🌹 “ഇന്നത്തെ ചിന്താവിഷയം” 🌹 – 2024 | ജൂലൈ 30 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

വേഷമല്ല വ്യക്തിത്വം
————————————-

കാടു കാണാൻ ഇറങ്ങിയ രാജകുമാരനു കുരങ്ങന്മാരെക്കണ്ടപ്പോൾ ഒരാശയം തോന്നി. അവയെ നൃത്തം പരിശീലിപ്പിച്ചാൽ ജനങ്ങളെ രസിപ്പിക്കാനാകും. വിലപിടിപ്പുള്ള ഉടുപ്പുകളും മുഖംമൂടികളും അണിഞ്ഞ് അരങ്ങിലെത്തിയാൽ, അവ രാജ നർത്തകന്മാരേപ്പോലെ നൃത്തമാടും. നിറഞ്ഞ കയ്യടിയും ലഭിക്കും.

സംഗതി ഗംഭീര വിജയമായി. പക്ഷെ, ഒരിക്കൽ നൃത്തം നടക്കുന്നതിനിടയിൽ, കാണികളിലൊരാൾ കീശയിൽ കിടന്ന കപ്പലണ്ടി വാരി, സ്റ്റേജിലേക്കെറിഞ്ഞു. കപ്പലണ്ടി കണ്ട കുരങ്ങന്മാർ, നൃത്തമെല്ലാം മറന്നു. മുഖം മൂടികൾ വലിച്ചെറിഞ്ഞ്, ഉടുപ്പുകൾ കീറിയെറിഞ്ഞ്, അവ കപ്പലണ്ടിക്കു വേണ്ടി കടിപിടി കൂടി.

എത്ര ഒളിപ്പിച്ചാലും, ഉള്ളിലുള്ളത് ഒരിക്കൽ പുറത്തു വരും. സൗന്ദര്യ വർദ്ധക വസ്തുക്കൾക്ക് വ്യക്തി വൈശിഷ്ട്യം സമ്മാനിക്കാനാവില്ല. അലങ്കാരങ്ങൾക്ക് എന്തിനേയും ആകർഷകമാക്കാം; പക്ഷെ, അർത്ഥപൂർണ്ണമാക്കാനാവില്ല. വേഷങ്ങൾക്കും വിദ്യകൾക്കുമപ്പുറമാണ് വ്യക്തിത്വം.

വ്യക്തി സവിശേഷതകൾ അനന്യമായിരിക്കുന്നതു പോലെയാണ് ദൗർബല്യങ്ങളും. അതും ഓരോരുത്തർക്കും സ്വന്തമായുണ്ടാകും. തിരിച്ചറിയാനും തിരുത്താനുമുള്ള സന്നദ്ധതയാണാവശ്യം. വേഷം മാറ്റാനുള്ള വ്യഗ്രത, പ്രകൃതം മാറ്റാനുള്ള വിവേകത്തിലും പ്രകടമാകണം. സാഹചര്യങ്ങളെ ഒഴിവാക്കാനായെന്നു വരില്ല. എന്നാൽ, വശീകരണങ്ങളെ നേരിടാൻ, എപ്പോഴും നാം സജ്ജരായിരിക്കണം. സ്വന്തം വ്യക്തിത്വം മെച്ചപ്പെടുത്താനുള്ള എളുപ്പമാർഗം, തൻ്റെ വൈകല്യങ്ങൾ എന്തെന്നും, അവയുടെ ആഴം എന്തെന്നും അറിയുകയാണ്. വേഷം കൊണ്ടു മാത്രം ആർക്കും ആദരണീയ വ്യക്തിത്വമാകാനാവില്ല. അതിന് ആന്തരിക നന്മകൾ വളർത്തിയെടുക്കാൻ ആകണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര