📱വാർത്തകൾ ഒറ്റനോട്ടത്തിൽ📱 – 2026 | മെയ് 05 | ചൊവ്വ ✍️ കപിൽ ശങ്കർ

🔹2026 മെയ് 5-ന് (ചൊവ്വാഴ്ച) ആചരിക്കുന്ന പ്രധാനപ്പെട്ട ദിനങ്ങളും പ്രത്യേകതകളും താഴെ പറയുന്നവയാണ്:

•ലോക ആസ്ത്മ ദിനം (World Asthma Day): മെയ് മാസത്തിലെ ആദ്യ ചൊവ്വാഴ്ചയാണ് ലോക ആസ്ത്മ ദിനമായി ആചരിക്കുന്നത്. ആസ്ത്മ രോഗത്തെക്കുറിച്ചുള്ള അവബോധം, പ്രതിരോധം, പരിചരണം എന്നിവ വർദ്ധിപ്പിക്കാൻ ഈ ദിനം ലക്ഷ്യമിടുന്നു.
•അന്താരാഷ്ട്ര മിഡ്‌വൈഫ് ദിനം (International Day of the Midwife): പ്രസവസമയത്ത് അമ്മമാർക്കും കുഞ്ഞുങ്ങൾക്കും നൽകുന്ന പരിചരണത്തിന് മിഡ്‌വൈഫുമാർ നൽകുന്ന സംഭാവനകളെ ആദരിക്കുന്നതിനായി എല്ലാ വർഷവും മെയ് 5-ന് ഈ ദിനം ആചരിക്കുന്നു.
•സിങ്കോ ഡി മായോ (Cinco de Mayo): മെക്സിക്കൻ സംസ്കാരത്തിൻ്റെ ആഘോഷം. 1862-ൽ പ്യൂബ്ല യുദ്ധത്തിൽ മെക്സിക്കൻ സൈന്യം ഫ്രഞ്ച് സൈന്യത്തെ പരാജയപ്പെടുത്തിയതിൻ്റെ സ്മരണാർത്ഥം പ്രധാനമായും മെക്സിക്കോയിലും യുഎസിലും ഈ ദിനം ആഘോഷിക്കുന്നു.
•ലോക പോർച്ചുഗീസ് ഭാഷാ ദിനം (World Portuguese Language Day): പോർച്ചുഗീസ് ഭാഷയുടെ സാംസ്കാരിക സ്വാധീനത്തെയും വൈവിധ്യത്തെയും ആഘോഷിക്കുന്ന ദിനം.
•ജപ്പാൻ കുട്ടികളുടെ ദിനം (Children’s Day in Japan): ജപ്പാനിലെ ദേശീയ അവധി ദിനമാണിത്. കുട്ടികളുടെ സന്തോഷത്തിനും ആരോഗ്യത്തിനും വേണ്ടിയുള്ള ദിനമായി ഇത് ആചരിക്കുന്നു.
•ദേശീയ പോഷകാഹാര ദിനം (National Hoagie Day/Astronaut Day): പല രാജ്യങ്ങളിലും വ്യത്യസ്തമായ ദേശീയ ദിനങ്ങളായും മെയ് 5 ആചരിക്കപ്പെടുന്നു.
•ചരിത്രപരമായ ചില പ്രത്യേകതകൾ കൂടി യുണ്ട്.1944: മഹാത്മാ ഗാന്ധി ജയിൽ മോചിതനായി.1955: പശ്ചിമ ജർമനിക്ക് സമ്പൂർണ്ണ സ്വയംഭരണാധികാരം ലഭിച്ചു.

🔹സംസ്ഥാനത്ത് യുഡിഎഫ് സുനാമി. കേരളത്തിലെ 140 നിയമസഭാ മണ്ഡലങ്ങളില്‍ 102 സീറ്റും യുഡിഎഫ് തൂത്തുവാരി. എല്‍ഡിഎഫിനു 35 സീറ്റു മാത്രം. ബിജെപിക്കു മൂന്നിടത്തു ചരിത്രവിജയം. കോണ്‍ഗ്രസ് തനിച്ച് 63 സീറ്റില്‍ ജയിച്ചപ്പോള്‍ മുസ്ലിം ലീഗ് 22 സീറ്റുകളിലും കേരള കോണ്‍ഗ്രസ് ജോസഫ് ഏഴു സീറ്റുകളിലും ആര്‍എസ്പി മൂന്നു സിറ്റുകളിലും വിജയിച്ചു. സിപിഎം വെറും 26 സീറ്റുകളിലേക്ക് ഒതുങ്ങിയപ്പോള്‍ സിപിഐക്ക് നേടാനായത് എട്ടു സീറ്റ്. കേരള കോണ്‍ഗ്രസ് എമ്മിന്റെ ആരും ജയിച്ചില്ല. ഭരണ വിരുദ്ധ വികാരമെന്നും പിണറായി വിരുദ്ധ തരംഗമെന്നും രാഷ്ട്രീയ നിരീക്ഷകര്‍.

🔹മുഖ്യമന്ത്രി പിണറായി വിജയന്‍ രാജിവച്ചു. തലസ്ഥാനത്തെത്താതെ, കണ്ണൂരിലെ വസതിയില്‍നിന്ന് പ്രത്യേക ദൂതന്‍ വഴിയാണ് രാജിക്കത്ത് ഗവര്‍ണര്‍ക്ക് എത്തിച്ചത്. മുഖ്യമന്ത്രിയുടെ രാജി സ്വീകരിച്ച ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍, പുതിയ സര്‍ക്കാര്‍ അധികാരമേല്‍ക്കുന്നതു വരെ കാവല്‍ മുഖ്യമന്ത്രിയായി തുടരാന്‍ അദ്ദേഹത്തോട് ആവശ്യപ്പെട്ടു. കനത്ത പരാജയത്തിന് പിന്നാലെ വീട്ടില്‍നിന്ന് പുറത്തിറങ്ങാത്ത വിജയന്‍ മാധ്യമങ്ങളെയും കാണാന്‍ തയാറായില്ല.

