ദേശീയ തെരഞ്ഞെടുപ്പ് കമ്മീഷൻ 5 സംസ്ഥാനങ്ങൾ/ കേന്ദ്രഭരണ പ്രദേശങ്ങളിലായി നടക്കുന്ന പൊതുതെരഞ്ഞെടുപ്പുകൾക്കും 6 സംസ്ഥാനങ്ങളിലെ ഉപതെരഞ്ഞെടുപ്പുകൾക്കും മാതൃകാ പെരുമാറ്റച്ചട്ടം കർശനമായി നടപ്പിലാക്കുന്നതിനുള്ള നിർദ്ദേശങ്ങൾ പുറപ്പെടുവിച്ചു.
1. അസം, കേരളം, പുതുച്ചേരി, തമിഴ്നാട്, പശ്ചിമ ബംഗാൾ എന്നീ സംസ്ഥാനങ്ങളിലെ നിയമസഭാ തിരഞ്ഞെടുപ്പിനുള്ള തീയതികൾ ദേശീയ തിരഞ്ഞെടുപ്പ് കമ്മീഷൻ (ഇസിഐ) 2026 മാർച്ച് 15 ന് പ്രഖ്യാപിച്ചു.
2. സമയക്രമം പ്രകാരം, ഇസിഐയും അസം, കേരളം, പുതുച്ചേരി എന്നീ സംസ്ഥാനങ്ങളും/കേന്ദ്രഭരണ പ്രദേശങ്ങളും പുറപ്പെടുവിച്ച വിജ്ഞാപനങ്ങൾ അതത് ഗസറ്റുകളിൽ പ്രസിദ്ധീകരിച്ചു.
3. ഈ പ്രഖ്യാപനത്തോടെ, സംസ്ഥാനങ്ങളിലും കേന്ദ്രഭരണ പ്രദേശങ്ങളിലും മാതൃകാ പെരുമാറ്റച്ചട്ടം (Model Code of Conduct – MCC) ഉടൻ പ്രാബല്യത്തിൽ വരുന്നത് സംബന്ധിച്ച് അതത് സംസ്ഥാനങ്ങളിലെയും/കേന്ദ്രഭരണ പ്രദേശങ്ങളിലെയും ചീഫ് സെക്രട്ടറിക്കും മുഖ്യ തിരഞ്ഞെടുപ്പ് ഓഫീസർക്കും ഇസിഐ നിർദ്ദേശങ്ങൾ നൽകി. ഈ സംസ്ഥാനങ്ങൾ /കേന്ദ്രഭരണ പ്രദേശങ്ങളിലെ പ്രഖ്യാപനങ്ങൾ/നയ തീരുമാനങ്ങൾ എന്നിവ സംബന്ധിച്ച് കേന്ദ്ര ഗവണ്മെന്റിനും പെരുമാറ്റച്ചട്ടം ബാധകമായിരിക്കും.
4. ഗവണ്മെന്റ് , പൊതു, സ്വകാര്യ സ്വത്തുക്കളെ വികൃതമാക്കുന്ന വിധത്തിലുള്ള പ്രചാരണ വസ്തുക്കൾ നീക്കം ചെയ്യൽ, ഏതെങ്കിലും രാഷ്ട്രീയ പാർട്ടി, സ്ഥാനാർത്ഥി അല്ലെങ്കിൽ തിരഞ്ഞെടുപ്പുമായി ബന്ധപ്പെട്ട മറ്റേതെങ്കിലും വ്യക്തി ഔദ്യോഗിക വാഹനങ്ങൾ അല്ലെങ്കിൽ ഗവണ്മെന്റ് താമസസ്ഥലം ദുരുപയോഗം ചെയ്യൽ എന്നിവയുമായി ബന്ധപ്പെട്ട നിർദ്ദേശങ്ങൾ കർശനമായി പാലിക്കണമെന്ന് കമ്മീഷൻ നിർദ്ദേശിച്ചു. പൊതു ഖജനാവിന്റെ ചെലവിൽ പരസ്യങ്ങൾ നൽകുന്നത് നിരോധിച്ചിട്ടുണ്ട്.
5. പൗരന്മാരുടെ സ്വകാര്യത മാനിക്കപ്പെടണം. സ്വകാര്യ വസതികൾക്ക് പുറത്ത് പ്രകടനങ്ങളോ പ്രതിഷേധ പരിപാടികളോ പാടില്ല. ഉടമയുടെ സമ്മതമില്ലാതെ ഭൂമി, കെട്ടിടങ്ങൾ, മതിലുകൾ എന്നിവയിൽ പതാകകൾ, ബാനറുകൾ, പോസ്റ്ററുകൾ എന്നിവ സ്ഥാപിക്കാൻ പാടില്ല.
