സംസ്ഥാനത്ത് സ്വർണ വിലയിൽ ഇടിവ്. 22 കാരറ്റ് ഒരു ഗ്രാം സ്വർണത്തിന് 170 രൂപയുടെ കുറവോടെ 14,190 രൂപയായി വില. ഒരു പവന് 1,360 രൂപയുടെ കുറവോടെ 1,13,520 രൂപയിലാണ് വ്യാപാരം നടക്കുന്നത്. കഴിഞ്ഞ രണ്ട് ദിവസങ്ങളിൽ സ്വർണ വിലയിൽ വൻ വർധനവാണ് ഉണ്ടായിരുന്നത്. 3400 രൂപയോളമാണ് 48 മണിക്കൂറിറിനിടെ വർധിച്ചത്.
രാജ്യാന്തര വിപണിയിലെ മാറ്റങ്ങളാണ് ആഭ്യന്തര വിപണിയിലും പ്രതിഫലിക്കുന്നത്. അതേസമയം സംസ്ഥാനത്ത് വെള്ളി വിലയിൽ മാറ്റമില്ല. ഗ്രാമിന് 250 രൂപയും 10 ഗ്രാമിന് 2,500 രൂപയുമാണ് കേരളത്തിലെ ഇന്നത്തെ വില. അമേരിക്കൻ സമ്പദ്വ്യവസ്ഥയുമായി ബന്ധപ്പെട്ട പുതിയ സൂചനകളാണ് ഇപ്പോൾ സ്വർണവിപണിയുടെ പ്രധാന ശ്രദ്ധാകേന്ദ്രം.
യു.എസ്. ഫെഡറൽ റിസർവിന്റെ അടുത്ത പലിശനിരക്ക് തീരുമാനത്തെ സ്വാധീനിക്കാൻ സാധ്യതയുള്ള നോൺ-ഫാം പേറോൾസ് തൊഴിൽ റിപ്പോർട്ട് പുറത്തു വരാനിരിക്കുകയാണ്. തൊഴിൽ വിപണിയിൽ ദുർബലത പ്രകടമായാൽ ഫെഡറൽ റിസർവ് കടുത്ത പലിശനയം തുടരാനുള്ള സാധ്യത കുറയുമെന്ന പ്രതീക്ഷയാണ് സ്വർണത്തിന് പിന്തുണ നൽകുന്നത്.
