📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 13 | വെള്ളി ✍ കപിൽ ശങ്കർ

🔹സംസ്ഥാനത്ത് ചൂട് കൂടുന്ന സാഹചര്യത്തിൽ അൾട്രാവയലറ്റ് രശ്മികളെയും സൂക്ഷിക്കണമെന്ന മുന്നറിയിപ്പുമായി ദുരന്തനിവാരണ അതോറിറ്റി.
സംസ്ഥാന ദുരന്ത നിവാരണ അതോറിറ്റി സ്ഥാപിച്ച 14 സ്റ്റേഷനുകളിലെ തത്സമയ അൾട്രാവയലറ്റ് സൂചിക പ്രകാരം കഴിഞ്ഞ 24 മണിക്കൂറിൽ ഏറ്റവും കൂടുതൽ പതിച്ചത് പത്തനംതിട്ട ജില്ലയിലെ കോന്നിയിലും ഇടുക്കി ജില്ലയിലെ മൂന്നാറിലുമാണ്. അൾട്രാവയലറ്റ് സൂചികയിൽ എട്ട് രേഖപ്പെടുത്തിയ ഇവിടങ്ങളിൽ ഓറഞ്ച് അലർട്ടാണ്.അതേസമയം, കൊല്ലം ജില്ലയിലെ കൊട്ടാരക്കര (ഏഴ്), ആലപ്പുഴ ജില്ലയിലെ ചെങ്ങന്നൂർ (ഏഴ്), കോട്ടയം ജില്ലയിലെ ചങ്ങനാശേരി (ഏഴ്), പാലക്കാട് ജില്ലയിലെ തൃത്താല (ഏഴ്), വയനാട് ജില്ലയിലെ മാനന്തവാടി (ഏഴ്), എറണാകുളം ജില്ലയിലെ കളമശേരി (ആറ്), തൃശൂർ ജില്ലയിലെ ഒല്ലൂർ (ആറ്), മലപ്പുറം ജില്ലയിലെ പൊന്നാനി (ആറ്) എന്നിവിടങ്ങളിലും യെല്ലോ അലർട്ടാണ്.
അൾട്രാവയലറ്റ് സൂചിക 11ന് മുകളിലാണെങ്കിൽ റെഡ് അലർട്ടും എട്ടുമുതൽ 10 വരെ ഓറഞ്ച് അലർട്ടും ആറു മുതൽ ഏഴുവരെ യെല്ലോ അലർട്ടുമാണ് നല്കുന്നത്.തുടർച്ചയായി കൂടുതൽ സമയം അൾട്രാവയലറ്റ് രശ്മികൾ ശരീരത്തിൽ ഏൽക്കുന്നത് സൂര്യാതപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും മറ്റ് ആരോഗ്യ പ്രശ്നങ്ങൾക്കും കാരണമായേക്കാം. പൊതുജനങ്ങൾ സുരക്ഷാമുൻകരുതലുകൾ സ്വീകരിക്കണം.
പകൽ 10 മണി മുതൽ മൂന്നു മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. ആയതിനാൽ ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.

🔹ശബരിമല മണ്ഡല- മകരവിളക്ക് കാലത്ത് താത്കാലിക ജീവനക്കാര്‍ നടത്തിയ സംശയാസ്പദമായ പണമിടപാടുകളില്‍ വിശദ അന്വേഷണത്തിന് ഹൈക്കോടതി ഉത്തരവിട്ടു.തിരുവിതാംകൂര്‍ ദേവസ്വം ബോര്‍ഡ് ചീഫ് വിജിലന്‍സ് ആന്‍ഡ് സെക്യൂരിറ്റി ഓഫീസര്‍ 2025-26 സീസണിലെ സാമ്പത്തിക ക്രമക്കേടുകളെക്കുറിച്ച് അന്വേഷണം നടത്താനാണു നിര്‍ദേശം.
സന്നിധാനത്തെ താത്കാലിക ജീവനക്കാരും സ്ഥിരം ജീവനക്കാരും സാമ്പത്തിക ക്രമക്കേട് നടത്തിയെന്ന ശബരിമല സ്‌പെഷല്‍ കമ്മീഷണറുടെ റിപ്പോര്‍ട്ടിന്‍റെ അടിസ്ഥാനത്തിലാണ് ജസ്റ്റീസുമാരായ വി. രാജ വിജയരാഘവന്‍, കെ.വി. ജയകുമാര്‍ എന്നിവരടങ്ങിയ ഡിവിഷന്‍ ബെഞ്ചിന്‍റെ ഉത്തരവ്.നവംബര്‍ 17 മുതല്‍ സന്നിധാനത്തെ ബാങ്കുകളിലും പോസ്റ്റ് ഓഫീസുകളിലും നടന്ന നിക്ഷേപങ്ങളെക്കുറിച്ച് വിജിലന്‍സ് വിഭാഗം രഹസ്യ അന്വേഷണം നടത്തിയിരുന്നു.

