കൊട്ടാരക്കര: റൂറൽ ജില്ലാ പോലീസ് മേധാവിയുടെ പേരിലുണ്ടാക്കിയ വ്യാജ വാട്സാപ്പ് അക്കൗണ്ടിലൂടെ പണപ്പിരിവിനു ശ്രമം. കൊല്ലം റൂറൽ ജില്ലാ പോലീസ് മേധാവി ടി.കെ. വിഷ്ണു പ്രദീപിന്റെ പ്രൊഫൈൽ ചിത്രമുള്ള വാട്സാപ്പ് അക്കൗണ്ടിൽനിന്നാണ് പണം ആവശ്യപ്പെട്ടുള്ള സന്ദേശം പോലീസുകാർക്ക് ലഭിച്ചത്. അടിയന്തരമായി 40,000 രൂപ വേണമെന്നും ഉടൻ തിരിച്ചുനൽകാമെന്നും അറിയിച്ചുള്ള സന്ദേശത്തിൽ പണം കൈമാറാനുള്ള അക്കൗണ്ട് നമ്പറും രേഖപ്പെടുത്തിയിരുന്നു.
സന്ദേശം ലഭിച്ചവർ ഉന്നത പോലീസ് ഉദ്യോഗസ്ഥരെ വിവരം ധരിപ്പിക്കുകയും അവർ എസ്പിയെ അറിയിക്കുകയുമായിരുന്നു. തട്ടിപ്പാണെന്നു തിരിച്ചറിഞ്ഞതോടെ സൈബർസെൽ അന്വേഷണം ആരംഭിച്ചു. ബാങ്ക് അക്കൗണ്ട് ഡൽഹിയിലുള്ളതാണെന്നു തിരിച്ചറിഞ്ഞു. സന്ദേശം സംബന്ധിച്ച കൂടുതൽ വിവരങ്ങൾ വാട്സാപ്പിനോട് തേടിയിരിക്കുകയാണ് പോലീസ്. മുമ്പും സമാനമായ ശ്രമങ്ങൾ നടന്നിരുന്നതായി പോലീസ് പറയുന്നു.
