🔹ശബരിമലയിൽനിന്നു കടത്തിക്കൊണ്ടുപോയ കട്ടിളപ്പാളികളുടെ കാലപ്പഴക്കം കണ്ടെത്താൻ മൂന്നാമതും ശാസ്ത്രീയ പരിശോധന നടത്താൻ പ്രത്യേക അന്വേഷണസംഘം. വിഎസ്എസ്‌സി രണ്ടു ഘട്ടങ്ങളിലായി സാമ്പിൾ ശേഖരിച്ച് ശാസ്ത്രീയ പരിശോധന നടത്തിയെങ്കിലും കട്ടിളപ്പാളി പൊതിയുന്ന ചെമ്പുപാളികളുടെ കാലപ്പഴക്കം നിർണയിക്കുന്നതിൽ കൃത്യമായ പരിശോധനാഫലം ലഭിക്കാത്ത സാഹചര്യത്തിലാണ് വീണ്ടും ശാസ്ത്രീയ പരിശോധന നടത്താൻ തീരുമാനിച്ചത്.ദ്വാരപാലക ശില്പത്തിലും കട്ടിളപ്പാളിയിലും പൊതിഞ്ഞ സ്വർണത്തിന്‍റെ അളവിൽ വൻതോതിൽ തട്ടിപ്പു നടത്തിയതായി വിഎസ്എസ്‌സിയുടെ രണ്ടാം പരിശോധനാ ഫലത്തിൽ വ്യക്തമായിട്ടുണ്ടെന്നാണു വിവരം. ഉണ്ണിക്കൃഷ്ണൻ പോറ്റിയും സ്വർണം വേർതിരിച്ച സ്മാർട്ട് ക്രിയേഷൻസിലെ ഗോവർധനനും പറഞ്ഞതിൽനിന്നു വ്യത്യസ്തമായി ഇരട്ടിയോളം സ്വർണം തട്ടിയെടുത്തിട്ടുണ്ടെന്നാണ് റിപ്പോർട്ട് സൂചിപ്പിക്കുന്നത്. 980 ഗ്രാം സ്വർണമാണ് വേർതിരിച്ചതെന്നായിരുന്നു ഇവരുടെ മൊഴി.
🔹തലസ്ഥാനത്ത് ലൈസൻസില്ലാതെ പ്രവർത്തിച്ച സ്പായ്ക്ക് പൂട്ടുവീണു. തിരുവനന്തപുരം സ്റ്റാച്യുവിലെ ‘സ്പർശൻ വെൽനെസ്’ സ്പായ്ക്കാണ് പൂട്ടുവീണത്. 23 കാരിയുടെ പരാതിയിൽ നഗരസഭാ അധികൃതർ മിന്നൽ പരിശോധന നടത്തുകയായിരുന്നു.
വലിയ നിയമലംഘനമാണ് ഈ സ്പായുമായി ബന്ധപ്പെട്ട് നടന്നിട്ടുള്ളത്. ലൈസൻസില്ലാതെ പ്രവർത്തിച്ച സ്പായുടെ ഒരു വിഭാഗം അധികൃതർ പൂട്ടി. പരിശോധനയിൽ സ്പായിലെ പ്രീമിയം വിഭാഗം കെട്ടിടം പ്രവർത്തിക്കുന്നത് ലൈസൻസ് ഇല്ലാതെയെന്ന് കണ്ടെത്തി. അന്വേഷണത്തിന്‍റെ ഭാഗമായി ഈ വിഭാഗമാണ് പൂട്ടിയത്.തിരുവനന്തപുരം മേയർ വി.വി. രാജേഷിന്‍റെ വാർത്താസമ്മേളനത്തിന് പിന്നാലെയാണ് സെക്രട്ടറിയേറ്റിന് നേരെ എതിർവശത്ത് പ്രവർത്തിക്കുന്ന ‘സ്പർശൻ വെൽനെസ്’ സ്പായിൽ നഗരസഭ ആരോഗ്യവിഭാഗം ഉദ്യോഗസ്ഥർ പരിശോധന നടത്തിയത്. പിന്നാലെ പോലീസും സ്ഥലത്തെത്തി.
🔹കൊല്ലം പുത്തൂരിൽ പെൺകുട്ടിക്ക് നേരെ ജ്യോത്സ്യൻ ലൈംഗികാതിക്രമം നടത്താൻ ശ്രമിച്ചെന്ന് പരാതി. മുരാരി തന്ത്രി എന്ന വെണ്ടാർ സ്വദേശി രാജൻ ബാബുവിനെതിരെയാണ് കേസെടുത്തത്. ബാധയൊഴിപ്പിക്കലിനായി അമ്മയ്ക്കൊപ്പം എത്തിയതായിരുന്നു പെൺകുട്ടി. അമ്മയെ പുറത്തിരുത്തി പെൺകുട്ടിയെ മുറിയിലേക്കു കൂട്ടിക്കൊണ്ടുപോയി ഉപദ്രവിക്കാൻ ശ്രമിച്ചെന്നാണ് പരാതി. ജ്യോത്സ്യൻ ഒളിവിലാണെന്നും അന്വേഷണം തുടരുന്നതായും പുത്തൂർ പോലീസ് വ്യക്തമാക്കി.
