📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 15 | ബുധൻ ✍ കപിൽ ശങ്കർ

🔹സമൃദ്ധിയുടെയും ഐശ്വര്യത്തിന്റെയും പുതുവർഷാഘോഷമായ വിഷു, മലയാളികൾ ഇന്ന് (2026 ഏപ്രിൽ 15) ആഘോഷിക്കുകയാണ്. മലയാളി മനസ്സിന്റെ എല്ലാ വായനക്കാർക്കും വിഷു ആശംസകൾ.

കേരളത്തിന്റെ കാർഷിക സംസ്കാരവുമായി അടുത്തുനിൽക്കുന്നതാണ് ഈ ഉത്സവം.
വിഷു ആഘോഷങ്ങളിലെ പ്രധാന ചടങ്ങുകൾ താഴെ പറയുന്നവയാണ്:
* വിഷുക്കണി: പുലർച്ചെ ഐശ്വര്യപൂർണ്ണമായ വസ്തുക്കൾ കണ്ടുകൊണ്ട് ഉണരുന്നതാണ് ഏറ്റവും പ്രധാനപ്പെട്ട ചടങ്ങ്. നിലവിളക്ക് കൊളുത്തി അതിനു മുന്നിൽ കൊന്നപ്പൂവ്, സ്വർണ്ണം, കണ്ണാടി (വാൽക്കണ്ണാടി), നെല്ല്, അരിയളന്ന പറ, പച്ചക്കറികൾ, ഫലങ്ങൾ തുടങ്ങിയവ വച്ചാണ് കണി ഒരുക്കുന്നത്.
* വിഷുക്കൈനീട്ടം: കുടുംബത്തിലെ മുതിർന്നവർ കുട്ടികൾക്കും മറ്റുള്ളവർക്കും നാണയങ്ങൾ കൈനീട്ടമായി നൽകുന്ന രീതിയാണിത്. ഇത് വരും വർഷത്തേക്കുള്ള ഐശ്വര്യത്തിന്റെ പ്രതീകമായി കരുതപ്പെടുന്നു.
* വിഷുസദ്യ: ഉപ്പും എരിവും പുളിയും മധുരവും കലർന്ന വൈവിധ്യമാർന്ന വിഭവങ്ങളടങ്ങിയ വിഭവസമൃദ്ധമായ സദ്യയാണ് ഈ ദിവസത്തിന്റെ മറ്റൊരു പ്രത്യേകത. കഞ്ഞി, പുഴുക്ക്, വിഷുക്കട്ട തുടങ്ങിയവയും പ്രാദേശികമായി പ്രാധാന്യമുള്ളവയാണ്.
* മറ്റ് ആഘോഷങ്ങൾ: പുത്തൻ വസ്ത്രങ്ങൾ ധരിച്ചും (പുത്തൻകോടി), പടക്കങ്ങൾ പൊട്ടിച്ചും കുട്ടികളും മുതിർന്നവരും ഒരുപോലെ ആഘോഷങ്ങളിൽ പങ്കുചേരുന്നു
വിഷു എന്നാൽ ‘തുല്യമായത്’ എന്നാണ് അർത്ഥം. രാവും പകലും തുല്യമായ ദിവസം എന്നാണ് ഇതിലൂടെ അർത്ഥമാക്കുന്നത് . ശബരിമല, ഗുരുവായൂർ തുടങ്ങിയ പ്രമുഖ ക്ഷേത്രങ്ങളിൽ വിഷു പ്രമാണിച്ച് വൻ ഭക്തജനത്തിരക്കാണ് ഇന്ന് അനുഭവപ്പെടുന്നത്.

🔹ഏപ്രിൽ 15-ലെ മറ്റ് പ്രധാന ദിനാചരണങ്ങൾ:
* ലോക കലാദിനം (World Art Day): കലാകാരന്മാരെയും കലയെയും പ്രോത്സാഹിപ്പിക്കുന്നതിനായി ഏപ്രിൽ 15 ആഘോഷിക്കുന്നു.
* ബംഗാളി പുതുവർഷം (Poila Baisakh): ബംഗാളി കലണ്ടർ പ്രകാരം വർഷാരംഭം.
* ലോക സംസ്കാര ദിനം (Universal Day of Culture): സംസ്കാരത്തിന്റെയും കലയുടെയും സംരക്ഷണത്തിനായി (Roerich Pact-ന്റെ ഭാഗമായി) ആചരിക്കുന്നു.
* നാഷണൽ ടൈറ്റാനിക് അനുസ്മരണ ദിനം (National Titanic Remembrance Day): 1912 ഏപ്രിൽ 15-ന് ടൈറ്റാനിക് കപ്പൽ ദുരന്തത്തിൽ മരിച്ചവരെ ഓർമ്മിക്കുന്നു.
കൂടാതെ, അന്താരാഷ്ട്രതലത്തിൽ പല രാജ്യങ്ങളിലും ഏപ്രിൽ 15 നികുതി ദിനമായി (Tax Day) കണക്കാക്കാറുണ്ട്.

🔹വനിത സംവരണ ബില്ലും മണ്ഡല പുനര്‍നിര്‍ണയ ബില്ലും കേന്ദ്ര സര്‍ക്കാര്‍ എംപിമാര്‍ക്കു വിതരണം ചെയ്തു. ലോക്സഭാ സീറ്റുകളുടെ എണ്ണം 850 ആയി വര്‍ധിപ്പിക്കാനാണ് മണ്ഡല പുനര്‍നിര്‍ണയ ബില്ലിലെ നിര്‍ദേശം. പുനര്‍നിര്‍ണയത്തിന് സുപ്രീം കോടതി ജഡ്ജി അധ്യക്ഷായുള്ള കമ്മീഷനെ നിയമിക്കും. വര്‍ധിപ്പിക്കുന്ന മണ്ഡലങ്ങളില്‍ 35 എണ്ണം കേന്ദ്രഭരണ പ്രദേശങ്ങളില്‍നിന്നായിരിക്കും. ജനസംഖ്യക്ക് ആനുപാതികമായാണു മണ്ഡലങ്ങളുടെ എണ്ണമെന്നാണു സര്‍ക്കാര്‍ വാദം. എന്നാല്‍ ഉത്തരേന്ത്യന്‍ സംസ്ഥാനങ്ങള്‍ക്കു കൂടുതല്‍ മണ്ഡലങ്ങള്‍ അനുവദിക്കുമെന്നാണു പ്രതിപക്ഷത്തിന്റെ ആരോപണം. ലോക്സഭാ, നിയമസഭാ തലങ്ങളില്‍ 33 ശതമാനം സീറ്റുകള്‍ വനിതകള്‍ക്കായി സംവരണം ചെയ്യുന്നതാണു വനിതാ സംവരണ ബില്‍.

🔹സുപ്രീം കോടതിയിലെ സീനിയര്‍ അഭിഭാഷക ലിസ് മാത്യുവിനേയും ഹൈക്കോടതി അഭിഭാഷക എ.കെ. പ്രീതയെയും കേരള ഹൈക്കോടതി ജഡ്ജിമാരാക്കാന്‍ സുപ്രീം കോടതി കൊളീജിയം ശുപാര്‍ശചെയ്തു.

🔹വൈദ്യുതി ബോര്‍ഡിലെ ഓഫീസര്‍മാരുടെ സംഘടനകളുടെ അംഗീകാരത്തിനായി ഹിത പരിശോധന നടത്തണമെന്നാവശ്യപ്പെട്ട് ഹൈക്കോടതിയില്‍ ഹര്‍ജി. കേരള പവര്‍ ബോര്‍ഡ് ഓഫീസേഴ്സ് ഫെഡറേഷന്‍ പ്രസിഡന്റ് പി.ആര്‍. പോളാണ് ഹര്‍ജി നല്‍കിയത്. ഹര്‍ജി പരിഗണിച്ച ജസ്റ്റിസ് വിജു എബ്രഹാം, കെഎസ്ഇബിയോട് വിശദീകരണം തേടി. ആവശ്യമായ അംഗബലം ഇല്ലാതെയാണ് ഫെഡറേഷനിലെ ഒരു വിഭാഗത്തിന് അംഗീകാരം നല്‍കിയതെന്ന് ഹര്‍ജിയില്‍ ആരോപിക്കുന്നു.

🔹കണ്ണൂര്‍ അഞ്ചരക്കണ്ടി ഡെന്റല്‍ കോളേജ് വിദ്യാര്‍ത്ഥി നിതിന്‍രാജ് മരിച്ച സംഭവത്തില്‍ പ്രതിയായ ഡോ എം കെ റാമിനെ പുറത്താക്കുമെന്ന് കോളേജ് അധികൃതര്‍. അന്വേഷണത്തില്‍ പൊലീസ് വീഴ്ച ആരോപിച്ച് അഞ്ചരക്കണ്ടി ഡെന്റല്‍ കോളേജിലേക്ക് കെഎസ്യു – എംഎസ്എഫ് പ്രവര്‍ത്തകര്‍ പ്രതിഷേധ മാര്‍ച്ച് നടത്തി.

