📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 23 | വ്യാഴം ✍️ കപിൽ ശങ്കർ

🔹അതീവ ജാഗ്രതയില്‍ ഡല്‍ഹി. സിജെപി പ്രതിഷേധം തുടരുന്നതിനിടെ 16 മെട്രോസ്റ്റേഷനുകള്‍ അടച്ചു. പരീക്ഷാ ക്രമക്കേടുകളില്‍ പ്രതിഷേധിച്ച് രാജ്യത്തിന്റെ വിവിധ ഭാഗങ്ങളില്‍ നിന്ന് ജന്തര്‍ മന്തറിലെ സിജെപി സമരത്തില്‍ പങ്കെടുക്കാന്‍ ആയിരക്കണക്കിന് യുവജനങ്ങള്‍ ഒഴുകിയെത്തുകയാണ്. സമരക്കാരെ നേരിടാന്‍ 40 കമ്പനി സൈന്യത്തെ കൂടി നിയോഗിച്ചു. സിജെപി നേതാക്കളുമായുള്ള ചര്‍ച്ചയ്ക്ക് കേന്ദ്ര സര്‍ക്കാര്‍ വീണ്ടും ശ്രമം നടത്തുന്നുണ്ട്.

🔹വിദ്യാഭ്യാസ സമ്പ്രദായത്തെ തകര്‍ക്കുന്ന നയങ്ങളാണ് കേന്ദ്ര സര്‍ക്കാര്‍ നടപ്പാക്കുന്നതെന്നും വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ രാജിവയ്ക്കാതെ പ്രക്ഷോഭം അവസാനിപ്പിക്കില്ലെന്നും പ്രതിപക്ഷ നേതാവ് രാഹുല്‍ ഗാന്ധി. രാജ്യത്തെ വിദ്യാര്‍ഥികള്‍ ചെയ്ത തെറ്റെന്താണ്? സിജെപി പ്രതിഷേധത്തിനിടെ വിദ്യാര്‍ത്ഥികള്‍ക്കുനേരെ പോലീസ് നടത്തിയ ലാത്തിച്ചാര്‍ജ് അടക്കമുള്ള അതിക്രമങ്ങളുടെ ദൃശ്യങ്ങള്‍ പ്രദര്‍ശിപ്പിച്ചുകൊണ്ടു നടത്തിയ വാര്‍ത്താ സമ്മേളനത്തില്‍ അദ്ദേഹം ചോദിച്ചു. ഇന്ത്യന്‍ വിദ്യാഭ്യാസം അഴിമതി നിറഞ്ഞതായി മാറിയെന്നും വിദ്യാര്‍ത്ഥികള്‍ക്കു വിശ്വാസം നഷ്ടപ്പെട്ടെന്നും രാഹുല്‍ പറഞ്ഞു.

🔹ഒടുവില്‍ മോദി മിണ്ടി. ചോദ്യപേപ്പര്‍ ചോര്‍ച്ചയില്‍ വിചാരണയും ശിക്ഷയും ഫാസ്റ്റ് ട്രാക്ക് കോടതികള്‍ നടപ്പാക്കുമെന്ന് പ്രധാനമന്ത്രി നരേന്ദ്രമോദി. കുറ്റക്കാര്‍ക്ക് കടുത്ത ശിക്ഷ നല്‍കും. യുവാക്കളുടെ ഭാവിയെക്കാള്‍ വലുതായി ഒന്നുമില്ലെന്നും മോദി സാമൂഹ്യ മാധ്യമങ്ങളില്‍ കുറിച്ചു.

🔹യുവാക്കളുടെ ഭാവിയെ തകര്‍ത്തത് മോദിയാണെന്ന് പ്രതിപക്ഷ നേതാവ് രാഹുല്‍ ഗാന്ധി ട്വീറ്റ് ചെയ്തു. വിദ്യാഭ്യാസ മന്ത്രി ധര്‍മേന്ദ്ര പ്രധാനെ പുറത്താക്കണമെന്നും വിദ്യാര്‍ത്ഥികളോട് ക്ഷമ ചോദിക്കണമെന്നും അവരെ ആക്രമിച്ചവര്‍ക്കെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു.

🔹ശബരിമല സ്വര്‍ണക്കൊള്ള കേസില്‍ ദേവസ്വം ബോര്‍ഡ് മുന്‍ പ്രസിഡന്റ് പി എസ് പ്രശാന്തിനെ അറസ്റ്റ് ചെയ്തു. കേസില്‍ കൂടുതല്‍ അറസ്റ്റ് ഉണ്ടാകുമെന്നാണ് വിവരം. അജികുമാറിനെയും തിരുവാഭരണം കമ്മീഷണറായിരുന്ന റെജിലാലിനെയും കസ്റ്റഡിയിലെടുത്തേക്കും.

🔹വിദ്യ ബാലകൃഷ്ണന്‍ എംഎല്‍എയ്ക്ക് മന്ത്രിപദവി വാഗ്ദാനം ചെയ്ത് പണം തട്ടാന്‍ നീക്കം നടത്തിയ ഡല്‍ഹി സ്വദേശികളായ നിതിന്‍ കുമാര്‍, ഗൗരവ് എന്നിവരെ അറസ്റ്റ് ചെയ്തു. പ്രിയങ്ക ഗാന്ധിയുടെ ഓഫീസിലെ ഉദ്യോഗസ്ഥനാണെന്ന് തെറ്റിദ്ധരിപ്പിച്ച് 3 കോടി രൂപ ആവശ്യപ്പെടുകയായിരുന്നു.