🔹 ദേവസ്വത്തിന്‍റെ മുന്നൊരുക്കങ്ങൾ വിജയകരമായതോടെ വിവാഹ പാർട്ടിക്കാർക്ക് ബുദ്ധിമുട്ട് അനുഭവപ്പെടാതെ ക്ഷേത്ര സന്നിധിയിൽ ഇന്നലെ നടന്നത് 266 വിവാഹങ്ങൾ. മകരമാസത്തിലെ അവസാനത്തെ ഞായറാഴ്ചയായതിനാലാണ് വലിയ വിവാഹത്തിരക്ക് അനുഭവപ്പെട്ടത്ത്.തിരക്ക് ഉണ്ടാകുമെന്നു മുൻകൂട്ടി മനസിലാക്കിയതോടെ ദേവസ്വം വിപുലമായ ക്രമീകരണം നടത്തി. നാലു വിവാഹ മണ്ഡപങ്ങൾക്കൊപ്പം ഒരു മണ്ഡപംകൂടി അധികമായി ഒരുക്കി. പുലർച്ചെ 4.30ന് വിവാഹങ്ങൾ തുടങ്ങി. ഒരേസമയത്ത് അഞ്ചുവിവാഹങ്ങൾ വീതം നടന്നു. വിവാഹത്തിൽ പങ്കെടുക്കാൻ ഫോട്ടോഗ്രാഫർമാർ ഉൾപ്പെടെ 24 പേരെ മാത്രമാണ് മണ്ഡപത്തിനു സമീപത്തേക്ക് കടത്തിവിട്ടത്.മേൽപുത്തൂർ ഓഡിറ്റോറിയത്തിന് തെക്കു ഭാഗത്തെ പന്തലിൽ വധൂവരന്മാരെയും ബന്ധുക്കളെയും പ്രവേശിപ്പിച്ചു. ഓരോ വിവാഹ പാർട്ടിക്കാർക്കും ടോക്കൺ നൽകി സമയക്രമം പാലിച്ചു. 12ഓടെ ഭൂരിപക്ഷം വിവാഹങ്ങളും കഴിഞ്ഞു. വിവാഹം കഴിഞ്ഞവരെ തെക്കേനട വഴി കടത്തിവിട്ടു. പോലീസുകാരെ അധികമായി നിയോഗിച്ചിരുന്നു. ഔട്ടർ-ഇന്നർ റിംഗ് റോഡുകളിൽ വൺവേ സംവിധാനം ഏർപ്പെടുത്തി. ദേവസ്വം അധികൃതർ സെക്യൂരിറ്റി പോലീസ് എന്നിവരുടെ നേതൃത്വത്തിൽ പ്രവർത്തനങ്ങൾ ഏകോപിപ്പിച്ചു.
🔹ആലപ്പുഴ മാവേലിക്കരയിൽ ബസുകൾ ഓവർടേക്ക് ചെയ്യുന്നതിനെ ചൊല്ലിയുളള തർക്കം ആക്രമണത്തിൽ കലാശിച്ചു. സംഭവത്തിൽ കെഎസ്ആർടിസി ബസ് ഡ്രൈവറെ മർദിച്ച സ്വകാര്യ ബസ് ജീവനക്കാർ അറസ്റ്റിൽ.തിരുവല്ല സ്വദേശി മിഥുൻമോൻ, മാവേലിക്കര സ്വദേശി ദേവപ്രസാദ് എന്നിവരെയാണ് മാന്നാർ പോലീസ് പിടികൂടിയത്. മാവേലിക്കര കെഎസ്ആർടിസി ഡിപ്പോയിലെ ഡ്രൈവറെയാണ് സെന്റ് ജോർജ് ബസിലെ ഡ്രൈവർ മിഥുൻമോനും കണ്ടക്ടർ ദേവപ്രസാദും ചേർന്ന് മർദിച്ചത്.
🔹 തിരുവല്ലയിലെ സ്പായിൽ യുവതി കൂട്ടബലാത്സംഗത്തിനിരയായ കേസിൽ ഒരു പ്രതിയെ കൂടി പോലീസ് പിടികൂടി. നിരണം സ്വദേശി വരുൺ ആണ് അന്വേഷണ സംഘത്തിന്‍റെ പിടിയിലായത്. ആലുവയിൽനിന്ന് ഞായറാഴ്ച അർധരാത്രിയോടെയാണ് പ്രതിയെ പിടികൂടിയത്. ഇതോടെ കേസിൽ അറസ്റ്റിലായവരുടെ എണ്ണം മൂന്നായി. വരുണിന്‍റെ മൊബൈൽ ലൊക്കേഷൻ കൊച്ചിയിലാണെന്ന് മനസിലാക്കി പോലീസ് നടത്തിയ ഓപ്പറേഷനിലാണ് പ്രതി പിടിയിലായത്. നേരത്തെ സുബിൻ, ബെർലിൻ ദാസ് എന്നിവരെ പോലീസ് അറസ്റ്റ് ചെയ്തിരുന്നു.
