📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 21 | വെള്ളി ✍️ കപിൽ ശങ്കർ

🔹മുല്ലപ്പെരിയാറില്‍ പുതിയ അണക്കെട്ട് വേണമെന്ന കേരളത്തിന്റെ ആവശ്യം തമിഴ്നാട് തള്ളി. നിലവിലുള്ള ഡാമിലെ ജലസംഭരണ നിരപ്പ് 152 അടിയായി ഉയര്‍ത്തണമെന്ന് തമിഴ്നാട് ആവര്‍ത്തിച്ച് ആവശ്യപ്പെട്ടു. ചെന്നൈയില്‍ ദക്ഷിണേന്ത്യന്‍ മുഖ്യമന്ത്രിമാരുടെ യോഗത്തിലാണ് തര്‍ക്കമുണ്ടായത്. നിലവിലുള്ള ഡാമിലെ ജലനിരപ്പ് ഉയര്‍ത്തുന്നതിനു സുരക്ഷയില്‍ ആശങ്ക വേണ്ടെന്ന് വിദഗ്ധ സമിതിയും കോടതിയും വ്യക്തമാക്കിയിട്ടുണ്ടെന്ന് തമിഴ്നാട്ടിലെ ഊര്‍ജമന്ത്രി സി.ടി.ആര്‍. നിര്‍മല്‍കുമാര്‍ പറഞ്ഞു. മുല്ലപ്പെരിയാറില്‍ പുതുതായി നിര്‍മിക്കുന്ന അണക്കെട്ടില്‍ നിന്നുള്ള മുഴുവന്‍ വെള്ളവും തമിഴ്‌നാടിന് നല്‍കാമെന്നും അണക്കെട്ടിന്റെ നിര്‍മാണച്ചെലവ് കേരളം വഹിക്കാമെന്നും അണക്കെട്ടിന്റെ മാതൃക, നിര്‍മാണം, സ്ഥാനം എന്നിവ
തമിഴ്നാടിന് തീരുമാനിക്കാമെന്നും ദക്ഷിണേന്ത്യന്‍ സംസ്ഥാനങ്ങളുടെ സോണല്‍ കൗണ്‍സില്‍ യോഗത്തില്‍ മുഖ്യമന്ത്രി വി.ഡി.സതീശന്‍ പറഞ്ഞിരുന്നു.

🔹പഞ്ചസാര വില വര്‍ധന നിയന്ത്രിക്കാന്‍ 10 ലക്ഷം ടണ്‍ അസംസ്‌കൃത പഞ്ചസാര ഇറക്കുമതി ചെയ്യുന്നു. തീരുവ രഹിത ഇറക്കുമതിക്കാണ് അനുമതി. രണ്ടു മാസത്തിനിടെ രാജ്യത്ത് പഞ്ചസാര വില കുതിച്ചുയര്‍ന്നിരുന്നു. ഓണക്കാലത്ത് കേരളത്തില്‍ പഞ്ചസാരയുടെ വില കിലോക്ക് 59 രൂപ വരെയാണ് ഉയര്‍ന്നത്.

🔹ഓപ്പറേഷന്‍ തൂഫാന്റെ ഭാഗമായി സംസ്ഥാനത്ത് 74 പേര്‍ കൂടി അറസ്റ്റിലായതോടെ ആകെ അറസ്റ്റിലായവരുടെ എണ്ണം 10,015 ആയി. ആകെ 9280 കേസുകളാണ് ഇതുവരെ എടുത്തിട്ടുള്ളത്. ഇതുവരെ 8289.409 ഗ്രാം എം.ഡി.എം.എ-യും 1004.784 കി.ഗ്രാം കഞ്ചാവും 2382 കഞ്ചാവ് ചെടികളും പിടിച്ചെടുത്തിട്ടുണ്ട്.

