📱വാർത്തകൾ ഒറ്റനോട്ടത്തിൽ📱 – 2026 | ജൂൺ 30 | ചൊവ്വ ✍️ കപിൽ ശങ്കർ

🔹ശബരിമല സ്വര്‍ണക്കൊള്ള കേസില്‍ ദേവസ്വം ബോര്‍ഡ് മുന്‍ പ്രസിഡന്റും സിപിഎം നേതാവുമായ പി.എസ് പ്രശാന്തിനേയും ഭരണസമിതിയേയും പ്രതികളാക്കി. 2025 ലെ സ്വര്‍ണക്കൊള്ളയിലാണ് പ്രതി ചേര്‍ത്തത്. തന്ത്രി കണ്ഠര് രാജീവര്, ഉണ്ണികൃഷ്ണന്‍ പോറ്റി, സ്വര്‍ണവ്യാപാരി പങ്കജ് ഭണ്ഡാരി എന്നിവരും പ്രതികളാണ്. 2019 ലെ ഗൂഢാലോചനയുടെ തുടര്‍ച്ചയാണ് 2025 ലേത്. വിജയ് മല്യ സ്വര്‍ണ്ണം പൊതിയാന്‍ നല്‍കിയ സ്വര്‍ണ്ണപ്പാളികളില്‍ നിന്ന് കിലോക്കണക്കിന് സ്വര്‍ണ്ണം സ്ട്രിപ്പിങ് സൊല്യൂഷന്‍ ഉപയോഗിച്ച് വേര്‍തിരിച്ചെടുത്ത് കടത്തിയെന്നാണു കണ്ടെത്തല്‍.

🔹ദ്വാരപാലകശിൽപ്പത്തിൽ കേടുവരുത്തിയതിന് പിന്നിലും പോറ്റിയുടെ ഇടപെടലുണ്ടായതായി വിവരങ്ങൾ. പോറ്റി നിർമ്മിച്ച പീഠം സ്ഥാപിക്കുന്നതിനിടെയിലാണ് ശിൽപ്പത്തിന് കേടുപാട് സംഭവിച്ചത്. പീഠത്തിന്റെ അളവ് കൃത്യമല്ലാത്തതിനെ തുടർന്ന് പോറ്റി ഇത് തിരികെ കൊണ്ടുപോയിരുന്നു. തുടർന്ന് ഈ പീഠം പോറ്റിയുടെ ബന്ധുവിന്റെ വീട്ടിൽ നിന്നും കണ്ടെത്തി.

🔹ലഹരിക്കു വേണ്ടി അണലി കുഞ്ഞുങ്ങളെക്കൊണ്ട് നാവില്‍ കൊത്തിക്കുന്ന പാര്‍ലറുകള്‍ ഉണ്ടെന്ന് ആഭ്യന്തര മന്ത്രി രമേശ് ചെന്നിത്തല. ലഹരിയുടെ വേരറുക്കുമെന്നും അദ്ദേഹം പറഞ്ഞു. ഓപ്പറേഷന്‍ തൂഫാന്റെ ഭാഗമായി ഇന്നലെ വരെ 4146 കേസുകള്‍ രജിസ്റ്റര്‍ ചെയ്തു. വിവിധ ലഹരിക്കേസുകളിലായി 4471 പേര്‍ അറസ്റ്റിലായിട്ടുണ്ട്.

🔹ആഭ്യന്തര മന്ത്രി രമേശ് ചെന്നിത്തലയുടെ പരാമർശത്തിനെതിരെ ഡോ ഷിംന അസീസ്. ലഹരിക്കു വേണ്ടി അണലിക്കുഞ്ഞുങ്ങളെ കൊണ്ട് നാവിൽ കൊത്തിക്കുന്ന പാർലറുകൾ ഉണ്ടെന്ന് മന്ത്രി പറഞ്ഞത് വൈദ്യശാസ്ത്രപരമായി തെറ്റായ കാര്യമാണെന്നും രക്‌തത്തെ നേരിട്ട്‌ ബാധിക്കുന്ന അണലിവിഷം നാഡീവ്യൂഹത്തെ ബാധിക്കുന്നതല്ല, മൂർഖനും വെള്ളിക്കെട്ടനും ഒക്കെയാണ്‌ അത്തരത്തിലുള്ള ന്യൂറോടോക്‌സിക്‌ വെനം ഉള്ളതെന്നും ഡോക്ടർ പറഞ്ഞു.

🔹പി.എസ്.സി നിയമനങ്ങളിലെ സുതാര്യത ചോദ്യം ചെയ്യപ്പെടുന്ന രീതിയിൽ തുടർച്ചയായി പരാതികൾ ഉയരുന്നതിൽ സർക്കാരിന് ആശങ്ക. നിലവിൽ ഉയർന്നുവന്ന പരാതികളിലെ ആഭ്യന്തര അന്വേഷണത്തിന്റെ പുരോഗതിയും റിപ്പോർട്ടും വിലയിരുത്തിയ ശേഷം കർശനമായ തുടർനടപടികളിലേക്ക് കടക്കാനാണ് സർക്കാരിന്റെ തീരുമാനം.

🔹തിരുവനന്തപുരം കോര്‍പ്പറേഷനില്‍ ബിജെപി- യുഡിഎഫ് അംഗങ്ങള്‍ തമ്മില്‍ കയ്യാങ്കളി. കാപ്പാ കേസില്‍ ജയിലിലുള്ള ബിജെപി കൗണ്‍സിലര്‍ ആര്‍ സുഗതനെ പുറത്താക്കണമെന്നാവശ്യപ്പെട്ടുള്ള യുഡിഎഫ് അംഗങ്ങളുടെ പ്രതിഷേധത്തിനിടെ അജണ്ടകള്‍ പാസാക്കിയെന്നു മേയര്‍ വി.വി. രാജേഷ് വിളിച്ചുപറഞ്ഞ് കൗണ്‍സില്‍ യോഗം പിരിഞ്ഞു. ഇതിനു പിറകേ, യുഡിഎഫ് അംഗങ്ങള്‍ ഒപ്പുവയ്ക്കുന്നതിനിടെ ഹാജര്‍ പുസ്തകം ബിജെപി അംഗങ്ങള്‍ ബലമായി പിടിച്ചുപറിച്ചു. ഇതേത്തുടര്‍ന്നുണ്ടായ തര്‍ക്കത്തിനിടെ കോണ്‍ഗ്രസ് വനിതാ അംഗത്തെ ബിജെപി അംഗം ചെമ്പഴന്തി ഉദയന്‍ കൈയേറ്റം ചെയ്തു.

