📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 29 | ശനി ✍️ കപിൽ ശങ്കർ

🔹തിരുവനന്തപുരം ചേന്തിയില്‍ മുഖ്യമന്ത്രി വി ഡി സതീശന്റെ വാഹനം തടഞ്ഞ് കയര്‍ത്തു സംസാരിച്ച കോണ്‍ഗ്രസ് തിരുവനന്തപുരം ജില്ലാ കമ്മിറ്റി അംഗം ചേന്തി അനിലിനെ ശ്രീകാര്യം പൊലീസ് രാത്രി അറസ്റ്റു ചെയ്തു. ചേന്തിയിലെ ഗുരുജയന്തി പരിപാടിയില്‍ പങ്കെടുക്കാത്തതില്‍ പ്രതിഷേധിച്ചാണ് ചെമ്പഴന്തി ശ്രീനാരായണ ഗുരുകുലത്തിലെ ഗുരുജയന്തി പരിപാടിക്കു പോകുകയായിരുന്ന മുഖ്യമന്ത്രിയുടെ വാഹനം തടഞ്ഞത്. കാര്‍ നിര്‍ത്തി അനിലിനോടും മറ്റും സംസാരിച്ച മുഖ്യമന്ത്രിയോട് ചേന്തി അനില്‍ കയര്‍ത്തു സംസാരിച്ചിരുന്നു.

🔹മുഖ്യമന്ത്രി വി.ഡി. സതീശനെ വഴിയില്‍ തടഞ്ഞ് അപമര്യാദയായി സംസാരിച്ചതിന് അറസ്റ്റിലായ കോണ്‍ഗ്രസ് തിരുവനന്തപുരം ജില്ലാ കമ്മിറ്റി അംഗം ചേന്തി അനിലിനെ കോണ്‍ഗ്രസിന്റെ പ്രാഥമിക അംഗത്വത്തില്‍നിന്ന് പുറത്താക്കി. കെപിസിസിയുടെ നിര്‍ദേശാനുസരണം ഡിസിസി പ്രസിഡന്റ് എന്‍ ശക്തനാണ് നടപടിയെടുത്തത്.

🔹മുഖ്യമന്ത്രി വി.ഡി. സതീശനെ വഴിയില്‍ തടഞ്ഞ ഡിസിസി അംഗം ചേന്തി അനിലിനെതിരേ കേസെടുത്ത് അറസ്റ്റു ചെയ്തത് മുഖ്യമന്ത്രിയുടെ ഔദ്യോഗിക ജോലി തടസ്സപ്പെടുത്തല്‍, അന്യായമായി തടഞ്ഞു വയ്ക്കല്‍, അപമാര്യാദയായി പെരുമാറല്‍, ഗതാഗതം തടസ്സപ്പെടുത്തല്‍ എന്നീ വകുപ്പുകള്‍ ചുമത്തിയാണ്. അനില്‍ റൗഡി ലിസ്റ്റിലുള്ളയാളാണെന്ന് റിമാന്‍ഡ് റിപ്പോര്‍ട്ട്. പ്രതിക്കെതിരെ ശ്രീകാര്യം, തുമ്പ, മെഡിക്കല്‍ കോളേജ് പൊലീസ് സ്റ്റേഷനുകളില്‍ നിരവധി കേസുകളുണ്ടെന്നും റിമാന്‍ഡ് റിപ്പോര്‍ട്ടില്‍ പറയുന്നു.Government

🔹വഴിയില്‍ തടഞ്ഞുനിര്‍ത്തി ചീത്ത വിളിക്കുന്നത് ഒരു സംസ്‌കാരത്തിനും യോജിച്ചതല്ലെന്ന് മന്ത്രി കെ. മുരളീധരന്‍. മുഖ്യമന്ത്രിയെ വഴിയില്‍ തടഞ്ഞതില്‍ നടപടി വേണമെന്നും ഒരു മുഖ്യമന്ത്രിയെയും ഇങ്ങനെ തടയാന്‍ പാടില്ലെന്നും മന്ത്രി മാധ്യമങ്ങളോട് പറഞ്ഞു.

🔹സുകുമാരക്കുറുപ്പിനെ കണ്ടെത്തിയെന്ന വ്യാജ ചാനല്‍ പ്രചരണത്തിനു പിറകില്‍ താനല്ലെന്ന് റിട്ടയേഡ് ക്രൈംബ്രാഞ്ച് ഉദ്യോഗസ്ഥന്‍ അലി അക്ബര്‍. ചാനലുകളില്‍ പ്രചരിപ്പിച്ച ഫോട്ടോ നല്‍കിയത് താനല്ലെന്നും ചില ചാനലുകളാണ് തനിക്ക് ഫോട്ടോ അയച്ചുതന്നതെന്നും അദ്ദേഹം പറഞ്ഞു. ദുരൂഹത നീങ്ങിയ സാഹചര്യത്തില്‍ സുകുമാരക്കുറുപ്പിനെ കണ്ടെത്താന്‍ അന്തര്‍ദേശീയ ഏജന്‍സിയായ ഇന്റര്‍പോളിന്റെ സഹായം തേടേണ്ടതില്ലെന്നു ക്രൈം ബ്രാഞ്ച് തീരുമാനിച്ചു.

