുഖ്യമന്ത്രി പിണറായി വിജയനെതിരെ രൂക്ഷ വിമര്‍ശനവുമായി ഷാഫി പറമ്പില്‍ എം പി. നിലവാര തകര്‍ച്ചയുടെ അങ്ങേയറ്റമാണ് മുഖ്യമന്ത്രി പ്രകടമാക്കിയത്. അധികാരം നഷ്ടമായതോടെ പിണറായിയുടെ ഒറിജിനല്‍ മുഖം പുറത്തുവന്നെന്നു ഷാഫി.

🔹വയനാട്ടിലെ കോണ്‍ഗ്രസ് നേതാവ് എന്‍ എം വിജയന്റെയും മകന്റെയും ആത്മഹത്യക്കു കാരണം കുടുംബ പ്രശ്നങ്ങളാണെന്നും നേതാക്കള്‍ക്കു പങ്കില്ലെന്നും കോണ്‍ഗ്രസ് നേതാവ് കെ ഇ വിനയന്‍.. ആത്മഹത്യക്കുറിപ്പില്‍ പൊലീസ് ശരിയായ അന്വേഷണം നടത്തിയില്ലെന്നും കത്തില്‍ കോണ്‍ഗ്രസ് നേതാക്കളില്‍ ഒരാളുടെയും പേര് പരാമര്‍ശിച്ചിട്ടില്ലെന്നും നേതാക്കള്‍ പറഞ്ഞു.

🔹താമരശ്ശേരി റോഡില്‍ പഴയ ആക്രി സാധനങ്ങള്‍ ശേഖരിക്കുന്ന കൂമ്പാരങ്ങള്‍ക്ക് തീപിടിച്ചു. സ്ഥലത്ത് വന്‍ അഗ്നിബാധയുണ്ടായി. മുക്കിലങ്ങാടി അപ്പക്കാട്ടില്‍ ഗഫൂറിന്റെ ഉടമസ്ഥതയിലുള്ള സ്ഥാപനത്തിലാണ് തീപിടിത്തമുണ്ടായത്.

🔹 വാളയാർ അട്ടപ്പള്ളം ആൾക്കൂട്ട കൊലപാതക കേസിൽ ജാമ്യത്തിലായിരുന്ന ആറാം പ്രതിയെ തൂങ്ങിമരിച്ച നിലയിൽ കണ്ടെത്തി. കിഴക്കേ അട്ടപ്പള്ളത്ത് വിനോദ് കുമാറിനെയാണ് (54) വീടിനു സമീപത്തെ പറമ്പിൽ തൂങ്ങി മരിച്ച നിലയിൽ കണ്ടെത്തിയത്.കേസിൽ മണ്ണാർക്കാട് സ്പെഷൽ കോടതി ഇയാൾക്ക് നേരത്തെ ജാമ്യം അനുവദിച്ചിരുന്നു. ഇതു റദ്ദാക്കണമെന്നാവശ്യപ്പെട്ട് അന്വേഷണ സംഘം ഹൈക്കോടതിയിൽ അപേക്ഷ നൽകിയിരുന്നു. ഇതു ഹൈക്കോടതി പരിഗണിക്കാനിരിക്കെയാണ് പ്രതിയുടെ മരണം. മൃതദേഹം ജില്ലാ ആശുപത്രിയിലേക്കു മാറ്റിയിട്ടുണ്ട്.
കഴിഞ്ഞ ഡിസംബർ 17-നാണ് ജാർഖണ്ഡ് സ്വദേശി രാം നാരായൺ ഭഗേൽ ആൾക്കൂട്ട ആക്രമണത്തിനിരയായി കൊല്ലപ്പെട്ടത്. ഇരയുടെ ബന്ധുക്കൾക്ക് പറയാനുള്ളതു കേൾക്കാതെയാണ് വിചാരണക്കോടതി ജാമ്യം നൽകിയതെന്ന ആക്ഷേപം ഉയർന്നതിനെ തുടർന്നായിരുന്നു ഹൈക്കോടതിയുടെ ഇടപെടൽ.
കേസിൽ ആകെ ഒൻപതു പ്രതികളുണ്ട്. ഒരു മാസം മുൻപ് അന്വേഷണ സംഘത്തിന്‍റെ അപേക്ഷയിൽ ഹൈക്കോടതി മറ്റു എട്ട് പ്രതികളുടെയും ജാമ്യം റദ്ദാക്കിയിരുന്നു. ഇവർ നിലവിൽ റിമാൻഡിലാണ്. കഴിഞ്ഞ ദിവസം മണ്ണാർക്കാട് സ്പെഷൽ കോടതി പ്രതികളുടെ ജാമ്യാപേക്ഷ പരിഗണിക്കുന്നത് ഈ മാസം 18ലേക്കു മാറ്റിയിരുന്നു.
കൊല്ലപ്പെട്ട രാം നാരായൺ ഭാഗേലിന്‍റെ ഭാര്യയെ അന്ന് ഹാജരാക്കാനും മണ്ണാർക്കാട് പട്ടികജാതി പട്ടികവർഗ പ്രത്യേക കോടതി ജഡ്ജി ജോമോൻ ജോൺ ഉത്തരവിട്ടിട്ടുണ്ട്.