🔹കേരളത്തിലെ കക്ഷിനില:
യുഡിഎഫ് – കോണ്‍ഗ്രസ് 63, മുസ്ലിം ലീഗ് 22, കേരള കോണ്‍ഗ്രസ് 7, സ്വതന്ത്രര്‍ 4, ആര്‍എസ്പി 3, ആര്‍എംപി 1, കേരള കോണ്‍ഗ്രസ് ജേക്കബ് 1, സിഎംപി 1. യുഡിഎഫിനു ലഭിച്ചത് 46 ശതമാനം വോട്ട്.
എല്‍ഡിഎഫ് – സിപിഎം 26, സിപിഐ 8, ആര്‍ജെഡി 1. എല്‍ഡിഎഫിനു ലഭിച്ചത് 37.7 ശതമാനം വോട്ട്.
എന്‍ഡിഎ – ബിജെപി 3. ലഭിച്ചതു 13.2 ശതമാനം വോട്ട്.

🔹മുഖ്യമന്ത്രിയാകാന്‍ അവകാശ വാദം ഉന്നയിക്കില്ലെന്നും മുഖ്യമന്ത്രി ആരെന്നു പാര്‍ട്ടിയും ഹൈക്കമാന്‍ഡും തീരുമാനിക്കുമെന്നും കോണ്‍ഗ്രസ് നേതാവ് വി.ഡി. സതീശന്‍. ജനത്തിന്റ പ്രതീക്ഷ വളരെ വലുതാണ്. തമ്മില്‍ തല്ലിയാല്‍ ജനം പൊറുക്കില്ല. പാര്‍ട്ടിയുടെ നടപടിക്രമങ്ങളില്‍ തര്‍ക്കമുണ്ടാക്കില്ലെന്നും സതീശന്‍.

🔹തകര്‍ന്നടിഞ്ഞ് കേരള കോണ്‍ഗ്രസ് മാണി ഗ്രൂപ്പ്. കെ.എം. മാണി അര നൂറ്റാണ്ടോളം നിലനിര്‍ത്തിയ പാലാ നിയോജക മണ്ഡലത്തില്‍ അദ്ദേഹത്തിന്റെ മകനും എല്‍ഡിഎഫ് സ്ഥാനാര്‍ത്ഥിയുമായ ജോസ് കെ. മാണിയെ യുഡിഎഫ് സ്ഥാനാര്‍ത്ഥി മാണി സി. കാപ്പന്‍ 2991 വോട്ടുകളുടെ ഭൂരിപക്ഷത്തിനു തോല്‍പിച്ചു. കേരള കോണ്‍ഗ്രസ് മല്‍സരിച്ച 12 മണ്ഡലങ്ങളിലും തോറ്റു.

🔹മൂന്ന് താമരകള്‍ വിരിയിച്ച് കേരളത്തില്‍ ബിജെപി മുന്നേറ്റം. മൂന്നും എല്‍ഡിഎഫ് മണ്ഡലങ്ങളിലാണ്. നേമത്ത് അക്കൗണ്ട് വീണ്ടും തുറന്നതിന് പുറമെ കഴക്കൂട്ടത്തും ചാത്തന്നൂരും വിരിഞ്ഞത് അത്ഭുത താമര. ആറിടങ്ങളില്‍ ബിജെപി രണ്ടാമതെത്തി. നേമത്ത് മന്ത്രി ശിവന്‍കുട്ടിയെ തോല്‍പ്പിച്ച് സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. കഴക്കൂട്ടത്ത് കടകംപള്ളിയെ വീഴ്ത്തി മുന്‍ കേന്ദ്രമന്ത്രി വി.മുരളീധരന്‍. ചാത്തന്നൂരില്‍ ബി.ബി.ഗോപകുമാര്‍ എന്നിവരാണു ജയിച്ചത്.

🔹ഏറ്റവും മികച്ച വിജയവുമായി മുസ്ലിം ലീഗ്. 27 സീറ്റുകളില്‍ മത്സരിച്ച് 22 ഇടങ്ങളില്‍ ജയിച്ചു കയറിയ മുസ്ലിം ലീഗ് ഒരിക്കല്‍ കൂടി ശക്തി തെളിയിച്ചു. രണ്ടു സീറ്റുകളില്‍ ചുണ്ടിനും കപ്പിനുമിടയിലാണ് വിജയം നഷ്ടമായത്. രണ്ടു വനിതകളെ സ്ഥാനാര്‍ത്ഥികളാക്കിയതില്‍ ഒരാള്‍ ജയിച്ചു. മുസ്ലിംലീഗിന് അഭിമാനം.

🔹സിപിഎമ്മില്‍നിന്നു പുറത്തുവന്ന് യുഡിഎഫ് സ്ഥാനാര്‍ത്ഥികളായ മൂന്നു പേര്‍ ഗംഭീര വിജയം കാഴ്ചവച്ചു. ജി. സുധാകരന്‍, ടി.കെ. ഗോവിന്ദന്‍, വി. കുഞ്ഞികൃഷ്ണന്‍ എന്നിവരാണ് വിജയിച്ചത്. സിപിഎം വിട്ട് യുഡിഎഫ് സ്ഥാനാര്‍ത്ഥിയായ പി.കെ. ശശി തോറ്റു.

🔹കേരളത്തില്‍ എന്‍ഡിഎ യുടെ മുഖ്യസഖ്യകക്ഷിയായ ട്വന്റി-20 യുടെ പൊടിപോലും കാണാനില്ല. ബിജെപിക്ക് ശക്തമായ വോട്ടുള്ള പല മണ്ഡലത്തിലും ട്വന്റി20 സ്ഥാനാര്‍ത്ഥികള്‍ക്ക് 2021 ല്‍ ലഭിച്ച വോട്ടു പോലും നേടാനായില്ല. ബിജെപി പ്രധാന മണ്ഡലങ്ങളടക്കം ഇക്കുറി ട്വന്റി-20ക്കു വിട്ടു നല്‍കിയെങ്കിലും ബിജെപി വോട്ടുകളില്‍ ചോര്‍ച്ചയുണ്ടായെന്നാണ് വിലയിരുത്തല്‍.

