ഡസൽഡോർഫ്(ജർമനി)- യൂറോ കപ്പ് ഫുട്ബോളിൽ ഓസ്ട്രിയക്ക് എതിരെ ഫ്രാൻസിന് ജയം. കിലിയൻ എംബപ്പെയെ പോലെയുള്ള ലോകോത്തര താരങ്ങളുടെ സാന്നിധ്യമുണ്ടായിട്ടും സെൽഫ് ഗോളിലായിരുന്നു ഫ്രാൻസിന്റെ ജയം. മുപ്പത്തിയെട്ടാമത്തെ മിനിറ്റിൽ മാക്സ്മിലൻ വോബറിന്റെ സെൽഫ് ഗോളിലായിരുന്നു ഫ്രാൻസ് ജയിച്ചത്. ഫ്രാൻസിന്റെ ഗോൾ പോസ്റ്റിലേക്ക് വിജയകരായ നീക്കം നടത്തി തൊട്ടടുത്ത നിമിഷമാണ് ഓസ്ട്രിയയുടെ സ്വന്തം വലയിൽ പന്തു വീണത്.
കിലിയൻ എംബപ്പയുടെ നീക്കം പ്രതിരോധിക്കുന്നതിനിടെ മാക്സ് വോബറിന്റെ ഹെഡർ ഓസ്ട്രിയയുടെ തന്നെ ഗോൾ പോസ്റ്റിന്റെ വലത്തേ മൂലയിൽ പതിക്കുകയായിരുന്നു. മത്സരത്തിലെ അവസാനത്തെ പത്തുമിനിറ്റിൽ ഇരു ടീമുകളും മരണക്കളിയാണ് പുറത്തെടുത്തത്. ഇരുടീമുകളും ഉടൻ ഗോൾ നേടുമെന്ന പ്രതീതി ജനിപ്പിക്കുന്നതിനിടെ ഫൈനൽ വിസിൽ മുഴങ്ങി.
മുൻ നിര ടീമുകളെ എങ്ങിനെയാണ് താരതമ്യേന റാങ്കിംഗിൽ പിറകിലുള്ള ടീമുകൾ നേരിടുന്നത് എന്നതിന്റെ ഉത്തമ ഉദാഹരണം കൂടിയായിരുന്നു ഇന്നത്തെ ഫ്രാൻസ്-ഓസ്ട്രിയ മത്സരം. ഫ്രാൻസിനെ വരുതിയിലാക്കാൻ ഓസ്ട്രിയക്ക് സാധിച്ചു. ഫ്രാൻസിന്റെ ഗോളെന്നുറപ്പിച്ച ചില അവസരങ്ങൾ നിർഭാഗ്യം കൊണ്ട് പാഴാകുകയും ചെയ്തു.
