📱വാർത്തകൾ ഒറ്റനോട്ടത്തിൽ📱 – 2024 | ജൂൺ 20 | വ്യാഴം ✍ കപിൽ ശങ്കർ

🔹ജൂണ്‍ 18 ന് ഒമ്പത് ലക്ഷത്തോളം പേരെഴുതിയ കോളജ് അധ്യാപന യോഗ്യതാപരീക്ഷയായ യുജിസി നെറ്റ് പരീക്ഷ റദ്ദാക്കി. എന്‍ടിഎ നടത്തിയ പരീക്ഷയിലെ ചോദ്യങ്ങള്‍ ചോര്‍ന്നെന്ന സംശയത്തെത്തുടര്‍ന്ന് ഇന്നലെ രാത്രിയാണ് കേന്ദ്ര സര്‍ക്കാരിന്റെ അപ്രതീക്ഷിത പ്രഖ്യാപനം വന്നത്. അന്വേഷണം സിബിഐയെ ഏല്‍പിച്ചതായി വിദ്യാഭ്യാസ മന്ത്രാലയം അറിയിച്ചു. നീറ്റ് പരീക്ഷയ്ക്ക് പിന്നാലെ നെറ്റ് പരീക്ഷയിലും ക്രമക്കേട് കണ്ടെത്തിയതിന് പിന്നാലെ രൂക്ഷ വിമര്‍ശനമാണ് ഉയരുന്നത്. യുവാക്കളുടെ ഭാവി തകര്‍ക്കുകയാണെന്നും വീഴ്ചകള്‍ക്ക് സര്‍ക്കാര്‍ ഉത്തരവാദിത്വം ഏറ്റെടുക്കണമെന്നും കോണ്‍ഗ്രസ് നേതാവ് പ്രിയങ്ക ഗാന്ധി ആവശ്യപ്പെട്ടു. അതേസമയം നീറ്റ് പരീക്ഷ ക്രമക്കേടില്‍ രാജ്യവ്യാപകമായി പ്രതിഷേധം കടുപ്പിക്കാന്‍ ഒരുങ്ങി കോണ്‍ഗ്രസ് എന്‍ എസ് യു വിന്റെ നേതൃത്വത്തില്‍ ഇന്ന് പ്രതിഷേധം നടത്തും.

🔹കോഴിക്കോട് ; രണ്ട് കോടി രൂപ വിലവരുന്ന ലഹരി മരുന്ന് പിടികൂടിയ സംഭവത്തിൽ ഒളിവിൽ പോയ രണ്ടാമത്തെ ആളും പിടിയിലായി . പെരുവണ്ണാമുഴി സ്വദേശി മുതുകാട് കിഴക്കയിൽ ആൽബിൻ സെബാസ്റ്റ്യനെയാണ് പൊലീസ് പിടികൂടിയത്.ഒരു വർഷം മുമ്പ് വീട്ടുകാരും കുടുംബക്കാരും ചേർന്ന് എയർപോട്ടിൽ നിന്നും അർമേനിയയിലേക്ക് യാത്രയാക്കിയ ആൽബിൻ നാട്ടിൽ എത്തിയ വിവരം വീട്ടുകാർ അറിഞ്ഞില്ല. മകൻ അവിടെ ജോലി ചെയ്ത് നല്ല നിലയിൽ കഴിയുകയാണെന്നാണ് അവർ കരുതിയത്. മയക്കുമരുന്ന് കേസിൽ പൊലീസ് തിരഞ്ഞ് വീട്ടിൽ എത്തിയപ്പോഴാണ് മകൻ അർമേനിയയിൽ അല്ല കോഴിക്കോട് എത്തി ലഹരി കച്ചവടം നടത്തുകയാണെന്ന കാര്യം അറിഞ്ഞത്.പുതിയങ്ങാടി എടയ്‌ക്കൽ ഭാഗത്തെ വാടക വീട്ടിൽ നിന്നാണ് രണ്ട് കോടിയിലധികം വില വരുന്ന മാരക ലഹരി മരുന്നുകൾ പിടികൂടിയത് . പൊലീസ് പരിശോധയ്‌ക്ക് എത്തിയപ്പോൾ വീട്ടിലുണ്ടായിരുന്ന രണ്ട് പേർ ഓടി രക്ഷപ്പെട്ടു. വീട്ടിൽ സൂക്ഷിച്ച 779 ഗ്രാം എംഡിഎംഎ, ടാബ്‌ലെറ്റ് രൂപത്തിലുള്ള 6.150 ഗ്രാം എക്സ്റ്റസി, 80എൽ എസ്ഡി സ്റ്റാബുകൾ എന്നിവയും പിടിച്ചെടുത്തു.

