📱വാർത്തകൾ ഒറ്റനോട്ടത്തിൽ📱 – 2025 | ഒക്ടോബർ 31 | വെള്ളി ✍ കപിൽ ശങ്കർ

🔹അതി ദാരിദ്ര്യമുക്ത സംസ്ഥാനമായി കേരളം. കേരള പിറവി ദിനമായ നാളെ മുഖ്യമന്ത്രി പിണറായി വിജയന്‍ പ്രഖ്യാപനം നടത്തും. വൈകിട്ട് തിരുവനന്തപുരം സെന്‍ട്രല്‍ സ്റ്റേഡിയത്തില്‍ പൊതുസമ്മേളനവും സംഘടിപ്പിക്കും. പൊതുസമ്മേളനത്തില്‍ ഇന്ത്യന്‍ സിനിമ ഇതിഹാസങ്ങളായ മമ്മൂട്ടി, മോഹന്‍ലാല്‍, കമല്‍ഹാസന്‍ എന്നിവര്‍ വിശിഷ്ടാതിഥികളാകും.
രാജ്യത്തെ ആദ്യ അതി ദാരിദ്ര്യമുക്ത സംസ്ഥാനമായി മാറുകയാണ് കേരളം. രണ്ടാം പിണറായി സര്‍ക്കാരിന്റെ ആദ്യ മന്ത്രിസഭാ തീരുമാനമായിരുന്നു അതിദാരിദ്ര്യമുക്തി. ഇതിനായുള്ള സമഗ്ര പരിശോധനയിലൂടെ 64,006 കുടുംബങ്ങളിലായി 1,03,099 അതിദരിദ്ര വ്യക്തികളെ കണ്ടെത്തി. ആഹാരം പോലും കണ്ടെത്താന്‍ കഴിയാത്ത 20,648 അതിദരിദ്ര കുടുംബങ്ങളുണ്ടായിരുന്നു.
2022 ഏപ്രില്‍ ഒന്നു മുതല്‍ ഇവര്‍ക്ക് ഭക്ഷണവും ചികിത്സയും ഉറപ്പ് വരുത്തി. 4,677 പുതിയ വീട് പണിതത്തില്‍ 4005 ഉം പൂര്‍ത്തിയായി. 672 വീടുകളുടെ നിര്‍മാണം ഉടനെ പൂര്‍ത്തിയാകും. പണി തീരുന്നത് വരെ ഇവരെ സുരക്ഷിതമായി മറ്റൊരിടത്ത് താമസിപ്പിക്കും. പുനരുദ്ധാരണം ആവശ്യമായ 5,646 വീടുകളില്‍ 5,522 വീടുകളും പൂര്‍ത്തിയായി. ഇന്ത്യയില്‍ ആദ്യമായാണ് ഒരു സര്‍ക്കാര്‍ ഇത്തരമൊരു പദ്ധതി നടപ്പാക്കുന്നത്. അങ്ങനെ അവസാനത്തെ അതിദരിദ്രനെയും മോചിപ്പിച്ച്, ജനങ്ങള്‍ക്കൊപ്പമാണ് എന്നും ഇടതു സര്‍ക്കാരെന്ന് വീണ്ടും തെളിയിക്കുകയാണ് സംസ്ഥാന സര്‍ക്കാര്‍.
അതേസമയം, സര്‍ക്കാര്‍ പ്രഖ്യാപിച്ച ക്ഷേമ പദ്ധതികളും നാളെ മുതല്‍ പ്രാബല്യത്തിലാകും. ജനസംഖ്യയിലെ പകുതിയിലധികം പേർക്ക് നേരിട്ട് പ്രയോജനം ലഭിക്കുന്ന പദ്ധതികളാണിത്. രണ്ടാം പിണറായി സര്‍ക്കാരിന്റെ പ്രഖ്യാപനങ്ങളെ വരവേറ്റിരിക്കുകയാണ് കേരളം. അതേസമയം, പ്രതിപക്ഷം പ്രതിസന്ധിയിലാകുകയും ചെയ്തു.

