📱വാർത്തകൾ ഒറ്റനോട്ടത്തിൽ📱 – 2026 | മെയ് 30 | ശനി ✍️ കപിൽ ശങ്കർ

🔹മേയ് 31 ലോകമെമ്പാടും ലോക പുകയില വിരുദ്ധ ദിനമായി (World No Tobacco Day) ആചരിക്കുന്നു.പുകയിലയുടെ മാരകമായ ആരോഗ്യപ്രശ്നങ്ങളെക്കുറിച്ച് ജനങ്ങളിൽ അവബോധം വളർത്തുന്നതിനായി 1987-ലാണ് ലോകാരോഗ്യ സംഘടന (WHO) ഈ ദിനാചരണം ആരംഭിച്ചത്.
•ലോക തത്ത ദിനം (World Parrot Day): വന്യജീവി ലോകത്തെ തത്തകളുടെ സംരക്ഷണത്തെക്കുറിച്ചും, അവ നേരിടുന്ന വേട്ടയാടൽ, വാസസ്ഥല നഷ്ടം എന്നിവയെക്കുറിച്ചും ഓർമ്മിപ്പിക്കുന്ന അന്താരാഷ്ട്ര ദിനം.
•അന്താരാഷ്ട്ര ഫ്ലൈറ്റ് അറ്റൻഡന്റ് ദിനം (International Flight Attendant Day): വിമാനങ്ങളിലെ ക്യാബിൻ ക്രൂ ജീവനക്കാരുടെ സേവനങ്ങളെ മാനിക്കുന്നതിനുള്ള ദിവസം.
•അഹല്യാബായ് ഹോൾക്കർ ജയന്തി: ഇന്ത്യയിലെ പ്രശസ്തയായ മറാത്താ രാജ്ഞി അഹല്യാബായ് ഹോൾക്കറുടെ ജന്മദിനമാണ് (1725 മേയ് 31).
•ദക്ഷിണാഫ്രിക്കൻ യൂണിയൻ: 1910 മേയ് 31-നാണ് ‘യൂണിയൻ ഓഫ് സൗത്ത് ആഫ്രിക്ക’ രൂപീകൃതമായത്.

🔹അഞ്ച് ഇന്ദിരാ ഗ്യാരന്റികള്‍ അടക്കമുള്ള വാഗ്ദാനങ്ങള്‍ നടപ്പാക്കുമെന്ന് മുഖ്യമന്ത്രി വി ഡി സതീശന്‍. കേരളം പുതുയുഗത്തിലേക്ക് ചുവടുവയ്ക്കും. കേരളത്തെ തുറമുഖ നഗരമാക്കും. ദക്ഷിണേഷ്യയിലെ വലിയ ഏവിയേഷന്‍ ഹബ്ബാക്കും. സഹകരണ മേഖലയിലെ വിശ്വാസ്യത വീണ്ടെടുക്കും. ഉന്നത വിദ്യാഭ്യാസ മേഖലയില്‍ വന്‍ മാറ്റമുണ്ടാക്കും. മയക്കുമരുന്ന് ശൃംഖലയെ തുടച്ചുമാറ്റും. വ്യവസായങ്ങളെ ആകര്‍ഷിക്കാന്‍ ലാന്റ് ബാങ്ക് സജ്ജമാക്കും. പിണറായി സര്‍ക്കാരിന്റെ നയമല്ല നടപ്പാക്കുന്നതെന്നും വാര്‍ത്താസമ്മേളനത്തില്‍ മുഖ്യമന്ത്രി വ്യക്തമാക്കി.

🔹സംസ്ഥാനത്ത് അതിവേഗ റെയില്‍പാത സജ്ജമാക്കാന്‍ മുഖ്യമന്ത്രി വി ഡി സതീശനും മെട്രോമാന്‍ ഇ. ശ്രീധരനും തമ്മില്‍ കൂടിക്കാഴ്ച നടത്തി. ഇ ശ്രീധരന്‍ തയാറാക്കിയ ബദല്‍ പാതയുടെ കരടുരേഖ മുഖ്യമന്ത്രിക്കു കൈമാറി. തിരുവനന്തപുരം മുതല്‍ കണ്ണൂര്‍ വരെയുള്ള 430 കിലോമീറ്റര്‍ മൂന്നു മണിക്കൂര്‍ 15 മിനിറ്റുകൊണ്ട് എത്തുന്ന പദ്ധതിയാണിത്. മണിക്കൂറില്‍ 200 കിലോമീറ്റര്‍ വേഗത. നിലവിലുള്ള റെയില്‍ പാതകളുമായി കൂട്ടിയോജിപ്പിക്കാം. പിണറായി സര്‍ക്കാരിനും ശ്രീധരന്‍ ഈ പദ്ധതി രേഖ നല്‍കിയിരുന്നു.