🔹വിദ്യകൊണ്ട് പ്രബുദ്ധരാകാന്‍ പ്രേരിപ്പിച്ച ശ്രീനാരായണഗുരു യഥാര്‍ത്ഥത്തില്‍ വിശ്വഗുരുവാണെന്ന് മുഖ്യമന്ത്രി വി ഡി സതീശന്‍. ശ്രീനാരായണഗുരു ജയന്തി ആഘോഷങ്ങളോട് അനുബന്ധിച്ച് ചെമ്പഴന്തി ഗുരുകുലത്തില്‍ സംഘടിപ്പിച്ച ചടങ്ങില്‍ പ്രസംഗിക്കുകയായിരുന്നു അദ്ദേഹം. കണ്ണാടി പ്രതിഷ്ഠ നടത്തി മനുഷ്യനെ തന്നിലേക്ക് തന്നെ തിരിഞ്ഞുനോക്കാന്‍ പ്രേരിപ്പിച്ചത് ശ്രീനാരായണ ഗുരുവാണെന്ന് അദ്ദേഹം അഭിപ്രായപ്പെട്ടു.

🔹പിണറായി വിജയന്റെ വസതിയില്‍ പരിശോധനയക്കെത്തിയ എന്‍ഫോഴ്സ്മെന്റ് ഉദ്യോഗസ്ഥരുടെ വാഹനത്തിനെതിരേ ആക്രമണം നടത്തിയ കേസിലെ നാലു പ്രതികള്‍ ഫോണ്‍ വിവരങ്ങള്‍ പരിശോധിക്കാന്‍ സഹകരിക്കുന്നില്ലെന്ന് പോലീസ്. സിപിഎം പാളയം ലോക്കല്‍ കമ്മിറ്റി സെക്രട്ടറി ഐ.പി.ബിനു ഉള്‍പ്പെടെ 4 പ്രതികളുടെ മൊബൈല്‍ ഫോണ്‍ പോലീസിനു തുറക്കാനായിട്ടില്ല. പാസ്വേഡ് കൈമാറാത്തതാണു കാരണം. ഗൂഡാലോചന മറച്ചുവയ്ക്കാനാണ് ശ്രമമെന്ന് ആരോപിച്ച് കോടതിയെ സമീപിക്കാനാണു പോലീസിന്റെ നീക്കം.

🔹മലപ്പുറം കിഴിശ്ശേരിയില്‍ കൊണ്ടോട്ടി സബ് ആര്‍.ടി ഓഫീസിലെ ഉദ്യോഗസ്ഥരുടെ പീഡനത്തിലും അഴിമതിയിലും മനംനൊന്ത് ഓട്ടോ ഡ്രൈവറായ ഷൗക്കത്തലി ജീവനൊടുക്കിയ സംഭവം അങ്ങേയറ്റം ദൗര്‍ഭാഗ്യകരവും പ്രതിഷേധാര്‍ഹവുമാണെന്ന് പ്രതിപക്ഷ നേതാവ് പിണറായി വിജയന്‍. ഒരു തൊഴിലാളിയുടെ ഉപജീവനമാര്‍ഗ്ഗം തടഞ്ഞുവച്ച് മരണത്തിലേക്ക് തള്ളിവിടുകയാണ് ഉദ്യോഗസ്ഥര്‍ ചെയ്തതെന്നും അദ്ദേഹം ഫേസ്ബുക്കില്‍ കുറിച്ചു.

🔹കായംകുളത്ത് മാവേലി വേഷം കെട്ടിയ ആളുടെ മുഖത്ത് തിളച്ച എണ്ണയൊഴിച്ചതായി പരാതി. മാവേലി വേഷം കെട്ടിയ കരുനാഗപ്പള്ളി സ്വദേശിയായ ചന്ദ്രബാബുവിനോടാണ് ഈ ക്രൂരത. തട്ടുകടക്കാരനാണ് മാവേലിയെ ആക്രമിച്ചത്.

🔹കോഴിക്കോട് ജില്ലയിലെ രണ്ടിടങ്ങളിലായി പുഴയില്‍ ഒഴുക്കില്‍പ്പെട്ട് മൂന്നു പേര്‍ മരിച്ചു. വടകര മണിയൂര്‍ പാലയാട് നടയില്‍ പുഴയില്‍ കുളിക്കാനിറങ്ങിയ 2 കുട്ടികള്‍ക്കും കൊടുവള്ളി മാനിപുരം പുഴയില്‍ ഒഴുക്കില്‍പ്പെട്ട ഒരു കുട്ടിക്കുമാണ് ജീവന്‍ നഷ്ടമായത്. പാലയാട് നടയില്‍ കുളിക്കാനിറങ്ങിയ നാലംഗ സംഘത്തിലെ പാലയാട് സ്വദേശി നബീല്‍ (19), ഓര്‍ക്കാട്ടേരി വരപ്പുറത്ത് സിനാന്‍ (12) എന്നിവരാണ് മരിച്ചത്. കൂടെയുണ്ടായിരുന്ന രണ്ടുപേരെ രക്ഷപ്പെടുത്താനായി. കൊടുവള്ളി മാനിപുരം പുഴയില്‍ ഒഴുക്കില്‍പ്പെട്ട് കരീറ്റിപറമ്പ് സ്വദേശിയായ മുഹമ്മദ് ഷഹിന്‍ (15) എന്ന കുട്ടിയാണ് മരിച്ചത്.

