അമ്മ മലയാളം (കവിത) ✍രചന – ജയന്തി ശശി

അമൃതിൻ മധുരമൂട്ടുമമ്മമലയാളമേ
നിൻ ദിവ്യപ്രപഞ്ചത്തിലെൻ്റെ ജന്മപുണ്യം!
സുജനമാനസ്സേ നിൻ വീണാതന്ത്രിയിൽ
നിത്യവസന്തമായ് മീട്ടിയുണർത്തുന്ന
സുപദം ചൊല്ലിത്തരികയെൻ ഹൃത്തിലായ്..

സുപർണിയിൽ സന്തതം തൊഴുതുണർന്ന്
സുഷമമലരിൻസുഗന്ധം പൊഴിക്കുമ്പോൾ
അകതാരിലറിവിന്നക്ഷരങ്ങൾ പകരുന്ന
ഹൃദിഭാഷയാം പെറ്റമ്മയാണെൻ്റെ മലയാളം..

മലയാളഭാഷ തൻ സുധാരസത്താൽ
മനമേറെനെയ്തിട്ടസുവർണനിമിഷം
മറക്കുവാനാകുമോ ശ്രേഷ്ഠഭാഷയാം-
പെറ്റമ്മയെ,ഋതുക്കളെത്രകൊഴിഞ്ഞാലും..

മാതൃത്വത്തിൻസ്തന്യം ചുരത്തും മഹനീയമാം
മലയാളമേ,മർത്യ ചിന്തയിലുദിക്കുന്ന
മാസ്മരികമഞ്ജുഭാവനയാൽ കാവ്യങ്ങൾ
എഴുതപ്പെടുന്നുമഹത്വമാം മലയാളഭാഷ.!

രചന – ജയന്തി ശശി✍