🔹കേരള നിയമസഭയിലേക്കു 11 വനിതാ എംഎല്‍എമാര്‍. യുഡിഎഫിലെ ഒന്‍പത് പേരും എല്‍ഡിഎഫിലെ രണ്ടും പേരുമാണ് വിജയിച്ചത്. മുസ്ലിം ലീഗിന്റെ ആദ്യ വനിതാ എംഎല്‍എയായി ഫാത്തിമ തഹ്ലിയ വിജയിച്ചപ്പോള്‍, മന്ത്രി എ കെ ശശീന്ദ്രനെ പരാജയപ്പെടുത്തിയാണ് കോണ്‍ഗ്രസിന്റെ വിദ്യ ബാലകൃഷ്ണന്‍ വിജയിച്ചത്. കെ.കെ. രമ, ഉമ തോമസ്, കെ.എ. തുളസി, ബിന്ദു കൃഷ്ണ, ഷാനിമോള്‍ ഉസ്മാന്‍, രമ്യ ഹരിദാസ്, ഉഷ വിജയന്‍ എന്നിവര്‍ യുഡിഎഫില്‍നിന്നും ഒ.എസ്. അംബിക, ഗീത ഗോപി എന്നിവര്‍ എല്‍ഡിഎഫില്‍നിന്നും നിയമസഭയിലെത്തി. 2021 ല്‍ ഇടതു മുന്നണിയില്‍ നിന്ന് പത്തും യുഡിഎഫില്‍ നിന്ന് ഒരാളും അടക്കം 11 വനിതകളാണുണ്ടായിരുന്നത്.

🔹ചെങ്കോട്ടയായ ധര്‍മ്മടം നിയോജക മണ്ഡലത്തില്‍ സിപിഎം സ്ഥാനാര്‍ഥി പിണറായി വിജയന് 19,247 വോട്ടുകളുടെ ഭൂരിപക്ഷത്തോടെ വിജയം. പിണറായി വിജയന്‍ 84,504 വോട്ടുകള്‍ നേടി. കോണ്‍ഗ്രസിന്റെ അഡ്വ വി പി അബ്ദുള്‍ റഷീദ് 66,067 വോട്ടുകള്‍ നേടിയപ്പോള്‍ ബിജെപിയുടെ കെ രജ്ഞിത് 18,383 വോട്ടുകളും സ്വന്തമാക്കി. ആദ്യ ആറു റൗണ്ടുകളില്‍ പിണറായി വിജയന്‍ പിറകിലായിരുന്നു.

🔹മണലൂര്‍ നിയോജക മണ്ഡലത്തിലെ 160 തപാല്‍ വോട്ടുകള്‍ അസാധുവാക്കിയതിനെതിരേയും റീ കൗണ്ടിങ് ആവശ്യപ്പെട്ടും യുഡിഎഫ് ഹൈക്കോടതിയില്‍ ഹര്‍ജി നല്‍കും. 126 വോട്ടിനു തോറ്റ യുഡിഎഫ് സ്ഥാനാര്‍ത്ഥി ടി.എന്‍ പ്രതാപന്റെ ചീഫ് ഇലക്ഷന്‍ ഏജന്റ് സി.സി. ശ്രീകുമാറാണ് ഇക്കാര്യം വ്യക്തമാക്കിയത്.

🔹തോറ്റ എല്‍ഡിഎഫ് പ്രമുഖര്‍: മുഖ്യമന്ത്രി അടക്കം മത്സരിച്ച 20 മന്ത്രിമാരില്‍ 13 പേരും തോറ്റു. പത്തനാപുരത്ത് കാല്‍നൂറ്റാണ്ട് ജനപ്രതിനിധിയായിരുന്ന കെബി ഗണേഷ്‌കുമാറിനെ ജനം കൈവിട്ടു. മന്ത്രിമാരായ എം.ബി. രാജേഷ്, പി. രാജീവ്, വീണ ജോര്‍ജ്, വി.എന്‍. വാസവന്‍, റോഷി അഗസ്റ്റിന്‍, ഡോ. ആര്‍. ബിന്ദു, വി. ശിവന്‍കുട്ടി, വി. അബ്ദുറഹ്‌മാന്‍, ജെ. ചിഞ്ചുറാണി, എ.കെ. ശശീന്ദ്രന്‍, കടന്നപ്പള്ളി രാമചന്ദ്രന്‍, എല്‍ഡിഎഫ് കണ്‍വീനര്‍ ടി.പി. രാമകൃഷ്ണന്‍, മുന്‍ മന്ത്രിമാരായ കെ.കെ. ശൈലജ, കെ.ടി. ജലീല്‍, മാത്യു ടി. തോമസ്, ജോസ് കെ. മാണി, കടകംപള്ളി സുരേന്ദ്രന്‍, സിപിഎം സംസ്ഥാന സെക്രട്ടറി എം.വി. ഗോവിന്ദന്റെ പത്നി പി.കെ. ശ്യാമള.

🔹തോറ്റ യുഡിഎഫ് പ്രമുഖര്‍: ടി.എന്‍. പ്രതാപന്‍, വി.എസ്. ശിവകുമാര്‍.

