📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 15 | ഞായർ ✍ കപിൽ ശങ്കർ

🔹ഇന്ത്യൻ ടാങ്കറുകൾ എൽപിജിയുമായി ഇറാന്‍റെ അനുമതിയോടെ ഹോർമുസ് കടലിടുക്ക് കടന്നുവെന്ന് സ്ഥിരീകരിച്ച് കേന്ദ്ര സർക്കാർ. ശിവാലിക്, നന്ദദേവി എന്നീ ടാങ്കറുകളാണ് 93000 മെട്രിക് ടൺ എൽപിജിയുമായി ഇന്ത്യയിലേക്ക് എത്തുന്നത്.കൂടുതൽ ടാങ്കറുകൾക്ക് അനുമതി കിട്ടാനായി ഇറാനുമായി ചർച്ച തുടരുമെന്നും കേന്ദ്രം വ്യക്തമാക്കി. ഇറാൻ പ്രസിഡന്‍റുമായി പ്രധാനമന്ത്രി നരേന്ദ്ര മോദി നടത്തിയ ചർച്ചയ്ക്ക് ശേഷമാണ് ഹോർമുസ് കടലിടുക്ക് കടക്കാൻ ഇന്ത്യൻ എൽപിജി ടാങ്കറുകൾക്ക് കഴിഞ്ഞതെന്നും കേന്ദ്രം അറിയിച്ചു.
ശിവാലിക്, നന്ദദേവി എന്നീ ടാങ്കറുകൾ ഇന്നലെ അർധ രാത്രിക്ക് ശേഷം ഹോർമുസ് കടന്നുവെന്നാണ് സർക്കാർ സ്ഥിരീകരിച്ചത്. ഇവ 16നും 17നും ഇന്ത്യൻ തീരത്തെത്തുമെന്നാണ് കേന്ദ്രം വ്യക്തമാക്കുന്നത്. കടൽ മൈനുകൾ അടക്കം നീക്കാൻ ഇറാൻ സഹകരിച്ചെന്നാണ് സൂചന.ഖത്തറിലെ റാസ് ലഫ്ഫാൻ മേഖലയിൽ നിന്നാണ് ഈ ടാങ്കറുകൾ എൽപിജി നിറച്ചത്. ഇനിയും 22 ഇന്ത്യൻ എണ്ണ കപ്പലുകൾ ഹോർമുസ് കടലിടുക്കിന്‍റെ പടിഞ്ഞാറുണ്ട്. ഇവയ്ക്ക് സുരക്ഷിത പാത കിട്ടുന്നതിനും ചർച്ചകൾ നടക്കുകയാണ്. പരിഭ്രാന്തരായി പാചകവാതകം ബുക്ക് ചെയ്യരുതെന്ന നിർദേശം കേന്ദ്രം വീണ്ടും നൽകി.

🔹പാചക വാതക ക്ഷാമത്തിനൊപ്പം ഡീസൽ ലഭ്യതയിലും ഉണ്ടായിരിക്കുന്ന കുറവ് മത്സ്യബന്ധന മേഖലയെ പ്രതിസന്ധിയിലേക്ക് നയിക്കുന്നു. ദിവസങ്ങളായി തീരദേശ മേഖലയിൽ പാചക വാതക സിലിണ്ടറുകളുടെ വിതരണം വൈകുന്നതും ഡീസൽ ലഭ്യതയിൽ ഉണ്ടായിരിക്കുന്ന തടസവും മത്സ്യത്തൊഴിലാളികളെയും ബന്ധപ്പെട്ട വ്യാപാരികളെയും ആശങ്കയിലാക്കിയിരിക്കുകയാണ്.മത്സ്യബന്ധന ബോട്ടുകളും വള്ളങ്ങളും പ്രധാനമായും ആശ്രയിക്കുന്നത് ഡീസലിനെയാണ്. എന്നാൽ പമ്പുകളിൽ ഡീസൽ ലഭ്യത കുറഞ്ഞു വന്നതിനാൽ വിതരണത്തിൽ താമസം നേരിടുന്നതോടെ ബോട്ടുകളിൽ പലതും കടലിലേക്ക് പോകാൻ കഴിയാത്ത അവസ്ഥയാണുള്ളത്. മത്സ്യബന്ധനത്തിന് പോ കാൻ കഴിയാത്തിനാൽ തൊഴിലാളികളുടെ വരുമാനമില്ലാതായി.തീരപ്രദേശങ്ങളിലെ പല ചെറിയ ഹോട്ടലുകൾ, ഭക്ഷണശാലകൾ എന്നിവ പാചക വാതക ക്ഷാമം മൂലം പ്രവർത്തനം താൽക്കാലികമായി നിർത്തിയിരിക്കുകയാണ്. മത്സ്യങ്ങൾക്ക് വേണ്ടത്ര വില കിട്ടാത്ത സ്ഥിതി മത്സ്യത്തൊഴിലാളികളെ കൂടുതൽ കഷ്ടത്തിലാക്കുന്നു. ഇപ്പോഴത്തെ സാഹചര്യത്തിൽ മത്സ്യ അനുബന്ധ മേഖലകളിലും തിരിച്ചടി ഉണ്ടാകുന്നുണ്ട്.തീരദേശ മേഖലയിലെ ആയിരക്കണക്കിന് തൊഴിലാളികളുടെ ഉപജീവനത്തെ ബാധിക്കുന്ന സാഹചര്യമാണ് ഇപ്പോൾ നിലനിൽക്കുന്നത്. എൽ പി ജിയുടെ കടുത്ത ക്ഷാമത്തെ തുടർന്ന് മത്സ്യബന്ധന യാനങ്ങളിൽ മണ്ണെണ്ണ, ഡീസൽ സ്റ്റൗവുകൾ വാങ്ങുകയാണ് ഭൂരിഭാഗം പേരും. പാചക വാതകവും ഡീസലും അടിയന്തിരമായി ലഭ്യമാക്കാൻ സർക്കാർ നടപടി സ്വീകരിക്കണമെന്ന് മത്സ്യത്തൊഴിലാളികളും സംഘടനകളും വ്യാപാരികളും ആവശ്യപ്പെടുന്നു.