🔹 കാണാതായ ഗൃഹനാഥനെ കുളത്തിൽ മരിച്ച നിലയിൽ കണ്ടെത്തി. പാലക്കാട് തിരുവിഴാംകുന്ന് മുണ്ടക്കുന്ന് ചക്കംതൊടി അബ്ദു സലാം ( 49) ആണ് മരിച്ചത്. ഞായറാഴ്ച വൈകുന്നേരം മുതൽ അബ്ദു സലാമിനെ കാണാനില്ലായിരുന്നു.ഇതേ തുടർന്ന് നടത്തിയ അന്വേഷണത്തിലാണ് രാത്രിയോടെ വീടിന് സമീപത്തെ ഉപയോഗ ശൂന്യമായ കുളത്തിൽ അബ്ദു സലാമിനെ മരിച്ച നിലയിൽ കണ്ടെത്തിയത്. സംഭവത്തിൽ നാട്ടുകൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
🔹നെടുമങ്ങാട് ഒന്നേകാൽ കിലോഗ്രാം കഞ്ചാവുമായി ഇതരസംസ്ഥാനക്കാ
രായ കമിതാക്കൾ പിടിയിൽ. കരകുളം ഏണിക്കര ഭാഗങ്ങളിൽ കഞ്ചാവും മറ്റു ലഹരി മരുന്നുകളും എത്തിക്കുന്ന സംഘത്തിലെ പ്രധാന കണ്ണികളായ ആസാം സ്വദേശിയായ മിനാറാബീഗം എന്ന യുവതിയും സുഹൃത്ത് മുജീബുമാണ് എക്സൈസി ന്‍റെ പിടിയിലായത്. നെടുമങ്ങാട് എക്സൈസ് ഇൻസ്പെക്ടർ സി.വി. പ്രവീണിന്‍റെ നേതൃത്വത്തിൽ സ്ട്രെക്കിങ് ഫോഴ്സുമായി ബന്ധപ്പെട്ടു എട്ടാംകല്ല് കെൽട്രോൺ ജംഗ്ഷനു സമീപം നടത്തിയ പരിശോധനയിൽ 1.151 കിലോഗ്രാം കഞ്ചാവുമായി വന്ന മിനാറാബീഗത്തിൽ നിന്നും കഞ്ചാവ് ചില്ലറ വില്പന നടത്തുന്നതിനുപയോഗിക്കുന്ന ഡിജിറ്റൽ ത്രാസും കണ്ടെത്തി. കൂടെയുണ്ടായിരുന്ന സുഹൃത്തായ മുജീബെന്നു വിളിക്കുന്ന മുജീബുൽ റഹ്മാൻ എക്സൈസിനെക്കണ്ട് ഓടി രക്ഷപ്പെട്ടു.തുടർന്ന് കരകുളം വിദ്യാധിരാജപുരം ഭാഗത്തു ഒളിവിൽ കഴിയുകയായിരുന്ന ഇയാളെ എക് സൈസ് സംഘം കീഴടക്കി.
🔹പൂവാർസ്റ്റേഷൻ പരിധിയിൽ നടന്ന മോഷണത്തിന്‍റെ നിജസ്ഥിതി തേടി കാഞ്ഞിരംകുളം പോലീസ്. മോഷണം പോയെന്നു പറയുന്ന 54 പവനിൽ മുപ്പതോളം പവൻ വീടിന്‍റെ പരിസരങ്ങളിൽനിന്നു രണ്ടുപ്രാവശ്യമായി വീട്ടുകാർ തന്നെ കണ്ടെത്തിയിരുന്നു.
സമീപത്തെ ആളൊഴിഞ്ഞ പുരയിടത്തിൽനിന്നു തേങ്ങ വീണത് എടുക്കാൻ പോയ സമയത്തു പൊതിഞ്ഞ നിലയിൽ ക ണ്ടെത്തിയത് കാണാതായ സ്വർണ്ണമെന്നു പോലീസിനെ വിളിച്ച് വരുത്തി അവരുടെ സാന്നിധ്യത്തിൽതന്നെ വീട്ടുകാർ ഉറപ്പുവരുത്തിയിരുന്നു. ഇനി കിട്ടാനുള്ളതായി പറയുന്ന സ്വർണവും സമീപത്ത് ഉണ്ടാകുമെന്നു വിശ്വസിക്കുന്ന പോലീസ് സംഭവത്തിലെ ദുരൂഹത പുറത്തുകൊണ്ടു വരാനുള്ള ശ്രമവും ആരംഭിച്ചു.
🔹സ്കൂട്ടറിൽ വച്ചിരുന്ന മൊബൈൽ ഫോൺ മോഷ്ടിച്ച ആളെ തിരിച്ചറിഞ്ഞിട്ടും പോലീസ് പിടികൂടുന്നില്ലന്നു പരാതി. തിരുപുറം മഹാദേവർ ക്ഷേത്രത്തിനു മുന്നിൽ സൂക്ഷിച്ചിരുന്ന സ്കൂട്ടറിൽ നിന്നുമാണ് മൊബൈൽ ഫോൺ മോഷണം പോയത്. അരുമാനൂർ എംവി ഹയർ സെക്കൻഡറി സ്കൂളിലെ അധ്യാപിക ശ്രീലേഖയാണ് പരാതിക്കാരി. ക്ഷേത്രദർശനത്തിനായി എത്തിയതായിരുന്നു അധ്യാപിക. സമീപത്തെ സിസിടിവി ദൃശ്യങ്ങൾ പരിശോധിച്ചതിൽനിന്നും മോഷ്ടിച്ചയാൾ ശ്രീകാര്യം സ്വദേശിയാണെന്നു മനസി ലായി.ഇയാൾ കുറച്ചുനാൾ കോട്ടുകാൽ പുത്തളം എന്ന സ്ഥലത്ത് വാടകയ്ക്ക് താമസിച്ചിരുന്നതായും പോലീസിനു സൂചന ലഭിച്ചിട്ടുണ്ട്. കഴിഞ്ഞ തിങ്കളാഴ്ച രാവിലെയാണ് സംഭവം.സിസിടിവിയിൽ പതിഞ്ഞയാൾ പാറശാലയിൽ മാലമോഷ്ടിച്ച കേസിലെ ആളെന്നു പോലീസ് സംശയിക്കുന്നു.