🔹ഓപ്പറേഷന്‍ പാര്‍പ്പിടം എന്ന പേരില്‍ വിജിലന്‍സ് നടത്തിയ മിന്നല്‍ റെയ്ഡില്‍ തദ്ദേശ സ്ഥാപനങ്ങളില്‍ വന്‍ അഴിമതി നടന്നതായി കണ്ടെത്തി. കെട്ടിട നിര്‍മ്മാണ പെര്‍മിറ്റ് നല്‍കാന്‍ കോണ്‍ട്രാക്ടര്‍മാരില്‍ നിന്നും വിവിധ ഏജന്‍സികളില്‍ നിന്നും ഉദ്യോഗസ്ഥര്‍ പണംവാങ്ങുന്നുവെന്നാണ് കണ്ടെത്തിയത്. 30 ഉദ്യോഗസ്ഥര്‍ ഓണ്‍ലൈനായി 45 ലക്ഷം വാങ്ങിയതിന്റെ തെളിവ് ലഭിച്ചു.

🔹നീറ്റ് പരീക്ഷ ക്രമക്കേടിനെതിരെ സമരം ചെയ്ത പ്രതിപക്ഷ നേതാവ് രാഹുല്‍ ഗാന്ധി ഉള്‍പ്പെടെയുള്ള എംപി മാരെ കയ്യേറ്റം ചെയ്തില്‍ പ്രതിഷേധിച്ച് ഇന്നു സംസ്ഥാന വ്യാപകമായി വിദ്യാഭ്യാസ ബന്തിന് ആഹ്വാനം ചെയ്ത് കെഎസ്യു. നരേന്ദ്ര മോദിയുടെ കോലം കത്തിക്കാനും ജില്ലാ കേന്ദ്രങ്ങളില്‍ പ്രതിഷേധ പ്രകടനങ്ങള്‍ നടത്താനും കെഎസ്യു സംസ്ഥാന പ്രസിഡന്റ് അലോഷ്യസ് സേവ്യര്‍ ആഹ്വാനം ചെയ്തു. സിപിഐയുടെ വിദ്യാര്‍ത്ഥി സംഘടനയായ എഐഎസ്എഫും ഇന്നു വിദ്യാഭ്യാസ ബന്തിന് ആഹ്വാനം ചെയ്തിട്ടുണ്ട്. എസ്എഫ്‌ഐ നാളെ അഖിലേന്ത്യ പണിമുടക്കിനാണ് ആഹ്വാനം ചെയ്തിട്ടുള്ളത്.

🔹സര്‍ക്കാര്‍ ആശുപത്രികളില്‍ ഡിവൈഎഫ്ഐ നടത്തുന്ന സൗജന്യ ഭക്ഷണ വിതരണത്തെ അഭിനന്ദിച്ച് മുഖ്യമന്ത്രി വി ഡി സതീശന്‍. ഭക്ഷണം കൊടുക്കുന്നത് നല്ല കാര്യമാണ്. മറ്റുള്ളവരും ഇതു മാതൃകയാക്കണം. വല്ലാതെ രാഷ്ട്രീയവല്‍ക്കരിക്കാതെയും ആശുപത്രിയിലെ സ്ഥലങ്ങള്‍ കയ്യേറാതെയും ഭക്ഷണവിതരണം നടത്തണം. ആശുപത്രിക്കകത്ത് ചില സ്ഥലങ്ങള്‍ കയ്യേറുന്നത് അംഗീകരിക്കാനാവില്ലെന്ന് ആരോഗ്യമന്ത്രി വ്യക്തമാക്കിയിട്ടുണ്ടെന്നും അദ്ദേഹം പറഞ്ഞു.

🔹വിദ്യാഭ്യാസ മേഖലയില്‍ ലഭിക്കാനുള്ള 1500 കോടി തരണമെന്ന് കേന്ദ്രസര്‍ക്കാരിനോട് കേരളം ആവശ്യപ്പെട്ടു. വിദ്യാഭ്യാസ മന്ത്രിമാരുടെ യോഗത്തിലാണ് മന്ത്രി എന്‍ ഷംസുദ്ദീന്‍ എസ്എസ്‌കെ ഇനത്തില്‍ ലഭിക്കാനുള്ള തുക ആവശ്യപ്പെട്ടത്. പിഎം ശ്രീ പദ്ധതിയുമായി ഈ തുക കൂട്ടികുഴക്കരുതെന്നും പിഎം പോഷന്‍ പദ്ധതിയില്‍ കേരളം സഹകരിക്കാമെന്നും മന്ത്രി ഷംസുദ്ദീന്‍ പറഞ്ഞു.

