തിരുവനന്തപുരം,–പ്രശസ്ത ചലച്ചിത്ര നിര്മ്മാതാവും സംവിധായകനുമായ അരോമ മണി ( 65 )അന്തരിച്ചു.തിരുവനന്തപുരത്ത് കുന്നുകുഴിയിലെ വസതിയിലായിരുന്നു അന്ത്യം. അരോമ മൂവി ഇന്റര്നാഷണല്, സുനിത പ്രൊഡക്ഷന്സ് എന്നീ ബാനറുകളില് അറുപതിലധികം സിനിമകള് നിര്മിച്ചു.
മലയാളി സിനിമയിൽ മറക്കാത്ത ബാനര് നെയിമുകളാണ് സുനിത പ്രൊഡക്ഷന്സും അരോമ മൂവി ഇന്റര്നാഷണലും. 1977 ല് റിലീസ് ചെയ്ത, മധു നായകനായ ധീരസമീരെ യമുനാതീരെ ആയിരുന്നു അരോമ മണിയുടെ ആദ്യ നിര്മ്മാണ സംരംഭം.ഇരുപതാം നൂറ്റാണ്ട്, ഒരു സിബിഐ ഡയറിക്കുറിപ്പ്, ഓഗസ്റ്റ് 1, ജാഗ്രത, കോട്ടയം കുഞ്ഞച്ചന്, ധ്രുവം, കമ്മിഷണര്, ബാലേട്ടന് തുടങ്ങി നിരവധി ചിത്രങ്ങൾ എല്ലാം അരോമ മണിയുടേതായിരുന്നു . ‘ആ ദിവസം’ എന്ന ചിത്രത്തിന്റെ സംവിധാനം എം മണി ആയിരുന്നു.
എം മണിയുടെ നിര്മ്മാണത്തില് പുറത്തിറങ്ങിയ തിങ്കളാഴ്ച നല്ല ദിവസം എന്ന ചിത്രത്തിന് മികച്ച മലയാള ചിത്രത്തിനുള്ള ദേശീയ അവാര്ഡും ദൂരെ ദൂരെ ഒരു കൂട് കൂട്ടാം എന്ന ചിത്രത്തിന് മറ്റ് സാമൂഹിക വിഷയങ്ങളെക്കുറിച്ചുള്ള മികച്ച ചിത്രത്തിനുള്ള ദേശീയ അവാര്ഡും ലഭിച്ചു.