🔹സംസ്ഥാനത്ത് വൈദ്യുതി നിയന്ത്രണം തുടരും. ഉയർന്ന വിലയ്ക്ക് വൈദ്യുതി വാങ്ങാൻ കെഎസ്ഇബിക്ക് വൈദ്യുതി റെഗുലേറ്ററി കമ്മീഷൻ അനുമതി നൽകിയിട്ടുണ്ട്. സെപ്റ്റംബർ ഒഴികെ ജൂലൈ മുതൽ ഡിസംബർ വരെ വൈദ്യുതി ഉയർന്ന വിലയ്ക്ക് വാങ്ങാം എന്ന് ഉത്തരവില്‍ പറയുന്നു.

🔹പന്തളം നഗരസഭയിലെ വിവിധ വികസന പദ്ധതികളിൽ അഴിമതിയും ക്രമക്കേടും നടത്തിയ കേസിൽ മുൻ ബ്ലോക്ക് ഡെവലപ്‌മെന്റ് ഓഫീസർ ഉൾപ്പെടെ മൂന്ന് പ്രതികൾക്ക് കൊല്ലം വിജിലൻസ് കോടതി 14 വർഷം കഠിനതടവും 50,000 രൂപ പിഴയും ശിക്ഷ വിധിച്ചു. മുൻ ബി.ഡി.ഒ കെ. വാസുദേവൻ, പദ്ധതി കൺവീനർമാരായ ശാലു ഖാൻ, കെ. ശിവരാജൻ എന്നിവരെയാണ് കോടതി ശിക്ഷിച്ചത്.

🔹സ്വകാര്യ ആശുപത്രി നഴ്സുമാരുടെ സമരത്തില്‍ ഒരാഴ്ചക്കകം നടപടിയെന്ന് ആരോഗ്യവകുപ്പ് മന്ത്രി കെ മുരളീധരന്‍. നഴ്സുമാര്‍ സമരത്തില്‍ നിന്ന് പിന്‍മാറണം. മിനിമം വേതനം നിയമം നടപ്പിലാക്കുമെന്നും മന്ത്രി ഉറപ്പ് നല്‍കി. സര്‍ക്കാര്‍ ആശുപത്രികള്‍ക്ക് കെട്ടിടങ്ങള്‍ ഉണ്ടെങ്കിലും സൗകര്യം കുറവാണെന്നും പല കെട്ടിടങ്ങള്‍ക്കും ഫിറ്റ്നസ് പോലും ഇല്ലെന്നും മന്ത്രി നിയമസഭയില്‍ പറഞ്ഞു.

🔹യുഡിഎഫ് സര്‍ക്കാരിന്റെ പ്രിയദര്‍ശിനി സൗജന്യ യാത്രാപദ്ധതി സാധാരണക്കാരായ സ്ത്രീകളുടെ കുടുംബ ബജറ്റിനെ സഹായിച്ചെന്ന് ഗതാഗത മന്ത്രി സി പി ജോണ്‍. നിയമസഭയില്‍ സംസാരിക്കുകയായിരുന്നു മന്ത്രി. കെഎസ്ആര്‍ടിസിയില്‍ സ്ത്രീ യാത്രക്കാരുടെ എണ്ണം വര്‍ധിച്ചു. പ്രതിദിനം 10 ലക്ഷം സ്ത്രീകള്‍ യാത്ര ചെയ്തിരുന്ന സ്ഥാനത്ത് 15 ലക്ഷമായി ഉയര്‍ന്നു. അതേസമയം കെഎസ്ആര്‍ടിസിക്ക് ദിനംപ്രതി രണ്ടര കോടിയോളം രൂപയുടെ ബാധ്യതയുണ്ടാകുന്നുണ്ടെന്നും മന്ത്രി പറഞ്ഞു.

🔹തിരുവനന്തപുരം നഗരസഭ കൗണ്‍സില്‍ യോഗത്തിനിടെയുണ്ടായ കയ്യാങ്കളിയില്‍ ബിജെപി കൗണ്‍സിലര്‍മാര്‍ക്കെതിരെ കേസ്. ബിജെപി കൗണ്‍സിലര്‍ ചെമ്പഴന്തി ഉദയനാണ് കേസില്‍ ഒന്നാംപ്രതി. ഗിരി, പാപ്പനംകോട് സജി, വയല്‍ക്കര രതീഷ് എന്നിവരും പ്രതികളാണ്. യുഡിഎഫിലെ വനിതാ കൗണ്‍സിലര്‍മാരായ ഷെര്‍ലി, അനിത അലക്സ് എന്നിവര്‍ നല്‍കിയ പരാതിയിലാണ് മ്യൂസിയം പോലീസ് കേസെടുത്തത്.

🔹വിഴിഞ്ഞത്തു നിന്ന് മത്സ്യബന്ധനത്തിനു പോയ മൂന്നു തൊഴിലാളികളെ കടലില്‍ കാണാതായി. വെട്ടുകാട് സ്വദേശികളായ റോബിന്‍സണ്‍ (55, ജോര്‍ജ്ജ് വില്യം), സനു(45), വലിയവേളി സ്വദേശി ബാബു(40) എന്നിവരെയാണ് കാണാതായത്. ലിബിന്റെ ഉടമസ്ഥതയിലുള്ള വള്ളത്തില്‍ 28ന് വൈകിട്ട് 3ഓടെ കടലില്‍ പോയ ഇവര്‍ ഇന്നലെ രാവിലെ ആറോടെ തിരികെ എത്തേണ്ടതായിരുന്നു.

