ശ്രീകുമാർ
ഫോമാ നേതാക്കളും ഡെലിഗേറ്റുകളും പ്രവര്‍ത്തകരും സുഹൃത്തുക്കളും ഒരുമിക്കുന്ന സംഗമം കേവലം ഒരു ഔപചാരിക പരിപാടിയാകാതെ, പഴയ സൗഹൃദങ്ങള്‍ പുതുക്കാനും പുതിയ ബന്ധങ്ങള്‍ വളര്‍ത്താനും പരസ്പരം ആശയങ്ങള്‍ പങ്കുവയ്ക്കാനുമുള്ള ഹൃദ്യമായ മീറ്റ് ആന്റ് ഗ്രീറ്റ് വേദിയായിരിക്കും.
സംഗമത്തിന്റെ പ്രധാന ഭാഗമായി ”ഫോമയുടെ ഇന്നലെ, ഇന്ന്, നാളെ” എന്ന ആശയത്തെ മുന്‍നിര്‍ത്തിയുള്ള നേതൃസംവാദവും നടക്കും. ഫോമയുടെ രൂപീകരണം മുതല്‍ സംഘടന പിന്നിട്ട വഴികള്‍, വിവിധ കാലഘട്ടങ്ങളിലെ നേട്ടങ്ങളും അനുഭവങ്ങളും, നിലവിലെ പ്രവര്‍ത്തനങ്ങള്‍, ഭാവിയില്‍ സംഘടന കൈവരിക്കേണ്ട ലക്ഷ്യങ്ങള്‍ എന്നിവയെക്കുറിച്ച് നേതാക്കള്‍ അഭിപ്രായങ്ങളും നിര്‍ദേശങ്ങളും പങ്കുവയ്ക്കും.
ഫോമയെ വിവിധ കാലഘട്ടങ്ങളില്‍ നയിച്ച മുന്‍ പ്രസിഡന്റുമാരും മുന്‍ എക്സിക്യൂട്ടീവ് അംഗങ്ങളും സംഗമത്തില്‍ പങ്കെടുക്കുന്നത് പരിപാടിയുടെ പ്രത്യേകതയായിരിക്കും. സംഘടനയുടെ വളര്‍ച്ചയ്ക്ക് സാക്ഷികളായ മുതിര്‍ന്ന നേതാക്കളുടെ അനുഭവങ്ങളും പുതിയ തലമുറയുടെ കാഴ്ചപ്പാടുകളും ഒരേ വേദിയില്‍ സംഗമിക്കുന്നതിലൂടെ ഫോമയുടെ ഭാവിയിലേക്കുള്ള ക്രിയാത്മകമായ ആശയവിനിമയത്തിന് അവസരമൊരുങ്ങും.
ഓര്‍മ്മകള്‍ പങ്കിടാം, സൗഹൃദം പുതുക്കാം, അനുഭവങ്ങള്‍ കൈമാറാം, നാളത്തെ ഫോമയെക്കുറിച്ച് ഒരുമിച്ച് സംസാരിക്കാം എന്ന സന്ദേശത്തോടെയാണ് സൗഹൃദ സംഗമം സംഘടിപ്പിക്കുന്നത്.
ഫോമാ നേതാക്കളെയും ഡെലിഗേറ്റുകളെയും പ്രവര്‍ത്തകരെയും സുഹൃത്തുക്കളെയും ഒക്ടോബര്‍ 16-ന് വൈകിട്ട് 5 മണിക്ക് ചിക്കാഗോയില്‍ നടക്കുന്ന ”ഫോമാ സൗഹൃദ സംഗമം 2026”-ലേക്ക് സംഘടനയുടെ നാഷണല്‍ പ്രസിഡന്റ് ബേബി മണക്കുന്നേലും പരിപാടിക്ക് ചുക്കാന്‍ പിടിക്കുന്ന സെന്‍ട്രല്‍ റീജിയന്‍ ആര്‍.വി.പി ജോണ്‍സണ്‍ കണ്ണൂക്കാടനും ഹൃദയപൂര്‍വ്വം സ്വാഗതം ചെയ്യുന്നു.