🔹തലശ്ശേരിയില്‍ വൃദ്ധന്‍ ബോംബ് പൊട്ടി മരിച്ച സംഭവത്തില്‍ പുതിയ വെളിപ്പെടുത്തലുമായി പ്രദേശവാസിയായ യുവതി. ആളൊഴിഞ്ഞ വീടുകളെല്ലാം ബോംബ് നിര്‍മിക്കുന്നവരുടെ ഹബ്ബാണെന്നും ഇതൊക്കേ ആരെങ്കിലും തുറന്നുപറഞ്ഞാല്‍ പറയുന്നവരുടെ വീട് ബോംബെറിഞ്ഞ് നശിപ്പിക്കുമെന്നും ഇവിടെ ജീവിക്കാന്‍ അനുവദിക്കില്ലെന്നും യുവതി പ്രതികരിച്ചു. ഞങ്ങള്‍ക്ക് ബോംബ് പൊട്ടി മരിക്കാന്‍ ആഗ്രഹമില്ലെന്ന് പറഞ്ഞ യുവതി, താന്‍ തുറന്നു പറയുന്നത് ഈ നാട്ടിലെ എല്ലാവര്‍ക്കും വേണ്ടിയാണെന്നും സഹികെട്ടാണ് തുറന്നുപറയുന്നതെന്നും വ്യക്തമാക്കി. ഒരിക്കല്‍ ആളൊഴിഞ്ഞ പറമ്പില്‍ ബോംബ് കണ്ടെത്തിയപ്പോള്‍ പാര്‍ട്ടിക്കാര്‍ വന്ന് ബോംബുകള്‍ എടുത്തുമാറ്റിയെന്നും യുവതി വെളിപ്പെടുത്തി.

🔹തമിഴ്നാട്ടിലെ കള്ളക്കുറിച്ചി ജില്ലയില്‍ കരുണാപുരത്തുണ്ടായ വ്യാജമദ്യ ദുരന്തത്തില്‍ 18 പേര്‍ മരിച്ചു. 65 പേര്‍ ചികിത്സയിലാണ്. പലരുടെയും നില അതീവ ഗുരുതരമാണ്. വ്യാജമദ്യം വിറ്റയാള്‍ ഉള്‍പ്പെടെ 2 പേര്‍ അറസ്റ്റിലായി.

🔹ചെന്നൈ ∙ ബക്രീദ് ദിനത്തിൽ വീട്ടിൽനിന്നു സഹോദരൻ ചിക്കൻ ബിരിയാണി കഴിച്ചതുമായി ബന്ധപ്പെട്ട തർക്കത്തെ തുടർന്നു പ്ലസ് വൺ വിദ്യാർഥിനി തരീസ് ജീവനൊടുക്കി. താംബരത്താണ് സംഭവം. തരീസ് മാംസാഹാരം കഴിക്കാത്തതിനാൽ
വീട്ടിൽ സസ്യാഹാരം മാത്രമാണു പാകം ചെയ്യാറുള്ളത്. ബക്രീദ് ദിനത്തിൽ സുഹൃത്തുക്കൾ നൽകിയ ചിക്കൻ ബിരിയാണി സഹോദരൻ വീട്ടിലിരുന്ന് കഴിച്ചതിനെ തുടർന്ന് ഇരുവരും തമ്മിൽ വഴക്കുണ്ടായി. ഇതിനു പിന്നാലയാണ് തരീസ് ആത്മഹത്യ ചെയ്തത്.

🔹കൊച്ചി നഗരത്തിലെ സൂചനാ ബോര്‍ഡുകളും പൊതുസ്ഥലങ്ങളും വികൃതമാക്കുന്ന ഗ്രാഫിറ്റികള്‍ക്കു പിന്നില്‍ ആരെന്നതിനെ കുറിച്ച് അന്വേഷണം ആവശ്യപ്പെട്ട് മരട് നഗരസഭ സെക്രട്ടറി പരാതി നല്‍കിയതിനു പിന്നാലെ മരട് പൊലീസ് അന്വേഷണം തുടങ്ങി. നഗര നിരത്തുകളില്‍ പ്രത്യക്ഷപ്പെട്ട ഗ്രാഫിറ്റി ചിത്രങ്ങള്‍ അപ് ലോഡ് ചെയ്ത ചില ഇന്‍സ്റ്റഗ്രാം പേജുകളും പൊലീസ് നിരീക്ഷണത്തിലാണ്. എഴുത്തുകള്‍ പ്രത്യക്ഷപ്പെട്ട മേഖലകളിലെ സിസിടിവികള്‍ കേന്ദ്രീകരിച്ചാണ് ആദ്യ ഘട്ട അന്വേഷണം. മതിയായ തെളിവുകള്‍ ലഭിച്ചാല്‍ കേസ് എടുക്കുമെന്നും മരട് പൊലീസ് അറിയിച്ചു.

🔹കെഎസ്ആര്‍ടി ജീവനക്കാരെ കയ്യേറ്റം ചെയ്യരുതെന്നും, ബസ് വഴിയില്‍ തടയരുതെന്നും അഭ്യര്‍ത്ഥിച്ച് ഗതാഗതമന്ത്രി കെ ബി ഗണേഷ്‌കുമാര്‍. പരാതി ഉണ്ടെങ്കില്‍ കെഎസ്ആര്‍ടിസി മാനേജ്മെന്റിനെ അറിയിക്കാമെന്ന് കെഎസ്ആര്‍ടിസിയുടെ ഔദ്യോഗിക ഫേസ്ബുക്ക് പേജിലെ വീഡിയോ വഴിയാണ് ഗണേഷ്‌കുമാറിന്റെ അഭ്യര്‍ത്ഥന.

🔹മലപ്പുറം വള്ളിക്കുന്ന് മേഖലയില്‍ മഞ്ഞപ്പിത്തം ബാധിച്ചവരുടെ എണ്ണം 278 ലേക്കുയര്‍ന്നു. മഞ്ഞപ്പിത്തം കൂടുതല്‍ ആളുകളിലേക്ക് പടരുന്ന സാഹചര്യത്തില്‍ പ്രതിരോധ പ്രവര്‍ത്തനങ്ങള്‍ ഏകോപിപ്പിക്കാന്‍ ആരോഗ്യ വകുപ്പ് നോഡല്‍ ഓഫീസറെ നിയമിച്ചു. വള്ളിക്കുന്ന്, മൂന്നിയൂര്‍, തേഞ്ഞിപ്പലം പഞ്ചായത്തുകളിലെ മഞ്ഞപ്പിത്തം കഴിഞ്ഞ ദിവസം തൊട്ടടുത്ത ചേലേമ്പ്ര പഞ്ചായത്തിലേക്ക് കൂടി വ്യാപിച്ചു. ടാങ്കറില്‍ എത്തിച്ച കുടിവെള്ളത്തില്‍ നിന്നാണ് മഞ്ഞപ്പിത്തം ഉണ്ടായതെന്നാണ് ആരോഗ്യ വകുപ്പിന്റെ നിഗമനം. വീടുകള്‍ കയറിയിറങ്ങി ബോധവത്ക്കരണം ഊര്‍ജ്ജിതപ്പെടുത്താന്‍ വള്ളിക്കുന്ന് പഞ്ചായത്ത് ഓഫീസില്‍ ചേര്‍ന്ന അവലോകന യോഗം തീരുമാനിച്ചു.