🔹നിതിന്‍ രാജ് ആത്മഹത്യ കേസില്‍ പ്രതിയായ ഡോ. റാമിന്റെ ക്ലിനിക്ക് ഡിവൈഎഫ്ഐ പ്രവര്‍ത്തകര്‍ പൂട്ടിയിട്ടു. പൊലീസ് ബാരിക്കേഡ് മറികടന്നെത്തിയ പ്രവര്‍ത്തകര്‍ ക്ലിനിക്കിന് മുന്നില്‍ കൊടിയും അംബേദ്കറിന്റെ ചിത്രവും സ്ഥാപിച്ചു. അതേസമയം, കേസിലെ പ്രതികളായ അധ്യാപകര്‍ ഒളിവിലാണ്.

🔹നിതിന്‍ രാജിന്റെ കുടുംബത്തിന് സിപിഎം വീടു നിര്‍മിച്ചു നല്‍കും. ഈ മാസം 19 ന് വൈകീട്ട് അഞ്ചിന് സിപിഎം സംസ്ഥാന സെക്രട്ടറി എം.വി ഗോവിന്ദന്‍ വീടിന് തറക്കല്ലിട്ട് നിര്‍മാണ പ്രവര്‍ത്തനം തുടങ്ങും. സിപിഎം ജില്ലാ സെക്രട്ടറി എ.എ റഹീം എംപി വ്യക്തമാക്കി.

🔹സംസ്ഥാനത്ത് വേനല്‍ ചൂട് കൂടുകയാണെന്നും വരും ദിവസങ്ങളില്‍ പാലക്കാട് 40 ഡിഗ്രി സെല്‍ഷ്യസ് വരെയും, കൊല്ലത്ത് 39 വരെയും താപനില ഉയരുമെന്ന് മുഖ്യമന്ത്രി പിണറായി വിജയന്‍. പുറത്തിറങ്ങുന്നവര്‍ കുട, തൊപ്പി, സണ്‍ഗ്ലാസ് എന്നിവ നിര്‍ബന്ധമായും കരുതണം എന്നും മുഖ്യമന്ത്രി ഫേസ് ബുക്ക് പേജിലെ കുറിപ്പില്‍ ആവശ്യപ്പെട്ടു.

🔹ഇരിങ്ങാലക്കുട കൂടല്‍മാണിക്യം ക്ഷേത്രത്തില്‍ ജാതി വിവേചനം. തന്ത്രിമാരുടെ അഭിപ്രായം തള്ളി ദേവസ്വം റിക്രൂട്ട്മെന്റ് ബോര്‍ഡ് കഴകക്കാരനായി ഈഴവ പ്രതിനിധിയെ നിയമിച്ചതില്‍ പ്രതിഷേധിച്ച് പൂജാ കാര്യങ്ങളില്‍നിന്ന് അഞ്ചു തന്ത്രി കുടുംബങ്ങള്‍ വിട്ടുനില്‍ക്കുന്നു. ഉത്സവവുമായും ഇവര്‍ സഹകരിച്ചേക്കില്ല. ഈ മാസം 28 നാണ് ഉത്സവം കൊടിയേറുന്നത്.

🔹 തിരുവനന്തപുരം മലയിൻകീഴിൽ ദമ്പതികളെ ഒൻപതംഗ സംഘം മർദിച്ചതായി പരാതി. മലയം ചൂഴാറ്റുകോട്ട സ്വദേശികളായ അനീഷ് ഭാര്യ ശ്രീജ എന്നിവർക്കാണ് മർദനമേറ്റതായി പരാതിയുള്ളത്.ഏപ്രിൽ 11ന് ആയിരുന്നു സംഭവം നടന്നത്. ക്ഷേത്രോത്സവത്തിനിടെ ഒൻപതംഗ സംഘം അനീഷിനെ ക്രൂരമായി മർദിച്ചതായാണ് പരാതി. ഈ സമയം തട‍യാനെത്തിയ അനീഷിന്‍റെ ഭാര്യ ശ്രീജയ്ക്കും മർദനമേറ്റതായി പരാതിയിൽ പറയുന്നു.എന്നാൽ മർദനത്തിന്‍റെ കാരണം വ്യക്തമല്ല. ആക്രമണത്തിനിടെ അനീഷിന്‍റെ കഴുത്തിലുണ്ടായിരുന്ന അഞ്ചരപ്പവൻ മാലയും സംഘം പൊട്ടിച്ചെടുത്തതായി ആരോപണമുണ്ട്. അനീഷ് തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലാണ്.

🔹കോഴിക്കോട് ഈസ്റ്റ് മൂഴിക്കലില്‍ പതിനാറുകാരിയെ കൊന്ന് യുവാവ് ജീവനൊടുക്കിയ സംഭവത്തില്‍ അദ്നാന്‍ മരിച്ചത് ശ്വാസം മുട്ടിയാണെന്നാണ് പോസ്റ്റുമോര്‍ട്ടം റിപ്പോര്‍ട്ട്. അതേസമയം കഴുത്തില്‍ ഷാള്‍ മുറുക്കി ശ്വാസം മുട്ടിച്ചായിരുന്നു നസ്രിനയെ അദ്നാന്‍ കൊലപ്പെടുത്തിയത്. സംഭവത്തില്‍ പൊലീസ് കൂടുതല്‍ അന്വേഷണം നടത്തിവരികയാണ്.