🔹സംസ്ഥാനത്ത് എലിപ്പനി ബാധിച്ച് കണ്ണൂരില്‍ രണ്ടു പേര്‍ മരിച്ചു. ഒമ്പതു പേര്‍ക്ക് എലിപ്പനി സ്ഥിരീകരിച്ചു. സംസ്ഥാനത്ത് ആറ് പേര്‍ക്ക് കൂടി ഷിഗെല്ല ബാധിച്ചു. കോഴിക്കോട് നാല് പേര്‍ക്കും മലപ്പുറത്ത് രണ്ട് പേര്‍ക്കുമാണ് രോഗം സ്ഥിരീകരിച്ചത്.

🔹സെക്രട്ടറിയേറ്റ് മാര്‍ച്ചില്‍ ബ്ലെയ്ഡ് ഉപയോഗിച്ച് സംഘര്‍ഷമുണ്ടാക്കിയെന്ന കേസില്‍ എസ്എഫ്ഐ ജില്ലാ സെക്രട്ടറി നന്ദന്‍ അറസ്റ്റില്‍. സിപിഎം ജില്ലാ കമ്മിറ്റി ഓഫീസില്‍നിന്നു മടങ്ങുന്നതിനിടെയാണ് കന്റോണ്‍മെന്റ് പൊലീസ് അറസ്റ്റ് ചെയ്തത്. കേസിലെ മൂന്നാമത്തെ അറസ്റ്റാണിത്.

🔹നടിക്കെതിരായ ലൈംഗികാധിക്ഷേപത്തില്‍ ബോബി ചെമ്മണ്ണൂര്‍ ഇന്‍സ്റ്റാഗ്രാമില്‍ എഴുതിയ കുറിപ്പിലൂടെ മാപ്പു പറഞ്ഞു. മനപൂര്‍വം ആരേയും വേദനിപ്പിക്കാനോ മോശമായി ചിത്രീകരിക്കാനോ ശ്രമിച്ചിട്ടില്ല. തന്റെ വാക്കുകള്‍ നടിയേയും കുടുംബത്തേയും വേദനപ്പിച്ചതില്‍ ഖേദം അറിയിക്കുന്നു. മാപ്പ് പരിഗണിച്ച് കേസ് പിന്‍വലിക്കുമെന്ന് കരുതുന്നുവെന്നും വ്യവസായി ബോബി ചെമ്മണ്ണൂര്‍ പറഞ്ഞു. കേസെടുത്ത് ഒന്നരവര്‍ഷത്തിനു ശേഷമാണ് ഖേദപ്രകടനം.

🔹ചമ്പക്കുളം ജലമേളയില്‍ അരോമ ചുണ്ടനു കിരീടം. നടുഭാഗം ചുണ്ടന്‍ രണ്ടാം സ്ഥാനവും നടുവിലെ പറമ്പന്‍ മൂന്നാം സ്ഥാനവും നേടി. ചാമ്പ്യന്‍സ് ബോട്ട് ലീഗ് കൂടുതല്‍ മികച്ച രീതിയില്‍ നടത്തുമെന്ന് ജലമേളയുടെ വേദിയില്‍ ടൂറിസം മന്ത്രി പി സി വിഷ്ണുനാഥ് പ്രഖ്യാപിച്ചു.

🔹കാക്കനാട് മാവേലിപുരത്ത് സൈക്കിൾ ചവിട്ടുന്നതിനിടെ മുപ്പതടി താഴ്ചയിലേക്ക് വീണ് ഏഴാം ക്ലാസ് വിദ്യാർത്ഥിനി റിഹാന കാതറിൻ ആൻഡ്രൂസ് മരിച്ച സ്ഥലത്ത് ഒടുവിൽ ഇരുമ്പ് സംരക്ഷണ വേലി സ്ഥാപിച്ചു. ദുരന്തം നടന്ന് എട്ടാം ദിവസമാണ് മാവേലിപുരം ഓണം പാർക്കിന് സമീപത്തെ അപകടസ്ഥലത്ത് നഗരസഭ സുരക്ഷാ വേലി നിർമ്മിച്ചത്.

🔹പത്തനംതിട്ട ചിറ്റാറിലെ സന്ദീപിനെ അടുപ്പമുണ്ടായിരുന്ന വിവാഹിതയായ യുവതിയുടെ അച്ഛനും കൂട്ടുകാരനും ചേര്‍ന്നു കൊലപ്പെടുത്തിയതാണെന്നു പോലീസ്. അട്ടത്തോട് സ്വദേശി കൃഷ്ണന്‍കുട്ടി, സുഹൃത്ത് ഗോപി എന്നിവരാണ് പ്രതികള്‍. ഇരുവരും കസ്റ്റഡിയിലാണ്. മര്‍ദ്ദനമേറ്റാണു മരിച്ചതെന്ന് പോസ്റ്റുമോട്ടത്തില്‍ കണ്ടെത്തിയിരുന്നു.

🔹പ്രായപൂര്‍ത്തിയാവാത്ത വിദ്യാര്‍ഥികള്‍ക്കു കള്ള് വിറ്റ കള്ളുഷാപ്പ് ജീവനക്കാരനെ ചങ്ങരംകുളം പൊലീസ് അറസ്റ്റ് ചെയ്തു. കോക്കൂരിലെ കള്ളുഷാപ്പ് ജീവനക്കാരനായ കടവല്ലൂര്‍ സ്വദേശി കുന്നത്ത് ഞാലില്‍ സജീവിനെ (60) ആണ് അറസ്റ്റു ചെയ്തത്.

🔹കോഴിക്കോട് പതിനാറുകാരിയെ ലൈംഗിക പീഡനത്തിന് ഇരയാക്കുകയും നഗ്ന ദൃശ്യങ്ങള്‍ പ്രചരിപ്പിക്കുമെന്ന് ഭീഷണിപ്പെടുത്തുകയും ചെയ്ത കേസില്‍ ബാലുശ്ശേരി നടുവണ്ണൂര്‍ സ്വദേശിയായ അദ്നാനെ താമരശ്ശേരി പൊലീസ് അറസ്റ്റു ചെയ്തു.

