ഡൽഹി: കാൻസർ മരുന്ന് ബ്രാൻഡുകളുടെ പരമാവധി ചില്ലറ വിലയിൽ മാറ്റം വരുത്തി ദേശീയ മരുന്ന് വില നിയന്ത്രണ അതോറിറ്റി (NPPA). ഇതിൽ ചില മരുന്നുകളുടെ വിലയിൽ 90 ശതമാനത്തിലധികം കുറവാണ് വരുത്തിയിരിക്കുന്നത്. 543 ബ്രാൻഡുകളുടെ മരുന്നുകളുടെ വില കുറയും. നാഷണൽ ഫാർമസ്യൂട്ടിക്കൽ പ്രൈസിംഗ് കൺട്രോൾ അതോറിറ്റി പുറത്തുവിട്ട പട്ടിക പ്രകാരം, പല ജനറിക്, ബയോസിമിലാർ മരുന്നുകളുടെയും വിലയിൽ വലിയ കുറവുണ്ടായിട്ടുണ്ട്.
നവംബർ 9 മുതൽ പുതുക്കിയ നിരക്കുകൾ പ്രാബല്യത്തിൽ വരും. ക്യാൻസര്‍ പ്രതിരോധ മരുന്നുകളുടെ പുതുക്കിയ എംആര്‍പി നാഷണൽ ഫാർമസ്യൂട്ടിക്കൽ പ്രൈസിംഗ് അതോറിറ്റി പുറത്തുവിട്ടു. ഷെഡ്യൂൾ ചെയ്യാത്ത ക്യാൻസർ പ്രതിരോധ മരുന്നുകളുടെ പുതുക്കിയ വില നിർമാതാക്കൾ റിപ്പോർട്ട് ചെയ്യുന്ന മുറയ്ക്ക് വിലവിവരപ്പട്ടിക തുടർച്ചയായി പുതുക്കുമെന്ന് ഫാർമസ്യൂട്ടിക്കൽസ് വകുപ്പ് വ്യക്തമാക്കി.
ഹോർമോൺ സെൻസിറ്റീവ് സ്തനാർബുദ ചികിത്സയ്ക്ക് ഉപയോഗിക്കുന്ന അനാസ്ട്രോസോൾ ഉൾപ്പെടെയുള്ള മരുന്നുകളുടെ വിലയിലാണ് വൻ കുറവ് വന്നിരിക്കുന്നത്. ആർപിജി ലൈഫ് സയൻസസിന്റെ ‘അനാർസോൾ’ എന്ന മരുന്നിന്റെ വില 695.76 രൂപയിൽ നിന്ന് 73 രൂപയായി കുറഞ്ഞു. ഡോ. റെഡ്ഡീസ് ലബോറട്ടറീസ് വിപണിയിലെത്തിക്കുന്ന ‘അസാസിറ്റിൻ’ (Azacytin – 100 mg ഇൻജക്ഷൻ) മരുന്നിന്റെ വില 6,337 രൂപയിൽ നിന്ന് 1,495.04 രൂപയായി പുതുക്കി.
ആബട്ട് ഹെൽത്ത്‌കെയർ വിപണിയിലിറക്കുന്ന ‘ബെവാസിസാബ്’ (Bevacizab – 100 mg/4 ml ഇൻജക്ഷൻ) മരുന്നിന്റെ വില 4 മില്ലിലിറ്റർ വയലിന് 21,767.70 രൂപയിൽ നിന്ന് 5,930.13 രൂപയായി കുറഞ്ഞു. കൂടാതെ, ഡാസാറ്റിനിബ് മരുന്നിന്റെ ബ്രാൻഡായ ‘ഡാസാനാറ്റ് 20’ (Dasanat 20 – 60 ഗുളികകൾ) വില 2,812.50 രൂപയിൽ നിന്ന് 1,085.93 രൂപയായും, ഡെനോസുമാബ് ഇൻജക്ഷനായ ‘ഡെബ്രുമാബ് 60 mg’ (Debrumab 60 mg) വില പ്രീ-ഫിൽഡ് സിറിഞ്ചിന് 22,031.25 രൂപയിൽ നിന്ന് 5,941 രൂപയായും കുറഞ്ഞിട്ടുണ്ട്.
