മൂന്നാർ: ഇടുക്കി മൂന്നാറിൽ തോട്ടം തൊഴിലാളി കാട്ടാന ആക്രമണത്തിൽനിന്ന് തലനാരിഴയ്ക്ക് രക്ഷപ്പെട്ടു. കണ്ണനിമല എസ്റ്റേറ്റിലാണ് ഞെട്ടിക്കുന്ന സംഭവം നടന്നത്. തോട്ടത്തിൽ ജോലി ചെയ്യുന്നതിനിടെ അപ്രതീക്ഷിതമായി എത്തിയ കാട്ടാന കൂട്ടത്തിന് മുന്നിൽപെട്ട തൊഴിലാളി ഓടി രക്ഷപ്പെടുകയായിരുന്നു.
പ്രദേശവാസികൾ ബഹളം വെച്ചും മുന്നറിയിപ്പ് നൽകിയുമാണ് കാട്ടാനകളുടെ ശ്രദ്ധ മാറ്റിയതും തൊഴിലാളിയെ സുരക്ഷിതമായി ഓടിമാറാൻ സഹായിച്ചതും. എന്നാൽ കാട്ടാനകൾ ആവർത്തിച്ച് തോട്ടം മേഖലയിലും ജനവാസ കേന്ദ്രങ്ങളിലും ഇറങ്ങുന്നത് പ്രദേശവാസികളുടെയും തൊഴിലാളികളുടെയും ജീവന് ഭീഷണിയായി മാറിയിരിക്കുകയാണ്.
വർദ്ധിച്ചുവരുന്ന കാട്ടാനശല്യത്തിന് ശാശ്വതമായ പരിഹാരം കാണണമെന്നും സുരക്ഷ ഉറപ്പാക്കാൻ വനംവകുപ്പ് അടിയന്തര നടപടി സ്വീകരിക്കണമെന്നും പ്രദേശവാസികൾ ശക്തമായി ആവശ്യപ്പെടുന്നു.
