തിരുവന്തപുരം: സംസ്ഥാനത്ത് പ്ലസ് വൺ അഡ്മിഷന് വേണ്ടിയുള്ള ഓൺലൈൻ രജിസ്ട്രേഷൻ നാളെ (മെയ് 16) ആരംഭിക്കും. റിസൾട്ട് പ്രഖ്യാപിച്ച് ഒരാഴ്ച്ചക്ക് ശേഷമാണ് പ്ലസ് വൺ അഡ്മിഷൻ നടപടിക്രമങ്ങൾ ആരംഭിക്കുന്നത്.
https://hscap.kerala.gov.in/ എന്ന വെബ്സൈറ്റിലൂടെയാണ് ഏകജാലക സംവിധാനം വഴി അഡ്മിഷൻ പ്രക്രിയകൾ നടക്കുക. അഡ്മിഷനുമായ ബന്ധപ്പെട്ട വിവരങ്ങൾ അടങ്ങിയ പ്രോസ്പെക്ടസ് HSCAP വെബ്സൈറ്റിൽ പ്രസിദ്ധീകരിച്ചിട്ടുണ്ട്.
കേരള സിലബസ് എസ്എസ്എൽസി, സിബിഎസ്ഇ, ഐസിഎസ്ഇ, ടിഎച്ച്എസ്എൽസി എന്നിങ്ങനെയുള്ള സ്കീമുകളിൽ റെഗുലറായി പഠനം പൂർത്തിയാക്കിയ വിദ്യാർത്ഥികൾ അഡ്മിഷന് അർഹരാണ്. അതോടൊപ്പം മറ്റു സംസ്ഥാനങ്ങളിൽ നിന്നും രാജ്യങ്ങളിൽ നിന്നുമെല്ലാം റെഗുലറായി പത്താം ക്ലാസിന് തുല്യമായ പരീക്ഷ പാസായവർക്കും അഡ്മിഷന് നേടാൻ സാധിക്കുമെന്ന് പ്രോസ്പെക്ടസിൽ വ്യക്തമാക്കുന്നു.
മുൻവർഷങ്ങളിലേത് പോലെ തന്നെ https://hscap.kerala.gov.in/ എന്ന വെബ്സൈറ്റിൽ പൂർണ്ണമായും ഓൺലൈനായാണ് അപേക്ഷ സമർപ്പിക്കേണ്ടത്. സ്വന്തമായി ഇൻ്റർനെറ്റ് സൗകര്യമില്ലാത്ത വിദ്യാർഥികൾക്ക് പഠിച്ചിരുന്ന ഹൈസ്കൂളിലെ കമ്പ്യൂട്ടർ ലാബ് അല്ലെങ്കിൽ പ്രദേശത്തുള്ള സർക്കാർ/എയ്ഡഡ് ഹയർസെക്കൻ്ററി സ്കൂളുകളിൽ പോയി അവിടെയുള്ള കമ്പ്യൂട്ടർ ലാബ് സൗകര്യങ്ങൾ ഉപയോഗപ്പെടുത്താം.
http://www.admission.dge.kerala.gov.in/ എന്ന ഹയർസെക്കണ്ടറി/വൊക്കേഷണൽ ഹയർ സെക്കണ്ടറി അഡ്മിഷൻ പോർട്ടലിൽ “Click for Higher Secondary Admission’ എന്ന ഓപ്ഷനിൽ ക്ലിക്ക് ചെയ്താലും HSCP സൈറ്റിലേക്ക് എത്താനാകും. പിന്നീട് കാണുന്ന CREATE CANDIDATE LOGIN-SWS എന്ന ഓപ്ഷൻ തെരഞ്ഞെടുത്ത് കൊണ്ട് ലോഗിൻ ചെയ്യാൻ സാധിക്കും. അതിന് ശേഷം ക്യാൻഡിഡേറ്റ് ലോഗിനിലെ Apply Online എന്ന ലിങ്കിലൂടെ അപേക്ഷ പൂർത്തിയാക്കാൻ സാധിക്കും.
അപേക്ഷ സമർപ്പിക്കുന്നതിനും സമർപ്പിച്ച അപേക്ഷയിലെ വിവരങ്ങൾ പരിശോധിക്കുന്നതിനും പ്ലസ് വൺ അഡ്മിഷനുമായി ബന്ധപ്പെട്ട് വിദ്യാർഥികൾക്കുണ്ടാകുന്ന സംശയങ്ങൾ പരിഹരിക്കുന്നതിനുമെല്ലാം സ്കൂളുകളിൽ ഹെൽപ് ഡെസ്കുകൾ പ്രവർത്തിക്കും.
മെയിൻ ഘട്ടം രജിസ്ട്രേഷൻ ആരംഭിക്കുന്നത് – 2024 മെയ് 16
രജിസ്ട്രേഷൻ അവസാനിക്കുന്നത് – 2024 മെയ് 25
ട്രയൽ അലോട്ട്മെൻ്റ് – 2024 മെയ് 29
ആദ്യ അലോട്ട്മെൻ്റ് – 2024 ജൂൺ 5
മെയിൻ ഘട്ടം അവസാനിക്കുന്നത് – 2024 ജൂൺ 16
ക്ലാസുകൾ തുടങ്ങുന്നത് – 2024 ജൂൺ 24
മെറിറ്റ് ക്വാട്ട സപ്ലിമെൻ്ററി ഘട്ടം ജൂലൈ 2ന് തുടങ്ങി ജൂലൈ 31ന് അവസാനിക്കും.
സ്പോർട്സ് ക്വാട്ട മുഖ്യഘട്ടം മെയ് 22 മുതൽ ജൂൺ 19 വരെയും സപ്ലിമെൻ്ററി ഘട്ടം ജൂൺ 22 മുതൽ ജൂലൈ 1 വരെ നടക്കും.
കമ്മ്യൂണിറ്റി ക്വാട്ട മുഖ്യ ഘട്ടം ജൂൺ 2-ന് തുടങ്ങി ജൂൺ 12 വരെയും സപ്ലിമെൻ്ററി ഘട്ടം ജൂൺ 24-ന് തുടങ്ങി ജൂലൈ 1 വരെയുമാണ്.