🔹യുഡിഎഫിലെ വിജയിച്ചവരും ഭൂരിപക്ഷവും: പറവൂര്‍ വി.ഡി. സതീശന്‍ 20600. ഹരിപ്പാട് രമേശ് ചെന്നിത്തല 23377. മലപ്പുറം പി.കെ. കുഞ്ഞാലിക്കുട്ടി 85327. പേരാവൂര്‍ കെപിസിസി പ്രസിഡന്റ് സണ്ണി ജോസഫ് 14453. വട്ടിയൂര്‍ക്കാവ് കെ. മുരളീധരന്‍ 2796. തൃശൂര്‍ രാജന്‍ ജെ. പല്ലന്‍ 26,803. കല്‍പ്പറ്റ ടി. സിദ്ദിക്ക്- 45,000. നിലമ്പൂര്‍ ആര്യാടന്‍ ഷൗക്കത്ത്- 54,851. ഉടുമ്പന്‍ചോല സേനാപതി വേണു- 20,021. തിരുവമ്പാടി സി.കെ. കാസിം – 6,741. കൊല്ലം ബിന്ദു കൃഷ്ണ -16,830. കൊടുങ്ങല്ലൂര്‍ അഡ്വ. ഒ.ജെ.ജനീഷ്- 8,308. പീരുമേട് സിറിയക് തോമസ്- 27,634. പെരുമ്പാവൂര്‍ മനോജ് മൂത്തേടന്‍- 28434. നെയ്യാറ്റിന്‍കര എന്‍. ശക്തന്‍ 6966. പാലക്കാട് രമേഷ് പിഷാരടി 12,000. മുവാറ്റുപുഴ മാത്യു കുഴല്‍നാടന്‍. തൃക്കാക്കര ഉമ തോമസ് 50200, കാഞ്ഞിരപ്പിള്ളി റോണി കെ. ബേബി 5772. ഇരിങ്ങാലക്കുട തോമസ് ഉണ്ണിയാടാന്‍ 10212. എലത്തൂര്‍ അഡ്വ. വിദ്യ ബാലകൃഷ്ണന്‍ 12162. മഞ്ചേരി എം. റഹ്‌മത്തുള്ള 57887. മണ്ണാര്‍ക്കാട് എന്‍. ഷംസുദ്ദീന്‍ 25903. കോഴിക്കോട് നോര്‍ത്ത് അഡ്വ. കെ. ജയന്ത് 1483. ആലുവ അന്‍വര്‍ സാദത്ത് 29143. കോവളം എം വിന്‍സെന്റ് 32709. ഏറനാട് പി.കെ. ബഷീര്‍ 41289. കുന്നത്തുനാട് വി.പി. സജീന്ദ്രന്‍ 21283. കോഴിക്കോട് സൗത്ത് ഫൈസല്‍ ബാബു 52680. തൃപ്പുണിത്തുറ ദീപക് ജോയ് 18468. പൊന്നാനി കെ.പി. നൗഷാദലി 13267. ആറന്മുള അബിന്‍ വര്‍ക്കി 18985. ബാലുശേരി വി.ടി. സൂരജ് 16980. അങ്കമാലി റോജി എം ജോണ്‍ 37008. വേങ്ങര കെ.എം. ഷാജി 30325. തിരുവല്ല വര്‍ഗീസ് മാമ്മന്‍ 11000. കാട്ടാക്കട എം.ആര്‍. ബൈജു 7136. കൊച്ചി മുഹമ്മദ് ഷിയാസ് 8188. തവന്നൂര്‍ വി.എസ്. ജോയ് 14647. കുണ്ടറ പി.സി. വിഷ്ണുനാഥ് 32564. ആലപ്പുഴ എ.ഡി. തോമസ് 81065. വണ്ടൂര്‍ എ.പി. അനില്‍കുമാര്‍ 47939. പെരിന്തല്‍മണ്ണ നജീബ് കാന്തപുരം 32431. ചിറ്റൂര്‍ സുമേഷ് അച്യുതന്‍ 6510. വാമനപുരം സുധീര്‍ഷാ പാലോട് 12185. കോട്ടക്കല്‍ ആബിദ് ഹുസൈന്‍ തങ്ങള്‍ 51781. കൊയിലാണ്ടി കെ. പ്രവീണ്‍കുമാര്‍ 12070. കളമശേരി വി.ഇ. അബ്ദുള്‍ ഗഫൂര്‍ 16312. കുട്ടനാട് റെജി ചെറിയാന്‍ 56594. കണ്ണൂര്‍ ടി.ഒ. മോഹനന്‍ 18551. ചിറയന്‍കീഴ് രമ്യ ഹരിദാസ് 1422. ചടയമംഗലം എം.എം. നസീര്‍ 7486. തിരൂര്‍ കുറുക്കോളി മൊയ്തീന്‍ 24137. വള്ളിക്കുന്ന് ടി.വി. ഇബ്രാഹിം 51289. അമ്പലപ്പുഴ ജി. സുധാകരന്‍ 27935. തളിപ്പറമ്പ് ടി.കെ. ഗോവിന്ദന്‍ 12551, പയ്യന്നൂര്‍ വി. കുഞ്ഞികൃഷ്ണന്‍ 7487, കൊണ്ടോട്ടി ടി.പി. അഷറഫലി 56017. താനൂര്‍ പി.കെ. നവാസ് 27131. അടൂര്‍ സിവി. ശാന്തകുമാര്‍ 10332. റാന്നി പഴകുളം മധു 54652. ദേവികുളം എഫ്. രാജ 5233. ചാലക്കുടി സനീഷ്‌കുമാര്‍ ജോസഫ് 23156. തിരുവനന്തപുരം സെന്‍ട്രല്‍ സി.പി. ജോണ്‍. മാനന്തവാടി ഉഷ വിജയന്‍, തൃക്കരിപ്പൂര്‍ സന്ദീപ് വാര്യര്‍ 4431. നാദാപുരം കെ.എം. അബിജിത്ത് 23600. മങ്കട മഞ്ഞളാംകുഴി അലി 45609. ഇരിക്കൂര്‍ സജീവ് ജോസഫ് 42426. പത്തനാപുരം ജ്യോതികുമാര്‍ ചാമക്കാല 8310. തൊടുപുഴ അപു ജോണ്‍ ജോസഫ് 44291. തിരൂരങ്ങാടി പിഎംഎ സമീര്‍. കായംകുളം എം. ലിജു. മഞ്ചേശ്വരം എകെഎം അഷറഫ് 29252, കാസര്‍കോട് കല്ലട മാഹിന്‍ 22698, ഉദുമ കെ. നീലകണ്ഠന്‍ 4847, വടകര കെ.കെ. രമ 14862. (പട്ടിക പൂര്‍ണമല്ല)