🔹കോട്ടയത്ത് ദീര്‍ഘനാളായി ശോചനീയാവസ്ഥയില്‍ കിടക്കുന്ന പ്രാപ്പുഴ പാലം പുനര്‍നിര്‍മിക്കുന്നു. അയ്മനം പഞ്ചായത്തിലെ 16-ാം വാര്‍ഡിലാണു താത്കാലികമായി നിര്‍മിച്ച പ്രാപ്പുഴ പാലം. നാളുകളായി പാലത്തിലുള്ള തടിപ്പലകകള്‍ തകര്‍ന്ന് ഏതും നിമിഷവും തകര്‍ന്നുവീഴാവുന്ന സ്ഥിതിയിലായിരുന്നു. സ്‌കൂള്‍ വിദ്യാര്‍ഥികള്‍ അടക്കമുള്ളവര്‍ പാലത്തിലൂടെ ഭീതിയോടെയാണു സഞ്ചരിക്കുന്നത്.
പുതിയ പാലം നിര്‍മിക്കുക എന്നത് പ്രദേശത്തെ നൂറിലധികം കുടുംബങ്ങളുടെ കാലങ്ങളായുള്ള ആവശ്യമായിരുന്നു. പുതിയ പാലം വരുന്നതോടെ പ്രാപ്പുഴ നിവാസികളുടെ നീണ്ട കാത്തിരിപ്പിനാണു വിരാമമാകുന്നത്. കാറുകള്‍ വരെ കടന്നുപോകാന്‍ സാധിക്കുന്ന രീതിയിലുള്ള വീതിയുള്ള കോണ്‍ക്രീറ്റ് പാലമാണ് നിര്‍മിക്കാന്‍ ധാരണയിലായിരിക്കുന്നതെന്ന് അയ്മനം പഞ്ചായത്ത് വൈസ് പ്രസിഡന്‍റ് അനു ശിവപ്രസാദ് പറഞ്ഞു.
ശോച്യാവസ്ഥയിലായ പ്രാപ്പുഴ പാലം പുനരുദ്ധരിക്കണമെന്നാവശ്യപ്പെട്ട് 16-ാം വാര്‍ഡംഗവും വൈസ് പ്രസിഡന്‍റുമായ അനു ശിവപ്രസാദ് പി.ടി. ഉഷ എംപിക്കു നൽകിയ നിവേദനത്തിന്‍റെ അടിസ്ഥാനത്തിലാണു പുതിയ കോണ്‍ക്രീറ്റ് പാലം നിര്‍മിക്കാന്‍ അനുമതി ലഭിച്ചത്.പുതിയ പാലം നിര്‍മിക്കുന്നതുമായി ബന്ധപ്പെട്ടു സാങ്കേതിക കാര്യങ്ങള്‍ പൂര്‍ത്തിയാക്കി പ്രാദേശിക വികസന ഫണ്ട് ഉപയോഗപ്പെടുത്തി തുടര്‍നടപടികള്‍ സ്വീകരിക്കുമെന്ന് ബിജെപി സംസ്ഥാന അധ്യക്ഷന് അയച്ച കത്തില്‍ പി.ടി. ഉഷ എംപി വ്യക്തമാക്കിയിട്ടുണ്ട്. വൈസ് പ്രസിഡന്‍റ് അനു ശിവപ്രസാദ്, പഞ്ചായത്ത് പ്രസിഡന്‍റ് ബിന്ദു ഹരികുമാര്‍, മറ്റു ബിജെപി നേതാക്കളുടെയും ഇടപെടലിനെത്തുടര്‍ന്നാണ് പാലം യാഥാര്‍ഥ്യമാകുന്നത്.

🔹പ്ലസ് ടു വിദ്യാർഥിനിയെ യുവാവ് തട്ടിക്കൊണ്ടു പോയെന്നു പരാതി. കുണ്ടറ തെറ്റിക്കുന്ന് സ്വദേശി നിതീഷ് (24) കഴിഞ്ഞദിവസം പെരുമ്പുഴയിലെ വാടക വീട്ടിലെത്തി വിദ്യാർഥിനിയെ ബലമായി തട്ടിക്കൊണ്ടു പോയെന്നാണ് പരാതി.
സംഭവം നടക്കുന്ന സമയം വിദ്യാർഥിനിയും അമ്മൂമ്മയും മാത്രമേ വീട്ടിൽ ഉണ്ടായിരുന്നുള്ളൂ.പത്താംക്ലാസിൽ പഠിക്കുന്ന സമയത്ത് പ്രതിയുമായി അടുപ്പം ഉണ്ടായിരുന്ന കുട്ടി പിന്നെ ആ ഇഷ്ടത്തിൽ നിന്നും പിന്മാറിയത് പ്രതിയെ പ്രകോപിപ്പിച്ചെന്നാണ് പോലീസ് പറയുന്നത്.
തുടർന്ന് ഇവർ വാടകയ്ക്ക് താമസിക്കുന്ന സ്ഥലങ്ങളിലെല്ലാം എത്തി പ്രതി വീട് അടിച്ച് തകർക്കുകയും ശല്യം ചെയ്യുന്നതും പതിവായിരുന്നു. ഇതിന്‍റെ പേരിൽ മൂന്നിലേറെ കേസുകളിൽ നിതീഷ് പ്രതിയാണ്. കുട്ടിയുടെ മാതാവി ന്‍റ മൊഴിയുടെ അടിസ്ഥാനത്തിൽ കുണ്ടറ പോലീസ് കേസെടുത്തു അന്വേഷണം ആരംഭിച്ചു.