🔹കേന്ദ്ര തൊഴിലാളി സംഘടനകളും ദേശീയ തൊഴിലാളി ഫെഡറേഷനുകളും പ്രഖ്യാപിച്ച 24 മണിക്കൂർ അഖിലേന്ത്യാ പണിമുടക്ക് സംസ്ഥാനത്ത് പൂർണം. വ്യാപാര സ്ഥാനപങ്ങൾ അടഞ്ഞുകിടന്നു. സ്വകാര്യ ബസുകളും ടാക്സികളും സർവീസ് നടത്തിയില്ല. ഇരുചക്രവാഹനങ്ങൾ നിരത്തിലിറങ്ങി.റെയിൽവേ സ്റ്റേഷനുകളിലെത്തിയ പലരും തുടർ യാത്രയ്ക്ക് സൗകര്യമില്ലാതെ ബുദ്ധിമുട്ടിലായി. കെഎസ്ആർടിസി സർവീസുകൾ നടത്തിയില്ല. സെക്രട്ടേറിയറ്റ് ഉൾപ്പെടെയുള്ള സർക്കാർ ഓഫീസുകളിൽ വളരെ കുറിച്ചു ജീവനക്കാർ മാത്രമേ എത്തിയുള്ളൂ. 10.6 ശതമാനം ജീവനക്കാരാണ് സെക്രട്ടേറിയറ്റിൽ ഇന്നലെ ജോലിക്ക് എത്തിയത്.
അവശ്യ സർവീസുകളെ പണിമുടക്കിൽനിന്നും ഒഴിവാക്കിയിരുന്നു. സംസ്ഥാനത്ത് ചിലയിടങ്ങളിൽ വാഹനങ്ങൾ തടഞ്ഞത് സമരക്കാരും യാത്രക്കാരും തമ്മിലുള്ള വാക്കേറ്റത്തിനിടയാക്കി. തിരുവനന്തപുരത്ത് മ്യൂസിയം ജംഗ്ഷനിൽനിന്ന് ലോക്ഭവനു മുന്നിലേക്ക് വിവിധ സംഘടനകളുടെ നേതൃത്വത്തിൽ പ്രകടനം നടന്നു.

🔹നിറയെ വെള്ളമുള്ള തോടുകള്‍ പലതും പോളയും പായലും മാലിന്യവും നിറഞ്ഞു മലിനമാകുന്നു. നീരൊഴുക്ക് നിലച്ച മാലിന്യവാഹിനിയായ തോടുകള്‍ രോഗഭീഷിണി ഉയര്‍ത്തുന്നതിനൊപ്പം കാര്‍ഷിക മേഖലയ്ക്കും ഭീഷണിയാണ്. നാട്ടിലെ പ്രാദേശിക ജലസംഭരണികളായ തോടുകളും ജലാശയങ്ങളും ശുചിയാക്കി ഉപയോഗയോഗ്യമാക്കണമെന്നത് വര്‍ഷങ്ങളായുള്ള ആവശ്യമാണെങ്കിലും ഇതൊന്നും അധികാരികളുടെ കര്‍ണപുടങ്ങളിലെത്തിയിട്ടില്ലെന്ന് നാട്ടുകാരും കര്‍ഷകരും കുറ്റപ്പെടുത്തുന്നു.

🔹ലോറികളിൽനിന്ന് റോഡിലേക്ക് തെറിച്ചുവീഴുന്ന പൂഴിമണ്ണ് അപകടത്തിന് ഇടയാക്കുന്നു.റോഡിലെ വളവുകളിലും പാലങ്ങളിലുമാണ് ചെറിയ കല്ലുകളടക്കം പൂഴിമണ്ണ് വീഴുന്നത്. പൊട്ടൻചിറ, വല്ലകം വളവുകളിലും വൈക്കം തോട്ടുവക്കം, തോട്ടകംപള്ളിക്ക് സമീപത്തെ പാലം തുടങ്ങിയ സ്ഥലങ്ങളിലാണ് പൂഴിവീണ് അപകടസ്ഥിതിയുള്ളത്.റോഡരിൽ മീറ്ററുകളോളം നീളത്തിൽ വീഴുന്ന പൂഴിമണ്ണിൽ കയറി ഇരുചക്രവാഹന യാത്രികർ വീണ് പരിക്കേൽക്കുന്നതു നിത്യസംഭവമാണ്.വളവുകളിലൂടെ ഭാരവണ്ടികൾ കടന്നുപോകുമ്പോൾ പൂഴിമണ്ണ് ദേഹത്ത് വീഴാതെ തലനാരിഴയ്ക്കാണ് രക്ഷപ്പെടുന്നതെന്ന് ഇരുചക്ര വാഹനയാത്രികർ പറയുന്നു. ലോറികളിൽ പൂഴി മണ്ണ് മതിയായരീതിയിൽ മൂടിക്കൊണ്ടുപോകുന്നതിന് അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

🔹ആമ്പല്‍ പൂക്കളിലൂടെ ലോകശ്രദ്ധയാകര്‍ഷിച്ച വിനോദസഞ്ചാര കേന്ദ്രമായി മാറിയ മലരിക്കലില്‍ ടൂറിസം മേളയ്ക്കു തുടക്കമായി. മേളയ്ക്കു തുടക്കംകുറിച്ച് ഇന്നലെ വൈകുന്നേരം ആറിനു തിരനോട്ടം സംഘടിപ്പിച്ചു. തിരുവാര്‍പ്പ് പഞ്ചായത്ത് പ്രസിഡന്‍റ് ജയാ സജിമോന്‍ ഉദ്ഘാടനം ചെയ്തു. ഇന്നു മന്ത്രി വി.എന്‍. വാസവന്‍ മേളയുടെ ഉദ്ഘാടനം നിര്‍വഹിക്കും.
1800 ഏക്കര്‍ വിസ്തൃതിയുള്ള നെല്‍പ്പാടത്ത് ഒരുക്കിയിരിക്കുന്ന വൈദ്യുതി ദീപാലങ്കാരമാണ് മേളയുടെ പ്രധാന ആകര്‍ഷണം. പ്രാദേശിക വിഭവങ്ങള്‍ ഉള്‍ക്കൊള്ളിച്ചുള്ള ഭക്ഷ്യമേളയും തദ്ദേശീയരുടെ കലാപരിപാടികളും ഒരുക്കിയിട്ടുണ്ട്. മീനച്ചിലാര്‍- മീനന്തറയാര്‍- കൊടൂരാര്‍ പുനര്‍സംയോജന പദ്ധതി ജനകീയ കൂട്ടായ്മ, മലരിക്കല്‍ ടൂറിസം സൊസൈറ്റി, തിരുവാര്‍പ്പ് ഗ്രാമപഞ്ചായത്ത്, തിരുവാര്‍പ്പ്- കാഞ്ഞിരം സര്‍വീസ് സഹകരണ ബാങ്കുകള്‍, ജെ. ബ്ലോക്ക്- തിരുവായ്ക്കരി പാടശേഖരസമിതികള്‍, മലരിക്കല്‍ ബോട്ട് ഓപ്പറേറ്റേഴ്‌സ് അസോസിയേഷന്‍-തിരുവാര്‍പ്പ് എന്നിവരാണ് സംഘാടകര്‍.

🔹ചൂട്‍ കടുത്തതോടെ പൊട്ടന്‍ചിറയിലും-നെല്ലിക്കാ മലയിലും കാട്ടുതീ പടര്‍ന്നു പിടിക്കുന്നത് തുടര്‍ക്കഥയാകുന്നു. കഴിഞ്ഞദിവസം പകലാണ് കുടപ്പനമൂടിനു സമീപത്തെ നുള്ളിയോട്, നെല്ലിക്കാമല, പോട്ടന്‍ചിറ എന്നിവിടങ്ങളിൽ കാട്ടുതീപടര്‍ന്നത്. റബര്‍ തോട്ടങ്ങളിലും മലയോരത്തെ കുറ്റിക്കാടുകളിലും കരിയില മൂടിക്കിടക്കുന്നതു തീ പടരുന്നതിനു കാരണമായി. പ്രദേശവാസികൾ സംഘടിതമായി ഭാഗികമായി തീ നിയന്ത്രിക്കുന്നതിനിടെ പാറശാലയില്‍നിന്നു ഫയര്‍ഫോഴ്‌സ് സംഘമെത്തി വൈകുന്നേരത്തോടെ തീ നിയന്ത്രിച്ചിരുന്നു.

🔹നെടുമങ്ങാട് കാട്ടുപന്നി കുറുകെ ച്ചാടിയതിനെത്തുടർന്നു നിയന്ത്രണംവിട്ട ബുള്ളറ്റിൽനിന്നു വീണ രണ്ടു യുവാക്കൾക്കു പരിക്കേറ്റു. നേമം കാരയ്ക്കാമണ്ഡപം സ്വദേശിയായ അബു താഹിർ (48), പോത്തൻകോട് സ്വദേശി സാജിദ് (38) എന്നിവർക്കാണു പരിക്കേറ്റത്. കഴിഞ്ഞദിവസം രാത്രി ഒന്പതോടെ പനവൂർവച്ചായിരുന്നു അപകടം. അബു താഹിറിന്‍റെ മുഖത്തെ എല്ലു പൊട്ടുകയും കാലിനും കൈകൾക്കും സാരമായ പരിക്കേൽക്കുകയും ചെയ്തു.സാജിദിനു മുഖത്താണു പരിക്കേറ്റത്. ആംബുലൻസിൽ നെടുമങ്ങാട് ജില്ലാ ആശുപത്രിയിൽ പ്രവേശിപ്പിച്ച യുവാക്കളെ പ്രാഥമിക ശുശ്രൂഷ നൽകി തിരുവനന്തപുരം മെഡിക്കൽ കോളജിലേക്കുമാറ്റി. ഇവർ സഞ്ചരിച്ച ബുള്ളറ്റ് ഭാഗികമായി തകർന്നു. നെടുമങ്ങാട് മഞ്ച – അരുവിക്കര റോഡിൽ ടി.എച്ച്.എസിനു സമീപം കാട്ടുപന്നിയിടിച്ചു ഓട്ടോറിക്ഷ മറിഞ്ഞു ഡ്രൈവർ കളത്തറ സ്വദേശി സത്യദാസിനു (60) കഴിഞ്ഞദിവസം പരിക്കേറ്റിരുന്നു.

🔹മൺറോത്തുരുത്തിലെ ചെമ്മീൻപാടങ്ങളിൽ ചെമ്മീനുകൾ കൂട്ടത്തോടെ ചത്തൊടുങ്ങുന്നു. ലക്ഷങ്ങൾ ചെലവാക്കി ഫാമുകളിൽ രണ്ടരമാസത്തോളം തീറ്റകൊടുത്ത് പകുതി വളർച്ചയെത്തിയ ചെമ്മീനുകളാണ് കൂട്ടത്തോടെ ചത്തത്. വായ്പയെടുത്തും മറ്റും കൃഷിയിറക്കിയ കർഷകർ അപ്രതീക്ഷിതമായുണ്ടായ തിരിച്ചടിയിൽ കടക്കെണിയിലായി. മുപ്പതോളം പാടങ്ങളിലാണ് മൺറോത്തുരുത്തിൽ ചെമ്മീൻകൃഷിയിറക്കിയത്. ഇതിൽ ഇരുപത്തഞ്ചിലധികം ഫാമുകളിലെ ചെമ്മീനുകൾ മുഴുവനും നശിച്ചു.വനാമി, കാര (പുലിക്കൊഞ്ച്) ഇനങ്ങളിലെ ചെമ്മീനുകളാണ് മൺറോതുരുത്തിൽ കൃഷിചെയ്യുന്നത്. ചത്ത കാരച്ചെമ്മീനുകളിൽ വെള്ളപ്പാണ്ട് രോഗത്തിന്‍റെ ലക്ഷണങ്ങളുണ്ടായിരുന്നു. കാരച്ചെമ്മീനുകൾക്കു രോഗബാധ സാധ്യതയുള്ളതിനാൽ കർഷകരിൽ 90 ശതമാനവും വനാമി ചെമ്മീനുകളാണ് കൃഷിചെയ്യുന്നത്. അതേസമയം രോഗപ്രതിരോധശേഷിയുള്ള വനാമി ചെമ്മീനുകൾ ചത്തുപൊങ്ങിയതിന്‍റെ കാരണം വ്യക്തമല്ല. അഞ്ചോ ആറോ കർഷകർമാത്രമാണ് കാരച്ചെമ്മീനിൽ ഭാഗ്യം പരീക്ഷിച്ചത്.

🔹16കാരിയെ പീഡിപ്പിച്ച കേസിൽ പോലീസിൽനിന്നു സ്വയം വിരമിച്ചയാൾ നിലമ്പൂർ പോലീസിന്‍റെ പിടിയിൽ. മോട്ടിവേഷണൽ സ്പീക്കറായ ഫിലിപ്പ് മമ്പാടാണ് പിടിയിലായത്.
2025 സെപ്റ്റംബറിൽ 16കാരി കോഴിക്കോട് ചേവായൂർ പോലീസിൽ നൽകിയ പരാതി ചോവായൂർ പോലീസ് നിലമ്പൂർ പോലീസിനു കൈമാറിയിരുന്നു. കാസർഗോഡുള്ള ലോഡ്ജിൽ കൊണ്ടുപോയി പീഡിപ്പിച്ചുവെന്ന പരാതിയിലാണ് ഇയാൾക്കെതിരെ പോലീസ് കേസെടുത്തിട്ടുള്ളത് അറസ്റ്റ് രേഖപ്പെടുത്തി കോടതിയിൽ ഹാജരാക്കുമെന്നു പോലീസ് അറിയിച്ചു.
മോട്ടിവേഷൻ ക്ലാസിന്‍റെ പേരിൽ കൂട്ടികൊണ്ടു
പോയി പീഡിപ്പിച്ചതെന്ന് കൗൺസലിംഗിനിടയിൽ പെൺകുട്ടി പറഞ്ഞിരുന്നു. പെരിന്തൽമണ്ണ എസ്ഐ ആയിരിക്കെ ലഹരിക്കെതിരെ മോട്ടിവേഷൻ ക്ലാസുകൾ എടുക്കുന്നതിനായി സർവീസിൽനിന്ന് ഇയാൾ സ്വയം വിരമിക്കുകയായി
രുന്നു. അറസ്റ്റ് ഉൾപ്പെടെയുള്ള നടപടികളിലേക്കു നിലമ്പൂർ പോലീസ് കടന്നിട്ടുണ്ട്. അറസ്റ്റ് രേഖപ്പെടുത്തിയ ശേഷം ഇന്നു തന്നെ കോടതിയിൽ ഹാജരാക്കും.

🔹ജവഹര്‍ നഗര്‍ വസ്തുതട്ടിപ്പുമായി ബന്ധപ്പെട്ട് ശാസ്തമംഗലം സബ്‌ രജിസ്ട്രാര്‍ കെ.എസ്. ലക്ഷ്മി (55) യെ മ്യൂസിയം പോലീസ് കസ്റ്റഡിയില്‍ വാങ്ങി. ഇന്നലെയാണ് ഇവരെ കസ്റ്റഡിയില്‍ വാങ്ങിയത്. ഇന്നു പ്രതിയുമായി ശാസ്തമംഗലം സബ്‌ രജിസ്ട്രാര്‍ ഓഫീസില്‍ വിശദമായ തെളിവെടുപ്പു നടത്തും. വൈകുന്നേരം കോടതിയില്‍ ഹാജരാക്കും. അനില്‍ തമ്പിയുടെ നിര്‍ദേശപ്രകാരം വ്യാജരേഖചമച്ച് ഡോറ അസറിയ ക്രിപ്‌സിന്‍റെ വസ്തുതട്ടിയെടുക്കുന്നതിന് അനന്തപുരി മണികണ്ഠനു വേണ്ടുന്ന എല്ലാ ഒത്താശയും അധികാരത്തിലിരുന്നുകൊണ്ടു സഹായങ്ങളും ചെയ്തത് ലക്ഷ്മിയാണ്.ഇവര്‍ക്ക് കുറഞ്ഞത് 10 വര്‍ഷമായി മണികണ്ഠനുമായി പരിചയമുണ്ടെന്നാണു പോലീസ് നല്‍കുന്ന സൂചന. പ്രധാന പ്രതികള്‍ അറസ്റ്റിലാകുമ്പോഴും ലക്ഷ്മി ഫോണ്‍ മുഖാന്തരം മറ്റുള്ള പ്രതികളുമായി ബന്ധപ്പെട്ടിരുന്നുവെന്നതിനു സൂചന ലഭിച്ചിട്ടുണ്ട്. ലക്ഷ്മി കൈപ്പറ്റിയ 10 ലക്ഷം രൂപ വിനിയോഗിച്ച് സബ്‌രജിസ്ട്രാര്‍ ഓഫീസിലെ ചില ജീവനക്കാര്‍ക്ക് സ്മാര്‍ട്ട് ഫോണുകള്‍ വാങ്ങി നല്‍കിയിരുന്നു. ഇക്കാര്യങ്ങളും അന്വേഷിക്കുമെന്നു പോലീസ് വ്യക്തമാക്കി.

🔹കേരള ഹൈക്കോടതിയിലെ ഏഴ് അഡീഷണല്‍ ജഡ്ജിമാരെ സ്ഥിരം ജഡ്ജിമാരാക്കാൻ സുപ്രീംകോടതി കൊളീജിയം രാഷ്‌ട്രപതിക്കു ശിപാര്‍ശ നല്‍കി.ജസ്റ്റീസുമാരായ എം.എ. അബ്‌ദുള്‍ ഹക്കിം, വി.എം. ശ്യാംകുമാര്‍, ഹരിശങ്കര്‍ വി. മേനോന്‍, എസ്. മനു, എസ്. ഈശ്വരന്‍, പി.എം. മനോജ്, എം.ബി. സ്‌നേഹലത എന്നിവരാണ് സുപ്രീംകോടതി കൊളീജിയത്തിന്‍റെ ശിപാര്‍ശപ്രകാരം സ്ഥിരം ജഡ്ജിമാരാകുന്നവര്‍.

🔹നവാഗതരായ നമീബിയയെ 93 റൺസുകൾക്ക് തകർത്തു ടൂർണമെന്റ് ഫേവറൈറ്റുകൾ എന്ന പട്ടം അരക്കെട്ടുറപ്പിച്ച് ഇന്ത്യ. ഡൽഹിയിലെ അരുണ്‍ ജെയ്റ്റ്ലി സ്റ്റേഡിയത്തിൽ 210 റൺസെന്ന വിജയലക്ഷ്യം തേടി ബാറ്റിങ്ങിനിറങ്ങിയ നമീബിയയെ 116 റൺസിനു പുറത്താക്കിയാണ് ഇന്ത്യ ലോകകപ്പിലെ തുടർച്ചയായ രണ്ടാം ജയം സ്വന്തം പേരിലാക്കിയത്. ബാറ്റുകൊണ്ടും പന്ത് കൊണ്ടും ഒരുപോലെ തിളങ്ങിയ ഹർദിക് പാണ്ട്യയാണ് കളിയിലെ താരം.വമ്പൻ ലക്ഷ്യ തേടിയിറങ്ങിയ നമീബിയയെ മൂന്ന് വിക്കറ്റെടുത്ത വരുൺ ചക്രവർത്തിയും രണ്ടു വിക്കറ്റ് വീതം സ്വന്തമാക്കിയ അക്സർ പട്ടേലും ഹർദിക് പാണ്ട്യയും ചേർന്നാണ് കറക്കിവീഴ്ത്തിയത്. നമീബിയയ്ക്കു വേണ്ടി ഓപ്പണർ ലൗറേൻ സ്റ്റീൻകാംപ് 29 റൺസും സഹ ഓപ്പണറായ ഫ്രൈലിംക്ക് 22 റൺസും നേടി.നേരത്തെ, ടോസ് നഷ്ടപ്പെട്ടു ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ 9 വിക്കറ്റ് നഷ്ടത്തിൽ 209 റണ്സെടുത്തു. അർധസെഞ്ചുറികൾ നേടിയ ഹർദിക് പാണ്ട്യയുടെയും (52) ഓപ്പണർ ഇഷാൻ കിഷണിന്റെയും (61) ബാറ്റിംഗ് ആണ് ഇന്ത്യയെ 200 കടത്തിയത്.തിലക് വര്‍മ്മ 21 ബോളിൽ 25 റൺസും , ശിവം ദുബെ 16 ബോളിൽ 23 റൺസ് നേടി. എട്ടു പന്തുകളിൽ മൂന്നു സിക്സറുകളടക്കം 22 റൺസെടുത്ത സഞ്ജു സാംസൺ ടീമിന് മികച്ച തുടക്കം നൽകി.
ഇന്ത്യയുടെ അടുത്ത മത്സരം ഞായറാഴ്ച ചിരവൈരികളായ പാകിസ്താനെതിരെ ആണ്. കൊളംബോയിലെ ആർ പ്രേമദാസ സ്റ്റേഡിയത്തിൽ നടക്കുന്ന മത്സരത്തിൽ വിജയം നേടി ഗ്രൂപ്പിലെ ആധിപത്യം ഉറപ്പിക്കുകയായിരിക്കും ഇന്ത്യയുടെ ലക്‌ഷ്യം.