🔹പയ്യന്നൂരില്‍ പാര്‍ട്ടി വിട്ട വി. കുഞ്ഞികൃഷ്ണന്‍ എംഎല്‍എ അനുകൂലിയായ മുന്‍ സിപിഎം നേതാവ് ടി പുരുഷോത്തമന്റെ ചെമ്മീന്‍ കൃഷി സ്ഥലത്തെ ഷെഡിനു തീയിട്ടു. പയ്യന്നൂരിലെ കണ്ടങ്കാളിയിലാണ് സംഭവം. നേരത്തെ പുരുഷോത്തമന്റെ വീട് ആക്രമിച്ചു കാറിനു തീയിട്ട കേസില്‍ 5 സിപിഎം പ്രവര്‍ത്തകര്‍ അറസ്റ്റിലായിരുന്നു. ആക്രമണത്തിന് പിന്നില്‍ ടി.ഐ. മധുസൂദനനെന്ന് സംശയിക്കുന്നതായി പുരുഷോത്തമന്‍ ആരോപിച്ചു.

🔹തൃശൂര്‍ മടവാക്കരയില്‍ അച്ഛനെ ചുറ്റിക കൊണ്ട് തലയ്ക്കടിച്ച് കൊന്നു. മടവാക്കര സ്വദേശി കൃഷ്ണന്‍ (89 ) ആണ് മരിച്ചത്. മകന്‍ രാധാകൃഷ്ണന്‍ (54) അറസ്റ്റിലായി. ഭൂമി നല്‍കിയിട്ടും ജീവനാംശം നല്‍കിയില്ലെന്ന് ആരോപിച്ച് മകനെതിരെ കേസ് കൊടുത്തതിന്റെ വൈരാഗ്യത്തിലാണ് കൊലപാതകം. മറ്റൊരു മകന്റെ വീട്ടില്‍ തനിച്ചായിരുന്നു കൃഷ്ണന്റെ താമസം.

🔹തിരുവനന്തപുരം കോര്‍പ്പറേഷന്‍ ബിജെപി കൗണ്‍സിലര്‍ ആര്‍ സുഗതന് നെടുമങ്ങാട് സെക്കന്‍ഡ് ക്ലാസ് മജിസ്ട്രറ്റ് കോടതി ജാമ്യം അനുവദിച്ചു. വട്ടിയൂര്‍ക്കാവ് പൊലീസ് സ്റ്റേഷനിലെ രണ്ട് കേസുകള്‍ക്കാണ് ജാമ്യം അനുവദിച്ചത്. അതേസമയം കാപ്പ കേസുള്ളതിനാല്‍ സുഗതന് ജയിലില്‍തന്നെ തുടരേണ്ടിവരും.

🔹വിനോദയാത്രയ്ക്കു ബാങ്കോങ്കില്‍ പോയ മലയാളി യുവാവിനെ ഹോട്ടല്‍ മുറിയില്‍ മരിച്ച നിലയില്‍ കണ്ടെത്തി. തലവടി ഗ്രാമപഞ്ചായത്തിലെ ആനപ്രമ്പാല്‍ തെക്ക് പുന്നശ്ശേരി സ്വദേശിയായ പ്രജിത് പുഷ്പാംഗദന്‍ (49) ആണ് മരിച്ചത്.

🔹ഡല്‍ഹിയിലെ പാറ്റാ സമരത്തിന് ഐക്യദാര്‍ഢ്യവുമായി കൊച്ചി മഹാരാജാസ് കോളേജില്‍ പ്രമുഖരുടെ കൂട്ടായ്മ. ചലച്ചിത്ര നടന്‍ ജോജു ജോര്‍ജ്, എഴുത്തുകാരായ എന്‍ എസ് മാധവന്‍, കെ ആര്‍ മീര, രഞ്ജിനി ഹരിദാസ്, നടി ഗൗരി കിഷന്‍, ശീതള്‍ ശ്യം, ബേബി ജീന്‍, സംവിധായകന്‍ മഹേഷ് നാരായണന്‍, ആഷിഖ് അബു, സിപിഎം ജില്ലാ സെക്രട്ടറി സതീഷ്, ഹരീഷ് വാസുദേവന്‍ തുടങ്ങിയ പ്രമുഖര്‍ പരിപാടിയില്‍ പങ്കെടുത്തു.

🔹ജന്തര്‍ മന്തറില്‍ നടക്കുന്ന പ്രതിഷേധങ്ങളില്‍ സിജെപിക്ക് പിന്തുണയുമായി നടന്‍ ദുല്‍ഖര്‍ സല്‍മാന്‍. സോഷ്യല്‍ മീഡിയയില്‍ പങ്കുവച്ച കുറിപ്പില്‍ സമരക്കാരെ കേള്‍ക്കണമെന്നും വിദ്യാര്‍ഥികള്‍ ജീവനൊടുക്കുന്നത് വേദനിപ്പിക്കുന്നുവെന്നും സ്വപ്നങ്ങളും ലക്ഷ്യങ്ങളുമുള്ള മനുഷ്യര്‍ കരുണയും ബഹുമാനവും അര്‍ഹിക്കുന്നുവെന്നും താരം പറഞ്ഞു.

🔹സിജെപി സമരത്തിന് പിന്തുണ പ്രഖ്യാപിച്ച നടന്‍ ടൊവിനോ തോമസിന്റെ ഇരിങ്ങാലക്കുടയിലെ വീടിന് മുന്നില്‍ യുവമോര്‍ച്ച പ്രതിഷേധിച്ചു. വിദ്യാഭ്യാസ രംഗത്തെ ക്രമക്കേടുകള്‍ക്കെതിരെ ഡല്‍ഹിയില്‍ നടക്കുന്ന സമരത്തെ അനുകൂലിച്ചതിനാണ് പ്രതിഷേധം.