🔹പ്ലാസ്റ്റിക് മാലിന്യ ചാക്കില്‍നിന്ന് ലഭിച്ച സ്വര്‍ണക്കമ്മല്‍ ഉടമസ്ഥയ്ക്കു തിരിച്ചുനല്‍കി ഹരിതകര്‍മസേനാംഗങ്ങള്‍. മുളക്കുളം പഞ്ചായത്തിലെ നാലാം വാര്‍ഡിലെ ഹരിതകര്‍മസേനാംഗങ്ങളായ ഇരുപൂളുംകാലായില്‍ ഇ.പി. ഏലിയാമ്മ, പഴയമ്പിള്ളില്‍ മേരി സാജു എന്നിവരാണ് മാലിന്യങ്ങള്‍ തിരിയുന്നതിനിടെ കിട്ടിയ രണ്ട് ഗ്രാം തൂക്കം വരുന്ന സ്വര്‍ണക്കമ്മല്‍ തിരികെ നല്‍കിയത്.
അവര്‍മ തൂക്കുമറ്റത്തില്‍ സുഭാഷിണി രാജേന്ദ്രന്‍റെ വീട്ടില്‍നിന്ന് മാലിന്യം ശേഖരിക്കുന്നതിനിടെയാണ് ചാക്കിനുള്ളില്‍നിന്ന് സ്വര്‍ണക്കമ്മല്‍ ലഭിച്ചത്. മാലിന്യം എടുക്കുന്ന സമയത്ത് വീട്ടില്‍ ആരും ഉണ്ടായിരുന്നില്ല. വീട്ടുകാരെത്തിയശേഷം ഹരിതകര്‍മസേനാംഗങ്ങള്‍ ഇവിടെയെത്തി സ്വര്‍ണക്കമ്മല്‍ സുഭാഷിണിക്ക് കൈമാറി.
വീട്ടില്‍ സൂക്ഷിച്ചിരുന്ന കമ്മലുകളില്‍ ഒരെണ്ണം അറിയാതെ താഴെ വീണത് വീട് വൃത്തിയാക്കുന്നതിനിടെ പ്ലാസ്റ്റിക് കവറുകള്‍ ശേഖരിക്കുന്ന മാലിന്യത്തില്‍ ഉള്‍പ്പെട്ടതാവാമെന്ന് വീട്ടുകാര്‍ പറഞ്ഞു.

🔹റോട്ടറി ക്ലബ് റോട്ടറി ഡിസ്ട്രിക്റ്റ് പ്രോജക്ട് ഓപ്പോള്‍ – വിദ്യയുടെ ഭാഗമായി, സ്ത്രീ ശക്തീകരണത്തിനു പ്രാധാന്യംകൊടുത്ത് ഇരവുചിറ സെന്‍റ് ജോര്‍ജ് ഗവ. യുപി സ്‌കൂളിലും പുതുപ്പള്ളി വിഎച്ച്എസ് സ്‌കൂളിലും 11 പെണ്‍കുട്ടികള്‍ക്ക് സൈക്കിള്‍ വിതരണം ചെയ്തു.റവന്യു ഡിസ്ട്രിക്റ്റ് ഡയറക്ടര്‍ അന്‍വര്‍ മുഹമ്മദ്, അസി. ഗവർണര്‍ ജോജോ അലക്‌സാണ്ടര്‍, ക്ലബ് പ്രസിഡന്‍റ് കെ.ആര്‍. രാജഗോപാല്‍, സെക്രട്ടറി ആര്‍. അരുണ്‍, ട്രഷറര്‍ അനിത മോഹന്‍, സിബി ജോസഫ്, കുര്യന്‍ തോമസ്, കെ.കെ. ബിജു, ജിന ജേക്കബ്, കുര്യന്‍ പുന്നൂസ്, ലിറ്റി കുര്യന്‍, വിനോദ് ശിവരാമന്‍, സ്‌കൂള്‍ ഹെഡ്മിസ്ട്രസ് കരുണ എന്നിവര്‍ പങ്കെടുത്തു.

🔹ശബരിമല തീർഥാടക സംഘത്തിന്‍റെ വാഹനം ഇടിമിന്നലേറ്റ് തീപിടിച്ചു. നിലയ്ക്കലിലെ പാർക്കിംഗ് ഗ്രൗണ്ടിലാണ് സംഭവം. ശനിയാഴ്ച വൈകുന്നേരം 6.20ഓടെയാണ് അപകടമുണ്ടായത്. മലപ്പുറത്ത് നിന്നുള്ള തീർഥാടകരെത്തിയ വാഹനമാണ് തീപിടിച്ചത്.പാർക്കിംഗ് ഗ്രൗണ്ടിൽ നിർത്തിയിട്ടിരുന്ന കാറിന് മുകളിൽ മിന്നലേറ്റതിന് പിന്നാലെ വാഹനത്തിൽ നിന്ന് പുക ഉയർന്നു. ഇതോടെ വാഹനത്തിലുണ്ടായിരുന്ന മലപ്പുറം സ്വദേശികളായ റാസി, നൗഷാദ് ഉടൻ തന്നെ പുറത്തിറങ്ങി.
നിമിഷങ്ങൾക്കുള്ളിൽ വാഹനത്തിൽ തീപടരുകയായിരുന്നു. ഉടൻ തന്നെ സമീപത്തുണ്ടായിരുന്നവരും പോലീസും ചേർന്ന് തീ കെടുത്താൻ ശ്രമിച്ചു. വിവരമറിഞ്ഞ് സ്ഥലത്തെത്തിയ അഗ്നിരക്ഷാ സേന ഇടപെട്ട് തീ പൂർണമായും കെടുത്തി. അപകടത്തിൽ കാറിന് സാരമായ നാശനഷ്ടങ്ങളുണ്ടായി. ശബരിമലയിലേക്ക് തീർഥാടകരുമായി വന്ന ടാക്‌സി കാറായിരുന്നു അപകടത്തിൽപ്പെട്ടത്.

