വാഹന അപകടത്തിന് ഇരയായവർക്ക് നഷ്ടപരിഹാരം നൽകുന്ന കൃത്രിമ അവയവങ്ങളുടെ ചെലവും അവയുടെ പരിപാലനത്തിനുള്ള തുകയും ഉൾപ്പെടുത്തണമെന്ന് സുപ്രീംകോടതി വിധിച്ചു. അംഗവൈകല്യം സംഭവിച്ചവർക്ക് ചലനശേഷിയും ആത്മവിശ്വാസവും അന്തസ്സും വീണ്ടെടുക്കാൻ ഇത്തരം ഉപകരണങ്ങൾ അത്യന്താപേക്ഷിതമാണെന്ന് കോടതി കണ്ടെത്തി.
അവയവം നഷ്ടപ്പെട്ട ഒരാളുടെ ജീവിതത്തിൽ കൃത്രിമ അവയവം എന്നത് അവിഭാജ്യ ഘടകമാണെന്ന് നിരീക്ഷിച്ച കോടതി, പരിക്കേറ്റ വ്യക്തിയെ അപകടത്തിൽ പെടുമ്പോൾ അവർ ഏത് അവസ്ഥയിലായിരുന്നോ, ആ അവസ്ഥയിലേക്ക് പരമാവധി എത്തിക്കാൻ ലക്ഷ്യമിട്ടുള്ളതാകണം നഷ്ടപരിഹാരമെന്നും വ്യക്തമാക്കി.
2007ലെ ഒരു ബസ് അപകടവുമായി ബന്ധപ്പെട്ട അപ്പീൽ പരിഗണിക്കവെ, ജസ്റ്റിസ് ജെ.ബി. പർദിവാല, ജസ്റ്റിസ് കെ.വി. വിശ്വനാഥൻ എന്നിവരടങ്ങിയ ബെഞ്ചാണ് ഈ നിരീക്ഷണം നടത്തിയത്. അപകടത്തിൽ വലതുകാൽ മുറിച്ചുമാറ്റേണ്ടി വന്നിട്ടും, മോട്ടോർ ആക്‌സിഡൻ്റ് ക്ലെയിംസ് ട്രൈബ്യൂണലോ ഹൈക്കോടതിയോ കൃത്രിമ അവയവത്തിനുള്ള ചിലവുകൾക്കായി ചൂണ്ടിക്കാട്ടി.
മോട്ടോർ വാഹന നിയമത്തിലെ സെക്ഷൻ 168 പ്രകാരം ‘നീതിയുക്തമായ നഷ്ടപരിഹാരം’ നൽകാൻ ബാധ്യതയുണ്ടെന്ന് കോടതി ഊന്നിപ്പറഞ്ഞു. ഇത് ന്യായവും യുക്തിസഹവും പരിക്കേറ്റ വ്യക്തിയുടെ യഥാർത്ഥ ആവശ്യങ്ങൾ കണ്ടറിഞ്ഞുള്ളതുമാകണമെന്ന് കോടതി നിരീക്ഷിച്ചു.