🔹ക്രിക്കറ്റ് പരിശീലനത്തിനു വന്ന വിദ്യാര്‍ത്ഥിനിയെ പീഡിപ്പിച്ച കേസില്‍ ക്രിക്കറ്റ് പരിശീലകനായ പ്രതി വള്ളക്കടവ് ശ്രീവരാഹം സ്വദേശി എം. മനു (40) നാലാമത്തെ കേസിലും കുറ്റക്കാരന്‍. 28 വര്‍ഷം കഠിനതടവും 54,000 രൂപ പിഴയ്ക്കുമാണ് തിരുവനന്തപുരം അതിവേഗ പ്രത്യേക കോടതി ശിക്ഷിച്ചത്. ഫലത്തില്‍ ഏഴ് വര്‍ഷം ശിക്ഷ അനുഭവിച്ചാല്‍ മതി. മൂന്ന് കേസിലെയും ശിക്ഷ കാലാവധിക്ക് ശേഷമേ ഈ കേസിലെ ശിക്ഷ ആരംഭിക്കൂ.

🔹അയോധ്യരാമക്ഷേത്രത്തിലെ ഭക്തരുടെ കാണിക്കപ്പണവും സംഭാവനകളും വൻതോതിൽ തട്ടിയെടുക്കപ്പെട്ടെന്ന് കണ്ടെത്തിയ കേസിൽ എസ്ഐടിയുടെ റിപ്പോർട്ട് വെള്ളിയാഴ്ചയ്ക്കകം സർക്കാരിന് കൈമാറും. പ്രാഥമിക റിപ്പോർട്ടിന്റെ അടിസ്ഥാനത്തിൽ പ്രതികളെ അറസ്റ്റ് ചെയ്തിട്ടുണ്ട്. .

🔹അയോധ്യ രാമക്ഷേത്രത്തിലെ തട്ടിപ്പിനെക്കുറിച്ച് മൂന്നു മാസം മുന്‍പ് ട്രസ്റ്റിനെ വിവരം അറിയിച്ചിരുന്നെന്ന് സ്റ്റേറ്റ് ബാങ്ക് ഓഫ് ഇന്ത്യ ഉദ്യോഗസ്ഥര്‍. പണം എണ്ണിത്തിട്ടപ്പെടുത്തുന്ന ജീവനക്കാരെ മാറ്റണമെന്നു നിര്‍ദേശിച്ചു. ഭണ്ഡാരപ്പെട്ടിയിലെ പണം എണ്ണിത്തിട്ടപ്പെടുത്താന്‍ സ്വകാര്യ ഏജന്‍സി വഴി പുറത്തുനിന്നുള്ളവരെയും നിയോഗിച്ചിരുന്നു. എന്നാല്‍ ട്രസ്റ്റ് സെക്രട്ടറി ചമ്പത് റായിയും അനില്‍ മിശ്രയും ഇടപെട്ടതിനാല്‍ ജീവനക്കാരെ മാറ്റിയല്ലെന്നു ബാങ്ക് അധികൃതര്‍ പൊലീസിനു മൊഴി നല്‍കി.

🔹സിബിഎസ്ഇ ത്രിഭാഷാ നയത്തില്‍ ഇളവു വരുത്തി. പത്താം ക്ലാസില്‍ പഠിക്കുന്നവര്‍ക്കു മൂന്നു ഭാഷാനയം പിന്തുടരേണ്ടതില്ല. 7, 8, 9 ക്ലാസുകളില്‍ പഠിക്കുന്നവര്‍ പത്താം ക്ലാസിലെ ബോര്‍ഡ് പരീക്ഷയില്‍ മൂന്നാമത്തെ ഭാഷയ്ക്കു പരീക്ഷ എഴുതേണ്ടതില്ലെന്നും സിബിഎസ്ഇ വ്യക്തമാക്കി.

🔹പെട്രോള്‍-ഡീസല്‍ വിതരണത്തില്‍ കേന്ദ്ര സര്‍ക്കാര്‍ ഏര്‍പ്പെടുത്തിയിരുന്ന താല്‍ക്കാലിക നിയന്ത്രണങ്ങള്‍ ഇന്ന് അര്‍ധരാത്രിയോടെ പിന്‍വലിക്കും. ഒരു വാഹനത്തിനോ ഉപഭോക്താവിനോ പ്രതിദിനം 200 ലിറ്റര്‍ ഡീസല്‍ മാത്രമേ നല്‍കാവൂവെന്ന നിയന്ത്രണവും റദ്ദാക്കി. വ്യവസായ, വാണിജ്യ, സ്ഥാപന ഉപഭോക്താക്കള്‍ നിശ്ചിത കണ്‍സ്യൂമര്‍ പമ്പുകളില്‍ നിന്ന് ഇന്ധനം വാങ്ങണമെന്ന നിര്‍ദേശവും പിന്‍വലിക്കും.

🔹ടെലഗ്രാഫ് മുന്‍ എഡിറ്ററും മലയാളിയുമായ ആര്‍. രാജഗോപാലിന്റെ പാസ്പോര്‍ട്ട് വെരിഫിക്കേഷന്‍ കേസ് വിദേശികളെ നാടുകടത്തുന്നതിനുള്ള സെക്യൂരിറ്റി കണ്‍ട്രോള്‍ ഓര്‍ഗനൈസേഷന്റെ പരിഗണനയ്ക്കു വിട്ടെന്ന് റിപ്പോര്‍ട്ട്. കൊല്‍ക്കത്ത പോലീസിന്റെ വെബ്‌സൈറ്റിലെ വിവരങ്ങള്‍ ഉദ്ധരിച്ച് ഓപ്പണ്‍ മാഗസിനാണ് ഇക്കാര്യം റിപ്പോര്‍ട്ട് ചെയ്തത്. വോട്ടര്‍പട്ടികയില്‍ പേരു ചേര്‍ക്കണമെന്നും പാസ്പോര്‍ട്ട് പുതുക്കാന്‍ വഴിയൊരുക്കണമെന്നും ആവശ്യപ്പെട്ട് ബംഗാള്‍ മുഖ്യമന്ത്രിക്ക് കേരള മുഖ്യമന്ത്രി വി.ഡി. സതീശന്‍ കത്തയച്ചു.