🔹കാലോചിതമായ പരിഷ്ക്കാരങ്ങളിലൂടെ കെ എസ് ആർ ടി സിയെ സർക്കാർ ലാഭത്തിലാക്കിയതായി മന്ത്രി കെ. എൻ. ബാലഗോപാൽ. ഇടിസി അങ്കണവാടി ജംഗ്ഷൻ മുതൽ കൊട്ടാരക്കര വരെയും തിരിച്ചും യാത്ര നടത്തുന്ന സർക്കുലർ മിനി ബസ് സർവീസ് ഉദ്ഘാടനം ചെയ്യുകയായിരുന്നു മന്ത്രി.അടിസ്ഥാന സൗകര്യ മേഖലയിലെ വിപുലീകരണം പൊതുഗതാഗത സംവിധാനങ്ങളെയും മെച്ചപ്പെടുത്തും. കെ എസ് ആർ ടി സിയുടെ വരുമാന വർധനവിനും യാത്രക്കാരുടെ സൗകര്യങ്ങൾ മെച്ചപ്പെടുത്താനും സർക്കാർ നടപ്പാക്കിയ പദ്ധതികൾ വിജയിച്ചു. ഇ ടി സി ജംഗ്ഷനും പരിസര പ്രദേശങ്ങളും കേന്ദ്രീകരിച്ചുള്ള പുതിയ സ്ഥാപനങ്ങളിലേക്ക് എത്താൻ സാധിക്കും വിധമാണ് പുതിയ ബസ് സർവീസ് നടപ്പാക്കിയതെന്നും മന്ത്രി പറഞ്ഞു.
🔹കഴിഞ്ഞ ഒമ്പതു മാസമായി കോട്ടയം റീജണല്‍ ട്രാന്‍സ്‌പോര്‍ട്ട് ഓഫീസില്‍ ആര്‍ടിഒ ഇല്ല. ഇതോടെ ഓഫീസിനു കീഴില്‍ വിവിധ ആവശ്യങ്ങള്‍ക്കായി എത്തുന്ന വാഹന ഉടമകള്‍ ബുദ്ധിമുട്ടിലാണ്. കഴിഞ്ഞ വര്‍ഷം മേയ് 31നാണ് ആര്‍ടിഒ അജിത് കുമാര്‍ കൊല്ലത്തേക്ക് സ്ഥലം മാറിപ്പോയത് തുടര്‍ന്നിങ്ങോട്ട് ഒമ്പതു മാസമായി ഓഫീസ് നാഥനില്ലാ കളരിയാണ്. പത്തനംതിട്ട ആര്‍ടിഒയ്ക്ക് ചുമതലയുണ്ടെങ്കിലും ഇദ്ദേഹം ഇടയ്ക്ക് ഓഫീസിലെത്തി അത്യാവശ്യ കാര്യങ്ങള്‍ നിര്‍വഹിച്ചു പോരുക മാത്രമാണ്. കഴിഞ്ഞ മൂന്നുമാസമായി ഇദ്ദേഹത്തിനു ശബരിമല സ്‌പെഷല്‍ ഡ്യൂട്ടിയുമായിരുന്നു.ആര്‍ടിഒ ഇല്ലാത്തതിനാല്‍ വാഹന ഉടമകള്‍ക്ക് രജിസട്രേഷന്‍, ഫിറ്റ്നസ് ഉള്‍പ്പെടെ പല കാര്യങ്ങളും നടക്കുന്നില്ല. ജോയിന്‍റ് ആര്‍ടിഒയക്ക് സാങ്കേതിക യോഗ്യത ഇല്ലാത്തതിനാല്‍ പഴയ വാഹനങ്ങള്‍ക്ക് ഫിറ്റ്നസ് സര്‍ട്ടിഫിക്കറ്റ് കിട്ടുന്നതിനു പോലും പ്രയാസമാണ്. ഒരു വര്‍ഷമായി ആര്‍ടിഎ ബോര്‍ഡ് ചേരാത്തതു മൂലം ബസുടമകള്‍ക്ക് പല വിധ പ്രശ്‌നങ്ങള്‍ ഉണ്ടാകുന്നുണ്ട്.
🔹സ്പീഡ് ബോട്ടുകളുടെ മരണപാച്ചിൽ യാത്രക്കാരും വിനോദസഞ്ചാരികളുമായി പോകുന്ന മറ്റ് ബോട്ടുകൾക്ക് അപകടഭീഷണി ഉയർത്തുന്നതായി പരാതി. ഇന്നലെ വൈകുന്നേരം 5.30ന് കോക്കനട്ട് ലഗൂൺ റിസോർട്ടിന്‍റെ മുൻ വശത്ത് കവണാറ്റിൻകരയിൽനിന്നു വിനോദസഞ്ചാരികളുമായിപോയ ശിക്കാര ബോട്ട് തണ്ണീർമുക്കത്തുനിന്നെത്തിയ സ്പീഡ് ബോട്ടിന്‍റെ ഓളത്തിൽപ്പെട്ട് ആടിയുലഞ്ഞത് വിനോദസഞ്ചാരികളെ ഭയപ്പാടിലാക്കിയെന്നും ബോട്ട് മുങ്ങാതെ രക്ഷപ്പെട്ടത് ഭാഗ്യം കൊണ്ട് മാത്രമാണെന്നും ശിക്കാര ബോട്ട് ഡ്രൈവർ പറഞ്ഞു. ഇതു സംബന്ധിച്ച് പോലീസിൽ പരാതി നൽകുമെന്ന് കവണാറ്റിൻകര യൂണിറ്റ് സെക്രട്ടറി മോട്ടി അറിയിച്ചു.തണ്ണീർമുക്കം ഭാഗത്തുനിന്ന് എത്തുന്ന ചില സ്പീഡ് ബോട്ടുകാർ ചീപ്പുങ്കൽ മുതൽ പക്ഷി സങ്കേതം വരെയുള്ള ബോട്ട് ചാലിൽ ചെറു ബോട്ടുകൾക്കിടയിലൂടെ അഭ്യാസപ്രകടനങ്ങൾ നടത്തുന്നത് പതിവാണെന്ന് ബോട്ട് ഉടമകൾ പറയുന്നു.
