🌺 ശുഭദിനം 🌺 – 2024 | ജൂൺ 25 | ചൊവ്വ ✍ അർച്ചന കൃഷ്ണൻ

“ജീവിത ദു:ഖമുണ്ടാക്കിയ
കണ്ണുനീരിൽ ഇല്ലാതെയാവേണ്ടത്
അതേവരെയുണ്ടായിരുന്ന
അഹന്തയാണ് “

രവീന്ദ്രനാഥ ടാഗോർ

നമ്മളിൽ പലരും ഇങ്ങനെയൊക്കെ തന്നെയാണ്. നമ്മളുടെ പല പ്രശ്നങ്ങൾക്കും ഉത്തരങ്ങൾ എളുപ്പം കിട്ടുമെന്ന് വിചാരിച്ച് പല സ്ഥലങ്ങളിലും നാം അലയാറുണ്ട്. ചിലർ തീർത്ഥാടന കേന്ദ്രങ്ങളിൽ,ചിലർ ആത്മീയ ഗുരുക്കന്മാരെ,ചിലർ ജ്യോത്സ്യന്മാരെ, ചിലർ പ്രാത്ഥനയിലൊക്കെ അഭയം പ്രാപിക്കാറുണ്ട്. പ്രശ്നങ്ങളെ നേരിടാൻ വയ്യാതെ അവയിൽ നിന്നുള്ള ഒളിച്ചോട്ടം നടത്തുന്നവരുമുണ്ട്.

ജീവിതത്തിൽ ഒരു പ്രതിസന്ധി ഉടലെടുത്താൽ അതിനെ നേരിടാൻ പലർക്കും മടിയാണ്. പ്രശ്നങ്ങളിൽ നിന്ന് ഒളിച്ചോടാനാണ് പലർക്കും താത്പര്യം. പ്രശ്നങ്ങൾക്ക് എളുപ്പത്തിൽ ഉത്തരം കിട്ടുമെന്ന് കരുതി പലയിടങ്ങളിലും അന്വേഷിച്ച് സമയവും സമ്പത്തും പാഴാക്കുവാൻ പക്ഷേ യാതൊരു മടിയുമില്ല. നമ്മുടെ വർത്തമാന കാല ജീവിതം പലവിധ തിരക്കുകളാൽ സമ്പന്നമാണ്. എന്നാൽ ഈ തിരക്കുകൾ യഥാർത്ഥ പ്രശ്നങ്ങളിൽ നിന്ന് ഓടിയൊളിക്കാനുള്ള ഒരു ഉപാധിയും കൂടിയാണ് പലർക്കും. അത്തരക്കാർ തിരക്കുകളിൽനിന്നും ഒരിടവേളയെടുത്ത് പ്രശ്നങ്ങളെ നേരിടാൻ മനസ്സുറപ്പ് കാണിക്കുകയാണ് വേണ്ടത്.കൂരിരുട്ടിൽ നക്ഷത്രങ്ങളും, സമുദ്രത്തിൽ ദ്വീപുകളുമുള്ളതുപോലെ ഏതു മഹാവിപത്തിലും സഹായത്തിനായി ഒരു കരം വന്നുചേരും.

ഏവർക്കും ഹൃദയം നിറഞ്ഞ ശുഭദിനാശംസകൾ

അർച്ചന കൃഷ്ണൻ