👬👫കുട്ടീസ് കോർണർ 👬👫 (മുപ്പത്തി മൂന്നാം വാരം)

ഹായ് കുട്ടീസ്!! ഇന്ന് നമുക്ക്(A)കുസൃതി ചോദ്യങ്ങൾ (B)നാക്കുളുക്കി
(C)പദ്യം (D)സ്റ്റാമ്പ് കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കു ന്നുണ്ടന്ന് വിശ്വസിയ്ക്കുന്നു.😍

എന്ന് സ്വന്തം
ശങ്കരിയാന്റി.

👫A) കുസൃതി ചോദ്യങ്ങൾ (11)

1)ര യിൽ തുടങ്ങി ര യിൽ അവസാനിക്കുന്ന ഒരു പദം പറയാമോ?

രണ്ടര

2)തവളയുടെ മുൻപിലും കഴുത യുടെ പിൻപിലും കാണുന്നതെന്ത്?

ത

3)ഇടത്‌ കൈകൊണ്ട്‌ തൊടാം, വലതു കൈകൊണ്ട്‌ തൊടാൻ പറ്റില്ല. എന്താണത്‌?

വലതു കൈപ്പത്തിയുടെ പുറം ഭാഗം.

4)ആവശ്യമില്ലാത്തപ്പോൾ എടുത്തു വെക്കും … ആവശ്യമുള്ളപ്പോൾ വലിച്ചെറിയും … എന്താണ്?

വല

5) ഒരു മാവിലുള്ള മാങ്ങകളുടെ എണ്ണം ഒരു കണ്ണുപൊട്ടൻ കൃത്യമായി എണ്ണി‍പ്പറഞ്ഞു എങ്ങനെ?

ഒരു കണ്ണല്ലേ പൊട്ടിയിട്ടുളൂ ,,,,,, മറ്റേ കണ്ണിന്നു കുഴപ്പമൊന്നുമില്ലല്ലോ

6)ഭക്ഷണം കഴിയ്ക്കാനായി റെസ്റ്റോറന്റിൽ കയറിയ നാലു കൂട്ടുകാർ മസാല ദോശയ്ക്ക് ഓർഡർ കൊടുത്തെങ്കിലും എല്ലാർക്കും കിട്ടിയില്ല. കാരണം?

” എല്ലുള്ള” മസാല ദോശ എവിടെയെങ്കിലും കിട്ടുമോ ?

7)രമണനും ചന്ദ്രികയും ചിത്രരചനാ ക്ലാസിൽ ചേർന്നു… മാഷ് അവരെ ടെസ്റ്റ് ചെയ്യാനായി ഒരു വിഷയം കൊടുത്ത് ചിത്രം വരക്കാൻ പറഞ്ഞു… രമണൻ പെട്ടന്ന് വരച്ചുതീർന്നെങ്കിലും ചന്ദ്രികയ്ക്ക് വരക്കാൻ കഴിഞ്ഞില്ല… പടം വരച്ച് കഴിഞ്ഞ് വെറുതെയിരിക്കുന്ന രമണനോട് ചന്ദ്രിക തനിക്കുകൂടിയൊന്ന് വരച്ചു തരാൻ പറഞ്ഞു… പക്ഷേ പറ്റില്ലായെന്ന അർത്ഥത്തിൽ രമണനൊരു പാട്ടു പാടുകയാണ് ചെയ്തത്… ഏതു പാട്ടാണത്?

സ്വയം വര ചന്ദ്രികേ. സ്വപ്ന ഗായികേ …

8)ഒരാൾ , കാസറഗോഡ് നിന്നും ട്രെയിനിൽ തിരുവനന്തപുരത്ത് എത്താൻ ഒരു കൊല്ലം കഴിഞ്ഞുവെന്നു പറഞ്ഞു ,വിശദീകരിച്ചപ്പോൾ സംഗതി ശരിയാണ് മനസ്സിലായി . ഏങ്ങനെ ?