2013-ലെ ഡ്രഗ്സ് (പ്രൈസ് കൺട്രോൾ) ഓർഡറിലെ വ്യവസ്ഥകൾ ഉപയോഗിച്ച്, തെരഞ്ഞെടുക്കപ്പെട്ട ഈ മരുന്നുകളുടെ ട്രേഡ് മാർജിൻ പരമാവധി ചില്ലറ വിൽപന വിലയുടെ 30 ശതമാനമായി എൻപിപിഎ പരിമിതപ്പെടുത്തി. മരുന്നുകളുടെ വിതരണത്തിലും വിൽപന ശൃംഖലയിലും ചേർക്കുന്ന അധിക തുകയാണ് ട്രേഡ് മാർജിൻ. ഇത് പരിമിതപ്പെടുത്തുന്നതിലൂടെ, മരുന്നുകളുടെ ലഭ്യതയെ ബാധിക്കാതെ തന്നെ രോഗികൾക്ക് ലഭിക്കുന്ന വില കുറയ്ക്കുകയാണ് സർക്കാർ ലക്ഷ്യമിടുന്നത്.
ഇതിൽ ഉൾപ്പെട്ടിരിക്കുന്ന മരുന്നുകളിൽ 20-ലധികം തരം കാൻസറുകളുടെ ചികിത്സയ്ക്കായി ഉപയോഗിക്കുന്ന ഇമ്മ്യൂണോതെറാപ്പി മരുന്നുകളും അടങ്ങിയിട്ടുണ്ട്. സ്തനാർബുദം, പ്രോസ്റ്റേറ്റ് ക്യാൻസർ എന്നിവയുടെ ചികിത്സയ്ക്ക് ഉപയോഗിക്കുന്ന ഡെനോസുമാബ് , കാൻസർ ചികിത്സയ്ക്കിടെ അണുബാധയെ ചെറുക്കുന്ന ശ്വേതാണുക്കളുടെ കുറവ് തടയാൻ സഹായിക്കുന്ന പെഗ്ഫിൽഗ്രാസ്റ്റിം , വൻകുടൽ, അണ്ഡാശയം, ഗർഭാശയ ഗളം എന്നിവയെ ബാധിക്കുന്ന ക്യാൻസറുകൾക്ക് ഉപയോഗിക്കുന്ന ബെവാസിസുമാബ് എന്നിവയും ഈ പട്ടികയിൽ ഉൾപ്പെടുന്നു.
ഷെഡ്യൂൾ ചെയ്യാത്ത ക്യാൻസർ മരുന്നുകൾക്ക് നിർമാതാക്കൾ പുതുക്കിയ വില സമർപ്പിക്കുമ്പോൾ ലിസ്റ്റ് അപ്‌ഡേറ്റ് ചെയ്യുമെന്ന് അതോറിറ്റി അറിയിച്ചു. ഏറ്റവും പുതിയ വില വിവരങ്ങൾക്കും പുതുക്കിയ എംആർപികളുടെ പൂർണമായ പട്ടികയ്ക്കും എൻ‌പി‌പി‌എയുടെ ഔദ്യോഗിക വെബ്‌സൈറ്റ് പരിശോധിക്കാവുന്നതാണ്. മരുന്ന്, ബ്രാൻഡ്, ശക്തി, പായ്ക്ക് വലുപ്പം എന്നിവയെ ആശ്രയിച്ച് വിലക്കുറവ് വ്യത്യാസപ്പെടാം.
ക്യാൻസർ ചികിത്സ കൂടുതൽ താങ്ങാനാവുന്നതാക്കുന്നതിനായി, പൊതുതാൽപ്പര്യം മുൻനിർത്തി, ഷെഡ്യൂൾ ചെയ്യപ്പെടാത്ത 137 ക്യാൻസർ വിരുദ്ധ മരുന്നുകളുടെ ട്രേഡ് മാർജിൻ യുക്തിസഹമാക്കുന്നതായി (TMR) ഒക്ടോബർ 17-ന് പ്രഖ്യാപിച്ചതിന് പിന്നാലെ, റെഗുലേറ്റർ ഈ മരുന്നുകളുടെ വില ഗണ്യമായി കുറച്ചു.