🔹എല്‍ഡിഎഫിലെ വിജയിച്ചവരും ഭൂരിപക്ഷവും: ധര്‍മടം പിണറായി വിജയന്‍ 19247, മന്ത്രിമാരായിരുന്ന ബേപ്പൂര്‍ മുഹമ്മദ് റിയാസ് 7487, ചെങ്ങന്നൂര്‍ സജി ചെറിയാന്‍ 10,292, കൊട്ടാരക്കര കെ.എന്‍. ബാലഗോപാല്‍ 1012, ചേര്‍ത്തല പി. പ്രസാദ് 14489. നെടുമങ്ങാട് ജി.ആര്‍. അനില്‍ 21583. ഒല്ലൂര്‍ കെ. രാജന്‍ 8,884 എന്നിവര്‍ ജയിച്ചു. കല്യാശേരി എം. വിജിന്‍- ഭൂരിപക്ഷം 18,433. ഒറ്റപ്പാലം കെ. പ്രേംകുമാര്‍ -26,910. ചേലക്കര യു.ആര്‍. പ്രദീപ് 29386. ഷൊര്‍ണൂര്‍ പി. മമ്മിക്കുട്ടി 16,517. മാവേലിക്കര എം.എസ്. അരുണ്‍കുമാര്‍ 62342. പുനലൂര്‍ സി. അജയപ്രസാദ് 21529. കൈപ്പമംഗലം കെ കെ വത്സരാജ് 9944. നാട്ടിക ഗീതാ ഗോപി 7093. വടക്കാഞ്ചേരി സേവ്യര്‍ ചിറ്റിലപ്പിള്ളി 5690. അരുവിക്കര അഡ്വ. ജി. സ്റ്റീഫന്‍ 2843. ഗുരുവായൂര്‍ എന്‍.കെ. അക്ബര്‍ 1998. കോന്നി കെ.യു. ജനീഷ്‌കുമാര്‍ 1838. അഴീക്കോട് കെ.വി. സുമേഷ് 349. മട്ടന്നൂര്‍ വി.കെ. സനോജ് 14168. മണലൂര്‍ പ്രഫ. സി. രവീന്ദ്രനാഥ് 126. പുതുക്കാട് കെ.കെ. രാമചന്ദ്രന്‍ 2853. കുന്നംകുളം എ.സി. മൊയ്തീന്‍ 4563. പാറശാല സി.കെ. ഹരീന്ദ്രന്‍ 15013. ആറ്റിങ്ങല്‍ ഒ.എസ്. അംബിക 13375. കാഞ്ഞങ്ങാട് ഗോവിന്ദന്‍ പള്ളിക്കാപ്പില്‍ 15316, തലശേരി കാരായി രാജന്‍ 20523 ( പട്ടിക പൂര്‍ണമല്ല)

🔹എന്‍ഡിഎ (ബിജെപി): നേമം രാജീവ് ചന്ദ്രശേഖര്‍ 4978. ചാത്തന്നൂര്‍ ബി.ബി. ഗോപകുമാര്‍ 3334. കഴക്കൂട്ടം വി. മുരളീധരന്‍ 428.

🔹കൈക്കൂലി കേസില്‍ കെഎസ്ഇബി കുറ്റിപ്പുറം സെക്ഷന്‍ ഓഫിസിലെ മുന്‍ ഓവര്‍സിയര്‍ നെയ്യാറ്റിന്‍കര സ്വദേശിയുമായ മൈക്കിള്‍ പിള്ളയെ (60) വിജിലന്‍സ് കോടതി മൂന്നു വര്‍ഷം കഠിന തടവിനും 10,000 രൂപ പിഴ ഒടുക്കാനും ശിക്ഷിച്ചു. കുറ്റിപ്പുറം സ്വദേശിയുടെ വീട് പുതുക്കിപ്പണിയാന്‍ ഉപയോഗിച്ച വൈദ്യുതിക്ക് ഉയര്‍ന്ന നിരക്കിലുള്ള ചാര്‍ജ് ഈടാക്കാതിരിക്കാന്‍ 700 രൂപ കൈക്കൂലി വാങ്ങിയെന്നാണ് കേസ്.

🔹പത്തനംതിട്ട: വാഹനാപകടത്തിൽ നടൻ സന്തോഷ് കെ.നായർ വിടവാങ്ങി. രാവിലെ ആറരയോടെ അടൂർ ഏനാത്ത് എംസി റോഡിൽ ആണ് സംഭവം.
സന്തോഷും ഭാര്യ രാജലക്ഷ്മിയും സഞ്ചരിച്ച ഇന്നോവ കാർ നിയന്ത്രണം തെറ്റി എതിരെ വന്ന പാഴ്സൽ ലോറിയിൽ ഇടിച്ചാണ് അപകടമെന്ന് പോലീസ് അറിയിച്ചു. ഉടനെ അടൂരിലെ താലൂക്ക് ആശുപത്രിയിലെത്തിച്ചെങ്കിലും പിന്നീട് മരിച്ചു.രാജലക്ഷ്മിയുടെ പരിക്ക് ഗുരുതരമല്ലെന്നാണ് വിവരം. വാഹനമോടിച്ച സന്തോഷ് ഉറങ്ങിപ്പോയതാകാം അപകടത്തിന് കാരണമെന്നാണ് പ്രാഥമിക നിഗമനം. നൂറിലേറെ സിനിമകളിൽ അഭിനയിച്ചിട്ടുണ്ട്. ഹിറ്റായി ഇപ്പോൾ തിയേറ്ററിൽ പ്രദർശിപ്പിച്ചുകൊണ്ടിരിക്കുന്ന മോഹിനിയാട്ടമാണ് അവസാന സിനിമ.

🔹അനുമതിയില്ലാതെ ലോട്ടറി വില്‍പനയെക്കുറിച്ച് ലേഖനമെഴുതിയതിന് എന്‍. പ്രശാന്ത് ഐഎഎസിിന് വീണ്ടും സസ്‌പെന്‍ഷന്‍. സര്‍ക്കാരിനെതിരേ വിമര്‍ശിക്കുകയും മാധ്യമങ്ങളില്‍ പ്രതികരിക്കുകയും ചെയ്തതിനു ലഭിച്ച ഒമ്പതാമത്തെ സസ്‌പെന്‍ഷനാണിത്.

🔹കേരളമടക്കമുള്ള അഞ്ചു സംസ്ഥാനങ്ങളിലെ നിയമസഭാ തെരഞ്ഞെടുപ്പ് ഫലം പുറത്തുവന്നതിനു പിറകേ ജനങ്ങള്‍ക്ക് നന്ദി പറഞ്ഞ് പ്രധാനമന്ത്രി നരേന്ദ്ര മോദി. ഇതു ചരിത്ര ദിനമെന്നും വര്‍ഷങ്ങളായി നീണ്ട സാധനയിലൂടെ ലഭിച്ച സിദ്ധിയെന്നും നരേന്ദ്ര മോദി പറഞ്ഞു. ബംഗാള്‍, ആസാം, കേരളം, പുതുച്ചേരി, തമിഴ്നാട് സംസ്ഥാനങ്ങളിലെ ജനങ്ങളെ നമിക്കുന്നുവെന്നും മോദി പറഞ്ഞു.

