തിരുവനന്തപുരത്ത് നിന്ന് ഡല്ഹിക്ക് പുറപ്പെട്ട എയര് ഇന്ത്യ വിമാനം ചെന്നൈയില് അടിയന്തരമായി ഇറക്കി.റഡാറിലെ തകരാറിനെ തുടര്ന്നാണ് വിമാനം എമര്ജന്സി ലാന്ഡിങ് നടത്തിയത്. കെ.സി വേണുഗോപാല്, കൊടിക്കുന്നില് സുരേഷ്, അടൂര് പ്രകാശ്, കെ. രാധാകൃഷ്ണന് തുടങ്ങിയ കേരളത്തിലെ എം.പിമാരും വിമാനത്തിലുണ്ടായിരുന്നു . എയര് ഇന്ത്യയുടെ എഐ 2455 വിമാനമാണ് ചെന്നൈയില് അടിയന്തര ലാന്ഡിങ് നടത്തിയത് .
വൈകിട്ട് 7.15ന് തിരുവനന്തപുരത്ത് നിന്ന് പറന്നുയരേണ്ട വിമാനം അരമണിക്കൂറോളം വൈകിയാണ് പുറപ്പെട്ടത്. ഒരു മണിക്കൂര് പറന്ന ശേഷം സാങ്കേതിക തകരാര് കണ്ടെത്തി. തുടര്ന്ന് ചെന്നൈയില് ലാന്ഡ് ചെയ്യുകയായിരുന്നു.മറ്റൊരു വിമാനത്തില് യാത്രക്കാരെ ഡല്ഹിയിലെത്തിച്ചു .യാത്രക്കാരെല്ലാം സുരക്ഷിതരാണ് .