🔹പണം വാങ്ങി സിജെപി സമരത്തിന് പോയെന്ന് ആക്ഷേപിച്ച ബിജെപി നേതാവ് ബി ഗോപാലകൃഷ്ണന്‍ ആരാണെന്ന് രഞ്ജിനി ഹരിദാസ്. അങ്ങനെ ഒരാളെ കേട്ടിട്ടില്ലെന്ന് പരിഹസിച്ച രഞ്ജിനി ഹരിദാസ് എത്ര പണമാണ് വിദേശത്തുനിന്ന് കിട്ടിയതെന്നും പറയണമെന്ന് ആവശ്യപ്പെട്ടു. തനിക്ക് രണ്ട് ദിവസം സ്റ്റേജ് ഷോ ഇല്ലായിരുന്നു, അതുകൊണ്ടാണ് പോയതെന്നും രഞ്ജിനി പരിഹസിച്ചു.

🔹സിക്കിം തുരങ്ക അപകടത്തില്‍ കാണാതായ മലയാളി മരിച്ചു. കോട്ടയം പാമ്പാടി സ്വദേശി അനീഷ് മോഹന്‍ ആണ് മരിച്ചത്. ഇന്ന് പുലര്‍ച്ചെ രണ്ട് മണിയോടെയാണ് അനീഷ് മോഹന്റെ മൃതദേഹം കണ്ടെത്തിയത്.

🔹തനിക്കെതിരെ നിരന്തരം വ്യാജവാര്‍ത്തകള്‍ പ്രചരിപ്പിക്കുന്നുവെന്ന് മാധ്യമങ്ങള്‍ക്ക് മുന്നില്‍ വിതുമ്പിക്കരഞ്ഞ് സിപിഎം നേതാവ് പി കെ ശ്രീമതി. പികെ ശശിക്കെതിരായ പീഡന ആരോപണത്തെക്കുറിച്ച് പറയുമ്പോള്‍ തീവ്രത എന്ന വാക്ക് താന്‍ ഉപയോഗിച്ചിട്ടില്ല. ഏതോ എംഎല്‍എയുടെ ഭാര്യ എന്ന നിലയില്‍ പെന്‍ഷന്‍ വാങ്ങുന്നു എന്ന ആരോപണം മാനംകെടുത്താനാണെന്നും ശ്രീമതി പറഞ്ഞു.

🔹സഹപാഠികളുടെ മോര്‍ഫ് ചിത്രം പ്രചരിപ്പിച്ച കേസില്‍ തിരുവനന്തപുരം മെഡിക്കല്‍ കോളേജിലെ എംബിബിഎസ് വിദ്യാര്‍ത്ഥി പിടിയില്‍. വയനാട് സ്വദേശി എബല്‍ ആണ് അറസ്റ്റിലായത്. പ്രതിഷേധവുമായി മെഡിക്കല്‍ വിദ്യാര്‍ഥികള്‍ പൊലീസ് സ്റ്റേഷനിലെത്തി.

🔹കൊച്ചിയിലെ പി ആന്‍ഡ് ടി കോളനി ഫ്‌ലാറ്റ് നിര്‍മ്മാണത്തില്‍ ഗുരുതരമായ ക്രമക്കേടുകള്‍ ഉയര്‍ന്നതിനെ തുടര്‍ന്ന് സംഭവത്തില്‍ വിജിലന്‍സ് അന്വേഷണം. 14 കോടി രൂപ പ്രതീക്ഷിച്ച പദ്ധതിക്ക് 24 കോടിയോളം രൂപയാണ് ചെലവഴിച്ചത്. നിര്‍മ്മാണം പൂര്‍ത്തിയായി ഒരു മാസത്തിനകം കെട്ടിടത്തിലെ ചോര്‍ച്ചയും മറ്റ് പോരായ്മകളും പുറത്തുവന്നു.

🔹കടയ്ക്കാവൂരില്‍ നടുറോഡില്‍ യുവതിയുടെ കൈവെട്ടി മാറ്റിയ കാമുകനെ പോലീസ് പിടികൂടി. കടയ്ക്കാവൂര്‍ സ്വദേശിനി വിജി(38)ക്കാണ് വെട്ടേറ്റത്. ഗുരുതരമായി പരിക്കേറ്റ വിജിയെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. അഞ്ചുതെങ്ങ് കായിക്കര സ്വദേശി അനു (38) വിനെയാണ് അറസ്റ്റു ചെയ്തത്.

🔹കാറും ബൈക്കും കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം. വ്യാഴാഴ്ച പുലര്‍ച്ചെ 5.45ന് താഴെ കൂടരഞ്ഞിയിലുണ്ടായ അപകടത്തിൽ പൂവാറംതോട് സ്വദേശി അഭിജിത്ത് ആണ് മരിച്ചത്.അഭിജിത്തും സുഹൃത്തും സഞ്ചരിച്ച ബൈക്കും എതിര്‍ ദിശയില്‍ എത്തിയ കാറും തമ്മില്‍ കൂട്ടിയിടിക്കുകയായിരുന്നു. അപകടം നടന്ന ഉടൻതന്നെ ഇരുവരെയും ആശുപത്രിയിൽ പ്രവേശിപ്പിച്ചെങ്കിലും അഭിജിത്തിന്‍റെ ജീവൻ രക്ഷിക്കാനായില്ല.