‘കൊല്ലം’ എന്ന സ്ഥലം കഴിഞ്ഞു വേണം തിരുവനന്തപുരം എത്താൻ

9)പോകുമ്പോൾ ആരും ഇഷ്ടപ്പെടുന്നില്ല… വരുമ്പോൾ എല്ലാവർക്കും ഇഷ്ടമാകും…?

കറണ്ട്

10)ആടിനെപ്പോലെ ശബ്ദിക്കുന്ന മാസം?

മേയ്

📗📗

👫B) നാക്കുളുക്കി

കുട്ടീസ്… കഴിഞ്ഞ ആഴ്ചകളുടെ തുടർച്ച യായി ഈ വാരത്തിലും നമുക്ക് ചില വരികൾ വേഗത്തിൽ ചൊല്ലി നോക്കാം. ടങ് ട്വിസ്റ്റർ എന്ന് ഇംഗ്ലീഷിൽ പറയുന്ന കുറച്ചു നാക്കുളുക്കി വാചകങ്ങൾ വേഗത്തിൽ വായിച്ചു രസിച്ചോളൂ.. 😍കഴിഞ്ഞ 2ആഴ്ചകളിലെ ചൊല്ലി നോക്കിയോ..?

16.അറയിലെയുറിയില്‍ ഉരിതൈര്..!!

17. പാറമ്മേല്‍ പൂള, പൂളമ്മേല്‍ പാറ..!!

18. വണ്ടി കുന്ന് കേറി, കുന്ന് വണ്ടി കേറി..!

19. അരമുറം താള്‌ ഒരു മുറം പൂള്‌..!

20.അലറലൊടലറലാനാലയില്‍ കാലികൾ..!

📗📗

👫C) പണ്ടേ പ്രചാരത്തിലുള്ള പദ്യങ്ങൾ(1)

ഹായ് കുട്ടീസ് ഈ വാരം മുതൽ നമുക്ക് പണ്ടേ നാട്ടിൽ പാടുന്ന കുട്ടി കവിതകൾ കൂടി വായിയ്ക്കാം… ട്ടോ

മണ്ണും വിണ്ണും

വിണ്ണിൽ വെട്ടം വിതറും സൂര്യൻ
കണ്ണിനു കൗതുകമാകുന്നു
മണ്ണിൽ ചേറു പുതച്ചു വരുന്നൊരു
മണ്ണിര കൗതുകമാകുന്നു
മണ്ണും വിണ്ണും പ്രകൃതിയുമെല്ലാം
മനുഷ്യന് സമ്പത്താകുന്നു.

📗📗

👫D) സ്റ്റാമ്പിന്റെ കഥ(14)

കോട്ടയ്ക്കല്‍ ആര്യവൈദ്യശാല

2002-ൽ ഭാരതീയ തപാൽ വകുപ്പ് കോട്ടക്കൽ ആര്യവൈദ്യശാലയുടെ ശതാബ്ദിയോടനുബന്ധിച്ചുള്ള സ്മരണിക തപാൽ സ്റ്റാമ്പ് പുറത്തിറക്കി.5 രൂപ മുഖവിലയുള്ള സ്റ്റാമ്പിൽ P.S വാര്യരുടെ ഛായാചിത്രം അലേഖനം ചെയ്താണ് പുറത്തിറക്കിയത്.

