മീൻ പിടിക്കുന്ന വീഡിയോകൾ കൊണ്ട് സോഷ്യൽ മീഡിയയിൽ വൈറലായ ആ ‘വള്ളക്കാരൻ’ ഒടുവിൽ പോലീസിന്റെ വലയിലായി! വെട്ടിക്കാട്ടുമുക്ക് പാലത്തിന് സമീപം പുഴയോരത്തിരുന്ന് ചൂണ്ടയിട്ട് മീൻ പിടിക്കുന്നത് വെറുമൊരു ഷോ മാത്രമായിരുന്നു. വള്ളത്തിനടിയിലെ രഹസ്യ അറയിലുണ്ടായിരുന്നത് കിലോക്കണക്കിന് കഞ്ചാവാണ്.
വെട്ടിക്കാട്ടുമുക്ക് സ്വദേശി അഭിജിത്ത് സാബുവാണ് (29) തലയോലപ്പറമ്പ് പോലീസിന്റെയും ഡൻസാഫ് സംഘത്തിന്റെയും തകർപ്പൻ നീക്കത്തിലൂടെ പിടിയിലായത്. ഇൻസ്റ്റഗ്രാമിലും യൂട്യൂബിലും മീൻപിടുത്തക്കാരനായി വേഷമിട്ട ഇയാൾ, യഥാർത്ഥത്തിൽ ആ വള്ളം ഉപയോഗിച്ചിരുന്നത് കഞ്ചാവ് കച്ചവടത്തിനുള്ള മൊബൈൽ ഷോപ്പായിട്ടായിരുന്നു. പത്തോളം പൊതികളിലായി സൂക്ഷിച്ചിരുന്ന 580 ഗ്രാം കഞ്ചാവാണ് പോലീസ് കണ്ടെടുത്തത്.
ആവശ്യക്കാർക്ക് വള്ളത്തിനടുത്തേക്ക് മീൻ വാങ്ങാനെന്ന വ്യാജേന എത്താനും കൈമാറാനും എളുപ്പമായതിനാലാണ് ഇയാൾ പുഴ കേന്ദ്രീകരിച്ച് കച്ചവടം നടത്തിയത്. എന്നാൽ ജില്ലാ പോലീസ് മേധാവിക്ക് കിട്ടിയ ആ ‘സീക്രട്ട്’ വിവരത്തിൽ എല്ലാം പൊളിഞ്ഞു. ഞായറാഴ്ച രാവിലെ വള്ളത്തിലേക്ക് കയറാൻ വന്ന അഭിജിത്തിനെ പോലീസ് വളയുകയായിരുന്നു. പെൺകുട്ടികളടക്കമുള്ള വലിയൊരു സൗഹൃദവലയത്തിലേക്ക് കഞ്ചാവ് എത്തിച്ചിരുന്നതായി ഇയാൾ സമ്മതിച്ചിട്ടുണ്ട്. ഇനി ബാക്കി കാര്യങ്ങൾ കപ്പിത്താനും വള്ളവും സ്റ്റേഷനിൽ ഇരുന്ന് പറയും.