🔹ബജറ്റില്‍ ജീവനക്കാര്‍ക്കായി ചില വിസ്മയങ്ങള്‍ ഉണ്ടാകുമെന്ന് മുഖ്യമന്ത്രി വി.ഡി സതീശന്‍. എല്ലാ പ്രശ്നങ്ങളും ഒറ്റയടിക്ക് തീര്‍ക്കുമെന്നല്ല. ജീവനക്കാരില്‍ വലിയ ഒരു വിഭാഗം യുഡിഎഫിനാണ് വോട്ടു ചെയ്തത്. കഴിഞ്ഞ പത്തു വര്‍ഷം യുഡിഎഫ് അനുകൂല ജീവനക്കാര്‍ അനുവദിച്ച യാതനകള്‍ മറിക്കില്ലെന്നും എന്‍ജിഒ അസോസേഷന്‍ സംസ്ഥാന സമ്മേളനം ഉദ്ഘാടനം ചെയ്തുകൊണ്ട് മുഖ്യമന്ത്രി പറഞ്ഞു.

🔹എസ്ഐ റാങ്ക് പട്ടികയിലുള്ളവർക്ക് ഉടൻ നിയമന ഉത്തരവ് നൽകാൻ നിർദേശം നൽകി ആഭ്യന്തരമന്ത്രി രമേശ് ചെന്നിത്തല. 43 പേർക്ക് നിയമനം നൽകാനാണ് നിർദേശം. ജൂൺ 9ന് കാലാവധി കഴിയുന്ന പട്ടികയിൽ നിന്നാണ് നിയമനം നടത്തുക.

‎🔹തൃശൂർ അതിരപ്പിള്ളിയിൽ വൈശേരി സ്വദേശി മോഹനൻ കാട്ടാനയുടെ ആക്രമണത്തിൽ കൊല്ലപ്പെട്ടു. ഇന്ന് പുലർച്ചെ 2.45 ഓടെ കൃഷിയിടത്തിലിറങ്ങിയ ആനയെ തുരത്താൻ ശ്രമിക്കുന്നതിനിടെ ആയിരുന്നു ആനയുടെ ആക്രമണം. കാട്ടാന ആക്രമണത്തിൽ പ്രതിഷേധിച്ച് അതിരപ്പിള്ളിയിൽ ഇന്ന് ഹർത്താൽ

‎🔹കാട്ടാന ആക്രമണത്തിൽ കൊല്ലപ്പെട്ട മോഹനന്റെ കുടുംബത്തിന് 14 ലക്ഷം രൂപ നഷ്ടപരിഹാരം നൽകുമെന്ന് വനംമന്ത്രി ഷിബു ബേബി ജോൺ. വന്യമൃഗ ആക്രമണത്തിൽ പ്രഥമ ഉത്തരവാദിത്തം വനം വകുപ്പിന് തന്നെയാണെന്നും ദീർഘകാലമായി നിൽക്കുന്ന പ്രശ്നങ്ങളെ കൂട്ടായ ഉത്തരവാദിത്തത്തോടെ നേരിടണമെന്നും മന്ത്രി വ്യക്തമാക്കി.

🔹മാസപ്പടി പരിശോധനയ്ക്കു പിണറായി വിജയന്റെ വീട്ടില്‍ റെയ്ഡിനെത്തിയ എന്‍ഫോഴ്‌സ്‌മെന്റ് ഉദ്യോഗസ്ഥരെ ആക്രമിച്ച കേസില്‍ ആറു പ്രതികളെ കൂടി പോലീസ് അറസ്റ്റു ചെയ്തു. ആറ്റുകാല്‍ ഉണ്ണി, വിജയ്, സിദ്ധാര്‍ഥ്, നിഷാദ്, ചാല ഉണ്ണി, ഷൈജു സലിം എന്നീ സിപിഎം പ്രവര്‍ത്തകരെയാണ് പിടികൂടിയത്. ഇതോടെ ഈ കേസില്‍ അറസ്റ്റിലായവരുടെ എണ്ണം 25 ആയി.

‎🔹സിഎംആർഎൽ എക്സാലോജിക് സാമ്പത്തിക ഇടപാട് കേസിൽ ടി വീണയുടെ ലോക്കർ തുറന്നു പരിശോധിക്കാൻ ഇ ഡി. എച്ച്ഡിഎഫ്സി ബാങ്കിലെ ലോക്കറാണ് പരിശോധിക്കുക. ലോക്കറുള്ള അക്കൗണ്ട് ഇ ഡി മരവിപ്പിച്ചിരുന്നു.

🔹മാസപ്പടി കേസിലെ ഇഡി റെയ്ഡിന് എതിരായ സിപിഐഎം പ്രതിഷേധത്തെ പിന്തുണയ്ക്കുന്നതിൽ സിപിഐയിൽ ആശയക്കുഴപ്പം. പിണറായി വിജയന്റെ മകൾക്കെതിരായ കേസിൽ പ്രതിഷേധിക്കുന്നതെന്തിനെന്ന നിലപാടിലാണ് മുതിർന്ന നേതാക്കൾ.

