👬👫കുട്ടീസ് കോർണർ 👬👫 (നാല്പത്തിയേഴാം വാരം) ✍സൈമ ശങ്കർ, മൈസൂർ

ഹായ് കുട്ടീസ്!! ഇന്ന് നമുക്ക് (A)കടം കഥകൾ (B)പൊതു അറിവ്
(C)പദ്യം (D)സ്റ്റാമ്പിന്റെ കഥ കൂടാതെ ഈ ആഴ്ചയും എളുപ്പത്തിൽ (E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങൾ അവ വരച്ചു നോക്കാറുണ്ടല്ലൊ … ല്ലേ…?😍

എന്ന് സ്വന്തം
ശങ്കരിയാന്റി.

👫A) കടംകഥകൾ (10)

1)ആരോടും മല്ലടിക്കും മല്ലന്‍ വെള്ളം കുടിച്ചാല്‍ ചത്തുപോകും –

അഗ്നി.

2)ആയിരം ചാമുണ്ഡിക്കൊരു കോഴി –

വാഴക്കുലയും കുടപ്പനും.

3)ആയിരം കണ്ണന്‍ ആറ്റില്‍ച്ചാടി-

വല.

4)ആകാശത്തൊരു പഞ്ഞിക്കിടയ്ക്ക-

മേഘം.

5)ആഹു ഊഹു മരം കിളിക്കിരിക്കാന്‍ കൊമ്പില്ലാത്ത മരം-

പുക.

6)ആരും ഇഷ്ടപ്പെടാത്തിഷ്ടം-

നഷ്ടം

7)ആയിരം പൊടിയരി അതിലൊരു തേങ്ങാപ്പൂള്-

നക്ഷത്രങ്ങളും ചന്ദ്രക്കലയും.

8)ആയിരം തച്ചന്‍മാര്‍ ഞെരങ്ങിപ്പണിത മണപ്പുര-

ചിതല്‍പ്പുറ്റ്.

9)ആയിരം തിരിയിട്ടു കത്തിച്ച പൊന്‍വിളക്ക് അന്തിയായപ്പോള്‍ അണഞ്ഞുപോയി-

സൂര്യന്‍.

10)ആയിരം തിരിതെറുത്ത് അതിലൊരു വെള്ളിക്കോല്‍-

വാഴപ്പിണ്ടി

📗📗

👫B) പൊതു അറിവ്

കുട്ടീസ് ഈ ആഴ്ച പൊതു അറിവിൽ കഴിഞ്ഞ ആഴ്ച്ചകളുടെ തുടർച്ചയായി നാനാർത്ഥം അറിയാം… ട്ടോ.

നാനാർത്ഥം

സുഖം – ക്ഷേമം, ആരോഗ്യം, സ്വർഗ്ഗം

സ്ഥാനം – പാർപ്പിടം, നില, അവസ്ഥ

ഹരി – വിഷ്ണു, സിംഹം, രശ്മി

ഹസ്തം – കൈ, തുമ്പിക്കെ, ഒരുപിടി

ഹേമം – സ്വർണ്ണം, വെള്ളം, ഹേമന്തകാലം

ഹൈമം – തണുപ്പുള്ള, സ്വർണ്ണമയം

കറ – വൃക്ഷങ്ങളുടെ പശ, കായ്കളിലുള്ള വെള്ളം, അഴുക്ക്

കാഞ്ചി – അരഞ്ഞാൺ, മഹത്വം, തോക്കിന്റെ കുത്തി

കാണം – വസ്തു , പഴയ അളവ്, സ്വർണ്ണ നാണയം, കാക്ക

കാണി – കാഴ്ചക്കാരൻ, കാണിക്ക, കണ്ണ്, അല്പം

📗📗

👫C) പണ്ടേ പ്രചാരത്തിലുള്ള പദ്യങ്ങൾ(16)