🔹കാഞ്ഞങ്ങാട് മഡിയൻ ജംഗ്ഷനിലുണ്ടായ ബൈക്ക് അപകടത്തിൽ രണ്ട് പേർ മരിച്ചു. ബൈക്ക് കാൽനട യാത്രക്കാരനെ ഇടിച്ച് മറിഞ്ഞാണ് അപകടമുണ്ടായത്.കാൽനട യാത്രക്കാരനായ വാണിയമ്പാറ സ്വദേശി അബ്ദുൽ മജീദ് (56), ബൈക്ക് ഓടിച്ച മീനാപ്പീസ് സ്വദേശി നാഫിഖ് (16) എന്നിവരാണ് മരിച്ചത്.
ബൈക്ക് യാത്രക്കാരനായ ഹൊസ്ദുർഗ് കടപ്പുറം സ്വദേശി ശൈഖ് മുഹമ്മദ് (17) നെ പരിക്കുകളോടെ ആശുപത്രിയിൽ പ്രവേശിപ്പിച്ചു. പുലർച്ചെ രണ്ടരയോടെയാണ് അപകടമുണ്ടായത്.

🔹വീട്ടമ്മയുടെ താലിമാല പൊട്ടിച്ച് ആറ്റിൽചാടി രക്ഷപ്പെടാൻ ശ്രമിച്ച പ്രതിയെ സാഹസികമായി പിടികൂടി പോലീസ്. കുറുന്താർ സ്വദേശി രാജേഷ് ആണ് കേസിലെ പ്രതി. ആറന്മുള പോലീസ് ആണ് പ്രതിയെ പിടികൂടിയത്.കോഴഞ്ചേരി സ്വദേശിനി പ്രസന്നയുടെ നാല് പവനോളം തൂക്കം വരുന്ന മാലയും പൊട്ടിച്ചായിരുന്നു രാജേഷ് ആറ്റിലേക്ക് എടുത്തുചാടിയത്. വീട്ടിൽ അതിക്രമിച്ച് കയറിയായിരുന്നു രാജേഷ് വീട്ടമ്മയുടെ മാല പൊട്ടിച്ചത്.
ഇയാളെ പിടികൂടാനായി പോലീസ് പ്രതിക്കൊപ്പം ആറ്റിലേക്ക് ചാടുകയായിരുന്നു. എന്നാൽ പ്രതിയെ പിടികൂടിയെങ്കിലും ഇയാളിൽ നിന്ന് മാല കണ്ടെത്താനായില്ല.

🔹രാജ്യത്തെ പ്രഥമ വൃക്കമാറ്റ ശസ്ത്രക്രിയയ്ക്കു നേതൃത്വം നൽകിയ പ്രശസ്ത നെഫ്രോളജിസ്റ്റും കൊച്ചി വിപിഎസ് ലേക്‌ഷോര്‍ ആശുപത്രി ഡയറക്ടറുമായ ഡോ. കെ.വി. ജോണി (87) അന്തരിച്ചു.
വാർധക്യസഹജമായ അസുഖങ്ങളാൽ ചികിത്സയിലായിരുന്നു. സംസ്കാരം പിന്നീട്. എണാകുളം തേവര ഫെറി റോഡ് ഉപരിക മാളിക 12ബിയിലായിരുന്നു താമസം.1971ൽ വെല്ലൂർ സിഎംസിയിലാണ് ഡോ. കെ.വി. ജോണിയുടെ നേതൃത്വത്തിൽ രാജ്യത്തെ ആദ്യ വൃക്കമാറ്റ ശസ്ത്രക്രിയ നടന്നത്. രാജ്യത്തെ ഏറ്റവും വലിയ ഡയാലിസിസ് സെന്‍ററിന് വെല്ലൂരിൽ തുടക്കം കുറിച്ചതിലും അദ്ദേഹത്തിന്‍റെ മേൽനോട്ടമുണ്ട്. 1993ൽ കുവൈറ്റിലും റീനൽ ട്രാൻസ്പ്ലാന്‍റ് സെന്‍റർ സ്ഥാപിക്കുന്നതിൽ ഡോ. ജോണി പ്രധാന പങ്ക് വഹിച്ചു.

🔹പശ്ചിമബംഗാളിൽ പ്രധാനമന്ത്രി നരേന്ദ്രമോദിയുടെ പ്രസംഗവേദിക്കു സമീപം തൃണമൂൽ കോൺഗ്രസ്-ബിജെപി പ്രവർത്തർ ഏറ്റുമുട്ടി.പ്രധാനമന്ത്രി എത്തുന്നതിന് അരമണിക്കൂർ മുന്പാണ് സെൻട്രൽ കൊൽക്കത്തയിലെ ഗിരീഷ് പാർക്കിൽ സംഘർഷമുണ്ടായത്. ഇരുവിഭാഗവും തമ്മിലുള്ള കല്ലേറിയിൽ ഒരു പോലീസ് ഉദ്യോഗസ്ഥനും ബിജെപി പ്രവർത്തകനം പരിക്കേറ്റു.
പ്രധാനമന്ത്രിയുടെ പരിപാടിയ്ക്ക് പോയ പ്രവർത്തകർക്കുനേരെ ഗിരീഷ് പാർക്കിന് സമീപത്തുവെച്ച് കല്ലേറുണ്ടായതായി ബിജെപി പ്രവർത്തകർ ആരോപിക്കുന്നു. വാഹനങ്ങൾക്കും കേടുപാടുകൾ സംഭവിച്ചു.
എന്നാൽ ആരോപണങ്ങൾ തൃണമൂൽ പ്രവർത്തകർ നിഷേധിച്ചു. ബിജെപി പ്രവർത്തകരാണ് തങ്ങൾക്കുനേരേ കല്ലേറ് തുടങ്ങിയെതെന്ന് ഇവർ വിശദീകരിക്കുന്നു. തെരഞ്ഞെടുപ്പിന് മുന്നോടിയായി ബിജെപി നടത്തുന്ന പരിവർത്തൻ യാത്രയുടെ ഭാഗമായാണ് മോദി കൊൽക്കത്തയിലെത്തിയത്

🔹ഇറാനിലെ പ്രധാന നഗരങ്ങൾ ആക്രമിച്ച് യുഎസും ഇസ്രയേലും. രാത്രി നടത്തിയ ആക്രമണങ്ങളിൽ ഇറാനിലെ ഇസ്ഫഹാൻ പ്രവിശ്യയിൽ വിവിധയിടങ്ങളിലുണ്ടായ മിസൈൽ ആക്രമണത്തിൽ15 പേർ കൊല്ലപ്പെട്ടതായി റിപ്പോർട്ടുകളുണ്ട്.പശ്ചിമേഷ്യൻ സംഘർഷം രൂക്ഷമാകുന്നതിനിടെ അയൽ രാജ്യങ്ങളോട് അമേരിക്കൻ സൈനിക താവളങ്ങൾ അടച്ചുപൂട്ടാൻ ഇറാൻ വീണ്ടും ആവശ്യപ്പെട്ടു. മേഖലയിൽ അമേരിക്കൻ സാന്നിധ്യമുണ്ടാകരുതെന്നും സമാധാനം ഉറപ്പാക്കാൻ അതാണ് മാർഗമെന്നും ഇറാൻ അറിയിച്ചു.അതേസമയം കുവൈത്ത് അന്താരാഷ്ട്ര വിമാനത്താവളത്തിന് നേരെ ആക്രമണമുണ്ടായി. റഡാർ സംവിധാനത്തിന് നേരെയാണ് ഡ്രോൺ ആക്രമണം നടന്നത്. എന്നാൽ ആക്രമണത്തിൽ ആർക്കും പരിക്കില്ലെന്നാണ് പുറത്തുവരുന്ന വിവരം.

🔹ഐപിഎൽ 2026 സീസണിന് മുന്നോടിയായി മൂന്ന് തവണ ചാന്പ്യൻമാരായ കോൽക്കത്ത നൈറ്റ് റൈഡേഴ്സ് പുതിയ ജഴ്സി പുറത്തിറക്കി.2012, 2014, 2024 വർഷങ്ങളിൽ കെകെആർ ഐപിഎൽ കിരീടങ്ങൾ നേടിയപ്പോൾ 2021ൽ റണ്ണേഴ്സ് അപ്പായി.മാർച്ച് 29ന് മുംബൈയിലെ വാങ്കഡെ സ്റ്റേഡിയത്തിൽ മുംബൈ ഇന്ത്യൻസിനെതിരേയാണ് കെകെആർ സീസണിന് തുടക്കമിടുന്നത്. ഏപ്രിൽ രണ്ടിന് സണ്‍റൈസേഴ്സ് ഹൈദരാബാദിനെതിരേയാണ് അവരുടെ ആദ്യ ഹോം മത്സരം.

🔹2001 മാർച്ചിൽ കൊൽക്കത്തയിലെ ഈഡൻ ഗാർഡൻസിൽ നടന്ന ഇന്ത്യ-ഓസ്‌ട്രേലിയ പോരാട്ടം ടെസ്റ്റ് ക്രിക്കറ്റ് ചരിത്രത്തിലെ ഏറ്റവും മഹത്തായ മത്സരങ്ങളിൽ ഒന്നായി ഇന്നും ഓർമ്മിക്കപ്പെടുന്നു. ആ ചരിത്രവിജയത്തിന്റെ രജതജൂബിലിയാണ് ഇന്ന്.
അന്നത്തെ പരമ്പരയിൽ ആദ്യ ടെസ്റ്റ് ജയിച്ച് ആത്മവിശ്വാസത്തോടെ എത്തിയ ഓസ്‌ട്രേലിയൻ ടീം അന്ന് ലോക ക്രിക്കറ്റിലെകിരീടം വയ്ക്കാത്ത രാജാക്കന്മാരായിരുന്നു. 1999 ലെ ലോകകപ്പ് നേടിയപ്പോൾ ആരംഭിച്ച സ്റ്റീവ് വോ യുടെയും സംഘത്തിന്റെയും ജൈത്രയാത്ര ഒടുവിൽ എത്തിനിന്നത് “ഫൈനൽ ഫ്രണ്ടിയർ” എന്ന് നായകൻ സ്റ്റീവ് വോ തന്നെ വിശേഷിപ്പിച്ച ഇന്ത്യൻ മണ്ണിലാണ്.
ആദ്യ ടെസ്റ്റിൽ ഗാംഗുലിയുടെ കീഴിൽ ചെറിയ ചുവടുകൾ വച്ച് കൊണ്ടിരുന്ന ഇന്ത്യൻ ടീമിനെ ഹെയ്ഡനും, പോണ്ടിങ്ങും , മഗ്രാന്തും , ഷെയിൻ വാണും ഗിൽക്രിസ്റ്റും അടങ്ങുന്ന സംഘം കശക്കിയെറിഞ്ഞു കളഞ്ഞു. ഇന്ത്യയിൽ പരമ്പര പിടിക്കാനായി അടുത്തതായി കങ്കാരു പട എത്തിയത് കൊൽക്കത്തയിൽ ആയിരുന്നു.
കൊൽക്കത്തയിൽ നടന്ന രണ്ടാം ടെസ്റ്റിൽ ടോസ് നേടിയ സ്റ്റീവ് വോ ആദ്യം ബാറ്റിംഗ് തെരഞ്ഞെടുത്തു. ആദ്യ രണ്ട് ദിവസങ്ങളിൽ തന്നെ ഓസ്‌ട്രേലിയ മത്സരത്തിൽ പൂർണ്ണ നിയന്ത്രണം ഏറ്റെടുത്തു. മികച്ച ബാറ്റിംഗിന്റെ കരുത്തിൽ അവർ ആദ്യ ഇന്നിംഗ്സിൽ 445 റൺസ് നേടി.എന്നാൽ സ്കോർ 500 കടക്കാത്തതിൽ ഇന്ത്യ നന്ദി പറയേണ്ടിയിരുന്നത് ഹാട്രിക് അടക്കം ഏഴ് വിക്കറ്റുകൾ നേടിയ സ്പിന്നർ ഹർഭജൻ സിംഗിനോടാണ് . റിക്കി പോണ്ടിംഗ്, ആഡം ഗിൽക്രിസ്റ്റ്, ഷെയിൻ വോൺ എന്നിവരാണ് അന്ന് തുടരെയുള്ള പന്തുകളിൽ സിംഗിന്റെ ഇരകളായി.
എന്നാൽ ഇന്ത്യ ആദ്യ ഇന്നിംഗ്സ് തകർന്നു. ഗ്ലെൻ മഗ്രാത്തിന്റെയും ജേസൺ ഗില്ലെസ്പിയുടെയും പേസ് ആക്രമണത്തിന് മുന്നിൽ ഇന്ത്യ 171 റൺസിൽ പുറത്തായി. ഇതോടെ ഓസ്‌ട്രേലിയയ്ക്ക് 274 റൺസിന്റെ ലീഡ് ലഭിച്ചു.
ഇവിടെയാണ് കളിയുടെ ഗതി മാറ്റിയ ഒരു തീരുമാനം വോ എടുത്തത്.
മത്സരം വേഗത്തിൽ അവസാനിപ്പിക്കാൻ സ്റ്റീവ് വോ ഇന്ത്യയെ ഫോളോ-ഓൺ ചെയ്യാൻ അയച്ചു. ഇന്ത്യ വീണ്ടും ബാറ്റിംഗിന് ഇറങ്ങുമ്പോൾ പരാജയം ഒഴിവാക്കുക പോലും ബുദ്ധിമുട്ടായി തോന്നുന്ന സാഹചര്യമായിരുന്നു.മൂന്നാം ദിവസത്തിന്റെ അവസാനത്തിൽ ഇന്ത്യയുടെ സ്കോർ 232 ന് 4 എന്ന നിലയിലായിരുന്നു.
അപ്പോഴാണ് വി.വി.എസ്. ലക്ഷ്മണും രാഹുൽ ദ്രാവിഡും ക്രീസിൽ ഒരുമിച്ചത്. തുടർന്ന് നടന്നത് ടെസ്റ്റ് ക്രിക്കറ്റ് ചരിത്രത്തിലെ ഏറ്റവും പ്രശസ്തമായ പങ്കാളിത്തങ്ങളിൽ ഒന്നായിരുന്നു .ലക്ഷ്മൺ മനോഹരമായ ഷോട്ടുകളിലൂടെ ഓസ്‌ട്രേലിയൻ ബൗളർമാരെ സമ്മർദത്തിലാക്കി. ദ്രാവിഡ് ഉറച്ച പ്രതിരോധത്തോടെ കൂട്ടായി നിന്നു. ഇരുവരും മണിക്കൂറുകളോളം ബാറ്റ് ചെയ്ത് ഓസ്‌ട്രേലിയയെ ക്ഷീണിപ്പിച്ചു. ലക്ഷ്മൺ 281 റൺസ് നേടി അന്നത്തെ ഇന്ത്യയുടെ ഏറ്റവും വലിയ ടെസ്റ്റ് സ്കോർ കുറിച്ചു. ദ്രാവിഡ് 180 റൺസുമായി പിന്തുണ നൽകി. ഇരുവരും ചേർന്ന് 376 റൺസിന്റെ മഹത്തായ കൂട്ടുകെട്ട് നേടി.ഒടുവിൽ ഇന്ത്യ രണ്ടാം ഇന്നിംഗ്സിൽ 657 ന് 7 എന്ന നിലയിൽ ഡിക്ലയർ ചെയ്തു. ജയിക്കാൻ ഓസ്‌ട്രേലിയയ്ക്ക് 384 റൺസ് വേണ്ടിയിരുന്നു .അവസാന ദിവസം മത്സരം ആവേശകരമായി മാറി. ഹർഭജൻ സിംഗ് വീണ്ടും മികച്ച ബൗളിംഗ് നടത്തി ആറ് വിക്കറ്റുകൾ നേടി. സച്ചിൻ ടെണ്ടുൽക്കറും മൂന്ന് വിക്കറ്റുകൾ വീഴ്ത്തി. അതിൽ ഷെയിൻ വോണിനെ ഒരു ഗൂഗ്ലിയിലൂടെ പുറത്താക്കിയതും ശ്രദ്ധേയമായി.
ഓസ്‌ട്രേലിയ 212 റൺസിൽ പുറത്തായതോടെ ഇന്ത്യ 171 റൺസിന് വിജയം നേടി. ഫോളോ-ഓൺ ഏറ്റുവാങ്ങിയ ശേഷം ടെസ്റ്റ് ജയിച്ച ലോകത്തിലെ അപൂർവ വിജയങ്ങളിലൊന്നായി ഈ വിജയം ചരിത്രത്തിൽ രേഖപ്പെടുത്തി.
ഇന്ന് 25 വർഷങ്ങൾക്ക് ശേഷം പോലും ആ മത്സരം ഇന്ത്യൻ ക്രിക്കറ്റിന്റെ ഏറ്റവും വലിയ വിജയങ്ങളിൽ ഒന്നായി കണക്കാക്കപ്പെടുന്നു. വി.വി.എസ്. ലക്ഷ്മൺ, രാഹുൽ ദ്രാവിഡ്, ഹർഭജൻ സിംഗ്, എന്നിവർ കാഴ്ചവെച്ച ആ അതുല്യ പ്രകടനം ക്രിക്കറ്റ് ആരാധകർ ഇന്നും ആവേശത്തോടെ ഓർക്കുന്നു. മാത്രമല്ല ആ വിജയത്തിന്റെ ആവേശത്തിൽ ഗാംഗുലി എന്ന നായകന്റെ തണലിൽ തുടങ്ങിയ ജൈത്രയാത്ര ഇന്ന് ഇന്ത്യയുടെ മൂന്നാം ടി 20 ലോകകപ്പ് കിരീടത്തിലാണ് എത്തിനിൽക്കുന്നത്.