🔹വടക്കു കിഴക്കന്‍ സംസ്ഥാനങ്ങളില്‍ പ്രളയക്കെടുതി. അരുണാചല്‍ പ്രദേശില്‍ ഇന്നലെ ഉണ്ടായ മേഘവിസ്ഫോടനത്തില്‍ രക്ഷാപ്രവര്‍ത്തകര്‍ സഞ്ചരിച്ച ബോട്ട് കാണാതായി. ഇവരടക്കം ഒന്‍പത് പേരെയാണ് കാണാതായത്. ആസാമില്‍ ആറ് ജില്ലകളിലായി 22,000 ആളുകളെയാണ് പ്രളയം ബാധിച്ചത്. കനത്ത മഴയെത്തുടര്‍ന്ന് സിമെന്‍ നദിയിലെ റെയില്‍വേ പാലത്തിന്റെ ഒരു തൂണ്‍ തകര്‍ന്നു. ഇതോടെ റെയില്‍ ഗതാഗതം തടസപ്പെട്ടു.

🔹തമിഴ്‌നാട്ടില്‍ മൂന്നു മുതല്‍ ആറു മാസത്തിനകം വിജയ് സര്‍ക്കാര്‍ വീഴുമെന്നും പൊതുതെരഞ്ഞെടുപ്പ് ഉണ്ടായേക്കാമെന്നും ഡിഎംകെ അധ്യക്ഷന്‍ എം കെ സ്റ്റാലിന്‍. ചെന്നൈയില്‍ മുന്‍ അണ്ണാ ഡിഎംകെ മന്ത്രി ബെഞ്ചമിന്റെ നേതൃത്വത്തില്‍ ഏതാനും പ്രവര്‍ത്തകര്‍ ഡിഎംകെയില്‍ ചേര്‍ന്നതിനോടനുബന്ധിച്ചു നടന്ന സമ്മേളനത്തില്‍ സംസാരിക്കുകയായിരുന്നു അദ്ദേഹം.

🔹മഹാരാഷ്ട്രയില്‍ മൂന്നു വയസ്സുകാരിയെ ബലാത്സംഗം ചെയ്ത് കൊലപ്പെടുത്തിയ കേസില്‍ പ്രതിക്കു വധശിക്ഷ. 65 കാരനായ ഭീംറാവു കാംബ്ലെയെയാണ് പുണെ കോടതി വധശിക്ഷയ്ക്കു വിധിച്ചത്.

🔹ഇലക്ട്രിക് വാഹനങ്ങള്‍ക്ക് വന്‍ നികുതിയിളവുകളും സബ്‌സിഡികളും വാഗ്ദാനം ചെയ്ത് പുതിയ ഇവി പോളിസി. ഈ നയപ്രകാരം പെട്രോള്‍, ഡീസല്‍ ടൂവീലറുകള്‍ ഘട്ടം ഘട്ടമായി നിര്‍ത്തലാക്കുകയും പഴയ വാഹനങ്ങള്‍ പൊളിക്കുന്നതിന് ആകര്‍ഷകമായ സ്‌ക്രാപ്പേജ് ആനുകൂല്യങ്ങള്‍ നല്‍കുകയും ചെയ്യും.

🔹ഇറാന്റെ പരമോന്നത നേതാവായിരുന്ന ആയത്തുള്ള അലി ഖമനെയിയുടെ സംസ്‌കാര ചടങ്ങുകള്‍ക്ക് ഇന്ത്യയെ പ്രതിനിധീകരിച്ച് ബിഹാര്‍ ഗവര്‍ണര്‍ സയ്ദ് അത്ത ഹസ്നയ്ന്‍, വിദേശകാര്യ സഹമന്ത്രി പബിത്ര മാര്‍ഗരിറ്റ എന്നിവര്‍ പങ്കെടുക്കും. വിദേശകാര്യമന്ത്രാലയ ഉദ്യോഗസ്ഥരും അനുഗമിക്കും.

🔹അമേരിക്ക മരവിപ്പിച്ച ഇറാന്റെ സ്വത്തുക്കളില്‍ 600 കോടി ഡോളര്‍ ആദ്യ ഘട്ടമായി ഖത്തര്‍ വഴി നല്‍കും. ഹോര്‍മൂസിലെ സംഘര്‍ഷം അവസാനിപ്പിക്കാന്‍ ഇറാനും അമേരിക്കയും വീണ്ടും ധാരണയിലെത്തി. ഇറാന്‍ – അമേരിക്ക ചര്‍ച്ചകള്‍ ഈയാഴ്ച്ച നടക്കുമെന്ന വാര്‍ത്ത ഇറാന്‍ നിഷേധിച്ചു. ഇതേസമയം, ഹോര്‍മൂസ് കൈകാര്യം ചെയ്യാനുള്ള ചര്‍ച്ചകള്‍ ഒമാനും ഇറാനും തമ്മില്‍ തുടങ്ങി.

🔹ഇറാഖ് രാഷ്ട്രീയത്തെ പിടിച്ചുലച്ച അഴിമതിക്കേസില്‍ ഏഴ് ഉന്നത രാഷ്ട്രീയ നേതാക്കളെ സൈന്യം അറസ്റ്റു ചെയ്തു. ഭരണകക്ഷിയിലും പ്രതിപക്ഷത്തുമുള്ള പാര്‍ലമെന്റ് അംഗങ്ങളായ ഏഴു പേരയൊണ് പിടികൂടിയത്. ബാഗ്ദാദിലെ അതീവ സുരക്ഷാ മേഖലയായ ഗ്രീന്‍ സോണ്‍ വളഞ്ഞാണ് ഇവരെ അറസ്റ്റ് ചെയ്തത്.