🔹 തന്‍റെ ഭാര്യയുടെ ചിത്രങ്ങള്‍ ഉപയോഗിച്ച് ഹീനമായ അപവാദ പ്രചാരണം നടത്തുകയാണെന്ന പരാതിയുമായി മന്ത്രിയും തൃത്താലയിലെ എൽഡിഎഫ് സ്ഥാനാർഥിയുമായ എം.ബി. രാജേഷ്. സാമൂഹിക മാധ്യമങ്ങളില്‍ അതിരുവിട്ട രീതിയിലുള്ള വ്യക്തിഹത്യയാണ് നടക്കുന്നതെന്നും അദ്ദേഹം പറഞ്ഞു.
തെരഞ്ഞെടുപ്പ് കാലത്ത് ഒരു പൊതുപ്രവര്‍ത്തകന്‍ ഇങ്ങനെയൊരു നടപടിയിലേക്ക് കടക്കുന്നത് ഇത് ആദ്യമായിരിക്കുമെന്നും കുടുംബത്തെ വേട്ടയാടുമ്പോള്‍ ഇതല്ലാതെ വേറെ വഴിയില്ല എന്നും അദ്ദേഹം പറഞ്ഞു. സൈബര്‍ അധിക്ഷേപങ്ങള്‍ക്കെതിരെ നിയമപരമായി മുന്നോട്ട് നീങ്ങാന്‍ ഒരു ഐടി സെല്ലിനെയും അഭിഭാഷക സംഘത്തെയും നിയോഗിച്ചിരിക്കുകയാണെന്നും മന്ത്രി വ്യക്തമാക്കി.
തെരഞ്ഞെടുപ്പിന്‍റെ അവസാനഘട്ടം എത്തിയപ്പോള്‍ എല്ലാ പരിധിയും ലംഘിക്കുന്ന വ്യക്തിഹത്യയാണ് യുഡിഎഫ് നടത്തുന്നത്. കുടുംബത്തെയും അധിക്ഷേപിക്കുന്ന പ്രവര്‍ത്തിയാണ് നടത്തുന്നത്. ഇതിനെ നിയമപരമായി നേരിടാനാണ് തീരുമാനം.
കഴിഞ്ഞ ദിവസങ്ങളില്‍ ഭാര്യയുടെ ചിത്രം വരെ ഉള്‍പ്പെടുത്തി വാട്‌സ്ആപ്പിലൂടെ അധിക്ഷേപ പ്രചരണം നടക്കുന്നു. അതിനെതിരെ ഡിജിപിക്കും തെരഞ്ഞെടുപ്പ് കമ്മീഷനും പരാതി നല്‍കി. തെരഞ്ഞെടുപ്പിന് മണിക്കൂറുകള്‍ മാത്രം ബാക്കി നില്‍ക്കേയാണ് സരസ് മേളയെ കുറിച്ച് ആരോപണം ഉന്നയിക്കുന്നത്. ഇത്തരം പ്രചരണങ്ങള്‍ അപ്രതീക്ഷിതമല്ലെന്നും മന്ത്രി പറഞ്ഞു.

🔹പ്രായപൂര്‍ത്തിയാകാത്ത പെണ്‍കുട്ടിയ്ക്കെതിരെ ലൈംഗികാതിക്രമം നടത്തിയ കേസിൽ യുവാവ് പിടിയിൽ. പൂവച്ചല്‍ പേഴുംമൂട് പുത്തന്‍പള്ളി റോഡരികത്തുവീട്ടില്‍ മുഹമ്മദ് നാഥർ(18) ആണ് പിടിയിലായത്.തിരുവല്ലം പോലീസ് ആണ് പ്രതിയെ പിടികൂടിയത്. ഇന്‍സ്റ്റഗ്രാമിലൂടെയാണ് പ്രതി പ്രായപൂര്‍ത്തിയാകാത്ത പെണ്‍കുട്ടിയെ പരിചയപ്പെട്ടത്. തുടർന്ന് നിരന്തരം മെസേജുകളിലൂടെയും കോളുകളിലൂടെയും കുട്ടിയുമായി അടുപ്പം സ്ഥാപിച്ചു. ഇതിനുപിന്നാലെയാണ് പ്രതി പെണ്‍കുട്ടിയുടെ വീട്ടില്‍ അതിക്രമിച്ചു കയറി ലൈംഗിക പീഡനത്തിന് ഇരയാക്കിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