🔹കൊട്ടാരക്കരയിൽ യുവാവ് വൈദ്യുതാഘാതമേറ്റ് മരിച്ചു. പത്തനംതിട്ട ആനയടി സ്വദേശി സുജിത്(37) ആണ് മരിച്ചത്. കൊട്ടാരക്കര പുത്തൂരിലാണ് സംഭവം. ഇലക്ട്രിക് പോസ്റ്റിൽ നിന്നാണ് സുജിത്തിന് ഷോക്കേറ്റത്. ചെറുമങ്ങാട് ദേവീ ക്ഷേത്രത്തിലെ ഉത്സവത്തിനായി ഇലക്ട്രിക് പോസ്റ്റിൽ കയറി ട്യൂബ് കെട്ടുന്നതിനിടെ ആയിരുന്നു അപകടം. സ്ട്രീറ്റ് ലൈറ്റിന്‍റെ വയറിൽ തട്ടി വൈദ്യുതാഘാതം ഏൽക്കുകയായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
🔹ഷൊർണൂരിൽ അനാശാസ്യ കേന്ദ്രം നടത്തിയെന്ന കേസിൽ ലോഡ്ജ് ഉടമ അറസ്റ്റിൽ. കുളപ്പുള്ളി മെഗാ ലോഡ്ജ് ഉടമ വല്ലപ്പുഴ കുറുവട്ടൂർ നെടിയോടത്ത് വീട്ടിൽ ബഷീർ(57) ആണ് പിടിയിലായത്. ഷൊർണൂർ പോലീസ് ആണ് പ്രതിയെ കസ്റ്റഡിയിലെടുത്തത്.
പോലീസ് ലോഡ്ജിൽ നടത്തിയ പരിശോധനയ്ക്ക് പിന്നാലെ ഇവിടേക്ക് ഇടപാടുകാരെ എത്തിച്ച എട്ട് പേരെയും കസ്റ്റഡിയിലെടുത്തു. ഇടപാടുകാരെ എത്തിച്ച കുളപ്പുള്ളി, പട്ടാമ്പി, വെസ്റ്റ് ബംഗാൾ, ആസാം, ബംഗുളൂരൂ, ചെന്നൈ, ആലുവ, കല്ലടിക്കോട് എന്നിവിടങ്ങളിൽ നിന്നുള്ള എട്ട് പേരാണ് പിടിയിലായത്.
🔹വീടുകളില്‍ ഒതുങ്ങിപ്പോയ ജീവിതങ്ങള്‍ക്ക് കൈതാങ്ങാകുവാന്‍ സമൂഹത്തിന്‍റെ വിവിധ മേഖലകളിലുള്ളവര്‍ ജാതി, മത, വര്‍ഗ വ്യത്യാസങ്ങളെല്ലാം മറന്ന് ഹോപ്പത്തോണ്‍ മൊബിലിറ്റി വാക്കിനായി കോഴിക്കോട് കടപ്പുറത്ത് സംഗമിച്ചത് വേറിട്ട കാഴ്ചയായി.ഹെല്‍പ്പിംഗ് ഹാന്‍ഡ്സ് ചാരിറ്റബിള്‍ ട്രസ്റ്റിന്റെ നേതൃത്വത്തില്‍ തിരുവമ്പാടിയിലെ പുന്നക്കലില്‍ തുടങ്ങുന്ന സൗജന്യ റിഹാബിലിറ്റേഷന്‍ സെന്‍ററായ ഇന്‍സ്റ്റിറ്റ്യൂട്ട് ഫോര്‍ റീഹാബിലിറ്റേഷന്‍ എക്സലന്‍സ് ശിലാസ്ഥാപനത്തിന്‍റെ മുന്നോടിയായാണ് ഹോപ്പത്തോണ്‍ മൊബിലിറ്റി വാക്ക് നടത്തിയത്. ‘വരൂ… അവര്‍ക്കൊപ്പം നടക്കാം’ എന്ന മുദ്രാവാക്യവുമായി നടന്ന വാക്കത്തോണില്‍ വീല്‍ ചെയറിലുള്ള ഭിന്നശേഷിക്കാര്‍, സാമൂഹ്യ പ്രവര്‍ത്തകര്‍, യുവജനങ്ങള്‍, വിദ്യാര്‍ഥികള്‍ തുടങ്ങിയവര്‍ പങ്കാളികളായി.
ബീച്ചിലെ രക്തസാക്ഷി മണ്ഡപത്തില്‍ നിന്നാരംഭിച്ച വാക്കത്തോണ്‍ഫ്രീഡം സ്‌ക്വയറില്‍ സമാപിച്ചു. വിജിലന്‍സ് സ്‌പെഷല്‍ സെല്‍ എസ്പി കെ.പി അബ്ദുല്‍ റസാഖ് ഫ്ളാഗ് ഓഫ് ചെയ്തു. ഹെല്‍പ്പിംഗ് ഹാന്‍ഡ്സ് ട്രസ്റ്റ് പ്രസിഡന്റ് കെ.വി. നിയാസ്, സെക്രട്ടറി എം.കെ. നൗഫല്‍, ഐആര്‍ഇ ചെയര്‍മാന്‍ കെ.എം. അഷ്റഫ്, കണ്‍വീനര്‍ സി. മുഹമ്മദ് മിറാഷ്, മീഡിയ കമ്മിറ്റി ചെയര്‍മാന്‍ മജീദ് പുളിക്കല്‍, കണ്‍വീനര്‍ സിദ്ദീഖ് തിരുവണ്ണൂര്‍ തുടങ്ങിയവര്‍ നേതൃത്വം നല്‍കി.