ഹായ് കുട്ടീസ് ഈ വാരവും നമുക്ക് പണ്ടേ നാട്ടിൽ പാടുന്ന കുട്ടി കവിതകളിൽ ഒന്ന് കൂടി വായിക്കാം… ട്ടോ ഈ ആഴ്ചയിൽ കുഞ്ഞിനെ ക്കുറിച്ചൊരു കവിതയാണ്‌ കുട്ടീസ്. 😍

കുഞ്ഞ്

കുഞ്ഞേ കുഞ്ഞേ കോഴിക്കുഞ്ഞേ
അമ്മയെവിടെപ്പോയ്..
കോയാക്കാന്റെ പറമ്പില് കുപ്പകൾ
ചിക്കിപെറുക്കാൻ പോയ്..

കുഞ്ഞേ കുഞ്ഞേ കാക്കക്കുഞ്ഞേ
അമ്മയെവിടെപ്പോയ്..
മാത്തപ്പന്റെ മാവിന് കൊമ്പിലെ
മാങ്ങ പറിക്കാൻ പോയ്..

കുഞ്ഞേ കുഞ്ഞേ പട്ടിക്കുഞ്ഞേ
അമ്മയെവിടെപ്പോയ്..
കുട്ടൻ നായരുടെ മട്ടൻ കടയിലെ
എല്ലു പെറുക്കാൻ പോയ്…

കുഞ്ഞേ കുഞ്ഞേ തത്തക്കുഞ്ഞേ
അമ്മയെവിടെപ്പോയ്..
പുഞ്ചൻ വയലിലെ നെൽക്കതിര് മെല്ലെ
കൊത്തിയെടുക്കാന് പോയ്..

കുഞ്ഞേ കുഞ്ഞേ ആനക്കുഞ്ഞേ
അമ്മയെവിടെപ്പോയ്..
റോഡിൽ‍ വീണ് കിടക്കും ആൽ‍മരം
കെട്ടിവലിക്കാൻ പോയ്..

👫D) സ്റ്റാമ്പിന്റെ കഥ (25)

പി.ടി.ഉഷ

സ്റ്റാമ്പ് നിർമ്മാണത്തെക്കുറിച്ചുള്ള ഇന്ത്യയിലെ ആദ്യത്തെ ആധികാരിക പുസ്തകമായ ചിറ്റ രഞ്ജൻ പക്രാഷിയുടെ ഒരു സ്റ്റാമ്പ് ഈസ് ബോൺ എന്ന പുസ്തകം ഒരു സ്റ്റാമ്പ് ഡിസൈനർ എന്ന നിലയിലുള്ള അദ്ദേഹത്തിന്റെ യാത്രയെക്കുറിച്ച് വിശദമായി വിവരിക്കുന്നുണ്ട്.മഹാന്മാരുടെയും പ്രധാനപ്പെട്ട ദേശീയ സംഭവങ്ങളുടെയും 56 സ്മാരക സ്റ്റാമ്പുകൾ രൂപകൽപ്പന ചെയ്തിട്ടുള്ള അദ്ദേഹം ബീജിംഗിൽ നടന്ന പതിനൊന്നാമത് ഏഷ്യൻ ഗെയിംസിന് വേണ്ടി ഡിസൈൻ ചെയ്ത സ്റ്റാമ്പുകളിൽ ഒന്ന് 4രൂപ മുഖ വില യുള്ള പി.ടി.ഉഷയുടെ ഛായ ചിത്രമാണ് ചിത്രീകരിച്ചിരിക്കുന്നത്.