🔹ആര്‍ട്ടിഫിഷ്യല്‍ ഇന്റലിജന്‍സ് സേവനങ്ങള്‍ ഉപയോഗിക്കുന്നവര്‍ക്ക് ബില്ലിംഗിലെ പിഴവുകള്‍ കാരണം ഏകദേശം 1.7 മില്യണ്‍ ഡോളര്‍ (ഏകദേശം 14 കോടി രൂപ) അധിക ബാധ്യത. ഓപ്പണ്‍എഐ, ആന്ത്രോപിക് തുടങ്ങിയ മുന്‍നിര കമ്പനികളുടെ എഐ മോഡലുകളും സേവനങ്ങളും ഉപയോഗിക്കുന്നവര്‍ക്കാണ് ഈ അധിക ചാര്‍ജ് നേരിടേണ്ടി വന്നത്. വോഡിറ്റ് എന്ന സ്റ്റാര്‍ട്ടപ്പാണ് ഈ ബില്ലിംഗ് ക്രമക്കേടുകള്‍ പുറത്തുകൊണ്ടുവന്നത്. 2026 മാര്‍ച്ച് മുതല്‍ ജൂണ്‍ വരെയുള്ള കാലയളവില്‍ 60 കമ്പനികളില്‍ നിന്നുള്ള 34 മില്യണ്‍ ഡോളറിന്റെ എഐ ഇന്‍വോയ്‌സുകള്‍ പരിശോധിച്ചപ്പോഴാണ് ഈ വലിയ തുകയുടെ പിഴവ് കണ്ടെത്തിയത്. ഇതില്‍ പ്രധാനമായും ആന്ത്രോപിക്കിന്റെ ‘ക്ലോഡ് കോഡ്’ സംബന്ധിച്ച ബില്ലുകളിലാണ് കൂടുതല്‍ പ്രശ്നങ്ങള്‍ കണ്ടതെങ്കിലും ഓപ്പണ്‍എഐ ഇന്‍വോയ്‌സുകളിലും സമാനമായ പിഴവുകള്‍ ഉണ്ടായിരുന്നു. പാനസോണിക്, എച്ച്പി, ഹോണ്ട തുടങ്ങിയ വമ്പന്‍ കമ്പനികള്‍ വോഡിറ്റിന്റെ സേവനം ഉപയോഗിക്കുന്നവരാണ്.

🔹മൂന്ന് കൊടുമുടികള്‍ 24 മണിക്കൂറിനുള്ളില്‍ കീഴടക്കി ബ്രിട്ടനിലെ കേറ്റ് രാജകുമാരി. രണ്ട് വര്‍ഷം മുന്‍പ് താന്‍ കാന്‍സര്‍ രോഗത്തിന് ചികിത്സ തേടിയ ആശുപത്രിയെ സഹായിക്കാനായിരുന്നു കഠിനമായ കൊടുമുടി ചലഞ്ച്.

🔹ഇംഗ്ലണ്ട് പരമ്പരയിലെ ആദ്യ മത്സരത്തില്‍ തന്നെ വൈഭവ് സൂര്യവംശിയെ കളിപ്പിക്കണമെന്ന് മുന്‍ ഇന്ത്യന്‍ നായകന്‍ സുനില്‍ ഗവാസ്‌കര്‍ ആവശ്യപ്പെട്ടു.

🔹ഫിഫ ലോകകപ്പ് നോക്കൗട്ട് റൗണ്ടില്‍ ജപ്പാനെ ഒന്നിനെതിരേ രണ്ടു ഗോളിനു തകര്‍ത്ത് ബ്രസീല്‍ പ്രീ ക്വാര്‍ട്ടറിലെത്തി. 29-ാം മിനിറ്റില്‍ കെയ്ഷു സാനോയുടെ ഗോളിലൂടെ ജപ്പാന്‍ മുന്നിലെത്തിയിരുന്നു. തുടര്‍ന്ന് 56-ാം മിനിറ്റില്‍ കസെമിറോയുടെ ഹെഡ്ഡര്‍ ബ്രസീലിന് സമനില സമ്മാനിച്ചു. ഇഞ്ചുറി ടൈമില്‍ ഗബ്രിയല്‍ മാര്‍ട്ടിനെല്ലി നേടിയ ഗോളാണ് ബ്രസീലിന് ജയമൊരുക്കിയത്.

🔹ഫിഫ ലോകകപ്പില്‍ നിന്ന് ജര്‍മനി പുറത്ത്. റൗണ്ട് ഓഫ് 32 മത്സരത്തില്‍ പാരഗ്വായോട് ഷൂട്ടൗട്ടില്‍ തോറ്റാണ് ജര്‍മനി പുറത്തായത്. നിശ്ചിത സമയത്തും എക്‌സ്ട്രാ ടൈമിനു ശേഷവും ഓരോ ഗോള്‍ വീതമടിച്ച് സമനിലയില്‍ പിരിഞ്ഞതോടെയാണ് ഷൂട്ടൗട്ട് അനിവാര്യമായത്. ഷൂട്ടൗട്ടില്‍ 4-3 ന് തോല്‍പിച്ചാണ് പരാഗ്വ ജര്‍മനിക്ക് ഷോക്ക് നല്‍കിയത്. നേരത്തെ കളിയുടെ 42-ാം മിനിറ്റില്‍ ജൂലിയോ എന്‍സീസോയാണ് ജര്‍മനിയെ ഞെട്ടിച്ച് പാരഗ്വായ്ക്ക് വേണ്ടി ആദ്യം ലീഡെടുത്തത്. എന്നാല്‍ കളിയുടെ 54-ാം മിനിറ്റില്‍ കായ് ഹവേര്‍ട്സിലൂടെ ജര്‍മനി സമനില പിടിക്കുകയായിരുന്നു.