🔹വാഴ്ത്തപ്പെട്ട രക്തസാക്ഷി സിസ്റ്റർ ‌റാണി മരിയയുടെ ജീവിതം പ്രമേയമാക്കി ഒരുക്കിയ മലയാളം സിനിമ ‘ദ ഫേസ് ഓഫ് ദ ഫേസ്‌ലെസ്’ സ്പെയിനിലെ തിയറ്ററുകളിൽ കൈയടി നേടുന്നു.എൽ റോസ്‌ട്രോ ഡെൽ പെർടോൺ’ എന്ന ടൈറ്റിലോടെ സ്പാനിഷ് ഭാഷയിലേക്കു മൊഴി മാറ്റിയ സിനിമ അവിടെ 40ഓളം തിയറ്ററുകളിലാണ് പ്രദർശിപ്പിക്കുന്നത്. മലയാളത്തിൽനിന്നു സ്പാനിഷിലേക്ക് ഡബ്ബ് ചെയ്തു പുറത്തിറക്കിയ ആദ്യസിനിമയാണിതെന്ന് സംവിധായകൻ ഷെയ്സൺ പി. ഔസേഫ് പറഞ്ഞു.
ഇതിനകം ആറു ഭാഷകളിൽ ഡബ്ബ് ചെയ്ത ചിത്രം കേരളത്തിൽ റിലീസ് ചെയ്തു രണ്ടു വർഷമായിട്ടും ബുക്ക്മൈഷോയിൽ പത്തിൽ ഒമ്പത് റേറ്റിംഗ് നേടിയിരുന്നു. 2024ലെ ഓസ്കർ എൻട്രി നേടിയ നേടിയ ചിത്രത്തിന് 125 ഓളം പുരസ്കാരങ്ങൾ ലഭിച്ചു.
അമേരിക്കയിലെ സാൾട്ട് ലേയ്ക്ക് സിറ്റിയിലുള്ള സ്പാനിഷ് കമ്യൂണിറ്റി ‘സെൻട്രോ സിവിക്കോ മേക്സിക്കാനോ’ എന്ന അവാർഡ് നൽകി സംവിധായകനെ ആദരിച്ചു.ചാലക്കുടി മോതിരക്കണ്ണി സ്വദേശിയാണ് ഷെയ്സൺ. സൗത്ത് അമേരിക്കൻ രാജ്യങ്ങളിലെ തിയറ്ററുകളിലും ‘ദ ഫേസ് ഓഫ് ദ ഫേസ്‌ലെസ്’ പ്രദർശിപ്പിക്കുന്നുണ്ട്.

🔹മലയാള സിനിമയെയും വിടാതെ യുദ്ധം. പാചകവാതക ക്ഷാമത്തെ തുടര്‍ന്ന് മലയാള സിനിമ ഷൂട്ടിംഗ് മേഖലയും പ്രതിസന്ധിയിലേക്ക്. മിക്ക സിനിമകള്‍ക്കും രണ്ടു ദിവസം വരെ മാത്രം ഉപയോഗിക്കാനുള്ള ഗ്യാസ് മാത്രമേ കൈവശമുള്ളു. നടന്‍ സന്ദീപ് പ്രദീപിന്‍റേത് അടക്കം പതിനന്നോളം സിനിമകളുടെ ഷൂട്ടിംഗാണ് കൊച്ചിയില്‍ നിലവില്‍ നടന്നു കൊണ്ടിരിക്കുന്നത്.ഷൂട്ടിംഗ് പൂര്‍ണമായും നിര്‍ത്തി വയ്‌ക്കേണ്ട അവസ്ഥ വന്നിട്ടില്ലെങ്കിലും അങ്ങനൊരു ഘട്ടത്തിലേക്ക് എത്തിയേക്കാം എന്നാണ് ഫിലിം ചേംബര്‍ പ്രസിഡന്‍റ് അനില്‍ തോമസ് ദീപിക ഓണ്‍ലൈനിനോട് പ്രതികരിച്ചത്.നിലവിലെ പ്രതിസന്ധി സിനിമ വ്യവസായത്തെയും ബാധിച്ചിട്ടുണ്ട്. എന്നാല്‍ സിനിമ ഷൂട്ടിംഗ് പൂര്‍ണ്ണമായും നിര്‍ത്തിവയ്ക്കുന്ന അവസ്ഥ ഇതുവരെ ഉണ്ടായിട്ടില്ല. എന്റെ അറിവില്‍ സിനിമകളുടെ ഷൂട്ടിംഗ് നിര്‍ത്തിയിട്ടില്ല.ഇനി മുന്നോട്ട് പോകാന്‍ പറ്റില്ലെന്ന് തോന്നിയാല്‍ ഷൂട്ടിംഗ് നിര്‍ത്താം എന്ന നിലപാടിലാണ് നിര്‍മ്മാതാക്കള്‍. ഗ്യാസ് കിട്ടാതാകുന്ന സാഹചര്യം വന്നാല്‍ സ്വാഭാവികമായി നിര്‍ത്തേണ്ടി വരും.നിലവില്‍ ഗ്യാസ് ക്ഷാമം ഉണ്ടാവുന്നുണ്ട്. അത് പരിഹരിക്കാന്‍ പറ്റുന്നതൊക്കെ ചെയ്ത് മുന്നോട്ട് പോകാനാണ് ശ്രമിക്കുന്നത്. കിട്ടാതെ വന്നു കഴിഞ്ഞാല്‍ എല്ലാം മുടങ്ങും എന്ന് അനില്‍ തോമസ് പറഞ്ഞു.രണ്ടു ദിവസത്തേക്ക് മാത്രമുള്ള പാചകവാതകം മാത്രമാണ് ഇനിയുള്ളത് എന്നാണ് പ്രൊഡക്ഷന്‍ അസിസ്റ്റന്‍റ് സുജിത്ത് മണ്ണാര്‍ക്കാടിന്‍റെ വാക്കുകള്‍. രണ്ടു ദിവസം കൂടി പിടിച്ചു നില്‍ക്കാനാകും. അത് കഴിഞ്ഞാല്‍ ഗ്യാസ് കിട്ടുമോ എന്ത് ചെയ്യും എന്നൊന്നും അറിയില്ല. പ്രതിസന്ധി വരികയാണെങ്കില്‍ ഷൂട്ടിംഗ് നിര്‍ത്തേണ്ട അവസ്ഥയാണ്.
സിനിമ സെറ്റിലെ മെസില്‍ ചോര്‍ ഒക്കെ വിറകടുപ്പില്‍ തന്നെയാണ് വയ്ക്കുന്നത്. ഇതുവരെ ഷൂട്ടിംഗ് മുടങ്ങിയിട്ടില്ല. 11 സിനിമകളുടെ ഷൂട്ടിംഗാണ് നിലവില്‍ നടക്കുന്നത്. കൂടാതെ പരസ്യങ്ങളുടെയും സീരിയലുകളുടെയും ഷൂട്ടിംഗ് നടക്കുന്നുണ്ട്. രണ്ടു ദിവസത്തേക്ക് കുഴപ്പമില്ലാതെ പോകും എന്നല്ലാതെ അതിനു ശേഷം എന്തു ചെയ്യുമെന്ന് അറിയില്ല എന്ന് സുജിത്ത് മണ്ണാര്‍ക്കാട് വ്യക്തമാക്കി.