🔹അച്ചന്‍കോവിലാറില്‍ നടന്ന പായിപ്പാട് ജലോത്സവത്തില്‍ പായിപ്പാടന്‍ ചുണ്ടന്‍ ജേതാവായി. ഫൈനല്‍ മത്സരത്തില്‍ മുട്ടേല്‍ തങ്കച്ചന്‍ ക്യാപ്റ്റനായ പള്ളാത്തുരുത്തി ബോട്ട് ക്ലബ് തുഴഞ്ഞ മേലപ്പാടം ചുണ്ടനെ തുഴപ്പാടുകളുടെ വ്യത്യാസത്തില്‍ പിന്നിലാക്കിയാണ് മഹേഷ് കറുകത്തറയില്‍ ക്യാപ്റ്റനായ ആരോമാ ബോട്ട് ക്ലബ് തുഴഞ്ഞ പായിപ്പാടന്‍ ചുണ്ടന്‍ കിരീടം ചൂടിയത്.

🔹പായിപ്പാട് ജലോത്സവത്തിനിടെ മോട്ടോര്‍ ബോട്ടില്‍നിന്ന് ആറ്റില്‍ വീണ് പുന്നമട സ്വദേശിയായ കണ്ടത്തില്‍ തോമസ് ജോസഫിന്റെ മകന്‍ എബിന്‍ തോമസ് (മത്തായി- 31) മുങ്ങി മരിച്ചു. മോട്ടോര്‍ ബോട്ടിലെ ജീവനക്കാരനായിരുന്ന എബിന്‍ തോമസിന് ദേഹാസ്വാസ്ഥ്യം അനുഭവപ്പെടുകയും ആറ്റിലേക്ക് മറിഞ്ഞു വീഴുകയുമായിരുന്നു.

🔹ഫേസ്ബുക്കില്‍ മതസ്പര്‍ദ്ധ വളര്‍ത്തുന്ന പോസ്റ്റുകള്‍ പങ്കുവച്ച തൊടുപുഴ പോലീസ് സ്റ്റേഷനിലെ ഗ്രേഡ് സബ് ഇന്‍സ്പെക്ടര്‍ കെ. വിജേഷിനെ സര്‍വീസില്‍ നിന്നു സസ്പെന്‍ഡു ചെയ്തു. പൂക്കളവുമായി ബന്ധപ്പെട്ട വിദ്വേഷ പോസ്റ്റ് പങ്കുവച്ചതിനെതിരേ ലഭിച്ച പരാതിയുടെ അടിസ്ഥാനത്തിലാണു നടപടി.

🔹പിടികിട്ടാപ്പുള്ളി സുകുമാര കുറുപ്പിന്റേതെന്ന പേരില്‍ ചിത്രം പ്രചരിക്കപ്പെട്ട തൃശൂര്‍ കരുമത്ര സ്വദേശി ദാമോദര മേനോനെ ഓര്‍മക്കുറവ് അടക്കമുള്ള അസുഖങ്ങള്‍മൂലം നാട്ടിലെത്തിക്കാന്‍ ഒരു മാസം മുമ്പേ ശ്രമം ആരംഭിച്ചിരുന്നെന്ന് നോര്‍ക്ക. ബ്രൂണേയിലെ ഇന്ത്യന്‍ ഹൈക്കമ്മീഷന്‍ ആവശ്യപ്പെട്ടതിനെത്തുടര്‍ന്നാണു നോര്‍ക്ക സഹായംതേടി ജൂലൈ രണ്ടിനു സംസ്ഥാന സര്‍ക്കാരിന്റെ കത്തയച്ചത്. ദാമോദര മേനോന്റെ പാസ്പോര്‍ട് നമ്പര്‍ അടക്കം കത്തിലുണ്ടായിരുന്നു.

🔹സംഗീതാധ്യാപികയും തിരുവനന്തപുരം ഗവണ്‍മെന്റ് വിമന്‍സ് കോളേജ് സംഗീത വിഭാഗം മുന്‍ മേധാവിയുമായ ബി. സരോജിനി (94) അന്തരിച്ചു. പ്രശസ്ത പിന്നണി ഗായകന്‍ ജി. വേണുഗോപാലിന്റെ അമ്മയാണ്.