🔹പറഞ്ഞ വാക്കുപാലിച്ച് തിരുവനന്തപുരം നഗരസഭ. ആമയിഴഞ്ചാന്‍ തോട്ടില്‍ ശുചീകരണത്തിനിടെ മരിച്ച ജോയിയുടെ അമ്മയ്ക്കുള്ള വീടിന്റെ നിര്‍മാണം പൂര്‍ത്തീകരിച്ചു. തിരുവനന്തപുരം ജില്ലാ പഞ്ചായത്തും നഗരസഭയും ചേര്‍ന്ന് നിര്‍മിച്ച വീട് ഇന്ന് കൈമാറും. ചേര്‍ത്തുപിടിച്ച സര്‍ക്കാരിനും നഗരസഭയ്ക്കും ജോയിയുടെ അമ്മ മെല്‍ഗി നന്ദി അറിയിക്കുകയാണ്.
ആമയിഴഞ്ചാന്‍ തോട്ടില്‍ ശുചീകരണത്തിനിടെയാണ് റെയില്‍വേ കരാര്‍ തൊഴിലാളിയായ ജോയി മരണമടഞ്ഞത്. പിന്നീട് ജോയിയുടെ കുടുംബത്തെ ചേര്‍ത്തുപിടിക്കുകയായിരുന്നു സര്‍ക്കാരും തിരുവനന്തപുരം നഗരസഭയും. ജോയിയുടെ അമ്മയ്ക്ക് മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് 10 ലക്ഷം രൂപ നല്‍കാന്‍ മന്ത്രിസഭാ യോഗം അന്ന് തീരുമാനിച്ചിരുന്നു. പിന്നാലെ സ്വന്തമായി വീടില്ലാത്ത അമ്മയ്ക്ക് വീട് നിര്‍മിച്ചു നല്‍കുമെന്ന് നഗരസഭയും പ്രഖ്യാപിച്ചു.
ജോയിയുടെ അമ്മ താമസിക്കുന്ന മാരായമുട്ടത്തെ വീടിന് സമീപത്ത് തന്നെ ജില്ലാ പഞ്ചായത്ത് ഭൂമി കണ്ടെത്തി. മാര്‍ച്ച് 27-ന് തറക്കല്ലിട്ടു. വെറും ഏഴ് മാസം പിന്നിടുമ്പോള്‍, പറഞ്ഞ വാക്കുപാലിച്ച് വീടിന്റെ നിര്‍മാണം പൂര്‍ത്തീകരിച്ചിരിക്കുകയാണ്. ജില്ലാ പഞ്ചായത്ത് അഞ്ച് ലക്ഷം രൂപയ്ക്ക് വാങ്ങിയ അഞ്ച് സെന്റ് ഭൂമിയിലാണ് തിരുവനന്തപുരം നഗരസഭ ലൈഫ് മിഷന്‍ പദ്ധതിയില്‍ ഉള്‍പ്പെടുത്തി വീട് നിര്‍മിച്ചത്.

🔹ആശ വര്‍ക്കര്‍മാരുടെ ഓണറേറിയം വര്‍ധിപ്പിച്ച സര്‍ക്കാറിന് അഭിവാദ്യമര്‍പ്പിച്ച് കോഴിക്കോട് ആശ വര്‍ക്കര്‍മാരുടെ നേതൃത്വത്തില്‍ ആഹ്ളാദപ്രകടനം സംഘടിപ്പിച്ചു. ആശമാര്‍ക്ക് വലിയ കരുതല്‍ നല്‍കുന്നതാണ് സര്‍ക്കാര്‍ തീരുമാനമെന്നും 1,000 രൂപയായി ഉയര്‍ത്തിയത് അപ്രതീക്ഷിതമെന്നും ആശ വര്‍ക്കേഴ്സ് ഫെഡറേഷന്‍ യൂണിയന്‍ (സി ഐ ടി യു) അഖിലേന്ത്യാ പ്രസിഡന്റ് പി പി പ്രേമ പറഞ്ഞു.
കോഴിക്കോട് പുതിയ ബസ് സ്റ്റാൻഡിന് സമിപത്ത് നിന്ന് ആരംഭിച്ച് നഗരം ചുറ്റിയായിരുന്നു ആശമാരുടെ പ്രകടനം. ആശ വര്‍ക്കര്‍മാരുടെ ഓണറേറിയം 1,000 രൂപയായി ഉയര്‍ത്തിയതില്‍ സന്തോഷം പങ്കുവെക്കുകയാണ് ആശ വര്‍ക്കര്‍മാര്‍. 1,000 രൂപ പ്രതിക്ഷിച്ചിരുന്നില്ലെന്നും ഈ സര്‍ക്കാര്‍ ഇനിയും വരണം എന്നതാണ് ആഗ്രഹമെന്നും ആശ വര്‍ക്കര്‍മാര്‍ പറയുന്നു. സകലമനുഷ്യരെയും മനസ്സിലാക്കുന്നതാണ് സര്‍ക്കര്‍ ഇടപെടലെന്നും വീണ്ടും സമരം തുടരുന്ന എസ് യു സി ഐ പ്രവര്‍ത്തകരുടെത് കാപട്യമാണെന്നും പ്രേമ പറഞ്ഞു.

🔹ശബരിമല സ്വര്‍ണ മോഷണ കേസില്‍ രണ്ടാം പ്രതി മുരാരി ബാബുവിന്റെ കാലാവധി ഇന്ന് അവസാനിക്കും. മുരാരി ബാബുവിനെ ഇന്ന് റാന്നി കോടതിയില്‍ ഹാജരാക്കും. നാല് ദിവസത്തെ കസ്റ്റഡിയില്‍ മുഖ്യപ്രതി ഉണ്ണികൃഷ്ണന്‍ പോറ്റിയെയും മുരാരി ബാബുവിനെയും ഒരുമിച്ചിരുത്തി എസ് ഐ ടി ചോദ്യം ചെയ്തിരുന്നു.
അതേസമയം, മുഖ്യപ്രതി ഉണ്ണികൃഷ്ണന്‍ പോറ്റിയെ കഴിഞ്ഞ ദിവസം കോടതി റിമാന്‍ഡ് ചെയ്തിരുന്നു. പല സംസ്ഥാനങ്ങളിലായി വ്യാപിച്ചുള്ള നിലവിലെ അന്വേഷണത്തില്‍ നിര്‍ണായകമായിട്ടുള്ള നിരവധി രേഖകളാണ് പ്രത്യേക അന്വേഷണ സംഘം പിടിച്ചെടുത്തത്. ഇനി കേസിലെ മറ്റ് പ്രതികളിലേക്ക് കടക്കാനാണ് പ്രത്യേക അന്വേഷണ സംഘത്തിന്റെ തീരുമാനം.

🔹എറണാകുളം പെരുമ്പാവൂരിൽ എ ടി എം കുത്തിപ്പൊളിച്ച് പണം കവരാൻ ശ്രമിച്ച പ്രതികളെ പൊലീസ് അറസ്റ്റ് ചെയ്തു. തൊടുപുഴ കൊടുവേലി സ്വദേശി സുജിത്ത് എം ബാബു (26), കൊല്ലം ശൂരനാട് സ്വദേശി അനന്ദു പ്രസാദ് (24 ) എന്നിവരാണ് പെരുമ്പാവൂർ പൊലീസിന്‍റെ പിടിയിലായത്. പുലർച്ചെ മൂന്നുമണിയോടെ മാറമ്പിള്ളിയിലുള്ള ഫെഡറൽ ബാങ്ക് എടിഎമ്മിൽ കടന്ന പ്രതികൾ സിസിടിവി ക്യാമറയുടെ വയറുകൾ മുറിക്കുന്നതിനിടെ സൈറൺ മുഴങ്ങി.
തൊട്ടടുത്ത വീട്ടിൽ താമസിച്ചിരുന്ന ബാങ്ക് ജീവനക്കാരൻ ശബ്ദം കേട്ട് എഴുന്നേറ്റ് നാട്ടുകാരെ വിളിച്ചു കൂട്ടുകയായിരുന്നു. നാട്ടുകാർ എത്തിയപ്പോഴേക്കും പ്രതികൾ ഓടി രക്ഷപ്പെട്ടു. പിന്നീട് നാട്ടുകാരുടെ സഹായത്തോടെ പ്രതികളെ ഓടിച്ചിട്ട് പിടികൂടുകയും പെരുമ്പാവൂർ പൊലീസ് എത്തി കസ്റ്റഡിയിൽ എടുക്കുകയുമായിരുന്നു.

🔹ബെംഗളൂരുവില്‍ ഡെലിവറി ബോയിയെ മനഃപൂർവം കാറിടിച്ച് വീഴ്ത്തി കൊലപ്പെടുത്തിയ മലയാളികള്‍ ബെംഗളൂരുവില്‍ അറസ്റ്റില്‍. കളരിപ്പയറ്റ് പരിശീലകനും ഭാര്യയുമാണ് പൊലീസിൻ്റെ പിടിയിലായത്. ഒക്ടോബർ 25നാണ് കേസിനാസ്പദമായ സംഭവം. കെമ്പട്ടള്ളി സ്വദേശിയായ ദർശനെയാണ് കാറിടിച്ചു കൊലപ്പെടുത്തിയത്. ആദ്യം സ്വാഭാവിക മരണമെന്ന് കരുതിയ പൊലീസ് സി സി ടി വി കേന്ദ്രീകരിച്ച് നടത്തിയ അന്വേഷണത്തിലാണ് കൊലപാതകമെന്ന് കണ്ടെത്തിയത്. പിന്നാലെ മലയാളിയായ മനോജ് കുമാറും (32) ജമ്മുകശ്മീർ സ്വദേശി ഭാര്യ ആരതിശർമ (30) എന്നിവര്‍ അറസ്റ്റിലായത്. ഇവരെ 14 ദിവസത്തെ ജുഡീഷ്യൽ കസ്റ്റഡിയിൽ വിട്ടു.
അഞ്ചു വർഷം മുൻപാണ് മനോജും ആരതിയും തമ്മില്‍ വിവാഹിതരാകുന്നത്. ദമ്പതികൾ, സ്കൂട്ടറിൽ സഞ്ചരിക്കുകയായിരുന്ന ഡെലിവറി ഏജൻറിനെ മനഃപൂർവം ഇടിച്ചുവീഴ്ത്തുന്നതിൻ്റെ സി സി ടി വി ദൃശ്യങ്ങൾ പുറത്തുവന്നിരുന്നു. കാറിടിച്ച് തെറിച്ചു വീണ് ഗുരുതരമായി പരിക്കേറ്റാണ് ദർശൻ മരിച്ചത്.

