പ്രസാദ് തീയാടിക്കൽ
ഷിക്കാഗോ: യുണൈറ്റഡ് എയർലൈൻസിന്റെ കമ്പ്യൂട്ടർ സംവിധാനത്തിലുണ്ടായ വ്യാപക സാങ്കേതിക തകരാറിനെ തുടർന്ന് നവംബർ 16 തിങ്കളാഴ്ച പുറപ്പെടാനിരുന്ന നിരവധി വിമാനങ്ങളുടെ സർവീസുകൾ വൈകി. ഫ്ലൈറ്റ് ട്രാക്കിങ് വെബ്സൈറ്റായ ഫ്ലൈറ്റ്അവെയറിന്റെ കണക്കനുസരിച്ച്, വൈകുന്നേരത്തോടെ 418 വിമാനങ്ങൾ വൈകിയിരുന്നു. സാങ്കേതിക പ്രശ്നം പരിഹരിച്ചതായി കമ്പനി പിന്നീട് അറിയിച്ചു.
പുറപ്പെടാനിരുന്ന വിമാനങ്ങളെയാണ് തകരാർ ബാധിച്ചത്. ഇതിനകം പറന്നുകൊണ്ടിരുന്ന വിമാനങ്ങളെയും യുണൈറ്റഡ് എക്സ്പ്രസ് സർവീസുകളെയും പ്രശ്നം ബാധിച്ചിട്ടില്ലെന്ന് കമ്പനി വ്യക്തമാക്കി. യാത്രക്കാർക്കുണ്ടായ അസൗകര്യത്തിൽ യുണൈറ്റഡ് ക്ഷമാപണം നടത്തി.
സൈബർ സുരക്ഷയുമായി ബന്ധപ്പെട്ട സംഭവമാണിതെന്നതിന് സൂചനകളില്ലെന്ന് കമ്പനി അറിയിച്ചു. തകരാറിനിടെ ടെക്സസിലെ ഹൂസ്റ്റണിൽ ഒരു യുണൈറ്റഡ് പൈലറ്റ്, സംവിധാനം പ്രവർത്തനക്ഷമമാകുന്നതുവരെ വിമാനത്തെ ഗേറ്റിൽത്തന്നെ നിർത്താൻ കൺട്രോൾ ടവറിനോട് അനുമതി തേടിയതായും റിപ്പോർട്ടുണ്ട്.
ഫെഡറൽ ഏവിയേഷൻ അഡ്മിനിസ്ട്രേഷന്റെ നെറ്റ്വർക്ക് തകരാറിനെ തുടർന്ന് അമേരിക്കയിൽ വിമാനങ്ങളുടെ പുറപ്പെടൽ രാജ്യവ്യാപകമായി താൽക്കാലികമായി നിർത്തിവെച്ചതിന് ദിവസങ്ങൾക്കു ശേഷമാണ് പുതിയ സംഭവം. ഇരു സംഭവങ്ങളും തമ്മിൽ ബന്ധമുണ്ടെന്ന് സ്ഥിരീകരിച്ചിട്ടില്ല. യാത്രക്കാർ യുണൈറ്റഡിന്റെ ഔദ്യോഗിക വെബ്സൈറ്റിലോ ആപ്പിലോ വിമാനത്തിന്റെ നിലവിലെ സ്ഥിതി പരിശോധിക്കണം.