🔹തമിഴ്നാട്ടില്‍ വിജയ് തരംഗം. ബംഗാളില്‍ മമതയെ അട്ടിമറിച്ച് ബിജെപി ഭരണം പിടിച്ചു. ആസാമിലും പുതുച്ചേരിയിലും ബിജെപിക്കു ഭരണത്തുടര്‍ച്ച.

🔹തമിഴ്നാട്ടിലെ 234 സീറ്റുകളില്‍ വിജയിന്റെ തമിഴക വെട്രി കഴകം 107 സീറ്റുകള്‍ നേടി ഏറ്റവും വലിയ ഒറ്റകക്ഷിയായി. മുഖ്യമന്ത്രി എം.കെ. സ്റ്റാലിന്‍ കൊളത്തൂരില്‍ തോറ്റു. വിജയ് മല്‍സരിച്ച രണ്ടിടത്തും ജയിച്ചു. ഡിഎംകെ നയിച്ച കോണ്‍ഗ്രസ് ഉള്‍പെട്ട സഖ്യത്തിന് 73 സീറ്റ്. എഐഎഡിഎംകെ ഉള്‍പെട്ട എന്‍ഡിഎയ്ക്ക് 47 സീറ്റ്. മന്ത്രിസഭയുണ്ടാക്കാന്‍ വിജയ് നീക്കങ്ങള്‍ ആരംഭിച്ചു.

🔹തമിഴ്നാട് മുഖ്യമന്ത്രി എം കെ സ്റ്റാലിന്‍ കൊളത്തൂര്‍ മണ്ഡലത്തില്‍ അപ്രതീക്ഷിതമായി പരാജയപ്പെട്ടു. നടന്‍ വിജയ്യുടെ പാര്‍ട്ടിയായ തമിഴക വെട്രി കഴകത്തിന്റെ സ്ഥാനാര്‍ത്ഥിയും സ്റ്റാലിന്റെ മുന്‍ വിശ്വസ്തനുമായ വി എസ് ബാബുവാണ് അട്ടിമറി വിജയം നേടിയത്.

🔹പുതുച്ചേരിയിലെ 30 അംഗ നിയമസഭയില്‍ 16 സീറ്റുമായി എന്‍ഡിഎ ഭരണമുറപ്പിച്ചു. എന്‍ഡിഎയിലെ മുഖ്യകക്ഷിയായ ഓള്‍ ഇന്ത്യ എന്‍ആര്‍ കോണ്‍ഗ്രസ് 12 സീറ്റും ബിജെപി നാലു സീറ്റും നേടി. ഡിഎംകെ- 5, ടിവികെ – 2, കോണ്‍ഗ്രസ് -1, എഐഎഡിഎംകെ -1, മറ്റുള്ളവര്‍ -5.

🔹ബംഗാളിലെ 294 സീറ്റുകളില്‍ 207 സീറ്റുകള്‍ സ്വന്തമാക്കി ബിജെപി അട്ടിമറി വിജയം നേടി. ഭരണകക്ഷിയായിരുന്ന തൃണമൂല്‍ കോണ്‍ഗ്രസ് 80 സീറ്റുകളിലേക്ക് ഒതുങ്ങി. മുഖ്യമന്ത്രിയായിരുന്ന മമത ബാനര്‍ജി ഭവാനിപൂരില്‍ പതിനയ്യായിരം വോട്ടിനു തോറ്റു. കോണ്‍ഗ്രസിന് രണ്ടുപേരേയും സിപിഎമ്മിന് ഒരാളേയുമാണു ബംഗാളില്‍ ജയിപ്പിക്കാനായത്.

🔹ആസാമിലെ 126 മണ്ഡലങ്ങളില്‍ ബിജെപി 82 സീറ്റുകളുമായി ഭരണം നിലനിര്‍ത്തി. കോണ്‍ഗ്രസിനു നേടാനായത് 19 സീറ്റു മാത്രം. ബോഡോലാന്‍ഡ് പീപ്പിള്‍സ് ഫ്രണ്ടും ആസാം ഗണ പരിഷത്തും പത്തു വീതം സീറ്റുകള്‍ നേടി.

🔹ഹോര്‍മുസ് കടലിടുക്കില്‍ യുദ്ധഭീതി. ആക്രമണം തുടര്‍ന്ന് ഇറാന്‍. യുഎഇയില്‍ ഇന്നു മുതല്‍ വെള്ളിയാഴ്ച്ച വരെ സ്‌കൂള്‍ പഠനം ഓണ്‍ലൈനായി.

🔹വാട്സാപ്പിനും ടെലഗ്രാമിനും ബദലായി എക്സ് ചാറ്റ് എന്ന പുതിയ ആപ്പ് അവതരിപ്പിച്ച് എലോണ്‍ മസ്‌ക്. നിലവില്‍ ഐഫോണ്‍, ഐപാഡ് തുടങ്ങിയ ഉപയോക്താക്കള്‍ക്ക് ഈ സേവനം ലഭ്യമാണ്. എന്‍ഡ്-ടു-എന്‍ഡ് -എന്‍ക്രിപ്ഷനിലൂടെ സന്ദേശങ്ങള്‍ക്ക് പൂര്‍ണ സുരക്ഷ ഉറപ്പാക്കുന്നു. പരസ്യങ്ങളുമില്ല. സ്വകാര്യത ട്രാക്ക് ചെയ്യാന്‍ കഴിയില്ല. നിലവിലുള്ള എക്സ്(പഴയ ട്വിറ്റര്‍) അക്കൗണ്ട് ഉപയോഗിച്ച് നേരിട്ട് ലോഗിന്‍ ചെയ്യാം. ചാറ്റുകളുടെ സ്‌ക്രീന്‍ഷോട്ട് എടുക്കുന്നത് തടയാനുള്ള ഫീച്ചറും ഇതിലുണ്ട്. വാട്‌സാപ്പിന്റെ സുരക്ഷാ പ്രശ്നങ്ങളുമായി ബന്ധപ്പെട്ട് യുഎസില്‍ കേസ് നിലനില്‍ക്കുന്ന സാഹചര്യത്തിലാണ് എക്‌സ് ചാറ്റിന്റെ വരവ്. അയച്ച സന്ദേശങ്ങള്‍ എഡിറ്റ് ചെയ്യാനും എല്ലാവര്‍ക്കുമായി ഡിലീറ്റ് ചെയ്യാനും എക്‌സ് ചാറ്റില്‍ കഴിയും. നിശ്ചിത സമയത്തിന് ശേഷം സന്ദേശങ്ങള്‍ താനേ ഇല്ലാതാകുന്ന ഫീച്ചറുമുണ്ട്. വലിയ ഫയലുകള്‍, ഫോട്ടോകള്‍, വീഡിയോകള്‍ എന്നിവ വേഗത്തില്‍ കൈമാറാം. സുരക്ഷിതമായ ഗ്രൂപ്പ് സംഭാഷണങ്ങള്‍ക്കും ഇതില്‍ സൗകര്യമുണ്ട്.