🔹കെഎസ്ആർടിസിയുടെ പുതിയ വണ്ടികൾ കാണുമ്പോൾ മറ്റ് സംസ്ഥാനങ്ങൾ അസൂയയാണെന്ന് മന്ത്രി കെ.ബി. ഗണേഷ് കുമാർ. അസൂയയുടെ പേരിൽ കെഎസ്ആർടിസി ബസുകൾ തടഞ്ഞുവെച്ചപ്പോൾ ശക്തമായ തിരിച്ചടി നൽകിയെന്നും മന്ത്രി പറഞ്ഞു. കെഎസ്ആർടിസിയുടെ പുതിയ പദ്ധതികളുടെ ഉദ്ഘാടന ചടങ്ങിലാണ് മന്ത്രി ഈ അനുഭവങ്ങൾ പങ്കുവെച്ചത്.
വോൾവോയുടെ ഏറ്റവും ലേറ്റസ്റ്റ് മോഡലിലുള്ള സ്ലീപ്പർ ബസ് വാങ്ങുന്ന ഇന്ത്യയിലെ ആദ്യത്തെ ട്രാൻസ്പോർട്ട് കോർപ്പറേഷൻ കെഎസ്ആർടിസി ആണ്. നമ്മുടെ വണ്ടി കാണുമ്പോൾ മറ്റ് സംസ്ഥാനങ്ങൾക്ക് അസൂയയാണ്. പുതിയ വണ്ടികൾ കണ്ടപ്പോൾ ഉണ്ടായ കുശുമ്പാണ് പ്രശ്നങ്ങൾക്ക് കാരണമായത്. പുതിയ ബസ് കണ്ടപ്പോൾ ചിലർ അത് പ്രൈവറ്റ് ബസ് ആണെന്ന് വിചാരിച്ചു എന്നും മന്ത്രി പറഞ്ഞു.
കൊട്ടാരക്കരയിൽ നിന്ന് പോയ ഒരു കെഎസ്ആർടിസി വണ്ടി അവിടുത്തെ ട്രാൻസ്പോർട്ട് അധികൃതർ പിടിച്ചെടുക്കുകയും കണ്ടക്ടറെ തടഞ്ഞുവെക്കുകയും ചെയ്തു. “നമ്മുടെ വണ്ടി കണ്ടപ്പോൾ പ്രൈവറ്റ് ബസ് ആണെന്ന് വിചാരിച്ചു. വണ്ടി വിട്ടുകൊടുക്കാൻ അധികൃതർ ആദ്യം തയ്യാറായില്ല. അവരുടെ മന്ത്രി ഇടപെട്ടപ്പോഴും വണ്ടി തടഞ്ഞുവെച്ചു. തൊട്ടുപിന്നാലെ ഇവിടെ നിന്ന് കോഴിക്കോട് റൂട്ടിലുള്ള അവരുടെ വണ്ടി പിടിച്ചെടുത്തു. അതിന് ശേഷമാണ് അവർ വണ്ടി വിട്ട് നൽകിയത് എന്നും മന്ത്രി വിവരിച്ചു.

🔹സംസ്ഥാനത്ത് ക്യാൻസർ രോഗികൾക്ക് സൗജന്യ യാത്ര ഉറപ്പാക്കുന്ന ‘ഹാപ്പി ലോങ്ങ് ലൈഫ് സൗജന്യ കാർഡ് പദ്ധതി’യുടെ യാത്ര കാർഡ് വിതരണം ആരംഭിച്ചതായി മന്ത്രി കെ ബി ഗണേഷ് കുമാർ അറിയിച്ചു. കെഎസ്ആർടിസി നടപ്പിലാക്കുന്ന എട്ട് പ്രധാന പദ്ധതികളിൽ ഓന്നാണ് ‘ഹാപ്പി ലോങ്ങ് ലൈഫ് സൗജന്യ കാർഡ് പദ്ധതി’. ക്യാൻസർ രോഗവുമായി ബന്ധപ്പെട്ട് കീമോ, റേഡിയേഷൻ പോലുള്ള ചികിത്സകൾക്കായി യാത്ര ചെയ്യുന്നവർക്കാണ് ഈ സൗകര്യം ലഭിക്കുക.
ഈ പദ്ധതി കെഎസ്ആർടിസി ജീവനക്കാർ ഈ സമൂഹത്തിലെ രോഗികൾക്ക് നൽകുന്ന സമ്മാനമാണ് എന്നും ഗതാഗത വകുപ്പ് മന്ത്രി കെ ബി ഗണേഷ് കുമാർ പറഞ്ഞു. ഇതൊരു പാസ് അല്ല, ഓസ് അല്ല, ഔദാര്യമല്ല, മറിച്ച് കെഎസ്ആർടിസി അതിന്റെ മികവിനൊപ്പം ചെയ്യുന്ന ജീവകാരുണ്യ പ്രവർത്തനമാണ്. കാർഡിൽ ‘രോഗി’ എന്ന തോന്നൽ ഉണ്ടാകാൻ പാടില്ല എന്നതിനാൽ, അതിൽ ‘ഹാപ്പി ലോങ്ങ് ലൈഫ്’ എന്നാണ് രേഖപ്പെടുത്തിയിരിക്കുന്നത്. സാധാരണക്കാർക്ക് ക്യാൻസർ ബാധിക്കുമ്പോൾ ഉണ്ടാകുന്ന സാമ്പത്തികമായ തകർച്ചയും യാത്രാക്ലേശവും ലഘൂകരിക്കുന്നതിനാണ് ഈ പദ്ധതി എന്നും മന്ത്രി വ്യക്തമാക്കി.

🔹മണലിയിൽ ആശങ്ക പരത്തിയ കാട്ടാന ഒടുവിൽ കാട് കയറി. രണ്ട് ദിവസത്തെ ദൗത്യത്തിനാണ് ഇതോടെ വിജയം കണ്ടത്. വിതുര – മണലിയിൽ നിന്നും ഏകദേശം 15 കിലോ മീറ്റർ അകലെ കല്ലാർ പട്ടാണിത്തിരു മേഖലയിലേക്ക് കാട്ടാനയെ എത്തിച്ചാണ് കാടുകയറ്റിയത്. മണലി ജനവാസ മേഖലയിൽ തമ്പടിച്ചിരിക്കുന്ന കാട്ടാനയെ ഇന്ന് ഉച്ചയോടെയാണ് കല്ലാർ സെക്ഷൻ പരിധിയിലെ പട്ടാണിത്തിരു വനമേഖലയിൽ എത്തിച്ചത്. ഇവിടെ നിന്നും കൂടുതൽ ഉള്ളിലേക്ക് കാട്ടാന പോകാനാണ് സാധ്യതയെന്നാണ് വിലയിരുത്തൽ. വനം ഉദ്യോഗസ്ഥർക്കൊപ്പം റാപ്പിഡ് റെസ്പോൺസ് ടീം(ആർആർടി) അംഗങ്ങളും ചേർന്നാണ് കാട്ടാനയെ കാടുകയറ്റിയത്.

🔹മുംബൈയില്‍ 19 കുട്ടികളെ ബന്ദികളാക്കിയ യുവാവ് പൊലീസിന്റെ വെടിയേറ്റ് കൊല്ലപ്പെട്ടു. കുട്ടികളെയെല്ലാം രക്ഷിച്ചു. സംഭവത്തില്‍ അടിമുടി ദുരൂഹതയുണ്ട്. ഇയാളില്‍ നിന്ന് എയര്‍ഗണ്‍ പിടികൂടിയെന്ന് ഡെപ്യൂട്ടി കമ്മീഷണര്‍ ആദ്യം വ്യക്തമാക്കിയെങ്കിലും വെടിയേറ്റ കാര്യം വെളിപ്പെടുത്തിയിരുന്നില്ല.
പവായ് മേഖലയില്‍ 19 സ്‌കൂള്‍ കുട്ടികളെ ബന്ദിയാക്കിയ രോഹിത് ആര്യ ആണ് പൊലീസ് വെടിവെയ്പ്പില്‍ കൊല്ലപ്പെട്ടത്. രക്ഷാപ്രവര്‍ത്തനത്തിനിടെ പൊലീസിന് നേരെ എയര്‍ ഗണ്‍ ഉപയോഗിച്ച് ഇയാള്‍ വെടിയുതിര്‍ത്തതിനെ തുടര്‍ന്നാണ് പൊലീസ് തിരികെ വെടിവെച്ചത്. വെടിയേറ്റ നിലയില്‍ ആശുപത്രിയില്‍ രോഹിത് പ്രവേശിപ്പിച്ചെങ്കിലും മരിക്കുകയായിരുന്നു. ഇയാള്‍ നാഗ്പൂര്‍ സ്വദേശിയാണെന്നും മുംബൈയില്‍ ചെമ്പൂരാണ് താമസമെന്നുമാണ് വിവരങ്ങള്‍.

🔹ആഫ്രിക്കൻ രാജ്യമായ മൊസാംബിക്കിലെ ബെയ്റാ തുറമുഖത്തിനു സമീപം ബോട്ട് മറിഞ്ഞു കാണാതായ പിറവം സ്വദേശിയുടെ മൃതദേഹം കണ്ടെത്തിയതായി നാട്ടിൽ വിവരം ലഭിച്ചു. പോത്തംകുടിലിൽ സന്തോഷിന്റെയും ഷീനയുടെയും മകൻ 22 വയസുള്ള ഇന്ദ്രജിത്ത് ആണ് മരിച്ചത്. ഒക്ടോബർ 16 ന് പുലർച്ചെയായിരുന്നു അപകടം. മെക്കാനിക്കൽ എൻജിനീയറിങ് പൂർത്തിയാക്കിയ ഇന്ദ്രജിത്ത് ഒരു വർഷത്തോളമായി കപ്പലിൽ അറ്റകുറ്റപ്പണികൾ ചെയ്യുന്ന കമ്പനിയിലാണ് ജോലി ചെയ്തിരുന്നത്.

🔹പ്രവാസി ക്ഷേമത്തിന് മുന്‍തൂക്കം നല്‍കുന്ന സര്‍ക്കാരാണിതെന്നും നോര്‍ക്ക കെയര്‍ ഇന്‍ഷുറന്‍സ് ഏറെ ഗുണകരമാകുന്ന പദ്ധതിയാണെന്നും മുഖ്യമന്ത്രി പിണറായി വിജയൻ. ഖത്തറിൽ പ്രവാസികൾ സംഘടിപ്പിച്ച മലയാളോത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദോഹയിൽ പ്രവാസി ക്ഷേമ പദ്ധതികള്‍ ഒന്നൊന്നായി മുഖ്യമന്തി വിശദീകരിച്ചു.

🔹സംസ്ഥാനത്ത് ഇന്ന് മുതൽ ശക്തമായ മഴയ്ക്ക് ശമനം. കേന്ദ്ര കാലാവസ്ഥ വകുപ്പാണ് ഇക്കാര്യം അറിയിച്ചത്. അടുത്ത അഞ്ച് ദിവസത്തേയ്ക്ക് ഒരു ജില്ലയിലും പ്രത്യേക മ‍ഴ മുന്നറിയിപ്പുകള്‍ നൽകിയിട്ടില്ല. കള്ളക്കടൽ പ്രതിഭാസത്തിൻ്റെ ഭാഗമായി വിവിധ തീരങ്ങളിൽ ഉയർന്ന തിരമാലയ്ക്ക് സാധ്യതയുള്ളതിനാല്‍ ജാഗ്രതാ നിര്‍ദ്ദേശം നല്‍കിയിട്ടുണ്ട്. അതേസമയം, കേരള – ലക്ഷദ്വീപ് തീരങ്ങളിൽ മത്സ്യബന്ധനത്തിന് തടസ്സമില്ല.

🔹വനിത ഏകദിന ലോകകപ്പ് ക്രിക്കറ്റ് സെമി ഫൈനലിനിടെ പുതുചരിത്രമെഴുതി ഇന്ത്യൻ താരം സ്മൃതി മന്ദാന. ഏകദിന ക്രിക്കറ്റിൽ ഓസ്ട്രേലിയൻ ടീമിനെതിരെ 1,000 റൺസ് എന്ന റെക്കോർഡ് പൂർത്തിയാക്കുന്ന രണ്ടാമത്തെ ഇന്ത്യൻ വനിതാ താരമായി മന്ദാന മാറി. മുൻ ഇന്ത്യൻ ക്യാപ്റ്റൻ കൂടിയായ മിഥാലി രാജാണ് ഇതിനുമുമ്പ് ഈ നേട്ടം കൈവരിച്ച ക്രിക്കറ്റ് താരം.
വനിത ഏകദിന ലോകകപ്പ് സെമി ഫൈനലിൽ ഓസ്ട്രേലിയ ഉയർത്തിയ 339 റൺസ് വിജയലക്ഷ്യം പിന്തുടരവേയാണ് സ്മൃതി ഈ റെക്കോർഡ് സ്വന്തമാക്കിയത്. എന്നാൽ ഇന്നത്തെ നിർണായക മത്സരത്തിൽ താരത്തിന് മികച്ച സ്കോർ നേടാനായില്ല. 24 പന്തിൽ നിന്ന് 24 റൺസെടുത്ത ശേഷം മന്ദാന പുറത്താവുകയായിരുന്നു.
ഇന്ത്യൻ ഇന്നിങ്സ് 25 ഓവർ പിന്നിടുമ്പോൾ ഹർമൻപ്രീത് കൗറും ജമീമ റോഡ്രിഗസുമാണ് ക്രീസിൽ ഇന്ത്യ രണ്ട് വിക്കറ്റ് നഷ്ടത്തിൽ 163 റൺസെന് നിലയിലായിലാണ്. ടോസ് നേടി ആദ്യം ബാറ്റ് ചെയ്ത ഓസ്ട്രേലിയ 49.5 ഓവറിൽ 338 റൺസെടുത്തു. ഓസീസ് നിരയിൽ ഫീബി ലിച്ച്‌ഫീൽഡ് തകർപ്പൻ സെഞ്ച്വറിയാണ് നേടിയത്. 93 പന്തുകൾ നേരിട്ട ലിച്ച്‌ഫീൽഡ് 17 ഫോറുകളും മൂന്ന് സിക്സറുകളും ഉൾപ്പെടെയാണ് 119 റൺസ് നേടിയത്. ലിച്ച്ഫീൽഡിന്റെ മൂന്നാം ഏകദിന സെഞ്ച്വറിയാണിത്. വനിതാ ഏകദിന ലോകകപ്പ് നോക്കൗട്ട് മത്സരങ്ങളുടെ ചരിത്രത്തിലെ ഏറ്റവും വേഗതയേറിയ സെഞ്ച്വറി കൂടിയാണിത്.