🔹സംസ്ഥാനത്ത് കഴിഞ്ഞ വര്‍ഷം മുങ്ങിമരിച്ചത് 821 പേര്‍. കേരള ഫയര്‍ ആന്‍ഡ് റെസ്‌ക്യു സര്‍വീസിന്‍റെ കണക്കുകള്‍ പ്രകാരം ഇക്കാലയളവില്‍ ഏറ്റവും കൂടുതല്‍ മുങ്ങിമരണം റിപ്പോര്‍ട്ട് ചെയ്തത് എറണാകുളം ജില്ലയിലാണ്-157 പേർ. അതേസമയം, 2024 ല്‍ സംസ്ഥാനത്ത് ഏറ്റവും കുറവ് മുങ്ങിമരണം റിപ്പോര്‍ട്ട് ചെയ്തത് എറണാകുളത്തായിരുന്നു-18.

🔹മുങ്ങിമരണം സംബന്ധിച്ച കണക്കുകളില്‍ രണ്ടാം സ്ഥാനത്തുള്ളത് പാലക്കാടും മൂന്നാം സ്ഥാനത്ത് കൊല്ലവുമാണ്. ഇവിടങ്ങളിൽ യഥാക്രമം 109, 99 എന്നിങ്ങനെയാണ് മുങ്ങിമരണങ്ങൾ.തിരുവനന്തപുരത്ത് 2024ല്‍ ജലാശയത്തില്‍ 80 ജീവനാണ് പൊലിഞ്ഞതെങ്കില്‍ കഴിഞ്ഞ വര്‍ഷം ഒരു മരണം മാത്രമായിരുന്നു. മുങ്ങിമരിച്ചവരില്‍ ഏറെയും വിദ്യാര്‍ഥികളും യുവാക്കളുമാണ്. അവധിക്കാലത്ത് കടലില്‍ കുളിക്കാനിറങ്ങി തിരയില്‍പ്പെട്ട് ജീവന്‍ നഷ്ടമാകുന്നവരുടെ എണ്ണവും വര്‍ധിക്കുന്നുണ്ട്.സംസ്ഥാന ദുരന്തനിവാരണ അഥോറിറ്റി, കേരള വാട്ടര്‍ അഥോറിറ്റി, ഡാം സേഫ്റ്റി അഥോറിറ്റി, തദ്ദേശ സ്വയംഭരണ സ്ഥാപനങ്ങള്‍ ഉള്‍പ്പെടെ ബീച്ചുകളിലും പുഴകളിലെ കടവുകളിലും അപകട മുന്നറിയിപ്പ് ബോര്‍ഡുകള്‍ സ്ഥാപിച്ചിട്ടുണ്ടെങ്കിലും പലരും അതൊക്കെ അവഗണിച്ച് വെള്ളത്തിലേക്ക് ഇറങ്ങുന്നതാണു പലപ്പോഴും അപകടത്തിന് കാരണമാകുന്നത്.

🔹കർണാടകയിലെ ചിക്കമഗളുരുവിൽ അംബേദ്കർ ജയന്തി ഘോഷയാത്രയിലേക്ക് കാർ പാഞ്ഞു കയറി ഏഴുവയസുകാരിക്ക് ദാരുണാന്ത്യം. അപകടത്തിൽ ഏഴു പേർക്ക് പരിക്കേറ്റു. കാർ ഡ്രൈവർ മദ്യപിച്ചിരുന്നതാണ് അപകടകാരണമെന്ന് പോലീസ് പറയുന്നു. ഇയാളെ നാട്ടുകാർ പിടികൂടി തടഞ്ഞുവച്ചു. അതേസമയം, ഒപ്പമുണ്ടായിരുന്നയാൾ ഓടി രക്ഷപ്പെട്ടു. പരിക്കേറ്റവരെ ഹാസനിലെ ജില്ലാ ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമാണെന്നാണ് വിവരം. അപകടത്തെത്തുടർന്ന് ജില്ലാ ആശുപത്രിക്ക് മുന്നിൽ നാട്ടുകാർ പ്രതിഷേധം നടത്തി.

