പോർട്ട് ഓഫ് സ്പെയിൻ: ജോർദാനിൽ ഔദ്യോഗിക സൈനിക ചുമതല നിർവഹിക്കുന്നതിനിടെ കൊല്ലപ്പെട്ട മൂന്ന് അമേരിക്കൻ സൈനികരിൽ ട്രിനിഡാഡ് ആൻഡ് ടൊബാഗോ വംശജയായ സാർജന്റ് ആഞ്ചൽ സാറാ റാംപേഴ്സാഡ് (28) ന്റെ മരണത്തിൽ ട്രിനിഡാഡ് ആൻഡ് ടൊബാഗോ പ്രധാനമന്ത്രി കമല പ്രസാദ്-ബിസ്സേസർ അനുശോചനം രേഖപ്പെടുത്തി.
വിദേശകാര്യ-കാരിക്കോം മന്ത്രാലയം പുറത്തിറക്കിയ പ്രസ്താവനയിൽ, അമേരിക്കൻ സർക്കാരിനും ജനങ്ങൾക്കും, മരണമടഞ്ഞ മൂന്ന് സൈനികരുടെ കുടുംബാംഗങ്ങൾക്കും സഹപ്രവർത്തകർക്കും ട്രിനിഡാഡ് ആൻഡ് ടൊബാഗോ സർക്കാരിന്റെയും ജനങ്ങളുടെയും പേരിൽ പ്രധാനമന്ത്രി അഗാധമായ അനുശോചനം അറിയിച്ചു.
ജർമ്മനിയിലെ ആൻസ്ബാക്ക് ആസ്ഥാനമായ 52-ാം എയർ ഡിഫൻസ് ആർട്ടില്ലറി ബ്രിഗേഡിൽ സേവനമനുഷ്ഠിച്ചിരുന്ന സാർജന്റ് റാംപേഴ്സാഡിന്റെ പിതാവ് ട്രിനിഡാഡ് ആൻഡ് ടൊബാഗോ സ്വദേശിയും മാതാവ് അമേരിക്കൻ പൗരയുമാണ്. അമേരിക്കൻ പതാകയ്ക്ക് കീഴിൽ സേവനമനുഷ്ഠിച്ചിരുന്നെങ്കിലും ട്രിനിഡാഡ് ആൻഡ് ടൊബാഗോയുമായുള്ള പാരമ്പര്യബന്ധം രാജ്യത്തിന് പ്രത്യേക അഭിമാനവും വേദനയും സമ്മാനിക്കുന്നതാണെന്ന് പ്രധാനമന്ത്രി പറഞ്ഞു.
അമേരിക്കൻ അധികൃതർ ന്യൂയോർക്കിലെ ട്രിനിഡാഡ് ആൻഡ് ടൊബാഗോ ആക്ടിംഗ് വൈസ് കോൺസുലേറ്റിനെ ഔദ്യോഗികമായി മരണവിവരം അറിയിച്ചതിനെ തുടർന്ന് വിദേശകാര്യ മന്ത്രി ഷോൺ സോബേഴ്സ് സൈനികയുടെ പിതാവുമായി ബന്ധപ്പെട്ടു അനുശോചനം അറിയിച്ചു. തുടർന്ന് ന്യൂയോർക്കിലെ ട്രിനിഡാഡ് ആൻഡ് ടൊബാഗോ കോൺസുലേറ്റ് ഉദ്യോഗസ്ഥർ കുടുംബത്തെ സന്ദർശിച്ച് രാജ്യത്തിന്റെ അനുശോചനവും പിന്തുണയും അറിയിച്ചു.
രാജ്യസേവനത്തിനായി ജീവൻ സമർപ്പിച്ച സാർജന്റ് റാംപേഴ്സാഡിനെയും മറ്റ് രണ്ട് അമേരിക്കൻ സൈനികരെയും ട്രിനിഡാഡ് ആൻഡ് ടൊബാഗോ ആദരപൂർവം അനുസ്മരിക്കുന്നതായും, അവരുടെ ധീരതയും ത്യാഗവും ഒരിക്കലും മറക്കപ്പെടില്ലെന്നും സർക്കാർ പ്രസ്താവനയിൽ വ്യക്തമാക്കി. കുടുംബാംഗങ്ങൾക്കും സഹപ്രവർത്തകർക്കും അനുശോചനം അറിയിച്ച സർക്കാർ, അവരുടെ ധീരസേവനത്തിന്റെ ഓർമ്മ എന്നും നിലനിൽക്കട്ടെയെന്നും പ്രാർത്ഥിച്ചു.