🔹റവന്യൂ അധികൃതര്‍ പുറമ്പോക്കും റോഡും അളക്കുന്നതിനിടെ സമാന്തരമായി മന്ത്രി വീണാ ജോര്‍ജിന്റെ ഭര്‍ത്താവ് ജോര്‍ജ് ജോസഫ് റോഡ് അളക്കാനെത്തിയതോടെ കൊടുമണ്ണില്‍ കോണ്‍ഗ്രസ് പ്രവര്‍ത്തകരുടെ പ്രതിഷേധം. മന്ത്രി വീണാ ജോര്‍ജിന്റെ ഭര്‍ത്താവ് ജോര്‍ജ് ജോസഫിന്റെ പരാതിയില്‍ പത്തനംതിട്ട കൊടുമണ്ണിലെ ഓട അലൈന്‍മെന്റ് തര്‍ക്കത്തില്‍ മേഖലയിലെ പുറമ്പോക്ക് റവന്യൂ അധികൃതര്‍ അളന്നു. മന്ത്രിയുടെ ഭര്‍ത്താവിന്റെ കെട്ടിടത്തിന്റെ മുന്നില്‍ ഓടയുടെ ഗതി മാറ്റിയെന്ന വിവാദത്തിന്റെ തുടര്‍ച്ചയാണ് നടപടികള്‍.

🔹ഒരു കിലോ എം.ഡി.എം.എ.യുമായിആലുവ റെയില്‍വേ സ്റ്റേഷനില്‍ യുവതി അറസ്റ്റിലായ കേസില്‍ ഒരാള്‍കൂടി പിടിയില്‍. കൊച്ചി സ്വദേശി സഫീര്‍ ആണ് പിടിയിലായത്. ബെംഗളൂരു മുനീശ്വരനഗര്‍ സ്വദേശിനി സര്‍മീന്‍ അക്തറി (26) നെ റൂറല്‍ ജില്ലാ ഡാന്‍സാഫ് ടീമും ആലുവ പോലീസും ചേര്‍ന്ന് കഴിഞ്ഞദിവസം പിടികൂടിയിരുന്നു.

🔹തിരുവനന്തപുരം അമ്പൂരിയില്‍ ഭര്‍ത്താവ് ഭാര്യയെ കുത്തിക്കൊന്നു. അമ്പൂരി മായം കോലോത്ത് വീട്ടില്‍ രാജി (34)യാണ് മരിച്ചത്. സംഭവത്തില്‍ ഭര്‍ത്താവ് മനോജ് സെബാസ്റ്റ്യനെ (50) പോലീസ് പിടികൂടി. കുടുംബപ്രശ്നങ്ങളെ തുടര്‍ന്ന് ഇരുവരും കുറച്ചുനാളുകളായി അടുത്തടുത്ത വീടുകളിലായാണു താമസിച്ചിരുന്നത്.

🔹ഐസ്‌ക്രീമില്‍ മനുഷ്യവിരല്‍ കണ്ടെത്തിയ സംഭവത്തില്‍ നിര്‍ണായക കണ്ടെത്തല്‍. ഐസ്‌ക്രീം കമ്പനിയുടെ പുനെ ഫാക്ടറിയിലെ ജീവനക്കാരന് അപകടത്തില്‍ വിരലുകള്‍ക്ക് പരിക്കേറ്റതായി അന്വേഷണ സംഘം കണ്ടെത്തി. ജീവനക്കാരന്റെ ഡിഎന്‍എ സാമ്പിളുകള്‍ ശേഖരിച്ച് അന്വേഷണസംഘം പരിശോധനക്കായി അയച്ചു. ഫലം വന്നശേഷം വിരല്‍ ഇയാളുടേതാണെന്ന് സ്ഥിരീകരിച്ചാല്‍ കമ്പനിക്കെതിരെ പുതിയ കേസെടുക്കും.

🔹കോടതി ഹാളിൽ നിന്നും പാമ്പിനെ പിടികൂടി. ഇന്നലെ ഉച്ചകഴിഞ്ഞ് നെയ്യാറ്റിൻകര എം.എ.സി.ടി കോടതി ഹാളിലാണ് ചില അഭിഭാഷകർ പാമ്പിനെ കണ്ടത്. ഉടൻ തന്നെ എം.എ.സി.ടി ജഡ്ജ് കവിതാ ഗംഗാധരൻ പരുത്തിപ്പള്ളി ഫോറസ്റ്റ് റേഞ്ച് ഓഫീസറെ വിവരം അറിയിച്ചതിനെ തുടർന്ന് സ്നേക്ക് റെസ്ക്യൂവർ സുധീഷ് പള്ളിച്ചൽ എത്തി കോടതി ഹാൾ പരിശോധിച്ചപ്പോഴാണ് അലമാരകൾക്കിടയിൽ നെയ്യാറ്റിൻകര നിന്നും പാമ്പിനെ കണ്ടെത്തിയത്.തുടർന്ന് ഹൂക്ക് ഉപയോഗിച്ച് 2 മീറ്ററോളം നീളമുള്ള വർണ്ണ പാമ്പിനെ പിടികൂടുകയായിരുന്നു. വർണ്ണപാമ്പ്, പറക്കും പാമ്പ്, നാഗത്താൻ, പുള്ളി പവിഴ പാമ്പ് തുടങ്ങിയ പേരുകളിൽ അറിയപ്പെടുന്ന പാമ്പിന് ചെറിയ തോതിൽ വിഷമുണ്ടെന്നാണ് അറിയുന്നത്. പിടികൂടിയ പാമ്പിനെ ഫോറസ്റ്റ് ഡിപ്പാർട്ട്മെൻ്റിന് കൈമാറും.