🔹മകളെ ശ്വാസംമുട്ടിച്ച് കൊലപ്പെടുത്തിയതിനു പിന്നാലെ അമ്മ ജീവനൊടുക്കി. ബംഗളൂരുവിൽ നടന്ന സംഭവത്തിൽ സുവർണ (40), 13 വയസുകാരിയായ മകൾ എന്നിവരുടെ മൃതദേഹങ്ങളാണ് വീട്ടിൽ നിന്ന് കണ്ടെത്തിയത്.അയൽക്കാർ വിവരം അറിയിച്ചതിനെ തുടർന്ന് പോലീസ് എത്തി പരിശോധന നടത്തിയപ്പോഴാണ് മൃതദേഹങ്ങൾ കണ്ടെത്തിയത്. സംഭവത്തിൽ രണ്ട് വ്യത്യസ്‌ത കേസുകൾ പോലീസ് രജിസ്‌റ്റർ ചെയ്‌തു. ഭാര്യ മകളെ കൊലപ്പെടുത്തിയെന്ന ഭർത്താവ് ചന്ദ്രശേഖറിന്‍റെ പരാതിയിലാണ് ഒരു കേസ് രജിസ്‌റ്റർ ചെയ്തത്. സുവർണയുടെ സഹോദരൻ മഞ്ജുനാഥ് നൽകിയ മറ്റൊരു പരാതിയിലും പോലീസ് കേസെടുത്തു. സംഭവത്തിൽ ദുരൂഹതയുണ്ടെന്നും അന്വേഷണം ആരംഭിച്ചെന്നും പോലീസ് പറഞ്ഞു.

🔹യു.എസ് പ്രസിഡന്റ് ഡൊണാള്‍ഡ് ട്രംപ് തന്നെ ഫോണില്‍ വിളിച്ചു നാല്‍പതു മിനിറ്റോളം സംസാരിച്ചെന്ന് പ്രധാനമന്ത്രി നരേന്ദ്ര മോദി. വിവിധ മേഖലകളില്‍ ഇരു രാജ്യങ്ങളും തമ്മിലുള്ള ഉഭയകക്ഷി സഹകരണത്തിലെ പുരോഗതി അവലോകനം ചെയ്തു. ഹോര്‍മുസ് കടലിടുക്ക് തുറക്കേണ്ടതിനെക്കുറിച്ചും മേഖലയിലെ സുരക്ഷയെക്കുറിച്ചും സംസാരിച്ചെന്നു മോദി എക്സില്‍ കുറിച്ചു.

🔹മണ്ഡല പുനര്‍നിര്‍ണയത്തില്‍ തമിഴ്നാടിന് അര്‍ഹമായത്രയും മണ്ഡലങ്ങള്‍ അനുവദിച്ചില്ലെങ്കില്‍ രാജ്യം ഇതുവരെ കണ്ടിട്ടില്ലാത്ത പ്രക്ഷോഭത്തിന് സാക്ഷ്യം വഹിക്കേണ്ടി വരുമെന്നു പ്രധാനമന്ത്രി നരേന്ദ്രമോദിയോട് തമിഴ്നാട് മുഖ്യമന്ത്രി എം.കെ സ്റ്റാലിന്‍. വടക്കേ ഇന്ത്യന്‍ സംസ്ഥാനങ്ങള്‍ക്ക് അനര്‍ഹമായ പ്രാധാന്യം നല്‍കി തമിഴ്നാടിന്റെ പദവി കുറയ്ക്കാന്‍ ശ്രമിച്ചാല്‍ പ്രതിരോധിക്കുമെന്ന് അദ്ദേഹം വ്യക്തമാക്കി.

🔹 യാത്രക്കിടെ ഛർദിക്കാനിറങ്ങിയ അമ്മയെയും മകനെയും കാത്തുനിൽക്കാതെ കെ.എസ്.ആർ.ടി.സി സ്വിഫ്റ്റ് ബസ് പോയതായി പരാതി. മൈസൂരുവിൽനിന്ന് ചങ്ങനാശേരിക്ക് കെ.എസ്.ആർ.ടി.സി ബസിൽ യാത്ര ചെയ്യുന്നതിനിടെയാണ് പ്രായമായ അമ്മക്ക് ഛർദിക്കാൻ രാത്രി 11.30ന് താമരശ്ശേരി ചുരത്തിലെ ഒമ്പതാം വളവിന് മുകളിൽ‍ വ്യൂ പോയന്റിൽ ബസ് നിർത്തിയത്. തുടർന്ന് അമ്മയും മകനും റോഡിൽ ഇറങ്ങി. 15 മിനിറ്റോളം ബസ് കാത്ത് നിന്നെങ്കിലും തിരിച്ചെത്താതിരുന്നതിനെ തുടർന്ന് ഇവരെ കയറ്റാതെ ബസ് യാത്ര തുടരുകയായിരുന്നു.