🔹യുഡിഎഫ് സ്ഥാനാർഥി ബിന്ദു കൃഷ്ണയുടെ മകന്‍റെ പേരിലുള്ള കാര്‍ ഇടിച്ച് കായിക താരങ്ങള്‍ക്ക് പരിക്കേറ്റ സംഭവത്തില്‍ കേസെടുത്ത് പോലീസ്. ഡ്രൈവര്‍ക്കെതിരെയാണ് കേസെടുത്തത്. കൊല്ലം ഈസ്റ്റ് പോലീസിന്‍റേതാണ് നടപടി.ഭാരതീയ ന്യായ സംഹിതയിലെ 281, 125 (a), 125 (b), മോട്ടോര്‍ വെഹിക്കിള്‍ ആക്ട് 1988 ലെ 134 (a), 134 (b) വകുപ്പുകള്‍ പ്രകാരമാണ് കേസെടുത്തിരിക്കുന്നത്. അമിതവേഗതയിലും അശ്രദ്ധവുമായാണ് പ്രതി വാഹനം ഓടിച്ചതെന്ന് എഫ്‌ഐആറില്‍ പറയുന്നുണ്ട്. KL 16 R 2935 നമ്പര്‍ കാറാണ് അപകടമുണ്ടാക്കിയതെന്നും എഫ്‌ഐആറില്‍ പറയുന്നു. പ്രതി നിലവില്‍ പോലീസ് കസ്റ്റഡിയിലാണ്.
ചൊവ്വാഴ്ച വൈകുന്നേരമാണ് അപകടമുണ്ടായത്. അപകടത്തില്‍ ഹോക്കി താരങ്ങളായ ചിന്നു ലക്ഷ്മി (13), ധനലക്ഷ്മി (13) എന്നിവര്‍ക്കാണ് പരിക്കേറ്റത്. കാര്‍ അമിത വേഗത്തിലെത്തി ഇരുവരെയും ഇടിച്ച് തെറിപ്പിക്കുകയായിരുന്നു.ഇടിയുടെ ആഘാതത്തില്‍ ഇരുവരും തെറിച്ച് കായലില്‍ വീണു. ചിന്നു ലക്ഷ്മിയുടെ തലയ്ക്ക് മുറിവും നട്ടെല്ലിലെ അസ്ഥിക്ക് പൊട്ടലും ഇടത് കൈക്കും വാരിയെല്ലിനും താടിയെല്ലിനും പൊട്ടലും ഉണ്ടായി. ഇതിന് പുറമേ ആന്തരിക രക്തസ്രാവവും സംഭവിച്ചു.
ധനലക്ഷ്മിയുടെ ഇടത് കാലിന് മുറിവും പൊട്ടലും സംഭവിച്ചിട്ടുണ്ട്. ഇടത് തുട ഭാഗത്ത് അസ്ഥിക്ക് പൊട്ടലും ശരീരത്തിന്‍റെ പല ഭാഗത്തും മുറിവും സംഭവിച്ചിട്ടുണ്ട്. ചിന്നുലക്ഷ്മി അപകടനില തരണം ചെയ്തിട്ടുണ്ട് എന്നാണ് വിവരം.

🔹ഇടപാടുകള്‍ കൂടുതല്‍ സുരക്ഷിതമാക്കാന്‍ പുതിയ ഫീച്ചറുമായി പേടിഎം. യുപിഐ പേയ്‌മെന്റുകള്‍ അപ്രൂവ് ചെയ്യുന്നതിന് ഉപയോക്താക്കള്‍ക്ക് ഫിംഗര്‍പ്രിന്റ് അല്ലെങ്കില്‍ ഫേസ് ഐഡി ഉപയോഗിക്കാന്‍ അനുവദിക്കുന്നതാണ് ഫീച്ചര്‍. ഇനി ഓരോ ഇടപാടിനും ഉപയോക്താക്കള്‍ക്ക് പിന്‍ ടൈപ്പ് ചെയ്യേണ്ട ആവശ്യമില്ല. വേഗത്തില്‍ ടാപ്പ് ചെയ്യുകയോ അല്ലെങ്കില്‍ ഫേസ് ഡിറ്റക്ഷന്‍ ഉപയോഗിച്ചും ഇടപാടുകള്‍ പൂര്‍ത്തിയാക്കാം. ഏപ്രില്‍ 1 മുതല്‍ റിസര്‍വ് ബാങ്ക് പുതിയ ടു-ഫാക്ടര്‍ ഓതന്റിക്കേഷന്‍ നിയമങ്ങള്‍ നടപ്പിലാക്കാന്‍ തുടങ്ങിയതിന് പിന്നാലെയാണ് പേയ്‌മെന്റുകള്‍ സുഗമവും കൂടുതല്‍ സുരക്ഷിതവുമാക്കുന്നതിനായി പേടിഎം ഈ അപ്‌ഡേറ്റ് പുറത്തിറക്കിയത്. യുപിഐ പേയ്‌മെന്റുകള്‍ക്കായുള്ള പേടിഎംന്റെ ബയോമെട്രിക് ഓതന്റിക്കേഷന്‍ ഫീച്ചര്‍ ആന്‍ഡ്രോയിഡ്, ഐഒഎസ് ഡിവൈസുകളില്‍ സപ്പോര്‍ട്ട് ചെയ്യും.