🔹തിരു വീര്‍ – ഐശ്വര്യ രാജേഷ് ചിത്രം ‘ഓ സുകുമാരി’ യിലെ വെഡിങ് ആന്തം പുറത്ത്. യാദിയുടെ കല്യാണത്തില്‍ എന്ന വരികളോടെ ആരംഭിക്കുന്ന ഗാനത്തിന്റെ ലിറിക് വീഡിയോ ആണ് റിലീസ് ചെയ്തിരിക്കുന്നത്. രാജ് പെരിയാര്‍ വരികള്‍ രചിച്ച ഗാനം ആലപിച്ചത് യദുകൃഷ്ണന്‍ ആണ്. ഭരത് മഞ്ജിരാജു ആണ് ഈ ഗാനത്തിന് സംഗീതം പകര്‍ന്നിരിക്കുന്നത്. ചിത്രം രചിച്ചുസംവിധാനം ചെയ്തിരിക്കുന്നത് നവാഗതനായ ഭരത് ദര്‍ശന്‍ ആണ്. തിരുവീര്‍ അവതരിപ്പിക്കുന്ന യാദഗിരി എന്ന നായകന്റെയും ഐശ്വര്യ രാജേഷ് അവതരിപ്പിക്കുന്ന ദാമിനി എന്ന കഥാപാത്രത്തിന്റെയും കല്യാണവുമായി ബന്ധപ്പെട്ടാണ് ഈ ഗാനം ഒരുക്കിയിരിക്കുന്നത്. ഗ്രാമീണ പശ്ചാത്തലത്തില്‍ കഥ പറയുന്ന ഒരു റൊമാന്റിക് കോമഡി ആയാണ് ഈ ചിത്രം ഒരുക്കിയിരിക്കുന്നത്. മുരളിധര്‍ ഗൌഡ്, വിഷ്ണു ഓയി (മാഡ് ഫെയിം) ഝാന്‍സി, അമാനി, ആനന്ദ്കോട്ട ജയറാം എന്നിവരാണ് ചിത്രത്തിലെ മറ്റു താരങ്ങള്‍. തെലുങ്ക്, കന്നഡ, തമിഴ്, മലയാളം, ഹിന്ദി ഭാഷകളില്‍ ചിത്രം റിലീസ് ചെയ്യും.

🔹വിഷ്ണു വിശാല്‍, ഐശ്വര്യ ലക്ഷ്മി എന്നിവരെ പ്രധാന കഥാപാത്രങ്ങളാക്കി ചെല്ല അയ്യാവു സംവിധാനം ചെയ്ത സ്പോര്‍സ് ഡ്രാമ ചിത്രം ‘ഗാട്ട കുസ്തി 2’ ട്രെയ്‌ലര്‍ പുറത്ത്. ചിത്രം ജൂലൈ 3 ന് ആഗോള റിലീസായി തിയേറ്ററുകളിലെത്തും. ‘ഗാട്ട കുസ്തി 2’ കേരളത്തിലെ തീയേറ്ററുകളില്‍ എത്തിക്കുന്നത് ഇ4 എന്റര്‍ടെയിന്‍മെന്റ് ആണ്. വേല്‍സ് ഫിലിം ഇന്റര്‍നാഷ്നലും വിഷ്ണു വിശാല്‍ സ്റ്റുഡിയോസും ചേര്‍ന്നാണ് ചിത്രം നിര്‍മ്മിക്കുന്നത്. വിഷ്ണു വിശാല്‍, ഐശ്വര്യ ലക്ഷ്മി എന്നിവര്‍ അവതരിപ്പിക്കുന്ന വീരയുടെയും കീര്‍ത്തിയുടെയും ഒപ്പം, ഇത്തവണ അവരുടെ മകളുടെയും ഇടയില്‍ ഉണ്ടാകുന്ന സംഭവ വികാസങ്ങളാണ് ചിത്രത്തിലൂടെ അവതരിപ്പിക്കുന്നത് എന്നും ട്രെയ്‌ലര്‍ കാണിച്ചു തരുന്നുണ്ട്. സ്പോര്‍ട്സ് ആക്ഷന്‍, കോമഡി, ഫാമിലി ഡ്രാമ, ഇമോഷന്‍ എന്നിവയെല്ലാം കോര്‍ത്തിണക്കിയാണ് ചിത്രം കഥ പറയുന്നത്.

💦 ഗുരുജിയുടെ വാക്കുകൾ
*****************************

ജീവിതത്തിൽ നമ്മൾ നൽകുന്ന ഏറ്റവും വലിയ രണ്ട് നിക്ഷേപങ്ങളാണ് നമ്മുടെ സമയവും സ്നേഹവും. കടന്നുപോകുന്ന ഓരോ സെക്കൻഡും നമുക്ക് ഒരിക്കലും തിരിച്ചുപിടിക്കാൻ കഴിയാത്തതാണ്. അങ്ങനെയുള്ള നമ്മുടെ വിലപ്പെട്ട സമയം, നമ്മളോട് ഒട്ടും ആത്മാർത്ഥത കാണിക്കാത്ത, സ്വന്തം സ്വാർത്ഥതയ്ക്ക് വേണ്ടി മാത്രം കൂടെ നിൽക്കുന്ന മനുഷ്യർക്ക് വേണ്ടി ജീവനോടെ പകുത്തു നൽകുന്നത് എത്ര വലിയ നഷ്ടമാണ്!
പലപ്പോഴും നമ്മൾ മറ്റുള്ളവരെ അമിതമായി വിശ്വസിക്കുകയും അവർക്കായി നമ്മുടെ സമാധാനവും സമയവും കളയുകയും ചെയ്യാറുണ്ട്. എന്നാൽ ഒടുവിൽ തിരിച്ചുകിട്ടുന്നത് അവഗണനയും വേദനയും മാത്രമാകുമ്പോഴാണ് നമ്മൾ പലതും തിരിച്ചറിയുന്നത്.
നമ്മൾ മനസ്സിലാക്കേണ്ട ചില കാര്യങ്ങൾ:
അർഹതയുള്ളവർക്ക് മാത്രം: നമ്മുടെ സ്നേഹവും കരുതലും ആത്മാർത്ഥമായി മനസ്സിലാക്കുന്ന, അതിനെ ബഹുമാനിക്കുന്ന ചുരുക്കം ചിലർ മതി നമ്മുടെ ജീവിതത്തിൽ.
സ്വയം തിരിച്ചറിവ്: നമ്മളെ വിലമതിക്കാത്തവരുടെ കൂടെനിന്ന് സ്വയം വില കളയരുത്. ആത്മാർത്ഥതയില്ലാത്ത ബന്ധങ്ങളിൽ നിന്ന് കൃത്യമായ അകലം പാലിക്കുന്നത് ഒരു സ്വാർത്ഥതയല്ല, മറിച്ച് നമ്മുടെ മാനസിക സമാധാനത്തിനായുള്ള നല്ലൊരു തീരുമാനമാണ്.
അതുകൊണ്ട്, മാറ്റിവെക്കാം ആത്മാർത്ഥതയില്ലാത്ത മുഖങ്ങളെ. നമ്മുടെ സ്നേഹവും സമയവും അതിനൊക്കെ പൂർണ്ണമായി അർഹതയുള്ള നല്ല മനുഷ്യർക്ക് വേണ്ടി മാത്രം മാറ്റിവെക്കാം. കാരണം, നമ്മുടെ ജീവിതവും സമാധാനവും മറ്റാരേക്കാളും പ്രധാനം നമുക്ക് തന്നെയാണ്!