സാമൂതിരി രാജവംശത്തിന്റെ ശാഖകളിലൊന്നായ കിഴക്കേ കോവിലകത്തെ കുടുംബങ്ങളും അവരുടെ ആരാധനാലയങ്ങളും കൊട്ടാരങ്ങളും അധ്വാനശീലരായ കര്‍ഷകരും കൃഷിക്കാരും ഉള്‍പ്പെടെ നാനാജാതി മതസ്ഥര്‍ പാര്‍ത്തിരുന്ന ഒരു പ്രദേശമായിരുന്നു ഇന്നത്തെ മലപ്പുറം ജില്ലയിലെ കോട്ടക്കല്‍. ഒരു കാലത്ത് അവിടമാണ് ആയുര്‍വേദത്തിന്റെ പര്യായമായി ഇന്ന് ലോകം അറിയപ്പെടുന്ന പി.എസ്. വാര്യര്‍ (പന്നീമ്പള്ളി ശങ്കുണ്ണിവാര്യര്‍) 1902. -ൽസ്ഥാപിച്ച കോട്ടയ്ക്കല്‍ ആര്യവൈദ്യശാലയുടെ ആസ്ഥാനം.
ഭാരതീയ ആരോഗ്യ പരിപാലന രീതിയായ ആയുർവേദത്തിന്റെ ഉപയോഗത്തിനും പരിപോഷണത്തിന്നും വേണ്ടി സ്ഥാപിച്ച ഒരു സ്ഥാപനമാണ്‌ കോട്ടക്കൽ ആര്യവൈദ്യ ശാല.. അത് ആതുരാലയം എന്ന നിലയിൽ മദ്ധ്യമലബാറിലെ നിത്യസാധാരണക്കാരുടെ ആശ്രയ കേന്ദ്രമായിരുന്നു. വിശപ്പിനുള്ള ഭക്ഷണം പോലും പകർന്നു കൊടുത്ത മഹത്തായ ഇടമായിരുന്നു അത്. ചികിൽസായിടം ,അഭയം , കവന കൗമുദി പോലുള്ള കവിതയുടെ പ്രകാശനയിടം ,പി എസ് വി നാട്യസംഘം പോലുള്ള കഥകളിസംഘത്തിന്റെ പ്രവർത്തനയിടം, കൊടുങ്ങല്ലൂർക്കളരിയുടെ പ്രയോഗ സന്ദർഭയിടം, ലോകോത്തര കലാകാരന്മാർക്ക് നിരുപാധികം വന്ന പെർഫോം ചെയ്യാനുള്ള ഇടം എന്നിങ്ങനെ ചരിത്ര സന്ദർഭങ്ങളുടെ ഒരു ഹബ് ആയി കോട്ടക്കൽ മാറുന്നതാണ് പിന്നീടുള്ള ചരിത്രം
വൈദ്യരത്നത്തിന്റെ കാലത്തുതന്നെ ജാതിമതഭേദമില്ലാതെ എല്ലാവരെയും ചേർത്തുപിടിച്ചു ആര്യവൈദ്യശാല വിശ്വംഭരക്ഷേത്രം പണിതപ്പോൾ അവിടെ എല്ലാവർക്കും പ്രവേശനം അനുവദിച്ചു. വാര്യരുടെ ഭവനമായ കൈലാസമന്ദിരത്തിന്റെ പ്രവേശനകവാടത്തിൽ സർവമതസമഭാവനയുടെ അടയാളമായി ക്രിസ്ത്യൻ, ഹിന്ദു, മുസ്ലിം മതചിഹ്നങ്ങൾ കൊത്തി. മലബാർ കലാപം കോട്ടയ്ക്കലിനെ കാര്യമായി ബാധിക്കാതിരുന്നത് പി.എസ്. വാര്യർക്ക് തദ്ദേശീയർക്കിടയിലുണ്ടായിരുന്ന സ്വാധീനംകൊണ്ടുകൂടിയായിരുന്നു.മലയാളത്തിലെ ആദ്യത്തെ വൈദ്യമാസികയായ ധന്വന്തരി അദ്ദേഹം ആരംഭിച്ചു. ചികിത്സാസംബന്ധിയായ വിവിധ ഗ്രന്ഥങ്ങൾ രചിച്ചു. അവയിൽ പ്രധാനപ്പെട്ടതാണ് ചികിത്സാസംഗ്രഹം, ബൃഹച്ഛാരീരം, അഷ്ടാംഗസംഗ്രഹം തുടങ്ങിയവയാണ്.ആയുര്‍വേദത്തിന്റെ പ്രചാരണവും ജനങ്ങളില്‍ ആരോഗ്യബോധവും വളര്‍ത്തുകയായിരുന്നു മാസികയുടെ ലക്ഷ്യം.23 വര്‍ഷം മുടക്കമില്ലാതെ പ്രസിദ്ധീകരിച്ച വൈദ്യമാസികയെന്ന റെക്കോര്‍ഡും ധന്വന്തരിക്കാണ് മനുഷ്യസമുദായത്തിന് അദ്ദേഹം നൽകിയ അമൂല്യ സംഭാവനകൾ പരിഗണിച്ച് 1933ൽ അന്നത്തെ വൈസ്രോയി അദ്ദേഹത്തെ വൈദ്യരത്നം എന്ന ബഹുമതി നൽകി ആദരിച്ചു.
ഒരു നൂറ്റാണ്ടിലധികം പഴക്കമുള്ള ഈ സ്ഥാപനത്തിൽ ലോകത്തിലെ എല്ലാ ഭാഗങ്ങളിൽ നിന്നും ആളുകൾ ചികിൽസയ്ക്കായി എത്തുന്നു. ആയുർവേദ മരുന്നു നിർമ്മാണം, ആയുർവേദ മരുന്നുകളൂടെ ഗവേഷണം, ആയുർവേദ ഗ്രന്ഥങ്ങളുടെ പ്രസിദ്ധീകരണം, ആയുർവേദ കലാലയത്തിന്റെ നടത്തിപ്പ് തുടങ്ങിയ പ്രവൃത്തികളും ഈ സ്ഥാപനം നടത്തുന്നു.