🔹പുലിക്കളിക്കെതിരായ വിമര്‍ശനത്തില്‍ ഖേദം പ്രകടിപ്പിച്ച് നടനും എഴുത്തുകാരനുമായ വി കെ ശ്രീരാമന്‍. തൃശൂരിലേത് സിങ്കിള്‍ തീം കാര്‍ണിവല്‍ ആണെന്ന് മനസ്സിലാക്കാതെയുള്ള അഭിപ്രായ പ്രകടനം പക്വതയുള്ളതായിരുന്നില്ലെന്നാണ് ഖേദക്കുറിപ്പ്..

🔹ഓണത്തോടനുബന്ധിച്ച് വിപണിയിലെ വിലക്കയറ്റം തടയാന്‍ സപ്ലൈകോ എല്ലാ ക്രമീകരണങ്ങളും പൂര്‍ത്തിയാക്കിയതായി മന്ത്രി അനൂപ് ജേക്കബ് അറിയിച്ചു. അവശ്യസാധനങ്ങളുടെ ലഭ്യത ഉറപ്പാക്കുന്നതിനൊപ്പം, കലൂരിലെ ഓണം മെഗാ ട്രേഡ് ഫെയറിലേക്ക് സൗജന്യ ബസ് സര്‍വീസും സര്‍ക്കാര്‍ ഒരുക്കിയിട്ടുണ്ട്.

🔹ലോക്ഭവന്‍ വളപ്പിലെ നെല്‍കൃഷി വിളവെടുപ്പിന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ നേതൃത്വം നല്‍കി. പത്ത് സെന്റ് സ്ഥലത്ത് മൂന്ന് മാസം മുമ്പ് വിതച്ച നെല്ലിന്റെ കൊയ്ത്തിനാണ് ഗവര്‍ണര്‍ എത്തിയത്. പടവലം, ചീര, മുരിങ്ങ, നെയ്യ്ക്കുമ്പളം, മത്തന്‍, വെള്ളരി, നിത്യവഴുതന, കാബേജ്, കത്രിക്ക, നീളന്‍പയര്‍, കപ്പ, പച്ചമുളക്, മധുരക്കിഴങ്ങ് തുടങ്ങി വിവിധയിനം പച്ചക്കറികള്‍ ഇവിടെ വിളവെടുപ്പിന് പാകമായിട്ടുണ്ട്.

🔹ഗുരുവായൂര്‍ ക്ഷേത്രത്തില്‍ അടുത്ത ദിവസങ്ങളില്‍ റെക്കോര്‍ഡ് വിവാഹങ്ങള്‍. ചിങ്ങമാസത്തിലെ ആദ്യ ഞായറാഴ്ചയായ ആഗസ്റ്റ് 23 ന് 429 വിവാഹങ്ങളും, ആഗസ്റ്റ് 30 ന് 342 വിവാഹങ്ങളും, സെപ്റ്റംബര്‍ 13 ന് 328 വിവാഹങ്ങളുമാണ് നടക്കുക.

🔹ദേവസ്വം ബോര്‍ഡുകള്‍ക്ക് കീഴിലുള്ള മുഴുവന്‍ ക്ഷേത്രങ്ങളുടെയും ആസ്തിമൂല്യം തിട്ടപ്പെടുത്താന്‍ സര്‍ക്കാര്‍ നടപടി തുടങ്ങി. ക്ഷേത്രങ്ങളിലെ സ്വര്‍ണത്തിന്റെ വിവരങ്ങള്‍ ഡിജിറ്റലൈസ് ചെയ്യണമെന്ന് ദേവസ്വം സെക്രട്ടറി ഡോ. എം.ജി. രാജമാണിക്യം മന്ത്രി കെ. മുരളീധരന് നല്‍കിയ റിപ്പോര്‍ട്ടില്‍ ആവശ്യപ്പെട്ടു. സ്വര്‍ണം വാങ്ങുമ്പോഴും സ്ട്രോങ് റൂമിലേക്ക് മാറ്റുമ്പോഴും ഡിജിറ്റല്‍ തെളിവുകള്‍ നിര്‍ബന്ധമാക്കണമെന്നും എല്ലാ ദേവസ്വങ്ങളിലും ഡിജിറ്റല്‍ സംവിധാനം നടപ്പിലാക്കണമെന്നും റിപ്പോര്‍ട്ടില്‍ പറയുന്നു.