🔹ഐപിഎലില്‍ ലക്നോ സൂപ്പര്‍ ജയന്റ്സിനെതിരേ മുംബൈ ഇന്ത്യന്‍സിന് ആറു വിക്കറ്റിന്റെ തകര്‍പ്പന്‍ വിജയം. 229 റണ്‍ വിജയലക്ഷ്യവുമായി ഇറങ്ങിയ മുംബൈ18.4 ഓവറില്‍ ജയിച്ചു. ടോസ് നേടി ആദ്യം ബാറ്റു ചെയ്ത ലക്നോ അഞ്ചു വിക്കറ്റ് നഷ്ടത്തില്‍ 228 റണ്‍സ് അടിച്ചു. 83 റണ്‍സ് നേടിയ റ്യാന്‍ റിക്കിള്‍ട്ടണും 84 റണ്‍സ് നേടിയ രോഹിത് ശര്‍മയുമാണ് മുംബൈക്കു വിജയമൊരുക്കിയത്.

🔹സംഗീത സംവിധായകന്‍ അലക്സ് പോളിന്റെ മകള്‍ അശ്വതി അലക്സ് സംവിധാന രംഗത്തേക്ക് അരങ്ങേറ്റം കുറിക്കുന്ന സിനിമയാണ് ‘ലൗ ആന്‍ഡ് യു’. അശ്വതി തന്നെയാണ് ചിത്രത്തിന് തിരക്കഥയൊരുക്കിയിരിക്കുന്നതും. പുതുമുഖങ്ങളായ ജോണ്‍ ജോയ്, അനന്യ നായര്‍ എന്നിവരാണ് ചിത്രത്തില്‍ പ്രധാന വേഷങ്ങളിലെത്തുന്നത്. ആര്‍ച്ച, അയന ആന്റണി, ജിജോ ജോര്‍ജ്ജ്, ശിവാഞ്ജന, സുമേഷ് ഭാസ്‌കര്‍, അഭിരാമി അശോക് തുടങ്ങിയവരാണ് മറ്റു കഥാപാത്രങ്ങളെ അവതരിപ്പിക്കുന്നത്. അലക്സ് പോള്‍ ക്രിയേഷന്‍ പ്രൈവറ്റ് ലിമിറ്റഡിന്റെ ബാനറില്‍ നിര്‍മിക്കുന്ന ഈ ചിത്രത്തിന്റെ ഛായാഗ്രഹണം ഉല്ലാസ് റെഡ്ബി നിര്‍വ്വഹിക്കുന്നു. ഏഴ് മനോഹര ഗാനങ്ങളുള്ള ഈ ചിത്രത്തിലെ സംഗീത സംവിധാനം അലക്സ് പോള്‍ നിര്‍വ്വഹിക്കുന്നു. ഒരു യാത്രയും അതില്‍ ഒപ്പമുള്ളവരുടെ പ്രണയവും സൗഹൃദവും സമന്വയിപ്പിക്കുന്ന ഒരു ഫീല്‍ ഗുഡ് മ്യൂസിക്കല്‍ ഫാമിലി ചിത്രമാണ് ‘ലൗ ആന്‍ഡ് യു.

🔹സമീപകാലത്ത് പ്രേക്ഷകശ്രദ്ധ നേടിയ ചിത്രം ‘മോഹിനിയാട്ടം’ ഒടിടിയിലേക്ക്. 2024 ല്‍ തിയറ്ററുകളിലെത്തിയ ഭരതനാട്യത്തിന്റെ രണ്ടാം ഭാഗം ആയാണ് മോഹിനിയാട്ടം എത്തിയത്. ഏപ്രില്‍ 10 ന് തിയറ്ററുകളില്‍ എത്തിയ ചിത്രം നെറ്റ്ഫ്ലിക്സിലൂടെ മെയ് 8 ന് സ്ട്രീമിംഗ് ആരംഭിക്കും. ഭരതനാട്യം കോമഡി ഡ്രാമ ചിത്രമായിരുന്നുവെങ്കില്‍ സീക്വല്‍ ആയ മോഹിനിയാട്ടം ഡാര്‍ക് കോമഡി ത്രില്ലര്‍ ഗണത്തില്‍ പെട്ട ചിത്രമാണ്. ഭരതനാട്യം സംവിധാനം ചെയ്ത കൃഷ്ണദാസ് മുരളി തന്നെയാണ് മോഹിനിയാട്ടവും ഒരുക്കിയിരിക്കുന്നത്. ചിത്രത്തിന്റെ രചനയും സംവിധാനവും കൃഷ്ണദാസ് മുരളിയാണ്. സൈജു കുറുപ്പ്, സുരാജ് വെഞ്ഞാറമൂട്, ജഗദീഷ്, വിനയ് ഫോര്‍ട്ട്, ബേബി ജീന്‍, കലാരഞ്ജിനി, ശ്രീജ രവി, അഭിറാം രാധാകൃഷ്ണന്‍, സ്വാതി ദാസ് പ്രഭു, ദിവ്യ നായര്‍, ശ്രുതി സുരേഷ്, നന്ദു പൊതുവാള്‍, ജിനില്‍, ജിവിന്‍, സന്തോഷ് ഗുരുവായൂര്‍, നിസ്താര്‍ സേട്ട് എന്നിവരാണ് പ്രധാന താരങ്ങള്‍.