🔹സീനിയർ വനിതാ ഏകദിന ടൂർണമെന്റിൽ കേരളത്തിന് തുടർച്ചയായ മൂന്നാം വിജയം. ത്രിപുരയെ അറുപത് റൺസിനാണ് കേരളം തോല്പിച്ചത്. ആദ്യം ബാറ്റ് ചെയ്ത കേരളം 50 ഓവറിൽ ഒൻപത് വിക്കറ്റ് നഷ്ടത്തിൽ 265 റൺസെടുത്തു. മറുപടി ബാറ്റിങ്ങിന് ഇറങ്ങിയ ത്രിപുരയ്ക്ക് 50 ഓവറിൽ എട്ട് വിക്കറ്റ് നഷ്ടത്തിൽ 205 റൺസ് മാത്രമാണ് നേടാനായത്. സെഞ്ച്വറി നേടുകയും രണ്ട് വിക്കറ്റ് വീഴ്ത്തുകയും ചെയ്ത ക്യാപ്റ്റൻ ടി ഷാനിയാണ് കേരളത്തിൻ്റെ വിജയശില്പി.
തുടർച്ചയായ രണ്ടാം മത്സരത്തിലും ഓപ്പണർമാരായ ക്യാപ്റ്റൻ ഷാനിയും അക്ഷയയും ചേർന്ന് മികച്ച തുടക്കമാണ് കേരളത്തിന് നല്‍കിയത്. ഇരുവരും ചേർന്ന് ഓപ്പണിങ് വിക്കറ്റിൽ 84 റൺസ് കൂട്ടിച്ചേർത്തു. 41 റൺസെടുത്ത് അക്ഷയ മടങ്ങിയെങ്കിലും മറുവശത്ത് ഉറച്ചുനിന്ന ഷാനിയുടെ ഇന്നിങ്സ് കേരളത്തിന് തുണയായി. മൂന്നാം വിക്കറ്റിൽ സജന സജീവനൊപ്പം ചേർന്ന് ഷാനി അനായാസം ഇന്നിങ്സ് മുന്നോട്ടുനീക്കി. ഇരുവരും ചേർന്നുള്ള കൂട്ടുകെട്ടിൽ 61 റൺസ് പിറന്നു. 19 റൺസെടുത്ത സജനയ്ക്ക് ശേഷമെത്തിയ എസ് ആശയും മികച്ച രീതിയിൽ ബാറ്റ് വീശി. 26 പന്തിൽ 34 റൺസാണ് ആശ നേടിയത്. മറുവശത്ത് സെഞ്ച്വറി പൂർത്തിയാക്കിയ ഷാനി റണ്ണൗട്ടാവുകയായിരുന്നു. 123 പന്തിൽ 17 ബൗണ്ടറികളടക്കം 111 റൺസാണ് ഷാനി നേടിയത്. നജ്ല സി.എം.സി 18 റൺസുമായി പുറത്താകാതെ നിന്നു. ത്രിപുരയ്ക്ക് വേണ്ടി അംബേശ ദാസ് നാലും തമന്ന നിഗം രണ്ടും വിക്കറ്റുകൾ വീഴ്ത്തി.