🔹എം സി റോഡിൽ ട്രാവലറും ലോറിയും കൂട്ടിയിടിച്ച് രണ്ട് പേർക്ക് ഗുരുതര പരിക്ക്. ചെങ്ങന്നൂർ ഭാഗത്ത് നിന്നും വന്ന ട്രാവലറും എതിർദിശയിൽ വന്ന ലോറിയുമായാണ് ഇടിച്ചത്. എം സി റോഡിൽ മാന്തുകയിൽ ആണ് വാഹനാപകടം നടന്നത്.ട്രാവലറിൽ ഉണ്ടായിരുന്ന ഡ്രൈവർ ഉൾപ്പടെ രണ്ട് പേർക്ക് ഗുരുതര പരിക്കേറ്റു.പരിക്കേറ്റവരെ കല്ലിശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു.വ്യാഴാഴ്ച രാവിലെ 7 മണിക്കാണ് അപകടം നടന്നത്.ട്രാവലറിന്റെ ഡ്രൈവർ ഉറങ്ങിയതാണ് അപകടകാരണം. ഹോം അപ്ലയിൻസ് സപ്ലെ ചെയ്യുന്നതാണ് ട്രാവലർ , പാലുമായി അടൂരിൽ നിന്നും വന്നതായിരുന്നു ലോറി. അതേസമയം തിങ്കളാഴ്ച പുലർച്ചെ ഇതിനു സമീപം ഉണ്ടായ വാഹനാപകടത്തിൽ ഒരു വീട്ടമ്മ മരിച്ചിരുന്നു.

🔹മുതലപ്പൊഴി തുറമുഖ അഴിമുഖത്ത് മത്സ്യബന്ധന വള്ളം മറിഞ്ഞ് തൊഴിലാളി മരിച്ചു. അഞ്ചുതെങ്ങ് സ്വദേശി വിക്ടറാണ് (50) മരിച്ചത്. മത്സ്യബന്ധനം കഴിഞ്ഞ് മടങ്ങി വരവേ അഴിമുഖത്തുണ്ടായ ശക്തമായ തിരയിൽപ്പെട്ട് വള്ളം തലകീഴായി മറിയുകയായിരുന്നു.അർധരാത്രി ഒന്നരയോടെയായിരുന്നു അപകടം നടന്നത്. വിക്ടറിനൊപ്പം വള്ളത്തിലുണ്ടായിരുന്ന മൂന്ന് തൊഴിലാളികൾ രക്ഷപ്പെട്ടു, ഫ്രാൻസിസ്, സുരേഷ് യേശുദാസ് എന്നിവരാണ് രക്ഷപ്പെട്ടത്.

🔹നെടുമങ്ങാട് – അഴീക്കോട് പെട്രോൾ പമ്പിന് സമീപം കെ എസ് ആർ ടി സി ബസിനടിയിൽപ്പെട്ട് യുവതി മരിച്ചു. പറണ്ടോട് സ്വദേശി മുബീനയാണ് മരിച്ചത്.തലയിൽ കൂടി ബസിൻ്റെ ചക്രം കയറി ഇറങ്ങിയാണ് യുവതി മരിച്ചത്.
തിരുവനന്തപുരത്തുനിന്ന് ആര്യനാടിലേക്ക് പോകുകയായിരുന്ന ഫാസ്റ്റ് പാസഞ്ചർ ബസ്സ് യുവതിയുടെ സ്കൂട്ടറിൽ തട്ടുകയായിരുന്നു. യുവതി സംഭവസ്ഥലത്ത് വെച്ച് തന്നെ മരിച്ചു.