🔹സ്വന്തം ജീവിതത്തെ യാതൊരുവിധ വെള്ളപൂശലുകളുമില്ലാതെ തുറന്നുകാട്ടിയ സോണിയ ഗാന്ധിയുടെ ആത്മകഥ തിരുത്താന്‍ പ്രസാധകര്‍ ആവശ്യപ്പെട്ടപ്പോള്‍ ‘സാധ്യമല്ല ‘ എന്നതിനപ്പുറം ഒരു മറുപടി ഉണ്ടാകില്ലെന്ന് ഉന്നത വിദ്യാഭ്യാസ മന്ത്രിയും എഐസിസി സെക്രട്ടറിയുമായ റോജി എം. ജോണ്‍. ഫേസ്ബുക്കില്‍ പങ്കുവെച്ച കുറിപ്പിലാണ് അദ്ദേഹം ഇങ്ങനെ പ്രതികരിച്ചത്.

🔹സോണിയ ഗാന്ധിയുടെ ഓര്‍മ്മക്കുറിപ്പുകളില്‍ നിന്ന് ആര്‍എസ്എസിനെയും മോദിയെയും കുറിച്ചുള്ള ഭാഗങ്ങള്‍ മാറ്റാനാണ് നിര്‍ദേശം നല്‍കിയതെന്ന് കോണ്‍ഗ്രസ് നേതാവ് അശോക് ഗെലോട്ട് ആരോപിച്ചു. ചൈനീസ് കടന്നുകയറ്റത്തെ കുറിച്ചുള്ള ഭാഗം നീക്കാനും നിര്‍ദേശിച്ചുവെന്ന് ഗെലോട്ട് വ്യക്തമാക്കി.

🔹ചാനലുകാരെ കാണുമ്പോള്‍ പേടിയാണെന്നും തന്റെ ഭാഷാ ശുദ്ധി നന്നാക്കാന്‍ ആരും പഠിപ്പിക്കേണ്ടതില്ലെന്നും വെള്ളാപ്പള്ളി നടേശന്‍. എസ്.എന്‍.ഡി.പി യോഗം പറവൂര്‍ യൂണിറ്റിന്റെ ശ്രീനാരായണ ജയന്തി സാംസ്‌കാരിക ആഘോഷത്തിലും ഘോഷയാത്രയിലും സംസാരിക്കവേ ആയിരുന്നു പ്രതികരണം.

🔹തിരുവനന്തപുരം കൈലാത്ത്കോണത്ത് പൗരാവലി നടത്തിയ ഓണാഘോഷത്തിന് നേരെ 40 അംഗ ഗുണ്ടാസംഘത്തിന്റെ ആക്രമണം. നാലു പേര്‍ക്ക് പരിക്കേറ്റു. ഒമ്പത് ബൈക്കുകളും രണ്ട് കാറുകളും അക്രമി സംഘം തകര്‍ത്തു. ലഹരി മാഫിയയാണ് അക്രമത്തിന് പിന്നിലെന്ന് നാട്ടുകാര്‍ ആരോപിച്ചു. പോലീസ് അന്വേഷണം ആരംഭിച്ചു.

🔹നിരവധി ക്രിമിനല്‍ കേസുകളില്‍ പ്രതികളായ സഹോദരങ്ങളെ കവര്‍ച്ച ആസൂത്രണം ചെയ്യുന്നതിനിടെ കോഴിക്കോട് പൊലീസ് അറസ്റ്റ് ചെയ്തു. കല്ലായി ചക്കുംകടവ് സ്വദേശികളും സഹോദരങ്ങളുമായ മുഹമ്മദ് ഷിഹാല്‍ എംപി (26) സഹോദരന്‍ മുഹമ്മദ് ഫാസില്‍(24) എന്നിവരെയാണ് പൊലീസ് അറസ്റ്റ് ചെയ്തത്.

🔹നേപ്പാളിലെ മിന്നല്‍ പ്രളയത്തില്‍ എട്ടു മലയാളികളടക്കം 320 ഇന്ത്യക്കാരെ കാണാനില്ല. മരണസംഖ്യ 584 ആയി. ഇന്നലെ 160 മൃതദേഹങ്ങള്‍ കണ്ടെത്തി. നേപ്പാളില്‍ ഇതുവരെ 84 ഇന്ത്യക്കാരെ കണ്ടെത്താനായെന്നും രക്ഷപ്പെടുത്തിയ 21 ഇന്ത്യക്കാരെ നാട്ടിലെത്തിച്ചെന്നും വിദേശകാര്യ വക്താവ് രണ്‍ധീര്‍ ജയ്സ്വാള്‍.

🔹നേപ്പാളില്‍ രക്ഷാപ്രവര്‍ത്തനത്തിന് സൈന്യത്തെയും എന്‍ ഡി ആര്‍ എഫ് സംഘത്തെയും അയക്കാമെന്ന ഇന്ത്യയുടെ നിര്‍ദ്ദേശം സ്വീകരിക്കാതെ നേപ്പാള്‍. എന്തിനും ഇന്ത്യ തയ്യാറായി നില്‍ക്കുകയാണെന്ന് വിദേശകാര്യമന്ത്രി എസ് ജയശങ്കര്‍ നേപ്പാള്‍ വിദേശകാര്യമന്ത്രി ശിസിര്‍ ഖനാലിനെ അറിയിച്ചു. തുരങ്കത്തില്‍ തിരച്ചില്‍ നടത്താനുള്ള വിദഗ്ധ സംഘത്തിന്റെ സഹായം മാത്രമാണ് നേപ്പാള്‍ ഇതുവരെ തേടിയതെന്ന് വിദേശകാര്യ മന്ത്രാലയം വ്യക്തമാക്കി.