6. പൊതുജനങ്ങൾ, രാഷ്ട്രീയ പാർട്ടികൾ എന്നിവർക്ക് ബന്ധപ്പെട്ട ഡിഇഒ/ആർഒയ്ക്ക് പരാതികൾ സമർപ്പിക്കാൻ കഴിയുന്ന 950 എന്ന കോൾ സെന്റർ ഉൾപ്പെടെ, പരാതി നിരീക്ഷണ സംവിധാനം സജ്ജീകരിച്ചിട്ടുണ്ട്.
7. ECINET-ലെ C-Vigil ആപ്പ് ഉപയോഗിച്ച് പൗരന്മാർക്കും രാഷ്ട്രീയ പാർട്ടികൾക്കും എംസിസി നിയമലംഘനങ്ങൾ റിപ്പോർട്ട് ചെയ്യാം. പരാതികൾ 100 മിനിറ്റിനുള്ളിൽ പരിഹരിക്കുന്നുണ്ടെന്ന് ഉറപ്പാക്കാൻ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുടനീളം 5,173-ലധികം ഫ്ലൈയിംഗ് സ്ക്വാഡുകളെ വിന്യസിച്ചിട്ടുണ്ട്. ഇതിനുപുറമെ, 5,200-ലധികം സ്റ്റാറ്റിക് സർവൈലൻസ് ടീമുകളെയും (എസ്എസ്ടി) വിന്യസിച്ചിട്ടുണ്ട്.
8. ഗതാഗത, സുരക്ഷാ ക്രമീകരണങ്ങൾ സാധ്യമാക്കുന്നതിനായി , യോഗങ്ങൾക്കും ഘോഷയാത്രകൾക്കും മുമ്പ് രാഷ്ട്രീയ പാർട്ടികൾ പോലീസ് അധികൃതരെ അറിയിക്കേണ്ടതുണ്ട്. ഇത് സംബന്ധിച്ച നിരോധന ഉത്തരവുകൾ പാലിക്കേണ്ടതും , ഉച്ചഭാഷിണികൾക്കോ മറ്റ് സൗകര്യങ്ങൾക്കോ ആവശ്യമായ അനുമതികൾ നേടുകയും വേണം.
9. മന്ത്രിമാർ ഔദ്യോഗിക ചുമതലകളെ തിരഞ്ഞെടുപ്പ് പ്രചാരണവുമായി സംയോജിപ്പിക്കരുത്. ഗവണ്മെന്റ് സംവിധാനം, വാഹനങ്ങൾ , അല്ലെങ്കിൽ ഉദ്യോഗസ്ഥരെ പ്രചാരണ ആവശ്യങ്ങൾക്കായി ഉപയോഗിക്കരുത്.
10. പെരുമാറ്റച്ചട്ടം നടപ്പിലാക്കുന്നതിനും, എല്ലാ പാർട്ടികളോടും തുല്യ പരിഗണന ഉറപ്പാക്കുന്നതിനും , ഔദ്യോഗിക സൗകര്യങ്ങൾ ദുരുപയോഗം ചെയ്യുന്നത് തടയുന്നതിനും നിഷ്പക്ഷമായി പ്രവർത്തിക്കാൻ എല്ലാ തലങ്ങളിലുമുള്ള ഉദ്യോഗസ്ഥരോടും നിർദ്ദേശം നൽകിയിട്ടുണ്ട്. ഈ ഉദ്യോഗസ്ഥർ യോഗങ്ങൾ, ഘോഷയാത്രകൾ, പോളിംഗ് ക്രമീകരണങ്ങൾ എന്നിവ നീതിപൂർവ്വം നിയന്ത്രിക്കുകയും, ക്രമസമാധാനം പരിപാലിക്കുകയും , തിരഞ്ഞെടുപ്പ് പ്രക്രിയയുടെ വിശ്വാസ്യത നിലനിർത്തുകയും വേണം.
11. മൈതാനങ്ങൾ, ഹെലിപാഡുകൾ തുടങ്ങിയ പൊതു സ്ഥലങ്ങൾ ഉപയോഗിക്കുന്നതിന് അനുമതി തേടി രാഷ്ട്രീയ പാർട്ടികൾക്ക് അപേക്ഷിക്കാൻ കഴിയുന്ന വിധത്തിൽ ECINET-ൽ സുവിധ മൊഡ്യൂൾ സജീവമാക്കിയിട്ടുണ്ട്. ഇവ ആദ്യം വരുന്നവർക്ക് ആദ്യം എന്ന രീതിയിൽ അനുവദിക്കും.