🔹കേരള സംസ്ഥാന ചലച്ചിത്ര പുരസ്‌കാരങ്ങള്‍ നവംബര്‍ ഒന്നിന് പ്രഖ്യാപിക്കും. മികച്ച നടനായുള്ള മത്സരത്തിന്‍റെ അവസാന റൗണ്ടില്‍ മമ്മൂട്ടിയും, ആസിഫ് അലിയും വിജയരാഘവനും ടൊവിനോയും ഉണ്ടെന്നാണ് വിവരം. ഭ്രമയുഗത്തിലെ പ്രകടനത്തിലൂടെ അവാർഡ് ചർച്ചകളിൽ സജീവമായ മമ്മൂട്ടിക്കൊപ്പം യുവനിരയിൽ നിന്നും ആസിഫ് അലിയുടെ പേരും ഉയർന്ന് കേൾക്കുന്നുണ്ട്. നവാഗത സംവിധായകനുള്ള പുരസ്‌കാരത്തില്‍ മോഹന്‍ലാലും മത്സരിക്കുന്നുണ്ട്.
36 സിനിമകളാണ് ഇക്കുറി അവസാന റൗണ്ടിലെത്തിയത്. ചലച്ചിത്ര മേളകളില്‍ മികച്ച പ്രകടനം കാഴ്ചവച്ച ഓള്‍ വി ഇമാജിന്‍ ആസ് ലൈറ്റ്, ഫെമിനിച്ചി ഫാത്തിമ എന്നീ ചിത്രങ്ങളും മികച്ച ചിത്രമാകാനുള്ള മത്സരത്തിന്റെ അവസാന റൗണ്ടില്‍ ഉണ്ട്. ഈ ചിത്രങ്ങളില്‍ വേഷമിട്ട കനി കുസൃതി, ദിവ്യപ്രഭ, ഷംല ഹംസ എന്നിവരാണ് മികച്ച നടിക്ക് വേണ്ടി മത്സരിക്കുന്നത്. അനശ്വര രാജന്‍, ജ്യോതിര്‍മയി, സുരഭി ലക്ഷ്മി തുടങ്ങിയവരും സാധ്യതാ പട്ടികയിലുണ്ട്.

🔹മലയാളം സിനിമാ മേഖലയിൽ ഇരുപത് വർഷത്തോളമായി പ്രവർത്തിക്കുന്ന മലയാളികള്‍ക്ക് ഏറ്റവും സുപരിചിതനായ നടനാണ് സുരാജ് വെഞ്ഞാറമൂട്. ഇതുവരെ നാഷണൽ അവാർഡും പല കേരള സംസ്ഥാന ചലച്ചിത്ര പുരസ്കാരങ്ങളും നേടാൻ നടന് ക‍ഴിഞ്ഞു. ഈ വര്‍ഷം പുറത്തിറങ്ങിയ വിക്രം നായകനായ തമിഴ് ചിത്രം വീര ധീര സൂരനില്‍ അദ്ദേഹം ഒരു പ്രധാന വേഷം ചെയ്തിരുന്നു. അതിനിടെയാണ് നടൻ പുതിയൊരു അപ്ഡേറ്റ് പുറത്തുവിട്ടിരിക്കുന്നത്.
കന്നഡ നടൻ ശിവരാജ് കുമാറിൻ്റെ ‘ഡാഡ്’ സിനിമയിലാണ് നടൻ അരങ്ങേറ്റം കുറിക്കുന്നത്. സഹതാരം സുരാജിനൊപ്പമുള്ള ചിത്രം പങ്കുവെച്ചതിന് പിന്നാലെയാണ് സുരാജ് കന്നഡയിലും അരങ്ങേറ്റം കുറിക്കുന്ന കാര്യം ആരാധകര്‍ അറിയുന്നത്.