🔹മുന്‍മന്ത്രി ടി യു കുരുവിള അന്തരിച്ചു. 89 വയസ്സായിരുന്നു. ആരോഗ്യ പ്രശ്നങ്ങളെ തുടര്‍ന്ന് ഏറെ നാളായി കൊച്ചിയിലെ ആശുപത്രിയില്‍ ചികിത്സയിലായിരുന്നു. കേരള കോണ്‍ഗ്രസ് ജോസഫ് ഗ്രൂപ്പ് വൈസ് ചെയര്‍മാനാണ്. വി എസ് അച്യുതാനന്ദന്‍ സര്‍ക്കാരില്‍ പൊതുമരാമത്ത് മന്ത്രിയായിരുന്നു ടി യു കുരുവിള.

🔹ശബരിമലയില്‍ കഴിഞ്ഞ 10 വര്‍ഷത്തെ അഷ്ടാഭിഷേകങ്ങള്‍ ഓഡിറ്റ് ചെയ്ത് റിപ്പോര്‍ട്ട് ഹാജരാക്കാന്‍ ഹൈക്കോടതി ഉത്തരവിട്ടു. റിപ്പോര്‍ട്ട് നല്‍കാന്‍ സ്റ്റേറ്റ് ഓഡിറ്റ് വകുപ്പിനാണ് നിര്‍ദേശം നല്‍കിയത്. മൂന്ന് ആഴ്ചയ്ക്കകം റിപ്പോര്‍ട്ട് സമര്‍പ്പിക്കണം. തിരുവിതാംകൂര്‍ ദേവസ്വം ബോര്‍ഡ് ഉദ്യോഗസ്ഥര്‍ ഫണ്ട് വകമാറ്റിയെന്ന ആരോപണത്തിലാണ് നടപടി.

🔹ശബരിമല സ്വർണ്ണക്കൊള്ളയുമായി ബന്ധപ്പെട്ട നിർണ്ണായക പരിശോധന ഫലം എസ്ഐടിക്ക്. പാളികൾ മാറ്റിയില്ലെന്നും, പൊതിഞ്ഞിരുന്ന സ്വർണ്ണം മാത്രമാണ് തട്ടിയെടുത്തതെന്നുമാണ് കണ്ടെത്തൽ. ദ്വാരപാലക പാളിയിൽ നിന്നും കട്ടിളപ്പാളിയിൽ നിന്നും നാല് മാസം മുൻപ് സാമ്പിളുകള്‍ ശേഖരിച്ച് പരിശോധനയ്ക്കയച്ചിരുന്നു.

🔹‎പത്മനാഭസ്വാമി ക്ഷേത്രത്തിലെ അമൂല്യ വസ്തുക്കൾ നഷ്ടപ്പെട്ട സംഭവത്തിൽ ആഭ്യന്തരമന്ത്രിയുമായി കൂടിയാലോചിച്ച് തീരുമാനമെന്ന് ദേവസ്വം മന്ത്രി കെ മുരളീധരൻ. ഏത് അന്വേഷണത്തോടും എതിർപ്പില്ലെന്ന് കൊട്ടാരം അറിയിച്ചു. ക്ഷേത്രവുമായി ബന്ധപ്പെട്ട എല്ലാ കണക്കുകളും സുതാര്യമായിരിക്കണമെന്നാണ് പത്മനാഭസ്വാമി ക്ഷേത്രത്തിലെ ഫണ്ട് വിവരം പുറത്തുവിടാത്തതിനെ കുറിച്ചുള്ള ചോദ്യത്തോടുള്ള മന്ത്രിയുടെ പ്രതികരണം.

🔹ശ്രീപത്മനാഭസ്വാമി ക്ഷേത്രത്തില്‍ നിന്ന് വസ്തുക്കള്‍ നഷ്ടപ്പെട്ടെന്ന ഡിജിപിയുടെ റിപ്പോര്‍ട്ട് വസ്തുതാവിരുദ്ധമാണെന്ന് ക്ഷേത്ര ഭരണസമിതി. വൈര നാമവും വിളക്കും ഉള്‍പ്പെടെയുള്ളവ ക്ഷേത്രത്തില്‍ ഭദ്രമാണെന്നും, തെറ്റായ റിപ്പോര്‍ട്ട് നല്‍കിയ ഉദ്യോഗസ്ഥര്‍ക്കെതിരെ നടപടി വേണമെന്നും ഭരണസമിതി ആവശ്യപ്പെട്ടു.

🔹താരസംഘടനയായ അമ്മയുടെ ജനറല്‍ സെക്രട്ടറി കുക്കു പരമേശ്വരനെതിരേ അമ്മയുടെ ഫ്രണ്ട് ഓഫീസ് ജീവനക്കാരി അതുല്യ കൊച്ചി സിറ്റി പോലീസ് കമ്മിഷണര്‍ക്ക് പരാതി നല്‍കി. താനുമായി അപകീര്‍ത്തികരമായ ബന്ധമുണ്ടെന്നു പറയാന്‍ സെക്യൂരിറ്റി ജീവനക്കാരനെ കുക്കു പരമേശ്വരന്‍ നിര്‍ബന്ധിച്ചെന്നാണ് അതുല്യയുടെ പരാതി.