💦 ഗുരുജിയുടെ വാക്കുകൾ

ചൂടുള്ള ശരീരത്തെ ഒന്ന് ചേർത്ത് പിടിച്ച് ആശ്വസിപ്പിക്കാൻ പോലും സമയമില്ലാത്തവർ, തണുത്ത ശരീരത്തെ കെട്ടിപിടിച്ചു അലമുറയിടുന്നത് പ്രഹസനമോ, കുറ്റബോധമോ കൊണ്ടാകും.
മറ്റൊരാളെ എറിയാൻ കൈയിൽ കനൽ സൂക്ഷിക്കുന്നത് പോലെയാണ് മനസ്സിൽ ദേഷ്യം കൊണ്ടുനടക്കുന്നത്.
സ്വയം പൊള്ളിക്കാനേ അത് ഉപകരിക്കു.
മനുഷ്യൻ്റെ ഏറ്റവും വലിയ ശക്തി മനസ്സാണ്.
അത് ക്ഷയിച്ചാൽ എല്ലാം പരാജയമായിരിക്കും.
സ്നേഹം, ക്ഷമ. കാരുണ്യം, മറക്കാനും പൊറുക്കാനുമുള്ള കഴിവ് ഇതൊക്കെയാണ് നമ്മുടെ ജീവിതത്തേയും, മനസ്സിനെയും സുന്ദരവും, സന്തോഷകരവും ആക്കുന്നത്.

തയ്യാറാക്കിയത്: കപിൽ ശങ്കർ

52 Likes

📱വാർത്തകൾ ഒറ്റനോട്ടത്തിൽ📱 – 2026 | മാർച്ച് 15 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

സൗദിയിൽ വിമാനത്തിന് നേരെ ആക്രമണം; പൈലറ്റ് കൊല്ലപ്പെട്ടു; ഇന്ത്യയിൽ നിന്നടക്കം വിമാനങ്ങൾ റദ്ദാക്കി

പാനമയിൽ റിക്ടർ സ്കെയിലിൽ 7.6 തീവ്രത രേഖപ്പെടുത്തിയ വൻ ഭൂചലനം: സുനാമി മുന്നറിയിപ്പ്

ക്യാമ്പില്‍ നിന്ന് ഇറങ്ങിപ്പോയ സംഭവം: റൊണാള്‍ഡോയെ സസ്‌പെന്‍ഡ് ചെയ്ത് പോര്‍ച്ചുഗല്‍ ഫുട്‌ബോള്‍ ഫെഡറേഷന്‍

LEAVE A REPLY Cancel reply

Most Popular

സംസ്ഥാനത്തു ശക്തമായ മഴയ്ക്ക് സാധ്യത: 4 ജില്ലകളിൽ യെല്ലോ അലേർട്ട്

ഭർത്താവിന് പരസ്ത്രീ ബന്ധമെന്ന് സംശയം: മയക്കിക്കിടത്തി സ്വകാര്യ ഭാഗങ്ങൾ കുത്തിക്കീറിയ ഭാര്യ അറസ്റ്റിൽ

സൗദിയിൽ വിമാനത്തിന് നേരെ ആക്രമണം; പൈലറ്റ് കൊല്ലപ്പെട്ടു; ഇന്ത്യയിൽ നിന്നടക്കം വിമാനങ്ങൾ റദ്ദാക്കി

Recent Comments

EDITOR PICKS

സംസ്ഥാനത്തു ശക്തമായ മഴയ്ക്ക് സാധ്യത: 4 ജില്ലകളിൽ യെല്ലോ അലേർട്ട്

ഭർത്താവിന് പരസ്ത്രീ ബന്ധമെന്ന് സംശയം: മയക്കിക്കിടത്തി സ്വകാര്യ ഭാഗങ്ങൾ കുത്തിക്കീറിയ ഭാര്യ അറസ്റ്റിൽ

POPULAR POSTS

ഭർത്താവിന് പരസ്ത്രീ ബന്ധമെന്ന് സംശയം: മയക്കിക്കിടത്തി സ്വകാര്യ ഭാഗങ്ങൾ കുത്തിക്കീറിയ ഭാര്യ അറസ്റ്റിൽ

ഇന്ധന സർചാർജ് വർധിപ്പിച്ച് എയർ ഇന്ത്യ; പുതുക്കിയ ചാർജ് ഇന്ന് അർദ്ധരാത്രി മുതൽ പ്രാബല്യത്തിൽ

POPULAR CATEGORY

ABOUT US

FOLLOW US