🔹ആഗോളതലത്തില്‍ വിമാന ഇന്ധനവില കുതിച്ചുയരുന്ന സാഹചര്യത്തില്‍, ആഭ്യന്തര-അന്താരാഷ്ട്ര വിമാന യാത്രക്കാര്‍ക്കുള്ള ഫ്യുവല്‍ സര്‍ചാര്‍ജ് വര്‍ദ്ധിപ്പിക്കാന്‍ എയര്‍ ഇന്ത്യ. പരിഷ്‌കരിച്ച നിരക്കുകള്‍ ഏപ്രില്‍ 8 മുതല്‍ പ്രാബല്യത്തില്‍ വരും. ആഭ്യന്തര റൂട്ടുകളില്‍ 500 കിലോമീറ്റര്‍ വരെയുള്ള യാത്രകള്‍ക്ക് 299 രൂപയും, 501 മുതല്‍ 1,000 കിലോമീറ്റര്‍ വരെ 399 രൂപയും ഫ്യുവല്‍ സര്‍ചാര്‍ജ് നല്‍കണം. 2,000 കിലോമീറ്ററിന് മുകളിലുള്ള റൂട്ടുകളില്‍ 899 രൂപ വരെയാണ് അധികമായി നല്‍കേണ്ടി വരിക. അന്താരാഷ്ട്ര റൂട്ടുകളില്‍ ഗള്‍ഫ് രാജ്യങ്ങളിലേക്കുള്ള യാത്രക്കാര്‍ക്ക് 50 ഡോളറും, സിംഗപ്പൂരിലേക്ക് 60 ഡോളറും സര്‍ചാര്‍ജ് നല്‍കണം. നോര്‍ത്ത് അമേരിക്ക, ഓസ്ട്രേലിയ റൂട്ടുകളില്‍ 280 ഡോളര്‍ ഈടാക്കും. യൂറോപ്പ്, യുകെ റൂട്ടുകളിലേക്ക് 205 ഡോളറാണ് അധിക നിരക്ക്. ഏപ്രില്‍ 8 ന് മുന്‍പ് ടിക്കറ്റ് ബുക്ക് ചെയ്തവരെ ഈ വര്‍ദ്ധന ബാധിക്കില്ല, എന്നാല്‍ യാത്രയുടെ തീയതിയോ റൂട്ടോ മാറ്റുകയാണെങ്കില്‍ പുതിയ നിരക്ക് ബാധകമാകും.

🔹കോൺഗ്രസ് നേതാവും മുന്‍ കേന്ദ്രമന്ത്രിയുമായ മൊഹ്സിന കിദ്വായി (94) അന്തരിച്ചു. . ഇന്നു പുലർച്ചെയോടെ നോയിഡയിലായിരുന്നു അന്ത്യം.രാജീവ് ഗാന്ധി മന്ത്രിസഭയിൽ നിരവധി വകുപ്പുകളുടെ ചുമതല വഹിച്ചിട്ടുണ്ട്. ഇന്ദിര ഗാന്ധി മന്ത്രിസഭയിലും അംഗമായിരുന്നു. ദീർഘകാലം എംഎൽഎയും എംപിയുമായിരുന്നു. കേരളത്തിന്‍റെ ചുമതലയുള്ള എഐസിസി ജനറൽ സെക്രട്ടറിയായിരുന്നു.
കോൺഗ്രസിലെ തലമുതിർന്ന നേതാക്കളിൽ ഒരാളാണ് മൊഹ്സിന കിദ്വായി. ഉത്തർപ്രദേശിൽ നിന്നുള്ള നേതാവാണ്. ഇവിടെ നിരവധി തവണ എംഎൽഎയും മന്ത്രിയുമായിട്ടുണ്ട്.
മീററ്റ് ലോക്സഭ മണ്ഡലത്തിൽ നിന്നും മത്സരിച്ച് വിജയിച്ച് 1978ലാണ് ലോക്സഭയിലെത്തിയത്. ആദ്യം ഇന്ദിരാഗാന്ധി മന്ത്രിസഭയിൽ മന്ത്രിയായി. രാജീവ് ഗാന്ധി മന്ത്രിസഭയിലും നിരവധി വകുപ്പുകളുടെ ചുമതല വഹിച്ചിട്ടുണ്ട്.