‎🔹നടി അൻസിബ നൽകിയ പരാതിയിൽ വിശദമായ പരിശോധനയ്ക്ക് ശേഷം മാത്രം തുടർ നടപടികൾ എടുക്കാൻ പൊലീസ്. നടി ലക്ഷ്മി പ്രിയയ്ക്കും തൃപ്പൂണിത്തുറ പൊലീസ് സ്റ്റേഷനിലെ വനിതാ എസ് ഐയ്ക്കുമെതിരെ കേസെടുക്കണമെന്നാണ് അൻസിബയുടെ ആവശ്യം.

🔹പൊലീസിനും ലക്ഷ്മി പ്രിയയ്ക്കുമെതിരെ മുഖ്യമന്ത്രിക്കും ഡിജിപിക്കും നടി അന്‍സിബ ഹസന്‍ നല്‍കിയ പരാതി മുഖ്യമന്ത്രി പൊലീസ് മേധാവിക്ക് കൈമാറി. അന്‍സിബയുടെ പരാതിയില്‍ തുടര്‍ നടപടി സ്വീകരിക്കണമെന്നും മുഖ്യമന്ത്രി വി ഡി സതീശന്‍ നിര്‍ദ്ദേശം നല്‍കിയിട്ടുണ്ട്. ഇക്കാര്യം അന്‍സിബയെ അറിയിച്ചിട്ടുമുണ്ട്.

🔹നിക്ഷേപ തുക തിരിച്ചു കിട്ടാത്തതിന് കോണ്‍ഗ്രസ് നേതാവിന്റെ വീട്ടിലെത്തി സ്വയം പെട്രോള്‍ ഒഴിച്ച് തീകൊളുത്തിയ വയോധികന്‍ മരിച്ചു. കോഴിക്കോട് വടകരയിലെ തിരുവള്ളൂര്‍ സ്വദേശി ഇബ്രാഹിം കുട്ടിയാണ് മരിച്ചത്. കോണ്‍ഗ്രസ് നേതാവായ ലേബര്‍ സര്‍വീസ് സൊസൈറ്റി ഡയറക്ടര്‍ സുധീറിന്റെ വീട്ടിലെത്തിയാണ് തീ കൊളുത്തിയത്.

🔹ഇന്നു മുതല്‍ നാലു ദിവസത്തേക്കു മഴ മുന്നറിയിപ്പ്. ഇന്ന് പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം ജില്ലകളിലും നാളെ കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.

🔹എറണാകുളം ജില്ലയിലെ കുന്നത്തുനാട് വാഴക്കുളത്ത് പെയിന്റ് കമ്പനിയില്‍ വന്‍ തീപിടുത്തം. ഇന്നലെ രാത്രി ഏഴരയോടെയാണ് വാഴക്കുളം വില്ലേജ് ഓഫീസിന് എതിര്‍വശത്ത് പ്രവര്‍ത്തിക്കുന്ന ‘കളര്‍ ഇന്ത്യ’ എന്ന പെയിന്റ് കമ്പനിക്ക് തീപിടിച്ചത്.

🔹മുഖ്യമന്ത്രി വി.ഡി. സതീശനെ വിമര്‍ശിച്ച് സമൂഹ മാധ്യമങ്ങളില്‍ പോസ്റ്റിട്ട സര്‍ക്കാര്‍ സ്‌കൂള്‍ പ്രിന്‍സിപ്പലിനു സസ്‌പെന്‍ഷന്‍. ആറ്റിങ്ങല്‍ ഗവണ്‍മെന്റ് ബോയ്സ് ഹയര്‍ സെക്കണ്ടറി സ്‌കൂള്‍ പ്രിന്‍സിപ്പല്‍ ജവാദ് സുബൈറിനെതിരെയാണ് നടപടി.

🔹പതിനെട്ടുകാരിക്കുനേരെ ലൈംഗികാതിക്രമം നടത്തിയ സൈക്യാട്രിക് കൗണ്‍സിലര്‍ അറസ്റ്റില്‍. കോഴിക്കോട് തൊണ്ടയാട് സ്വദേശി യഹിയ ഖാന്‍ ആണ് അറസ്റ്റിലായത്.

🔹യുഡിഎഫ് സർക്കാർ അധികാരം ഏറ്റെടുത്തതിനു പിന്നാലെ എക്സൈസ് നയത്തിൽ മാറ്റം വരുത്തുന്നു. വെള്ളിയാഴ്ച ചേർന്ന ഉന്നതതല യോഗത്തിൽ മന്ത്രി എം. ലിജു ഇത് സംബന്ധിച്ച് നിർണായക വിവരങ്ങൾ നൽകി.പുതിയ നയത്തിന്‍റെ ഭാഗമായി ബാറുകളുടെ പ്രവർത്തന സമയത്തിൽ മാറ്റമുണ്ടാകുമെന്ന് റിപ്പോർട്ടുകളുണ്ട്. ഇതു സംബന്ധിച്ച് സർക്കാർ പഠനം നടത്തും. എക്സൈസ് നയം പരിഷ്കരിക്കുന്നതുമായി ബന്ധപ്പെട്ട് കൃത്യമായ ശിപാർശകളും നിർദ്ദേശങ്ങളും എഴുതി നൽകാൻ ഉദ്യോഗസ്ഥർക്ക് നിർദ്ദേശം നൽകി.ലഹരിക്കെതിരെ സംസ്ഥാന സർക്കാർ നടപ്പിലാക്കുന്ന വിമുക്തി പദ്ധതിയെ കൂടുതൽ ജനകീയമാക്കും. ഇതിനൊപ്പം എക്സൈസ് വകുപ്പിനെ ആധുനികവത്കരിക്കുമെന്നും മന്ത്രി അറിയിച്ചു. അത്യാധുനിക സാങ്കേതിക സൗകര്യങ്ങൾ വകുപ്പിന് ലഭ്യമാക്കും.

🔹കാമുകിയെ മർദിക്കുകയും കഴുത്തു ഞെരിച്ചു കൊലപ്പെടുത്താൻ ശ്രമിക്കുകയും മരിച്ചെന്നു കരുതി റോഡിൽ ഉപേക്ഷിക്കുകയും ചെയ്ത കേസിൽ യുവാവ് അറസ്റ്റിൽ. കോതമംഗലം സ്വദേശി നിതിൻ (31) ആണ് അറസ്റ്റിലായത്.കുന്നത്തുനാട് പോലീസ് ആണ് ഇയാളെ അറസ്റ്റ് ചെയ്തത്. സ്വകാര്യ ബാങ്കിലെ ജീവനക്കാരനായ നിതിന്‍റെ വിവാഹം തിങ്കളാഴ്ച നടക്കാനിരിക്കെയാണ് പോലീസ് അറസ്റ്റ് ചെയ്തത്. വധശ്രമത്തിനാണ് കേസ്.പട്ടിമറ്റം സ്വദേശിയും ഒരു കുട്ടിയുടെ അമ്മയുമാണ് യുവതി. നിതിന്‍റെ വിവാഹം ഉറപ്പിച്ചതോടെ ബന്ധത്തിൽ നിന്ന് പിന്മാറണമെന്ന് യുവതി ആവശ്യപ്പെട്ടു. ഇതേച്ചൊല്ലി കഴിഞ്ഞ ശനിയാഴ്ച രാത്രി ഇവർ തമ്മിൽ കലഹമുണ്ടായി.കടുത്ത മർദനത്തിനൊടുവിൽ യുവതി മരിച്ചെന്നു കരുതി നിതിൻ, ഇവരുടെ കൈകൾ കൂട്ടിക്കെട്ടി കോതമംഗലം ന്യൂ ബൈപാസിൽ കോഴിപ്പിള്ളി ഭാഗത്തെ വിജനമായ കുറ്റിക്കാട്ടിൽ തള്ളുകയായിരുന്നു.പുലർച്ചെ ബോധം വീണ്ടു കിട്ടിയ യുവതി ഇഴഞ്ഞുനീങ്ങി കോഴിപ്പിള്ളി ജംഗ്ഷനിൽ എത്തി നാട്ടുകാരെ വിവരം ധരിപ്പിച്ചു. തുടർന്ന് ആശുപത്രിയിൽ ചികിത്സ തേടിയ യുവതി പോലീസിൽ പരാതി നൽകുകയായിരുന്നു.

🔹ആലുവയില്‍ അച്ഛനമ്മമാര്‍ക്കൊപ്പം ഉറങ്ങിക്കിടന്ന കുട്ടിയെ തട്ടികൊണ്ടുപോയി പീഡിപ്പിച്ച കേസില്‍ പ്രതിയായ ക്രിസ്റ്റല്‍ രാജിന് ഇരട്ട ജീവപര്യന്തം. പെരുമ്പാവൂര്‍ അതിവേഗ പോക്സോ കോടതിയാണ് ശിക്ഷ വിധിച്ചത്. പോക്സോ ഉള്‍പ്പെടെ നിരവധി കേസുകളില്‍ ഉള്‍പ്പെട്ട ക്രിസ്റ്റല്‍ രാജിനെതിരെ കാപ്പയും ചുമത്തിയിട്ടുണ്ട്.

🔹സിബിഎസ്ഇ പുനര്‍മൂല്യനിര്‍ണ്ണയത്തിനുള്ള അപേക്ഷകള്‍ ജൂണ്‍ ഒന്നു വരെ സ്വീകരിക്കും. ഈ മാസം 26 മുതല്‍ 29 വരെ പുനര്‍മൂല്യനിര്‍ണ്ണയത്തിന് അപേക്ഷ നല്‍കാമെന്നായിരുന്നു സി ബി എസ് ഇ ആദ്യം വ്യക്തമാക്കിയിരുന്നത്.