🔹കൊച്ചി രാജ്യാന്തര വിമാനത്താവളത്തിൽനിന്നു ലക്ഷദ്വീപിലെ അഗത്തിയിലേക്ക് പുതിയ വിമാന സർവീസ് ഇന്നു തുടങ്ങും. ഫ്ലൈ 91 എയർലൈൻസാണ് സർവീസ് ആരംഭിക്കുന്നത്. പ്രതിദിന സർവീസാണ് കമ്പനി നടത്തുന്നത്. രാവിലെ 9.30ന് അഗത്തിയിൽനിന്നു പുറപ്പെടുന്ന വിമാനം 10.50 ന് കൊച്ചി വിമാനത്താവളത്തിൽ എത്തും. ഈ വിമാനം രാവിലെ 11.20 ന് കൊച്ചിയിൽനിന്നു പുറപ്പെട്ട് 12.45ന് അഗത്തിയിൽ എത്തിച്ചേരും. വ്യാഴാഴ്ച ഒഴികെയുള്ള എല്ലാ ദിവസങ്ങളിലും സർവീസ് ഉണ്ടായിരിക്കും. ലക്ഷദ്വീപിലേക്ക് കൊച്ചി വിമാനത്താവളത്തിൽനിന്നു മാത്രമാണ് സർവീസ് ഉള്ളത്. നിലവിൽ ഇൻഡിഗോയും അലയൻസ് എയറുമാണ് അഗത്തിയിലേക്കു സർവീസ് നടത്തുന്നത്.
🔹 അമേരിക്ക വ്യാപാര കരാറിനെതിരേ രാജ്യവ്യാപക പ്രതിഷേധത്തിന് കര്‍ഷക സംഘടനകള്‍.ഇന്ത്യയുടെ കാര്‍ഷിക മേഖല അമേരിക്കന്‍ കുത്തകകള്‍ക്കു മുന്നില്‍ കീഴടങ്ങും വിധേനയാണ് ഇടക്കാല വ്യാപാര കരാറിന്‍റെ ചട്ടക്കൂടെന്ന് കര്‍ഷക സംഘടനയായ സംയുക്ത കിസാന്‍ മോര്‍ച്ച (എസ്‌കെഎം) രാഷ്‌ട്രീയേതര വിഭാഗം ചൂണ്ടിക്കാട്ടി.കരാറില്‍ ഒപ്പിടുന്നതില്‍നിന്ന് പ്രധാനമന്ത്രി പിന്മാറണമെന്നും അല്ലെങ്കില്‍ രാജ്യവ്യാപകമായ സമരം നേരിടേണ്ടിവരുമെന്നും കര്‍ഷക സംഘടനകളായ എസ്‌കെഎമ്മും ഓള്‍ ഇന്ത്യ കിസാന്‍ സഭയും വ്യക്തമാക്കി. കരാറിനെതിരേ ഫെബ്രുവരി 12ന് രാജ്യവ്യാപകമായി നടക്കുന്ന പൊതുപണിമുടക്കില്‍ പ്രധാനമന്ത്രി നരേന്ദ്ര മോദിയുടെയും അമേരിക്കന്‍ പ്രസിഡന്റ് ഡോണള്‍ഡ് ട്രംപിന്‍റെയും കോലം കത്തിച്ച് പ്രതിഷേധിക്കുമെന്നും കര്‍ഷക നേതാക്കള്‍ പറഞ്ഞു.യൂറോപ്യന്‍ യൂണിയനും അമേരിക്കയുമായി കേന്ദ്രസര്‍ക്കാര്‍ ഏര്‍പ്പെടുന്ന കരാര്‍ സ്തംഭനാവസ്ഥയിലുള്ള അവരുടെ സമ്പദ് വ്യവസ്ഥ മെച്ചപ്പെടുത്താനാണെന്നും ഇന്ത്യക്ക് കാര്യമായ ഗുണം ലഭിക്കില്ലെന്നും കര്‍ഷക സംഘടനാ നേതാക്കള്‍ ആരോപിച്ചു. താഴ്ന്ന വരുമാനവും കടബാധ്യതയുംകൊണ്ട് ബുദ്ധിമുട്ടുന്ന കര്‍ഷകരുടെ സ്ഥിതി ഇതിനകംതന്നെ വഷളായി തുടരുകയാണ്.പുതിയ തീരുമാനം അതിന്‍റെ ആഘാതം വര്‍ധിപ്പിക്കുമെന്നും നേതാക്കള്‍ ചൂണ്ടിക്കാട്ടി.