🔹വീണ വിജയനെതിരെ നടക്കുന്ന ഇഡി അന്വേഷണത്തെ വിമര്‍ശിച്ചു മുഖപ്രസംഗവുമായി ദേശാഭിമാനി ദിനപത്രം. ഇഡിയുടെ രാഷ്ട്രീയവേട്ട വിലപ്പോകില്ല. ഇഡി അപസര്‍പക കഥകള്‍ മെനയുകയാണ്. കേസ് വലിച്ചു നീട്ടുന്നത് ദുരൂഹമാണെന്നും പകപ്പോകല്‍ ആണെന്നും മുഖപ്രസംഗത്തില്‍ പറയുന്നു.

🔹പത്തനംതിട്ടയില്‍ 75 കാരിയെ കൊലപ്പെടുത്തിയതിന് മകന്‍ ടിജോ തോമസ്, ടിജോയ്ക്കൊപ്പം താമസിച്ചിരുന്ന 37 കാരിയായ റിന്‍സി മോള്‍ എന്നിവരെ പത്തനംതിട്ട കോയിപ്രം പൊലീസ് അറസ്റ്റു ചെയ്തു.

🔹പ്രശസ്ത ഛായാഗ്രാഹകന്‍ ടി എസ് ബാബു അന്തരിച്ചു. 48 വയസായിരുന്നു. കോഴിക്കോട് മെഡിക്കല്‍ കോളെജില്‍ ചികിത്സയിലായിരുന്നു. പ്രശ്നപരിഹാര ശാല, കാള ചേകവന്‍ എന്നീ സിനിമകളുടെ ക്യാമറാമാന്‍ ആയിരുന്നു.

🔹കൊണ്ടോട്ടിയില്‍ കോളേജിലെ ഓണാഘോഷത്തിനിടെ വിദ്യാര്‍ഥികള്‍ എത്തിയ കാറില്‍ നിന്ന് ഒരു ഗ്രാം എംഡിഎംഎ പിടികൂടി. കണ്ടാലറിയാവുന്ന മൂന്നു പേരെ പ്രതിയാക്കി എക്സൈസ് അന്വേഷണം ആരംഭിച്ചു.

🔹രാജ്യത്തെ 36 റെയില്‍വേ സ്റ്റേഷനുകളിലെ കാന്റീനുകളിലും ഫുഡ് സ്റ്റാളുകളിലും നടത്തിയ മിന്നല്‍ പരിശോധനയില്‍ പഴകിയതും വൃത്തിഹീനവുമായ ഭക്ഷണസാധനങ്ങള്‍ പിടിച്ചെടുത്തു. പാചകത്തിനായി പൂപ്പല്‍ ബാധിച്ച പച്ചക്കറികളും കാലാവധി കഴിഞ്ഞ തൈരുമാണ് പല കേന്ദ്രങ്ങളിലും ഉപയോഗിച്ചിരുന്നതെന്നും കണ്ടെത്തി.

🔹യെമനിലും സൊമാലിയയിലും രണ്ട് ചരക്കുക്കപ്പലുകളില്‍ 22 ഇന്ത്യാക്കാരെ കടല്‍ക്കൊള്ളക്കാര്‍ ബന്ദികളാക്കി. യെമന്‍ തീരത്തിന് 30 നോട്ടിക്കല്‍ മൈല്‍ അകലെ വെച്ചാണ് എരിത്രിയന്‍ പതാകയുള്ള എം.ടി സിബു എന്ന കപ്പല്‍ റാഞ്ചിയത്. കപ്പലിലുണ്ടായിരുന്ന 20 ജീവനക്കാരില്‍ 16 പേര്‍ ഇന്ത്യക്കാരാണ്. സൊമാലിയന്‍ തീരത്തിന് സമീപത്തുവെച്ച് ആക്രമിക്കപ്പെട്ട കപ്പലില്‍ ആറ് ഇന്ത്യക്കാരാണുള്ളത്.