🔹ഓണ്‍ലൈന്‍ ട്രേഡിങ് തട്ടിപ്പിലൂടെ 1.83 കോടി രൂപ തട്ടിയെടുത്ത കേസിലെ മുഖ്യപ്രതി പിടിയില്‍. ഹിമാചല്‍ പ്രദേശിലെ ബാബാനഗര്‍ സ്വദേശി സൂര്യകാന്ത് ആണ് കൊല്ലം പൊലീസിന്റെ പിടിയിലായത്. വന്‍ തുക ലാഭം വാഗ്ദാനം ചെയ്ത് വ്യാജ ഓണ്‍ലൈന്‍ ട്രേഡിങ് വഴി പുത്തൂര്‍ സ്വദേശിയില്‍ നിന്നും 1.83 കോടി രൂപ തട്ടിയെടുത്തെന്ന പരാതിയിലാണ് അറസ്റ്റ്.

🔹നെന്‍മാറ ഇരട്ടക്കൊലക്കേസില്‍ സാക്ഷിമൊഴികള്‍ നിഷേധിച്ച് പ്രതി ചെന്താമര. 46 പേരുടെ മൊഴികളാണ് ചെന്താമരയെ വായിച്ചു കേള്‍പ്പിച്ചത്. 2025 ജനുവരി 27 ന് നടന്ന നെന്‍മാറ ഇരട്ടക്കൊല കേസിലെ അന്തിമ വിചാരണയാണ് ഇപ്പോള്‍ നടക്കുന്നത്. ആകെ 81 സാക്ഷികളാണ് കേസിലുള്ളത്.

🔹കര്‍ണാടകത്തില്‍ ഇന്ന് കോണ്‍ഗ്രസ് നിയമസഭ കക്ഷിയോഗം. രാജിവച്ച സിദ്ദരാമയ്യക്കു പകരം ഉപമുഖ്യമന്ത്രി ഡി.കെ ശിവകുമാര്‍ മുഖ്യമന്ത്രിയാകും. ജൂണ്‍ മൂന്നിന് സത്യപ്രതിജ്ഞ ചെയ്യും.

🔹കര്‍ണാടകയിലെ വിജയപുര ജില്ലയില്‍ ഭൂമിതര്‍ക്കത്തെത്തുടര്‍ന്ന് ആറുപേരെ വെടിവെച്ചും വെട്ടിയും കൊലപ്പെടുത്തി. ഗോവിന്ദപുര്‍ ഗ്രാമത്തിലാണ് സംഭവം. ഗ്രാമത്തിലെ നിരാലെ, ഗോളഗി കുടുംബങ്ങള്‍ തമ്മില്‍ ദീര്‍ഘകാലമായി നിലനിന്നിരുന്ന ഭൂമിതര്‍ക്കമാണ് കൂട്ടക്കൊലയില്‍ കലാശിച്ചത്.

🔹ഡല്‍ഹിയിലെ ബംഗാളി മാര്‍ക്കറ്റ് മേഖലയിലെ തോടര്‍മല്‍ പാര്‍ക്കില്‍ ഓട്ടോറിക്ഷാ ഡ്രൈവര്‍മാരുമായി സംവദിച്ചും അവര്‍ക്കൊപ്പം നിലത്തിരുന്ന് ഉച്ചഭക്ഷണം കഴിച്ചും ലോക്‌സഭയിലെ പ്രതിപക്ഷ നേതാവ് രാഹുല്‍ ഗാന്ധി. തന്റെ വീടിനു സമീപത്താണ് അപ്രതീക്ഷിതമായി രാഹുല്‍ ഡ്രൈവര്‍മാരെ കാണാനെത്തിയത്. ഓട്ടോ ഡ്രൈവര്‍മാരുടെ കാക്കി യൂണിഫോം ധരിച്ചാണ് അദ്ദേഹം എത്തിയത്.

🔹നീറ്റ് ചോദ്യപേപ്പര്‍ ചോര്‍ച്ച എങ്ങനെ സംഭവിച്ചെന്ന് സുപ്രീം കോടതി. ചോദ്യപ്പേപ്പര്‍ ചോര്‍ച്ചയെ തുടര്‍ന്ന് നടത്തുന്ന നീറ്റ് യുജി പുനപരീക്ഷയില്‍ വീഴ്ചകളൊന്നും ഉണ്ടാകാതിരിക്കാന്‍ പ്രധാനമന്ത്രി നേരിട്ട് മേല്‍നോട്ടം വഹിക്കുന്നുണ്ടെന്ന് കേന്ദ്ര സര്‍ക്കാര്‍ സുപ്രീം കോടതിയെ അറിയിച്ചു.

🔹ഇറാനും അമേരിക്കയും തമ്മിലുള്ള സമാധാന കരാറില്‍ അന്തിമ തീരുമാനമെടുക്കാന്‍ യു എസ് പ്രസിഡന്റ് ഡോണള്‍ഡ് ട്രംപ് ഉന്നതതല യോഗം വിളിച്ചു. തന്ത്രപ്രധാനമായ ഹോര്‍മുസ് കടലിടുക്ക് ഇറാന്‍ തുറക്കണമെന്നും ടോള്‍ ഈടാക്കരുതെന്നുമാണ് അമേരിക്കയുടെ നിര്‍ദേശം. ഇറാന്‍ അണ്വായുധങ്ങള്‍ നിര്‍മ്മിക്കരുതെന്ന നിര്‍ദ്ദേശവുമുണ്ട്.

🔹വിമാന ഇന്ധനവില 121 ശതമാനത്തിലധികം വര്‍ധിച്ചെന്ന് അന്താരാഷ്ട്ര വ്യോമഗതാഗത അസോസിയേഷന്‍. വിമാന യാത്രാനിരക്ക് ഇനിയും വര്‍ധിപ്പിക്കേണ്ടി വരുമെന്നും അസോസിയേഷന്‍ വ്യക്തമാക്കി. യുദ്ധത്തെത്തുടര്‍ന്നാണ് വിമാന ഇന്ധനവില കുതിച്ചുയര്‍ന്നത്.

🔹രാജ്യത്തെ കറന്‍സി നിര്‍മാണത്തില്‍ പേപ്പറിന് പകരം പ്ലാസ്റ്റിക് ഉപയോഗിക്കാന്‍ റിസര്‍വ് ബാങ്ക് ആലോചന. പരീക്ഷണമെന്നോണം ആദ്യം 10, 20 രൂപ നോട്ടുകളായിരിക്കും പ്ലാസ്റ്റിക് കറന്‍സി അഥവാ പോളിമര്‍ കറന്‍സിയായി പുറത്തിറക്കുക. കോട്ടണ്‍ അധിഷ്ഠിതമായ പേപ്പര്‍ ഉപയോഗിച്ചാണ് നിലവില്‍ നോട്ടുകളുടെ അച്ചടി. ഇത്തരം നോട്ടുകള്‍ ശരാശരി 3-4 വര്‍ഷം കഴിയുമ്പോള്‍ മുഷിയും. പൊടി, വെള്ളം തുടങ്ങിയവ മൂലവും ആളുകള്‍ മടക്കിവയ്ക്കുന്നതിനാലും എളുപ്പത്തില്‍ മോശമാകാനുള്ള സാധ്യതയുമേറെ. എന്നാല്‍, പോളിമര്‍ നോട്ടുകള്‍ക്ക് ഈ പ്രശ്‌നമില്ലെന്നതും ദീര്‍ഘകാലം ഈടുനില്‍ക്കുമെന്നതും നേട്ടമാണ്. 2024-25ല്‍ ഏതാണ്ട് 2380 കോടി നോട്ടുകളാണ് മുഷിഞ്ഞതിനെ തുടര്‍ന്ന് പൊതുവിപണിയില്‍ നിന്ന് റിസര്‍വ് ബാങ്ക് പിന്‍വലിച്ചത്. പോളിമര്‍ നോട്ടുകളുടെ വ്യാജന്‍ ഉണ്ടാക്കാന്‍ പ്രയാസമാണെന്നതും നേട്ടമാണ്. പ്ലാസ്റ്റിക് ആയതിനാല്‍ കൂടുതല്‍ സുരക്ഷാ ഫീച്ചറുകളും പ്രത്യേക മഷികളും ഉള്‍ക്കൊള്ളിക്കാം. അറുപതോളം രാജ്യങ്ങള്‍ നിലവില്‍ പോളിമര്‍ നോട്ടുകള്‍ ഉപയോഗിക്കുന്നുണ്ട്.

🔹ഗുസ്തിതാരവും ഒളിമ്പിക് മെഡല്‍ ജേതാവുമായ വിനേഷ് ഫോഗട്ടിന് ഏഷ്യന്‍ ഗെയിംസിന്റെ സെലക്ഷന്‍ ട്രയല്‍സില്‍ പങ്കെടുക്കാമെന്ന ഡല്‍ഹി ഹൈക്കോടതി വിധി സുപ്രീം കോടതി ശരിവച്ചു. വിനേഷ് ഫോഗട്ട് രാജ്യത്തിന് അഭിമാനമാണെന്ന് പറഞ്ഞുകൊണ്ടാണ് സുപ്രീം കോടതി ഇന്ത്യന്‍ ഗുസ്തി ഫെഡറേഷന്റെ അപ്പീല്‍ തള്ളിയത്.