💦 ഗുരുജിയുടെ വാക്കുകൾ

മറ്റെന്തിനെക്കാളുമുപരി ജനങ്ങൾ ആഗ്രഹിക്കുന്നത് തങ്ങൾക്ക് സുഖമായിരിക്കണം എന്നതാണ്. സന്തോഷമായിരിക്കാനും ക്രിയാത്മകമായിരിക്കാനും സ്വസ്ഥതയുള്ളവരായിരിക്കാനും നാം ആഗ്രഹിക്കുന്നു. എല്ലാത്തിലുമുപരി നാം യഥാർഥത്തിൽ ആഗ്രഹിക്കുന്നത് മനസ്സമാധാനമാണ്. ജീവിതത്തിന്റെ ആവശ്യകതകൾ, നിങ്ങളുടെ കുടുംബം, സുഹൃത്തുക്കൾ, ജോലി, നിങ്ങളുടെ ഇടപാടുകാർ, നിങ്ങളുടെ സാമൂഹികപ്രവർത്തനങ്ങൾ, നിങ്ങൾ ഉൾപ്പെട്ട മറ്റെല്ലാവിധ പ്രവർത്തനങ്ങൾ എന്നിവയെ ഫലപ്രദമായി കൈകാര്യം ചെയ്യാനുള്ള നിങ്ങളുടെ കഴിവിൽ വിശ്വാസം തോന്നുമ്പോൾ മാത്രമാണ് മനസ്സമാധാനം ആസ്വദിക്കാൻ നിങ്ങൾക്കു കഴിയുക.

തയ്യാറാക്കിയത്:
കപിൽ ശങ്കർ

2 Likes

📱വാർത്തകൾ ഒറ്റനോട്ടത്തിൽ📱 – 2025 | ഒക്ടോബർ 31 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്:
കപിൽ ശങ്കർ

ജർമ്മനിയിലെ പ്രാദേശിക നിയമസഭാ തിരഞ്ഞെടുപ്പിൽ ഭരണകക്ഷിയായ ക്രിസ്ത്യൻ ഡെമോക്രാറ്റിക് യൂണിയന് കനത്ത തിരിച്ചടി

കെ.എച്ച്.എൻ.എ ‘മംഗല്യസൂത്രം’ നവീകരിച്ച മാട്രിമോണിയൽ വെബ്സൈറ്റ് പ്രകാശനം ചെയ്തു

റഷ്യ – യുക്രെയ്ന്‍ യുദ്ധത്തെ വീണ്ടും വിമർശിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ്

LEAVE A REPLY Cancel reply

Most Popular

ജർമ്മനിയിലെ പ്രാദേശിക നിയമസഭാ തിരഞ്ഞെടുപ്പിൽ ഭരണകക്ഷിയായ ക്രിസ്ത്യൻ ഡെമോക്രാറ്റിക് യൂണിയന് കനത്ത തിരിച്ചടി

കെ.എച്ച്.എൻ.എ ‘മംഗല്യസൂത്രം’ നവീകരിച്ച മാട്രിമോണിയൽ വെബ്സൈറ്റ് പ്രകാശനം ചെയ്തു

Recent Comments

EDITOR PICKS

ജർമ്മനിയിലെ പ്രാദേശിക നിയമസഭാ തിരഞ്ഞെടുപ്പിൽ ഭരണകക്ഷിയായ ക്രിസ്ത്യൻ ഡെമോക്രാറ്റിക് യൂണിയന് കനത്ത തിരിച്ചടി

POPULAR POSTS

ഏഷ്യൻ ഗെയിംസ് ഷൂട്ടിംഗിൽ മൂന്ന് മെഡൽ കൂടി സ്വന്തമാക്കി ഇന്ത്യ

46 കോടി രൂപ തട്ടിയതായി കേസ്; നടി അംബികക്കെതിരെ സഹോദരി രാധപരാതി നൽകി

ചരിത്രം കുറിച്ച് ഫൊക്കാന: ഒരു മണിക്കൂറിലധികം ഇടവേളയിൽ രണ്ട് ഗിന്നസ് വേൾഡ് റെക്കോർഡുകൾ.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2025 | ഒക്ടോബർ 31 | വെള്ളി ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

തയ്യാറാക്കിയത്:
കപിൽ ശങ്കർ