🔹കാർ പാർക്കിംഗിനെ ചൊല്ലിയുണ്ടായ വാക്കുതർക്കത്തെ തുടർന്ന് ജിം ഉടമയെ വാളുകൊണ്ട് ആക്രമിച്ച് ബിജെപി നേതാവിന്‍റെ ബന്ധു. ഇൻഡോറിലെ എയറോഡ്രോം മേഖലയിലാണ് സംഭവം.60 ഫീറ്റ് റോഡിൽ വച്ച് ആഷു വ്യാസ് എന്നയാൾക്ക് നേരെയാണ് ആക്രമണമുണ്ടായത്. ആഷു വ്യാസ് കൈകൊണ്ട് വാൾ തടഞ്ഞതിനെ തുടർന്ന് ഇയാൾക്ക് പരിക്കേറ്റു. എന്നാൽ ആരോഗ്യനില തൃപ്തികരമാണ്.
ബിജെപി നേതാവ് കമലേഷ് ഖണ്ഡേൽവാളിന്‍റെ ബന്ധു രാകേഷ് ഖണ്ഡേൽവാളാണ് ആക്രമണം നടത്തിയത്. സംഭവത്തിന്‍റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
ആഷു വ്യാസ് പോലീസിൽ പരാതി നൽകിയെങ്കിലും, സംഭവം ഒത്തുതീർപ്പാക്കാനും കേസ് രജിസ്റ്റർ ചെയ്യുന്നത് ഒഴിവാക്കാനും രാഷ്ട്രീയ ഇടപെടലുണ്ടായതായി റിപ്പോർട്ടുണ്ട്. സംഭവം ഗൗരവമായി എടുക്കുന്നുണ്ടെന്നും ക്രമസമാധാനം ഉറപ്പാക്കാൻ വിശദമായ അന്വേഷണം ആരംഭിച്ചിട്ടുണ്ടെന്നും പോലീസ് പറഞ്ഞു.

🔹ബംഗാളില്‍ വോട്ടര്‍ പട്ടികയില്‍നിന്ന് പുറത്തായത് 90 ലക്ഷത്തിലേറെ വോട്ടര്‍മാര്‍. തിരഞ്ഞെടുപ്പ് കമ്മിഷന്‍ പട്ടിക പുറത്തുവിട്ടപ്പോഴാണ് അന്തിമ കണക്കുകള്‍ പുറത്തുവന്നത. 22,163 വോട്ടര്‍മാരുടെ കാര്യത്തില്‍ ഇനിയും തീരുമാനമെടുക്കാനുണ്ടെന്നും കമ്മിഷന്‍.

🔹മണിപ്പൂരിലെ ബിഷ്ണുപൂര്‍ ജില്ലയില്‍ റോക്കറ്റ് ആക്രമണത്തില്‍ രണ്ടു കുട്ടികള്‍ കൊല്ലപ്പെടുകയും അമ്മയ്ക്കു പരിക്കേല്‍ക്കുകയും ചെയ്തു. മണിപ്പൂരിലെ അഞ്ചു ജില്ലകളില്‍ മൊബൈല്‍ ഇന്റര്‍നെറ്റ് സേവനങ്ങള്‍ മൂന്നു ദിവസത്തേക്ക് റദ്ദാക്കി. ബിഷ്ണുപൂരില്‍ കര്‍ഫ്യൂ ഏര്‍പ്പെടുത്തിയിട്ടുണ്ട്.

🔹മഹാരാഷ്ട്രയിലെ നാസിക്കില്‍ ഇടവഴിയിലൂടെ സഞ്ചരിച്ച കാര്‍ കിണറ്റില്‍ വീണ് ആറു കുട്ടികളടക്കം ഒന്‍പതു പേര്‍ മരിച്ചു. കോച്ചിംഗ് ക്ലാസ് കഴിഞ്ഞ് മടങ്ങിയ സംഘമാണ് അപകടത്തില്‍പ്പെട്ടത്. റോഡരികില്‍ മൂടാതെ കിടന്ന കിണറിലേക്കാണു കാര്‍ മറിഞ്ഞത്.

🔹ഹോര്‍മുസ് കടലിടുക്കിനു സമീപമുള്ള ഇറാന്റെ തന്ത്രപ്രധാനമായ എണ്ണക്കയറ്റുമതി കേന്ദ്രമായ ഖാര്‍ഗ് ഐലന്‍ഡില്‍ യുഎസ് സൈന്യത്തിന്റെ ബോംബാക്രമണം. ഇറാന്റെ എണ്ണക്കയറ്റുമതിയുടെ 90 ശതമാനവും കൈകാര്യം ചെയ്യുന്ന ഈ ദ്വീപിലെ അമ്പതിലധികം പോയിന്റുകളിലാണ് അമേരിക്കന്‍ പോര്‍വിമാനങ്ങള്‍ ആഞ്ഞടിച്ചത്.