💦 ഗുരുജിയുടെ വാക്കുകൾ

സൗഹൃദത്തിന്റെ അറ്റത്ത് നിൽക്കുക എന്ന് വെച്ചാൽ, അവിടെ ‘ഞാൻ’ എന്നോ ‘നീ’ എന്നോ ഉള്ള വേർതിരിവുകൾ ഇല്ലാതാകുന്നു എന്നാണ് അർത്ഥം. അവിടെ വാക്കുകളേക്കാൾ കൂടുതൽ നിശബ്ദതകൾ സംസാരിക്കും. ഒരാളുടെ നോട്ടം കണ്ടാൽ മറ്റേയാൾക്ക് മനസ്സിലാകുന്ന ആത്മബന്ധം. പലപ്പോഴും പ്രണയത്തിന് നൽകാൻ കഴിയാത്ത സമാധാനവും സ്വസ്ഥതയും നൽകുന്നത് ഇത്തരം കൂട്ടിരിക്കലുകളാണ്. ലോകം എന്ത് പറഞ്ഞാലും, എന്ത് പേരിട്ടു വിളിച്ചാലും മാറ്റമില്ലാതെ തുടരുന്ന ആ ഒഴുക്ക് പ്രണയത്തെപ്പോലും അതിശയിപ്പിക്കുന്നതാണ്. ഏറ്റവും മനോഹരമായ ഈ ബന്ധത്തിൽ പ്രണയം തോറ്റു പോകുന്നത് എന്തുകൊണ്ടെന്നാൽ, പ്രണയത്തിന് നഷ്ടപ്പെടാൻ ഭയമാണ്. എന്നാൽ യഥാർത്ഥ സൗഹൃദത്തിന് ആ ഭയമില്ല. കാലം മാറുമ്പോഴോ ദൂരം കൂടുമ്പോഴോ കുറഞ്ഞു പോകാത്ത സ്നേഹമാണത്. പകുത്തു നൽകുന്ന ഭക്ഷണത്തിലും, പാതിയിൽ നിർത്തിയ സംസാരത്തിലും, കരുതലിന്റെ ആ നോട്ടത്തിലും ഒരു പ്രണയത്തേക്കാൾ നൂറിരട്ടി ആഴമുണ്ട്. വിട്ടുകൊടുക്കാനും ചേർത്തുപിടിക്കാനും പഠിപ്പിക്കുന്ന ഈ ബന്ധമാണ് ഭൂമിയിലെ ഏറ്റവും വിശുദ്ധമായ ഇടം. ജീവിതത്തിന്റെ തിരക്കുകൾക്കിടയിൽ ആത്മാർത്ഥമായ ഒരു വാക്കിനോ നോക്കിനോ കൊതിക്കുന്നവർ നമ്മളിലുണ്ട്. പ്രണയത്തിന്റെ വേലിക്കെട്ടുകളില്ലാതെ, പരസ്പരം താങ്ങായി നിൽക്കുന്ന സൗഹൃദങ്ങൾ എന്നും ഒരു അത്ഭുതമാണ്. ”പ്രണയം അവസാനിക്കുന്നിടത്ത് സൗഹൃദം തുടങ്ങുന്നു എന്നല്ല, മറിച്ച് പ്രണയത്തിന് എത്താൻ കഴിയാത്ത ഉയരങ്ങളിൽ സൗഹൃദം വേരൂന്നി നിൽക്കുന്നു എന്നതാണ് സത്യം.”

തയ്യാറാക്കിയത്: കപിൽ ശങ്കർ

11 Likes

📱വാർത്തകൾ ഒറ്റനോട്ടത്തിൽ📱 – 2026 | മെയ് 05 | ചൊവ്വ ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

അന്നോണം – ഇന്നോണം (ലേഖനം) ✍ സുമ പള്ളിപ്രം

തിരുവോണം (കവിത) ✍ പി . എൻ. വിജയൻ.

തെക്കൻകാറ്റ് (ഓണം കവിത) ✍ബേബി മാത്യു അടിമാലി

1 COMMENT

LEAVE A REPLY Cancel reply

Most Popular

സംസ്ഥാനത്ത് ശക്തമായ മഴയ്ക്ക് സാധ്യത; എട്ട് ജില്ലകളിൽ യെല്ലോ അലർട്ട്

നൂറു ദിന കർമ്മ പരിപാടി: ആയിരം പഠനമുറികൾ യാഥാർത്ഥ്യമാകുന്നു

കള്ളക്കടല്‍ ജാഗ്രത നിര്‍ദേശം പുറപ്പെടുവിച്ചു

‘ഓണം ലഹരിമുക്തവും സമാധാനപരവുമാകാൻ ജാഗ്രത പാലിക്കണം’: ആരോഗ്യ മന്ത്രി കെ മുരളീധരൻ

Recent Comments

EDITOR PICKS

സംസ്ഥാനത്ത് ശക്തമായ മഴയ്ക്ക് സാധ്യത; എട്ട് ജില്ലകളിൽ യെല്ലോ അലർട്ട്

നൂറു ദിന കർമ്മ പരിപാടി: ആയിരം പഠനമുറികൾ യാഥാർത്ഥ്യമാകുന്നു

കള്ളക്കടല്‍ ജാഗ്രത നിര്‍ദേശം പുറപ്പെടുവിച്ചു

POPULAR POSTS

മൊബൈല്‍ ഫോണ്‍ EMI യെച്ചൊല്ലി തര്‍ക്കം: അച്ഛനും മകനും മലയിടുക്കില്‍ വീണ് മരിച്ചു; അമ്മ ജീവനൊടുക്കി.

‘ജാർഖണ്ഡിലെ വിദ്യാർത്ഥി സമരം സർക്കാർ ചർച്ചയിലൂടെ പ്രശ്നം പരിഹരിച്ചതിൽ സന്തോഷം’ ; രാഹുൽ ഗാന്ധി.

വിദ്യാർഥികൾക്കെതിരായ പെല്ലറ്റ് ആക്രമണം; രാഹുൽ ഗാന്ധിയുടെ സമരം വിജയം, FIR രജിസ്റ്റർ ചെയ്യാൻ തീരുമാനം.

POPULAR CATEGORY

ABOUT US

FOLLOW US