🔹മലയാള സിനിമയിൽ തരംഗമായി മാറിയ നിവിൻ പോളി ചിത്രം ‘പ്രേമം’ വീണ്ടും വെള്ളിത്തിരയിലേക്ക്. ചിത്രം പുറത്തിറങ്ങി പത്ത് വർഷം തികയുന്ന വേളയിലാണ് പ്രേമത്തെ സ്നേഹിക്കുന്നവർക്കായി അണിയറപ്രവർത്തകർ വീണ്ടും റീ-റിലീസ് ഒരുക്കുന്നത്.വാലന്‍റൈന്‍സ് ഡേ സ്പെഷല്‍ റീ റിലീസ് ആയാണ് ചിത്രം വീണ്ടും കാണികളിലേക്ക് എത്തുന്നത്.ഒരു കാലഘട്ടത്തിലെ യുവാക്കളുടെ ഹരമായിരുന്ന ജോർജ്ജും മലർ ടീച്ചറും സെലിനുമെല്ലാം ഒരിക്കൽ കൂടി വലിയ സ്ക്രീനിൽ എത്തുന്നതിന്റെ ആകാംക്ഷയിലാണ് ആരാധകർ
അൽഫോൺസ് പുത്രൻ സംവിധാനം ചെയ്ത പ്രേമം 2015-ലാണ് ആദ്യമായി തിയേറ്ററുകളിൽ എത്തിയത്. അന്ന് കേരളത്തിന് പുറമെ തമിഴ്‌നാട്ടിലും വലിയ ചലനമുണ്ടാക്കാൻ പ്രേമത്തിന് സാധിച്ചിരുന്നു. മുണ്ടും മടക്കിക്കുത്തി കറുത്ത ഷർട്ടും ധരിച്ചെത്തിയ ജോർജ്ജും, തമിഴ് ചുവയുള്ള മലയാളം സംസാരിക്കുന്ന മലർ മിസ്സും മലയാളികളുടെ മനസ്സിൽ ഇന്നും മായാതെയുണ്ട്. സായ് പല്ലവി, അനുപമ പരമേശ്വരൻ, മഡോണ സെബാസ്റ്റ്യൻ എന്നിവരുടെ കരിയറിലെ തന്നെ വലിയ ബ്രേക്ക് ആയിരുന്നു ഈ ചിത്രം.
പിവിആർ ഐനോക്സ് തിയേറ്റർ ശൃംഖല വഴിയാണ് ചിത്രത്തിന്റെ ലിമിറ്റഡ് റീ-റിലീസ് ഒരുക്കിയിരിക്കുന്നത്. കേരളം ഉൾപ്പെടെ നാല് തെന്നിന്ത്യൻ സംസ്ഥാനങ്ങളിലെ 14 സെന്ററുകളിലാണ് ഫെബ്രുവരി 13 മുതൽ ചിത്രം എത്തുക. കേരളത്തിൽ കൊച്ചി, തിരുവനന്തപുരം എന്നിവിടങ്ങളിലും, തമിഴ്‌നാട്ടിൽ ചെന്നൈ, കോയമ്പത്തൂർ, കർണാടകത്തിൽ ബെംഗളൂരു, മംഗളൂരു, തെലങ്കാനയിൽ ഹൈദരാബാദ് എന്നീ പ്രധാന നഗരങ്ങളിലും ചിത്രം റിലീസ് ചെയ്യും.

🔹തെലുങ്ക് താരം നിഖിൽ സിദ്ധാർഥയെ നായകനാക്കി ഭരത് കൃഷ്ണമാചാരി സംവിധാനം ചെയ്യുന്ന പാൻ ഇന്ത്യൻ ചിത്രം സ്വയംഭൂവിന്‍റെ ടീസർ റിലീസായി. യോദ്ധാവിന്‍റെ വേഷത്തിലാണ് നിഖിൽ എത്തുന്നത്. സംയുക്ത മേനോൻ ആണ് നായിക.പിക്‌സൽ സ്റ്റുഡിയോസിന്‍റെ ബാനറിൽ ഭുവനും ശ്രീകറും ചേർന്നാണ് നിർമിക്കുന്നത്. ടാഗോർ മധുവാണ് ചിത്രം അവതരിപ്പിക്കുന്നത്. തന്‍റെ കഥാപാത്രത്തിന്‍റെ ആധികാരികതയ്ക്കായി കഠിനമായ ശാരീരിക പരിശീലനത്തിന് വിധേയനായ നിഖിൽ വേഷത്തിനായി ഏകദേശം രണ്ട് വർഷത്തോളമാണ് ചെലവഴിച്ചത്. വൻ ബജറ്റും ഉയർന്ന സാങ്കേതിക നിലവാരവുമുള്ള വലിയ ക്യാൻവാസിൽ, പീരിയോഡിക് യുദ്ധപശ്ചാത്തലത്തിലാണ് ഒരുക്കിയിരിക്കുന്നത്.ഛായാഗ്രഹണം: കെ.കെ. സെന്തിൽ കുമാർ, സംഗീതം: രവി ബസ്രൂർ, എഡിറ്റിംഗ്: തമ്മി രാജു, പ്രൊഡക്ഷൻ ഡിസൈനേഴ്‌സ്: എം. പ്രഭാകരൻ, രവീന്ദർ, സംഭാഷണം: വിജയ് കാമിസേട്ടി.

