ലണ്ടൻ: ലണ്ടനിൽ ബ്രിട്ടീഷ് സിഖ് യുവാവായ ഗാരി എന്ന ഗുർമുഖ് സിങ് (30) ആണ് കൊല്ലപ്പെട്ടത്. കിഴക്കൻ ലണ്ടനിലെ ഇൽഫോർഡിൽ ഫെൽബ്രിഗ്ഗെ റോഡിലാണ് സംഭവം നടന്നത്. കൊലപാതകവുമായി ബന്ധപ്പെട്ട് മൂന്ന് സ്ത്രീൾ ഉൾപ്പെടെ അഞ്ച് പേർ അറസ്റ്റിലായിട്ടുണ്ട്. പ്രതികളും കൊല്ലപ്പെട്ടയാളും പരിചയക്കാരായിരുന്നെന്നാണ് റിപ്പോർട്ട്.
വ്യാഴാഴ്ചയാണ് നഗരത്തിൽ ബ്രിട്ടീഷ് സിഖ് യുവാവ് ആക്രമിക്കപ്പെട്ടത്. കൊലപാതകവുമായി ബന്ധപ്പെട്ട് അമർദീപ് സിങ് (27) എന്നയാളെയാണ് പോലീസ് ആദ്യം അറസ്റ്റ് ചെയ്തത്. ഇയാൾക്കെതിരെ കൊലക്കുറ്റം ചുമത്തിയിട്ടുണ്ട്. കേസുമായി ബന്ധപ്പെട്ട് 29 വയസ്സുള്ള ഒരു പുരുഷനെയും 29, 30, 54 വയസ്സുള്ള മൂന്ന് സ്ത്രീകളെയും അറസ്റ്റ് ചെയ്തിട്ടുണ്ട് പോലീസ് അറിയിച്ചു.
ഗാരിക്ക് പരിചയമുള്ളവരാണ് കൊലപാതകത്തിന് പിന്നിലെന്നാണ് പോലീസിൻ്റെ നിഗമനം. പോസ്റ്റ്‌മോർട്ടം റിപ്പോർട്ടിൽ ഇടത് തുടയിലെ മുറിവാണ് മരണകാരണമെന്ന് കണ്ടെത്തി. സംഭവത്തെക്കുറിച്ച് വിശദമായ അന്വേഷണം തുടരുകയാണ്. ലണ്ടൻ ആംബുലൻസ് സർവീസാണ് ഒരാൾ ആക്രമിക്കപ്പെട്ടതായി പോലീസിനെ വിവരമറിയിച്ചത്. ഉടൻ തന്നെ ഗാരിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അമർദീപ് സിങ്ങിൻ്റെ വിചാരണ 2026 ജനുവരി അഞ്ചിന് ആരംഭിക്കും. കേസിൽ അറസ്റ്റിലായ മറ്റുനാലുപേരും ജാമ്യത്തിലാണ്. ഒക്ടോബറിൽ വീണ്ടും പോലീസ് മുമ്പാകെ ഹാജരാകണമെന്നും അറിയിച്ചിട്ടുണ്ട്. ഗാരിയും അമർദീപും തമ്മിലുണ്ടായ തർക്കത്തിനൊടുവിലാണ് ഇയാളെ കുത്തിയതെന്നാണ് പ്രാഥമിക റിപ്പോർട്ടുകൾ. എന്നാൽ കൃത്യമായ വിവരങ്ങൾ ലഭ്യമായിട്ടില്ല.
എല്ലാവർക്കും വളരെ പ്രിയപ്പെട്ടവനായിരുന്നു ഗാരി. കണ്ടുമുട്ടിയ എല്ലാവരുമായും ബന്ധപ്പെടാൻ അദ്ദേഹത്തിന് അസാധാരണമായ കഴിവുണ്ടായിരുന്നു. കുടുംബത്തോടൊപ്പം സമയം ചെലവിടുന്നതിൽ അദ്ദേഹം അതീവ സന്തോഷവാനായിരുന്നു. അവൻ്റെ ഓർമ്മകൾ എന്നെന്നും നിലനിൽക്കുമെന്നും കുടുംബം പ്രതികരിച്ചു.
ഒറ്റപ്പെട്ട സംവഭമാണ് ഉണ്ടായതെന്ന് പോലീസ് ഡിറ്റക്ടീവ് ചീഫ് ഇൻസ്പെക്ടർ ജോണാ യോർക്ക് പറഞ്ഞു. ‘ഇത്തരം സംഭവങ്ങൾ നാട്ടിൽ ഭീതിയുണ്ടാക്കുന്നതാണ്. ഈ കൊലപാതകം സമൂഹത്തിൽ വലിയ ആഘാതമുണ്ടാക്കിയിട്ടുണ്ട്. പോലീസ് അന്വേഷണം നടത്തുന്നതിനാൽ കൂടുതൽ ഉദ്യോഗസ്ഥർ സ്ഥലത്തുണ്ടാകും. നിങ്ങൾക്ക് എന്തെങ്കിലും സംശയങ്ങളുണ്ടെങ്കിൽ അവരോട് ചോദിക്കാവുന്നതാണ്.’ എന്നും അവർ കൂട്ടിച്ചേർത്തു. കേസിൽ വിശദമായ അന്വേഷണം പുരോഗമിക്കുകയാണ്.