🔹ഇന്ത്യന്‍ വംശജരായ ദമ്പതിമാര്‍ കുറ്റക്കാരെന്ന് കണ്ടെത്തി. ജോഗേഷ് ഭണ്ഡാരി(59) ഭാര്യ മീനാക്ഷി ഭണ്ഡാരി(58) എന്നിവരാണ് കുറ്റക്കാരെന്ന് കണ്ടെത്തിയത്. ഇവരുടെ കമ്പനിയില്‍ ജീവനക്കാരനായ ക്രെയ്ഗ് മോറിസും(43) കുറ്റക്കാരനാണ്.

🔹കര്‍ണാടകയില്‍ കോണ്‍ഗ്രസ് ആസ്ഥാനത്തിനു മുന്നില്‍ പ്രതിഷേധത്തിനെത്തിയ ബിജെപി എംഎല്‍എയ്ക്ക് നേരേ മുട്ടയേറ്. ബി പി ഹരീഷ് എംഎല്‍എയ്ക്കു നേരേയാണ് കോണ്‍ഗ്രസ് പ്രവര്‍ത്തകര്‍ മുട്ടയെറിഞ്ഞത്. കോണ്‍ഗ്രസ് പ്രവര്‍ത്തകര്‍ തന്നെ മര്‍ദിച്ചതായും ഹരീഷ് ആരോപിച്ചു.

🔹ഡല്‍ഹിയിലെ 16 മെട്രോ സ്റ്റേഷനുകള്‍ അടച്ചു. വൈകുന്നേരത്തോടെ തുറന്നു. രാജീവ് ചൌക്ക്, ലോക് കല്യാണ മാര്‍ഗ്, ഐടിഒ, സെന്‍ട്രല്‍ സെക്രട്ടറിയേറ്റ് ഉള്‍പ്പെടെ ന്യൂദില്ലി മേഖലയിലെ പ്രധാന സ്റ്റേഷനുകളിലാണ് നിയന്ത്രണം.

🔹തുടര്‍ച്ചയായ പന്ത്രണ്ടാം രാത്രിയിലും ഇറാനില്‍ അമേരിക്കയുടെ കനത്ത വ്യോമാക്രമണം. ബുഷെഹര്‍ ആണവനിലയത്തിന് സമീപമുള്ള പവര്‍ സബ്സ്റ്റേഷന് നേരെയും ആക്രമണം ഉണ്ടായി. ഹോര്‍മുസ് കടലിടുക്കില്‍ ഇറാന്‍ ഏതെങ്കിലും കപ്പലിന് നേരെ ആക്രമണം നടത്തിയാല്‍, പകരം ഇറാന്റെ പാലങ്ങളോ വൈദ്യുതി നിലയങ്ങളോ തകര്‍ക്കുമെന്ന് ഡൊണാള്‍ഡ് ട്രംപ് ആവര്‍ത്തിച്ചു.

🔹ജമ്മു കശ്മീരില്‍ ഭീകരാക്രമണത്തില്‍ പൊലീസുകാരന് വീരമൃത്യു. ജമ്മു കശ്മീര്‍ പൊലീസിലെ ഹെഡ് കോണ്‍സ്റ്റബിളായ ആഷിഖ് ഹുസൈന്‍ ഖുറേഷി(35)യാണ് ഭീകരരുടെ വെടിയേറ്റ് മരിച്ചത്. അനന്തനാഗിലെ ലാല്‍ ചൗക്കിലായിരുന്നു ഭീകരാക്രണം. അമര്‍നാഥ് യാത്രയുടെ സുരക്ഷയുടെ ഭാഗമായി ഡ്യൂട്ടിയിലുണ്ടായിരുന്ന പൊലീസ് സംഘത്തിന് നേരേയാണ് ഭീകരര്‍ വെടിവച്ചത്. സൈന്യം ഈ പ്രദേശം വളഞ്ഞിട്ടുണ്ട്.

🔹അമേരിക്കയും സൗദി അറേബ്യയും തമ്മില്‍ ചരിത്രപരമായ സമാധാന ആണവ സഹകരണ കരാറില്‍ ഒപ്പുവച്ചു. ഇരുരാജ്യങ്ങളും തമ്മില്‍ ശതകോടികളുടെ പങ്കാളിത്തം ഉറപ്പാക്കുന്ന കരാറാണ് ഒപ്പുവച്ചത്.

🔹ഫിഫ പ്രസിഡന്റ് ജിയാനി ഇന്‍ഫാന്റിനോയെ യുഎന്‍ സെക്രട്ടറി ജനറല്‍ ആക്കണമെന്ന് ഡോണള്‍ഡ് ട്രംപ്. ന്യൂയോര്‍ക്ക് പോസ്റ്റിലെ വാര്‍ത്തയിലാണ് ട്രംപിന്റെ നിലപാട് വെളിപ്പെടുത്തിയിരിക്കുന്നത്. ഫിഫ ലോകകപ്പ് സംഘാടനത്തില്‍ ഇന്‍ഫന്റീനോ വഹിച്ച പങ്കില്‍ ട്രംപിനു പൂര്‍ണ തൃപ്തിയുണ്ടെന്നും, ലോകമെങ്ങുമുള്ള ജനങ്ങളെ ഒന്നിപ്പിക്കാന്‍ അദ്ദേഹത്തിനു കഴിയുമെന്നും ട്രംപ് പറഞ്ഞതായാണു വാര്‍ത്ത.