💦 ഗുരുജിയുടെ വാക്കുകൾ

എല്ലാ ബന്ധങ്ങളുടെയും ബന്ധത്തിന്റെ ആഴം സംസാരമാണ്. ബന്ധത്തിന്റെ ആഴം കുറയുമ്പോൾ സംസാരിക്കാൻ വാക്കുകൾ ഇല്ലാതാകും. ചിലപ്പോൾ അവർക്കിടയിൽ ഒരു പ്രശ്നവും ഉണ്ടാകില്ല. സ്നേഹം കൂടുമ്പോൾ ആണ് പരിഭവം കൂടുന്നത്. ഒരാൾ പിണങ്ങിയിരിക്കുന്നതിന് ചിലപ്പോൾ കാരണം നിസ്സാരമായിരിക്കും. അടുത്ത സുഹൃത്ത് ഒരു യാത്ര പോയത് തന്നോട് പറഞ്ഞില്ല, അല്ലെങ്കിൽ അവന്റെ ഒരു സന്തോഷം തന്നോട് പങ്കു വെച്ചില്ല,എന്നൊക്കെയുള്ള വളരെ ചെറിയ കാര്യങ്ങൾ. തന്നോട് സ്നേഹം ഉണ്ടെങ്കിൽ അവൻ അതു തന്നോട് പറഞ്ഞേനെ.. താൻ സ്നേഹിക്കുന്നത് പോലെ അവൻ തന്നെ സ്നേഹിക്കുന്നില്ല. ഇങ്ങോട്ടു സ്നേഹമില്ലെങ്കിൽ പിന്നെ താൻ മാത്രം എന്തിനാ അങ്ങോട്ട്‌ സ്നേഹിക്കുന്നത് എന്ന തോന്നലിൽ അവൻ അൽപ്പം പിണക്കം ഉള്ളിൽ നടിച്ചു പിൻവാങ്ങി നിൽക്കും. ഇതൊന്നുമറിയാത്ത മറ്റെയാൾ അവൻ തന്നോട് മിണ്ടുന്നില്ലല്ലോ എന്ന് കരുതി അവനും മൗനം പാലിക്കും. സംസാരം കുറയുന്നത്തോടെ ബന്ധത്തിന്റെ ആഴവും കുറഞ്ഞു തുടങ്ങും. പിന്നെ പരസ്പരം പറഞ്ഞു പോയ വാക്കുകൾക്ക് അമിതമായ അർഥങ്ങൾ കണ്ടു തുടങ്ങും. പിന്നീട് ഒരുമിച്ചുള്ള യാത്ര പോലും ദുസ്സഹമായി തുടങ്ങും. കുടുംബജീവിതത്തിലും സംഭവിക്കുന്നത് ഇതൊക്ക തന്നെ ആണ്.

തയ്യാറാക്കിയത്: കപിൽ ശങ്കർ

104 Likes

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 13 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ഫോമയുടെ ഇന്നലെ, ഇന്ന്, നാളെ ചര്‍ച്ചയാകുന്നു; സൗഹൃദ സംഗമം ഒക്ടോബര്‍ 16-ന് ചിക്കാഗോയില്‍

കോതമംഗലം മാർ അത്തനേഷ്യസ് കോളേജ് പൂർവ വിദ്യാർത്ഥി കുടുംബ സംഗമം നവംബർ 13 മുതൽ 15 വരെ ഫിലാഡൽഫിയയിൽ

ക്രിസ്റ്റ പൈക്കിന്റെ വധശിക്ഷ പരാജയപ്പെട്ടു; നില അതീവ ഗുരുതരം

LEAVE A REPLY Cancel reply

Most Popular

സംസ്ഥാനത്ത് പനി ബാധിച്ച് ഒരു മരണം കൂടി

തിരുവല്ല നിരണത്ത് വീട്ടിലെ ഫ്രിഡ്ജ് പൊട്ടിത്തെറിച്ച് വീട് വാസയോഗ്യമല്ലാത്ത വിധം കത്തിനശിച്ചു, ആളപായമില്ല

Recent Comments

EDITOR PICKS

സംസ്ഥാനത്ത് പനി ബാധിച്ച് ഒരു മരണം കൂടി

തിരുവല്ല നിരണത്ത് വീട്ടിലെ ഫ്രിഡ്ജ് പൊട്ടിത്തെറിച്ച് വീട് വാസയോഗ്യമല്ലാത്ത വിധം കത്തിനശിച്ചു, ആളപായമില്ല

POPULAR POSTS

ഒക്ടോബർ 2 ഗാന്ധിജയന്തി: ജീവിത വിജയത്തിന് വിദ്യാർഥികൾക്കുള്ള ഗാന്ധിസൂക്തങ്ങൾ

ഫ്ലൈദുബായ് വിമാനത്തിനുള്ളിലെ ആക്രമണം; പരിക്കേറ്റ ഇന്ത്യൻ പൈലറ്റിൻ്റെ ആരോഗ്യനില തൃപ്തികരം

POPULAR CATEGORY

ABOUT US

FOLLOW US