ഇന്ത്യന്‍ കായികരംഗം കണ്ട എക്കാലത്തെയും മികച്ച അത്‌ലറ്റുകളില്‍ ഒരാളാണ് പിലാവുള്ളകണ്ടി തെക്കേപറമ്പില്‍ ഉഷ എന്ന പി.ടി ഉഷ.പയ്യോളി എക്സ്പ്രസ് എന്നു വിളിക്കപ്പെടുന്ന ഇന്ത്യയിലെ ഈ പ്രശസ്ത കായിക താരം കോഴിക്കോട് പയ്യോളി എന്ന ചെറിയ ഗ്രാമത്തിലാണ് ജനിച്ചുവളർന്നത് . .ഇന്ത്യ കണ്ട എക്കാലത്തെയും മികച്ച ഓട്ടക്കാരിയായാണ്‌ പി.ടി.ഉഷയെ കണക്കാക്കുന്നത്.

ഉഷയുടെ ആദ്യത്തെ അന്തർദേശീയ മീറ്റ് പാകിസ്ഥാനിലെ കറാച്ചിയിൽ വച്ചായിരുന്നു. ഉഷ സ്പ്രിന്റ് ഡബിളടക്കം നാലു സ്വർണ്ണം നേടി. അത് ഒരു ജൈത്രയാത്രയുടെ തുടക്കമായിരുന്നു. അടുത്ത വേദി മോസ്കോ ഒളിമ്പിക്സ്. ജൂലായ് 1980. ഒളിമ്പിക്സിൽ പങ്കെടു ക്കുന്ന ആദ്യ മലയാളി വനിത.
ഒളിമ്പിക്സിൽ ഓട്ടമത്സരത്തിൽ പങ്കെടുക്കുന്ന ഏറ്റവും പ്രായം കുറഞ്ഞ ഇന്ത്യക്കാരിയായി ഉഷ.1980-ല്‍ 16-ാം വയസില്‍ ഉഷ തന്റെ ആദ്യ ഒളിമ്പിക്‌സില്‍ മത്സരിച്ചു. മോസ്‌കോയില്‍ നടന്ന ആ ഒളിമ്പിക്‌സില്‍ മത്സരിച്ച ഏറ്റവും പ്രായംകുറഞ്ഞ സ്പ്രിന്റര്‍ എന്ന റെക്കോഡും ഉഷയ്ക്കായിരുന്നു.1982 ൽ ഡെൽഹിയിൽ വച്ചു നടന്ന ഏഷ്യാഡിൽ നൂറുമീറ്റർ ഓട്ടത്തിലും, ഇരുന്നൂറുമീറ്റർ ഓട്ടത്തിലും വെള്ളിമെഡൽ കരസ്ഥമാക്കി.1984-ലെ ലോസ് ആഞ്ജലിസ് ഒളിമ്പിക്‌സ് ഇന്ത്യക്കാര്‍ക്ക് ആര്‍ക്കും മറക്കാനാകില്ല. പ്രത്യേകിച്ച് മലയാളികള്‍ക്ക്. 400 മീറ്റര്‍ ഹര്‍ഡില്‍സില്‍ സെക്കന്‍ഡിന്റെ നൂറിലൊരംശത്തില്‍ പി.ടി ഉഷയ്ക്ക് മെഡല്‍ നഷ്ടപ്പെട്ട ഒളിമ്പിക്‌സായിരുന്നു അത്.1985-ലും 1986-ലും 400 മീറ്റര്‍ ഹര്‍ഡില്‍സില്‍ ലോകത്തിലെ മികച്ച എട്ട് അത്ലറ്റുകളില്‍ ഒരാളായി രാജ്യാന്തര അത്ലറ്റിക് സംഘടന ഉഷയെ തിരഞ്ഞെടുത്തിരുന്നു. 1983-ല്‍ അര്‍ജുന പുരസ്‌കാരം ഉഷയെ തേടിയെത്തി. 1985-ല്‍ പത്മശ്രീയും.

📗📗

👫E) എളുപ്പത്തിൽ ഒരു ചിത്രം വരയ്ക്കാം (31)

👬👭👫👭👬👭👫👭👬👭

അവതരണം:
സൈമ ശങ്കർ, മൈസൂർ
➖➖➖➖➖➖➖➖➖➖➖
👬👭👫👭👬👭👫👭👬