🔹തുടർച്ചയായ രണ്ട് ട്വന്‍റി20 പരന്പര പരാജയത്തിനു ശേഷം മൂന്ന് മത്സരമടങ്ങിയ ട്വന്‍റി20 പരന്പരയ്ക്ക് ശ്രേയസ് അയ്യർ നയിക്കുന്ന ഇന്ത്യ ഇന്ന് സിംബാബ്‌വെയ്ക്കെതിരേ ഇറങ്ങും. പരന്പര തൂത്തുവാരി അഭിമാനവും ആത്മവിശ്വാസവും തിരിച്ചുപിടിച്ച് ശ്രേയസ് ഉയർത്തുകയാണ് നായകൻ അയ്യരുടെ ഭാരിച്ച ഉത്തരവാദിത്വം.അയർലൻഡിലും (2-0) ഇംഗ്ലണ്ടിലും (4-0) പരമ്പരകൾ നഷ്ടപ്പെട്ടതോടെ അയ്യർ കടുത്ത സമ്മർദത്തിലാണ്. 2026 ഐപിഎല്ലിനു ശേഷമാണ് അദ്ദേഹം ടീമിന്‍റെ ക്യാപ്റ്റൻ സ്ഥാനം ഏറ്റെടുത്തത്. തുടർച്ചയായ ആറ് തോൽവികൾ സമ്മർദം കൂട്ടുന്നു. വൈകുന്നേരം 4.30നാണ് മത്സരം.

🔹അനസ് സൈനുദ്ദീന്‍, തീര്‍ത്ഥ ഹരിദേവ്, ജെസ്സന്‍ ജോസഫ്, അനീഷ് പൊന്നപ്പന്‍ എന്നിവരെ പ്രധാന കഥാപാത്രങ്ങളാക്കി അംലാദ് ജലീല്‍ സംവിധാനം ചെയ്യുന്ന ‘കരിമ്പടം’ എന്ന ചിത്രത്തിലെ വീഡിയോ ഗാനം റിലീസായി. അനസ് സൈനുദ്ദീന്‍ രചിച്ച് സംഗീതം നല്‍കി മധു ബാലകൃഷ്ണന്‍ ആലപിച്ച തനുവിലിനി എന്നും തണുപ്പല്ലേ എന്നാരംഭിക്കുന്ന ഗാനമാണ് റിലീസായത്. സുനില്‍ സി പി, വിവേകാനന്ദന്‍, ഉണ്ണികൃഷ്ണന്‍, കല ആയൂര്‍, അജയന്‍ അഞ്ചല്‍, ശരിക സ്റ്റാലിന്‍, ജീവന്‍ നവോദയ, സനോജ് നടയില്‍, ജിബിന്‍ ജോയ്, അനീഷ് വി ശിവദാസ്, ഷിബിന അമീര്‍ജാന്‍, അമ്മവീട്ടില്‍ രാജേഷ്, ബിന്ദു ചന്ദ്ര, സാവിത്രി ചേത്തല്ലൂര്‍, രതീഷ് മീനക്കല്‍, ശ്രീകുമാര്‍ മാടവൂര്‍, സജീന കൊല്ലം, രമ്യ മനോജ്, അഡ്വ. അനില്‍കുമാര്‍ തുടങ്ങിയവരാണ് മറ്റു കഥാപാത്രങ്ങളെ അവതരിപ്പിക്കുന്നത്. ഈ ചിത്രത്തിന്റെ കഥ, തിരക്കഥ, സംഭാഷണം അനസ് സൈനുദീന്‍ എഴുതുന്നു. ശ്രീജിത്ത് മനോഹരന്‍ ഛായാഗ്രഹണം നിര്‍വഹിക്കുന്നു.

🔹രഞ്ജിത്ത് സംവിധാനം ചെയ്യുന്ന ലോ ആന്‍ഡ് ഓര്‍ഡര്‍ എന്ന ചിത്രം സെപ്റ്റംബര്‍ നാലിന് പുറത്തെത്തും. റിലീസ് ഡേറ്റ് പ്രഖ്യാപിക്കുന്ന പുതിയ പോസ്റ്റര്‍ പുറത്തെത്തി. ചിത്രത്തിലെ ലീഡ് റോള്‍ കൈകാര്യം ചെയ്യുന്ന പ്രകാശ് വര്‍മ്മ അവതരിപ്പിക്കുന്ന പൊലീസ് ഉദ്യോഗസ്ഥനും ജൂനിയേഴ്സായ അഞ്ച് ചെറുപ്പക്കാരും ചേര്‍ന്നുള്ള ദൃശ്യമാണ് പോസ്റ്ററില്‍. കൊച്ചി നഗരത്തിന്റെ പശ്ചാത്തലത്തില്‍ പൂര്‍ണ്ണമായും ഒരു പൊലീസ് സ്റ്റോറി ആക്ഷന്‍, മാസ് എന്റര്‍ടൈനറായി അവതരിപ്പിക്കുകയാണ് ഈ ചിത്രത്തിലൂടെ. പ്രകാശ് വര്‍മ്മയും അഭിരാമിയും കേന്ദ്ര കഥാപാത്രങ്ങളെ അവതരിപ്പിക്കുന്ന ഈ ചിത്രത്തില്‍ വലിയൊരു താരനിര തന്നെയുണ്ട്. ഇവര്‍ക്കൊപ്പം രഞ്ജിത്തിന്റെ തന്നെ ബ്ലാക്ക് എന്ന ചിത്രത്തിലെ കാരിക്കാമുറി ഷണ്മുഖന്‍ എന്ന ജനപ്രിയ കഥാപാത്രത്തെ മമ്മൂട്ടി വീണ്ടും ഈ ചിത്രത്തില്‍ അവതരിപ്പിക്കുന്നതായി റിപ്പോര്‍ട്ടുകള്‍ എത്തിയിരുന്നു. ഗാനങ്ങള്‍ ഷിബു ചക്രവര്‍ത്തി, സംഗീതം ജോ ഡാനിയേല്‍, പശ്ചാത്തല സംഗീതം ബിജിബാല്‍.