🔹ഡൊണാള്‍ഡ് ട്രംപ് ആരംഭിച്ച ഇറാന്‍ യുദ്ധം ആറുമാസം പിന്നിടുമ്പോള്‍ അമേരിക്കയ്ക്ക് വലിയ ബാധ്യതയായി മാറിയിരിക്കുന്നുവെന്ന് റിപ്പോര്‍ട്ടുകള്‍. പശ്ചിമേഷ്യയില്‍ ശ്രദ്ധ കേന്ദ്രീകരിക്കുന്നത് യുക്രെയിന്‍, തായ്വാന്‍ തുടങ്ങിയ നിര്‍ണായക മേഖലകളില്‍ യുഎസ് സ്വാധീനം കുറയ്ക്കുകയും ആഗോളതലത്തില്‍ പുതിയ പ്രതിസന്ധികള്‍ സൃഷ്ടിക്കുകയും ചെയ്തെന്നാണു റിപ്പോര്‍ട്ട്.

🔹വെനസ്വേലയുമായി ചരിത്രത്തിലെ ഏറ്റവും വലിയ എണ്ണക്കരാറുമായി അമേരിക്ക. വെനസ്വേലയുടെ 6500 കോടി ബാരലിലധികം ക്രൂഡ് ഓയില്‍ ശേഖരത്തില്‍ അമേരിക്കയ്ക്ക് ഭൂരിപക്ഷ നിയന്ത്രണം ലഭിക്കുന്നതാണ് കരാര്‍. പ്രസിഡന്റായിരുന്ന മഡൂറോയെ പിടികൂടിയ യുഎസ് ഇടക്കാല പ്രസിഡന്റ് ഡെല്‍സി റോഡ്രിഗസുമായി നടത്തിയ ചര്‍ച്ചകളിലാണ് ഈ ധാരണയായത്. യുഎസ് പ്രസിഡന്റ് ഡൊണാള്‍ഡ് ട്രംപാണ് ഇക്കാര്യം വെളിപ്പെടുത്തിയത്.

🔹ഹോര്‍മുസ് തുറക്കാന്‍ തയാറെന്ന് ഇറാന്‍ പ്രസിഡന്റ് മസൂദ് പെസഷ്‌കിയാന്‍. ഒമാനുമായി ഇക്കാര്യത്തില്‍ ധാരണയില്‍ എത്തി. അമേരിക്ക വാക്കു പാലിച്ചാല്‍ ഹോര്‍മുസ് കടലിടുക്ക് കപ്പലുകള്‍ക്കായി തുറന്നുകൊടുക്കുമെന്നും ഇറാന്‍ പ്രസിഡന്റ് വ്യക്തമാക്കി. ഹോര്‍മുസ് കടലിടുക്കില്‍ പൂര്‍ണ്ണ നിയന്ത്രണമുണ്ടെന്നും അനുവാദം ഇല്ലാതെ ഒരു കപ്പലിനും കടക്കാന്‍ ആവില്ലെന്നും ഇറാന്‍.

🔹ന്യൂയോര്‍ക്ക് മേയര്‍ സൊഹ്റാന്‍ മംദാനി മുതിര്‍ന്ന പൗരന്മാര്‍ക്കായുള്ള കമ്മ്യൂണിറ്റി സെന്ററായ ഇന്ത്യാഹോമില്‍ രക്ഷാബന്ധന്‍ ആഘോഷത്തില്‍ പങ്കെടുത്തു. ഇന്ത്യക്കാരിയായ സ്ത്രീ സൊഹ്റാന്‍ മംദാനിക്ക് രാഖി കെട്ടിക്കൊടുക്കുന്നതിന്റെ ചിത്രവും അദ്ദേഹം സാമൂഹികമാധ്യമങ്ങളില്‍ പങ്കുവച്ചു.

🔹സൗദി അറേബ്യയുടെ സ്വപ്ന നഗര പദ്ധതിയായ ‘ന്യൂ മുറബ്ബ’യില്‍ അത്യാധുനിക സൗകര്യങ്ങളോടെ പുതിയ ജനറല്‍ ആശുപത്രി നിര്‍മിക്കുന്നു. സൗദി പബ്ലിക് ഇന്‍വെസ്റ്റ്മെന്റ് ഫണ്ടിന് കീഴിലുള്ള ന്യൂ മുറബ്ബ ഡെവലപ്‌മെന്റ് കമ്പനിയും പ്രമുഖ ആരോഗ്യ സേവന ദാതാക്കളായ അല്‍ മാന മെഡിക്കല്‍ ഗ്രൂപ്പും തമ്മില്‍ പങ്കാളിത്ത കരാര്‍ ഒപ്പുവച്ചു.

🔹മുഹമ്മദ് അസ്ഹറുദ്ദീന്റെ തകര്‍പ്പന്‍ സെഞ്ച്വറിയുടെ മികവില്‍ കാലിക്കറ്റ് ഉയര്‍ത്തിയ കൂറ്റന്‍ ലക്ഷ്യം മറികടന്ന് ആലപ്പി റിപ്പിള്‍സ്. ആദ്യം ബാറ്റ് ചെയ്ത കാലിക്കറ്റ് 20 ഓവറില്‍ അഞ്ച് വിക്കറ്റ് നഷ്ടത്തിലാണ് 213 റണ്‍സെടുത്തത്. മറുപടി ബാറ്റിംഗിനിറങ്ങിയ ആലപ്പി 19.3 ഓവറില്‍ നാല് വിക്കറ്റ് നഷ്ടത്തില്‍ ലക്ഷ്യത്തിലെത്തി. ഇതോടെ ആലപ്പി പോയിന്റ് പട്ടികയില്‍ ഒന്നാം സ്ഥാനത്തേക്ക് മുന്നേറിയപ്പോള്‍ മുഹമ്മദ് അസ്ഹറുദ്ദീന്‍ കെസിഎല്ലിന്റെ ചരിത്രത്തില്‍ ആയിരം റണ്‍സ് തികയ്ക്കുന്ന ആദ്യ താരമെന്ന സുവര്‍ണ നേട്ടവും സ്വന്തമാക്കി.

🔹സൂര്യ-മമിത ബൈജു ചിത്രം ‘വിശ്വനാഥ് ആന്‍ഡ് സണ്‍സി’ലെ വീഡിയോ ഗാനം റിലീസ് ചെയ്തു. ‘പട്ടാമ്പൂച്ചി..’ എന്ന ഗാനത്തിന് സംഗീതം നല്‍കിയിരിക്കുന്നത് ജിവി പ്രകാശ് കുമാറാണ്. സുബ്ലാഷിണി ആലപിച്ച ഗാനത്തിന്റെ വരികള്‍ എഴുതിയിരിക്കുന്നത് അരുണ്‍രാജ കാമരാജ് ആണ്. മമിതയുടെ ഡാന്‍സ് ആണ് ഗാനരംഗത്തെ പ്രധാന ഹൈലൈറ്റ്. ലക്കി ഭാസ്‌കര്‍ അടക്കമുള്ള ചിത്രങ്ങളിലൂടെ പ്രേക്ഷകശ്രദ്ധ നേടിയ വെങ്കി അറ്റ്ലൂരിക്കൊപ്പം സൂര്യ ഒരുമിക്കുന്ന ചിത്രം എന്നതായിരുന്നു വിശ്വനാഥ് ആന്‍ഡ് സണ്‍സ് എന്ന ചിത്രത്തിന്റെ പ്രധാന യുഎസ്പി. ഈ മാസം 14 ന് ആയിരുന്നു ചിത്രത്തിന്റെ റിലീസ്. ആഗോള ബോക്സ് ഓഫീസില്‍ നിന്ന് ചിത്രം നേടിയത് 188 കോടിയാണ്. ഇന്ത്യയില്‍ നിന്ന് നേടിയ ഗ്രോസ് 126 കോടിയും വിദേശത്തുനിന്ന് 61 കോടിയും. രവീണ ടണ്ഠന്‍, നാസര്‍, അനാര്‍ക്കലി മരക്കാര്‍, രാജീവ് മേനോന്‍, കാളി വെങ്കട്ട്, ഭവാനി ശ്രീ, സുനില്‍ റെഡ്ഡി എന്നിവരും ചിത്രത്തില്‍ വേഷമിട്ടിരിക്കുന്നു.

🔹ഗുഡ്വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജയസൂര്യയെ നായകനാക്കി രതീഷ് വേഗ രചനയും സംവിധാനവും നിര്‍വഹിക്കുന്ന പാന്‍- ഇന്ത്യന്‍ ഇന്‍വെസ്റ്റിഗേറ്റീവ് ആക്ഷന്‍ ത്രില്ലര്‍ ‘ഓപ്പറേഷന്‍ ത്രാളി’ന്റെ ടീസര്‍ പുറത്തിറങ്ങി. ജമ്മു കശ്മീരിലെ ത്രാളില്‍ ഇന്ത്യന്‍ സൈന്യവും തീവ്രവാദികളും തമ്മില്‍ നടന്ന ശ്രദ്ധേയമായ ഏറ്റുമുട്ടലിനെ ആസ്പദമാക്കി ഒരുങ്ങുന്ന ചിത്രമാണ് ‘ഓപ്പറേഷന്‍ ത്രാള്‍’. എന്‍.ഐ.എ. ഓഫീസറായാണ് ജയസൂര്യ ചിത്രത്തിലെത്തുന്നത്. ചിത്രത്തില്‍ മുരളി ശര്‍മ, വിനയ് റായ്, സിദ്ദിഖ്, സായ് കുമാര്‍, നന്ദലാല്‍ കൃഷ്ണമൂര്‍ത്തി, റിതിക സിങ്, കാവ്യ ഷെട്ടി, ആന്‍സണ്‍ പോള്‍, സിറാജുദ്ദീന്‍ തുടങ്ങിയവരും പ്രധാന വേഷങ്ങളിലെത്തുന്നു. ബോളിവുഡ് താരങ്ങളായ വിക്രം കൊച്ചാര്‍, യശ്പാല്‍ ഗേര, മിര്‍ സര്‍വര്‍, ചന്ദന്‍ ബിഷ്ത്, ഹന്‍സിക ജംഗിദ്, വാണി ദോഗ്ര, ജയ് ഠാക്കൂര്‍, വിജയ് ത്രിവേദി, മന്‍ഹര്‍ സിങ് ട്രിവിയ എന്നിവരും ചിത്രത്തിലുണ്ട്.