🔹ഐപിഎലില്‍ ഗുജറാത്ത് ടൈറ്റന്‍സ് ഫൈനലില്‍. രണ്ടാം ക്വാളിഫയറില്‍ രാജസ്ഥാന്‍ റോയല്‍സിനെ ഏഴു വിക്കറ്റിന് തകര്‍ത്താണ് ഗുജറാത്ത് ഫൈനലിലെത്തിയത്. ഞായറാഴ്ച അഹമ്മദാബാദില്‍ നടക്കുന്ന ഫൈനലില്‍ റോയല്‍ ചലഞ്ചേഴ്സ് ബെംഗളൂരും ഗുജറാത്തും തമ്മിലാണു മല്‍സരം. 47 പന്തില്‍ 96 റണ്‍സെടുത്ത വൈഭവ് സൂര്യവംശിയുടെ മികവില്‍ രാജസ്ഥാന്‍ ഉയര്‍ത്തിയ 215 റണ്‍സിന്റെ കൂറ്റന്‍ വിജയലക്ഷ്യം ക്യാപ്റ്റന്‍ ശുഭ്മാന്‍ ഗില്ലിന്റെ സെഞ്ചുറിയുടെയും സായ് സുദര്‍ശന്റെ അര്‍ധസെഞ്ചുറിയുടെയും കരുത്തില്‍ മൂന്ന് വിക്കറ്റ് നഷ്ടത്തില്‍ 18.3 ഓവറില്‍ ഗുജറാത്ത് അനായാസം മറികടന്നു. 47 പന്തില്‍ സെഞ്ചുറി തികച്ച ഗില്‍ 53 പന്തില്‍ 104 റണ്‍സെടുത്ത് ടോപ് സ്‌കോററായപ്പോള്‍ 32 പന്തില്‍ 58 റണ്‍സെടുത്ത സായ് സുദര്‍ശന്‍ തുടര്‍ച്ചയായ രണ്ടാം മത്സരത്തിലും ഹിറ്റ് വിക്കറ്റായി പുറത്തായി. സ്‌കോര്‍ രാജസ്ഥാന്‍ റോയല്‍സ് 20 ഓവറില്‍ 214-6, ഗുജറാത്ത് ടൈറ്റന്‍സ് 18.3 ഓവറില്‍ 219-3.

🔹നസ്ലെന്‍ നായകനായി എത്തുന്ന ഏറ്റവും പുതിയ ചിത്രം ‘മോളിവുഡ് ടൈംസി’ലെ പ്രൊമോ സോംഗ് റിലീസ് ചെയ്തു. ഗോട്ട് സോംഗ് എന്ന ടൈറ്റിലില്‍ വരുന്ന ജേക്സ് ബിജോയ് സംഗീത സംവിധാനം നിര്‍വഹിച്ച ഈ ഗാനം സംവിധാനം ചെയ്തിരിക്കുന്നത് ഡൗണ്‍ ട്രോഡന്‍ ആണ്. ഗാനം ആലപിച്ചിരിക്കുന്നത് ജയ്ക്സ് ബിജോയ്, അദ്രി ജോ, ട്രൈബ് മാമാ മേരികാളി എന്നിവര്‍ ചേര്‍ന്നാണ്. വരികള്‍ അദ്രി ജോയും എഴുതിയിരിക്കുന്നു. നസ്ലെനൊപ്പം സംഗീത സംവിധായകനായ ജേക്സ് ബിജോയും അദ്രി ജോയും ഗാനത്തിന്റെ വീഡിയോ പതിപ്പില്‍ ഉണ്ട്. വിനീത് മാധവന്‍ എന്ന കഥാപാത്രത്തിന്റെ സിനിമയെന്ന സ്വപ്നത്തിലേക്കുള്ള യാത്രയാണ് സിനിമ. നസ്ലിന്‍, സംഗീത് പ്രതാപ്, ഷറഫുദ്ദീന്‍ എന്നിവരെ കേന്ദ്ര കഥാപാത്രങ്ങളാക്കി അഭിനവ് സുന്ദര്‍ നായക് സംവിധാനം ചെയ്യുന്ന ചിത്രമാണ് മോളിവുഡ് ടൈംസ്.

💦 ഗുരുജിയുടെ വാക്കുകൾ

ജീവിതത്തിൽ ഏറ്റവും കൂടുതൽ സൂക്ഷിക്കേണ്ടത് നിങ്ങളുടെ വ്യക്തിത്വമാണ്.
ആരെയെങ്കിലും നിലനിർത്താൻ വേണ്ടി സ്വന്തം വില കളയരുത്…..!
നിങ്ങളെ കരയിപ്പിക്കുന്നവർക്കായി വീണ്ടും വീണ്ടും ചിരിക്കാൻ നടിക്കരുത്..
നിങ്ങളെ ചെറുതാക്കി കാണുന്നവരുടെ മുന്നിൽ സ്വയം തെളിയിക്കാൻ ശ്രമിക്കരുത്…..വിശ്വസിക്കാത്തവരുടെ മുന്നിൽ വിശദീകരിക്കാൻ നിൽക്കരുത് .

തയ്യാറാക്കിയത്: കപിൽ ശങ്കർ

83 Likes

📱വാർത്തകൾ ഒറ്റനോട്ടത്തിൽ📱 – 2026 | മെയ് 30 | ശനി ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

ഇന്റർനാഷണൽ പ്രയർ ലൈൻ 644-ാമത് പ്രാർത്ഥനാ സംഗമം സമാപിച്ചു

സതേൺ പോവർട്ടി ലോ സെന്റര് ഇൻ്റലിജൻസ് ഡയറക്ടർ അറസ്റ്റിൽ: ഫെഡറൽ അന്വേഷണത്തിൽ കോടികളുടെ തട്ടിപ്പ് പുറത്ത്

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

എത്തുന്നു ഇന്ത്യയുടെ ആദ്യ തദ്ദേശീയ മലേറിയ വാക്സിൻ: പ്രത്യേകതകൾ ഇവയെല്ലാം

POPULAR CATEGORY

ABOUT US

FOLLOW US