ഇന്ത്യയുടെ നവോത്ഥാനവും ദേശീയതയും ഉള്‍ക്കൊണ്ട് ഉരുത്തിരിഞ്ഞുവന്ന സ്ഥാപനമാണ് കോട്ടയ്ക്കല്‍ ആര്യവൈദ്യശാല. അതുകൊണ്ടുതന്നെ അതിന്റെ പാരമ്പര്യം മറ്റ് സ്ഥാപനങ്ങളില്‍നിന്നും വ്യത്യസ്തമാണ്. ഇന്ന് ആഗോളതലത്തില്‍ ആയുര്‍വേദത്തിന് ലഭിച്ച അംഗീകാരത്തിനും ഇംഗ്ലീഷ് വൈദ്യ ശാസ്ത്രത്തെ പ്പോലും അതിശയിപ്പിക്കുന്ന ചികിത്സാരീതി തേടി നൂറുകണക്കിന് വിദേശികള്‍ കേരളത്തില്‍ എത്തുന്നതിനു പ്രധാന കാരണം കോട്ടയ്ക്കല്‍ ആര്യവൈദ്യ ശാലയാണ്‌.
ഇന്ന് രണ്ടായിരത്തി അഞ്ഞൂറുപേർക്ക് നേരിട്ടും പതിനായിരത്തിൽപ്പരമാളുകൾക്ക്അല്ലാതെയും തൊഴിൽ നൽകുന്ന സ്ഥാപനമാണ്ആര്യവൈദ്യശാല
ആയുര്‍വേദചികിത്സയ്ക്ക് ഒരു മഹാസ്ഥാപനം ഉണ്ടാക്കുകയും ആതുരശുശ്രൂഷയുടെ വിവിധ ശാഖകളില്‍ ഒരേസമയം വ്യാപരിക്കുകയും ഭാവിയിലെ ഭിഷഗ്വരന്മാരെ പരിശിലിപ്പിക്കുകയും അടിസ്ഥാന ശാസ്ത്രങ്ങളിലെ വിധിപ്രകാരം വിപുലരമായ തോതില്‍ ഔഷധങ്ങള്‍ തയ്യാറാക്കുകയും ചെയ്യുന്ന സംഘടിതശ്രമം എന്ന നിലയ്ക്കുണ്ടായ കോട്ടയ്ക്കല്‍ ആര്യവൈദ്യശാല കേരള നവോത്ഥാനത്തിന്റെ ദീപസ്തംഭമായി നിലകൊള്ളുന്നു.

📗📗

👫E) എളുപ്പത്തിൽ ഒരു ചിത്രം വരയ്ക്കാം (17)

അവതരണം
സൈമ ശങ്കർ
➖➖➖➖➖➖➖➖➖➖➖
👬👭👫👭👬👭👫👭👬👭