🔹പ്രധാനമന്ത്രി നരേന്ദ്ര മോദി തിരഞ്ഞെടുപ്പ് പ്രചാരണത്തിന്റെ ഭാഗമായി ഇന്നു നാഗര്‍കോവിലില്‍ റോഡ് ഷോ നടത്തും. തിരുവനന്തപുരം വിമാനത്താവളത്തില്‍ എത്തിയ ശേഷമാണ് പ്രധാനമന്ത്രി തമിഴ്നാട്ടിലേക്ക് പോകുന്നത്. അതിനാല്‍ തിരുവനന്തപുരത്തും ഗതാഗത നിയന്ത്രണമുണ്ട്. ഉച്ചയ്ക്ക് 11.30 മുതല്‍ രാത്രി ഏഴുവരെ നിയന്ത്രണങ്ങള്‍ ബാധകമായിരിക്കും.

🔹ദക്ഷിണ കൊറിയയിലെ ഇഞ്ചിയോണില്‍ മയക്കുമരുന്നു വ്യാപാരത്തില്‍നിന്ന് മകനുണ്ടാക്കിയ പണം വെളുപ്പിക്കാന്‍ സഹായിച്ച 90കാരിയായ അമ്മയ്ക്കു തടവുശിക്ഷ വിധിച്ച് കോടതി. ഒരു വര്‍ഷത്തെ തടവും മൂന്ന് കോടിയോളം രൂപ പിഴയുമാണു ശിക്ഷ വിധിച്ചത്.

🔹ഉത്തര്‍പ്രദേശിലെ കാണ്‍പൂര്‍ കേന്ദ്രീകരിച്ച് പ്രവര്‍ത്തിച്ചിരുന്ന വൃക്ക റാക്കറ്റ് സംഘത്തിലെ മുഖ്യസൂത്രധാരന്‍ രോഹിത് തിവാരി പിടിയില്‍. പന്ത്രണ്ടാം ക്ലാസ് വിദ്യാഭ്യാസമുള്ള ഇയാള്‍ മുപ്പതോളം ശസ്ത്രക്രിയകള്‍ നടത്തിയെന്നു പൊലീസ് കണ്ടെത്തി. ശസ്ത്രക്രിയകള്‍ നടത്തുന്നതിന്റെ ചിത്രങ്ങള്‍ പോലീസിനു ലഭിച്ചിട്ടുണ്ട്. രോഹിത് തിവാരിയെ പിടികൂടാന്‍ സഹായിക്കുന്നവര്‍ക്ക് 25,000 രൂപ പൊലീസ് പാരിതോഷികം പ്രഖ്യാപിച്ചിരുന്നു.

🔹വിവാഹ മോചനത്തിന് വിസമ്മതിച്ച ഭര്‍ത്താവിനെ വെടിവച്ച് കൊലപ്പെടുത്തിയ കേസില്‍ ഭാര്യയും കാമുകനും ഉള്‍പ്പെടെ അഞ്ചുപേര്‍ അറസ്റ്റിലായി. ഒഡിഷയിലെ ജാജ്പുര്‍ സ്വദേശിയായ സൗമ്യ രഞ്ജന്‍ സമാലി(23)നെ പിന്തുടര്‍ന്ന് കൊലപ്പെടുത്തിയ കേസിലാണ് ഭാര്യ ശുഭശ്രീ ബെഹ്റ(23), കാമുകന്‍ തപന്‍ ഖില്ലാര്‍(26), ഇയാളുടെ സഹോദരി പ്രിതിപ്രവ പ്രിയദര്‍ശിനി, സുരാജ്, അങ്കിത് എന്നിവരെ പൊലീസ് അറസ്റ്റ് ചെയ്തത്.

🔹ഛത്തീസ്ഗഢിലെ വേദാന്ത പവര്‍ പ്ലാന്റില്‍ ഉണ്ടായ അപകടത്തില്‍ 10 മരണം. ബോയിലര്‍ പൊട്ടിത്തെറിച്ചുണ്ടായ അപകടത്തില്‍ നാല്‍പതിലധികം പേര്‍ക്ക് പരിക്കേറ്റു. മരണസംഖ്യ ഉയര്‍ന്നേക്കാം. ഛത്തീസ്ഗഢിലെ സക്തി ജില്ലയിലെ സിംഗിതാരായ് ഗ്രാമത്തിലെ വേദാന്ത ലിമിറ്റഡിന്റെ പവര്‍ പ്ലാന്റിലാണ് സംഭവം.