🔹മലയാള സിനിമയില്‍ നിന്ന് മറ്റൊരു ത്രില്ലര്‍ ചിത്രം കൂടി എത്തുകയാണ് ‘കണ്ടന്‍’. പുതുമുഖ സംവിധായകന്‍ ആയ ജിബിന്‍ ആന്റണി ആണ് ചിത്രം സംവിധാനം ചെയ്തിരിക്കുന്നത്. ചിത്രത്തിന്റെ ഛായാഗ്രഹണം ജിബിന്‍ ആന്റണി, അലന്‍ ജേക്കബ് എന്നിവര്‍ നിര്‍വ്വഹിച്ചിരിക്കുന്നു. രചന, എഡിറ്റിംഗ്, ലിറിക്സ് എന്നിവ സംവിധായകന്‍ ജിബിന്‍ ആന്റണിയാണ് നിര്‍വ്വഹിച്ചിരിക്കുന്നത്. പൂര്‍ണ്ണമായും യൂകെയില്‍ ചിത്രീകരിച്ച ഈ ചിത്രത്തില്‍ അഭിനയിച്ചിരിക്കുന്നത് യൂകെ മലയാളികളായ പുതുമുഖങ്ങള്‍ ആണ്. സംഗീതം നല്‍കിയിരിക്കുന്നത് ജെയ്സണ്‍ ജോണ്‍ ആണ്. സൂരജ് സന്തോഷ്, സിതാര കൃഷ്ണകുമാര്‍, അഞ്ജു ജോസഫ് എന്നിവരാണ് ഗാനങ്ങള്‍ ആലപിച്ചിരിക്കുന്നത്. ചരിത്രത്തില്‍ ആദ്യമായിട്ടാണ് യുകെ മലയാളികള്‍ ചേര്‍ന്ന് നിര്‍മ്മിച്ച ഒരു മലയാള സിനിമ കേരളത്തിലും യുകെയിലും ആയി ഈ മാസം 31 ന് പ്രദര്‍ശത്തിനെത്തുന്നത് എന്ന പ്രത്യേകതയും ഈ ചിത്രത്തിനുണ്ട്.

💦 ഗുരുജിയുടെ വാക്കുകൾ
*****************************

ഓടിയോടി അവസാനം ഇനിയെനിക്ക്‌ വയ്യെന്നുപറഞ്ഞ്‌ ഒരിടത്തിരിക്കുമ്പോൾ അടങ്ങി വരുന്ന ഒരകതാരുണ്ട്‌. അവിടെയാണ്‌ മൗനത്തിന്റെ വില നാം അറിയുക. അതൊരു നിഷ്ക്രിയതയല്ല. മറിച്ച്‌ സക്രിയമായ കാത്തിരിപ്പാണ്‌. ചളിയൂറുന്നതുവരെ കാത്തിരിക്കുന്ന വിവേകമാണത്‌. കാരണം, ചളിയൂറിയാലേ കാഴ്ച തെളിയൂവെന്ന്‌ അവർക്കറിയാം. അതൊരു അലസമായ ഇരിപ്പല്ലെന്നും ഓർക്കാം. അനിവാര്യമായ കാത്തിരിപ്പുകളെ കാത്തിരിക്കുന്നത്‌ ശാന്തമായ ഒരു ജീവിതമാണെന്നത്‌ ക്ഷമയോടെ കാത്തിരുന്നവർക്കെല്ലാമുള്ള അനുഭവമാണ്‌. ആഗ്രഹങ്ങളുടെ പൂർത്തീകരണത്തിനുള്ള കാത്തിരിപ്പല്ല നാം പറയുന്നത്‌. ഉള്ളിളകിയപ്പോൾ കലങ്ങിപ്പോയ ശാന്തിയെ പൂർവനിലയിലേക്കു കൊണ്ടുവരാനുള്ള മൗനത്തെക്കുറിച്ചാണ്‌‌.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 23

•ഇന്ത്യയിൽ ദേശീയ പ്രക്ഷേപണ ദിനമായി (National Broadcasting Day) ആചരിക്കുന്നത് ജൂലൈ 23 ആണ്. 1927 ജൂലൈ 23-നാണ് ബോംബെ സ്റ്റേഷനിൽ നിന്ന് ഇന്ത്യൻ ബ്രോഡ്കാസ്റ്റിംഗ് കമ്പനി (IBC) എന്ന സ്വകാര്യ കമ്പനിയുടെ കീഴിൽ രാജ്യത്തെ ആദ്യത്തെ റേഡിയോ പ്രക്ഷേപണം ആരംഭിച്ചത്. ഇതിന്റെ ഓർമ്മയ്ക്കായാണ് ഈ ദിനം ആചരിക്കുന്നത്.