🔹അമേരിക്കയിലെ അലാസ്‌കയില്‍ ചാര്‍ട്ടര്‍ വിമാനം തകര്‍ന്നുവീണ് വിമാനത്തിലുണ്ടായിരുന്ന ജീവനക്കാരടക്കം എട്ടുപേരും കൊല്ലപ്പെട്ടു. സെക്യൂരിറ്റി ഏവിയേഷന്റെ ഉടമസ്ഥതയിലുള്ള ഇരട്ട എഞ്ചിന്‍ സെസ്ന 441 വിമാനമാണ് തകര്‍ന്നുവീണത്. ആറ് യാത്രക്കാരും രണ്ട് പൈലറ്റുമാരുമാണ് വിമാനത്തില്‍ ഉണ്ടായിരുന്നത്.

🔹ഇറാന്റെ മിസൈല്‍ ഭീഷണിമൂലം യുഎഇയില്‍ നിന്നുള്ള വിമാന സര്‍വീസുകള്‍ പ്രതിസന്ധിയിലായി. എമിറേറ്റ്‌സ്, എത്തിഹാദ്, എയര്‍ അറേബ്യ, ഫ്ലൈദുബായ് എന്നീ പ്രമുഖ യുഎഇ വിമാനക്കമ്പനികളും നിരവധി അന്താരാഷ്ട്ര വിമാനക്കമ്പനികളും സര്‍വീസുകള്‍ റദ്ദാക്കി. ചിലത് സമയം പുനഃക്രമീകരിച്ചു.

🔹അമേരിക്ക കീഴടങ്ങണമെന്ന് ഇറാന്‍. തങ്ങളുടെ മേഖലയില്‍നിന്ന് അമേരിക്ക സ്ഥലംവിടണമെന്നും ആക്രമിച്ചാല്‍ തിരിച്ചടിക്കുമെന്നും ഇറാന്‍ മുന്നറിയിപ്പ് നല്‍കി. മേഖലയിലെ കാര്യങ്ങള്‍ ഇനി ഇറാന്‍ നിശ്ചയിക്കുമെന്നും ഇറാന്‍ പാര്‍ലമെന്റ് ദേശീയ സുരക്ഷ കമ്മീഷന്‍ മേധാവി അവകാശപ്പെട്ടു.

🔹പാലസ്തീനിലെ വെസ്റ്റ് ബാങ്കില്‍ 200 കിടക്കകളുള്ള സൂപ്പര്‍ സ്പെഷ്യാലിറ്റി ആശുപത്രി നിര്‍മ്മിക്കാന്‍ ഇന്ത്യ. രണ്ട് വര്‍ഷത്തിനുള്ളില്‍ പൂര്‍ത്തിയാക്കുന്ന ആശുപത്രിക്കായി തറക്കല്ലിട്ടു. ജനീന്‍ ഗവര്‍ണറേറ്റിലാണ് ഇന്ത്യയുടെ പുതിയ സൂപ്പര്‍ സ്പെഷ്യലിറ്റി ആശുപത്രി വരുന്നത്.

🔹കേരള ക്രിക്കറ്റ് ലീഗിന്റെ മൂന്നാം സീസണിലെ ആദ്യ മത്സരത്തില്‍ തൃശൂര്‍ ടൈറ്റന്‍സ്, കാലിക്കറ്റ് ഗ്ലോബ് സ്റ്റാര്‍സിനെ ഏഴ് വിക്കറ്റിന് പരാജയപ്പെടുത്തി. ആദ്യം ബാറ്റ് ചെയ്ത കാലിക്കറ്റ് 137 റണ്‍സെടുത്തപ്പോള്‍, 19 പന്തുകള്‍ ബാക്കിനില്‍ക്കെ തൃശൂര്‍ ലക്ഷ്യം കണ്ടു. അര്‍ദ്ധ സെഞ്ച്വറി നേടിയ നിഖില്‍ തോട്ടതാണ് കളിയിലെ താരം.

🔹ലോക ബാഡ്മിന്റണ്‍ ചാമ്പ്യന്‍ഷിപ്പില്‍ സിംഗിള്‍സില്‍ ഇന്ത്യയുടെ ആയുഷ് ഷെട്ടിയും പി.വി സിന്ധുവും പ്രീ ക്വാര്‍ട്ടറില്‍ പുറത്തായി. ഇന്തൊനേഷ്യയുടെ ആല്‍വി ഫര്‍ഹാനോടായിരുന്നു ആയുഷിന്റെ തോല്‍വി. വനിതാ സിംഗിള്‍സില്‍ രണ്ടാം ഗെയിം നേടിയ പി.വി. സിന്ധു മൂന്നാം ഗെയിമില്‍ ചൈനയുടെ വാങ് സിയിയുമായി പൊരുതി കീഴടങ്ങുകയായിരുന്നു.

🔹ഇംഗ്ലണ്ടിനെ സമനിലയില്‍ പിടിച്ച് ഹോക്കി ലോകകപ്പിന്റെ രണ്ടാം റൗണ്ടില്‍ കടന്ന് ഇന്ത്യന്‍ വനിതകള്‍. 60 മിനിറ്റ് നീണ്ട മത്സരത്തില്‍ ഇരുടീമുകള്‍ക്കും ഗോള്‍ കണ്ടെത്താനായില്ല.

🔹കോമഡി ഫാമിലി എന്റര്‍ടെയ്‌നറുമായി പതിനാറ് വര്‍ഷങ്ങള്‍ക്ക് ശേഷം എവെര്‍ഗ്രീന്‍ ഗ്യാങ്ന്റെ ‘പാതിരാക്കുറുക്കന്‍’ എന്ന ചിത്രത്തിന്റെ ഒഫീഷ്യല്‍ ഫസ്റ്റ് ലുക്ക് പോസ്റ്റര്‍ റിലീസായി. ജഗദീഷ്, മുകേഷ്, സിദ്ദിഖ്, അശോകന്‍ എന്നിവരെ കേന്ദ്ര കഥാപാത്രങ്ങളാക്കി നവാഗതനായ ജയേഷ് വേണുഗോപാല്‍ സംവിധാനം ചെയ്യുന്ന ചിത്രം സെപ്റ്റംബറില്‍ പ്രദര്‍ശനത്തിനെത്തും. തികച്ചും വ്യത്യസ്തമായ സാഹചര്യങ്ങളില്‍ നിന്നും വരുന്ന നാലുപേര്‍ അപ്രതീക്ഷിതമായി ഒരു വലിയ പ്രതിസന്ധിയില്‍ ചെന്നുപെടുന്നതും, തുടര്‍ന്നുള്ള അവരുടെ അതിജീവനവും നര്‍മ്മത്തിന്റെ പശ്ചാത്തലത്തില്‍ അവതരിപ്പിക്കുന്ന ചിത്രമാണ് പാതിരാകുറുക്കന്‍. ഇവരെക്കൂടാതെ ഇന്ദ്രന്‍സ്, നിര്‍മല്‍ പാലാഴി, വിനീത് തട്ടില്‍, റിയാസ് നര്‍മ്മകല, സുധീര്‍ പറവൂര്‍, കുട്ടി അഖില്‍, അനീഷ് ഗോപാല്‍, ടെസ്സ ജോസഫ്, അജയന്‍ മാടയ്ക്കല്‍ എന്നിവര്‍ക്കൊപ്പം സോഷ്യല്‍ മീഡിയ ഇന്‍ഫ്ലുവെന്‍സെഴ്സ് ആയ അശ്വിത-അശ്വിജ എന്നിവരും ചിത്രത്തില്‍ ശ്രദ്ധേയ വേഷങ്ങളിലെത്തുന്നു.

🔹കാര്‍ത്തിക് ആര്യന്‍ നായകനായ ബോളിവുഡ് ചിത്രം ‘ക്യാപ്റ്റന്‍ ഇന്ത്യ’യില്‍ പാര്‍വതി തിരുവോത്ത് പ്രധാന വേഷത്തിലെത്തുന്നു. ഇന്ത്യയുടെ സുപ്രധാനമായൊരു രക്ഷാദൗത്യത്തില്‍ നിന്നും പ്രചോദനം ഉള്‍ക്കൊണ്ടാണ് ചിത്രമൊരുക്കുന്നതെന്നാണ് റിപ്പോര്‍ട്ടുകള്‍. ചിത്രത്തില്‍ പൈലറ്റിന്റെ വേഷത്തിലാണ് കാര്‍ത്തിക് ആര്യനെത്തുന്നത്. ബോളിവുഡില്‍ സജീവമാവുകയാണ് പാര്‍വതി. ചിത്രത്തില്‍ പാര്‍വതിയുടേത് വളരെ പ്രാധാന്യമുള്ള വേഷമാണെന്നാണ് റിപ്പോര്‍ട്ടുകള്‍. മലയാളത്തിലെ മുന്‍നിര നടിയായ പാര്‍വതി ഇര്‍ഫാന്‍ ഖാനൊപ്പം അഭിനയിച്ച ഖരീബ് ഖരീബ് സിംഗിളിലൂടെയാണ് ബോളിവുഡിലെത്തുന്നത്. പിന്നീട് കഡക് സിങ്, യു യാ മേം തുടങ്ങിയ ചിത്രങ്ങളില്‍ അഭിനയിച്ചു. ഹൃത്വിക് റോഷന്‍ നിര്‍മിക്കുന്ന പ്രൈം വിഡിയോ സീരീസ് സ്റ്റോമിലും പാര്‍വതിയുണ്ട്. മലയാള ചിത്രം ഐ, നോബഡിയാണ് പാര്‍വതിയുടേതായി ഒടുവില്‍ പുറത്തിറങ്ങിയ സിനിമ. പ്രഥമ ദൃഷ്ട്യാ കുറ്റക്കാര്‍ ആണ് പാര്‍വതിയുടേതായി അണിയറയിലുള്ള ചിത്രം.

🔹പ്രിയദര്‍ശന്‍ സംവിധാനം ചെയ്ത ‘ഹൈവാന്‍’ എന്ന സിനിമയിലെ ആദ്യ ഗാനമായ ‘മേരെ ഹീറോ ഹേ വോ’ പുറത്തിറങ്ങി. കാഴ്ചപരിമിതിയുള്ള കഥാപാത്രത്തെ അവതരിപ്പിക്കുന്ന സെയ്ഫ് അലി ഖാനും ബാലതാരമായ പഹാല്‍ ചൗധരിയും ചേര്‍ന്നുള്ള ഹൃദ്യമായ രംഗങ്ങളാണ് ഗാനരംഗത്തിലുള്ളത്. പ്രീതം സംഗീതം നല്‍കിയ ഗാനത്തിന് വരികളെഴുതിയിരിക്കുന്നത് ജാവേദ് അക്തറാണ്. ഷാനും വാനിക നായകും ചേര്‍ന്നാണ് ഗാനം ആലപിച്ചിരിക്കുന്നത്. പ്രിയദര്‍ശന്റെ തന്നെ മലയാള ചിത്രം ‘ഒപ്പ’ത്തിന്റെ റീമേക്കാണ് ‘ഹൈവാന്‍’. ചിത്രത്തില്‍ മോഹന്‍ലാലും അതിഥിവേഷത്തിലുണ്ടെന്നാണ് വിവരം. സെയ്ഫ് അലി ഖാനും അക്ഷയ് കുമാറുമാണ് ചിത്രത്തില്‍ പ്രധാന വേഷത്തില്‍. ‘ഒപ്പ’ത്തിലെ ‘മിനുങ്ങും മിന്നാമിനുങ്ങേ…’ എന്ന് തുടങ്ങുന്ന ഗാനത്തെ ഓര്‍മിപ്പിക്കുന്നതാണ് ‘ഹൈവാനി’ലെ പാട്ടും. ബോമന്‍ ഇറാനി, സയാമി ഖേര്‍, ശ്രിയ പില്‍ഗാവോങ്കര്‍ എന്നിവരാണ് മറ്റ് പ്രധാന അഭിനേതാക്കള്‍. സെപ്റ്റംബര്‍ 11-ന് ചിത്രം ആഗോള റിലീസായി എത്തും.