🔹കൗതുകമുണര്‍ത്തുന്ന മലയാളം ടൈം ട്രാവല്‍ ത്രില്ലര്‍ ‘ഒറിജിനല്‍’ലെ ആദ്യ ഗാനം പുറത്തിറങ്ങി. ‘മാളേ മല്ലിക്കൊത്തേ’ എന്ന പേരില്‍ പുറത്തിറങ്ങിയ ഗാനം സംഗീത സംവിധായകന്‍ ഇലക്ട്രോണിക് കിളിയുടെ വേറിട്ട സംഗീത ശൈലിയും അട്ടപ്പാടിയില്‍ നിന്നുള്ള ഗായിക കവിത കാളിയപ്പന്റെ തനതായ നാടന്‍ ശബ്ദവും ഒരുമിക്കുന്നതാണ്. മുത്തുവാണ് വരികള്‍ എഴുതിയിരിക്കുന്നത്. റമീസ് എഴുതി സംവിധാനം ചെയ്യുന്ന ചിത്രത്തില്‍ ശ്രീനാഥ് ഭാസിയാണ് നായകന്‍. അഭിരാം രാധാകൃഷ്ണന്‍, രാജേഷ് മാധവന്‍, സാഫ് ബോയ്, ബിനു പപ്പു, ഫെമിന ജോര്‍ജ്, ശ്രീകാന്ത് വെട്ടിയാര്‍, ഗോകുലന്‍, അനീഷ് ജി, സലീം ഹസന്‍, ദിനേശ് പ്രഭാകര്‍, രാജേഷ് പറവൂര്‍, ഷമീര്‍ (ചൂരല്‍), സുബിന്‍ ടാര്‍സന്‍, അരുണ്‍ പ്രദീപ്, ലാല മലപ്പുറം, സ്റ്റിനി ഫ്രാന്‍സിസ്, ഹാരിസ് സലീം, വിരു വിവേക് എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.

💦 ഗുരുജിയുടെ വാക്കുകൾ
*****************************

ചിലപ്പോഴൊക്കെ നമുക്ക് വേണ്ടത് വലിയ വാക്കുകളോ പരിഹാരങ്ങളോ അല്ല..
ഒരാളുടെ സ്നേഹത്തോടെയുള്ള ഒരു ആലിംഗനം മാത്രം മതി.
മനസ്സിലെ ഭാരങ്ങൾ അലിഞ്ഞുപോകാനും, ഒറ്റപ്പെടലിന്റെ വേദന കുറയാനും, “ഞാൻ നിന്നോടൊപ്പമുണ്ട്” എന്നൊരു നിശ്ശബ്ദ ഉറപ്പ് നൽകാനും ഒരു ചേർത്തുപിടിത്തത്തിന് കഴിയും.
ഒരുപക്ഷേ, ഇന്ന് നിങ്ങളുടെ ഒരു ചേർത്തുപിടിക്കൽ ആരുടെയെങ്കിലും മനസ്സിന് ആവശ്യമായ ഏറ്റവും വലിയ ആശ്വാസമായിരിക്കാം.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 29

•മേജർ ധ്യാൻചന്ദ് ജന്മദിനം (ഹോക്കി മന്ത്രവാദി)1905 ഓഗസ്റ്റ് 29-നാണ് ധ്യാൻചന്ദ് ജനിച്ചത്.ഇന്ത്യയ്ക്ക് മൂന്ന് ഒളിമ്പിക്സ് സ്വർണ്ണ മെഡലുകൾ (1928, 1932, 1936) നേടിക്കൊടുക്കുന്നതിൽ അദ്ദേഹം പ്രധാന പങ്കുവഹിച്ചു.അദ്ദേഹത്തോടുള്ള ആദരസൂചകമായി 2012 മുതലാണ് കേന്ദ്ര സർക്കാർ ഓഗസ്റ്റ് 29 ദേശീയ കായിക ദിനമായി പ്രഖ്യാപിച്ചത്.ഭാരതത്തിലെ ഏറ്റവും വലിയ കായിക ബഹുമതി മേജർ ധ്യാൻചന്ദ് ഖേൽരത്ന അവാർഡ് എന്ന പേരിലാണ് അറിയപ്പെടുന്നത്.