🔹സമാധാന കരാറില്‍ ഒപ്പിട്ടില്ലെങ്കില്‍ ഇന്നു രാത്രി ഒരു നാഗരികത തന്നെ ഇല്ലാതാക്കുമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ട്രൂത്ത് സോഷ്യലില്‍ പങ്കുവച്ച കുറിപ്പിലാണ് ഈ ഭീഷണി. അമേരിക്കന്‍ വൈസ് പ്രസിഡന്റ് ജെ ഡി വാന്‍സും സമാനമായ ഭീഷണി മുഴക്കി. ഇതേസമയം, യുഎസുമായി ഇനി ഒരു ചര്‍ച്ചയും ഇല്ലെന്ന് ഇറാന്‍. ഇറാനിലുള്ള ഇന്ത്യക്കാര്‍ രണ്ടു ദിവസം പുറത്തിറങ്ങരുതെന്ന് ഇന്ത്യന്‍ എംബസി ആവശ്യപ്പെട്ടു.

🔹ഐപിഎല്ലില്‍ രാജസ്ഥാന്‍ റോയല്‍സിന് 27 റണ്ണുകളുടെ വിജയം. 11 ഓവറില്‍ രാജസ്ഥാന്‍ റോയല്‍സ് 150 റണ്‍സ് നേടിയപ്പോള്‍ മുംബൈക്ക് 123 റണ്‍സ് നേടാനേ കഴിഞ്ഞുള്ളൂ. ഗുവാഹത്തി, ബര്‍സപര ക്രിക്കറ്റ് സ്റ്റേഡിയത്തില്‍ മഴയെ തുടര്‍ന്ന് മത്സരം 11 ഓവറാക്കി ചുരുക്കിയിരുന്നു. പിന്നാലെ ടോസ് നഷ്ടപ്പെട്ട് ബാറ്റിംഗിനെത്തിയ രാജസ്ഥാന്‍ റോയല്‍സിനെ യശസ്വി ജയ്‌സ്വാളിന്റെ (32 പന്തില്‍ പുറത്താവാതെ 77) അര്‍ധ സെഞ്ചുറിയാണ് കൂറ്റന്‍ സ്‌കോറിലേക്ക് നയിച്ചത്. 14 പന്തില്‍ 39 റണ്‍സെടുത്ത വൈഭവ് സൂര്യവംശിയും രാജസ്ഥാന്റെ വിജയത്തില്‍ നിര്‍ണായക പങ്കു വഹിച്ചു.

🔹മുന്‍ ക്യാപ്റ്റന്‍ തമീം ഇഖ്ബാലിനെ ബംഗ്ലാദേശ് ക്രിക്കറ്റ് ബോര്‍ഡിന്റെ പ്രസിഡന്റായി നിയമിച്ചു. അമിനുല്‍ ഇസ്ലാമിന്റെ നേതൃത്വത്തിലുള്ള ഡയറക്ടര്‍ ബോര്‍ഡ് പിരിച്ചുവിട്ടതിനെ തുടര്‍ന്നാണ് ഈ നടപടി.

🔹തിരുവനന്തപുരം വെഞ്ഞാറമൂട് കൂട്ടക്കൊലക്കേസ് പ്രമേയമാക്കി നിര്‍മിച്ചതെന്ന് ആരോപിക്കപ്പെടുന്ന ‘കാലം പറഞ്ഞ കഥ’എന്ന സിനിമയ്ക്കു വിലക്കില്ല.സിനിമയുടെ റിലീസ് തടയണമെന്ന ഹര്‍ജി ഹൈക്കോടതി തള്ളി. കേസിലെ ഏക പ്രതിയായ അഫാന്‍റെ അച്ഛൻ സമര്‍പ്പിച്ച ഹര്‍ജിയാണു ജസ്റ്റീസ് ബെച്ചു കുര്യന്‍ തോമസ് തള്ളിയത്.കേസിന്‍റെ വിചാരണയെ സിനിമ സ്വാധീനിച്ചേക്കുമെന്ന് ചൂണ്ടിക്കാട്ടിയായിരുന്നു ഹര്‍ജി. സിനിമയിലൂടെ കുടുംബത്തെ തിരിച്ചറിയാന്‍ ഇടയായാല്‍ അത് അപകീര്‍ത്തികരമാകുമെന്നും ഹര്‍ജിക്കാരന്‍ വാദിച്ചു. ഒരു സിനിമ എങ്ങനെയാണു നിഷ്പക്ഷമായ വിചാരണയെ ബാധിക്കുകയെന്ന് കോടതി ചോദിച്ചു. മിക്ക സിനിമകളും യഥാര്‍ഥ സംഭവങ്ങളില്‍നിന്നു പ്രചോദനം ഉള്‍ക്കൊണ്ടതാകാമെന്നും നിരീക്ഷിച്ചു.
സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ റിവൈസിംഗ് കമ്മിറ്റിയുടെ പരിശോധനയ്ക്കുശേഷം ചിത്രത്തിന് യു/എ സര്‍ട്ടിഫിക്കറ്റ് നല്‍കിയിരുന്നു. സിനിമ റിലീസ് ചെയ്യുന്നത് വിചാരണയെ ബാധിക്കില്ലെന്നും പ്രമേയം വ്യത്യസ്തമാണെന്നും സെന്‍സര്‍ ബോര്‍ഡും അറിയിച്ചിരുന്നു.

🔹ഒരിടവേളയ്ക്ക് ശേഷം മലയാള സിനിമാസ്വാദകരുടെ കണ്ണും മനവും നിറച്ച സിനിമയായി മാറിയിരിക്കുകയാണ് ‘വാഴ 2’. ഒരുകൂട്ടം സോഷ്യല്‍ മീഡിയ താരങ്ങള്‍ക്കൊപ്പം സീനിയര്‍ താരങ്ങളും ഒന്നിച്ചെത്തി ഞെട്ടിച്ച ചിത്രം ബോക്‌സ് ഓഫീസില്‍ വന്‍ തേരോട്ടമാണ് സൃഷ്ടിച്ചിരിക്കുന്നത്. ആദ്യദിനം കേരളത്തില്‍ നിന്നുമാത്രം 5 കോടിയിലധികം രൂപ നേടിയ ചിത്രം അഞ്ചാം ദിനം എത്തുമ്പോള്‍, ആഗോളതലത്തില്‍ 100 കോടി രൂപയുടെ അടുത്തേക്ക് കുതിക്കുന്നു. വാഴ 2ന്റെ അണിയറപ്രവര്‍ത്തകര്‍ നല്‍കിയ വിവരം പ്രകാരം ചിത്രം 80 കോടി രൂപ ആഗോള തലത്തില്‍ നേടി. റിലീസ് ചെയ്ത് വെറും അഞ്ച് ദിവസത്തിലാണ് ചിത്രത്തിന്റെ ഈ നേട്ടം. അധികം വൈകാതെ വാഴ 2, 100 കോടി ക്ലബ്ബിലും ഇടം നേടുമെന്നാണ് ട്രാക്കര്‍മാരുടെ വിലയിരുത്തല്‍. അങ്ങനെയെങ്കില്‍ 2026ലെ രണ്ടാമത്തെ 100 കോടി ക്ലബ്ബാകും വാഴ 2. ആട് 3 ആണ് ഈ വര്‍ഷം ആദ്യം 100 കോടി രൂപ നേടിയത്. അഞ്ച് ദിവസത്തില്‍ 33.95 കോടി രൂപയാണ് കേരളത്തില്‍ നിന്നു നേടിയിരിക്കുന്നത്.

🔹2016ല്‍ പുറത്തിറങ്ങിയ തന്റെ കന്നി ചിത്രം ‘ഹാപ്പി വെഡ്ഡിങ്ങി’ന് രണ്ടാംഭാഗം പ്രഖ്യാപിച്ച് സംവിധായകന്‍ ഒമര്‍ ലുലു. ആദ്യഭാഗത്തിന്റെ അതേ ഴോണറില്‍ തന്നെയൊരുങ്ങുന്ന ചിത്രം ഉടന്‍ വരുമെന്ന് ഒമര്‍ ലുലു സാമൂഹികമാധ്യമങ്ങള്‍ വഴി അറിയിച്ചു. പിന്നീട് ആആറ് സിനിമകള്‍ സംവിധാനം ചെയ്തെങ്കിലും, ഒമര്‍ ലുലുവിന്റെ കരിയര്‍ ബെസ്റ്റ് എന്ന് വിശേഷിപ്പക്കപ്പെട്ട ചിത്രമാണ് ‘ഹാപ്പി വെഡ്ഡിങ്’. സിജു വില്‍സണ്‍, ഷറഫുദ്ദീന്‍, സൗബിന്‍ ഷാഹിര്‍ എന്നിവരായിരുന്നു ‘ഹാപ്പി വെഡ്ഡിങ്ങി’ലെ പ്രധാന താരങ്ങള്‍. മനീഷ് കെ.സിയും പ്രനീഷും ചേര്‍ന്നെഴുതിയ ചിത്രം നിര്‍മിച്ചത് നാസര്‍ അലിയായിരുന്നു. സിനു സിദ്ധാര്‍ഥ് ഛായാഗ്രാഹകനായ ചിത്രത്തിന് അരുണ്‍ മുരളീധരന്‍ സംഗീതവും വിമല്‍ ടി.കെ. പശ്ചാത്തലസംഗീതവുമൊരുക്കി. ദൃശ്യ രഘുനാഥ് ആയിരുന്നു ചിത്രത്തില്‍ നായികയായെത്തിയത്. അനു സിത്താര, ഗ്രേസ് ആന്റണി, മെറീന മൈക്കിള്‍ എന്നിവരും ചിത്രത്തില്‍ വേഷമിട്ടു.