🔹ഹോര്‍മൂസ് കടലിടുക്കു കടക്കാന്‍ ശ്രമിച്ച ആറു കപ്പലുകളെ മടക്കിയയച്ചെന്ന് അമേരിക്ക. ഹോര്‍മൂസിലും ഇറാനു ചുറ്റുമായി പതിനായിരം സൈനികരെ വിന്യസിച്ചിട്ടുണ്ട്. 12 പടക്കപ്പലുകളും 100 വിമാനങ്ങളും വിന്യസിച്ചിട്ടുണ്ടെന്നും യുഎസ് അവകാശപ്പെട്ടു. ഇതേസമയം, രണ്ടു ദിവസത്തിനകം വീണ്ടും ചര്‍ച്ച നടക്കുമെന്നു യുഎസ് പ്രസിഡന്റ് ഡൊണാള്‍ഡ് ട്രംപ്. ഉപരോധം തുടര്‍ന്നാല്‍ ഇറാന് പ്രതിദിനം നാലായിരം കോടി രൂപയുടെ നഷ്ടമുണ്ടാകുമെന്നാണു റിപ്പോര്‍ട്ട്.

🔹ഹോര്‍മൂസില്‍ അമേരിക്കയുടെ ഉപരോധ ഭീഷണി നടപ്പായില്ല. യുഎസ് യുദ്ധക്കപ്പലുകള്‍ക്കു മുന്നിലൂടെ ചൈനയുടേതടക്കം ഏഴു കപ്പലുകള്‍ ഹോര്‍മൂസ് കടലിടുക്കു കടന്നുപോയി. രണ്ടു കപ്പലുകള്‍ ഇറാനിയന്‍ തുറമുഖത്തു നങ്കൂരമിടുകയും ചെയ്തു. അമേരിക്കയുടെ നിലപാടിനു നാറ്റോ സഖ്യകക്ഷികളുടെ പിന്തുണയില്ല. ചൈനയും റഷ്യയും ഇറാനെ പിന്തുണയ്ക്കുകയും ചെയ്തു.

🔹2026 മാര്‍ച്ച് മാസത്തെ ഐസിസിയുടെ മികച്ച താരത്തിനുളളപുരസ്‌കാരം സഞ്ജു സാംസണ്. ഈ പുരസ്‌കാരം നേടുന്ന ആദ്യ മലയാളിയാണ് സഞ്ജു. ട്വന്റി 20 ലോകകപ്പിലെ മിന്നും പ്രകടനമാണ് സഞ്ജുവിനെ പുരസ്‌കാരത്തിന് അര്‍ഹനാക്കിയത്.

🔹ഐപിഎലില്‍ ചെന്നൈ സൂപ്പര്‍ കിംഗ്സിന് തുടര്‍ച്ചയായ രണ്ടാം ജയം. 48 റണ്‍സ് നേടി സഞ്ജു സാംസണ്‍ ഒരിക്കല്‍ കൂടി ടോപ് സ്‌കോററായ മത്സരത്തില്‍ കൊല്‍ക്കത്ത നൈറ്റ് റൈഡേഴ്സിനെ 32 റണ്‍സിനാണ് ചെന്നൈ തകര്‍ത്തത്. ആദ്യം ബാറ്റ് ചെയ്ത ചെന്നൈ ഉയര്‍ത്തിയ 193 റണ്‍സ് വിജയലക്ഷ്യം പിന്തുടര്‍ന്ന കൊല്‍ക്കത്തക്ക് ഒരു ഘട്ടത്തില്‍ പോലും വിജയപ്രതീക്ഷ ഉണര്‍ത്താനായില്ല. 20 ഓവറില്‍ ഏഴ് വിക്കറ്റ് നഷ്ടത്തില്‍ 160 റണ്‍സെടുക്കാനെ കൊല്‍ക്കത്തക്കായുള്ളു.

🔹ഷാജി കൈലാസ് സംവിധാനം ചെയ്ത് ജോജു ജോര്‍ജ് നായകനായി എത്തുന്ന കംപ്ലീറ്റ് ആക്ഷന്‍ ചിത്രമായ ‘വരവ്’ന്റെ സെക്കന്‍ഡ് ലുക്ക് പോസ്റ്റര്‍ പുറത്തിറങ്ങി. ജോജു ജോര്‍ജിന്റെ തീപാറും നോട്ടമുള്ള പോസ്റ്ററാണ് എത്തിയത്. മലയോര മേഖലയുടെ പശ്ചാത്തലത്തില്‍ കഥ പറയുന്ന ചിത്രത്തില്‍ പോളി എന്ന് വിളിപ്പേരുള്ള പോളച്ചന്‍ എന്ന കഥാപാത്രമായാണ് ജോജു ജോര്‍ജ് എത്തുന്നത്. പോളച്ചന്റെ ജീവിത പോരാട്ടങ്ങളും പ്രതികാരവും ഇഴ ചേര്‍ന്ന് നില്‍ക്കുന്ന കംപ്ലീറ്റ് ആക്ഷന്‍ ചിത്രമാണ് വരവ്. വാണി വിശ്വനാഥും ചിത്രത്തിലുണ്ട്. സ്റ്റണ്ട് മാസ്റ്റര്‍മാരുടെ ഒരു വലിയ നിര തന്നെയുണ്ട് ചിത്രത്തില്‍. സുകന്യ, മുരളി ഗോപി, അര്‍ജുന്‍ അശോകന്‍, ദീപക് പറമ്പോല്‍, ബാബുരാജ്, അസീസ് നെടുമങ്ങാട്, ബൈജു സന്തോഷ്, അഭിമന്യു തിലകന്‍, ബോബി കുര്യന്‍, അശ്വിന്‍ കുമാര്‍, ശ്രീജിത്ത് രവി എന്നിവരും ചിത്രത്തില്‍ പ്രധാന വേഷങ്ങളിലെത്തുന്നു.