•കായിക ദിനത്തിന്റെ ലക്ഷ്യം:യുവാക്കൾക്കിടയിൽ കായിക മേഖലയോടുള്ള താല്പര്യം വളർത്തുക.ദൈനംദിന ജീവിതത്തിൽ കായികക്ഷമതയുടെയും ആരോഗ്യത്തിന്റെയും പ്രാധാന്യം ജനങ്ങളെ ബോധ്യപ്പെടുത്തുക.കായിക ദിനത്തോട് അനുബന്ധിച്ച് രാജ്യത്തുടനീളം വിദ്യാലയങ്ങളിലും ഓഫീസുകളിലും വിവിധ കായിക മത്സരങ്ങളും ഫിറ്റ്‌നസ് ക്യാമ്പെയ്നുകളും സംഘടിപ്പിക്കാറുണ്ട്.

•അന്താരാഷ്ട്ര ആണവപരീക്ഷണ വിരുദ്ധ ദിനം (International Day against Nuclear Tests): ഐക്യരാഷ്ട്രസഭയുടെ നേതൃത്വത്തിൽ ലോകമെമ്പാടും ആണവായുധ പരീക്ഷണങ്ങൾക്കെതിരെ അവബോധം സൃഷ്ടിക്കാൻ ഈ ദിവസം ആചരിക്കുന്നു.

തയ്യാറാക്കിയത്: കപിൽ ശങ്കർ

9 Likes

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 29 | ശനി ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 29

തയ്യാറാക്കിയത്: കപിൽ ശങ്കർ

വെനസ്വേലൻ എണ്ണശേഖരത്തിന്റെ ഭൂരിഭാഗം നിയന്ത്രണവും യു.എസ് ഏറ്റെടുക്കുന്നു; പ്രഖ്യാപനവുമായി ഡൊണാൾഡ് ട്രംപ്

അമ്മയെ വെടിവെച്ചു കൊന്ന ജോർജിയയിൽ നിന്നുള്ള കൗമാരക്കാരിക്ക് ജീവപര്യന്തം തടവ് ശിക്ഷ

സെന്റ് ലൂയിസിൽ ചരിത്രം കുറിച്ച് പ്രഗ്ഗാനന്ദ; ഗ്രാൻഡ് ചെസ് ടൂർ കിരീടം നേടുന്ന ആദ്യ ഇന്ത്യൻ താരം

LEAVE A REPLY Cancel reply

Most Popular

സ്ത്രീധന കേസുകൾ വേഗത്തിൽ തീർപ്പാക്കണം; കീഴ്‌ക്കോടതികൾക്ക് സുപ്രീം കോടതിയുടെ നിർദേശം.

പുറത്തുവന്ന ചിത്രം ദാമോദര മേനോന്റേത് തന്നെ; കേരള പൊലീസ്.

യുപി തെരഞ്ഞെടുപ്പ് ചൂടിലേയ്ക്ക്: കോണ്‍ഗ്രസ്-SP സഖ്യനീക്കം, OBC വോട്ടുറപ്പിക്കാന്‍ ബിജെപി, അയോധ്യയും വിഷയമാവും.

Recent Comments

EDITOR PICKS

സ്ത്രീധന കേസുകൾ വേഗത്തിൽ തീർപ്പാക്കണം; കീഴ്‌ക്കോടതികൾക്ക് സുപ്രീം കോടതിയുടെ നിർദേശം.

പുറത്തുവന്ന ചിത്രം ദാമോദര മേനോന്റേത് തന്നെ; കേരള പൊലീസ്.

യുപി തെരഞ്ഞെടുപ്പ് ചൂടിലേയ്ക്ക്: കോണ്‍ഗ്രസ്-SP സഖ്യനീക്കം, OBC വോട്ടുറപ്പിക്കാന്‍ ബിജെപി, അയോധ്യയും വിഷയമാവും.

POPULAR POSTS

സ്ത്രീധന കേസുകൾ വേഗത്തിൽ തീർപ്പാക്കണം; കീഴ്‌ക്കോടതികൾക്ക് സുപ്രീം കോടതിയുടെ നിർദേശം.

യുപി തെരഞ്ഞെടുപ്പ് ചൂടിലേയ്ക്ക്: കോണ്‍ഗ്രസ്-SP സഖ്യനീക്കം, OBC വോട്ടുറപ്പിക്കാന്‍ ബിജെപി, അയോധ്യയും വിഷയമാവും.

പാകിസ്താന് വേണ്ടി ചാരപ്രവർത്തനം; ഡല്‍ഹി സ്വദേശികളായ ദമ്പതികളെ പൊലീസ് അറസ്റ്റ് ചെയ്തു.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 29 | ശനി ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ഓഗസ്റ്റ് 29

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************