🔹മറയൂർ കോവിൽക്കടവ് റോഡിൽ ജീപ്പ് മറിഞ്ഞ് യുവാവ് മരിച്ചു. മയൂർ മേലാടി സ്വദേശി നന്ദു എന്ന് വിളിക്കുന്ന നാഗമണികണ്ഠൻ (24) ആണ് അപകടത്തിൽ മരണപ്പെട്ടത്. രാത്രി 8 മണിക്കാണ് ബാബു നഗറിന് സമീപം നിയന്ത്രണം നഷ്ടപ്പെട്ട് വാഹനം മറിഞ്ഞത്.സഫാരി ജീപ്പിൻ്റെ ഡ്രൈവർമാർ ജോലി കഴിഞ്ഞ് മടങ്ങുന്ന വഴിക്ക് പട്ടം കോളനിക്ക് സമീപം മരത്തിൽ ഇടിക്കുകയായിരുന്നു. നന്ദു ഉൾപ്പെടെയുള്ള പരിക്കേറ്റവരെ മറ്റൊരു ജീപ്പിൽ കയറ്റി മറയൂരിലെ ആശുപത്രിയിലേക്ക് കൊണ്ടുപോകുന്ന വഴി ആ ജീപ്പും മറിയുകയായിരുന്നു. മറയൂർ പൊലീസ് എത്തി മേൽനടപടികൾ സ്വീകരിച്ച് മൃതദ്ദേഹം മോർച്ചറിയിലേക്ക് മാറ്റി.

🔹കാസര്‍ഗോഡ് സൗത്ത് തൃക്കരിപ്പൂരില്‍ കിണറ്റില്‍ വീണ പെരുമ്പാമ്പിനെ പിടികൂടി. ഒളവറയില്‍ ആക്രി കച്ചവടക്കാര്‍ താമസിക്കുന്ന വീടിന്റെ മുറിയില്‍ കണ്ട പാമ്പ് കിണറ്റില്‍ വീഴുകയായിരുന്നു.പാമ്പിന് മൂന്നരമീറ്റര്‍ നീളമുണ്ട്. വനം വകുപ്പ് കാഞ്ഞങ്ങാട് റേഞ്ച് സ്‌നേക് റെസ്‌ക്യൂ അംഗം അനൂപ് എത്തിയാണ് പാമ്പിനെ പിടികൂടിയത്.

🔹അന്താരാഷ്ട്ര യോഗ ദിനത്തോടനുബന്ധിച്ച് പ്രധാനമന്ത്രി നരേന്ദ്രമോദി ഇന്നും നാളെയും ജമ്മുകശ്മീര്‍ സന്ദര്‍ശിക്കും. 1500 കോടിയുടെ പദ്ധതികളും മോദി ഉദ്ഘാടനം ചെയ്യും. മൂന്നാംതവണയും പ്രധാമന്ത്രിയായി അധികാരമേറ്റ ശേഷം ഇത് ആദ്യമായാണ് മോദി ജമ്മുകശ്മീര്‍ സന്ദര്‍ശിക്കുന്നത്. ഭീകരാക്രമണങ്ങളുടെ പശ്ചാത്തലത്തില്‍ ജമ്മുകശ്മീരിലെ സുരക്ഷ ശക്തമാക്കിയിട്ടുണ്ട്. ഇന്നലെ കേന്ദ്ര ആഭ്യന്തരമന്ത്രി ജമ്മുകശ്മീരിലെ സുരക്ഷ ക്രമീകരണങ്ങള്‍ വിലയിരുത്തിയിരുന്നു.

🔹ഡല്‍ഹി മുഖ്യമന്ത്രി അരവിന്ദ് കെജ്രിവാളിന്റെ ജുഡീഷ്യല്‍ കസ്റ്റഡി കാലാവധി ജൂലായ് മൂന്നുവരെ നീട്ടി. അതേസമയം കെജ്രിവാള്‍ 100 കോടി രൂപ കൈക്കൂലി ആവശ്യപ്പെട്ടതിന് തെളിവുണ്ടെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് ഡല്‍ഹി റോസ് അവന്യൂ കോടതയില്‍ പറഞ്ഞു. സ്ഥിരജാമ്യത്തിനായുള്ള കെജ്രിവാളിന്റെ ഹര്‍ജി പരിഗണിക്കുകയായിരുന്നു കോടതി.