💦 ഗുരുജിയുടെ വാക്കുകൾ
*****************************

ഇവിടെ ജന്മം തന്നതിന്റെ കടപ്പാടു പോലും മറക്കുന്നവരും ഒരു ജന്മബന്ധവുമില്ലാത്തവരോടും ഉള്ള കടപ്പാടെന്തെന്നു തിരിച്ചറിയുന്നവരും തമ്മിലുള്ള വ്യത്യാസം ഇരുളും വെളിച്ചവും പോലെയാണ് എന്ന് നാം തിരിച്ചറിയുന്നു. രാഷ്ട്രീയത്തിലായാലും മതത്തിലായാലും മറ്റുള്ളവർക്ക് ഒരു നീതി,അവനവന് ഇമ്മിണി ബല്യ മറ്റൊന്ന് എന്ന രീതിയിൽ മനുഷ്യ ഹൃദയങ്ങൾ വെട്ടിമുറിക്കപ്പെടുമ്പോൾ, സ്നേഹത്തിന്റെ ഉറവുകളെല്ലാം ഊഷരമാവുമ്പോൾ ജീവിച്ചിരിക്കുന്നതിന്റെ ആനന്ദം അറിയുന്ന ചില ജന്മങ്ങൾ നമ്മുടെ കൂടെയുണ്ടെന്നുള്ള അറിവുതന്നെ ഏറെ മധുരതരമാണ്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 21

•ലോക മുതിർന്ന പൗരന്മാരുടെ ദിനം (World Senior Citizen’s Day)മുതിർന്ന പൗരന്മാർ സമൂഹത്തിന് നൽകിയ സംഭാവനകളെ ആദരിക്കുന്നതിനും അവർ നേരിടുന്ന ആരോഗ്യ-സാമൂഹിക പ്രശ്നങ്ങളെക്കുറിച്ച് അവബോധം സൃഷ്ടിക്കുന്നതിനുമായാണ് എല്ലാ വർഷവും ഓഗസ്റ്റ് 21 World Senior Citizen’s Day ആയി ആചരിക്കുന്നത്. 1988-ൽ അമേരിക്കൻ പ്രസിഡന്റ് റൊണാൾഡ് റീഗൻ തുടക്കം കുറിച്ച ഈ ദിനം പിന്നീട് ഐക്യരാഷ്ട്രസഭ ആഗോള ആചരണമായി അംഗീകരിച്ചു.

•ഭീകരതയുടെ ഇരകളെ അനുസ്മരിക്കുന്നതിനുള്ള അന്താരാഷ്ട്ര ദിനം (International Day of Remembrance and Tribute to the Victims of Terrorism)ഭീകരാക്രമണങ്ങളിൽ ജീവൻ നഷ്ടപ്പെട്ടവരെയും അതിജീവിച്ചവരെയും ഓർമ്മിക്കാനും അവർക്ക് പിന്തുണ പ്രഖ്യാപിക്കാനുമായി ഐക്യരാഷ്ട്രസഭ (UN) പ്രഖ്യാപിച്ച ദിനമാണിത്. ഭീകരവാദത്തിനെതിരെയുള്ള ആഗോള പ്രതിരോധവും മനുഷ്യാവകാശ സംരക്ഷണവും ഈ ദിനം ലക്ഷ്യമിടുന്നു.

•ലോക സംരംഭക ദിനം (World Entrepreneur’s Day)ലോകമെമ്പാടുമുള്ള സംരംഭകത്വം, ഇന്നൊവേഷൻ, നേതൃപാടവം എന്നിവയെ പ്രോത്സാഹിപ്പിക്കുന്നതിനായി ഈ ദിവസം വേൾഡ് ഓൺട്രപ്രണേഴ്സ് ഡേ ആയി ആഘോഷിക്കുന്നു. പുതിയ ബിസിനസ് ആശയങ്ങളുമായി മുന്നോട്ടുവരുന്നവരെയും വ്യവസായ പ്രമുഖരെയും ഈ ദിവസം പ്രത്യേകം ഓർമ്മിക്കുന്നു.

•1911: ലോകപ്രശസ്ത ചിത്രമായ മോണാലിസ പാരിസിലെ ലൂവ്ര് മ്യൂസിയത്തിൽ നിന്നും മോഷ്ടിക്കപ്പെട്ടു.

•1959: ഹവായി അമേരിക്കയുടെ 50-ാമത് ഔദ്യോഗിക സംസ്ഥാനമായി മാറി.

•1972: ഇന്ത്യയിൽ വന്യജീവി സംരക്ഷണ നിയമം (Wildlife Protection Act) ലോക്സഭ പാസാക്കി.

•1983: ഫിലിപ്പീൻസിലെ ജനാധിപത്യ നേതാവ് നിനോയ് അക്വിനോ വധിക്കപ്പെട്ടു (ഫിലിപ്പീൻസിൽ ഈ ദിവസം ‘നിനോയ് അക്വിനോ ദിനം’ ആയി ആചരിക്കുന്നു).

തയ്യാറാക്കിയത്: കപിൽ ശങ്കർ

14 Likes

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 21 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 21

തയ്യാറാക്കിയത്: കപിൽ ശങ്കർ

ഭാര്യയെ കൊന്ന് ഓടയിൽ തള്ളിയ യു.എസ് സൈനികന് 59 വർഷം തടവ്

തലച്ചോറിലെ നിശബ്ദ അപകടം: ചെറുപ്പക്കാരിൽ സ്ട്രോക്ക് ആശങ്കാജനകമായി വർദ്ധിക്കുന്നു

LEAVE A REPLY Cancel reply

Most Popular

10 ദിവസം അറ്റകുറ്റപ്പണി: ആലുവയിലെ 2 പാലങ്ങൾ 28 മുതൽ അടയ്ക്കും, ഗതാഗതം തടസ്സപ്പെടും

ഒക്ടോബർ 27; പുന്നപ്ര- വയലാർ രക്തസാക്ഷി ദിനം.

‘ഇ ഡി തോളില്‍ കയറുന്നു, കെ എം ഷാജഹാന് രാഷ്ട്രീയ അജണ്ട’; ടി വീണ ഹൈക്കോടതിയില്‍.

Recent Comments

EDITOR PICKS

10 ദിവസം അറ്റകുറ്റപ്പണി: ആലുവയിലെ 2 പാലങ്ങൾ 28 മുതൽ അടയ്ക്കും, ഗതാഗതം തടസ്സപ്പെടും

ഒക്ടോബർ 27; പുന്നപ്ര- വയലാർ രക്തസാക്ഷി ദിനം.

POPULAR POSTS

ഇതെന്തൊരു വിധി: ആറുമാസത്തിനിടെ 23 പേർക്ക് വധശിക്ഷ വിധിച്ച ജഡ്ജിയെ സ്ഥലംമാറ്റി

തേനിയിൽ ജയിൽ ജീവനക്കാരനെ ആക്രമിച്ചശേഷം 17 വിചാരണ തടവുകാർ കൂട്ടത്തോടെ രക്ഷപ്പെട്ടു

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 21 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ഓഗസ്റ്റ് 21

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************