പി പി ചെറിയാൻ
ന്യൂയോർക്ക്: അമേരിക്കയുടെ ഭീഷണികൾക്ക് മുന്നിൽ രാജ്യം വഴങ്ങില്ലെന്ന് ഇറാൻ പ്രസിഡന്റ് മസൂദ് പെസെഷ്കിയാൻ. ഇറാന്റെ പരമാധികാരത്തെ ഇല്ലാതാക്കുമെന്ന യു.എസ് പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പിന് പിന്നാലെ, ഐക്യരാഷ്ട്രസഭയുടെ പൊതുസഭയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
ഉപരോധങ്ങളും സമ്മർദ്ദങ്ങളും കൂടുന്തോറും ഇറാനിയൻ ജനതയുടെ പ്രതിരോധം ശക്തമാകുമെന്നും രാജ്യം ആർക്കും മുന്നിൽ മുട്ടുമടക്കില്ലെന്നും അദ്ദേഹം വ്യക്തമാക്കി.യു.എസ്-ഇസ്രായേൽ വ്യോമാക്രമണങ്ങളിൽ കൊല്ലപ്പെട്ട കുട്ടികളുടെയും മുൻ പരമാധികാര നേതാവ് ആയത്തുള്ള അലി ഖമേനിയുടെയും ചിത്രങ്ങൾ ഉയർത്തിക്കാട്ടിയാണ് പെസെഷ്കിയാൻ പ്രസംഗിച്ചത്.
ഇറാൻ ആണവായുധങ്ങൾ നിർമ്മിക്കാൻ ആഗ്രഹിക്കുന്നില്ലെന്നും എന്നാൽ സമാധാനപരമായ ആവശ്യങ്ങൾക്കുള്ള ആണവപദ്ധതികൾക്ക് രാജ്യത്തിന് അവകാശമുണ്ടെന്നും അദ്ദേഹം ആവർത്തിച്ചു. ഭീഷണിയുടെ ഭാഷ ഒഴിവാക്കിയുള്ള നയതന്ത്ര ചർച്ചകൾക്ക് ഇറാൻ ഇപ്പോഴും തയ്യാറാണെന്നും യു.എസിനെയും ഇസ്രായേലിനെയും രൂക്ഷമായി വിമർശിച്ചുകൊണ്ട് അദ്ദേഹം കൂട്ടിച്ചേർത്തു.
വാർത്ത: പി പി ചെറിയാൻ