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 30

•ലോക സോഷ്യൽ മീഡിയ ദിനം (World Social Media Day)ആധുനിക ആശയവിനിമയ രംഗത്ത് വിപ്ലവം സൃഷ്ടിച്ച സമൂഹമാധ്യമങ്ങളുടെ സ്വാധീനത്തെയും പ്രാധാന്യത്തെയും ഓർമ്മിപ്പിക്കുന്നതിനാണ് ജൂൺ 30 ⁠ലോക സോഷ്യൽ മീഡിയ ദിനമായി ആചരിക്കുന്നത്. 2010-ൽ ‘മാഷബിൾ’ (Mashable) എന്ന ആഗോള മാധ്യമ കമ്പനിയാണ് ഈ ദിനാചരണത്തിന് തുടക്കം കുറിച്ചത്.

•അന്താരാഷ്ട്ര ഛിന്നഗ്രഹ ദിനം (International Asteroid Day)ഛിന്നഗ്രഹങ്ങളെക്കുറിച്ചും അവ ഭൂമിക്ക് വരുത്തിവെക്കാവുന്ന അപകടങ്ങളെക്കുറിച്ചും ജനങ്ങളിൽ അവബോധം വളർത്താൻ ഐക്യരാഷ്ട്രസഭയുടെ (UN) ആഹ്വാനപ്രകാരം ഈ ദിവസം അന്താരാഷ്ട്ര ഛിന്നഗ്രഹ ദിനമായി ആചരിക്കുന്നു. 1908 ജൂൺ 30-ന് റഷ്യയിലെ സൈബീരിയയിൽ ഉണ്ടായ വൻ ഛിന്നഗ്രഹ സ്ഫോടനമായ (തുംഗസ്ക സംഭവം) ഓർമ്മപ്പെടുത്തലായാണ് ഈ തീയതി തിരഞ്ഞെടുത്തത്.

•അന്താരാഷ്ട്ര പാർലമെന്ററി ദിനം (International Day of Parliamentarism)ലോകമെമ്പാടുമുള്ള പാർലമെന്ററി സംവിധാനങ്ങളെയും അവ ജനാധിപത്യ പ്രക്രിയയിൽ ചെലുത്തുന്ന സ്വാധീനത്തെയും ബഹുമാനിക്കുന്നതിനായാണ് ഐക്യരാഷ്ട്രസഭ ജൂൺ 30 അന്താരാഷ്ട്ര പാർലമെന്ററി ദിനമായി പ്രഖ്യാപിച്ചത്. 1889 ജൂൺ 30-നാണ് അന്താരാഷ്ട്ര പാർലമെന്ററി സംഘടനയായ ‘ഇന്റർ പാർലമെന്ററി യൂണിയൻ’ (IPU) സ്ഥാപിതമായത്.

തയ്യാറാക്കിയത്: കപിൽ ശങ്കർ

69 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 30 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 30

തയ്യാറാക്കിയത്: കപിൽ ശങ്കർ

ഗൗതം അദാനിക്കെതിരായ കേസ് പിൻവലിച്ചതിൽ വിശദീകരണം തേടി യുഎസ് കോടതി

LEAVE A REPLY Cancel reply

Most Popular

രാജസ്ഥാനിൽ പ്രധാനമന്ത്രി നരേന്ദ്ര മോദിയുടെ മുഖംമൂടി ധരിച്ച് മോഷണം

തൃശ്ശൂരിലെ ലോഡ്ജില്‍ യുവതിയെയും നവജാതശിശുവിനെയും മരിച്ച നിലയില്‍ കണ്ടെത്തി

തൃശൂരിൽ ബസ് നിയന്ത്രണം വിട്ട് ബസ് സ്റ്റോപ്പിലേക്ക് ഇടിച്ചുകയറി അപകടം; അഞ്ച് പേർക്ക് പരിക്ക്.

മലയോര റൂട്ടുകളിൽ കെ.എസ്.ആർ.ടി.സി യുടെ അപകടയാത്ര.

Recent Comments

EDITOR PICKS

രാജസ്ഥാനിൽ പ്രധാനമന്ത്രി നരേന്ദ്ര മോദിയുടെ മുഖംമൂടി ധരിച്ച് മോഷണം

തൃശ്ശൂരിലെ ലോഡ്ജില്‍ യുവതിയെയും നവജാതശിശുവിനെയും മരിച്ച നിലയില്‍ കണ്ടെത്തി

തൃശൂരിൽ ബസ് നിയന്ത്രണം വിട്ട് ബസ് സ്റ്റോപ്പിലേക്ക് ഇടിച്ചുകയറി അപകടം; അഞ്ച് പേർക്ക് പരിക്ക്.

POPULAR POSTS

രാജസ്ഥാനിൽ പ്രധാനമന്ത്രി നരേന്ദ്ര മോദിയുടെ മുഖംമൂടി ധരിച്ച് മോഷണം

2028 ലോസ് ഏഞ്ചൽസ് ഒളിമ്പിക്സ്: ക്രിക്കറ്റ് യോഗ്യതാ മാനദണ്ഡങ്ങൾ പ്രഖ്യാപിച്ചു; ആറ് ടീമുകൾ വീതം മാറ്റുരയ്ക്കും.

ഇത് ചരിത്രം; കാനഡ ഫിഫ ലോകകപ്പിന്റെ പ്രീ ക്വാര്‍ട്ടറില്‍; നോക്കൗട്ടില്‍ ദക്ഷിണാഫ്രിക്കയെ തോല്‍പ്പിച്ചു.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 30 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂൺ 30

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************