🔹പൂന എക്സ്പ്രസ്‌വേയിൽ 33 മണിക്കൂർ ഗതാഗതക്കുരുക്കുണ്ടായ സംഭവത്തിൽ അപകടത്തിൽപ്പെട്ട ടാങ്കറിന്‍റെ ഡ്രൈവർക്കെതിരേ അപകടരമായ ഡ്രൈവിംഗിനു കേസെടുത്തു. യുപി അസംഗഡ് സ്വദേശിയായ രത്തൻ സിംഗ് ഉദയ് നാരായൺ സിംഗിന് (44) എതിരേയാണ് കേസ്. ഗുജറാത്തിൽനിന്നു കൊച്ചിയിലേക്കു വന്ന ടാങ്കർ കഴിഞ്ഞ ചൊവ്വാഴ്ച വൈകുന്നേരം അഞ്ചിന് റായ്ഗഡ് ജില്ലയിലെ അദോഷി ടണലിനു സമീപമായിരുന്നു അപകടത്തിൽപ്പെട്ടത്. അമിതവേഗത്തിലായിരുന്നു ടാങ്കർ. ഡ്രൈവർക്കും സഹായിക്കും പരിക്കേറ്റു. ചൊവ്വാഴ്ച മുതലുള്ള ഗതാഗതക്കുരുക്ക് പരിഹരിച്ച് വ്യാഴാഴ്ചയാണ് ഗതാഗതം സുഗമമാക്കിയത്. 20 കിലോമീറ്ററോളം നീളത്തിലാണ് ഗതാഗതക്കുരുക്ക് രൂപപ്പെട്ടത്. ആയിരക്കണക്കിനു യാത്രക്കാരാണ് ഭക്ഷണവും വെള്ളവുമില്ലാതെ റോഡില്‍ വലഞ്ഞത്.എട്ടു മണിക്കൂറോളം ഗതാഗതക്കുരുക്കില്‍പ്പെട്ട വ്യവസായി സുധീര്‍ മേത്ത് ഹെലികോപ്റ്ററിലാണ് പൂനയിലേക്കു പോയത് വലിയ വാര്‍ത്താപ്രാധാന്യം നേടിയിരുന്നു.
🔹കാത്തിരിപ്പുകള്‍ക്ക് അവസാനം, ഇന്ത്യന്‍ സൂപ്പര്‍ ലീഗിന്‍റെ (ഐഎസ്എല്‍) ക്യാപ്‌സ്യൂള്‍ രൂപത്തിനു പ്രണയദിനമായ ഫെബ്രുവരി 14നു പന്ത് ഉരുളും. ഉദ്ഘാടന മത്സരത്തില്‍ കൊച്ചിയുടെ സ്വന്തം ടീമായ കേരള ബ്ലാസ്റ്റേഴ്‌സ് എഫ്‌സി ഐഎസ്എല്‍ വമ്പന്മാരായ മോഹന്‍ ബഗാന്‍ എസ്ജിയുമായി ഏറ്റുമുട്ടും. 14നു വൈകുന്നേരം അഞ്ചിനാണ് കേരളം ബ്ലാസ്റ്റേഴ്‌സ് x മോഹന്‍ ബഗാന്‍ സീസണ്‍ ഉദ്ഘാടന പോരാട്ടം. തുടര്‍ന്ന് രാത്രി 7.30ന് എഫ്‌സി ഗോവയും ഇന്‍റര്‍ കാശിയും ഏറ്റുമുട്ടും. ഗോവയിലെ ഫത്തോര്‍ഡ സ്റ്റേഡിയത്തിലാണ് ഈ മത്സരം. 2025-26 സീസണ്‍ ഐഎസ്എല്‍ ഷെഡ്യൂള്‍ ഇന്നലെ ഓള്‍ ഇന്ത്യ ഫുട്‌ബോള്‍ അസോസിയേഷന്‍ (എഐഎഫ്എഫ്) പ്രഖ്യാപിച്ചു.കോഴിക്കോട് കോര്‍പറേഷന്‍ സ്റ്റേഡിയത്തിലേക്കു കേരള ബ്ലാസ്റ്റേഴ്‌സ് എഫ്‌സിയുടെ ഹോം മത്സരങ്ങള്‍ മാറ്റുമെന്ന വാര്‍ത്തകള്‍ പ്രചരിച്ചെങ്കിലും അതുണ്ടായില്ല. കൊച്ചി ജവഹര്‍ലാല്‍ നെഹ്‌റു സ്റ്റേഡിയംതന്നെ തങ്ങളുടെ ഹോം ഗ്രൗണ്ടായി കേരള ബ്ലാസ്റ്റേഴ്‌സ് രജിസ്റ്റര്‍ ചെയ്തു.കൊച്ചിയില്‍ കേരള ബ്ലാസ്റ്റേഴ്‌സിന്‍റെ ആദ്യ മത്സരം 22നാണ്. ഐഎസ്എല്‍ സീസണിലെ 12-ാം മത്സരമാണിത്. മുംബൈ സിറ്റി എഫ്‌സിയാണ് കേരള ബ്ലാസ്റ്റേഴ്‌സിന്‍റെ എതിരാളികള്‍. രാത്രി 7.30നാണ് കിക്കോഫ്.