🔹ടി20 സൂപ്പര്‍ എട്ടിലെ ആദ്യ മത്സരത്തില്‍ അമേരിക്കക്കെതിരെ ദക്ഷിണാഫ്രിക്കക്ക് 18 റണ്‍സിന്റെ വിജയം. ആദ്യം ബാറ്റ് ചെയ്ത ദക്ഷിണാഫ്രിക്ക 40 പന്തില്‍ 74 റണ്‍സെടുത്ത ക്വിന്റണ്‍ ഡി കോക്കിന്റെ മികവില്‍ 4 വിക്കറ്റ് നഷ്ടത്തില്‍ 194 റണ്‍സെടുത്തു. മറുപടി ബാറ്റിംഗിനിറങ്ങിയ അമേരിക്കക്ക് 47 പന്തില്‍ 80 റണ്‍സെടുത്ത ആന്‍ഡ്രീസ് ഗൗസ് പ്രതീക്ഷ നല്‍കിയെങ്കിലും നിശ്ചിത ഓവറില്‍ 6 വിക്കറ്റ് നഷ്ടത്തില്‍ 176 റണ്‍സ് നേടാനേ സാധിച്ചുള്ളൂ.

🔹നടന്‍ കലാഭവന്‍ ഷാജോണിന്റെ മകന്‍ സിനിമയിലേക്ക്. രവീഷ് നാഥ് സംവിധാനം ചെയ്യുന്ന ‘സമാധാന പുസ്തകം’ എന്ന ചിത്രത്തിലൂടെയാണ് യോഹാന്‍ ഷാജോണ്‍ അഭിനയത്തിലേക്ക് ചുവടുവെക്കുന്നത്. സിനിമയുടെ പോസ്റ്റര്‍ പങ്കുവച്ചുകൊണ്ട് ഷാജോണ്‍ തന്നെയാണ് സന്തോഷവാര്‍ത്ത ആരാധകരെ അറിയിച്ചത്. ”എന്റെ മകന്‍ യോഹാന്‍ ആദ്യമായി അഭിനയിക്കുന്ന സിനിമയാണ്…(ബാഗ് പിടിച്ചു നില്‍ക്കുന്ന ആളാണ് കക്ഷി. ധനുസ്, ഇര്‍ഫാന്‍, ശ്രീലക്ഷ്മി തുടങ്ങിയ പുതുമുഖങ്ങള്‍ക്കൊപ്പം സിജുവും, മാത്യൂസും അടങ്ങുന്ന പ്രിയ താരങ്ങളും ഉണ്ട്..എല്ലാവരുടെയും പ്രാര്‍ഥനകളും, പിന്തുണയും ഉണ്ടാവണം.” ഷാജോണ്‍ കുറിച്ചു. സ്‌കൂള്‍ വിദ്യാര്‍ത്ഥികളുടെ ജീവിതം പറയുന്നതാണ് ചിത്രം. സിപി ശിവന്‍, ആദി, രവീഷ് നാഥ് എന്നിവരാണ് ചിത്രത്തിന്റെ രചന നിര്‍വഹിച്ചിരിക്കുന്നത്. സിഗ്മ സ്റ്റോറീസിന്റെ ബാനറില്‍ നിസാര്‍ മംഗലശ്ശേരിയാണ് നിര്‍മാണം. സിജു വില്‍സന്‍, ജെയിംസ് ഏലിയ, മാത്യു തോമസ്, മേഘനാഥന്‍, വി.കെ. ശ്രീരാമന്‍, പ്രമോദ് വെളിയനാട്, ദിലീപ് മേനോന്‍, ലിയോണ ലിഷോയ്, വീണാ നായര്‍ തുടങ്ങിയ പ്രമുഖരും അഭിനയിക്കുന്നു. ചിത്രം ജൂലൈ 19ന് തിയറ്ററുകളിലെത്തും.

തയ്യാറാക്കിയത്:
കപിൽ ശങ്കർ