മലയാള സാഹിത്യകാരി ജിസ ജോസ് എഴുതിയ ശ്രദ്ധേയമായ ഒരു കുറ്റാന്വേഷണ നോവലാണ് ‘ബ്ലൂ ബെറീസ്’. മനുഷ്യമനസ്സിലെ നിഗൂഢതകളിലൂടെയും കവിതയുടെ ലോകത്തിലൂടെയും സഞ്ചരിക്കുന്ന ഒരു വ്യത്യസ്തമായ വായനാനുഭവമാണിത്.
ബ്ലൂ ബെറീസ് ബേക്കറിയിലെ സ്റ്റെല്ല എന്ന ജീവനക്കാരിയിൽ കൂടിയാണ് നോവൽ മുന്നോട്ട് പോകുന്നത്. വളരെ പണ്ട്കാലം മുതൽ കേക്ക് ന് പ്രസിദ്ധമായ ഷോപ്പ് ആണ്..കേക്ക് ഷോപ്പിലേക്ക് ഒരു ദിവസം ഓർഡർ ലഭിക്കുന്നു. എന്നത്തേതിൽ നിന്നും വ്യത്യസ്തമായി ആ കേക്കിൽ എഴുതാൻ ഒരു സ്ത്രീ കുറിച്ച് തന്ന വരികളാണ് അത്ഭുതപ്പെടുത്തിയത്.
തൊരുദത് ന്റെ സീത എന്ന കവിതയിലെ വരികളായ “ആൻഡ് മെൽറ്റസ് ദ പിക്ച്ചർ ഫ്രം ദയർ സൈറ്റ് എവേ
യെറ്റ് ഷാൽ ദേ ഡ്രീം ഓഫ് ഇറ്റ് അൺടിൽ ദ ഡേ
വെൻ ഷാൽ ദോസ് ചിൽഡ്രൻ ബൈ ദയർ മദർസ് സൈഡ് ”
സഹോദരങ്ങളുടെ പുനഃസമാഗമത്തിന്റെ ഭാഗമായി തയ്യാറാക്കിയ കേക്കിൽ എഴുതാനായി ഉപയോഗിച്ച ഈ വിഷാദപൂർണ്ണമായ കവിതയെ ചുറ്റിപ്പറ്റിയാണ് കഥ മുന്നേറുന്നത്. എന്നാൽ കേക്ക് വാങ്ങി പോകും വഴി ഓർഡർ തന്ന സ്ത്രീ കൊല്ലപ്പെടുകയും അതിന്റെ ഭാഗമായി ഷോപ്പിലെ ജീവനക്കാരായ സ്റ്റെല്ലയ്ക്കും ടിസയ്ക്കും ജോലി നഷ്ടമാകുകയും ചെയ്യുന്നു.ഇതിന്റെ സത്യാവസ്ഥ അറിയാനായി ഇവരുടെ കൂടെ സുഹാന എന്ന പത്രപ്രവർത്തക കൂടി ചേരുമ്പോൾ കഥ പുതിയൊരു വഴിത്തിരിവിലേക്ക് എത്തുന്നു. കവിതയും കൊലപാതകവും തമ്മിലുള്ള ബന്ധം അന്വേഷിച്ച് ഈ മൂന്ന് പെൺകുട്ടികൾ നടത്തുന്ന യാത്രയാണ് നോവലിന്റെ ഇതിവൃത്തം.
ബ്ലൂ ബെറീസ് എന്ന നോവൽ, പേരിൽ ഒരു മധുരം സൂക്ഷിച്ചിരുന്നാലും ഉള്ളടക്കത്തിൽ മനുഷ്യജീവിതത്തിന്റെ കയ്പും ഏകാന്തതയും ബന്ധങ്ങളുടെ പൊളിച്ചെഴുത്തുമാണ് അവതരിപ്പിക്കുന്നത്. നോവലിലെ ഓരോ അധ്യായവും വായനക്കാരനെ വെറും കഥയിലൂടെ മാത്രമല്ല, മനുഷ്യ മനസ്സിന്റെ അടർന്നുകിടക്കുന്ന വികാരങ്ങളിലൂടെ കൂടി യാത്ര ചെയ്യിക്കുന്നു.
ഈ ഭാഗത്ത് എഴുത്തുകാരൻ സമൂഹത്തിന്റെ മാറിയ മുഖവും മനുഷ്യബന്ധങ്ങളിലെ അകൽച്ചയും വളരെ തീവ്രമായി അവതരിപ്പിക്കുന്നു. പഴയ കാലത്തെ കൂട്ടായ്മകളും സ്നേഹബന്ധങ്ങളും ഇന്നത്തെ സ്വാർത്ഥ ജീവിതശൈലിയിൽ എങ്ങനെ നഷ്ടപ്പെടുന്നു എന്നത് വേദനയോടെ രേഖപ്പെടുത്തുന്നു. കുടുംബബന്ധങ്ങൾ പോലും യാന്ത്രികമാകുന്ന കാലത്തിന്റെ യാഥാർത്ഥ്യം ഇവിടെ വ്യക്തമായി കാണാം.
എഴുത്തിന്റെ പ്രധാന പ്രത്യേകത അതിന്റെ ലാളിത്യമാണ്. അലങ്കാരപദങ്ങളുടെ അമിതഭാരം ഇല്ലാതെ സാധാരണ ജീവിതകാഴ്ചകൾ പോലും വായനക്കാരന്റെ ഹൃദയത്തെ സ്പർശിക്കുന്ന തരത്തിൽ അവതരിപ്പിച്ചിരിക്കുന്നു. ഓരോ വരിയിലും ഒരു നിശ്ശബ്ദ വേദനയും, ഓർമ്മകളുടെ മങ്ങലുമുണ്ട്.
പ്രത്യേകിച്ച് “കുറെ നൊമ്പരങ്ങളുടെ കൂട്ടന്വേഷണമാണ് ബ്ലൂബെറീസ്” എന്ന നോവലിന്റെ ആത്മാവിനെ തന്നെ തുറന്നുകാട്ടുന്നു. മനുഷ്യന്റെ ഉള്ളിലെ മുറിവുകളും നഷ്ടബോധങ്ങളും സമൂഹത്തിന്റെ മാറ്റങ്ങളോടുള്ള പ്രതിഷേധവും ഈ കൃതിയിൽ ശക്തമായി പ്രതിഫലിക്കുന്നു.
ബ്ലൂ ബെറീസ് ഒരു സാധാരണ നോവൽമാത്രമല്ല.. അത് ഇന്നത്തെ മനുഷ്യജീവിതത്തിന്റെ ഒറ്റപ്പെടലുകളെ ചോദ്യം ചെയ്യുന്ന ഒരു സാമൂഹിക രേഖപത്രമാണ്. വായിച്ചു തീർന്നിട്ടും കഥാപാത്രങ്ങളും അവരുടെ വേദനകളും മനസ്സിൽ നീണ്ടുനിൽക്കും. സാഹിത്യത്തിന്റെ ആഴം ആസ്വദിക്കാൻ ഇഷ്ടപ്പെടുന്നവർക്ക് ഈ കൃതി ഒരു മികച്ച വായനാനുഭവമാകും
.
സാധാരണ ക്രൈം നോവലുകളിൽ കാണുന്ന അമിതമായ അക്രമങ്ങളോ രക്തച്ചൊരിച്ചിലുകളോ ഇല്ലാതെ, വളരെ സ്വാഭാവികതയോടെയും ശാന്തതയോടെയുമാണ് കഥ മുന്നേറുന്നത്. ജീവിതത്തിന്റെ സന്തോഷങ്ങൾ കേക്കിന്റെ പുറംപാളി പോലെ മനോഹരമാണെങ്കിലും, അതിന്റെ ഉൾഭാഗം കയ്പു നിറഞ്ഞതായിരിക്കാം എന്ന തത്ത്വചിന്ത ഈ നോവലിൽ ഉടനീളം കാണാം. കവിതയും ജീവിതവും തമ്മിലുള്ള ഇഴയടുപ്പം മനോഹരമായി ഇതിൽ വിവരിക്കുന്നുണ്ട്.സാധാരണ കുറ്റാന്വേഷണ കഥകളിൽ നിന്നും വ്യത്യസ്തമായി, മനശാസ്ത്രപരമായ അന്വേഷണങ്ങൾക്ക് പ്രാധാന്യം നൽകുന്ന ഒരു നോവൽ തേടുന്നവർക്ക് തീർച്ചയായും വായിച്ചിരിക്കേണ്ട ഒന്നാണ് ബ്ലൂ ബെറീസ്.