💦 ഗുരുജിയുടെ വാക്കുകൾ

എന്തെങ്കിലും യഥാർത്ഥത്തിൽ അറിഞ്ഞു തുടങ്ങിയവർക്ക് മനസ്സിലാകും ഓരോ അറിവും ആരംഭം മാത്രമാണെന്ന്….
അറിവിന്റെ തുടക്കത്തിൽ തന്നെ യാത്ര അവസാനിപ്പിക്കരുത്…. അങ്ങനെയുള്ളവർ എല്ലാ അറിവുകളെയും നിഷേധിക്കുന്നവരാണ്.അറിവിനെ പിന്തുടരുന്നവരുടെയെല്ലാം അടിസ്ഥാനഭാവം എളിമയായിരിക്കും, ഇനിയും അറിയേണ്ടതിക്കുറിച്ചുള്ള ചിന്ത അവരെ വിനീതരാക്കും.ഉയർന്ന ലക്ഷ്യം, മനസ്സുവെച്ചുള്ള പ്രയത്നം, ബുദ്ധിപൂർവമായ നേതൃത്വം, സമർത്ഥമായ പ്രവർത്തനം, സമർപ്പണ ബുദ്ധി എന്നിവയെല്ലാം ഒത്തുചേരുന്നവരാണ് മികച്ച നേട്ടങ്ങൾ കൈവരിക്കുന്നത്.

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 15 | ബുധൻ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | നവംബർ 5 | വ്യാഴം | ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | നവംബർ 5 | വ്യാഴം | ✍️ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | നവംബർ 5 | വ്യാഴം | ✍️ ബേബി മാത്യു അടിമാലി

LEAVE A REPLY Cancel reply

Most Popular

കാണാതായ തന്റെ പ്രിയപ്പെട്ട തത്തയെ കണ്ടെത്താൻ ഒരു ലക്ഷം രൂപ പാരിതോഷികം പ്രഖ്യാപിച്ച് മുൻ അധ്യാപിക

കാലടി സർവകലാശാലയിലെ വിദ്യാർത്ഥികളുടെ ഹർജി സുപ്രീം കോടതി ഇന്ന് പരിഗണിക്കും

അമൽ നീരദിൻ്റെ ഏറ്റവും പുതിയ ചിത്രം ‘ബാച്ച്‌ലർ പാർട്ടി Deux’ ട്രെയിലർ പുറത്തിറങ്ങി

ജിഎന്‍എ-കെഎസ്ഇബി കരാറില്‍ വിശദീകരണവുമായി മുഖ്യമന്ത്രി വി ഡി സതീശന്‍

Recent Comments

EDITOR PICKS

കാണാതായ തന്റെ പ്രിയപ്പെട്ട തത്തയെ കണ്ടെത്താൻ ഒരു ലക്ഷം രൂപ പാരിതോഷികം പ്രഖ്യാപിച്ച് മുൻ അധ്യാപിക

കാലടി സർവകലാശാലയിലെ വിദ്യാർത്ഥികളുടെ ഹർജി സുപ്രീം കോടതി ഇന്ന് പരിഗണിക്കും

അമൽ നീരദിൻ്റെ ഏറ്റവും പുതിയ ചിത്രം ‘ബാച്ച്‌ലർ പാർട്ടി Deux’ ട്രെയിലർ പുറത്തിറങ്ങി

POPULAR POSTS

കാണാതായ തന്റെ പ്രിയപ്പെട്ട തത്തയെ കണ്ടെത്താൻ ഒരു ലക്ഷം രൂപ പാരിതോഷികം പ്രഖ്യാപിച്ച് മുൻ അധ്യാപിക

കർണാടകയിൽ ബസ് നിരക്കുകൾ കുത്തനെ ഉയർത്തുന്നു: നവംബർ 5 അർദ്ധരാത്രി മുതൽ പുതുക്കിയ നിരക്കുകൾ നിലവിൽ വരും

അഗ്നിവീറുകളുടെ സ്ഥിരനിയമനത്തില്‍ നിര്‍ണായക നീക്കവുമായി കേന്ദ്രസര്‍ക്കാര്‍

POPULAR CATEGORY

ABOUT US

FOLLOW US