🔹കുമരകം വീണ്ടും സിനിമക്കാരുടെ ഇഷ്ട ലൊക്കേഷനായി മാറുന്നു. നീണ്ട ഇടവേളക്ക് ഒടുവിൽ ഇലവൺ ഐക്കൺസിന്‍റെ ബാനറിൽ ഷഹദ് സംവിധാനം ചെയ്യുന്ന കോട്ടയം സ്വദേശി കൂടിയായ വിജയരാഘവൻ മുഖ്യകഥാപാത്രമായി അഭിനയിക്കുന്ന “പ്രഥമ ദൃഷ്ട്യാ കുറ്റക്കാരൻ’’ സിനിമയുടെ ചിത്രീകരണമാണ് ഇന്നലെ മുതൽ കവണാറ്റിൻകര – ചീപ്പുങ്കൽ ഭാഗത്ത് പുരോഗമിക്കുന്നത്. വിജയരാഘവനെ കൂടാതെ പാർവ്വതി തിരുവോത്ത്, വിനയ് ഫോർട്ട്, മാത്യു തോമസ് തുടങ്ങിയവർ ചിത്രത്തിലെ പ്രധാന കഥാപാത്രങ്ങളായി വേഷമിടുന്നതിനൊപ്പം ആസിഫ് അലി ഗസ്റ്റ് റോളിലും എത്തുന്നുണ്ട്.2019 ഡിസംബറിൽ റിലീസ് ചെയ്ത മഞ്ജുവാര്യർ കേന്ദ്രകഥാപാത്രമായി അഭിനയിച്ച “പ്രതി പൂവൻ കോഴി’’ സിനിമയുടെ ഷൂട്ടിംഗിന്‍റെ ഭൂരിഭാഗവും നടന്നത് കുമരകത്തായിരുന്നു. മുൻ വർഷങ്ങളിൽ മലയാളം, ഹിന്ദി, തമിഴ്, തെലുങ്ക് തുടങ്ങി വിവിധ ഭാഷകളിലുള്ള സിനിമകളുടെ ഷൂട്ടിംഗ് ലൊക്കേഷനായിരുന്നു കുമരകം.നെൽപാടങ്ങളും തോടുകളും വേമ്പനാട്ടുകായലിന്‍റെ മനോഹാരിതയും ഒക്കെയാണ് കുമരകം സിനിമക്കാരുടെ ഇഷ്ട ലൊക്കേഷനായി മാറിയതിനുള്ള കാരണം. കോട്ടയം, കുമരകം, കുത്താട്ടുകുളം തുടങ്ങിയ സ്ഥലങ്ങളിൽ ചിത്രീകരണം പുരോഗമിക്കുന്ന “പ്രഥമ ദൃഷ്ട്യാ കുറ്റക്കാരൻ’’ സിനിമ ഓണത്തിന് തിയറ്ററുകളിൽ റിലീസിന് എത്തുമെന്ന് സിനിമയുടെ അണിയറ പ്രവർത്തകർ പറഞ്ഞു.
🔹തിയറ്ററിൽ റിലീസ് ചെയ്ത ആശാൻ സിനിമ എല്ലാവരും പോയി കാണണം എന്ന അഭ്യർഥനയുമായി നടൻ ഇന്ദ്രൻസ്. ഗപ്പിക്ക് സംഭവിച്ചത് ആശാന് സംഭവിക്കരുത് എന്നാണ് ഇന്ദ്രൻസ് വീഡിയോയിൽ പറയുന്നത്. ഇത് വരെയുള്ള സഹകരണത്തിന് നന്ദി. തുടർന്നും നിങ്ങളുടെ സഹകരണം പ്രതീക്ഷിക്കുന്നു. ഓക്കേ ആണെങ്കിൽ ഒരു ലൈക്ക് ഇട്ടേക്കണേ. എന്ന് നിങ്ങളുടെ സ്വന്തം ആശാൻ എന്ന അടികുറിപ്പോടെയാണ് ഇന്ദ്രൻസ് വീഡിയോ പങ്കുവച്ചിരിക്കുന്നത്. ഇന്ദ്രൻസിനെ നായകനാക്കി ജോൺ പോൾ ജോർജ് സംവിധാനം ചെയ്ത ചിത്രമാണ് ആശാൻ. ഞാൻ ഇപ്പോൾ അടൂർ സാറിന്‍റെ ‘പദയാത്ര’ സിനിമയുടെ സെറ്റിൽ ആണ്. അതുകൊണ്ട് തിയറ്ററിൽ വന്ന് നിങ്ങളെ നേരിൽ കാണാൻ കഴിയുന്നില്ല. ഞാൻ അറുനൂറിലേറെ ചിത്രങ്ങളിൽ അഭിനയിച്ചെങ്കിലും ഇത്രയേറെ പബ്ലിസിറ്റിയോടെ ഒരു സിനിമയുടെ നായകനാകുന്നത് ആദ്യമായിട്ടാണ്.സിനിമ നല്ലതാണെന്നും മനോഹരമാണെന്നും പറഞ്ഞുകൊണ്ട് നിരവധി പേർ വിളിക്കുന്നുണ്ട്. ഞാൻ മാത്രമല്ല, നൂറിലേറെ പുതുമുഖങ്ങൾ ഈ സിനിമയിൽ അഭിനയിക്കുന്നുണ്ട്.
വേഫെററും ഗപ്പി സിനിമാസും ചേർന്ന് മനോഹരമായി ഈ സിനിമയുടെ പ്രൊമോഷൻ നടത്തുന്നുണ്ട്. അതൊക്കെ കാണുമ്പോൾ എനിക്ക് വലിയ സന്തോഷമാണ്.
💦 ഗുരുജിയുടെ വാക്കുകൾ
എത്രയൊക്കെ മാറ്റങ്ങളുണ്ടായാലും മാറുന്നതല്ല സൗഹൃദം, അത് ആത്മാവ് ശരീരത്തില്‍ നിന്ന് മറഞ്ഞാലും ഓര്‍മ്മകളില്‍ നില്‍ക്കുന്നതാണ്. ഭാര്യ ഭര്‍ത്താവിനോടും, ഭര്‍ത്താവ് ഭാര്യയോടും, മക്കള്‍ മാതാപിതാക്കളോടും മാതാപിതാക്കള്‍ മക്കളോടും അദ്ധ്യാപകര്‍ വിദ്യാര്‍ത്ഥികളോടും, വിദ്യാര്‍ത്ഥികള്‍ അദ്ധ്യാപകരോടും എല്ലാവരോടും സ്നേഹത്തില്‍ ആഴമുള്ള സുഹൃദ്ബന്ധങ്ങള്‍ ഉണ്ടാകട്ടെ.
_”വിശ്വസ്തനായ സ്നേഹിതനെപ്പോലെ അമൂല്യമായി ഒന്നുമില്ല. അവന്‍റെ മാഹാത്മ്യം അളവറ്റതാണ്, വിശ്വസ്തനായ സ്നേഹിതന്‍ ജീവാമൃതമാണ്.