•ലോക ഷോഗ്രൻസ് ദിനം (World Sjogren’s Day): രോഗപ്രതിരോധ ശേഷിയെ ബാധിക്കുന്ന ‘ഷോഗ്രൻസ് സിൻഡ്രോം’ എന്ന ആരോഗ്യസ്ഥിതിയെക്കുറിച്ച് ആഗോളതലത്തിൽ അവബോധം വളർത്തുന്ന ദിനം.

•ബാലഗംഗാധര തിലക് ജയന്തി: ഇന്ത്യൻ സ്വാതന്ത്ര്യ സമര ചരിത്രത്തിലെ ധീരനായ നേതാവ് ലോക്മാന്യ ബാലഗംഗാധര തിലകൻ ജനിച്ചത് 1856 ജൂലൈ 23-നാണ്. “സ്വരാജ്യം എന്റെ ജന്മസിദ്ധാവകാശമാണ്, ഞാൻ അത് നേടുക തന്നെ ചെയ്യും” എന്ന അദ്ദേഹത്തിന്റെ മുദ്രാവാക്യം ഏറെ പ്രശസ്തമാണ്.

•കോഴിക്കോട് സർവ്വകലാശാല: കേരളത്തിലെ പ്രമുഖ ഉന്നതവിദ്യാഭ്യാസ സ്ഥാപനമായ കോഴിക്കോട് സർവ്വകലാശാല ഔദ്യോഗികമായി പ്രവർത്തനം ആരംഭിച്ചത് 1968 ജൂലൈ 23-നാണ്.

•ആദ്യ കാർ വിൽപ്പന (1903): ഫോർഡ് മോട്ടോർ കമ്പനി അവരുടെ ചരിത്രത്തിലെ ആദ്യത്തെ കാർ വിറ്റത് ഈ ദിവസമാണ്.

തയ്യാറാക്കിയത്: കപിൽ ശങ്കർ

16 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 23 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 23

തയ്യാറാക്കിയത്: കപിൽ ശങ്കർ

അമേരിക്കയിൽ താമസം മാറിയാൽ 10 ദിവസത്തിനകം വിവരം നൽകണം; കടുത്ത മുന്നറിയിപ്പുമായി യുഎസ് ഇമിഗ്രേഷൻ

ഡാളസിൽ മാതാപിതാക്കൾക്കൊപ്പം ഉറങ്ങിയ കൈക്കുഞ്ഞ് മരിച്ചു; അന്വേഷണം ആരംഭിച്ച് പോലീസ്

LEAVE A REPLY Cancel reply

Most Popular

ഡല്‍ഹിയിലെ പീഡന പരമ്പര; സ്വമേധയാ ഹര്‍ജി ഫയലില്‍ സ്വീകരിച്ച് സുപ്രീംകോടതി

മദ്യപിച്ച് കാറോടിച്ചു, 3 വാഹനങ്ങളിൽ ഇടിച്ചു; യൂട്യൂബർ അശ്വന്ത് കോക്ക് കസ്റ്റഡിയിൽ

എസി, ടിവി, വാഷിംഗ് മെഷിന്‍ എല്ലാത്തിനും വില കൂടും; ഒക്ടോബര്‍ 1 മുതല്‍ പുതിയ വില.

പോലീസ് ക്ലിയറൻസ് സർട്ടിഫിക്കറ്റ് (NIOC) വേണോ? ഇതിനായി പോലീസ് സ്റ്റേഷനിൽ നേരിട്ട് പോകേണ്ട ആവശ്യമില്ല.

Recent Comments

EDITOR PICKS

ഡല്‍ഹിയിലെ പീഡന പരമ്പര; സ്വമേധയാ ഹര്‍ജി ഫയലില്‍ സ്വീകരിച്ച് സുപ്രീംകോടതി

മദ്യപിച്ച് കാറോടിച്ചു, 3 വാഹനങ്ങളിൽ ഇടിച്ചു; യൂട്യൂബർ അശ്വന്ത് കോക്ക് കസ്റ്റഡിയിൽ

എസി, ടിവി, വാഷിംഗ് മെഷിന്‍ എല്ലാത്തിനും വില കൂടും; ഒക്ടോബര്‍ 1 മുതല്‍ പുതിയ വില.

POPULAR POSTS

ഡല്‍ഹിയിലെ പീഡന പരമ്പര; സ്വമേധയാ ഹര്‍ജി ഫയലില്‍ സ്വീകരിച്ച് സുപ്രീംകോടതി

ഗ്രാനൈറ്റ് വ്യവസായി ആർ വീരമണി മുഖ്യപ്രതിയായ പോക്ക്‌സോ കേസിൽ പുതിയ പരാതി കൂടി

‘തായ് മാമൻ തങ്കമോതിരം’പദ്ധതിക്ക് തുടക്കമായി

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 23 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂലൈ 23

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************