🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 14 | ശനി ✍ പ്രൊഫസ്സർ എ.വി. ഇട്ടി മാവേലിക്കര

സത്യാന്വേഷണത്തിലൂടെ
ജീവിതത്തിൻ്റെ അർത്ഥവും പൊരുളും കണ്ടെത്താം
—————————————————————————-

കാലം, മനുഷ്യരുടെ കാഴ്ചപ്പാടുകളെയും, മുൻഗണനകളെയും മാറ്റി മറിക്കും എന്നത്
എല്ലാവരും അംഗീകരിക്കും. ഓരോ പ്രായത്തിനും അതതിൻ്റേതായ ശരികളും തെറ്റുകളുമുണ്ടാകും. അവ തിരുത്താൻ ആരു പറഞ്ഞാലും അവർ തയ്യാറാകണമെന്നില്ല. ശരിയെന്ന് ഉറച്ചു വിശ്വസിച്ച് എടുത്ത തീരുമാനങ്ങളാണു തെറ്റിലേക്കു നയിച്ചത് എന്നു തിരിച്ചറിയുമ്പോഴേക്കും, തിരിച്ചു പോകാനാകാത്തവിധം യാത്ര മുമ്പോട്ടു പോയിട്ടുണ്ടാകും.

വർത്തമാന കാലത്തിലാണ് എല്ലാവരും ജീവിക്കുന്നതും ജീവിക്കേണ്ടതും. ഇന്നലെകളിലോ, നാളെകളിലോ ആർക്കും ജീവിക്കാനാകയില്ല. പക്ഷെ, മുമ്പേ സഞ്ചരിച്ചവരുടെയും, മൺമറഞ്ഞു പോയവരുടെയും, ജീവിത പാഠങ്ങൾ നമുക്കു സ്വാംശീകരിക്കാനാകണം. സ്വന്തം അനുഭവങ്ങളിൽ നിന്നുമാണ് എല്ലാവരും തങ്ങളുടെ ശരികൾക്കു രൂപം നൽകുന്നത്. അനുഭവ കാലയളവുകളുടെ ഏറ്റക്കുറച്ചിലിനനുസരിച്ച് ശരിതെറ്റുകളുടെ വ്യാഖ്യാനത്തിൽ വ്യത്യാസമുണ്ടാകും എന്നു മാത്രമേയുള്ളു.

പണ്ഡിതനായില്ലെങ്കിലും, പ്രായോഗികമായി സത്യവും മിഥ്യയും തമ്മിൽ വേർതിരിച്ചറിയാനെങ്കിലും, ഓരോരുത്തരും പഠിക്കണം. പ്രായവും വളർച്ചയും കൂടുന്നതിനനുസരിച്ച്, ശരികളിലെ തെറ്റും, തെറ്റുകളിലെ ശരിയും, കണ്ടത്താനാകണം. വിശ്വാസങ്ങളിലും പ്രതീക്ഷകളിലും ധാരണകളിലും, തിരുത്തലുകൾ ആവശ്യമെങ്കിൽ, അവ മടികൂടാതെ നടപ്പിലാക്കണം. തുടങ്ങി എന്നതിൻ്റെ പേരിൽ, തുടരേണ്ടതായ ഒരു ശീലമോ, സംപ്രദായമോ ഇല്ല. തിരുത്തേണ്ടതും, തച്ചുടയ്ക്കേണ്ടതും, പു:നർനിർമ്മിക്കേണ്ടതുമുണ്ടാകും. അവ തിരിച്ചറിഞ്ഞ്, തിരത്തൽ വരുത്തി, ഒരാൾ നയിക്കുന്ന ജീവിതമാണ്, ഒരാളെ നന്മയിലേക്കും പൂർണ്ണതയിലേക്കും നയിക്കുക.

എത്ര വേഗം ശരികളിലേക്കും. സത്യങ്ങളിലേക്കും എത്തുന്നുവോ, അത്രയും അർഥപൂർണവും, സമൃദ്ധവുമാകും ജീവിതം. തെറ്റിദ്ധാരണകളിലൂടെയും അപര അനുകരണങ്ങളിലൂടെയുമല്ലാതെ നടത്തുന്ന നിഷ്പക്ഷ സത്യാന്വേഷണങ്ങളാണ്, ഒരാളുടെ ജീവിതത്തി ന് അർത്ഥവും പൊരുളും നൽകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര