റിയാദ്: സൗദി അറേബ്യയിലെ വിമാനത്താവളങ്ങള്‍ക്ക് നേരെ ഹൂത്തികള്‍ നടത്തിയ ഭീകരാക്രമണങ്ങളില്‍ ഇതുവരെ 19 പേര് കൊല്ലപ്പെട്ടു. റിയാദ്, അബ്ഹ വിമാനത്താവളങ്ങളെ ലക്ഷ്യമിട്ട ആക്രമണങ്ങളില്‍ 364 പേര്‍ക്ക് പരിക്കേറ്റതായും സൗദി സഖ്യസേന വക്താവ് തുര്‍ക്കി അല്‍ മാലിക്കി അറിയിച്ചു. വിശുദ്ധ നഗരങ്ങളായ മക്കയെയും മദീനയെയും ലക്ഷ്യമിട്ടും ഹൂത്തികള്‍ ഭീകരാക്രമണത്തിന് ശ്രമിച്ചത് അത്യന്തം നീചമാണെന്നും അദ്ദേഹം പറഞ്ഞു
സൗദി വിമാനത്താവളങ്ങള്‍ക്ക് നേരെ ഹൂത്തികള്‍ നടത്തിയ ക്രൂരമായ ആക്രമണങ്ങളില്‍ 19 പേരുടെ ജീവനാണ് നഷ്ടമായത്. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ഉണ്ടായ ആക്രമണത്തില്‍ 17 പേര് കൊല്ലപ്പെടുകയും 333 പേര്‍ക്ക് പരിക്കേല്‍ക്കുകയും ചെയ്തു. അബ്ഹ വിമാനത്താവളത്തില്‍ ഉണ്ടായ ആക്രമണത്തില്‍ 3 പേര് കൊല്ലപ്പെടുകയും 28 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. ഈ മാസം ആദ്യം മുതല്‍ റിയാദ് വിമാനത്താവളത്തിന് നേരെ മാത്രം 20 ആക്രമണങ്ങളാണ് ഹൂത്തികള്‍ നടത്തിയത്. തിരക്കേറിയ സമയത്ത് നടന്ന ഈ ആക്രമണങ്ങള്‍ യാത്രക്കാരുടെയും തീര്‍ത്ഥാടകരുടെയും ജീവന്‍ അപകടത്തിലാക്കി.
വിശുദ്ധ നഗരങ്ങളായ മക്കയ്ക്കും മദീനയ്ക്കും നേരെ ഹൂത്തികള്‍ നടത്തിയ ആക്രമണ ശ്രമങ്ങള്‍ അത്യന്തം നീചമാണെന്ന് സഖ്യസേന വക്താവ് പറഞ്ഞു. അയല്‍രാജ്യങ്ങളുടെ സഹായത്തോടെ ലഭിച്ച ഡ്രോണുകളും ബാല്ലിസ്റ്റിക് മിസൈലുകളും ഉപയോഗിച്ചാണ് ഹൂത്തികള്‍ ആക്രമണം നടത്തുന്നത്. സനാ, സആദ, അംറാന്‍ എന്നീ മലനിരകളിലാണ് ഹൂത്തികള്‍ പ്രധാനമായും ആയുധങ്ങള്‍ സൂക്ഷിച്ചിരിക്കുന്നത്. ഈ ഭീകര ശൃംഖല തകര്‍ക്കാന്‍ സഖ്യസേന ശക്തമായ തിരിച്ചടി നല്‍കി വരികയാണ്. ഇതിനകം ഹൂത്തികളുടെ 127 ആയുധ കേന്ദ്രങ്ങള്‍ സൗദി സഖ്യസേന തകര്‍ത്തതായും തുര്‍ക്കി അല്‍ മാലികി പറഞ്ഞു.