💦 ഗുരുജിയുടെ വാക്കുകൾ

‘ജീവിതത്തിൽ വായിച്ച ഏറ്റവും നല്ല പുസ്തകം അമ്മയാണെങ്കിൽ, അത് വായിക്കാൻ തിരി കെടാത്തത്ര വെളിച്ചം പകർന്നു തന്നത് അച്ഛനാണ് ” എന്ന് പറഞ്ഞു കേട്ട ഒരു വാചകമുണ്ട്. ഇരുട്ടുമൂടിയ ജീവിതത്തിലെ ഇടനാഴികളിലൂടെ നടന്നു പോകേണ്ടി വരുമ്പോൾ വഴികാട്ടാനായി തെളിഞ്ഞു കത്തുന്ന ഒരു മെഴുകുതിരിയായി അച്ഛനും അച്ഛൻറെ ഓർമ്മകളും എപ്പോഴും നമ്മോടൊപ്പം ഉണ്ടാകും. നമ്മുടെ ജീവിത ഘട്ടത്തിൽ ഉടനീളം തെറ്റുകൾ ഉണ്ടാവുമ്പോഴെല്ലാം നേർവഴി പറഞ്ഞുതരാനും ഒരു ചെറിയ കുട്ടിക്ക് സംഭവിച്ച പോലെ അതിനെ ക്ഷമയോടെ ഏറ്റുവാങ്ങാനും അച്ഛനുണ്ടാകും. ഓരോ പ്രതിസന്ധികൾ ജീവിതത്തെ വരിഞ്ഞുമുറുക്കി ചുഴറ്റിയുമ്പോഴും ഒരു സുഹൃത്തിന് എന്ന പോലെ അച്ഛൻ പകർന്നു നൽകിയ പിന്തുണയും പ്രചോദനവുമൊക്കെ, ആ പാതയിൽ ഉടനീളം ഒരിക്കലും കെട്ടുപോകാതെ പ്രകാശിക്കുന്ന വെളിച്ചമായി നമുക്ക് മുന്നിൽ എന്നും നിലനിൽക്കും.

തയ്യാറാക്കിയത്: കപിൽ ശങ്കർ

16 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 08 | ബുധൻ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

“ഇസ്രയേലിൽ എനിക്ക് 99 ശതമാനം ജനപ്രീതിയുണ്ട്, മത്സരിച്ചാൽ പ്രധാനമന്ത്രി വരെ ആകും”: ഡോണൾഡ് ട്രംപ്

ദേശീയ ഭീകരവാദ വിരുദ്ധ ദിനം . (രാജീവ് ഗാന്ധിയുടെ ഓർമ്മയിൽ) ✍️അഫ്സൽ ബഷീർ തൃക്കോമല

ആരാണ് ഞാൻ….? (കവിത) ✍ ഉദയനാരായണൻ

1 COMMENT

LEAVE A REPLY Cancel reply

Most Popular

‘സേതുമാധവൻ വീണ്ടും എത്തുന്നു’: കിരീടം ഡോൾബി ഓട്ടോമോസിൽ 4K ദൃശ്യഭംഗിയിൽ റീ റിലീസ്

പിറന്നാൾ ദിനത്തിൽ ലാലേട്ടന്റെ സർപ്രൈസ്; ബോക്‌സോഫീസ് പിടിച്ചടക്കാൻ ദൃശ്യം 3 ഇന്ന് റിലീസ് ചെയ്യും

സംസ്ഥാനത്തു അടുത്ത 3 മണിക്കൂറിൽ ഇടിമിന്നലോട് കൂടിയ മഴയ്ക്ക് സാധ്യത: 6 ജില്ലകളിൽ യെല്ലോ അലേർട്ട്

Recent Comments

EDITOR PICKS

‘സേതുമാധവൻ വീണ്ടും എത്തുന്നു’: കിരീടം ഡോൾബി ഓട്ടോമോസിൽ 4K ദൃശ്യഭംഗിയിൽ റീ റിലീസ്

പിറന്നാൾ ദിനത്തിൽ ലാലേട്ടന്റെ സർപ്രൈസ്; ബോക്‌സോഫീസ് പിടിച്ചടക്കാൻ ദൃശ്യം 3 ഇന്ന് റിലീസ് ചെയ്യും

POPULAR POSTS

‘അപകടകാരികളായ തെരുവ് നായ്ക്കളെ കൊല്ലാം’: തെരുവുനായ കേസിൽ കർശന ഉത്തരവുമായി സുപ്രീംകോടതി

ഇന്ത്യൻ കമ്പനിയിൽ അസിസ്റ്റൻ്റ് ലോക്കോപൈലറ്റുമാരുടെ ഒഴിവിലേക്ക് വിജ്ഞാപനം പ്രസിദ്ധീകരിച്ചു

59 വർഷത്തിന് ശേഷം തമിഴ്‌നാട്ടിൽ കോൺഗ്രസിന് രണ്ടു മന്ത്രിമാർ

POPULAR CATEGORY

ABOUT US

FOLLOW US